五個月

自從十月尾返左工之後都無再寫blog喇，都有成兩個幾月咁耐！之前重立定決心要記低Ambrose嘅好多第一次，但都係事與願違，一來返左工之後都無咩時間，二來就係懶，哈哈！過幾日Ambrose都五個月，之後會有更多更多嘅第一次，我真係唔可以再miss喇，的起心肝又再寫！

 

Ambrose四個月返左健康院打針，因為要同佢登記睇街症（登記左之後第日要睇醫生可以打電話預約）同攞退燒藥，我就上上落落行黎行去，到我返轉頭已經錯過左磅重度頭圍同打針嘅全部過程，甚至乎連見姑娘都安排唔到見Tweety，真係好可惜！不過好彩Tweety都抽到少少時間私人幫Ambrose度身長（兩個月時度過之後無咩特別話唔會再度架喎）。Ambrose四個月嘅體重係7.41kg，即16磅幾，身長63.5cm，唔算特別長喎，跟番生長線，依然係中b！其實同老公都唔覺Ambrose特別肥，除左條頸仔勁多摺之外，都唔係米之蓮bb，唔明佢點解咁重？定還是父母嘅心態係咁，一日唔係米之蓮，一日都唔會覺得自己個b係肥？Anyway，Ambrose都係跟番生長線去，一切正常都無謂深究。呢次打針姑娘都有同Ambrose測試反應，响佢面前搖噹噹，Ambrose就望實，當姑娘移動噹噹，佢都會跟住個噹噹望，重會伸手想攞咁，試左兩次都一様，pass啦！我同老公講番個測試，佢話未見過Ambrose自己攞野，佢覺得好出奇，其實我都無見過，係有時放左d玩具响佢手仔附近佢都會唔覺意攞起，不過我哋唔覺得呢d係佢有意識想攞而攞，真係唔覺意攞到咁，姑娘嘅測試就似係佢感到有興趣而去伸手攞，我哋話Ambrose識扮野，返到屋企又做唔到，唉！

 

Ambrose自從中秋節睇醫生睇眼之後，到而家大大話話都睇過N次醫生，我諗佢係比其他bb睇得多！眼仔腫左就睇左兩次醫生，之後又發現佢口入面有d白點，睇完又話有d細菌，唔太特別又唔太大問題咁，俾左藥水滴口，滴左幾日又唔覺好左又唔覺差左，好似滴唔滴理唔理都一様，我哋又無再滴，始終係藥，我哋唔想俾咁多，諗住再有擴散先再睇。之後我哋又發現Ambrose條頸仔淋巴位腫起又再睇醫生，醫生又話無咩野，淋巴周身都係，bb皮薄會特別現d喎，反而醫生見佢條頸仔摺得利害“葉”到紅哂，佢叫我哋睇住佢條頸嘅皮膚重好喎，俾左藥揸頸，無藥食！再之後Ambrose成日鼻塞，瞓到半夜塞醒又喊，又有咳，攪到我哋都無得瞓，我哋辛苦之餘又“鄧” Ambrose慘，佢半夜塞醒左之後又狂打喊露，又“hehe鞋鞋”咁，好似大人咁憂鬱呀！我哋又同佢食保嬰丹又珍珠末，最尾都係睇醫生，話佢鼻敏感，鼻水倒流，d藥水加埋成半安咁多，真係好得人驚，Ambrose梗係喊到拆天啦，心都痛埋，見d藥又攪到佢暈吓暈吓咁，又唔係好止到咳，又同佢轉左睇第二個醫生，呢次個醫生都話係鼻水倒流令到佢咳，果d唔係真咳喎，俾左d滴鼻藥同收鼻水抗敏藥，都係2ml，同之前個醫生嘅15ml真係差好遠！至於點解鼻水會倒流或點解有鼻水，真係唔知點解，因為係奶奶同Ambrose睇醫生，佢無問！都唔記得呢次睇左幾次醫生喇！再之後又係無啦啦見佢淋巴又好似腫腫哋，唔放心又睇，不過今次睇第二個醫生睇吓有咩講，不過都一様，bb成日都係咁，無發燒無其他唔舒服無多左其他地方腫就應該無咩野喎，又係醫左條頸“葉”紅左嘅問題先，都係俾d滴鼻藥同揸頸藥膏！而家屋企個雪櫃有好多藥水！都唔知係我哋太緊張定點，見人哋嘅b都唔使點睇醫生咁，不過好彩嘅係睇咁多次醫生都唔係咩大病就真。可能自從Ambrose兩個月開始都斷斷續續有厭奶嘅情形，所以佢一有少少野唔多妥又加上唔肯食奶，老公同奶奶都捉佢睇醫生啦，如果有少少野但都肯食奶就會再觀察吓先，不過實情Ambrose大部份時間都厭奶！

