創意畫班@第十堂 (3y2m)

今堂做左過三關棋子加底板，底板其實好簡單一張正方形瓦通紙油左綠色，應該係老師幫手畫左井字分隔！Ambrose嘅棋係由輕黏土做成嘅蜘蛛同波板糖，見其他同學仔嘅棋唔一樣，有d係恐龍同其他形狀，即係話人人唔同，係自己揀整咩野！雖然Ambrose整嘅蜘蛛都有少少痴埋哂，但成套棋穴係好可愛！

 

不過由於快要搬家的關係，呢次作品一回家已經pack好左無影到相lur！

Clay Moving Car @ Amos

買野真係一不離二，尋日至買左盒Make
and Play Car Adventure Game，今日又買左呢盒Clay Moving Car！

 

事緣有個朋友仔話俾媽咪聽學畫畫果度有團購訂輕黏土，咁睇張list個價錢又好似真係平d咁，但一張order要買十包，媽咪就有d保留喇！媽咪又諗起之前都買過呢隻牌子嘅輕黏土都未試玩，都唔知係咪真係唔痴手，所以一買要十包真係好risky！但媽咪又諗住團購應該平d，唔趁平買好似走寶喇！反正之前都有諗過唔好成日買白色溝色，因為有時想整實色好似紅色咁，白色又整唔到，成日都焗限左整粉色，所以之前已諗住買多幾隻色！於是媽咪見有團購，就好想知究竟平時在書店賣開幾多錢！媽咪今日收工就去左大眾度格價，發現大眾賣一包$17.5，團購只係$15，不過有會員咭，文儀用品有九折，折左只係$15.8，咁其實團購都唔係平好多，仲要買十包咁多，咁不如買貴幾毫子响大眾買，要幾多就買幾多算啦！

 

本來睇完就走，但見黏土隔離又有一盒盒嘅野，係黏土手工套裝！之前响團購張單度都好似見有呢d手工set，於是又忍唔住睇吓囉，一攞上手睇，又覺得幾好咁，又係有車碌，可以用黏土整架車出黎玩，正！望吓價錢，只係$38，折左只係$34.2，好平呀！再開番張團購單出黎對，發現團購要$45，咪即係仲貴？！咁都得？！

 

於是媽咪見咁平，又忍唔住買左一盒俾Ambrose！不過返屋企時至醒起，之前買左一盒Crayola又係用輕黏土整車仔 嘅set，整都未整囉！哈哈！

Make and Play Car Adventure Game

好耐都無買過玩具教具俾Ambrose了！大概因為就快要搬屋，望一望要收拾嘅物件，至發現原來媽咪已經”買定”太多玩具教具同workbooks俾Ambrose，而現實生活中，每日放工返屋企後又鮮有攞出黎同佢玩或教佢，所以媽咪開始覺得買野，可能某程度上係有少少上癮，多過實際需要！就係咁，媽咪已經有好幾個月無買野俾Ambrose，以免堆積如山！

 

今日lunch一個人食飯，無所事事行吓公司樓下嘅玩具店，媽咪發現左呢盒Make and Play Car Adventure Game ，好似幾好咁！盒入面有車嘅模同車碌，用石膏粉可以整三架車出黎，應該好似係之前媽咪同Ambrose做過嘅Make a Buggy車車咁，倒模完乾左就自行上色！真係太好喇，自從上次整左一架之後，發覺好好玩，但都唔見有得賣喇！呢盒可以一次過整三架車，整完之後就用呢三架車玩game，真係唔錯！所以媽咪忍唔住放低$95買佢返屋企了！

一次過滿足三個願望之放電半天遊 (3y2m)

好耐都無同表姐們去玩喇，有時候Ambrose都會話想搵表姐玩，好似真係好掛住佢地咁！趁今日爹爹同姑丈都放假，就約埋一齊去玩！呢排忙新屋嘅野都少同Ambrose去踩單車，諗住趁今日帶幾個嘩鬼一齊去大尾篤踩單車，但姑姐就介紹左一個好地方俾我地，近近地唔使去咁遠，又有個遊樂場，又無咩人，可以踩單車，行落少少仲有個沙灘仔，d沙仲幼過黃金泳灘喎，咁小朋友去一個地方就可以一次過滿足三個願望喇！

