面試@九龍塘啟思幼稚園

去完保易面試，爹爹飛車出九龍塘，有驚無險，面試於十一點，要求家長十五分鐘前到達，但我地只係梗梗幾分鐘前到達，真係一額汗！不過遲有遲好嘅，因為去到都重係排十一點面試果輪，得 一兩 個家長，唔使排咁濟！如果真係十五分鐘前到，咁即係一開始全世界都要排，都係等個“排”字“等”字！加上一入門口已經係outdoor playground，放哂slides同車仔出黎，好多小朋友玩緊，Ambrose一見到已經好想玩，好彩無早到，唔係咁早去到一定會玩陣，Ambrose一定玩到唔願走，格硬抱走佢去面試可能重衰！而家一去到即攞貼子即上樓面試，無得俾佢玩重好，哈哈！

 

面試課室係二樓六室，原本有升降機，不過分流問題，全世界都要同小朋友一齊行樓梯，好彩Ambrose不嬲對行樓梯都有興趣，唔使媽咪抱，哈哈！不過佢行到二樓都放緩腳步，可能佢都攰喇！

 

去到課室，已見入面有其他小朋友坐左响檯邊玩玩具，媽咪拖住Ambrose入去，佢自自然然搵左個位坐低，原本媽咪想坐去人堆之中，起碼果度檯面玩具都多d好玩d，不過Ambrose自己選擇左無人果張檯度，無辦法啦！Ambrose一坐低已經攞左果盤玩具玩，又問媽咪“咩黎架？”媽咪都唔知，因為都未見過，果盤其實係一堆膠嘅積木，有片狀同條狀，係可以砌嘅，不過媽咪真係無咩想像力，都唔知砌咩，媽咪望吓其他人檯面玩具，好似好玩d，媽咪不知幾想行去攞另一張無人嘅檯上玩具過黎玩！說時遲那時快，有個老師已經坐左埋黎喇！一黎已經問Ambrose咩名，Ambrose唔知點 解無答 老師，老師再問，媽咪再催一次，佢至肯講，好過無啦！再問邊個同佢黎架？Ambrose識答媽咪！之後再問咁“爸爸”呢？由於平時我地唔係叫“爸爸”，所以媽咪忍唔住直接問Ambrose爹爹呢？不過Ambrose都唔識答，早知媽咪之前brief定Ambrose爹爹去泊車啦！之 後 老師已經問Ambrose果盤玩具係咩黎，唔好話Ambrose啦，媽咪都唔識答呀！之 後 老師同Ambrose玩果盤玩具，好出奇地，Ambrose又肯同老師玩，重要無啦啦自己同老師笑，個樣真係好cute，哈哈！不過唔知老師欣唔欣賞呢？因為媽咪感覺老師都無咩大反應！老師手攞住一條膠條想同Ambrose交換手上果一條，唔知點解Ambrose又無反應，講多兩次，佢索性俾左自己果條俾老師，老師俾番手中果條俾Ambrose，Ambrose又唔要，好奇怪，Ambrose一向都肯同人交換，今日唔知做咩！

 

之 後 老師用果盤膠片問Ambrose顏色，真係死得啦，Ambrose未分到顏色，响佢世界入面，咩都係黃色，再唔係就係“blue”，果然，佢又係亂答一通，唯一答到係“blue”，不過俾人感覺一定係撞中啦！媽咪已經知無咩希望喇！不過Ambrose都好叻架喇，老師叫幫手收拾佢好肯收拾，媽咪叫佢細細力唔好咁粗魯佢又即時細力番，都算係咁啦！

 

問左一輪顏色，老師又攞左一盤玩具，逐樣攞出黎同Ambrose玩。攞左一個蘋果出黎，問Ambrose係咩黎，重以為Ambrose一定識，佢平時一定會講“apple”，點知佢唔答，老師問左兩次就話俾佢知係蘋果，佢又跟老師講一次，激死人！之後係一個黃色啤梨，係黃色，同平時嘅青色唔同，哈哈！Ambrose唔識定唔想答，又係老師教佢，最後係香蕉，今次終於都答到！之 後 老師要Ambrose將蘋果俾媽咪，啤梨俾老師，香蕉俾自己，Ambrose做齊，無問題！老師响盤再攞隻碟出黎，問Ambrose係咩，答到，不過其實成間房好嘈，媽咪都唔確定Ambrose嘅答案老師係咪次次都聽到，加上老師中途又要招呼新入課室嘅小朋友，好似都唔係好專心咁同我地面試！之 後 老師俾兩個蘋果同刀俾Ambrose切，叫Ambrose切完放上碟度，Ambrose索性响碟上面切，哈哈！切完蘋果，又叫Ambrose响果盤入面搵隻杯飲水，Ambrose都可做到！不過老師又走左去囉，唉！

 

玩完果堆煮飯仔，老師又攞番果盤膠積木出黎，抽取左唔同顏色嘅膠片出黎，再叫Ambrose响其中攞出指定顏色，又係問顏色！！！究竟一個二十六個月嘅小朋友係咪真係識分顏色架？配對就話無問題啫，就咁講顏色搵番出黎真係好難，至少Ambrose一定唔得囉！結果，Ambrose無响果堆抽左出黎嘅膠片中攞指定顏色，佢又去番果盤玩具度摷，老師都無阻止佢，不過佢幾乎攞錯哂！真係令媽咪冒哂汗呀！不過响另一個角度睇，媽咪都好欣賞Ambrose對老師嘅提問係有回應，真係嘗試去摷出 黎俾 老師，雖然係錯，但媽咪覺得佢已經做得好好，係認知問題，佢自己唔識都無辦法啦！搵顏色搵左一輪都係亂撞時，Ambrose曾經攞起左一片黃色，而老師咁啱又問佢咩色，原以為好興咩都答黃色嘅Ambrose今次點都中番一條啦，點知佢竟然答“blue”，媽咪真係好“blue”囉！

