火箭與城堡

一直都未有時間update番！

 

多謝哂blog友Vivian嘅努力搜索，竟然俾佢搵到大屋嘅代理商，可以直接上代理度買埋火箭，個價錢仲要平過書展價，真係太好喇！

 

原本媽咪都只係諗住買埋火箭就算，上星期上到代理度取貨時，都係忍唔住加碼要埋城堡，諗起都好玩喇！

 

Home Art Jamming @ 公園和貨櫃車 (3y)

好耐都無同Ambrose畫水彩喇，雖然明知佢一見到有得畫水彩一定會好開心，但因為之前份工收工比而家夜，食得飯，執得野黎都晏晏地，而且次次返到屋企佢都沖哂涼，如果再俾佢畫水彩，分分鐘又要再沖過喇！而家轉左工，較啱時間收工搭車，通常七點已經可以到家，開飯執野全部都可以早返少少！今晚撞正Ambrose未沖涼，媽咪又ok精神，所以就開壇同佢畫水彩！

 

其實Ambrose細個就話坐地下玩，而家佢咁大個，坐地下畫都有少少輪盡，不過响地下舖張膠檯布就畫得，係暫時黎講最方便嘅，畫住先啦！同以前唔同，Ambrose細個嘅時候就係咁篤，亂畫一餐，之後一定會好快將唔同顏色撈埋一碟，而家佢大左，可以認真少少揸畫筆去畫野，唔會亂咁撈埋d顏色喇！

 

見佢手起筆落係咁畫，開頭都係好似亂黎咁，可能要warm up吓啦，始終水彩同crayons唔同，而且坐地下畫真係唔係好就到位同力咁！畫左一陣，見成張畫紙已經畫滿哂，Ambrose話呢個係公園喎，而中間果架有車碌嘅係車喎，但其實媽咪開頭以為佢畫緊大笨象囉，哈哈！

 

畫完一張，Ambrose本來想返轉張紙再畫，因為平時用crayons畫畫都係咁，好彩截停左佢，唔係，一定無左幅畫啦！媽咪俾過一張新畫紙俾Ambrose，佢又係唔使點諗，已經响度畫線條。今次，好明顯係一架車，Ambrose自己話係貨櫃車！媽咪問佢咁d貨呢？佢响車尾部份畫幾畫，話係貨！再問，咁架車係行緊定停左响度，佢就走去畫紅綠燈，意思係停緊車！不過由於畫筆佢用黎用去都係果枝，媽咪又無教佢要洗筆，所以畫筆上面嘅色已經mix埋一齊了，所以紅綠燈都係差唔多色，哈哈！再問Ambrose，咁架車响邊度，會唔會响水度，定係佢會响咩地方行架？佢就去畫左車下面條線，係馬路！最後，Ambrose要求媽咪幫手畫司機，因為果個位太細，佢根本畫唔到，所以媽咪都幫佢畫左個人仔上去（其實好核突，似馬騮多d）！成張畫，大功告成！

 

Ambrose畫完兩幅畫，其實都意猶未盡，不過因為要剪頭髮，所以要叫停佢喇！媽咪感覺畫水彩好似無以前咁麻煩，可能而家Ambrose定少少，同埋佢自己有野想畫，可以唔使點理佢，唔似以前坐左响度唔知做咩，亂畫亂篤一番，而且佢又知道唔好行出檯布以外地方，比較易控制！如果下次又撞正佢未沖涼，都可以多同佢畫水彩囉！係要諗諗個setting，俾佢企响度畫會好d，不過都可能要等搬左屋至轉到模式了！

Ambrose話係公園

以為係大笨象

有紋有路畫貨櫃車

初試交通工具puzzles @ 22 August 2012

漏左寫Ambrose初試交通工具puzzles添！

 

多謝Herman媽咪送左呢盒puzzles俾Ambrose！媽咪之前將佢收埋，諗住Ambrose都未得架喇，點知有一日俾佢發現左呢盒野，見到有車車自然就好興奮，成日都話要開黎玩！

 

