Ambrose第一次跳舞表演 (3y4m)

一早計劃同Ambrose報跳舞學校嘅小演員班，目的唔係想培養佢跳舞，而係貪圖呢個班有較多演出同埋比賽嘅機會。九月時就已經幫Ambrose報左一期小演員班，一期十四堂，一跳就幾個月，當中同時另報學校嘅芭蕾舞班，如果唔係根本join唔到小演員班。有時d野就係咁，人算不如天算，一直上開興趣班嘅Ambrose轉左過黎新校之後就好扭計，有時更加話唔去跳舞，去到又喊，唔換衫換鞋，真係折磨人！最記得十月嘅時侯小演員班有一個商場表演，媽咪獨自湊Ambrose去，點知又遇著大少唔高興，死都唔願換上果件南瓜衫，之後仲喊哂都唔肯上台，結果果次係企响台邊戇居居睇人跳舞，果一次令到媽咪極度沮喪，好猶豫究竟媽咪有無做錯？自己係咪怪獸家長要勉強個仔去做一d佢唔鍾意嘅野？終於，响果次之後，媽咪決定過埋呢一期小演員班，跳舞都係停一停啦！

果次之後，其實仲有一個跳舞比賽，好可惜，因為撞正搬屋而去唔到！有時，媽咪都覺得，可能同小演員班都無咩緣份，當初千算萬算，好美滿諗到可以有多d表演比賽經驗，到頭來原來唔係一加一等於二咁易。

十一月，就响去意已決嘅時候，跳舞老師有日捉住媽咪講，聖誕節有個大匯演，本來七月時已出通告報名，媽咪九月至轉黎上堂，所以錯過左報名時間，老師話見Ambrose近排已經適應，而且見佢可以跟到，上堂跳足全堂都話唔使休息，所以老師特別邀請媽咪俾Ambrose參加呢個大匯演！媽咪當然開心啦，始終表演機會唔係時時有，每一次都應該好好珍惜，既然老師都話Ambrose已經ready，媽咪當然唔會放過呢個失而復得嘅機會！

表演前一星期左右，爹爹媽咪先至知道原來雖然個表演七點半至開始，而Ambrose表演果隻舞仲要係全個節目嘅中後時段，但原來小朋友都要五點半去到大會堂綵排，而大人在送左小朋友去綵排後，要到成個show完左至可以接返小朋友！一知道呢個安排嘅時候，爹爹媽咪已經好擔心喇！爹爹好擔心，咁多小朋友响後台，又唔係有好多人員睇實，會唔會唔見左個仔？！媽咪好擔心，要Ambrose留响後台咁耐，佢自己識唔識出聲去廁所，識唔識攞袋入面嘅野出黎食？有無人照顧到佢呢？始終當日表演一定會好亂，咁細嘅小朋友一定會被忽略，到時又悶又餓又唔見爹爹媽咪咁耐，唔知Ambrose捱唔捱得住？再加上有之前唔肯上台嘅經驗，媽咪成日都諗，會唔會到佢地出場跳舞果陣，Ambrose又係唔肯出場，搞左成日得個吉？擔心，真係好擔心，如果報名前知道安排係咁，爹爹媽咪未必會報名，安心上完呢期小演員班就算！

錢既然已俾，見巧朗哥哥上年都有參加大匯演，喊完，今年仍然有參加，媽咪放心左少少，但仍已作可能會失望嘅打算！

七點半入場，其實好緊張，唔知老師會唔會突然抱Ambrose出黎話搞唔掂，又或者有其他事故。一直等呀等，直至到Ambrose出場前一隻舞，爹爹嘅緊張已達極點，不斷响媽咪耳邊話好緊張，其實媽咪何嘗唔係？！

終於，小企鵝出場了，由於媽咪手拿攝錄機，一時間搵唔到Ambrose嘅身影，仲一度認錯人，哈哈！好彩，爹爹好快已睇到並話俾媽咪知！佢真係好得意！可能因為等到太耐太攰，連佢平時只會响眼瞓時至出現嘅雙眼皮都走埋出黎！著左企鵝衫又笠住個頭，其實都有d似女仔，哈哈！

雖然Ambrose跳呢隻舞其實真係無咩特別，只係fing吓手，扒响度扮企鵝游水，踮高腳轉身等，但佢全程都有跟住做跟住跳，無發呆怯場，呢一刻真係好感動，比起幾個月前猛拉住媽咪對手唔肯上台嘅佢，又成長左喇！

大匯演成十點至完，接到Ambrose時真係忍唔住要大讚佢一番，而佢第一個反應係，佢好肚餓，哈哈！當然啦，Sarah姨姨為佢準備左盒cereal佢完封不動無食過！真係唔知佢响後台係點渡過！為左獎勵佢咁叻，爹爹話去麥當奴食野。媽咪趁機問Ambrose
，鍾唔鍾意跳舞同表演，佢話鍾意同埋開心，再問咁交錢繼續學好唔好，又話好，唔知係唔係認真嘅呢？！





 

 

創意畫班@第十四堂 ＠23 December 2012 (3y4m)

