7 week 5 day (adjusted)

今日做第一次私家產檢，因為前幾日好突然入左急症室兼且照過有心跳，所以心情都唔太緊張。同醫生講左前幾日嘅情況，醫生就同我照肚。可能今次係照肚，所以未聽到心跳，老公無得聽！醫生話小b都ok，不過都見到好多隙，即係話個胎囊未係stick得好實，都係要小心喎！好彩都放長假，可以瞓晏d，抖多d！

 

本身d人都會四星期檢查一次，不過我都太唔stable，醫生要我兩星期返去覆診，唸住慳d都唔得，無法啦！

6 week 6 day

都唔知點解食野差左好多，只不過係6 week，除左早餐同平時差唔多之外，其餘時間都好飽濟，lunch好勉強食到正常，夜晚幾乎係食唔落，食得好少！其實都唔想同同事一齊食，因為我都食唔到飯，只係粉麵係ok，食黎食去都係果一兩間，我又食得勁慢，真係唔好意思要佢地就我！重要呢排成日瞓得好差，成晚要起身去厠所，同埋成日瞓幾個鐘就醒左瞓唔返！兩點幾又有，三點幾又有，四點幾又有，總之就瞓得好差，幾乎七點幾要起身返工嘅時候先至開始瞓到，好辛苦！所以有時心情好down！

 

今日收工時去洗手間，見啡呀！之前醫生都有講過見紅見啡肚痛超過兩日先要睇醫生，我成日都肚痛，都係啱啱見啡，睇定d先！咁我就走去搭車返屋企，見到老公嘅時候同佢講左，佢就話不如睇醫生，我話咁夜都無得睇，何況屯門都無專科睇，佢話睇普通科喎！我唸住過幾日就有得做第一次產檢，如果無再見啡就等到果日先算！點知返到屋企去洗手間，見重有，老公同奶奶講，大家都唔知點好，老公越唸越緊張，勁要我去睇醫生，後尾check左睇開果個普通科收八點，我地飯都唔食就仆出去睇嘞！入到醫生房，講完d情況俾佢知，佢即刻反問我地，咁你地重等咩？唔快d去急症室嘅？我同老公都呆左一呆，醫生即刻寫紙俾我地入急症，希望唔使等太耐喎！

 

去到急症室登記分流，真係好快叫左入去，不過原來入到去都重要等叫名。大概等左一個鐘，就到我嘞，醫生問左陣，就話要照一照，咁又去左第二間房，但老公就唔可以入埋黎睇。醫生一照，嘩左一聲，我心都沉埋，唔知佢見到d咩有咁嘅反應。睇左一陣，佢先講話我個B望落唔止6 week咁細，差唔多有8 week喎，原來佢嘩左果一聲係驚訝個B俾佢計出來大而唔係有咩唔妥。之後佢俾我聽左一陣心跳聲，我問佢係我定呀B嘅心跳，醫生話我無儀器聽你心跳喎，呢個係你呀B嘅心跳，我忍住唔好抖氣，聽到d心跳“伏伏”聲，好似喺海度浮沉咁，好攪笑！之後落番床，醫生忽然叫埋老公過來，就話佢望落無咩野，不過我周數都好細，好多時流產都係响12 week前會發生，我肚痛同見啡，呢d就叫先兆性流產，如果真係流產，都無咩可以做，因為係個胎本身嘅問題喎！佢跟住就話佢覺得我無咩野，但係因為我肚痛，佢建議我食止痛藥然後留响度俾佢地觀察，我地問咁要觀察幾耐，佢話個幾鐘，到時唔止痛就要留院。本身我都放心左，但我聽完佢講話留院，我又驚過，傻左望住老公，老公問佢我地可唔可以返屋企休息，真係再痛先返黎入院，佢話唔係唔得，不過要由頭等過，我地唸左陣，都係返屋企，唔想响度等，有事要過返黎都唔遠，touchwood真係要重新等過，我呢d係急症，都唔會等得太耐，唔似平時咁等幾個鐘。醫生好好人咁寫左幾日假我返屋企休息，咁我就因為咁無端端提早放年假，一連十二日咁長呀！

 

返到屋企食左藥，無咁痛，重有少少啦，不過都好過之前架嘞！

6 week 3day

尋晚真係好累，企左成晚，不過同事好好，完左function要執野，個個都叫我坐低休息吓！

 

我真係好累，今日差唔多瞓左成日呀！

6 week

之前見Ellen Law話初初有左嘅時候無咩胃口，重累到死！我都唔係好信，點知轉頭到我係咁，重要係只不過踏入6week就咁，好似早左d喎！十六號公司有卡拉OK比賽，雖然通知左上司，應該唔會要我搬搬抬抬，但係始終係我地部門負責搞嘅，都唔會有得坐，成晚都要企，都唔知點算好！

4 week 6 day

忐忑左幾日，今日走左去第二個醫生驗多次！一入醫生房，佢就話我有左喎，之後重自動波寫紙俾我排健康院，我個心都安欒d！早知一早就睇佢啦！

 

而家就等7或者8week睇婦產科，forum d人話太早睇都照唔到BB心跳，為左唔好“嘥”錢但又想過年前睇左安心d，我就唸住放假前照一次先，不過之前無咩做過research邊個醫生好，都無咩idea，d人又話咁早唔好同人講，怕BB小氣，我地又唔識，最終我都係同左Ellen Law講，佢早我兩個月，我就有人可以跟吓交流吓！另外因為怕食錯野，老公就同奶奶講左，咁大家叫做放心d！

4 week 1day

今日即刻走去醫生度驗孕，唸住攞埋醫生證明交俾公司，點知醫生同我講“你應該有左”，因為醫生嘅tester嘅“＋”比較淺色，所以呢個醫生好保守咁講“應該”，佢都無唸住俾咩我，係我問佢攞懷孕證明，因為forum嘅人都話驗到通常醫生就自動會俾，唔係我使咩俾錢佢驗喎，自己都驗到啦！個醫生話佢唔會俾咩證明，因為預產期遲d睇專科醫生會俾，佢話佢會俾番個report我，我咪唸住ok啦！點知姑娘俾份咩野我？原來只係寫住“The pregnancy test for the captioned patient: positive (weakly)”，睇完之後都嬲爆，咁都叫report，咁簡單！重要括住weakly，咁即係點呀，同我無睇佢之前都無分別嘅！

 

我地唯有唸我地太早驗，係咁架嘞，forum嘅人都有講過太早驗會淺色d！不過因為聖誕果排唔知有左，重飲過酒，咁我又驚驚地囉！