由於砌puzzles都應該要不少講解同埋精力，所以媽咪要搵日無咁攰先同佢玩！今晚終於都俾Ambrose等到！佢一開盒就話要砌最難果架車，十塊喎，媽咪好肯定佢最易六塊果set都唔得，哈哈！好唔容易叫Ambrose由低砌起，果然佢都係眼力一般，可幸嘅係佢都會嘗試將凹同凸嘅puzzles砌埋一齊囉！經媽咪不斷提示佢應該點砌，佢都開始明明地嘅，只係有時佢都幾心急，見凹凸就猛咁砌，咩方向都唔理，哈哈！大致上，佢都可以經媽咪口頭提示下砌到，佢砌完自己都好開心，重不停砌完又拆，拆完又砌！

 

其實有時覺得玩具教具係要放出黎俾小朋友玩，佢地自己都會好鍾意不斷try and error，不斷練習！就好似媽咪之前唔會放crayons出黎俾佢任意畫，一定係有媽咪在先有得畫，但之後媽咪覺得咁樣佢少左好多機會畫野，又覺得都係顏色啫，平日嫲嫲都應該可以handle到，所以之後都放哂出黎，結果Ambrose真係愛上畫公仔，而且又真係畫得幾好咁（雖然屋企幅牆亦因而遭殃）！

 

媽咪正在掙扎究竟可唔可以放puzzles出黎俾佢平日try and error自我練習多d，始終，Ambrose一玩就可能散滿一地都係，嫲嫲又未必有眼力同佢玩到咁，到時玩到周地都係，又有可能會整爛，到時媽咪實發顛都似，所以暫時放左落玩具櫃度，佢有興趣先自己攞黎玩，費時擺响佢檯面咁當眼，一個唔該唔知fing哂去邊！

 

p.s.同晚開埋之前買嘅Haba木制puzzles俾Ambrose玩，超唔掂！木質一般，仲要木面有顏色嘅地方部份剝落，搞到砌完都一忽忽咁！好失望囉！枉佢特價左都要賣成一百大元！之前在淘寶買過d平價木製手抓板，質素仲好過佢呀！都未計原來佢puzzles面幅圖同底下係有少少唔同，Ambrose同媽咪都俾佢誤導左！講真，一係就一樣啦，一係就無囉，又要差唔多樣又要唔同，搞到Ambrose勁問媽咪點解咁咁咁，又搵唔到相應嘅puzzles出黎，真係嘥氣呀！

Mickey’s Rockin’ Road Show@25 August 2012

一年一度嘅Mickey Show又黎喇，Ambrose 咁鍾意Mickey，媽咪一定買飛同佢睇啦！仲要係早在五月有得優先買飛果時已經買定喇！今年就貴喇，同樣只係山頂飛，上年一張$100，兩歲唔使錢，即係$100兩個人入場，好抵！今年，一張飛要$150，升幅真係驚人，仲要Ambrose剛夠三歲，要俾錢喇，大小同價添呀，即係$300兩個人，貴左三倍！本來Ellen話浠浠身形同個樣可以呃得吓人，但媽咪相信以Ambrose嘅身形，應該好難仲話佢得兩歲，佢自己都會話自己三歲，萬一人地問起就唔多好啦，所以都係唔慳喇！

 

本來次次睇show都預早左時間出去，但次次可能都要就小朋友晏覺或各樣而遲左！Ambrose今次都好乖，知道有show睇就好合作去瞓覺，所以佢上車時好精神！相反，浠浠無瞓過，本來應承左Ellen上公路就瞓，結果多多野講，加上Ambrose自己玩引到佢唔願瞓，哈哈！最後，個show在九展開，佢就响到鑽石山附近時瞓左！結果，媽咪同Ambrose先下車食野，Ellen陪浠浠瞓多陣至落車！

 

食完野，又要搵廁所vivi，最後都係趕住入場咁濟，原本打算睇吓有咩紀念品賣都無時間喇！

 