 

終於都問完顏色，老師最後話送張貼子俾Ambrose，响袋到攞左張星星貼子出黎，乘機又問Ambrose係咩黎，Ambrose答到星星，老師又再問呢粒係咩色嘅星星，當然，又係錯啦！老師再問左如果無上午班係咪考慮下午班，媽咪見係九龍塘學校，無上午都要下午啦，反正又唔係好想入啟思，點都好啦！

 

就係咁，見其他小朋友都未見完，我地就走得喇！分流嘅關係，走時唔可以走回頭路，出左去另一個出口！又要兜番去正門入番去俾Ambrose玩吓車仔同slide，當係獎勵佢今日表現唔錯啦！

 

九龍塘啟思幼稚園，媽咪都係第一次去，校園好靚，同區內果d真係無得比，課室又colourful，去完連爹爹都話收下午班都想仆出黎讀，哈哈！不過媽咪有保留啦！

面試@保良局易桂芳幼稚園

今日Ambrose有兩場幼稚園面試，第一間係九點九嘅保良局易桂芳，第二間係十一點嘅九龍塘啟思，時間好緊湊！不過因為九龍塘啟思都係玩玩吓成份，所以萬一保易面試耐左唔夠時間出去都會放棄！

 

今朝九點半就同Ambrose落樓下保易，諗住早少少入去學校熟習吓環境，點知一去到就見一條人龍，唉！搞咩連約好面試都要排一餐架？知唔知d小朋友真係無咩耐性咁樣排隊等架？等左一陣又陸續叫人入去，Ambrose要去第二間房，但就要等到第三定第四間先叫到入去，重要係人肉傳音咁，有個校工一路沿人龍咁邊行邊叫話第二號房可入，其實都幾混亂！入到去之後，老師又因應編號再細分兩批，六個人一組入課室面試，Ambrose剛好係第七個，所以又要坐响門口度等第二輪面試，真係一等再等，媽咪真係好心急，一來覺得Ambrose未必有耐性等咁耐，等得太耐至有得入課室面試可能表現會差，二來又心急要趕出九龍塘面試，所以媽咪簡直想罵人，但又唔可以！

 

响課室門口等待，Ambrose開頭肯自己坐，坐左一陣佢又起身唔坐，老師叫媽咪同Ambrose一齊坐，媽咪一坐低，Ambrose又乖乖一齊坐，呢個仔成日都要有人陪住先得，唉！等待時間無聊，為左唔好俾Ambrose坐得耐無耐性，媽咪不斷同佢傾計，又描述學校各設施，好彩Ambrose呢期對各樣野都好有興趣，成日都問住“呢個咩黎架？”所以媽咪不斷講野都分散到Ambrose注意力。之後媽咪想Ambrose輕鬆d，所以提議唱歌仔，Ambrose當然欣然接受啦，難為媽咪要在人前唱歌仔，係有少少尷尬啫，哈哈！唱左一系列返學歌仔，終於都見第一批小朋友行番出黎喇，每個小朋友都手持一樣花花風車，Ambrose好似好有興趣咁，於是媽咪同Ambrose講入去聽老師講故事，要答老師問題，老師就會送花花俾Ambrose，再提醒Ambrose收到花花時要講多謝！就係咁，啱啱講完就入得課室喇！

 

Ambrose隨隨行入課室，媽咪跟在其後，坐位分成兩行，小朋友坐前而家長坐後，模式係同之前上幼兒樂園一樣，所以Ambrose無問題，自己行埋位坐好。其他小朋友，有 一兩 個唔係好肯自己坐，一個要家長抱住坐後面，一個就要攬住隻毛公仔至得！課室內有兩個老師，一個在旁觀察俾分，另一個就lead住面試，一開始老師坐低就同小朋友講早晨，當然大家都無反應，老師再逐個小朋友單對單講早晨，Ambrose係第一個，原以為佢會無反應唔理人，點知老師一講佢又跟住同番老師講早晨，真係喜出望外！其他小朋友大致都唔多肯講，要老師講幾次，家長又講幾次，先至細細聲講出黎！之後老師話要大家一齊企起身唱歌仔，家長都要，音樂一開始，原來係London Bridge is falling down，啱啱至同Ambrose响課室門口唱完，哈哈，老師要小朋友雙手舉高，Ambrose又係出奇地照做，之後一路唱歌，一路拍手掌，Ambrose都有做齊，音樂近尾聲老師都未叫停可以坐低，佢已經坐低左，哈哈！其他小朋友？又係要三催四請要家長拖起雙手舉手同拍掌，媽咪對於Ambrose嘅表現真係好驚訝！

 

再之 後就係 老師攞左隻手偶出黎，話手偶公仔好污糟，要洗面面，又攞左條毛巾出黎，逐個去小朋友度叫小朋友用毛巾幫手偶抺指定地方，Ambrose被要求抺眼睛，之 後 老師問Ambrose嘅眼睛呢？老師再指自己眼睛問Ambrose係咩黎，Ambrose一一做到答到；之後係耳仔，Ambrose又係一一做到，完全無問題！其他小朋友都可以做到，不過唔係講一次問一次就有反應，都要push一兩次先有反應，去到呢度，媽咪已經覺得Ambrose表現係全組最好！

