爹爹book左長洲華威酒店廿三號住一晚，諗住Ambrose未去過長洲，一家三口搭吓船，去吓離島行吓玩吓hea吓！
Ambrose知道去長洲會搭船，不知幾興奮，成日都講要搭船！之前果晚同佢講完去長洲一事，諗住第二朝瞓醒佢會唔記得，點知起身問佢今日去邊度，佢竟然答到，可想而知佢平時真係選擇性地聽我地講野呀！
多得Ellen姨姨提點，爹爹決定搭西鐡直出碼頭上船，因為全程bb車都可以唔使收喎！結果都真係唔使收，只係去到香港站唔知點解無濶閘出F出口，走左去問個客服，教我地出另一個出口行天橋過碼頭，但出到去發現有一行樓梯要落，Ambrose瞓著左，所以結果就係由爹爹連人帶車搬啦！去到碼頭買飛，見豪華座同普通座差少少錢，就買左豪華座，點知買完先知豪華座要上兩層好直嘅樓梯，爹爹今次真係辛苦喇！
豪華座有檯，係方便少少，加上窗全密封，好暖！不過Ambrose係都要出出面睇海景，啱啱撞正天氣轉凍，海風又大，真係吹到頭都甩呀！好彩唔覺意同Ambrose攞左頂帽跟身，要佢笠住先可以留响出面睇海。媽咪怕凍，同爹爹Ambrose影吓相就入番船倉度，可憐爹爹吹到死死吓，哈哈！
爹爹book左華威酒店海景房，個view真係正，如果係夏天就好，可以去埋沙灘，而家凍冰冰，見到都覺得超凍呀！去到酒店嘅Ambrose超開心，周圍攪，又一定要開露台個落地玻璃，凍鬼死人！媽咪擔心Ambrose凍，同佢執左好多衫，點知去到酒店先發現，媽咪唔記得同自己帶瞓覺衫，真係大意！
响酒店check in左擺低行季之後就出左去周圍行，酒店樓下就係公園，所以Ambrose又點會唔話玩丫！同佢玩左一陣都唔肯走，都係要出動到去搵單車踩搵野食先肯離開！
長洲其實好細，除左踩單車真係無咩好做！所以响街頭食左好多唔同小食之後，一家三口就去搵車租喇！家庭車係一個人踩兩個人坐後面，唔同大尾篤嘅家庭車，要兩個人踩，所以今次媽咪可以偷懶，哈哈！不過沿海邊踩單車，真係好大風，又係吹到頭都甩， Ambrose似乎好受落，成日叫爹爹快d快d，哈哈！中間有小事故，就係架單車甩鏈喇！好慘，因為已經踩到好遠，要返去換車都唔係易，爹爹唯有獻出佢人生第一次整甩鏈，好彩都俾佢整到，唔係又凍又要行番去就勁金喇！
踩吓踩吓又經過另一個公園，Ambrose又話要去玩，咁就陪佢去玩啦，反正唔踩單車，呢度又無咩好行，佢想去公園玩就玩啦，無其他行程趕住去嘅！玩完一餐之後，已經天黑喇，因為下午都無食過正餐，所以都係早d去食晚飯喇！
搵左檔大排檔食吓海鮮，Ambrose就開心啦，有佢鍾意食嘅蝦，係咁叫爹爹搣俾佢食！呢一餐真係好抵，有五餸一湯加兩碗飯一枝汽水，都只係二百蚊，五餸之中重係有蝦、聖子同魚架喎！
食完飯，行去超市買左d零食生果就回程返酒店，响室外玩左成日，真係凍左成日，返到酒店先至有暖嘅感覺呀！其實返到酒店好早，爹爹媽咪又發現有套叫“零秒出手”嘅劇集好好睇，同埋Ambrose一齊睇，哈哈！
夜晚，由於Ambrose有足夠嘅衫，所以暖爐唔可以開到最熱，如果唔係佢就出汗！可憐媽咪無帶瞓覺衫，只係可以著件底衫瞓，好彩因為諗住第二日就會最凍，所以唔覺意攞多條heatech嘅打底褲，所以勉強都有套瞓覺衫褲瞓覺！不過可能衫褲同被都薄，而華威酒店又唔係真係好似酒店咁有暖氣，又近海邊，媽咪半夜紮醒左之後覺得好凍，點瞓都瞓得唔多好囉！加上個枕頭好扁呀，瞓到周身骨痛！
第二日，懶吓床十點幾起身，真係好凍！原本諗住出去搵野食，但見原來酒店地下有酒樓，都係唔出去喇，飲茶算啦！原本Ambrose成日嘈住話去沙灘，媽咪都好想去，不過天氣實在好凍，海邊好大風，所以最後都同個沙灘無緣喇！飲完茶執埋行季就check out喇！走果時又經過公園，Ambrose例牌玩左陣！
長洲之行終於完結，我地搭十二點三船離開喇！呢一程船，Ambrose又要坐出面睇海，媽咪真係頂唔順，又係同佢影左少少相就入左船倉等喇！哈哈！今次好彩d，媽咪入左船倉一陣，就見爹爹同Ambrose返入黎，爹爹話Ambrose話真係好凍呀，爹爹問Ambrose返入去好唔好，佢話好，爹爹終於都可以唔使再吹風，哈哈！
落船行左陣IFC，Ambrose又瞓左！突然間覺得Ambrose大個左好多，見佢瞓响bb車度原來已經唔止突哂腳仔出黎，原來佢迫到無得轉身，架bb車已經係歐洲大車，比起好多車已經大左好多，Ambrose細個時瞓都不知幾鬆動，原來唔經唔覺佢已經大到連坐呢架車都咁迫！
呢一次長洲之旅，Ambrose出奇地好開心好興奮，全程成日都自己唱歌又笑又叫，爹爹話估唔到佢咁鍾意長洲！雖然咁樣入去住一晚無咩特別野玩，只係好hea咁踩吓單車同去公園玩，但見到Ambrose咁興奮真係覺得咁樣又有咩所謂，最緊要係佢開心，我地開心啫！做d咩又有咩關係呢？
沒有留言:
張貼留言