愛得太遲

錯失太易　愛得太遲
我怎想到　她忍不到那日子
盲目地發奮　忙忙忙從來未知
幸福會掠過　再也沒法說鍾意

愛一個字　也需要及時
只差一秒　心聲都已變歷史
為何未放肆　見我愛見的相知
要抱要吻要怎麼也好
不要相信一切有下次

相擁我所愛又花幾多秒　這幾秒
能夠做到又有多少
未算少　足夠遺憾忘掉

多少抱憾　多少過路人
太懂估計　卻不懂愛錫自身
人人在發奮　想起他朝都興奮
但今晚未過　你要過也很吸引

縱不信運　你不過是人
理想很遠　愛於咫尺卻在等
來日別操心　趁你有能力開心
世界有太多東西發生
不要等到天上俯瞰

有人話點解而家既女仔咁短視,男仔發奮工作係想將來既生活好d,一切也是為兩個人的將而付出,女人卻自私地埋怨男人沒時間陪自己,只看到眼前。

曾幾何時,我都有咁既經歷.............點解男朋友成日都話忙,好多野做,每次都話想專心做左先得閒理我,習慣星期一至星期五工作星期六或日先出街拍拖,很多大理由大道理,我無可能任性的叫他不要做,唯有等。今日佢做完呢樣,聽日又會有下一樣要做,要做既野又點會做得完?

當時我就唸,唔通我呢世都要係咁等?等佢做好工作,考試,等佢升職,再升職......幾時係盡頭?七老八十? 到時我重响唔响度?

呢一刻你定個目標要完成,可能要一年兩年,到你達到呢個目標之後,你又會有下一個目標去進發,呢個目標可能高d,要三五七年先做到,做到之後你又會再有下一個更高既目標............人係要不斷前進,進步,我明白呢個道理,但係前進既時候你又有無唸過身邊有好多人或物你係見唔到,即使你見到,又有無唸過佢係咪跟得到你既步伐?

呢一刻你顧唔到咁多野,只可專注工作,我想像唔到將來會係點?呢種想法叫自私?短視?眼前活生生既我你理唔到,重邊有資格講將來?將來係點無人知,你重係唔係同我一齊都話唔定,你叫我點等.......如果我呢一刻唔開心,你又點可以叫我相信以後會開心呢?人係要不斷向前,你不斷向前走既同時我亦都會,世界亦都會不斷改變,唔會因為任何人而停低............

愛情從來都唔應該有錯與對,我只是憑我既感覺出發,怪只怪兩個人並唔係一致.........

今時今日聽到呢首歌, 有d感慨

珍惜眼前人.....我要時刻記在心!!!

 

習慣

唔知由幾時開始,生活已經變成習慣。

大學既時候習慣左一個人住,無拘無束....習慣唸好多可能好簡單既事.....習慣左有人陪住.....

失戀既時候習慣一個人搞掂哂,開心唔閞心都要撐住.....習慣weekend同friends 食下tea,飲下野過日晨.....習慣玩到三更半夜搭泥"蚊"的返屋企......

拍拖既時候習慣有人管接管送....習慣發脾氣時有人會"dump"自己...而唔係發埋一份.....

原來好多野已經係習慣左,已經係生活既一部份......

星期二習慣返呀媽度食飯....其餘日子返奶奶度.....

星期六日習慣做鋪頭野...有時間就打麻雀........

習慣一星期中平日會有一晚兩個人出街食......

習慣一早起身只可吃流質食物........

唸返轉頭,呢一生都係習慣........

習慣...唉.....有時可唔可以唔係習慣?

 

New York Cheese Cake

一早約左同事大年初四晚去整我好鍾意食既New York Cheese Cake,雖然假期完後其實累透兼好想早d返屋企,但係心情都係好興奮。

去到做蛋糕的店鋪,實在不敢想像這會是一間在商場裹的店鋪,陳設簡單,門子更是透明的沒有任何遮掩,逛街的途人可任意觀賞我們的"表演"。

做這蛋糕的程序比我想像中容易,可能我平日實在太少運動,攪了一陣芝士就手軟.......不過無驚無險,我都做好左呢個蛋糕,好好好開心!!!

我希望下次可以自己在家做一次(成功既)就好嘞!!!