 

之 後 老師攞左一箱餅仔出黎，話爹爹媽咪一早同小朋友黎面試未食早餐，逐個小朋友派一包餅仔，再要小朋友送俾家長講多謝，同埋要鍚一啖家長！Ambrose收到餅 後同 老師講“唔該”，老師糾正佢話“多謝”，之後Ambrose轉左半身送包餅俾媽咪，佢無轉哂身，望住媽咪隔離個家長講多謝，好搞笑，由於媽咪覺得Ambrose表現好好，面試無咩問題，所以心情好輕鬆，見到佢唔係望住媽咪講多謝，媽咪都笑笑口話Ambrose唔係望住媽咪而係望住其他人講，老師都聽到笑笑口！

 

最後，老師再攞左箱花花風車出黎派俾小朋友，今次Ambrose一收到，老師未放手，佢已經好快咁講“多謝”，佢真係學得好快，唔再講“唔該”，真係醒到爆，就 連 老師都讚佢好快反應！媽咪從來無諗過Ambrose可以表現得咁好，重要同組之中佢表現最好，所以面試完後，媽咪好有信心呢間學校一定收Ambrose！

 

 

出到黎見到爹爹，都忍唔住同爹爹講Ambrose有幾叻，簡直係excellent！懷住輕鬆心情，即時上車飛車出九龍塘，唔好俾佢停喇！

面試@東華三院高德根紀念幼稚園

媽咪報東華三院高德根紀念幼稚園時都係上網見人話好，諗住報吓試吓嘅心態，點知原來報名表上午班限量派三百一早派哂，媽咪完全唔知重走上網download直接寄份表過去。老師收到表打俾媽咪話已經過左三百以外，上午班已full，只可考慮下午班，媽咪見資料都交哂，回郵信封都寄哂俾學校，唔去就蝕哂啦，所以下午班就下午班啦，都係但求去吓攞吓經驗見多d人，等Ambrose响呢段面試期有多d熱身。

 

結果面試安排左响今日一點三，Ambrose一放學就要過去，媽咪怕食唔切飯之下，要求老師改期，結果都只係可順延兩個鐘，三點三，都算好嘅，唔係無情講唔俾改！由於係平日關係，媽咪無專登請假同Ambrose面試，靠爹爹帶去，所以內容係點真係唔多清楚。

 

形式係一個老師在旁觀察記錄（應該係俾分），一個老師講故事，其間不斷問問題，睇小朋友反應，有無舉手答問題，當然，Ambrose呢part一定fail啦，要佢開口都有少少難度，又點可以要求佢主動舉手並回答丫！原先以為無咩小朋友做到，不過爹爹話都有幾個有舉手，亦有無舉手就咁答嘅小朋友，噢，Ambrose今次實fail呀！之後係俾一個籃小朋友，入面有幾隻動物玩具，老師俾指令攞邊隻動物出黎唱歌仔“fing”，Ambrose做到，不過唔係大動作，其他小朋友就好大動作喇！唉！做到都好過發呆啦！之 後 老師逐個埋小朋友度傾計送書仔禮物，去到Ambrose可能已經無咩時間，只係問左三條問題，包括咩名，Ambrose出奇地答左佢叫xxx，爹爹以為佢發力，哈哈，點知第二條問你最鍾意食咩野，Ambrose唔答，可能佢根本就咩都鍾意食，唔知最鍾意點答，爹爹引導佢答，都係唔答，唯有講一個字“提”字，Ambrose先可以自己答到“提子”，最後一條係問Ambrose最鍾意响邊度食提子？咁奇怪嘅？咩叫响邊度食提子？咁抽象，當然，Ambrose又啞左啦，哈哈！媽咪唔怪Ambrose，俾媽咪都唔知點答呀！爹爹話可能平日關係，有小朋友係婆婆湊入去面試，所以當老師問問題時，各家長尤其係婆婆湊去果d，就一尾响小朋友後面催迫小朋友你答老師xxx啦，答案都講哂出黎，而且又嘈，場面都幾肉酸，爹爹唔想咁做，真係幾無意思，所以盡量都唔催唔提，媽咪絕對贊同，所以，今次面試成功不大，不過媽咪一d都無失望，當熱身攞吓經驗！

Naïve

唉！啱啱至攪掂Ambrose返N班，即刻又要展開報K1大行動，真係煩！爹爹媽咪其實都未諗到Ambrose嘅路向，一方面覺得响區內就讀當然最方便，唔使顧慮太多點湊邊個湊點返學嘅問題，但另一方面亦都認同要俾Ambrose嘗試考出面嘅學校，唔試過又點知佢唔得，而且出面嘅學校名都響D，對於將來上小學有一定幫助，不過出去讀就牽涉到照顧問題，好頭痛！

 

因為諗住09年出生率高，出面學校競爭一定好大，本住試試心態會報九龍嘅幼稚園，不過信心唔大，因為知道Ambrose一出去見人就比較內儉怕羞，而且佢學識講野唔係太耐，比起同齡嘅都未係講得好多，所以本住俾佢試左無後悔嘅心態去考。若果真係有間好好嘅九龍名校收左至諗以後嘅野，區內出名嘅一律報哂！

 

真係唔知D學校係咪睇過通勝，間間都選左11月5日呢個全年大吉日面試！暫時嘅Schedule：

1)   9:00 >> SC (九龍)

2)   11:45 >> 保田(區內)

3)   13:10 >> KM (九龍)

