短髮

留長頭髮留左好多年喇，我記得對上一次剪短頭髮係結左婚之後返緊而家呢份工果時剪過。可能果時頭髮成鬼日開差，個人又悶悶地，唔知點解有日心血來潮走左去剪頭髮，咁就走左去剪喇，不過雖然係短頭髮，都只係遮住耳仔，長度响下巴上少少，唔上唔落，唔長唔短，有少少“leung”咁，到最後又係一如以往，懶得打理，唔剪唔剪，好順理成章咁又留番長頭髮喇！再對上一次短頭髮，原來已經係好耐之前嘅事！原來我讀大學果三年，都係短頭髮架！我唔記得當年點解會剪短頭髮，照計當年我都重會係果d貪靚嘅妹妹仔，我d頭髮又唔係柔軟又天生髦，短頭髮都唔係我杯茶，真係唔知點解會剪左，只係記得果時剪短之後又唔靚又再剪，點剪都怪怪咁，結果越剪越短，入大學果陣係短到去男仔頭咁，我呢世人都無諗過要剪到咁，但係又唔知點解，去到男仔頭嘅時侯個效果又幾好，重keep左成兩年，要去到year 3先慢慢留番長少少，諗住見工斯文少少．．．．．

近月成日抱Ambrose，佢都會抆住我d頭髮當扶手咁唔放，朝早佢瞓醒又好鍾意係咁望住我之後突如其來一手抓我嘅頭髮抆，抆完又會係咁望番自己隻手，因為佢成日抆甩我嘅頭髮，d頭髮甩左又會攝左响佢嘅手指隙度，佢每次都會好好奇咁望自己隻手，再擰吓擰吓等果幾條頭髮跌落床或地下，再又走埋黎抆過，抆完無論有無頭髮真係抆甩，佢都一定會望自己隻手，我開始覺得佢係好想去探索我嘅頭髮，佢响度study緊呢個因果關係！我今次真係大檸樂呀！講真，平時俾佢咁抆都咪話唔痛，重要有時係瞓瞓吓覺，佢一野抆落黎，真係痛醒架，就算我點惡點話佢，佢都一於少理照抆，真係攪佢唔掂呀！我開始諗不如剪短頭髮唔使煩啦！

剪短頭髮呢個念頭一出，真係收唔番。問吓老公剪短去好唔好，佢又話好。我都重有少少猶豫，唔係諗剪定唔剪，係諗剪幾短！睇吓d雜誌，又唔覺有咩短髮型，都幾頭痛，唔覺唔覺又擱置一邊無去諗！早兩日放假又諗起剪頭髮，趁住平日少人就快d去剪，點剪又真係未諗到，諗住去到先算啦！大前提係我唔會再剪唔長唔短嘅短髮型囉！

入到去同個髮型師講話要剪短頭髮，佢都再三問我係咪認真，係咪捨得！之後佢就俾左d髮型書俾我睇，都有少少idea要幾短嘅，只係驚唔襯囉！個髮型師較剪一揮，先由肩膀對上位置打橫剪哂d頭髮，再慢慢剪上去！佢一剪果吓我不知幾後悔唔叫佢俾我自己剪呢一下，真係超爽呀！佢一路剪一路問我呢度想點剪果度想點剪，其實我都唔sure，只係話要短，唔遮耳仔！點知佢又大我話，咁長頭髮一下剪到咁短無彎轉，想留番長就好麻煩。見佢咁講我開始有少少猶豫，佢就話不如剪左遮耳仔個型我望吓先，咁我都話好啦，穩陣d麻！到佢剪左出黎遮住耳仔，真係唔三唔四，唔使五秒我就話唔好睇，佢見我咁決絕就好爽快話咁同我剪短哂佢，果斷d唔好再諗留長嘅問題，要短，就去到盡！