上一堂老師話個手工要橫誇兩堂至可以做起，所以無野攞返屋企！今堂落堂，竟然見到整左頂聖誕帽！唔好話我知呢個就係要橫誇兩堂嘅手工呀？就咁睇，一堂時間做都有多喎！真係有少少唔明，上呢個綜合班係手工同畫畫間住一星期上架麻，既然上堂話要橫誇兩堂嘅手工，而呢頂帽又唔係果個大手工，咁係咪即係意味仲有第三堂手工埋番果個大手工尾呢？咁幾時先有得畫畫呢？

 

頂帽其實都幾可愛，不過感覺上好簡單，媽咪都係想Ambrose多畫畫囉！

Home Art Jamming @ bear bear 熊(3y4m)

朝早起身出廳，又係見到Ambrose坐响檯仔度畫畫。爹爹媽咪超級驚訝，佢竟然對住個月曆黎畫隻bear bear熊，佢都未試過對住某d公仔學畫畫，今次畫得真係好似，好靚呀！

自製聖誕飾物2012 (3y4m)

無諗住在家整聖誕樹，所以同Ambrose整聖誕咭時，亦順道整埋聖誕飾物，為新屋增添少少節日氣氛！

Harry哥哥的聖誕節(3y4m)

之前去左Harry哥哥的萬聖節，實在好好玩，所以對於Harry哥哥的聖誕節，係更加期待！原本以為自己買嘅位幾後下，但結果雖然唔係前，但亦唔係平時咁後，都睇得幾清楚！

 

一如以往，Harry哥哥都會响音樂會中穿插表現或搞氣氛，但感覺上，今次出黎嘅次數同時間比平時似乎短左少左咁！期望嘅亙動環節，當然又係因為坐得後無得上台一齊玩，Ambrose又問媽咪點解Harry哥哥唔俾佢上去玩！媽咪下次真係要好好考慮買頭幾行嘅飛至得喇！

 

唔知係咪對於個show太期待，加上尋日至睇完兩個幾鐘嘅胡桃夾子，Harry哥哥突然謝幕果刻，媽咪真係有d愕然，點解咁快就完左？媽咪仲好期待會响台前玩一陣，或者應該仲有d表演將個show嘅氣氛帶動得更高，畢竟聖誕節係一個普天同慶嘅節日，總係覺得”爭咁d”！好失落！

 

無好確切在開場時睇過時間，但望下錶，估計番入場以後等左幾耐至開始，減番之後發覺今次個show真係較以往嘅短左少少！之前通常要預起碼個半鐘至出番黎，今次只係一個鐘多少少就走得。

 

總括今次真係無萬聖節咁好玩，好氣氛，不過都無減Ambrose對Harry哥哥嘅愛戴，依然話好好睇，哈哈！雖然話個show咁快完左，從另一個角度諗，媽咪應該好投入個show至會無察覺時間飛逝，應該都係好睇嘅，只係expectation太高啫！連續湊住Ambrose睇兩晚show，都咪話唔攰，早d完就早d可以返屋企啦！

好行為獎勵計劃 (3y4m)

自從去完澳門之後，發現Ambrose原來超愛浸浴缸！新屋就正好有一浴缸，Ambrose更係成日講話想浸浴，媽咪見佢咁渴望，就靈機一動，諗到要佢要有好行為就有貼紙，儲滿三十個貼紙，就可以去浸浴缸喇！Ambrose真係受到浸浴缸嘅誘惑，有時佢做完某d野之後都有問我地佢乖唔乖，真係好搞笑！有時佢又可以好乖，但完全忘記左儲貼紙嘅事，好幾日都無得過貼紙，媽咪見佢無問，都無特登話俾，好衰！

 

今次實行呢個好行為獎勵計劃，最大最大得著就係Ambrose終於可以唔使以salon式洗頭喇！之前佢成日都好怕水入眼或者流到落塊面，所以佢一直唔肯抬高頭或低頭俾人幫佢洗頭髮，成三歲幾嘅佢，洗頭髮時仍然係坐在大人大脾然後好似salon洗頭一樣咁瞓落去，接住佢嘅頭就當然係大人嘅手啦，佢咁大個，真係好重！今次藉住浸浴缸嘅吸引力，媽咪係咁鼓勵佢嘗試企响度抬高頭洗頭髮，將獎勵貼紙加倍兩個咁送，短短幾日，終於成功令Ambrose戒掉salon式洗髮喇，真係好開心！

 

之前佢已經儲滿左三十個貼紙，一直都未安排應得嘅浸浴缸俾佢！見佢尋晚睇完胡桃夾子返屋企途中瞓左無沖涼，今晚夜晚又要去睇show，分分鐘又係回程瞓埋，見下午時間天氣唔係好凍，開埋個浴室寶俾佢浸浴缸，浸完瞓個暖笠笠嘅晏覺至出發睇show，時間真係剛剛好！

 

一聽到可以浸浴缸嘅Ambrose，真係超級開心呀！

自製聖誕咭2012 (3y4m)

仲記得上年一早就開始同Ambrose整聖誕咭送俾朋友仔，由於媽咪無咩天份，用左半個月至整起十幾張咭，真係嘔心瀝血！今年當然怕怕了，加上搬屋嘅關係，十二月頭都仲未送到床黎，好多野都未拆箱未執，大條道理唔整喇！就連學校嘅聖誕飾物比賽，都懶到只係交左一個上畫班咁啱做左嘅一個聖誕吊飾，哈哈！

