又唔記得寫低，唔知幾時開始Ambrose就已經識揸大人筷子自己夾餸喇！諗返應該係未搬屋前已經係咁，所以推斷係三歲兩個幾月左右。爹爹媽咪從來都無教過Ambrose用大人筷子，佢一路都係用兒童有輔助圈果隻筷子，一直都有人話小朋友用果隻筷子，可能適應左太易用，到真係轉用大人筷子又要再學過，媽咪都無理，反正之前買落，又用得唔錯，咁就由佢用住先，大d至算囉！點知唔知邊日開始，Ambrose無啦啦要求要用大人筷子，就係咁，佢就正式用大人筷子喇！佢一用就已經上手，唔使再教，真係好叻！手勢好似有少少唔正式，但都諗住等佢熟習左之後再慢慢執啦！
我們一家都是第一次去摘士多卑梨，Ambrose相當興奮！園入面有韓國及法國品種，前者$90/磅，後者價格相宜一點，只是$60/磅。驟眼睇，比較多人响韓國品種嘅田度採摘，當然啦，粒粒都好紅卜卜，比起法國品種多數都紅紅白白，又真係幾吸引嘅！媽咪無咩所謂，都係隨Kula意思，去法國田度摘！期間Ambrose好心急，一見到有士多卑梨，唔理好醜都話要，哈哈！媽咪教佢要揀d又大又紅嘅先要得，其實個田都唔多又大又紅，多數都係紅白混雜，更有好多都係成粒都係白色嘅，所以要慢慢行，慢慢搵！其實咁樣都唔錯丫，如果一去就去韓國果邊，粒粒都咁靚，根本唔使揀同搵啦，以Ambrose咁心急嘅態度，分分鐘一下子已剪滿一籃，又貴又食唔哂都似！
摘士多卑梨都唔係摘左好耐，亦唔係摘得多，都係俾Ambrose摘過就算，唔諗住摘夠一籃，所以最後埋單，只係十幾廿粒士多卑梨，盛惠$40！俾左錢，搵左個位就坐低，洗左兩粒俾Ambrose食，佢都不知幾開心，得得戚戚咁，哈哈！
食完士多卑梨，走左去隔離玩電動大象仔同電單車，其實都幾貴吓，幾十蚊坐象仔行一個圈，幾分鐘就完左！電單車都好少少，平d同埋可玩十分鐘！兩樣夾埋都唔夠二十分鐘，咁就無左七十大元！Kula話去冒險樂園玩都無咁貴，哈哈！
玩完d要錢嘅野，行左過去大草地玩，自己帶左泡泡水去吹，唔使錢，都玩左好一陣！Ambrose一去到室外呀、草地嘅地方，佢就成日會去執d長樹枝玩，同天天一人一枝都可以玩一大餐，服左佢！爹爹又响車尾廂攞埋個籃球玩，其實簡簡單單，追逐吓，佢地已經好開心，係咁咯咯笑！
兩個小朋友係咁跑，咩電都放哂！兩個人仲開始要求對方要跟自己方式玩，但兩個都唔跟，搞到喊哂，大人看在眼裡又覺好好笑，哈哈！既然開始喊哂，即係已經攰到死，係時候返屋企喇！呢度真係幾好玩，有機會真係要再黎玩過，不過相信夏天嘅時候一定好多野咬喇，所以趁住天氣未熱，要多黎幾次至得了！
上星期上左第一堂小提琴班，感覺良好。中心有一本notebook，會記錄左上堂教左d咩，家長需要跟進d咩，好有交帶。第一堂教持弓，對於音樂樂器零知識嘅爹爹媽咪黎講，要跟進真係唔易！老師其實好好，上堂教持弓時已影低左正確姿勢再whatsapp張相俾媽咪跟進練習，但奈何零知識就係零知識，爹爹媽咪對住張相再對埋本書去教Ambrose持弓姿勢時，都搞到一頭煙！其實Ambrose一開始已經持弓正確，但爹爹媽咪唔識，自己研究一大輪自己教Ambrose，之後因為實在太猶豫係咪真係啱，忍唔住又影低左whatsapp俾老師問清楚，點知，老師話掉轉左，嚇親佢！哈哈！當然，老師有描述手指嘅擺位俾媽咪聽，糾正返個姿勢啦！好彩有問佢，如果唔係，Ambrose一定俾我地教壞教錯哂喇！
除左持弓，上堂都有教1-4拍，同埋小提琴果四條絃線。由於Ambrose仲咁細，認字已經麻麻地嘅佢，而家要認拍子絃線，真係要不斷同佢反覆溫習，所以爹爹媽咪真係唔敢怠慢，日日都盡量抽時間同佢溫，以免去上堂時俾老師話。