最後，當佢剪完出黎，我都出奇滿意，連佢都話估唔到原來我都幾受到男仔頭！哈哈，佢唔知，我知！久違喇，短頭髮！行出髮型屋果刻，真係覺得成個人輕左好多！

返到屋企，奶奶一見到我就打左個突，問我做咩剪到咁似男仔，問我唔驚呀仔唔認得我咩，我無理佢，心諗女仔唔可以剪到似男仔咁短架咩？見呀仔又照樣同我玩，即係認得我啦！等埋老公返黎，好彩佢話好睇。

剪完頭髮之後，好多人都好surprised，有同事第一眼唔認得我，見到佢地唔同嘅反應同表情，真係覺得好好笑！不過一致都係good comment，真係無剪錯！最多人問點解咁捨得？你捨得架喇？講真，真係唔知點答，無話捨唔捨得嘅，都剪左喇，頭髮總會長番，唔好咪再留過囉，時間問題啫！之前一路都係長頭髮，其實我唔係特別對長頭髮有偏好，只係長頭髮真係可以一年都唔使去髮型屋一次，係好方便，唔使打理，對於我呢d唔鍾意打扮同咩都要快嘅人黎講,留長頭髮係好自然嘅事，因為根本都無為意去整理頭髮，d頭髮自自然然唔知幾時就變到咁長！

不過最唔慣就係條頸，好凍！

Dr Poon Playgroup – 第三堂

今堂playgroup老公唔使返工，可以車我地出去，yeah～～～

因為今堂playgroup完左之後會去個朋友屋企，所以奶奶今堂無一齊去玩！原本老公話佢唔泊車等我地，不過我就要佢一齊學吓點玩，梗係啦，咁貴學費，而且唔係間間都俾爹地媽咪一齊入去玩，咁梗係要一齊去陪Ambrose玩啦！

平時Ambrose六點幾食完奶都唔會即時瞓番，都要同我地响床搏鬥一陣先至瞓，但係都唔會瞓得耐，九點左右都會醒。今日佢瞓我地又瞓番，一家三口瞓到奶奶九點八返黎見到我地重未起身，好surprised！我地又拿拿林起身換衫執野出門口，時間關係，我地食唔到早餐！老公驚我好似上次咁趕頭趕命頭暈肚痛，死都攞定d豬肉乾俾我可以食！不過我都無咩胃口喇，第三堂喇，第三堂唔係又係遲到麻？！我真係有d質疑我報到去尖沙咀上堂係咪錯！

為左慳返d時間，老公車左我地去山林道放低我地自己去泊車，我係咁易攞左濕紙巾就抱住Ambrose上去。去到見門關上左，咪走去開門，點知度門好似“click”住左開唔到，試左幾次都係開唔到，又好似聽到裡面有聲，我單手抱住Ambrose手都軟埋，好彩見到有個密碼制，制上有個門鐘，我就按鐘。裡面有人應門，但見佢都係响裡面開都有少少“click”住咁，覺得唔係咁邪呀麻？！門一開，我見到裡面一個人都無，得Dr Poon同Auntie May，真係打左個突！我問佢係咪我記錯左黎錯左，Dr Poon話唔係，只係其他人未到！咁都有，我係踏正去到，重諗住遲到，點知第一個到！唔通d人驚左手足口病索性唔返？如果係咁，我地都算安全喎，因為分分鐘係一對一，有著數！我放低左Ambrose比佢爬，咁大地方一個爬都好爽，點知佢又唔爬，就咁坐住傻傻望住Dr Poon，過左一陣無咁陌生佢就爬左去攪台底個紙皮箱，真係激死！係咁要叫佢唔好攪，一來個箱有塵好污糟咁，二來好似唔係幾好意思俾個仔攪人地嘅野咁！之後佢無攪個箱，轉而抆地下地墊，佢又知响條邊抆起d地墊喎，抆起左一次，發現下面原來有塊防滑墊，佢就更加好奇係咁要抆，真係失禮喇！我抱左佢去房中間諗住佢可以爬吓，點知佢又爬返去個入口嘅地墊度，再抆！呢個時候其他人都陸續到左！總算有d野吸引到佢唔抆野住喇！