入左場，媽咪同Ambrose影相，點知唔小心向後行時踩左落下一層嘅椅背後嘅隙縫度，整傷隻腳，鬼死咁痛！坐定定之後，媽咪同Ellen見前排有人攞住個米奇望遠鏡好得意，已經猜想係紀念品之一喇，媽咪好想即刻落樓下買！不過問過Ambrose，以佢咁緊張嘅個性，開場前又點會俾媽咪離開佢丫，果然，佢直頭話媽咪唔好走開，哈哈！結果，Ellen放低左浠浠自己落去三樓買，真係唔該哂佢喇！其實會場入面都有物品兜售，不過係成$70一桶嘅爆谷，媽咪一定唔會買囉！個望遠鏡咁靚，都只係$70咋，呢個抵d！

 

記得上年嘅Mickey Show都有少少悶，可能因為大多數係泰山、史廸仔、獅子王等無咁hit嘅公仔人物啦，又勁多唱歌，所以幾悶！今次好好多，大部份時間都係Mickey、Minnie、Goofy同Donald一齊，又有Toy Story，又有跳跳虎，呢d全部都係Ambrose識嘅人物，而且又有故事情節，仲有架靚靚道具車，今次Ambrose明顯睇得投入好多囉！

 

個show去到中段時候，台上有d大波碌落去觀眾席度玩，算係有d亙動，Ambrose見到好想玩，仲話點解我地唔坐前d！下年，媽咪帶Ambrose睇show可能都要開始考慮選擇性地唔坐山頂喇！

 

Harry哥哥 x 樂之優兒 -“魔幻木偶奇遇記”

之前同Ambrose睇過幾次Harry哥哥嘅show，以為佢咁細個都無咩印象，睇完就算！點知原來佢真係記得，仲成日提起Harry哥哥，甚至乎已經俾佢感染左，成日响屋企表演魔術，好搞笑！

 

見Ambrose咁鍾意Harry哥哥，於是今年又好努力搵吓佢有無show搞，以為佢又會做今年嘅國際綜藝合家歡，又無喎！好失望之際，發現左呢個“魔幻木偶奇遇記”，應該係Harry哥哥搞嘅！雖然明知應該係“樂之優兒”學生嘅表演多，但劇名用埋Harry哥哥，相信唔多唔少Harry哥哥都會有表演掛，所以唔理喇，照買飛！

 

因為爹爹要返工，所以無車出，楓叔叔又唔揸車，媽咪要自己搭車喇！本來以為可以同Ellen一齊搭西鐡，點知佢原來唔記得左要睇show，約左人，所以佢要出去先，即係話媽咪要同Ambrose兩個人搭車出尖沙咀咁遠，都真係第一次，哈哈！

 

等Ambrose瞓醒再落樓食野至出發，原本預左時間好似好鬆動咁，不過瞓醒晏覺嘅Ambrose動作又超慢，出得門口再行去餐廳食野都已經好遲，無法啦，唔可以唔食，又驚出去唔熟路唔知去邊度食，所以遲左都要食！坐低叫完野食等左一陣，嚇然發現已經六點，個show七點半開始，Ellen話搭西鐡要預一個鐘，但餐廳距離西鐡站步行黎計，最快都要十分鐘，但拖住Ambrose就應該要雙倍時間，野食又未到，媽咪突然覺得好緊張，唔知會唔會遲到，d飛仲响媽咪手呢！

 

好彩，食物終於到左，而Ambrose真係好乖仲要好快咁自己食左一碗烏冬，登時令媽咪鬆一口氣！極速食完野，行左出去商場門口，仲猶豫緊應該步行去屯門站定搭輕鐡去兆康站轉西鐡好，似乎兩者都需時，媽咪好少搭西鐡輕鐡，真係唔知道究竟邊樣快，煩惱之間見到有輕鐡行走，靈機一觸，決定搭一個站嘅輕鐡去返屯門站，代替步行，又唔使怕輕鐡去兆康站原來仲慢！本來已經走左一架輕鐡，好彩另一架一分鐘就到，於是急急抱起Ambrose上車！去到西鐡站，非常好彩地有車快要開，媽咪衝入最近嘅門上車，本來一車都係人，竟然有個好心人讓位俾媽咪同Ambrose坐，實在太好喇！由六點鐘仲响餐廳無野食，到六點半已經上左西鐡，呢半個鐘頭真係好驚險呀！