 

講開厭奶，我哋都好頭痛！Ambrose由出世到而家都成日吐奶，時多時少，由今餐吐到下一餐都重有，即使係掃左風都會吐，所以佢用嘅紗巾同口水肩量都好多，攪到我哋都成日密密洗，好辛苦，再加上唔肯食奶又會攪到d巾濕哂，有時連衫都濕埋要換衫，真係好苦惱！健康院姑娘又話佢吐奶係胃淺，大d就好，我哋要接受佢成日吐奶，好無奈，唔知幾時叫大d，出世無耐嘅問題，到今時今日差唔多五個都重係咁！奶樽都試過幾隻唔同牌子嘅都係差唔多！我見Ellen四個幾月就同浠浠試食糊仔，見Ambrose成日厭奶，問姑娘可唔可以試吓糊仔，咁又唔使成日吐奶，一舉兩得，姑娘又話唔可以咁早，世衛建議六個月先開始轉固體食物喎！我都有睇d書話如果bb重磅唔好咁早俾佢食固體食物，咁會令bb將來會容易發胖，即係變左肥底，咁我梗唔想，雖然唔知Ambrose呢d係叫重磅定因為係中碼男b嘅standard重量，我都唔敢搏，事關我有妊娠糖尿病，唔知會唔會令到Ambrose將來有糖尿病嘅機會高d，如果加埋肥底就更加衰咁，所以都係諗住等足六個月先。但係呢排佢又厭奶得好緊要咁，雖然我唔會介意佢輕少少，但都驚佢成日唔肯食奶唔夠營養唔夠水份，都唔知點好！我已經買定哂糊仔同餐具，睇吓捱到幾時忍唔住試糊仔啦！

 

Ambrose出世我哋諗住唔俾奶咀佢，過左滿月無耐就聽健康院講俾佢食係俾d安全感佢，點知佢都唔鍾意食，俾親都推出黎，我哋都買左好多唔同款嘅咀俾佢試，so far都係麻麻哋鍾意，食得好少少嘅係日本Pigeon，不過都唔係一俾就食，之前諗，都好嘅，唔食咪唔食，反正之前都唔想佢食！不過呢一兩個月開始Ambrose好鍾意食手，重好蠱惑咁擰埋一邊食唔俾你睇到，之不過佢有時食得興起“dap dap”聲，係人都知啦，呢個時候我哋就開始寧願佢食咀，唉，佢唔食真係好難攪！正正因為Ambrose唔鍾意食咀，所以佢d咀都係初生時買落用到而家，都無好正式諗過同佢換番啱月齡嘅咀，到有一次姑姐話佢個奶咀短啜唔實咁，我先開始諗換番同款大少少嘅咀試，買住一個先，點知發覺佢都唔太抗拒咁，亦好似啜得好d，唔可以話鍾意嘅，但好少少啦！想話買多一個又無貨，一係就要去大圍買，真係煩！

 

Ambrose尋日起就換左大碼片喇！日本片大過平時嘅片，都唔知佢再大d可以著咩片喇！有人話bb遲吓會生長無咁快，但又有人話開始食固體食物會重得快，真係唔知邊様至啱！

 

响我重放產假嘅時候，有幾次抱住Ambrose瞓，佢响睡夢中kaka聲笑，因為得兩聲，同埋無諗過個幾月人仔會識kaka笑，同老公講佢又話唔係呀．．．咁我就不了了之，諗住可能係佢d抖氣換氣聲，點知過左一排又發覺佢睡夢中成日都kaka聲笑，同清醒嘅時候識同人笑，又伊伊哦哦咁，開始知佢真係識笑！到而家就黎五個月，佢都幾鍾意笑，同佢玩，佢有時會笑到kaka聲！四個月返健康院打針重識氹女仔，係咁同人笑，又咋咋帝用隻腳仔撩人哋隻腳，好攪笑！佢又鍾意照鏡，一抱佢埋鏡照就郁手郁腳好興奮咁，有時開心到kekekaka咁又叫又笑，所以佢一喊攪佢唔掂嘅時候我哋會帶佢照鏡鏡，如果連照鏡鏡都攪唔掂就真係投降喇！