都無特別再等d人到就開始喇！事關我咁遲都第一個到，再等就蝕哂時間啦！今堂Dr Poon教同bb玩打鞦韆。佢話打鞦韆可以訓練前庭，前庭好似係平衡感，但係其實今時今日香港地唔係重有好多公園有鞦韆打有繩網爬，佢講得啱，真係好少見到有鞦韆，重要係for bb果隻兜型鞦韆更加少！上次去西貢見到有，即刻玩番一陣！Dr Poon教我地自己同bb打鞦韆，將bb抱起面對出面前後搖，bb姿態好似坐住咁，我地大人都要坐低少少紮實個馬步，唔係fing fing吓自己都整親條腰就唔好喎！老公又未上黎，我自己抱Ambrose搖左一陣，見到有個媽咪又係一個人，就走埋去同佢個bb對打，兩個bb都好開心，不過難為我地兩個呀媽，搖左一陣我要抖，抖左一陣又對打過，今次係佢要抖，真係手都軟埋！之後當我同個媽咪對打到手都震埋，都唔係幾好意思又要抖嘅時候，老公就黎到，我教左佢點抱佢打鞦韆，佢就自己起勢咁同佢打，打到Dr Poon都話唔使咁刺激，輕柔d就得，佢先停落黎！

之後就關上燈玩電筒，Dr Poon開住個電筒周圍指，bb們就係咁追蹤個光圈，好攪笑，一班bb喺度哄吓哄吓，成班傻豬仔，哈哈！不過Ambrose只係追蹤左一陣哄埋去睇完佢就爬走左，佢去左另一個邊度起勢咁抆地墊！再唔係果邊咁啱有條柱，佢就係咁响果度借力企起身，真係頂佢唔順！可能Ambrose似我，鍾意玩自閉，Dr Poon都忍唔住射個電筒過黎條柱度引佢，佢一於少理，唔望唔追，射响柱附近地面佢都係望一下又繼續專心搖吓搖吓企响度，Dr Poon都無隱唔理佢，繼續射番個光去堆bb度！我同老公超無奈，老公一手抱起Ambrose去返中間，點知佢又爬左去之前個箱度，又係咁抆地墊，簡直係不能自拔，我地無佢符呀！呢個時候Dr Poon每個bb都派左個小電筒任佢地玩,，叫爹地媽咪示範又開又熄，俾bb知有因果關係，不過Ambrose都係一般有去留意，只係不斷想攞，攞到唔係去望吓d制同燈泡，而係攞黎食，真係激唔激死你？！

玩完電筒Auntie May派左一個拍拍手，叫我地玩俾bb睇，之後俾bb去試吓，點知Ambrose攞到手都係．．．．．食！！！！見人地果d唔食，雖然都唔係個個拍到，不過好多都會走去研究吓個拍拍手，揭吓佢，感覺真係有d沮喪！Auntie May依然都係話擺野入口係正常．．．．雖然係知道，不過當見到其他bb唔係咁狂食而佢又真係咩都食嘅時侯，又真係唔知可以點，唔知幾時先可以過渡到！玩左拍拍手，又俾左個搖鼓，見Ambrose係咁fing，好開心，先醒起屋企都有個搖鼓收埋左，睇黎都係時侯攞出黎俾佢玩喇！玩到咁上下又派左個布袋，要我地摺低d布袋個口然後放哂拍拍手同搖鼓入去，睇吓bb會唔會搵，結果係，搵！Ambrose好鍾意個搖鼓，一搵又攞出黎玩！之後又要將個袋口摺高番佢，放番佢鍾意嘅玩具入去，要佢摷番出黎，Ambrose就想攞，攞極都出唔到黎佢就放棄左，見到隔離個bb玩緊，佢又想擒人地，真係懶豬黎架，差少少就放棄！第日讀書都唔知點算？！玩個袋都有少少悶，可能Ambrose都唔肯摷（定唔識？！），我地响屋企有個布筒仔都有個開口，放d玩具入去佢會攞，呢個布袋軟“dei dei”，有少少難度佢就唔願攞，又係咁食個搖鼓，我都無氣話佢，唯有俾佢食俾佢玩，耐唔時抺吓啦！