 

好順利，七點一左右已經到尖東站，又話要一個鐘嘅？！

 

由於早左到，同Ambrose去埋廁所都仲有好多時間，本來叫Ambrose影吓相，呢個小朋友好搞笑，成日好易緊張，佢一緊張就只會集中落果樣野度，叫佢做其他野佢一定唔肯，死都唔肯影相！其實都幾似媽咪！仲要開始可以入場，d人慢慢行入場，但因為媽咪要等埋Ellen先可以入，Ambrose真係急到喊起上黎，係咁話入得喇，快d行啦！d人見佢咁仲以為佢扭計，其實佢真係好緊張囉！好喇，終於等到Ellen黎到，一齊入場，見條樓梯有咁多氣球同勞作咁靚，叫極佢都唔肯影相，係都要入場！最搞笑係，媽咪見入場又要分單雙數坐位排隊，而隊尾附近有部汽水機，本來媽咪想話買罐汽水入去飲，都俾Ambrose死扯住去排隊入場，都唔知係好嬲都好笑！

 

一如之前expect，個show其實係樂之優兒嘅學生表演，又歌又舞又話劇，對白仲要係全英文，好利害！d英文仲要係好typical嘅外國口音嘅英文，勁好聽囉！雖然都見有d學生係外藉人士同埋mixed，咁好聽嘅英文真係唔奇，不過見佢地小小年紀就一口流利英語，又咁大膽在台上表演話劇，真係覺得佢地好叻！希望Ambrose多睇呢d表演對於日後有機會在人前表演可以無咁緊張同埋有信心d！

 

其實Ambrose咁細，套劇又全英文，故事又未聽過，有d舞台表演都幾抽象，媽咪都要响旁邊解話，唔知Ambrose明得幾多！不過好明顯，佢知道講大話會“長鼻鼻”，媽咪見佢咁認真，再講埋如果唔聽話都會有“驢子耳朵”架！哈哈哈哈！返到屋企，佢都仲講緊“長鼻鼻”同“驢子耳朵”，真係入哂腦喇！

Ambrose上新畫班之二十五(3y)

今堂畫貓頭鷹，Ambrose都畫得唔錯，雖然可能老師有幫手畫，但見其他同學仔果隻都變左一pat野咁，Ambrose呢隻都算似架喇，wahahaha！今堂媽咪早左上去等，見到Ambrose好專心畫上下果兩條啡色紙條，其實都唔知咩黎！落堂問老師，老師話果兩條係樹枝喎！點解咁多圈架？！

再搵畫班

今日返畫班，中心職員通知中心做到9月16日，唔係搬，係唔做！唉！一早都話呢間野咁新又唔多覺佢好多人報，又一d都唔aggressive，上畫班仲有wet tissue提供抺到乾乾淨淨至走，畫完d畫可以响中心個畫架到等吹乾下次或好耐之後先攞返又得，仲可以俾成班家長坐响中心等小朋友放學，呢d中心咁好，唔會好aggressive要慳位慳時間排滿哂時間表同埋要班家長响門口等，遲早做唔住！以而家細路仔興趣班咁暢旺嘅景況之下，估唔到中心真係唔做！究竟係做唔住？定係負責人唔想做呢？

 

唉！中心唔做，媽咪又要煩過Ambrose嘅興趣班安排喇！之前見Ambrose畫畫好似畫得唔錯，仲同爹爹商量等佢再大多少少，去間專業少少嘅畫室學，始終而家呢個畫班，其實個名只係塗鴉班，真係塗鴉多，又會好似playgroup咁唱歌仔，感覺係玩多嘅！呢頭至講完等佢再大多少少，可以跟到老師畫一下佢跟一下黎畫先，果頭就話中心唔做，連塗鴉都無得玩喇！

 

至慘就係當初報呢間塗鴉班時，其實係報另一間專門少少嘅畫室先，但果間畫室無位，只可以waiting，咁媽咪就照wait！早排，應該係一個月前左右，畫室來電話有位了，足足等左佢半年至有位，可想而知幾full，但媽咪當時又諗住呢度學得輕鬆d，返開左又費時轉黎轉去，反正都諗住再大少少先轉好少少架麻，所以婉拒左唔要個位！