 

直至某日，Ambrose開始收到同學仔嘅聖誕咭，媽咪諗，係咪應該要回聖誕咭呢？因為Ambrose甚少提及班中同學仔，甚至媽咪攞張相去逐個問佢同學仔叫咩名，佢都答唔出，所以媽咪無諗過要派全班。反正見收到的聖誕咭只是一、兩張，那就不如索性收到的至回咭，一來可以俾Ambrose可以感受下聖誕節，二來起碼收到咭至知人地個名架麻！

 

由於媽咪一向唔太鍾意買聖誕咭，總覺得小朋友咁細個已經唔會識寫聖誕咭，如果張咭就咁買番黎，仲係由家長寫，咁其實又有咩意義呢？媽咪見要回嘅聖誕咭唔係太多，而且原來上年預備左嘅聖誕咭材料還有一、兩張剩，都係決定用埋佢喇！點知剛做起兩張，又諗起要做埋俾老師，同時又開始陸續收到其他同學仔嘅聖誕咭，似乎聖誕咭工作一開始就停不了！上年整聖誕咭其實係好蠢，媽咪要將雪白嘅畫紙印滿顏色，待乾；又要將聖誕公仔嘅stencils 小心奕奕印响咭入面，待乾；再要準備材料俾Ambrose親手製作。最煩係當時無特定咭嘅size，所以最後更要自己做埋信封，真係花左唔少時間！今年學精了，先去找找現成嘅信封，再去買埋A4厚顏色紙，只要再花少少時間製作封面嘅材料俾Ambrose做就搞掂！

 

媽咪決定做雪人，材料其實都好簡單，唔使另外買！雪人個身係用較早前新買床笠嘅包裝咭紙背面裁成圓形；再用Ambrose嘅diy學生相剪左個個頭落黎；手就用毛絨條屈成；雪人嘅鈕係之前書展買落嘅手工材料；雪人帽用少少顏色紙剪出黎；星星形foam stickers就真係要額外買黎貼上去張咭度無咁寡喇！封面其實都好簡單好快完成！最花時間反而係內頁！媽咪攞左字母印仔俾Ambrose自己印Merry
Christmas等字樣，但其實Ambrose又點會知點串？當然係媽咪讀個英文字母出黎佢去搵同印上去啦！所以進度好慢，但呢個又不失為一個幾好嘅認字嘅小遊戲！等到印好字，又要Ambrose自己寫名，當然又係媽咪串出黎佢寫！Ambrose其實都幾enjoy，覺得好好玩，但媽咪就辛苦了，正常短短時間就應印成嘅字被拖得奇慢，加上印字寫字都要不斷提Ambrose要寫或印邊個位，唔好離咁遠，高d低d，大d細d，真係講到口水都乾！首批完成嘅聖誕咭其實只有幾張，但就足足用左大半日閉門無出街而製成，真係好誇張！哈哈！

 

信封又係另一拖慢進度嘅一環，叫Ambrose自己寫名，下款已經唔敢叫佢寫埋，只係用番個名字印印落去就算，諗住都可以快快地，點知Ambrose又話要响上面畫公仔，仲要張張唔同，服左佢！

 

如是者，呢批聖誕咭其實只係做左幾張，仲要其中幾張係平日夜晚媽咪回家同Ambrose慢慢逐一做起嘅！今年媽咪嘅功夫係少左好多，不過所花時間亦唔見得少，只係Ambrose參與多左好多，所以時間相對真係好多。由於學校假期，有D同學仔响假期前果日先送聖誕咭，果d同學仔就無機會回咭了！原本已經準備多了材料製作多幾張送比幾個N班相熟同學仔，但假期甫開始媽咪已忙到不得了，所以最後也放棄了，材料還是留待下年再做吧！下年，相信要十一月尾開始要準備了！

聖誕芭蕾舞劇@胡桃夾子(3y4m)

媽咪一直都好想睇胡桃夾子，不過，如果搵爹爹陪，佢又會好悶，自己睇又好似戇居居咁，所以一直未睇過！直至有Ambrose，媽咪終於可以有人陪睇喇！好不容易等到Ambrose三歲，夠年齡入場，但因為之前已經同佢睇過兩場芭蕾舞劇，兩套劇都超過兩個鐘，要一個小朋友定定坐响度睇完全無對白嘅芭蕾舞劇，有時真係好抽象，大人其實好花精力。所以媽咪知道胡核夾子開始售票時，都係決定多等一年，等Ambrose再大些少至同佢去睇！

 

殊不知，有一日上音樂堂嘅時候，Ambrose見到胡桃夾子嘅宣傳海報，可能見係士兵造型，又有劍，又打架咁，佢就起勢咁問咩黎，然後佢竟然話想睇！就係咁，媽咪當晚返屋企即買飛喇！

 

一如以往，媽咪只係買兩張飛入場！爹爹就响出面等！Ambrose去到會場，一如以往咁見人入場佢又好緊張咁係咁叫媽咪快d，話佢自已好心急同緊張，真係好好笑！

 