4)   14:15 >> KV (九龍)

 

重有三間區內幼稚園未報所以未有時間，而呢三間都係區內勁出名，其中一間重係爹爹今朝排左兩個幾鐘至攞到下午班報名表（上午班一早已經無喇！除非半夜去排隊啦！）唔通個天都唔想Ambrose出去九龍讀？個天都想Ambrose留响現校，無學卷就無學卷？以而家咁嘅schedule，一定要响面試時取捨喇！真係頭痛！

 

另外，响搵學校嘅時候至發現，呢個世界真係好現實，靠關係識人幾時都係著數d，呢樣野唔係只响大人世界、工作世界出現，而係細至幼稚園已經出現！點解？因為一路搵學校，一路上網做research，已經見過聽過d人話有小朋友面試時唔出聲唔應人，自己個子女表現ok有問有答云云，但最後自己子女沒有offer而唔出聲嘅小朋友就有offer，講起至知原來佢地靠關係响面試前已攞到學位，根本唔需要擔心；媽咪之前亦响一d講座中聽聞有d學校係靠關係入，講嘅只係區內學校而唔係九龍塘名校，媽咪都半信半疑。及至到Ambrose入N班，媽咪都有靠家教會主席嘅關係希望入到某學卷學校N班，不過入唔到，至此，媽咪都仍然相信呢個世界無咁現實，重係有公平嘅！不過早兩日，Wing姨姨放棄做全職媽咪搵到份幼稚園工，個幼稚園校長知道Wing姨姨幫雅雯考有學卷幼稚園，校長細問Wing姨姨想入邊間，結果Wing姨姨講出心水幼稚園後，校長話呢間同個校長熟，可以幫佢攞位！雖然而家間學校都未開始報名面試，但活生生已經有個例子响媽咪面前，唔到媽咪唔信呢個世界就係咁現實，爹爹重笑媽咪too naïve！！！

 

總結，想幫小朋友搵間好學校，唔需要特訓小朋友，因為儘管小朋友幾叻都好，去到面試未必可以發揮出黎，呢d野父母控制唔到！可以做d咩？咪就係响入學前去識定d校長校監就最好，識個家教會主席都唔夠校長好！爹爹媽咪唯一可以做嘅係要排隊就早d去排隊，爭取選擇面試時間嘅機會，無其他野可做架喇！

 

而家已經唔係諗11月5日會去同去邊幾間學校面試，個天會安排；而家諗嘅係求神拜佛Ambrose果日無病無痛，可以以平常狀態去個天安排俾佢嘅學校面試，之後係點，都係個天去決定，我地呢d唔識人脈嘅家長，都只係可以諗“去到面試已經好好”！   

幼稚園開放日

今個周末好繁忙，兩日有三間幼稚園開放日，咁啱爹爹兩日都返夜，所以只有媽咪同Ambrose去哂咁多間學校！

 

星期六，去左保良局田家炳幼稚園以及保良局易桂芳幼稚園。由於田家炳較遠而易桂芳只在屋企樓下，所以先去田家炳，再返易桂芳就可以直接回家休息。其實媽咪之前完全唔知有田家炳呢間學校，係Wing姨姨話俾媽咪知呢間幾好，叫媽咪報名，媽咪知道呢間會响11月5日面試，由於已有好多間學校都响呢日面試，為左唔好煩，媽咪都無報名，之後爹爹知道左，就話唔使交報名費都係報左先算啦，所以呢間並唔係媽咪心水，真係人報我又報。

 

去完田家炳嘅感覺：

1) 商場搭升降機直達學校門口，都幾方便，不過升降機頗細，繁忙時間返學可能好迫，要行樓梯；媽咪當日無去睇埋樓梯响邊，未知環境如何；

2) 一入門口左右兩邊著formal dressing嘅老師企哂响度迎賓，感覺真係幾好，有被重視嘅感覺；

3) 開放日主題係視藝作品展，全校所有課室舖天蓋地都係視藝作品，好impressed；作品多元化而且有創意，可見學校重視美藝創意，比起其他較重學術嘅學校，呢間反而比較討媽咪歡心；不過由於舖天蓋地都係作品，課室原貌係點少少都睇唔到，某程度上又失去左開放日嘅意義；

4) 校園較細，一眼望哂咁濟，室外遊樂埸唔大，放左大型玩具組合同埋園藝植物，活動空間唔係太大，可能一班三十個小朋友都係啱啱好，亦唔覺有室內遊戲場地，唔係幾理想；

5) 老師態度勁親切，充滿笑容；見老師指點家長同小朋友一齊做手工同畫畫，完全無求其嘅感覺；即使見到媽咪抱住Ambrose企响龍頭睇畫畫狀似打尖，亦無話媽咪，重叫媽咪同Ambrose一齊親子畫畫，無嫌Ambrose咁細唔啱玩，感覺好好；加上玄關放置左一幅由唔同樂器組成嘅大畫，好多小朋友都走去攪d樂器破壞左幅畫，老師都無黑面，真係要讚；

6) 問左老師雙語其實都係兩文三語，一星期有三堂英文同普通話，其中一堂一定有外藉老師教，其餘兩堂係中國人老師講英文，聽聞九龍塘名校根德園都只係一星期一節英文咋喎，呢度都叫唔錯吧；

7) 廁所尚算清潔乾淨，只係唔明點解個廁所係水塔，一幅牆有好多水流落黎，去到地下一條槽，小朋友可以响果度vivi，vivi就自然被水帶走，媽咪硬係覺得果幅牆嘅水好似好唔衛生咁，可能少見啦，好處係小朋友未係好識對正廁所vivi都可企埋去就咁vivi囉，唔怕掂到廁所板。