 

而家無左個位後至話無得上塗鴉班，真係頭都痕埋！始終見Ambrose近日畫野真係幾好，而且暑期班老師亦有致電媽咪講番Ambrose上堂表現時，都有提及畫畫老師讚佢畫畫有自己概念，可以唔使人講，心中已有幅圖畫自己想要畫出黎，而且小肌肉有力，叫媽咪可以多多培養佢畫畫呢方面，所以當媽咪一聽到中心唔做，真係好煩囉！

 

放左學後同Ambrose去返之前turn down左位嘅畫室再問，又無位喇，又係要wait！都唔知要wait到幾時！最慘係Ambrose同媽咪講唔鍾意呢間畫室！當媽咪問Ambrose學跳舞定畫畫時，佢又揀學跳舞，其實一直以來佢都係唔鍾意上畫班，只係見佢無扭計，媽咪都照同佢番學！有時都好矛盾，明明見佢鍾意畫畫，但係又唔鍾意上畫班；明明老師話好好培養佢畫畫，但偏偏呢個時候又要停落黎，咁即係點呢？究竟媽咪應唔應該同佢搵畫班好呀？

Home Art Jamming @ 人仔和八爪魚 (3y)

再行開一陣番轉頭，諗住要Ambrose換衫著鞋出門口，佢都係要繼續畫，都唔明佢嘅，明明都係去畫班架啦，叫左幾十次換衫著鞋出門口都唔郁，係咁自我陶醉咁！

 

不過呢一次番轉頭叫佢，又令媽咪好surprised！原來Ambrose已經畫左兩個人仔出黎，今次好勁，佢竟然畫埋一條一條嘅頭髮，唔係以前鬼畫符咁亂圈一堆就叫頭髮！仲有就係佢竟然detail到畫埋衫鈕，眼睛又多左一個圈圈住！真係估唔到佢畫人仔嘅技巧又高左喇！之後Ambrose叫媽咪幫佢畫個電話俾人仔，當時人仔其實未有手，媽咪就話佢要電話呀，咁佢用咩揸住電話呀？Ambrose望一望就已經快快咁幫人仔畫手喇，今次，都係媽咪第一次見佢畫手唔係火柴手，而係嘗試畫手掌，果一刻真係好想攬住佢大讚一番，哈哈！之後佢就要媽咪畫個相機俾另一人仔，今次佢唔使媽咪講，已經即時去畫手了！媽咪d畫功當然係好差啦，Ambrose見到之後都問左句，“咩黎架”？？真係唔好意思喇！哈哈！

 

原本以為Ambrose畫完可以收手換衫啦，點知佢突然在兩個人仔之間開始又畫野喇！真係俾佢激死！

 

見佢畫個圓形又有眼又有口，以為又畫太陽伯伯啦，點知再見佢畫左d一條條打孖嘅線，唔係平時太陽果隻一條線，再望吓個口，媽咪又係勁surprised佢應該係畫緊octopus，好想忍住唔問Ambrose係咩黎，都係問左！醉心畫畫嘅Ambrose直至畫完至答媽咪，係“八爪魚”！呢個八爪魚嘅畫法又係唔同左，以前佢畫八爪魚，係畫左個圓形，响下面就畫好多條線話係八爪魚嘅腳，而家呢個畫法，係畫班第一堂教畫八爪魚嘅畫法，從來都無見過Ambrose咁樣畫番出黎，今日第一次！不過佢畫完之後，又多手去填顏色，隻八爪魚咁細，佢要填色當然就好易出界啦，如果唔係填左色，真係好似架！連佢自己都要俾自己幅畫兩個貼字呀，好好笑！

 

今日Ambrose真係俾左好多驚喜俾媽咪呀！

Home Art Jamming @ 蛇與Dolphin (3y)

