除夕夜，爹爹要返夜，得番我同Ambrose唔知做咩好！奶奶話不如去姑仔度叫party set食，細路又可以一齊玩，倒數同過夜。聽落好似都唔錯咁，反正無野做，之前Ambrose都試過在表姐家過夜都無問題，咁咪即管俾d細路一齊玩吓顛吓啦！
滿心期待呢次宿營係好好玩，原來係一個惡夢！去到食完野之後，佢地竟然開台打牌，我唔想俾Ambrose睇到我打牌，所以戒左好耐喇！我唯有睇住d細路玩啦！點知班細路入房玩玩吓，大表姐要睇dvd，因為間房好細，坐响床度睇dvd好近，見到幾個細路睇到定哂感覺真係唔係幾好，加上我地一直除左睇dwe碟之外都盡量唔開電視，Ambrose都叫無電視癮，咁樣無啦啦睇dvd，我驚佢會愛上睇電視，不過無計啦，大表姐要睇都要一齊陪佢啦！响房玩同睇dvd期間係完全無人理我地，得個工人一齊睇住d細路，其實我prefer互動多d，我之所以黎都係想Ambrose同佢地玩吓顛吓而唔係睇電視囉！
之後二表姐去左瞓覺，得番Ambrose同大表姐，其實Ambrose都夠鐘瞓覺，不過出面d人都無理過我地，無安排點瞓，無被舖，我見時間都重可以，都無即時要Ambrose瞓！睇多陣，我終於忍唔住出去沖奶公告天下我地要瞓喇，仍然係無人安排瞓覺嘅野，唔理咁多喇，入左房關門就算！點知Ambrose唔知點解唔飲奶，成枝原封不動，佢唔飲奶我就頭痕喇，唔知佢點瞓好！本身間房已經係二尺半子母床，平時Ambrose要瞓在大人床上自己典撻吓先瞓得著，但係而家張床二尺半，佢一典就典落去下面張床，好危險！另外，間房無細燈，熄左燈後係無光源，伸手不見五指，我都睇唔到Ambrose，但開燈佢又唔知道要瞓咁，都唔知點整佢瞓，出面又鬼咁嘈！我响房又氹又“暗”Ambrose，攪左成大半個鐘都唔得，成十一點幾喇，忍唔住打俾爹爹投訴，結果爹爹叫我返屋企瞓！
左諗右諗加左試右試，最後我都係出左房叫姑仔幫手call的士，佢地呢個時候先有反應問點解要走，我話呀仔瞓唔到，又唔飲奶，好嘈，佢好眼瞓又無得瞓等等，其實我心諗我返屋企張床都大d舒服d啦，使鬼响度迫同俾你地嘈到無得瞓丫！奶奶又話我返去佢都要走，我都唔明，我自己返去都可以handle到，我已經話唔使佢陪我，佢又好堅持，攪到我好似好掃佢地興咁，真係超無奈！真係好後悔應承左黎！之後姑爺話車我地返去，但一出聲就聽到出面青山公路塞車響安聲，佢地即刻話出面塞車，要返去都要塞一排，佢話不如俾佢試吓氹佢瞓啦！我見佢咁講，咪俾佢試吓囉！
姑爺二話不說同Ambrose又入返房，我留左响廳度睇大表姐同隔離屋d大細路玩wii，佢一路玩又一路哄埋個電視度，打緊牌果d大人又不停叫佢退後 d玩，其實又邊會聽到丫！我睇住全部人，真係超級後悔同Ambrose黎左！第一，黎到食完野玩左一陣又入房睇電視，無大人理，我差唔多一個睇三個細路都幾辛苦同好悶；第二，我為左Ambrose戒左電視戒打牌，一直都好好，咁樣一黎，睇電視都算喇，我唔係好鍾意佢處於一個咁嘅打牌環境；第三，眼見d大人掛住打牌而大表姐咁夜又唔瞓响度打機，覺得好無秩序，一個小朋友嘅作息真係要好規律，呢個係由細培養嘅習慣，如果將來有一日你話佢唔願瞓，咁呢個責任一定係大人而唔係個細路囉；第四，當節日氣氛好，可以俾細路晏d先瞓，但係打機真係好有保留，其實我係唔buy俾細路仔打機，覺得好無益，同埋佢地又要話佢唔好行咁前，但自己就唔去好好督導，我覺得真係好攪笑囉！就係呢一切，我發誓，我唔會再黎過夜，呢度嘅環境根本唔適合細路！
我曾經好幾次走去細房開門莊吓姑爺同Ambrose做緊d咩，瞓左未，不過次次莊佢地都重係睇緊書，雖然Ambrose已經攰到吽吽地，但係佢又真係好專心咁睇，無周圍爬，成個書蟲咁！過左成個鐘，姑爺出返黎話Ambrose重未瞓，佢同Ambrose睇左成個鐘書，佢自己都攰哂，佢覺得Ambrose好眼瞓，咁我又再試吓沖枝奶同佢瞓，點知佢都係唔飲，成枝無飲過，真係第一次咋！幾經辛苦，成一點鐘左右，Ambrose開始支持唔住瞓著，而我終於可以瞓覺喇！出面亦都係差唔多時候打完牌靜哂，呢個時候大家先發現過哂十二點鐘，唔記得倒數呀！
另一個惡夢開始喇！Ambrose成晚都周身郁，一時碌左一時碌右，我瞓响下面張子母床，成日都驚佢碌碌吓碌左落黎無覺好瞓！再之後佢成日碌都撞到個木床欄，一撞到又喊，一甩左個奶咀又喊，呢度無佢用開嘅睡袋，佢就咁蓋被瞓，我就成晚都要起身去睇佢！最誇嘅係佢可以瞓瞓吓個頭本身向床尾轉左向床頭，我又要跟住同佢一齊轉，以免佢半夜瞓瞓吓開眼莊我見唔到我又喊！
呢一晚，真係好辛苦！本身已經好後悔去左過夜，過左果一晚之後，Ambrose之後幾晚嘅瞓覺時間都推後，由平時十點，响張床碌黎碌去要碌到十二點先瞓得著，我深深覺得玩一晚夜嘅代價實在太大喇，要細路仔作息定時，真係要俾到一個瞓覺嘅環境佢，重要係不斷堅持，持之以恆，真係唔應該因為過時過節就可以放肆！而家一晚嘅放肆換黎幾晚嘅唔規律，我得到教訓喇！