因為遲買飛，所以中間較前嘅位已經無哂，唯有買前少少側面嘅位，入到場之後，發覺唔係好側，其實都幾好添！平時媽咪買平飛，通常都坐山頂位，鳥瞰全場，超大超多人咁，今次買到第十五行，真係幾前，但睇唔到balcony嘅人，Ambrose就問媽咪點解呢度咁細？哈哈哈！側面位一共有五連位，媽咪同Ambrose坐入面，出面係一家三口，小女孩大概五、六歲吧，當媽咪同Ambrose入場坐低時，就聽見小女孩爹爹同小女孩講，有小朋友黎睇呀！

 

平時聽音樂會、睇劇等，次次都一定比預定時間遲十五分鐘至真正開始，今晚真係好好彩，較到最遲入場，只係坐左一陣，就好快開始喇！會場燈光開始轉暗時，就聽到小女孩開始緊張到抽泣，繼而喊，小女孩爹爹即時抱左小女孩出去。小女孩走後，會場關了燈，開始看到台上嘅佈景，呢個時間，全場靜英英，Ambrose突然開口問媽咪問題，聲量其實不大，只是因為全場鴉雀無聲，佢嘅聲音就變得好大聲！媽咪正在阻止Ambrose問問題嘅時候，後面就傳來一聲好粗魯嘅”shh”一聲，聲調極為不滿及無禮，媽咪本能向後望，就見到隔一行隔幾個位嘅一個女人正用手拍拍隔鄰嘅朋友，大概意思就是＂算啦，唔好咁啦＂！呢個時候，媽咪意識到，那一聲”shh”應該係沖著Ambrose而來！其實媽咪一開始見咁靜，Ambrose講野都有少少唔好意思，自己亦已即時阻止佢，但聽見有人即時”shh”自己時，又覺得＂使唔使咁呀？＂

 

就响俾人”shh”完之後，媽咪已立即不斷响Ambrose耳邊同佢講咁靜唔可以咁大聲講野問野，要問就細細聲問。當然，呢段對話其實持續左幾句，因為Ambrose一向都會堅持問點解，所以媽咪不斷壓低聲線來解釋俾Ambrose聽，但只係响呢短短對話嘅同時，即使係音樂已響起並蓋過我地嘅對話，場務員已走左過來同媽咪講，唔可以講野！其實媽咪心入面比佢地更加著急要教Ambrose細聲點，已經即時做野，真係唔係好明，點解媽咪已經行動緊，佢仲要行過來催迫媽咪！

 

Ambrose其實經媽咪講解後都已經知道唔可以騷擾到人，但小朋友就係小朋友，睇劇會有好多問題發問，媽咪理解！Ambrose當然仲有不斷問，只係佢已經將自己把聲壓得好低，而媽咪答時又响佢耳旁超細聲講，加上開場之後其實音樂聲已很大聲，對話其實並唔影響到果位後座女士，但場務員竟然响第一次走過黎話唔好講野之後不到五分鐘，又走左過黎同媽咪講，叫小朋友唔好講野，話後面有人投訴！講真，响開場短短果十五分鐘，由”shh”一聲開始至場務員走左兩次過黎之間，媽咪已經不斷向後望，而每次場務員都一定向住媽咪做細聲d嘅手勢，已經夠煩，佢仲要走左兩次埋黎話我地，仲叫媽咪叫Ambrose唔好講野，媽咪真係好想問吓，呢度唔講得野架咩？！同埋請問點解個劇已列明招待三歲以上小朋友入場，點解入左場之後我地好似俾人歧視咁嘅？好想請教果位場務員，點樣可以叫一個好奇嘅小朋友唔好講野呢？如果個劇係完全唔俾講野兩個幾鐘，咁佢地係咪應該寫明只招待十八歲以上嘅成人呢？媽咪明白好多藝術性嘅音樂會一般會設年齡限制六歲以上，但呢套劇只設在三歲以上，係咪意味住呢套劇比平時嚴肅嘅音樂會係可以有多一點點嘅包容？再者，其實Ambrose只係响開場最靜果刻用左一般聲量問左媽咪一句夾埋都未必夠五個字嘅句子，就已經惹來一句極無禮嘅”shh”，之後媽咪同Ambrose嘅無音對話亦同樣不斷受到迫逼，媽咪完全唔理解，只係一開始嘅一句短短嘅問題，係咪嚴重影響其他人而要遭受到如此待遇？自問自己唔係持續不斷騷擾人，真係唔明點解好似自己犯下大錯咁俾人不斷怪責！媽咪回想起前兩次睇芭蕾舞劇都沒有受過如此待遇，想來可能因為之前買的是山頂平飛，而今次係較前嘅貴飛，所以呢d買貴飛嘅人就好有”要求”喇！

 

自從個場務走埋黎兩次之後，媽咪個心都不知幾唔高興，一方面當然繼續同Ambrose講要細細聲同埋等音樂大聲時至問，音樂細聲或無聲時唔好出聲，另一方面媽咪已經費時再去望個場務員同個女人！之前望，係因為真係緊張怕嘈到人；之後唔望，係覺得自己根本無做錯，理直氣壯，唔再需要著緊其他人點睇自己！

 