入得廚房

一連七日的新年假很快又結束,回想做過些什麼特別事,只能說是初三,假期最後一日,我親手煮了一餐飯給屋企人吃。可別小看我的廚藝!!!當晚做的所有菜已被狂風掃落葉式的掃光,不枉我忙了一個下午。

我的菜單如下:

老火紅青蘿蔔湯
辣酒煮花螺 (其實並不夠辣,真的要鑽研一下)
拿手香煎雞中翼
蒜茸小棠菜
苦瓜鮮魷
清蒸桂花魚
薑葱牛栢葉

矛盾

我開始發覺自己是一個很矛盾的人。

鍾意寧靜;但又希望熱鬧。
知足;卻原來亦好貪心。
喜歡低調;但又希望有人注意,不甘平凡。
一成不變,習慣某模式後什少改變;卻時不時想有所轉變,突破。
個性悲觀,時常先往壞方向想;卻又幻想好事或會發生自己身上。
不喜多言;卻會滔滔不絕,吱吱喳喳的說過不停,更會忘我地說了不應說的話。

那麼,下次當我說不必,其實是要;不想,其實想;不買,就買吧;不用理我,還是理好一點!

但,又不一定是定律…………..蛔蟲,從來不易做!

柚葉

第一年同老公過新年,雖然知道沒太多人會來我家拜年,卻又忍不住買些糖果,飾品應應節。

年廿九晚和老公行年宵,雖然不是維園年宵那麼壯觀,卻行得挺舒服。而且已經忘記了有幾多年無拍拖行年宵嘞!

响年宵買左豬毛巾,豬祝福掛牌同豬吊公仔,好得意!其實重有好多豬公仔好cute,但係當我唸起執屋發現床下底有好多公仔既時候,都係算啦!

返到屋企我地重煲d柚葉水冲涼,香噴噴好舒服。我記得細個呀媽逢新年都煲俾我冲涼,自己搬出來住就無攪呢d野......今年自己攪下d迷信野,懷念一番,好開心!老公重開心過我呀!正一大細路!!!

哀悼

收到朋友的電話,告知我們的一位小學同學剛過身的消息,很震撼!

小學同學自小體弱,面色永遠的白,可幸是一種近透明的白而不是青白,不會予人不健康的感覺,只是有點柔弱罷了。和她雖非深交,對她的感覺是溫柔而嫻靜,恰如其名字。花樣年華,竟傳來早逝消息,無不感慨萬千,據說這位小學同學十二月時才剛結婚,直教人心痛!

時間在不經意間流逝,只是我沒發現,回想從前,才驚覺所有印象已依稀,所謂回憶原來只是對往事歸結出來感覺的沈澱,仔細的情節就如夢境般,似有還無.......大概,人活在這繁忙的都市,為工作而奔波,為生活而營營役役,沒有一刻定下來去思考,去細味,去懷愐生活裡遇到各樣的人與事,以致一切人與事匆匆擦身而過,一天回首,才驟覺錯過了很多........

活在當下,珍惜眼前人!

我的驕傲

啞妹做司儀,原來真係唔得．．．

之前同老公夾過稿….一句咁大把啦,其他自己執生!!!對於一向反應遲鈍,打電話都驚一大餐既我,一句稿,真係好無安全感。如果要句句寫哂出來背,作為大學生既我真係覺得好羞家,作為一個婚宴亦唔見得合用。因為婚宴進行其間,實在有太多既變數,講求既係轉數,臨場既應變,生硬背稿絕對唔得!!!

就係咁,我既第一次喺驚寒交迫下發生。原本以為驚既係面對一大群人講野,但原來呢一樣唔係我真正驚既野,而係我真係唔知講咩…唔知點樣講我要講既野出來係大方而自然…..好似請完新人進行簡單而隆重既切餅儀式後要新人開香賓,點樣講叫佢地開香賓呢? “開香賓啦唔該”? 唔係下話?好odd!!!

我知道老公知我驚所以佢儘量自己講,而我都相信佢絕對稱職,甚至會發揮到…….不過我想講佢實在發揮得好好,可以一個人由頭帶到尾,唔使人幫佢,或者應該話佢已經忘記左係有個人企响佢隔離suppose一齊帶住個宴會…..甚至乎佢已經忘我地自己走位遮住我…..咁個台就無啦啦多左個花樽…已經傻下傻下,重要俾人ignore…好核突!!!!

唔緊要既,樣衰都無人識我,哈哈!!! (我唯有咁唸!)

老公提議唔使我上台,但我始終覺得既然應承左人地做,就唔應該半途而廢。人家搵得我,唔理係咪就手,定還是想一男一女視覺效果好d,一定有佢既理由,既然應承得,就唔能夠有負所託,我唔能夠令佢既婚宴錦上添花,至少呢個角色扮演我係要扮到尾……..對我自己亦都係一個交代…..雖然心裡好明白自己係幾咁不濟,有人提出代我,我真係好想退縮,另一方面,我真係好憎自己咁渣,退縮係一種逃避,選擇逃避既話,我會鄙視自己。

我,雖然渣,但我唯一能夠做既係勇於面對,承擔!

呢一樣係我值得自傲既地方!