以往新年由年三十去到初三都好忙，日日都要出街食飯拜年，今年新年帶住Ambrose真係忙上加忙！我哋一出動就好似要搬屋咁，大袋細袋，無計啦，Ambrose都重有吐奶情況，所以出親街都要帶定多少少口水肩、紗巾同替換衣服。忙左咁多日之後又要返工真係好累，Ambrose今個新年嘅表現都算幾好，起碼見到d咁少見嘅親戚都無點扭計喊過，係太八掛成日都唔瞓又眼瞓到暈嘅時候就唔鍾意人哄佢同會扭計之外，比上次去婆婆屋企食飯喊到拆天收唔到聲，要老公拿拿林抱返俾麻麻湊，真係有進步！
Ambrose嘅生活隨住假期結束又回歸正常，之前都有聽到佢似咳非咳嘅聲，麻麻話佢扮咳，我就覺得六個月人仔邊會識扮架，不過諗住佢又唔似係真咳，以為佢係鼻水倒流要清喉嚨嘅聲，所以不以為意，去到年初六就見Ambrose有鼻水，諗住趁佢唔太嚴重，初七一早同佢睇醫生，醫生話Ambrose少少傷風，開左咳水同收鼻水藥俾佢，返到屋企餵左藥“暗”瞓。初七下午莊友約左黎我屋企拜年，黎之前响附近飲茶先，因為要“暗”Ambrose瞓，老公就自己留响屋企等我同莊友飲茶。約左三點鐘飲茶，係有少少遲嘅，酒樓好似三點幾四點落場，所以我book位時人哋都話咁晏嘅．．．．．殊不知約得晏都會有人遲到，哈哈，真係慣例，一早都話想三點嘅話就要約二點半！飲完茶返到屋企就見老公抱住Ambrose，佢話Ambrose瞓左一陣，咁都好d！Ambrose食左藥比較“吽”，唔係幾笑，不過咁多人同佢玩佢又無扭計喎！好叻！呢個仔都係爛玩，有得玩就連食左藥咁累都唔願瞓！夜晚時間到老公d朋友黎拜年，Ambrose一路都唔瞓，又要人抱，佢而家都有廿磅，係咁抱住都好金，就連老公都話累！平時有人黎探b，我哋會舒服d，因為個個會爭住抱，不過今晚d朋友自己都有小朋友，一唔係就係單身男無咩意慾抱，所以我哋都好想快d完左個party休息吓！Ambrose一直都唔肯瞓我哋見佢咁累又唔瞓都好擔心，病就要瞓多d先好架麻！班朋友又唔知點解玩到唔捨得走，明明之前暗裡同其中一個講左十二點散場，佢哋竟然唔散，一直玩到兩、三點，我同老公都就快崩潰喇！
Ambrose成三點先倦極瞓左，我哋先叫可以休息吓！呀仔瞓左無耐我入房睇佢，發現老公怕佢凍親同佢又睡袋又厚被，關左窗但又開暖風機，間房都異常暖！我去摸吓呀仔有無出汗，點知佢無出汗但幾熱吓，我即刻同佢探熱，37.8，睇返個表，耳探37.8即係啱啱發燒！Ambrose第一次發燒，我都唔知點攪，又攞返健康院本書仔睇，原來要開窗等空氣流通，著棉質衫可透氣及吸汗！我即時開窗同關暖風，想同佢換衫又驚一時間著少左又開哂窗會冷親，都係等一陣睇吓會唔會好d。過左十分鐘佢都重燒緊，想話同佢食退燒藥，d朋友又話唔使住，咁我同佢換過d薄衫，放响大床噤我哋嘅羽絨被，老公開左少少風扇，過左一陣去睇佢，點知佢無啦啦嘔奶，佢係瞓平响床度好似嘖泉咁嘔左兩三吓大大啖，成床都濕哂，d奶多到佢個窩枕中間凹左嘅部份都浸左奶，我目擊全程，登時嚇到我唔知點算，Ambrose就係咁嘔醒左！我哋手忙腳亂又換衫又清潔，班友仔可能唔知我哋咁狼狽，佢哋有佢哋玩，我哋就忙住照顧個仔，個心又煩又亂，好想叫佢哋快d走！成四點先settle down個仔同送走d人，終於都可以休息吓喇！Ambrose都開始退燒！我哋累到連張床單拆左出黎之後都無整番，重要將濕果面嘅墊裖反轉就咁就瞓！
Ambrose可能都極累，第二日都無喊食奶，都係我七點幾紮醒驚佢肚空空先捉佢食奶。唔知點解Ambrose好似未睇醫生之前都還好d，睇完食左藥就差左咁，發燒之外，餐餐奶都嘔，一嘔重要係半枝至一枝奶嘔番出黎，好可憐！都唔知有幾多奶奶飲到，同埋d藥就好似食左等於無食咁，佢d鼻水鼻涕無收過，一包70張嘅濕紙巾一日就用哂，咳又咳到嘔，佢每次咳完都會喊，真係陰公！初八呢日係呀公生日，我哋都無出到去食飯，全日留响屋企湊仔！兩個人湊住都無停過！夜晚餐飯叫左外賣，成九點幾先有少少時間食，點知Ambrose一咳又嘔奶，我哋又要攪清潔換衫抺地，見到Ambrose又咳又嘔隻眼仔又紅又眼淚汪汪咁，我忍唔住喊左出黎！Ambrose好安靜咁望住我，佢好似諗緊野咁，我都唔想俾佢見到我喊，費時佢驚，所以都係走左去抺地！