就係咁，唱埋歌仔又say goodbye喇！

Dr Poon Playgroup – 第二堂

老公今堂playgroup要返工，得我同奶奶湊Ambrose番學，最大問題係交通！上堂係响山林道，老公話搭西鐡去柯士甸站行出去好似好遠，奶奶就話搭巴士出去彌敦道再轉巴士，我又覺得上上落落巴士好煩，又要搵巴士站，加上諗住一場出到去尖沙咀唔會上完堂就走，會行吓街，咁就一定要推車仔，咁我就諗住西鐡去到美孚轉地鐡去到佐敦，一出地鐡站左轉就係山林道，都好易！

上堂十一點三，我唔sure車程，諗住九點九至十點左右出門口都應該夠時間，點知果朝同Ambrose一齊番瞓，一瞓就九點四五個字，Ambrose起身之後好痴身，奶奶又未返到黎，奶樽又唔夠，我要抱住佢單手洗野執野！洗洗吓野奶奶返黎就抱開Ambrose我快快手執野，換衫，食早餐，整到十點兩個字先出到門口！奶奶推住Ambrose慢慢行，好似唔知我地十一點三夠鐘咁，我個心不知幾急！佢推左一陣我忍唔住自己推番行快幾步，佢就急步追上黎，我推bb車要兜路行，佢唔使，咁我地响西鐡站大堂等番一齊。點知唔知係咪個早餐食得太急，我又急步行，推住架車仔又心急驚遲到，去到西鐡站大堂已經好肚痛，好暈，兩眼金星，要蹲低休息一下。奶奶見我唔舒服就推番Ambrose同要我慢慢行，無辦法啦，我帶住一大一細出街，如果真係暈低左就大件事，所以我都唔敢太勉強喇！

其實之前都有諗去美孚轉車定尖東轉車，不過因為無去過尖東，怕更加唔熟地型，好似又差唔多時間咁，我就決定照响美孚轉車！去到美孚，又要搵lift上搵lift落，好彩有個好心人話我地知邊度有lift，唔使我地兜一大餐去搵lift。西鐡轉去地鐡果條路又真係唔短，好似行左好耐先去到地鐡月台，真係累死人呀！好辛苦去到佐敦之後，又有d問題，就係出閘機係窄嘅，bb車根本過唔到！我一手抱起Ambrose一手揹住個奶粉袋、奶奶手袋同自己手袋過閘，奶奶收車過，點知收左車都唔夠過，真係唔知點好果時，又有個好心人，佢自己都推住個細行李箱，佢主動走埋黎幫奶奶抬高架bb車响閘頂過，我地架bb車出名穩陣，所以都好重吓架，咁抬法都幾金架！之後我地都唔理得個好心人使唔使我地幫番轉頭就直出喇！真係好日都唔出城，大鄉里到爆，一出地鐡站我地又遇到另一個難題，就係出地鐡站係唔會有lift，要行樓梯。我依然係果一大抽野，抱住個仔同奶奶兩個人搬架bb車上，重要唔係一行樓梯，係幾行！抬到上地面真係命都無！奶奶重認得話柯士甸站咪即係呢條街尾尾囉，點解唔搭黎呢度行過黎喎，佢話西鐡轉地鐡果段路都勁遠，遠到佢以為行到左佐敦喎！我都好無奈，咁老公話行好遠丫麻，我又無諗起推住bb車西鐡轉地鐡原來又唔近，又轉折，重要過唔到閘同有咁多樓梯要抬！我都覺得自己好stupid！早知都係响柯士甸站行過黎好過啦！