今日上完第二堂返黎，老師原來真係有check Ambrose識唔識，好彩佢都ok！不過，真係唔可以以為今堂ok左之後就唔使再溫，一定要keep住同佢溫，以免唔記得！今堂老師教埋持琴同拉絃，媽咪真係好驚，唔係怕Ambrose應付唔到，而係怕自己應付唔到！
幾日都無掂過架火箭，以為Ambrose已經將佢拋諸腦後！今晚佢無啦啦話要油火箭，真係出奇！本來見盒面寫住建議用crayons不建議用水彩，可能怕太濕d紙會淋哂掛！不過架火箭砌起左要用crayons油都幾難，借唔到力！所以媽咪最後都係膽粗粗攞kid paints出黎油！結果效果相當好，唔濕，易油，而且可以油得好sharp，無紋！早知一早都用kid
paints啦！
雖然用左畫筆油係快過用crayons，不過枝火箭咁大枝，睇黎都有排至油完喇！
呢套Kumon 1-30買左好耐，Ambrose之前都無咩興趣玩，教佢認住d數字擺，佢又唔聽，自己亂擺，所以收埋左。
無啦啦今晚Ambrose攞左出黎自己玩，終於都俾佢放啱哂！媽咪不無驚喜！之不過，Ambrose真係算係一個slow learner，好多小朋友好細個時都已經可以對住個板擺番啱位，佢要到而家先得，可以預期，佢嘅學習路必然要花更多時間至得喇！
由於成架火箭真係幾大吓，幾多野油，所以媽咪揀左一幅比較複雜嘅幫Ambrose油。顏色都係用番crayons同水筆。不過由於咭紙入面係瓦通，所以當水筆又或是crayons大筆一油嘅時候，往往托印哂d紋出黎，就算媽咪幾努力去油，都油得唔夠實色同埋好難油到無白色。每人一塊配件，足足油左一個鐘，都未油得起！Ambrose已經好心急咁問油好未，佢好想砌架火箭出黎！但除左每人一塊配件之外，其實仲有好多塊未油，媽咪諗住一旦砌起左，好難再用crayons或水筆上色了，於是盡量解釋俾Ambrose知砌左好難油顏色呀！不過都係徒勞啦，佢一心想要砌火箭，都唔明咩叫油唔到顏色！所以，媽咪無可奈何之下，都砌左架火箭出黎滿足吓佢先！
不過砌好左之後，發現原來大屋真係好玩好多，可以同時容納兩個小朋友响入面坐，上次Ambrose去左表姐屋企就係入左間屋度玩，不知幾開心！呢枝火箭，只可以容納一個人，而因為火箭形狀係上濶下窄，基本上，Ambrose要彎身入火箭企，無得坐低！同埋枝火箭原本有個窗口位，但如果Ambrose企直個人，佢就已經高過個窗，咩都睇唔到，要睇到野就要彎低身貢個頭出黎！嚴格黎講，只可以影相！玩，真係玩唔到咁！可能因為入左去無得坐，Ambrose對於個火箭嘅熱情都大減！
唔通咁大架火箭就咁就玩完？唉！
有一晚，Ambrose無啦啦攞左盒收得好埋，完全未玩過嘅積木出黎玩。媽咪唔理佢，由佢自己埋頭玩！原本盒積木有一盒圖咭，可以俾小朋友跟住砌，媽咪都唔知擺左去邊！都有一刻諗，究竟Ambrose識唔識玩呢份積木架？！不過見佢自己玩無要求要陪，媽咪自然由得佢自己玩啦！
過左一陣，媽咪八掛去睇佢，竟然見佢自己砌左個雪人出黎，再之後，就見佢加埋手同腳，砌左個人仔出黎！見佢下巴又擺左幾個半圓形嘅積木，媽咪問係咪口水肩黎架？Ambrose話唔係，係佢個下巴，佢好肥喎！笑死媽咪！哈哈哈！
第二朝，媽咪行出廳，又見到呢個人仔唔同左樣，竟然見佢多左對鞋，同埋手掌，呢個Ambrose，真係唔知點解佢咁鍾意畫人仔，就連砌積木都要砌人仔！同埋佢畫畫已經例必畫埋鞋，而家砌積木都一樣，實在太可愛喇！
Ambrose細細個開始，媽咪都會同佢去音樂會，等佢多接觸音樂，多見唔同樂器，有一次佢係咁指住個豎琴，好有興趣咁，媽咪真係好擔心，Ambrose唔係鍾意豎琴下麻？比鋼琴仲要大部喎，唔係咁易搵人教，亦唔會平喎！好彩，又唔係！曾經，Ambrose行過幾次琴行都同媽咪講佢想學鋼琴，見佢都講左幾次，媽咪就同佢講，佢太細個無人收佢，等佢夠年齡，媽咪可以安排俾佢試吓學！後來，等下等下，有次團購買樂器玩具，媽咪俾Ambrose揀，佢竟然揀左個小提琴，自此，佢就好似迷上左小提琴咁，成日都攞個玩具琴出黎拉！