行開一陣，番轉頭再睇Ambrose，今次佢畫左條蛇，再指住粉紅色身果團野話係“Dolphin”！媽咪有少少驚訝，條蛇就話中間爹爹畫左一條做版佢跟住畫啫，但爹爹媽咪都應該無同佢畫過Dolphin，而且，佢自己仲話Dolphin個咀係“尖”架，同埋要係粉紅色！雖然好多書都話Dolphin係灰色，不過媽咪唔知幾時見過有粉紅色架喎，哈哈！睇落其實條蛇同Dolphin真係畫得似模似樣！讚！

 

不過唔該條Dolphin可唔可以唔好同條蛇一樣間條pattern囉！

Home Art Jamming @ 三眼仔(3y)

呢排Ambrose好似對畫畫好有興趣，繼之前不停要油顏色，又成日畫車仔、人仔之後，今日返畫班之前，趁媽咪好忙執野出門口嘅時候，佢自己又走左去畫畫，媽咪番轉頭睇佢，已經見有個人仔同埋一個三眼仔，哈哈！

 

不過原來三眼仔只有一條天線，佢畫左三條，好搞笑！

做功課 @ 動動手

K1開學之後，學校由以前每星期一本功課加一項小肌肉訓練變成每日都會有一本功課要做！不過其實咁細個小朋友嘅功課，都只係一頁紙咁多，好容易，基本上五分鐘一定做起！但問題係Ambrose 一直都好鍾意做功課，成日同媽咪講要做功課，以前就話有心機有精力嘅時候，會同佢做媽咪買嘅workbook，但真係要有精神先至同Ambrose開始做！但而家因為要做學校功課，而學校功課又只得果一頁咁多，Ambrose根本滿足唔到，成日都話要做埋後面果d，有時媽咪都俾佢做多一頁（咁下次可以skip一次唔使做，哈哈），同埋一定要攞媽咪功課出黎同佢做一輪至心息！講真，有時收工攰到死，雖然功課都唔係難做嘅，但要坐定定陪佢做，同佢講解，其實都咪話唔辛苦！

 

今晚同Ambrose開左呢本動動手黎做，簡單d！之前同Ambrose做畫線練習時覺得佢有時都唔多明點畫咁，今晚同佢做嘅時候，佢又好似唔使媽咪講就知道要點畫！好似有d好簡單嘅迷宮，由入口要行到出口，唔太複雜嘅，佢都可以自己手起筆落咁畫出黎，同埋跟形狀畫線都比之前好左少少，短短時間佢就已經有進步，有時呢d一小進步又令媽咪好鼓舞，真係要的起心肝同Ambrose多“做功課”至得！

 

另外，Ambrose近月以黎好鍾意油顏色，有時媽咪好攰而佢又要做功課，媽咪都會同佢油顏色，唔知係咪因為多練習，總覺得Ambrose油顏色越來越好！以前佢會知道唔好出界，但因為心急，成日大筆大筆油，所以最後一定會出界；但而家佢真係會盡量小心唔油出界，亦會盡量油到見唔到白色，態度唔同左！

 

今晚一晚，Ambrose已經做左四十幾頁！

Ambrose三歲生日會 – 後記

總括Ambrose三歲生日會，媽咪其實好滿意，尤其是自己親手做嘅佈置，得到各朋友們嘅讚賞，真係好有滿足感！另外，媽咪最鍾意放煙花果一刻，真係好靚好靚，媽咪覺得同個蛋糕真係好夾，果一刻見到個蛋糕，諗起之前由無idea到整到出黎，效果亦好好，又係好有成功感！最記得放煙花時各人都扮吹candle，亦有人以為真係可以吹熄，係咁吹係咁吹，其實煙花candle夠鐘就會熄，但各人都咁開心投入，氣氛真係好好！雖然好多人都會去麥當當開生日會（媽咪一個月已經參加了四次了），真係好方便，買個蛋糕咩都唔使理就攪掂，但媽咪由始至終都無諗過去要麥當當開生日會，只係選擇一係屋企一係無就算，因為始終場地所限，自己攪嘅生日會真係有氣氛好多同埋彈性大d，所以，即使辛苦少少，都係值得！

 