 

去完易桂芳嘅感覺：

1) 屋企樓下，好近，落樓行過去五分鐘就到，唔使舟車勞動，可以好遲起身都得，番風落雨都係行幾步，超方便，加上保系學校，質數有番咁上下；

2) 講開質數，聽聞易桂芳好谷讀書，好早已寫字，重要係深字，對於媽咪比較prefer幼稚園focus on音感體能美藝德育發展多過學術成績，概念似乎有所違背；

3) 比田家炳大，室外遊樂場空間頗大，幾理想，不過似乎又係無室內遊樂場地，只有一間音樂室定特別室，落雨可能做唔到早操同體能訓練，唔知會唔會响課室做呢；

4) 課室展示平日上堂嘅裝飾，educational，不過唔係特別吸引，趣味性同色彩都一般；

5) 由於易桂芳係分流有幾節時間俾人入去玩同參觀，而媽咪又同幾位媽咪一齊去無依指定時間，所以去到時老師話距離該節時間只有半小時，媽咪等都照入，可能因為咁，好多老師見到媽咪行黎行去時都問媽咪攞左禮物未，好想推媽咪去門口攞埋禮物走人咁，感覺好差；

6) 入左間課室係咩互動白板咁上下嘅野，原來係聽故事，之後有器材俾小朋友試玩，又有投票器，其實都幾得意，不過感覺就係show off緊教具，“懶”係先進咁，不過其實有呢d先進教具係好，無其實都可以手動操作，對於幼稚園生黎講趣味性都唔會差，所以呢d教具器材反而吸引唔到媽咪；

7) Ambrose行經滑梯好想玩，佢只係停左落黎睇，無扭計，不過可能企著龍頭附近，有個老師已經好似好嫌惡咁同Ambrose講玩就要排隊，好似話緊佢打尖咁，媽咪有d反感，而Ambrose聽到亦哄埋去老師度講要排隊，不過老師完全無理佢，無appreciate佢自己識講排隊囉；

8) 完全無時間問上課語言。

 

兩間保良局比較，田家炳俾媽咪感覺人情味濃d，亦都無咁學店，只可惜學校太細！

 

另外，星期日去左雅麗斯英文幼稚園，媽咪以為呢間比起區內其他學校已屬較冷門學校，估唔到果日去到超多人，十二點想話交表，學校又做左人流控制，首先要排隊去攞張交表籌，上面寫有交表時間，依時間返去再排隊交表，就係因為十二點攞到籌要一點幾交表，所以原本唔諗住行好耐嘅媽咪被迫留响學校參觀，夠時間排隊交完表，換埋禮物同食塊餅即走，前後攪左三個鐘，攰死人！

 

去完雅麗詩嘅感覺：

1)   獨立兩層校舍，好大，而且樓梯响室內，番風落雨都唔怕上上落落同埋撇雨“線”腳；媽咪住過呢間學校附近，知道果度全年太陽勁充足，而當日又真係咁樣，學校窗口又大又多，有d課室重係兩排窗，所以課室有充足嘅太陽光，好舒服，媽咪超鍾意呢間校舍；室內地方都幾大，可以做到室內遊樂場，而媽咪完全唔記得左睇有無室外遊樂場，唔知會唔會响天台；

2)     課室如實展示，佈置可愛多色彩，很吸引；

3)   完全展示各級所有嘅書本教具，家長可盡情睇，對學校課程都可以清楚多d，真係幾好，之前參觀嘅學校都無咁做，切合開放日目標，媽咪幾欣賞；

4)   雖然有個別老師笑容欠奉，不過其他嘅都好友善；

5)   遺憾未有時間參與奧福音樂觀課，不過學校引入奧福音樂，啱哂Ambrose喜歡音樂律動同敲擊，亦證明呢間學校唔止著重學術，會大膽嘗試，印象分加分啦；

6)   問 左 老師，雖然主要以中文為教學語言，但每日都有英文普通話時段，唔會話一星期得果一堂兩堂，呢間嘅語言環境似乎都好理想。

 

去完呢三間，媽咪比較鍾意雅麗斯同保田多d，當中雅麗斯嘅環境又吸引d，加上面試日好彩無撞全年大吉日11月5日，可以去到面試，只係下午三點半瞓覺時段，表現真係凍過水喇！

SpecialLuk Level 2

唔記得記錄番SpecialLuk進度，其實Ambrose似乎唔係話好鍾意玩呢套教具，只係一開始時唔知係咩黎，有得玩就玩吓，每次玩幾個pattern就唔玩，如是者，斷斷續續玩左幾次，都係停留在Level 1！之後媽咪再想同佢玩，Ambrose一見到就擰頭唔玩，媽咪唔敢勉強，擺埋第日再玩啦！無玩兩個月，早兩晚無所事事又攞出黎問Ambrose玩唔玩，點知可能佢唔記得咩黎，又話玩，哈哈！今次媽咪索性攞左Level 2本書出黎同佢玩，唔再Level 1喇！

 

Level 2比起Level 1真係深d，因為已經唔係上下圖同配對板同一樣圖案喇！要放好配對板，就要跟上圖的細圖示放好，Ambrose勉強都有跟做到，有時要提一提！而做練習時，要攞起配對板至見到圖案再配對下圖，呢個動作係一連串嘅，起初媽咪以為Ambrose唔得，點知佢好快就明白同做到，真係好叻仔！今晚佢重完成左成個Level 2，不過Ambrose唔係好跟Level 2次序玩，佢係見到圖形有興趣至揭去果頁玩。而Level 2基本上都係越後嘅練習係越深嘅，媽咪今晚見到Ambrose可以完成Level 2最尾一個練習，即係話Ambrose已經可試Level 3喇！

