又發燒

係而家嘅菌勁左？定係我嘅身體差左呢？以前成日覺得大人唔會成日發燒，但呢幾年發現，隔幾個月，我就會發吓燒，而且有時仲唔係燒一日半日咁，而係兩日、甚至三日！

三月三日，起身出門時，魔鬼老公話不如唔好返工陪佢喎，我話其實都有少少喉嚨痛，作病，不過都換好哂衫喇，唔返工之後仲大把野做返，所以照返工。點知，响公司嘅時侯就開始係咁閃電式頭痛，周身肌肉痛。呢幾年，發多左燒，我已經好清楚，呢d症狀，一定係發燒！除左頭痛肌肉痛，呢幾年發燒，d皮膚係會痛到連俾風吹到，開水喉嘅水滴到，都會痛到入心入肺！放工返去同Ambrose食完晚飯，已經支持唔住，响房暈低咁濟！呢一晚，食左特效必利痛，燒是退了。

三月四日，清晨時間，應該係藥力過左無起身再食，所以又發燒了。當然，真的要請病假了！諗住都係睇退燒，只係想攞張醫生紙請假，邊個醫生都無所謂啦，退燒藥應該間間差不多吧！所以去左一間平時有去開但少d人睇嘅診所度，但撞著個頂更醫生，講野無氣無力，完全聽唔到佢講野，睇佢個樣似中醫多個似西醫，真係好後悔睇左佢！自己知自己事，感覺身體真的很虛弱，大膽地問醫生可唔可以開兩日病假俾我，點知個醫生頭都唔抬就話一日就夠！其實，佢又唔係我，佢點知一日就夠呢？！呢一日，食住佢開嘅藥，成日都無退過燒，一直在房昏睡！

三月五日，發住燒又要走出去睇醫生，都係尋日個頂更醫生害的，藥又食唔好人，又唔肯開多日假，搞到半條人命都要死出去！今次，當然要換個醫生啦，但代價就係多人睇，要等好耐囉！呢次，食左藥，可以退燒了！

三月六日，清晨時間退了燒，身體仍然好虛弱，但已經放了兩天病假，不好意思再請假吧！所以好辛苦的起身返工，不到下午時間，又開始感覺到很有發燒的感覺，有點難以置信！捱到放工回家探熱，真的又發燒了！感覺真的有點恐怖，未試過燒幾日都反覆唔退，有d驚！

三月七日，都係頂唔住再請病假了。用左近兩個鐘等睇醫生，之前只不過有六個人輪侯，唔明點解個醫生好似嘆慢板，成日都唔叫人入去。最慘就係，等左成兩個鐘，佢見我都無幾分鐘，然後同我講，係要靠我自已打低d細菌，跟手收到同前日一模一樣嘅藥，真係激死人！

三月八日，終於，正式退燒了！不過身體仍未恢復到，雖然好肚餓，沒有胃口，每次食野都係食左幾啖後食唔落，未飽但又食唔到！最大得萫，就係個肚腩細左！

問我，係咪感冒？其實除左發燒同喉嚨有少少痛，其他咩症狀都無，只係不停燒、發冷、皮膚痛，真係唔多似感冒，真的好奇怪！