完左生日會之後，其實都有一陣子猶豫、檢討，下年生日，係咪應該再攪生日會呢？今次生日會籌備時間短，而且只有媽咪獨自處理，所以攪得比較辛苦！而媽咪最大心血，就係攪場地佈置，但結果發現，媽咪嘅心血，換黎一對手指甲邊爆烈勁痛，手臂因為不斷泵氣第二日極酸軟，真係辛苦到想罷工！但睇番相片，原來爹爹都無咩時間同d咁靚嘅佈置好好地影吓相留念（都有一兩張不過就唔係清場影囉）！仲有就係成個生日會攪左幾個鐘，相就只影左二百幾張，大部份都係成班小朋友一堆混戰緊，一係就係其他人嘅相，一係大合照，有自己嘅相又或者有自己而又是是正正嘅相，真係唔多，仲要係媽咪中間發覺未影相捉人同自己影番至有，如果唔係可能忙吓忙吓唔記得哂架喇！

 

再諗吓生日會當日，媽咪足足花左半日去攪佈置。其實當日係Ambrose生日，但因為媽咪忙，所以反而希望Ambrose入房瞓覺唔好攪住，再三諗番，其實生日就更加要同佢開開心心咁過，為左生日會，就咁浪費左半日時間咁！

 

生日會期間，亦唔見得可以陪住Ambrose，因為太多野要安排，之前要準備佈置，去到要準備野食，食緊又要準備遊戲，玩緊就更加忙，玩完又要開始準備執野，媽咪自己都無咩點食野，亦有好幾次Ambrose叫媽咪坐定定陪佢食野，有時都諗，究竟生日會係攪俾人地開心定係自己開心？當然媽咪深信Ambrose一定開心嘅，只係媽咪自己太忙，無法與眾同樂啫！

 

生日會另一煩惱事，就係雖然叫左朋友唔好買禮物，但最終都係收到一堆禮物！講真，現實d講，禮物呢d野未必份份啱心水，咁樣收到一堆之後，其實真係唔知可以點處理！响教養角度黎講，亦唔想Ambrose收到一大堆禮物，好似禮物得來太易又太多，唔識珍惜、感恩！環保角度講，寧願佢地封利是就算，起碼可以買到自己心水嘅野，亦唔使一下子塞滿屋企地方！

雖然生日會令媽咪有不少反思，不過媽咪知道Ambrose有咁多朋友仔同佢慶祝，一齊顛左一晚，又放肆地食左三杯啫喱，真係好開心！媽咪嘅辛苦都係值得！會不會有四歲生日會，要再慢慢思量了！

幾個月前見有sale而買下嘅玩具，最後充當生日禮物！

Ambrose三歲生日會 – 當日情況

場地佈置篇提到嘅氣球佈置，其實已經差不多係成個生日會全部嘅佈置，好彩一車迫迫地可以車哂過去！原本以為整好哂d佈置，去到都應該幾輕鬆，不過因為表哥表姐一齊跟車到左，要顧及佢地又要攪埋少少其他佈置，時間上都係慢左！本來諗住去到會場再整多幾朵氣球花，但最後都只係整多一兩朵就停左，一來今日整左成日已經好攰；二來雙手頭二指指頭因為要不斷將氣球打結而令指甲與下低之指甲肉不斷拉扯，早在家中製作時已紛紛爆開流血，痛到死；三來眼見氣球柱加banner擺埋一齊已經好靚，其他原本嘅idea都係暫且放下吧！始終一個人嘅精力真係有限，要求真係唔可以太高！唔再整氣球花，媽咪就整埋“3”字氣球小座就算，同埋吹埋巨形party signage貼在門外，一切佈置總算完結！

 

佈置完成左，之後就係扭波波喇！趁小朋友未到，諗住扭定d出黎擺住先，點知可能忙左成日，媽咪一到扭波時，個腦突然一片空白，即使連最簡單嘅劍都完全記唔起點扭！可想而知獨自攪場地佈置真係令媽咪完全虛脫！諗黎諗去，試左一輪至記得番點扭劍，再過多一陣，試多一陣就記得點扭laser gun，但其餘果d本身練得無咁熟，真係完全洗腦！

 