見Ambrose對小提琴咁有興趣，於是又買左d音樂會dvd俾佢睇，佢先至發現，原來真正嘅小提琴，唔使一路拉一路扮聲，哈哈哈！Ambrose發現左真正小提琴原來係拉就已經有聲之後，佢就開始要求媽咪買部真嘅小提琴俾佢！當然，媽咪無咁做啦，唔想買個琴俾佢當玩具玩麻！後來，Ambrose又分別於唔同時間不下數次要求學小提琴，媽咪其實好開心，因為最終Ambrose竟然要求學媽咪心目中希望佢學嘅樂器！
市面上嘅音樂中心，好多都已經接受三歲半嘅幼兒學鋼琴，但小提琴，好多都至少四、五歲！有教咁細嘅，都要出去學，價錢亦好貴，所以媽咪一心都諗住Ambrose夠四歲先至幫佢搵。
由於Ambrose不斷要求，而媽咪又响機緣巧合之下搵到個區內小提琴老師肯教同埋教開小朋友嘅，老師同Ambrose面試左之後就肯收佢做學生，媽咪見機會難得，所以雖然Ambrose只係三歲四個月，都俾佢試一試。唔期望佢好快有成績，亦無期望佢幾時至拉到歌仔，只係希望趁佢有興趣，而又有老師肯教，俾佢慢慢學，培養對音樂更濃厚嘅興趣！
今日第一堂，老師教左1-4拍、絃線名同埋持弓姿勢，似乎，真係要日日練習同溫書至得喇！對於音樂零知識嘅爹爹媽咪，今次真係要陪太子讀書喇！
聖誕假期前，學校派發左一棵萬壽菊俾學生帶回家，最初幾日，媽咪完全將佢忘記左，無淋水之餘仲要放响射燈下，終於有一日，媽咪見到萬壽菊有d枯同謝，先至醒起要淋水！
果然，淋左水又真係即刻好番哂！於是乎，媽咪日日都去淋水，諗住好好照顧佢！點知，有日淋水落去，d泥完全唔索水，落去嘅水响泥上浸住，媽咪唯有倒水，但一倒又連埋少少泥咁倒走，真係唔知點搞！
終於，响呢日之後，媽咪日日望吓棵萬壽菊，d泥仍然好濕，曾經諗過用抽濕機，不過又實在太滑稽了！過左兩、三日，就見到棵萬壽菊謝左！唉！咁都俾媽咪整死左！
爹爹見到萬壽菊死左，就直接掉左！點知，假期完後學校至通知話今日要帶返學校一齊欣賞喎！真係大件事！本來有同學話可以去買過一盤，不過媽咪又無時間去買，結果，當然就無啦！之前一晚同Ambrose做過briefing，一講起盆花，佢都唔知發生咩事，完全唔記得左佢，仲問媽咪係咩黎，激死！同佢講左，返到學校同老師講盤花死左，無得帶返學校。
放工返去問Ambrose有無同老師講盤花死左，佢話有，媽咪再問，老師點講，佢就話老師話唔緊要啦！仲以為佢返學會見到人人都有盤花攞返去自己無會唔開心，但從佢同媽咪嘅對話，媽咪真係覺得Ambrose一d都唔在乎，無野咁！原來有時真係唔可以諗太多，無就係無，咁又有咩所謂呢？
又係一幅Ambrose自己靜靜地一個人畫嘅畫，佢話呢個人滑緊雪喎，天上有雲，落緊雪，但唔知點解唔係太陽，而係月亮！
呀仔，夜晚滑雪好危險架！
雖然Ambrose畫得似落雨多d，不過爹爹媽咪真係好佩服佢可以畫到有哂構圖（雖然內容唔make sense，但小朋友真係可以好天馬行空），而且佢用嘅顏色亦好豐富，好簡單嘅一幅畫，但望落好colorful，即刻覺得好靚！
今日爹爹應Ambrose要求畫左隻恐龍，媽咪唔知道，只係見Ambrose係咁畫係咁畫，畫完之後佢就話係恐龍，媽咪真係超級surprised佢畫得都有幾分似，有一刻仲覺得Ambrose可能真係好有天份喎，咁都俾佢畫到出黎，哈哈！點知，轉過頭至發現原來之前爹爹畫左一隻俾佢睇，佢摺埋左媽咪睇唔到，以為係佢自己憑空畫出黎，哈哈哈！
不過都叫好意外，起碼可以話Ambrose嘅記性好好，佢竟然唔使睇住，憑記憶畫得番隻恐龍出黎，真係唔簡單！