如是者，上半場就响不滿不愉快同埋密密壓細聲或無音對話中渡過左，媽咪曾經有一刻以為會俾人趕離場無得睇！中場休息時，會場開了燈，媽咪正正猶豫係咪應該索性離場時，前面兩個女人突然擰轉頭撩Ambrose講野。其實媽咪一直覺得同Ambrose嘅對話並無騷擾到後面嘅”尊貴”人客，反而因為Ambrose坐媽咪大脾睇劇，佢嘅發問雖然已經好細聲近乎無聲咁濟，但因為坐大脾佢會較貼近前面，反而可能騷擾到前面的人！所以媽咪見正好兩位姨姨擰轉頭同Ambrose傾計，即時抓緊機會同佢地講唔好意思，嘈到佢地！點知呢兩個姨姨竟然同媽咪講：細路仔係咁架啦，實有好多問題，唔問至奇喎！佢已經好叻，咁定坐左咁耐無唔耐煩無扭計，又識問問題，而且仲識細細聲問，無嘈到我地喎！聽到呢番說話，媽咪不滿嘅心情終於有點悉懷！當兩個姨姨知道Ambrose只係三歲多一點，佢地都好驚訝Ambrose可以坐定定無扭計睇左成個鐘，仲咁叻可以不停問問題，其中一個姨姨仲叫另一個姨姨下次可以帶個四歲嘅孫一齊睇。言談間，兩位姨姨同媽咪講，音樂越細培養就越好，等小朋友對音樂有興趣，平時可播放不同類型嘅音樂俾佢聽，同埋可以多帶佢地去音樂會，佢地仲介紹了一d音樂會俾媽咪。媽咪亦同佢地講媽咪一直有去呢類幼兒音樂會，同埋之前兩個芭蕾舞劇，總之有啱年齡可以入場的都會盡量帶Ambrose去，今次呢套仲係Ambrose要求黎睇，兩位姨姨無不稱奇，覺得一個三歲人仔已經對呢d音樂會、芭蕾舞劇有興趣，而且原來已不是第一次參加，兩位不約而同叫媽咪俾佢學樂器，因為佢地覺得Ambrose對音樂係好有興趣至可以咁有耐性聽同埋主動要求去睇！媽咪坦言其實Ambrose已不斷要求學小提琴，只係坊間教小提琴嘅老師一般只收四、五歲小朋友，而學鋼琴都起碼要三歲半，所以Ambrose根本”未夠秤”去學！兩位姨姨聽到後對Ambrose真係讚不絕口，係咁話佢gifted，仲叫媽咪一定要好好栽培Ambrose！

 

姑勿論Ambrose係咪佢地口中所講咁勁咁叻咁”gifted”，同兩位姨姨近十五分鐘嘅對話，已教媽咪感動！感動唔係因為別人盛讚自己個仔果種飄飄然嘅感覺；感動係媽咪竟然响短短一個鐘內對於同一件事得到咁截然不同嘅待遇。响一個咁有文化嘅地方，媽咪深深體會到咩叫＂無禮＂同＂匀難＂以及＂包容＂同＂欣賞＂！作為一個無咩文化嘅家長，好想培養子女多參與文化節目，培養文化修養及興趣，媽咪深信係要由細做起。每遇到合年齡限制嘅節目，媽咪都好想帶Ambrose參與，畢竟合三歲小朋友嘅文化節目其實唔多，媽咪亦好珍惜每個參與機會。如果連合三歲小朋友嘅文化節目都唔可以多一點包容，那培養文化興趣嘅年齡應該去到幾大至合理？係咪要到d小朋友個個只係識得埋頭玩iphone同打機嘅時候至開始夠大呢？小朋友去欣賞文化節目嘅時侯，係有可能對其他人造成干擾，但如果唔係嚴重而且持續，大家係咪可以多一點修養包容一下呢？小朋友欣賞文化節目，同時學習到對其他人尊重，尊重唔係代表完全唔出聲坐响度就係尊重，如果係咁，瞓覺好可能對於個表演者係最尊重嘅表現喇！尊重亦可以响不干擾人之下對於節目進行討論與啟發，呢種係學習嘅過程，點解要咁discourage佢地呢？

 

今次呢套胡桃夾子，Ambrose成功地睇足全程，問佢都話好好睇，媽咪都覺得舞台佈景好靚，係好好睇！但媽咪諗，會唔會再有下次呢？應該話，可唔可以再有下次呢？下一次係咪應該要買番山頂位至唔俾人責難呢？

 

P.S. 坐出面嘅小女孩一開場喊住出左去後，上半場都無返過入來，媽咪相信，以佢嘅喊聲，應該係被禁止入場，其實都可以理解；下半場之後，就只見佢爹爹返黎，真係好慘呀，佢個位正價$400架！

Home for Christmas @ Andre Rieu

有一日，爹爹話想買隻有關聖誕節嘅碟俾Ambrose聽，媽咪不以為意，一心諗住係聽嘅碟，見臨近聖誕節，應吓節都不為過，反正家中又無呢類型嘅碟！買左返黎之後至發現，原來係睇嘅聖誕音樂會！

 

一開始，Ambrose見到呢隻碟封面上嘅男人，佢就話佢d頭髮亂哂 (其實係個男人電左頭髮，可能佢少見，所以話人頭髮亂了，笑死爹爹媽咪！)