 

準備好哂食物，一去到，Ambrose已經好心急要踩單車，不過都係叫左佢去食野先。食完野，兩個表姐衝左去遊樂場玩，但Ambrose就衝去踩單車！佢發現左條唔係好斜嘅斜路，就响果度踩黎踩去，又扮向後泊車，又扮”嘟”防盜，真係幾搞笑！踩完一輪單車，佢至衝埋去遊樂場玩！

 

玩完一輪，見已經四點喇，都係提議盡早行去沙灘玩一陣！雖然呢個天氣去沙灘玩好似涼左少少，不過又未至於好凍，都ok嘅！呢度果然真係無咩人，沙灘上只有我地一堆人，係耐唔時有d狗行黎行去！話就話玩沙，其實Ambrose同二表姐一樣都只係不斷挖d沙落個桶度，滿左又走去倒左佢，無架喇！哈哈！

 

玩左一陣，Ambrose响沙灘行吓行吓時發玩有d樹枝，佢執起左不知幾開心！係咁當magic wand係咁fing，之後又俾佢執到枝好長嘅樹枝，佢又執起黎當柺仗係咁一路行一路篤落d沙度，超開心咁！之後姑姐仲幫佢加工，將枝長樹枝整成一把劍咁，Ambrose不知幾鍾意，係咁玩！到要走嘅時候，佢係都想攞埋把劍走，氹左佢好耐佢至依依不捨放低把劍！

 

為左將身上腳上嘅沙都盡量fing甩先至回家，大家又再去遊樂場玩多陣！Ambrose又係一個箭步走去踩單車，原來佢至愛都係踩單車，哈哈！即使之後佢有去遊樂場玩，佢都係直奔去遊戲架上嘅軑盤度扮揸車，又叫人上佢架巴士，真係服左佢！

 

咁樣一玩就幾個鐘喇，都係時候執野回家再預備去食晚餐了！呢度果然係一個好地方，只是，如果無車，只得媽咪同Ambrose的話，應該都黎唔到，因為呢度連車都無架，截的士睇怕都係入左黎走果時都無車走架喇，唯有等爹爹放工先至黎玩啦！

創意畫班@第九堂 (3y2m)

今堂畫呢個人，真係有少少古怪！細看至估到，其實係粵劇果d藝人！咁深，唔知有無對住相黎畫嘅呢？

Home Art Jamming@粉彩+水彩畫(3y2m)

今個星期六爹爹要返工，媽咪懶得郁，唔想周圍去，即使去咁近嘅婆婆家都懶，所以決定同

Ambrose 兩個人留在家中好了！

 

可能呢排有同Ambrose玩水彩，佢而家周不時都要求畫水彩畫。媽咪見反正留在家中，咁不如玩多少少，玩埋粉彩，等佢好似畫班咁畫完油水彩，始終Ambrose揸顏色筆畫野係好過用水彩畫筆，而且媽咪一直都唔太想Ambrose在地下畫水彩，好似唔多就手，所以今次索性來個新嘗試，睇吓可唔可以set好d地方俾佢畫水彩畫！

 

首先攞左張檯出黎，因為媽咪諗住佢一路畫媽咪一路在廚房整晚餐！但發覺原來畫紙好大張，擺上檯後，檯面已經無位放顏色，所以又拉黎Ambrose嘅high chair放顏色，都ok啦！

 

見最近同Ambrose玩多左水彩，次次都用kid paints唔加水，但如果用粉彩畫畫，咁水彩一定要加水先至無咁杰同實色，所以媽咪終於攞埋之前買落嘅paint
cups出黎，諗住開左一次都可以玩多幾次方便d！

 