上到去Dr Poon度已經係遲左半個鐘，得番半個鐘頭！咁就蝕左百幾蚊！

好彩啱啱玩完放飛機，即打橫抱起bb凌空前後晃動，我地啱啱先做完苦力，真係無力咁玩！

今堂我地捐山洞，Dr Poon分左個帷幕同一個短隧道可以駁住個帷幕，每人一set。駁好就俾bb爬入去，可能我地平日都俾Ambrose周屋爬，有時我重會同佢一齊爬，所以今堂捐山洞真係難唔到佢，都唔使用玩具，只要有人响對面個洞口出現叫佢，佢就起動係咁爬，我同奶奶不斷引佢，佢就不斷爬，佢都不知幾開心，完全唔怕無猶豫。睇返其他bb都要用玩具引吓氹吓先肯爬，有d重扭計喊，Ambrose真係好叻！我地見有個bb條隧道仔係特別長，好想走去俾Ambrose爬，不過一人一set，又唔好意思走去霸人地個條黎玩咁無禮貌啦！玩玩吓連Dr Poon都走埋黎話Ambrose爬得好開心自在，我都無問佢咁即係點，不過覺得Ambrose開心自在咁爬都應該係好事！

之後Dr Poon抽起三sets帷幕隧道，要大家排隊向同一個方向爬入去出返黎，因為要Ambrose爬真係無難度，我地第一時間抱左佢過去，唔使十秒都爬返出黎，其他bb就好慢，又引又氹。我地見個個bb都排緊隊，條長隧道無人玩放左响度，即刻引Ambrose過去捐長隧道，好快，佢又爬入去响另一個出口出返黎，玩左一陣都有d唔好意思，好似自己有自己玩咁，人地嘅用意係守秩序排隊玩架麻，我地又走埋一邊玩，可能我地都太忘我猛引Ambrose捐，Auntie May開始收拾周邊果d帷幕隧道喇！

跟住就派左個廁紙芯同毛巾仔，塞條毛巾仔入廁紙芯，睇吓bb會唔會抆返條毛巾仔出黎，如果唔識就做俾佢睇！或者，俾佢睇左個廁紙芯，再用毛巾仔遮住，睇佢識唔識揭開條毛巾仔搵返個廁紙芯出黎！Ambrose小肌肉好似未係好得，見佢想抆又抆唔到條毛巾仔出黎，抆抆吓佢放棄左，轉而揸住係咁“fing”，佢真係成日一揸住d野就“fing”， Dr Poon話佢有音樂感節奏感，有梗係好啦，不過佢係唔係都“fing”一大餐，好多時係無音樂無歌仔佢都係咁，咁唔知係咪佢自己心裡面定腦裡面播緊歌呢，唔係都好難諗佢d音樂節奏感响邊度黎，有時“fing”到我有d擔心佢係唔係有問題，因為佢會“fing”到頭都搖埋，甚至乎有時會“fing”到失去平衡．．．．我諗有機會我下次要問一問Dr Poon咁樣有無問題喇！至於毛巾仔遮廁紙芯，Ambrose就睇你唔到，唔理唔理走去擒人地果d，真係激死！佢真係無咩專注力，永遠都唔會睇吓你做咩，成日望你做咩，睇一吓就走左去，根本玩唔到，唔知佢識唔識，真係頭痛，唯有只係諗bb係咁，佢唔會吓吓做到你expect佢要做嘅野出黎，唔係就唔會有咁多攪笑野發生啦．．．．

時光飛逝，唱埋歌仔就落堂！跟手推Ambrose去海港城搵位食lunch等老公，都未推到去，發覺Ambrose“long”左响bb車前面好耐無咩動靜，以為佢又食前面條扶手，點知原來佢就咁豬左！一定係爬完超累，推多兩推就瞓左啦！