 

隻碟其實响間大屋門外拍，好多人一齊合奏，主角頭髮亂了先生係拉小提琴，當Ambrose睇左一陣之後，佢就問，點解頭髮亂了先生拉小提琴唔使自己”err”(之前團購買左個小提琴玩具俾Ambrose，佢拉得似模似樣，但因為係玩具，所以無聲，爹爹就教佢一路拉，自己一路”err”扮拉出聲！)佢咁樣問真係笑死大家！而Ambrose亦係因為呢隻碟，至知真嘅小提琴係拉就有聲，唔係自己扮聲(枉媽咪同佢去聽過咁多次音樂會，次次都有小提琴架啦，佢果時又毫無疑問架喎！)

 

同一般音樂會唔同，平時的音樂會，演奏嘅人都著得好formal，黑白色打扮，呢隻碟，可能係因為for聖誕節，個個人都著得好靚，女士全部係晚裝，七彩繽紛！而且背景又有落雪，又有馬車，又有芭蕾舞，同平時坐定定响大會堂音樂廳聽音樂會真係好唔同，唔知係咪因為咁，Ambrose超鍾意睇呢隻碟！雖然話電視唔應該多睇，但呢隻係音樂碟，唔係d咩卡通電視，仲可以俾Ambrose多聽classical music，媽咪無太大異議，佢想睇就俾佢睇個夠啦！

 

亦係因為呢隻碟，Ambrose不斷同爹爹媽咪要求，想學真嘅小提琴！

Home Art Jamming@車仔船仔(3y3m)

另一幅又係Ambrose等爹爹媽咪起身時畫嘅畫，好colorful，好靚！雖然好唔make sense咁又有太陽又落雨，哈哈！但車下面有馬路、船下面有好大浪嘅海、天空有雲、馬路旁有山，呢d都好make sense，雖然睇落唔係咁整齊，亦唔應該咁畫法，但都好佩服Ambrose可以畫到個畫面咁豐富！

Home Art Jamming@一家三口(3y3m)

因為Ambrose 太鍾意畫畫，所以之前已經响佢張檯度，長期擺放畫薄、紙張同顏色筆，佢一有興致就可隨時畫畫，以佢嘅速度係咁畫，真係開始唔知點儲低哂佢嘅畫作！

 

Ambrose已經習慣左佢起左身，爹爹媽咪仲懶床死都唔起身，佢會自己出去畫畫，哈哈！呢幅一家三口就係某日佢起左身等爹爹媽咪自己畫架喇！畫功其實可以再好d，呢幅都畫得較求其，不過媽咪impressed係佢自己畫完同我地講係爹爹媽咪同佢自己，仲要媽咪畫得大d，哈哈，所以真係忍唔住記低佢！

 

另外，Ambrose又會開始要求媽咪影低佢畫嘅畫，叫媽咪俾老師睇，哈哈！

Textured Wands@ELC

好耐之前已經好想買呢隻塗鴉掃，不過只係見美國網有售，又唔做international order，得個想字！一係就見淘寶有，但價錢又唔平，又睇唔到實物，所以一直都無買！其實以Ambrose而家呢個年齡玩呢d塗鴉掃，似乎又大左少少！不過一直想買而買唔到嘅野，突然間响眼前出現，好難唔買囉！唯一最衰係無特價！

Sew Your Own Puppets@ELC

之前响書展買過類似嘅手工，平好多，不過就無呢套Sew Your Own Puppets咁靚，見特價左價錢都ok，又買多盒，自己玩或送人都好啦！呢盒Sew Your Own Puppets買平左，架上盒盒都係貼住七折，零零舍舍呢盒係半價，媽咪當然攞呢盒去買啦，哈哈！

 

結果，應該係售貨員貼錯牌，本身只有七折，但收銀員自動改番半價埋單，yeah！

Apron and Oven Gloves@ELC

今日lunch time去左ELC行吓！之前其實已見有玩具特價，不過完全無時間行，今日突然又諗起，忍唔住又去睇吓！

 

之前已見過呢套Apron and Oven Gloves ，不過只有粉紅色，所以無買！今日去竟然見到有最後一盒藍色，一定要買俾Ambrose啦，佢咁鍾意煮飯仔，哈哈！其實媽咪都睇中套廚房煲套裝，不過做特價嘅只有粉紅色，男仔色果套係正價，爭一半價錢，真係好唔抵！唔知幾時先會做埋特價呢？

變形俠醫@Lego

星期六上完跳舞班後去左反斗城行吓，Ambrose入去前仲同媽咪講，入去睇玩具，唔係買架，媽咪真係心懷安慰！點知佢去到Lego區見到有呢個變形俠醫，已經愛不惜手咁攞起黎睇，然後當媽咪話行喇，佢竟然攞埋個盒一齊行！哈哈！其實Ambrose都無話扭買玩具嘅，只係一味攞住唔放，話好靚同埋好想要，最後媽咪都係抵唔住，買左俾佢囉！

 

原本以為呢盒係Lego，咁即係可以砌落佢張Lego檯，點知原來佢都唔係正式Lego粒，基本上除左個牌子係Lego，入面嘅配件無一件係Lego樣，更唔好話同平時嘅Lego合併一齊玩喇，所以個變形俠醫其實唔可以砌在Lego檯上，真係好失望呀！