今次Ambrose又係畫車，最搞笑係佢畫完橙色，再响車上用藍色再畫左一舊野，媽咪問佢係咩黎，佢話係巴士上層！哈哈！雖然雙層巴士其實唔應該咁畫，不過媽咪都好佩服佢嘅創意！Ambrose其實有得畫畫都幾專心，媽咪可以放心响廚房洗菜整晚飯。到媽咪出黎時，見到Ambrose已經畫好哂，差在未油水彩，最令媽咪意外嘅，就係佢畫左一枝紅綠燈同埋馬路，紅綠燈嘅顏色都畫啱位，真係叻仔！

 

Ambrose第二幅係畫火車，見火車有面，媽咪問佢係咩火車，佢話係Thomas，哈哈，咁又唔多似！佢仲畫埋火箭，但畫畫吓又走左去畫魚同蟹，真係幾天馬行空，唔知係咪好鍾意自己幅比賽畫，所以又想畫多一次，哈哈！不過媽咪唔係老師，又無時間同天份教佢同指點佢畫，都係由佢自由創作好了！

 

最後一幅其實係食完晚飯再畫嘅，係Ambrose不斷要求繼續畫，但明顯地佢已經無咩心機畫，有時仲叫媽咪幫佢油，所以媽咪都係見好就收，幫手一齊油埋個底色就收工！有時候媽咪都恨自己藝術天份咁差，Ambrose成日叫媽咪教佢畫呢樣果樣媽咪都係唔識，真係令佢好失望！本來Ambrose叫媽咪教佢畫青蛙，媽咪都唔識，所以結果青蛙個身體都係圓形，係唔似，Ambrose應該都覺得唔多似，自己畫完望左一陣都好似唔太滿意咁，哈哈！

車上幾條線其實係彩虹!

創意畫班@比賽班第三堂(3y2m)

 

今堂爹爹媽咪一齊接Ambrose放學，在這之前，爹爹曾經見過上堂比賽班幅畫嘅進度，已經讚好靚，今日係最後一堂，幅畫要完成了，爹爹媽咪都好想知最後係咩樣！

 

一放學就見Ambrose攞住幅畫行出黎，真係估唔到，幅畫可以咁靚！成幅畫構圖都幾豐富，顏色又好colorful，真係好難想像係Ambrose畫嘅！比賽班有老師金精火眼睇住同指導，果然同平時嘅畫班有唔同！

 

媽咪覺得幅畫上嘅水彩略嫌花左d，好似好亂咁！不過就係咁先證明係Ambrose自己畫囉，哈哈！因為未放學時已見Ambrose揸住枝畫筆了了吓咁，開頭都唔知佢做咩，係見到佢幅畫之後就知佢了緊果d藍色紫色喇！查實都唔知係咩黎，哈哈！其實再近睇，上次話油到黑色一pat果d地方都無點修補過，只係油左水彩之後已經變得唔覺眼！

 

因於老師話幅畫交去比賽之後唔會攞得返，爹爹媽咪都好唔捨得，係咁用手機狂影！不過效果麻麻！爹爹見幅畫未咁快交去比賽，就話過兩日攞埋部單鏡機去影番留底用，老師都笑爹爹媽咪咁誇張！無法啦！Ambrose每幅作品都好珍貴架麻，更何況呢幅係佢人生第一幅嘅比賽畫，又攞唔返，咁一定要影好d靚d啦！

 

臨走，Ambrose都想好似平時咁攞返自己幅畫，大家都好依依不捨呢！

Home Art Jamming@企鵝與小女孩 (3y2m)

應承左Ambrose俾佢玩水彩，但平日夜晚已經好少開壇玩水彩咁大陣象，但爹爹已應承左，唔可以唔守信，所以點都要俾佢玩一陣！

 

一開始Ambrose畫左一塊面唔知係咩黎，之後佢話係企鵝，其實唔講唔知係企鵝，但講左又覺得有少少似咁啦！但畫畫吓佢又同企鵝加對角，同埋戴帽，都幾九唔搭八！哈哈！

 