其實我都覺得bb係feel到大人嘅情緒，有一次Ambrose嘔奶，我响房聽到d奶嘔落地下嘅聲就衝左出去睇佢，可能我好驚咁叫左一聲，佢一見到我好驚咁衝左出黎，呆左兩秒，之後就大喊，我覺得如果我唔衝出去佢未必會喊，佢明顯見到我之後先喊，可能我嘅舉動嚇親佢！都試過幾次類似嘅情形，所以我之後儘量減少驚慌嘅反應同表情，要扮到若無其事咁！清理完之後老公抱住Ambrose，咁啱我去雪櫃攞野，為左緩和氣氛，我就同Ambrose玩peekaboo，佢平時一玩呢個都好開心，笑到咯咯聲，佢病左之後都無咩笑過，我都係諗住氹吓佢，點知佢又識笑，笑到好開心咁，真係估唔到！事後老公同我講個仔孝順我，知我喊所以病住都氹番我開心，笑番黎氹我喎！我唔知Ambrose係咪真係識氹我，不過如果佢真係識feel大人嘅情緒嘅話，我哋就更加要小心唔好俾太多negative嘅野佢見到，我真係要記住！
原本Ambrose初九要去打半歲針，我都一早攞左假同佢去，不過佢病左就唔打得針，我都無銷假。一早重要幫Ambrose排隊掛號，睇開個醫生終於都放完假！睇完醫生，好辛苦餵完藥，Ambrose依然都係嘔！見佢d片片唔多尿，佢又無胃口，奶奶又食唔哂，食左又嘔番出黎，驚佢嘔到脫水同埋諗住病左飲多d水，俾水佢又唔肯飲，用針筒餵同食藥一樣咁嚎哭，至慘佢把聲都沙哂，嚎哭都出唔到聲咁濟，好慘！黃昏時候奶奶同Ambrose沖完涼諗住同佢著羊毛底衫，我話唔好，驚佢熱得濟發燒，奶奶好無奈係咁話凍，咁我覺得寧願著薄少少，唔夠先on top加衫或被，好過著哂响入面！佢無奈接受完之後就抱Ambrose瞓，之後重同佢噤晨褸同被，包到厚厚咁！我都唔想下下反對佢嘅做法，唯有等多一陣先攞開張被，點知我諗住攞開張被嘅時候，心血來潮同佢量吓體溫，今次係39度，都叫高燒，之前都係37點幾38度左右，今次39.2，我真係驚！即刻衝去同奶奶講，都唔理佢講緊電話，佢都即刻收線幫我餵藥，Ambrose其實一直瞓緊，無啦啦俾我哋捉起身食退燒藥，又喊，勁可憐！餵完藥好彩都唔使“暗”好耐就瞓番，佢都應該好辛苦先至會咁！奶奶仍然同佢噤好多被，我唔想啦，因為我之前聽人講bb發燒唔怕凍，要同佢降溫散熱，可以同佢抺身，甚至沖個暖水浴，之前就係噤好多被又開暖風機先會發燒，所以我感覺噤咁多野係唔妥當，但我又好難同奶奶講話抺身沖涼，佢一定反對，平時佢同Ambrose沖涼都快手快腳係咁易，成日都驚凍親，而家病左就更加唔會俾我同佢沖涼降溫啦！我打俾醫生問佢點算，因為Ambrose係咁嘔，我哋就算餵左藥佢又嘔好似起唔到作用咁，而家重要發埋燒，我驚佢遲少少一抱起又嘔番d退燒藥出黎，醫生就叫我觀察一兩個鐘先，如果唔退燒同覺得佢好辛苦就送醫院喎！呢個時侯好彩老公返黎，我即刻話佢知個仔發燒，望一望果d被，佢已經話唔好噤咁多，奶奶又係話凍呀凍呀，我哋只係成功攞開張被，想除多件衫同開窗都唔得！七點幾連老爺都黎左，佢今次有史以來講左d有建設性同啱聽嘅說話，佢話小朋友發燒唔怕凍唔使同佢著咁多，可能响我哋咁講同老公嘅堅持之下，最終我哋又同佢除左件背心同開大個窗，過左一排之後，唔知係邊樣野work，Ambrose已經退番燒，有驚無險！呢一日我自己都好感慨，個仔係自己嘅，想同佢噤少張被除件衫都控制唔到，如果沖完涼之後我堅持唔使噤咁多被嘅話，可能Ambrose就唔會發燒，我只係堅持左唔著羊毛底衫，究竟我呢個咁軟弱嘅呀媽幾時先可以有勇氣同有自己嘅堅持呢？我覺得响Ambrose嘅漫漫長路裡面，我真係要學識voice out同堅持先可以好好咁保護佢，我要堅強！
Ambrose最後足足病左個幾禮拜，鼻水叫做收左之後d咳都唔清，我同佢轉食猴“早”散，唔知點解奶奶好似唔係好想幫我餵Ambrose食咁，日間唔餵架，等到我返去發覺Ambrose未食藥，佢等我出手咁，我想同Ambrose斷埋d咳，唔想佢咳咁耐，對氣管唔好，所以就算佢喊都一定餵藥！
經此一役，Ambrose瘦左，塊面果兩舊肉仔都細哂，以前响後面都見到佢兩舊肉架，連朝早湊佢個姨姨成十幾日無見佢都話佢瘦左，最後果次同佢睇醫生磅重得番十九磅，真係輕左！不過Ambrose不嬲都ok重，輕少少都唔緊要嘅！最緊要係佢快d識笑番就好喇！