 

呢個變形俠醫，Ambrose好俾心機去砌，都叫有板有眼，睇黎，等佢四歲左右，真係可以試吓俾佢砌正常Lego喇！

小手工- Fire Engine

有一段時間也沒和Ambrose做手工了，只因媽咪太懶惰！搬屋時見到之前買落好多手工材料及玩具，媽咪明白，總不能只買不用，所以雖然屋仲未執好，今晚都係的起心肝，再同Ambrose一起做手工！

 

屋企仍然有點亂，所以太大型的手工，真的未可以開始！眼見這盒Fire Engine只是油顏色再吹脹便可以成為一架可以郁嘅車，實在很方便，一於就玩這盒吧！

 

媽咪慶幸Ambrose係一個好鍾意手工畫畫嘅小朋友，每次一聽見做手工，佢都可以咩都拋低唔做，爹爹都可以捨棄，跟住媽咪團團轉咁執材料出黎做手工，呢個亦係媽咪同佢做手工嘅動力，見到佢咁enjoy，就算自己幾無天份都好，都要不斷嘗試！

 

呢架Fire Engine，原本以為Ambrose會好鍾意，點知佢見到個盒面果架school bus，可能佢今個月開始坐school bus實在超開心同鍾意，所以佢竟然問媽咪有無school bus？調解一輪後Ambrose都接受左，開始油呀油，佢成日都堅持要用不同顏色黎油，有時媽咪都唔明點解，又唔知點先可以令佢油得正常一點！而且有時見佢都未分到應該油邊d地方先啱，好似樓梯嘅孔係要油底嘅顏色，佢就油左梯嘅色，講佢又唔多明，頭都痛埋！

 

油完顏色，吹脹左架車，Ambrose眉開眼笑，哈哈！

創意畫班@第十二堂 (3y3m)

今堂畫聖誕老人，Ambrose畫的那個，好肥好圓呀！同學仔果d都好瘦，哈哈！

 

本來聖誕老人都畫得唔錯，鬍子都係雪白色，但因為放在車上待乾，架車轉彎時成本畫薄又飛左又飛右，d油又未乾，到返屋企時至發現白鬍子上竟然有點點背景的紫藍色！

小白兔@小演員班

搬屋嘅關係，本來11月25日有個比賽，都無法參加了！

 

經過之前一輪角力，Ambrose返跳舞班又好似無咩野咁，老師仲話佢响課室跳得好開心，叫休息都話唔使！呢排跳嘅舞都係為左個比賽，有次問Ambrose佢可以講出扮小白兔同八爪魚，而且見佢有時响屋企都有扮吓咁，其實都知道佢應該都幾enjoy，真係好想同佢去個比賽試吓，但奈何撞正搬屋，家中一片混亂，無辦法啦！

 

老師好好人，唔知係咪佢好鍾意Ambrose，竟然同佢影左好幾張相，仲俾番爹爹，真係令我地好開心！呢一日其他會参加比賽嘅小朋友都換左白兔衫戴埋兔仔耳朵練習，Ambrose無參加跳舞，無白兔衫，好彩老師都有俾個白兔耳仔俾佢咋，唔係都會幾唔開心！

 

Ambrose戴左兔仔耳，好可愛，老師話佢成日扮老虎，哈哈哈！

在鬼地方返工的惡夢

九龍灣其實真係一個鬼地方，唔明點解咁多人响度返工，但竟然只有咁少車可以去到，仲要班次唔太密！如果要响九龍灣返屋企，果架死人258D真係激死你，又少車，架車黎到都已經企滿人，上都上唔到，都未計佢下下都係殘舊白巴！點解九巴可以咁定條巴士線架？觀塘九龍灣已經勁多工商廈架啦，都可以咁少車去！！！好彩有村巴嘅出現，如果唔係，真係點返工呀？！

 

搬屋前，問過屋苑個Security，屋苑外有村巴出觀塘一帶，登時放心了！搬屋後再去問村巴公司，原來村巴要買月票，而十一月已經full左，要waiting第三個至有位，呢個時侯至發現無村巴返工，真係好大件事！因為而家呢個屋苑位置比較不方便，唔好話村巴，九巴都唔多路線，有又要兜好多地方！上網不斷search左幾條唔同返工路線，撞正果幾日係咁落雨，真係好麻煩！第一日搭左架車出大窩口轉車，除左塞屯門公路，去到轉車又要等左好耐，等到有車仲多人到要企响司機隔離，再慢慢站站停，同埋再塞埋龍翔道，真係人都顛！終於當日遲左四十五分鐘至返到公司！呢條路線即時可以out喇！

 

之後試過是但上架巴士出左長沙灣，再轉地鐡，呢次就無遲喇，但全程又無位坐又迫人，仲要响德福步行去shuttle站，晨早流流真係好操勞，如果可以，免得過都唔想迫地鐡啦！

 