之後Ambrose又話要畫小女孩，今次佢就畫得有板有眼少少，識得畫長頭髮之餘，竟然識得畫個蝴蝶結俾個人仔，好叻呀！之後佢仲畫太陽，再話畫飛機！雖然架飛機畫得唔多靚，見佢一路畫機翼下面兩pat紅色，仲諗佢唔知搞咩，點知佢話係引擎，又真係啱架喎，媽咪好意外Ambrose竟然有咁好嘅觀察力！最後佢話要畫d草草，大功告成！

創意畫班@第八堂 (3y2m)

今堂整sushi，好可愛耶～～～

 

今次應該係紙黏土，因為都幾重吓！中間果舊媽咪覺得係蝦壽司，不過Ambrose話係蟹柳壽司，哈哈！

 

你是我最好的朋友@大細路劇團(3y2m)

今晚又約左Ellen姨姨同浠浠一齊睇劇，其實買飛時都唔知個劇係以咩形式進行，大概只係知講朋友嘅，見係for三歲以上小朋友，所以都無特別理內容形式係點喇！

 

食完晚飯就入場，由於係不設劃位嘅劇，媽咪都唔敢太遲去，驚要排隊！一入會場，發現無台，套劇係响平地演出，大會將坐位刻意做左幾個levels，令前後觀眾有唔同高度之別！不過其實最前坐位只係用cushion放在地下俾小朋友坐，之後果一排係矮櫈仔，再後一排係高少少嘅矮櫈，最後就係普通有背板嘅櫈，幾種櫈實際高度唔係差得太多！由於Ellen姨姨剛剛懷孕，所以為左唔好太辛苦，一行四人都係坐最後排嘅普通櫈，但坐吓坐吓前面又有人坐，即使Ambrose同浠浠已經坐响大人大脾，仍然會被前排遮住視線！最後，一行四人又搬到去第二排嘅矮櫈仔坐，睇得清楚d，不過就辛苦少少！

 

個劇係以真人演出，大意都係圍繞講咩叫做好朋友，無朋友會點，父母可以點幫小朋友建立自信交朋友。講真，唔可以話個劇唔好嘅，內容其實都可以，不過好多對白、解釋，對於三歲嘅小朋友黎講，似乎有d複雜同抽象，媽咪相信Ambrose同浠浠都唔太明白究竟做咩事！Ambrose更成日望住出面個大公仔對眼嘅顏色轉變，成日話媽咪點解而家係咩色？點解而家又係咩色？仲有就係佢見到演員戴左好誇張假髮原來可以攞起，佢就以為人地果頂係帽，嘩哈哈！由於套劇可能好深，Ambrose出乎意料之外好專心咁睇，中間無咩點問媽咪問題，平時如果同佢睇show睇劇，佢簡直係問足全程！呢套劇，最低年齡應該set番去四、五歲啦！

 

好辛苦先睇完套劇，原來仲有一part親子共讀嘅分享，顧問仲親自講左本繪本俾大家聽，當中佢不時反問小朋友問題，考吓佢地對本繪本嘅觀察力，但其實媽咪最大嘅問題就係每當同Ambrose講故事，每次都係當媽咪未講完一頁，佢已經睇住d公仔問呢樣問果樣，有時仲會越問越遠，成日都好似好難至講得完一本故事咁，即使講完一本，感覺上成個故事已經斷開哂咁濟，都唔知佢究竟聽到幾多？又聽得明幾多？真係唔好話反問佢，係佢勁問媽咪好多好細微嘅野就真！呢個問題媽咪都唔知點解決，究竟應該任佢問定係點都堅持講埋落去至可以問呢？

 

Anyway，分享完結後係無Q&A環節，本來可以排隊影相，不過坐左個幾鐘矮櫈仔真係好攰，一行四人都無等影相就走左喇！出到門口，原來有個小小壁報板，貼有呢個劇嘅演出相片，叫左Ambrose同浠浠行埋去影吓相留念，點知Ambrose全程用個背部對住鏡頭擺pose，真係服左佢呀！