小旅行@香港愉景灣酒店 (4y10m)

近月，爹爹媽咪工作繁忙得很，見爹爹工作壓力不少，媽咪真的很想去一轉旅行，鬆吓抖吓！可惜，爹爹媽咪難以取假之餘，Ambrose學校亦要作評估，個評估關係住Ambrose下學期嘅成績表，第日考小一都係交呢份成績，真係唔可以任性地走左去旅行啦！無得去旅行，媽咪唯有走去睇吓討論區有咩好去處介紹，點知發現，近期好多人都講緊香港愉景灣酒店，講到好有渡假feel又好好玩咁，媽咪即管book一晚試吓，諗住唔係真係咁好玩，都當行開吓，住吓酒店輕鬆吓都好！ 

事前其實都無同Ambrose講太多，費時佢小氣會病，哈哈！因為早上仲有興趣班要上，所以都係放左學至check in。去到酒店時，其實只係點幾鐘，幸運地，等左一陣就有房！好奇怪，個職員同爹爹講，可以upgrade我地間房去海景房，但會無左個浴缸，爹爹問個職員，咁除左個海景之外，間房有無唔同，職員話無架喎！媽咪一向都唔係特別鍾意海景嘅人，所以都無因為可以upgrade海景房而開心，反而一聽到話無左個浴缸，咁即係Ambrose無得玩泡泡浴，咁就唔多得喇！最後，我地話唔要海景喇，一定要浴缸！上到房時，見到間房有一半其實都望到海，另一半就係街景，並唔係山景，其實都幾開心！起碼，夜晚望出去都唔係漆黑一片麻！

入到廁所，見到個步入式淋浴間，真係好驚喜！之前上網並無留意酒店設施，所以完全唔知道，原來酒店呢個步入式淋浴間雖說好似係企缸咁，但原來關上去水位再注水，會變成一個好大嘅浴缸呀！咁大嘅浴缸，Ambrose一定玩到唔捨得走！

响房settle哂 d野之後，就去左樓下join酒店嘅活動，主力都係揀d唔使再俾錢嘅！首先係去play room度玩手工班！今星期手工活動係diy puzzle，每個小朋友都會有一份blank puzzle，職員派左水彩筆俾小朋友自由發揮响上面畫畫。點講好呢，媽咪其實唔expect手工班係無人主導嘅，諗住會有個導師lead住，咁唔係就唔叫班啦，但職員只係俾哂d材料我地自己搞掂就行左去，係有d失望嘅！仲有就係d水彩筆，好明顯都無檢查過，係就係每個小朋友一盒可以用，但打開入面，好可能有兩枝紅色但又無左枝綠色，又或者有d已經俾人畫到筆頭開哂叉或無咩色！講真，真係寧願返屋企畫仲好！好彩係响個play room度上，Ambrose好快畫完後已經去左玩！講開個play room，基本上無咩玩具，只係鋪哂軟墊，有少少lego，小廚房嘅玩具，比較啱一、兩歲嘅bb玩，但Ambrose又無介意，都消磨到時間，仲有少少唔願走添！

之後去玩彈彈床，個彈床擺左响室外，天氣咁熱，媽咪相信真係無咩人堅持到玩得耐，我地去到時，都只係得一個小朋友玩緊，玩左一陣後，只係得番Ambrose自己玩！佢玩到面都紅哂，爹爹媽咪就响隔離暴曬！見佢自己一個都玩得咁開心，熱一陣都值嘅！玩到身水身汗，入番酒店見到有扭波波，Ambrose又要排埋一份！

攞完波波，見Ambrose已經放哂電咁濟，同佢返房休息吓！趁佢瞓左，媽咪去左附近視察環境！其實酒店附近都ok方便，有幾間餐廳，最重要係有間惠康，想食咩都得！間惠康仲有小朋友坐嘅車仔連手推車，真係好正，媽咪決定今晚一定要同Ambrose黎行多次，哈哈！呢間惠康好大，而且仲竟然有售賣泡泡浴嘅產品，雖然媽咪都有帶定泡泡蛋俾Ambrose沖浴缸，但因為實在太多新奇得意嘅產品，忍唔住買左d俾佢！

Ambrose瞓醒覺，同佢去完超級市場後，就搭車去左廣場食晚飯。去左一間好多人都話好嘅餐廳，原本仲打算可以睇到廸士尼煙花，不過遲左d去，要露天晚飯又唔多願，加上時間又早左d，其實都好難等到放煙花，所以都係算罷啦，求其食左就算！快d返去試吓個咁大嘅浴缸！

返到酒店，開左一大缸水，Ambrose當然超high，仲要自己一個獨霸玩水，不過見佢玩得咁開心，自己都好開心呢！

第二朝早瞓醒，當然係衝去泳池游水啦！酒店泳池雖然唔算大，但服務都好好，住客唔需要帶毛巾，响池邊就有得攞，認真方便！最好嘅係，酒店提供埋浮條，連水泡都唔需要帶，當然數量有限，但真係可以就咁帶件泳衣去游水，好方便呀！Ambrose第一次接觸浮條，好新奇，又好興奮，見到都覺得佢好好笑！早上游水唔太多人，不過太陽曬唔到就有少少凍，係晏左先至開始逐漸曬到，不過我地都玩到攰，要走喇！

返房梳洗執野check out後，寄存行李後去左登記酒店活動。先去玩「親親馬兒」，其實只係參觀馬房，不過算係近距離接觸馬，媽咪同Ambrose同馬合照時，都好驚，哈哈！之後登記左「海盜嘉年華」，即係可以上泊响碼頭嘅海盜船參觀。聽講呢個節目只限暑假至有，平時要上呢隻船，就只有包船搞function至得喇，而包船費麻，哈哈，除左結婚，媽咪都諗唔到有咩function可以响架船度搞而又俾到果個咁高嘅包船費喇！「海盜嘉年華」先由一個短短嘅音樂劇開始，再有少少嘅face painting之後上船參觀及介紹，當然唔少得影相啦！尾站就係小遊戲，親子鬥快响一大盆沙入面掘番一枚金幣出黎，最快跑去俾主持就有小禮物一份！雖然我地唔係最快嘅一組，但當主持話可再比賽多一場時，媽咪就真係掘到金幣，Ambrose超開心咁出去領禮物，哈哈！

「海盜嘉年華」結束後，响附近餐廳食過午餐，又係時間走喇！呢次愉景灣嘅小旅行，真係幾輕鬆好玩，只係曬左d，期望下年暑假再去過！