 

本來想話攞埋Level 3試玩，不過Ambrose已經話唔玩喇，所以媽咪見好又要收，過幾晚再問佢玩唔玩先！如果玩完Level 3，已經可以轉玩再深d嘅BambinoLuk，不過以Ambrose對SpecialLuk嘅低興趣，睇黎媽咪唔使升grade買埋BambinoLuk啦！唔知再大d佢嘅興趣會唔會多d呢？

馬賽克手工

好耐都無同Ambrose做手工喇，今晚媽咪攞左拼貼畫薄出黎俾Ambrose油顏色，不過佢又一貫咁亂畫。拚貼圖像又係麻麻，可能太耐無同佢做手工，佢少左接觸漿糊，所以用手指撩左少少出黎之後就開始嘈話污糟，要媽咪幫佢抺手，死都唔再玩拚貼！唉！呢方面真係要多加訓練至得喇，一少左掂就咁快抗拒喇！

 

無興趣拚貼，媽咪醒起之前淘寶買番黎嘅馬賽克手工，都應該可以俾Ambrose試一試！Ambrose一直都鍾意船，所以媽咪選左船嘅底板出黎一齊做。媽咪示範左一次，相同顏色同圖形配對貼上，不過因為馬賽克嘅貼粒都幾細，加上搣一粒出黎成張貼子又好易散哂咁，所以最後唯有媽咪逐粒搣出黎俾Ambrose撕底紙貼上。但由於貼粒真係好細，一粒都只不過係媽咪指甲大小，以Ambrose嘅笨手去撕咁細嘅貼子底紙，加上佢已經好長一段時間都唔再玩貼子，所以佢撕左一陣唔得又放棄埋喇，睇黎呢份馬賽克手工又可以等再大少少時先玩喇！不過反正已經開左一張底板出黎，媽咪決定出吓力，同Ambrose一齊完成啦！

 

媽咪撕埋底紙至俾Ambrose，只要求佢跟顏色同圖形照貼上底板度，貼粒真係好細，Ambrose都要努力嘗試先至貼到。而因為每粒相隔又近，所以Ambrose貼完一粒再貼一粒時，有時都會貼左部份貼粒上去之前一粒貼粒上面，令到貼粒唔平，佢自己都知道唔平，所以有時佢就會大力拍吓幅圖，諗住拍番平佢，哈哈！當然都係要媽咪出手整番好佢啦！

 

呢幅馬賽克手工，就係媽咪同Ambrose一齊完成架喇！最欣賞係中間紫色柱嘅圓形貼粒同埋輪上嘅紅色三角形貼粒，全部都係Ambrose手起刀落好準確咁貼上，貼得真係好好，圓形部份全部覆蓋，貼三角形時亦留意到方向而跟隨轉動貼上，只有一丁點覆蓋唔到，算係咁啦！

踩腳趾

今晚開飯時發生件小意外！Ambrose唔知幾時走左去爹爹身後面，當爹爹响廚房攞左碟餱一個轉身想放上檯上面嘅時候，一腳就踩左落Ambrose嘅腳趾度，媽咪見到嘅時候，只係見爹爹為左避Ambrose而一仆一碌咁濟，而Ambrose就超好笑，坐左响地下，捧住自己被踩嘅腳，喊到個嘴成一直線。唔知點解，媽咪覺得佢呢個樣真係好好笑，哈哈哈！媽咪攬住Ambrose，佢就係咁講唔知咩野，可能係投訴爹爹踩到佢啦，不過以爹爹咁嘅份量加上無情力，又真係好痛嘅！媽咪唯有分散Ambrose注意力，問佢有無腳趾唔見左，數吓先，Ambrose聽到至識收聲睇吓d腳趾齊唔齊，嘩哈哈！真係又可憐又可笑！

Sit Down

返左學嘅Ambrose真係好好唱口，成日都唱歌仔，雖然歌不成歌，但起碼佢好自得其樂，重會走埋電子琴度係咁自彈自唱，好開心！今晚媽咪同Ambrose一齊唱歌仔，Ambrose攞左自己張小椅子放响琴後，然後同媽咪講Sit Down，自己扮老師彈琴唱歌，媽咪好surprised，唔係因為佢代入 左 老師角色，而係佢嘅一句Sit Down，又令媽咪覺得Ambrose返學越黎越學到野喇！

交表－保良局易桂芳幼稚園

估唔到Ambrose啱啱先開始返N班，新一輪嘅K1入學申請又要展開喇！Ambrose而家返果間學校唔係唔好，日日都有英普環境，Ambrose學英文都快左好多，之不過呢間無學卷，要响呢度讀四年，學費真係貴過媽咪當年讀大學呀！N班度度都無學卷咁就同佢讀呢間先，當俾多少少上英普Playgroup。但K1已經有學卷，爹爹媽咪都想搵吓有學卷嘅學校，搵定左先再考慮係咪真係轉校啦！

 