之後就再試搭最早架特別班去尖沙咀再轉車，點知上車無幾耐聽到巴士廣播話架車機件故障，將不可繼續行駛，會安排轉車。但全車人都瞓哂覺，無人有反應，又唔見司機有行動，直至行到出旺角，司機至停車叫人落車轉過第二架巴士，就係咁，原本唔多識路嘅我遇著壞車，再上左架唔知咩巴士，都唔知响邊落車再轉之前target左嘅車，真係幾徬徨囉！結果真係搵唔到要call老公，點知佢又做緊野唔得閒，眼見就夠鐘都仲企响尖沙咀未搵到站上車，真係不得不咒罵，九龍灣真係個不折不扣嘅地方！後來當然也找到車站，遲了三十五分鐘！

 

心有不甘地於第二日再試同一路線，心想今次無壞車，而且經鑽研後發覺早一個站下車再轉車上會慳兩個站，有機會可以準時返工，點知都係遲二十五分鐘！呢條路線又要certified喇！

 

返左幾日工，真係辛苦到想死，轉折都不在講，仲要早起身，天未光六點半起身，天寒地凍真係唔知咁返工法可以捱幾耐！

 

唯有再試下有少少傻嘅方法，搭接駁車返入屯門再搭村巴直出，架村巴到mega box附近有站，行返公司十分鐘左右，無遲到，仲要早到，可以夠時間食個熱早餐添！呢條路線其實最舒服同理想，而且如果夾啱時間上車下車，其實呢度比較stable一d！但咁都唔係代表可以晏d出門，都要七點咁早，唉！

 

响好沮喪嘅時候，終於收到村巴公司打來話有位喇！不過就得一班車，七點十樓下上車，其實真係好正，時間晏左又咁近上車，唯一擔心係七點十開車，八點九可以到九展嗎？而因為月票形式交費，即係話一交就交一個月嘅錢，如果時間真係夾唔到，呢幾百蚊都會白費，所以第一日搭時真係好緊張！

 

唔知係咪真係太黑仔，第一日搭，架車竟然遲到，問過其他人，佢地都話架車好少遲，通常早到，呢一遲大概有五至八分鐘，加上又下雨又有少少塞車，再响shuttle站遇正長人龍，最後都無驚無險準時到公司樓下，計埋買早餐同搭lift，都係遲左五分鐘左右！

 

再試多一日，已經係早五至十分鐘到公司樓下了！呢次搵車返工嘅惡夢就此結束！而家可以七點至起身，真係太好喇！

 

 

創意畫班@第十一堂 (3y3m)

搬屋嘅關係，走左一堂！

 

今日竟然整聖誕吊飾，好似早左少少，哈哈！不過黎緊學校有聖誕飾物比賽，但而家時間無多，搬屋後好多野都唔記得放响邊，又有好多野未unpack，媽咪都打算放棄今次比賽，講真每次交呢d野返學校比賽，都總覺評審唔公平，不過唔想Ambrose兩手空空無野交至整俾佢攞返去，都唔係旨在攞獎！所以當媽咪見到呢個吊飾，都好安慰，如果最後真係完全無時間整，媽咪決定攞呢個吊飾交番學校，起碼呢個真係Ambrose自己親手做，都唔係太唔見得人！當然比起其他同學嘅大型製作，呢個係好削架喇！無法啦，下年再大搞了！

搬家了

十一月二十四日搬家了！在這之前及之後的日子，真的很忙很忙！之前爹爹一直都不希望太早執拾，因為一旦開始了，家裡一定會很亂，而家中又有Ambrose，實際環境又不可以太亂，始終小朋友都會在家周圍跑跳玩，又會好奇執屋入箱的東西，總之預期如果太早執拾，家中寸步難行就一定會很麻煩！所以盡量將執拾期縮短至少於一星期！

 

以前兩個人的時侯，物品不多，搬家並不太煩；如今多了個小朋友，物品真是多到令人頭痛！一開始執，就發覺一星期其實真的不很夠！所以搬家前的一星期差不多晚晚也在開夜車收拾！早期執拾時也會執拾得一絲不苟，但到後期時，時間無多，而且有些東西真的不知道如何入箱，爹爹也就開始見東西就掉入紅白藍大袋就算！

 

直至搬家當天，家中很多東西都未入箱入袋，真的是一邊搬一邊執！由於姑丈有貨車，所以一如以往也沒有請搬運公司搬屋，都是幾個人搬呀搬的！不過如果有下次搬屋機會，還是請搬屋公司搬吧！大家也舒服一點，而且不用煩惱吧！

 

說回新屋，其實也沒有像之前的一間拆清所有東西進行大裝修，一來是資金問題；二來這幢樓齡較新，前業主又保養不錯，部份東西也可以保留；三來是因為此次搬屋一買一賣，遷就資金流動的時間，盡量將成交的時間調好，新業主肯將原屋租回給我們兩個月，好讓新屋成交以及裝修，雖然兩個月聽來很長，但實際由收樓至需要交吉時間也只有五星期左右，所以亦不容大裝修了！

 

搬了家其實就應該要盡快拆箱收拾，但好可惜，之前在十月訂了幾張床櫃也未能如期在搬家前送到！應該說，到今日為止也只有Ambrose床櫃到了，其他的都未有，所以拆箱收拾是不太可能了！可幸是所有床褥也有，大家也只可在地上睡，感覺上怪怪的！

 

真希望可以盡快有櫃有床可以收拾一下，快點有個舒舒服服的安樂窩吧！