今堂係畫打邊爐，老師話原來畫呢幅畫至發覺個個小朋友鍾意食嘅野都唔同，哈哈！Ambrose嘅畫有蝦，真係佢鍾意架喎！啡色的應該係冬菇，黃色應該係蛋，而綠色應該係菜，灰色就真係唔知咩黎，哈哈哈！
一放假，Ambrose成日都早起身，媽咪成日都賴在床上唔願郁，好彩佢都好乖，可以自己玩，咁媽咪都可以抖多一陣！
最近Ambrose無啦啦興起撕紙，話整野喎，搞到成地都係紙，真係幾煩吓！不過見佢唔係成日撕，諗住佢幾遲先學識撕紙，其實都應多加訓練，練吓小肌肉，所以都容忍佢，好彩佢都僅限撕平時俾佢畫畫用嘅A4紙，唔會走去搞紙巾，咁都易清理少少。
有一日媽咪瞓醒行出廳，只見Ambrose對住沙發唔知做緊咩，行埋去一睇，原來佢又响度撕紙，撕完後竟然响沙發上用d碎紙砌左架火車出黎，真係好佩服佢，雖然撕就撕得唔係好直架喇，不過無人教過佢可以咁玩，係佢自己諗出黎，真係唔可以唔佩服，小朋友真係可以有無限可能，有咩响手都可以玩得一餐！
另一日，媽咪放工返屋企，Ambrose跑出黎俾左張”爛紙”俾媽咪睇，媽咪問Ambrose係咩黎，佢話係火箭，紙上有粒搓圓嘅紙波，佢話係軑盤，而後面有張摺起左成90度角嘅紙，佢話係司機位，仲有火箭側邊痴住兩塊膠紙，佢話係翼，同埋最下嘅係煙喎！經過解說後，媽咪真心覺得Ambrose整得好似，佢好叻呀！
而家，每當Ambrose有咩作品，佢都會叫媽咪影低佢，要俾學校老師睇喎，哈哈！
連開四個Christmas Parties之後，真的又攰又厭！2013年嘅第一日，一心決定出去行吓，唔再留响屋企！
爹爹以前工作嘅關係都經常去沙頭角，但要入村就無咩機會，見今日放假，又唔使返興趣班，一心以為已開放，所以諗住帶Ambrose逛下！點知我地實在太傻喇，無睇過究竟開放左邊部份就去，結果去到至發現，想去行嘅地方，原來都無開放到，只有一條路仔開放左，但勁多團，而且一眼望去都係村屋，賣嘅係地方小食，完全唔想行，就係咁，架車兜左沙頭角一個圈就走左！
後來，爹爹又去左以前工作經過嘅地方，本來都係諗住落車行吓望吓就走，但竟然見到有人响石灘行同玩，我地亦都玩左一陣。石灘上有條小小山路，我地就上左去睇究竟有咩睇，見有石碑寫住新娘潭，諗番起細個學校旅行一定係去新娘潭，又係行呢d咁嘅山路，好有那些年嘅感覺。
Ambrose似乎都幾鍾意行山，可能一早同佢執左枝長樹枝，佢一向都鍾情長條狀物體，有條長樹枝俾佢篤住行山，不知幾開心，係咁話鍾意行山同埋好好玩，實情得個行字，無咩玩，哈哈！
Anyway，新一年嘅第一日其實旨在出去行吓，抖抖氣，之前又無真係計劃定行山，無咩準備，所以都唔敢行太遠，只係來回行左一小段，停下玩吓水睇下風景，好快就走左喇！夏天行山一定好熱好多蚊，冬天行山其實都唔錯，下次有時間可以計劃一下，其實行山都係一個幾好嘅假日親子活動！
Ambrose知道去倒數，心情好興奮，其實爹爹媽咪都唔知佢明唔明咩係倒數，極其量佢應該只係知有街去有show睇同埋會好多人，即係好好玩咁解！十二點先倒數，十一點已經有表演，仲有超級巨聲嘅歌星黎唱歌。不過由於天氣凍，又夜，無理由响街食足成個鐘西北風，所以雖然有表演睇，我地都係十一點半左右至落去，一路睇少少節目一路等倒數！Ambrose其實係一個幾鍾意睇表演嘅小朋友，只見佢好專注咁睇，好似好欣賞咁，可憐爹爹一直抱住佢先夠高睇，對手真係就斷！
倒數一刻Ambrose好落力咁大聲數，真係十級投入！倒數完後更有花火放，其實都幾靚，雖然係好短時間！一倒數完，四圍嘅人都開始散，爹爹終於可以放Ambrose落地，點知，呢個小朋友話肚餓同無力，實情係佢勁眼瞓，捱完倒數，精神一鬆就咩力都無，即刻暈低！結果，爹爹又要抱佢行返屋企，哈哈！
2013年，希望一家身體健康，Ambrose聽教聽話，學業最好可以有少少進步啦！亦希望爹爹可以响工作方面搵到滿足感，開開心心！