保易就近在屋企樓下，由落樓到幼稚園門口都唔使五分鐘，加上保記一直又係質數嘅保障，連繫又有保系小學同中學，學費扣埋學卷一個月都唔使一百蚊，真係平靚正。不過媽咪一直都有所保留，總覺得保易係比較傳統嘅幼稚園，如果入呢間，之後條路好順理成章保小保中，唔使諗其他，但就好似都幾填鴨同埋好大壓力。加上朋友們都不下幾次同媽咪講呢間幼稚園好多同胞入讀，媽咪唔想歧視，但事實一個好嘅學習環境對個小朋友好重要，唔講學術，只係講德育，呢一點媽咪對同胞持保留態度！

 

雖然媽咪唔太喜歡保易，但呢間都係區內熱門幼稚園，又近在自己屋企樓下，加上面試日同放榜日都同在十月份，幾乎係全區最早知道結果嘅一間學校，所以唔喜歡還唔喜歡，呢間都有一定嘅吸引力，至少報左又收左嘅話，之後再面試都無咁大壓力麻！所以媽咪一早都Download左報名表填好哂等今日去交表。

 

今日交表時間係十點鐘，因為以前未有小朋友時都已經見保易交表時排哂長龍，所以媽咪預九點至九點半落去排隊，但爹爹話唔得，九點都嫌遲，佢話要八點幾落去望吓先至安全（因為有朋友話越早交表號碼越前，收生都會考慮號碼越前越有機會）。由於爹爹要返夜，朝早成九點先返到屋企，所以媽咪搵左爺爺八點三過黎幫手睇住Ambrose，順便經過時望一望有無人排隊。如無，Ellen姨姨話佢書房見到保易門口，如果八點半至八點九佢起左身就幫手望一望情況再決定，如未起身媽咪就自己落去睇架喇！到爹爹九點返到黎時又可以望吓個情況，咁即係八點三至九點呢段期間都keep住知道排隊情況啦！媽咪諗住呢個安排真係好好，唔使花太多時間走去排隊，又可以盡早交表！

 

點知今日晨早七點一左右，手提響起，媽咪瞓緊覺都唔知咩事，只係下意識接左電話，聽見係嫲嫲把聲，佢叫媽咪起身落去排隊喇，因為佢返工落樓見到保易已經有十幾個人排緊喇！真係唔係麻？！十點交表，七點已經十幾個人，d人係咪傻架！媽咪當堂醒哂啦，由於家中只有媽咪同Ambrose，媽咪唔可以即時落樓，所以即時打俾爺爺，好彩爺爺起左身，佢話即時過黎幫媽咪排住先，等Ambrose起身之後媽咪就去接力！同一時間媽咪whatsapp埋d朋友仔，通知佢地情況有變，如果唔怕遲少少，就起身先再排，擔心嘅都係盡快落去排啦！

 

就係咁，媽咪經歷左好多家長都會為子女做嘅無聊野，就係晨早排隊，真係估唔到媽咪都做埋呢d野，哈哈！無法啦，近到咁都唔排咩？好似過唔到自己喎！而且又明知多人排，唔排第日後悔就唔好啦！希望唔好再有第二間攪d咁嘅野就好喇！

 

由於咁早已經有人排隊，未夠九點半條隊已經長到睇唔到龍尾，學校可能見太長龍，提早俾家長入去課室辦理手續，媽咪排得好前，大約係十三、四左右，所以九點半入得可以即做，時間約左去廿二號九點九，呢個時間好丫，啱哂早起身嘅Ambrose！媽咪攪掂哂出門口，望吓條隊，仍然唔見隊尾，真係好彩嫲嫲冒遲到俾老細知道嘅危險都要幫Ambrose排隊，再加上爺爺超快趕到同嫲嫲接力，唔係我地邊有排得咁前丫！媽咪見到校門有張通告，原來面試日只有三個時段，而每個時段都安排六十個考生面試，即共見一百八十人，而聽聞K1上下午班共四班，每班約三十人，如果只計上午班學位，即係只收六十人左右！一百八十人收六十人，即係三份一機會，如果排位越前都係考慮因素之一，咁媽咪起碼都穩企十幾位啦，以六十人計，排十幾應該都叫安全！不過都要睇Ambrose面試嘅表現喇，好似今日咁，佢同媽咪排隊排得耐都好想走，以佢咁怕陌生嘅性格，媽咪如果唔同佢一早排隊，真係危危乎！

灣仔書展收獲

今日媽咪好勁，响灣仔書展買左一堆書返黎！哈哈！多得同事指點，媽咪只攻十蚊區，十蚊一本嘅activity book，真係好抵，啱哂俾Ambrose開展初期練習，畫花哂整爛左都無咁心痛麻！咁之前買落嘅“貴”價活動書，都係等佢個人定d唔攪亂檔先開始用啦！今日買左十七本，超抵！媽咪最鍾意Lego貼子活動書，主題係playhouse同pirates，而其中playhouse果本入面果d人仔Ambrose都有，雖然間屋就同佢果間有唔同，不過主題差唔多，媽咪諗住Ambrose有得對照，應該做得投入d，所以媽咪執左同款兩本，呵呵！有一本Flying High嘅貼子書，真係超抵，書入面嘅物料係可以令d貼子重複使用，同埋亦有counting同coloring嘅概念，本書底重貼左張三聯書局嘅價錢牌，原價原來都要$25，而家$10，真係好開心！另外，媽咪都買左幾本教畫公仔嘅書，就算Ambrose有排都未ready學，媽咪自己都可以跟住學，因為媽咪對於畫公仔真係好差，而Ambrose又成日叫媽咪畫公仔，有左呢d書，至少媽咪都可學吓麻！

 

成堆書入面，有三本係教數學概念嘅，Ambrose都要幾歲先識架喇，不過十蚊本，忍唔住都買埋先！其實會場入面有好多故事書，媽咪只係買左一本關於圖形同朋友嘅書，唔敢買太多喇，因為圖書都係去圖書館借好d，費時攪到成屋都係Ambrose嘅書同玩具，真係無地方放喇！

晨早唱歌

今朝早Ambrose六點幾起身，係咁想叫媽咪起身同佢玩，媽咪好眼瞓呀，雖然俾佢整醒左都係繼續扮瞓，抖多一陣得一陣麻！Ambrose見叫唔醒媽咪，自己瞓响枕頭上面自得其樂開始唱歌，大大聲咁，真係多得佢唔少！來來去去都係唱佢新學識唱嘅小寶寶同埋果句ABCDEFG囉！睇黎佢開始投入學校生活喎，臨瞓同起身都係咁要唱歌，哈哈！

油門

早幾日已經收左樓，初步清潔左之後，發覺間屋都唔係好殘舊喎，要執嘅野又少d，可以慳返d喇！間屋唔係自住，都係租俾人，所以好多野，慳得就慳啦！亦因為咁，我好想做一d平時唔可以做嘅野，就係自己油房門喇！買齊哂材料，包括平底漿、磁漆、沙紙同埋油掃等，盲摸摸開始油漆工生涯！哈哈！早幾日初步油左兩隻房門，油完都好沮喪，似乎唔係想像中咁易，磁漆真係好難先掃得薄同均勻，每次落掃油都有落掃個印，即使我大力d定細力d，來回油多幾層都一樣有一撻撻印，究竟要幾輕力先至無？真係好難攪！  

忍唔住打俾大哥同老豆問吓，大哥又瞓左覺，老豆又唔聽電話，迫住去問唔係好識油油嘅二哥，問完都好似無咩得著，哈哈！揣摩多一陣之後，似乎又有少少領悟，但由於天色已暗，無白光好難再油落去，所以收工！都好丫，都要等底油乾左先再油多層好d麻！  

今日放假，同完呀仔去玩，又走左去油門，今日用左個半鐘油左成隻大房房門，之前經驗累積左，似乎今日掌握得好好多，反而無之前咁小心奕奕，但效果相當唔錯！唔係專業人士，但我自己相當滿意喇，簡直覺得自己油油有天份呀，只要有時間嘅話！哈哈！再睇番老公油果d，唉，唔係話好差，不過就流哂眼淚咁，我油果隻無架！  

最衰無時間啦，唔係我都好有興趣自己油好一屋嘅門，同埋好想試吓油牆，我諗我都應該整得唔錯架！

彈古箏

Ambrose第一次睇表舅父彈古箏已經好有興趣，佢可以好安定咁睇，最多都係手多多又想彈埋一份，佢唔會走左去唔想睇，大家都覺得Ambrose音樂感高，有見及此，媽咪都希望盡量同Ambrose多參與音樂會，等佢識多d唔同音樂樂器，奈何唔係好多音樂會俾咁細小朋友參加！所以每次去表舅父屋企，食完飯都必定要表舅父演奏吓，Ambrose就會好開心坐定定响表舅父隔離睇住！  

今晚又去表舅父屋企喇！Ambrose一知道去表舅父度已經全程講表舅父彈琴琴，到一入屋又不停講，成日問住表舅父去左邊，佢真係好期待。食完飯，又係演奏時間，表舅父唔見左個彈絃線片，彈唔到。Ambrose自己走埋去坐低，學表舅父用手掃絃線，似模似樣，自得其樂咁！媽咪教Ambrose勾線都有聲，唔一定撥先得，Ambrose都有照做，當然佢手指未係好靈活咁去勾，頂多都係撳到條線，哈哈！人地話要入名校一定要學樂器，樂器之中，唔計鋼琴，係要學d唔係咁多人學嘅至得，唔知古箏夠唔夠特別呢？大d可以考慮搵表舅父教彈古箏喎，哈哈！

小寶寶

早幾日Ambrose都未識唱哂成首小寶寶，今日媽咪突然聽到Ambrose唱哂成首喇，雖然成首得三句，哈哈！小寶寶，微微笑，背著書包上學去～～  

另外，ABC S song可以唱到ABCDEFG，好清楚，但係HIJK就唔太清楚咁蒙混唱過，係啱旋律，比起之前無咩旋律同埋唱ABCD之後就無啦啦OPQ又有少少進步喇！  

媽咪發覺自己都幾懶，平時學校嘅書都無同Ambrose睇番，歌仔又無同佢唱，其實唔睇書都應該要同佢唱吓歌仔，佢自己唱到都好興奮架麻！

N班上學第二十天

2011年10月4日，Ambrose今日返學無喊，好叻仔！聽聞佢今日返學重好風騷，笑哂咁俾老師拖入去，重同爹爹講拜拜！媽咪無緣睇到添！希望佢以後都咁開心返學就好喇！

有時做父母真係好矛盾，送佢返學，好想佢獨立唔好喊，有時諗番轉頭，當有一日佢唔再痴住我地果時，又好似好唔捨得咁！又想佢痴住自己，又想佢成長獨立堅強，呢種忐忑嘅感覺，真係好差！

又打風

今日又打風呀，三號風球，Ambrose又唔使返學喇！媽咪開始覺得打三號風球都好易，咁攪法，Ambrose好易唔使返學咁！都好嘅，果日打八號風球，咁啱Ambrose起身發燒，爹爹重話佢識揀打風至黎病，無浪費喎！果日之後Ambrose都重係有少少咳同鼻水，今日唔使返學，就當俾佢抖多d啦！