好彩嘅係媽咪之前不斷練習扭波，都知道自己資質有限，加上時間實在太少，intensive籌備生日會又令媽咪體力真係有d透支，所以媽咪對扭波一環其實都唔太有信心做到心目中嘅standard！媽咪靈機一觸諗起唔知幾時見過有d動物吹氣長棒，小朋友見到又係會玩得一餐，於是即時上網搵，終於花左兩晚時間搵到一間最近嘅淘店，務求盡快送貨，以備不時之需！不過呢間淘店只做批發，一個款最少訂十二個，不散賣！媽咪睇中四個款，真係無理由買四十八個，生日會小朋友其實只有十幾人，唔需要咁多！媽咪即管問每個款要半打，收貴d可唔可以賣俾媽咪，又得喎！不過計落條數，其實媽咪只要放棄一個款，買三款共三十六個仲抵過四款夾埋得廿四個，所以媽咪最後落實要三個款！三十六個好似好多咁，不過睇comment話有部份會漏氣，賣家話送膠水可痴番漏氣位，但膠水唔可以寄空運要用普通快遞，需時幾日，而媽咪已等不到喇，要求賣家唔要膠水發急件，只係梗梗响生日會前一日收到，真係一額汗！而因為有呢d吹氣棒，小朋友個個都攞住黎玩，好開心，所以即使媽咪真係扭唔到太多花款嘅波波，其實已經唔重要喇！最估唔到係d小朋友攞住d吹氣棒呀，扭波劍同槍已經玩到失控！

 

之前一晚難得抽到少少時間同爹爹一齊度生日會run down同埋遊戲，生日會場地book左五點鐘，預一個鐘頭set up，大概六點半至七點開始食野，諗住朋友們五點鐘到可以响出面室內playroom玩一陣，六點半七點入返活動室開餐，食到咁上下就玩少少遊戲，諗住約八點左右可以切蛋糕，九點左右可以陸續散場收拾場地！但朋友們大多都六點幾至到，所以原本打算六點半開餐都唔得喇！時間一路向後推，場面其實都一片混亂，又要等埋未到嘅朋友們，又要calm down班小朋友，同埋捉番走左去出面playroom玩緊嘅朋友仔，咁樣一攪已經七點幾先正式食野！

 

當然，遊戲時間都因為咁而要推遲，不過都堅持响開餐半小時之後，八點前開始！之前同爹爹度好左有幾樣Ambrose最愛嘅物件收埋响會場入面，要小朋友幫手搵出黎，不過因為去到個場地發現得四幅牆，可以收埋嘅地方實在有限，所以呢個遊戲set up都幾難，哈哈！不過唔緊要，準備左都照玩！原本諗住係小朋友玩嘅遊戲，但一講要搵咩出黎個個大人都四出去搵，最後當然都係大人搵到再俾小朋友交番黎啦！最攪笑係有大人一早已經知道物件放响邊，都未講已經走左去攞喇！同埋有d物件係講之前由媽咪搵地方擺，有人見到媽咪行去邊度，就即時行番去搵，好奸呀！

 

玩完搵野，之後就係期待已久嘅爭櫈仔遊戲喇！小朋友玩爭櫈仔，真係要用小朋友高度嘅櫈仔，呢個遊戲玩得成，都係多得嫲嫲有個在幼稚園工作嘅朋友，响生日會前無啦啦通知嫲嫲學校要換櫈仔，舊櫈要掉哂，嫲嫲朋友覺得浪費所以問嫲嫲要唔要！就係咁，因為有一批櫈仔，所以爹爹媽咪諗到要玩爭櫈仔喇！開頭都驚佢地咁細唔識玩，不過經過媽媽們示範之後，佢地好似又識喎！睇佢地氹氹轉行到老遠一聽到音樂停就即彈返去搵櫈坐，真係好笑！最搞鬼係Ambrose有一轉搵櫈坐，其實佢都好快架喇，不過兩張櫈同時有三個小朋友坐（小朋友細粒係兩張櫈都夠三個人坐），而佢係最邊果個，佢自己都知道唔得，一坐低就喊左出黎，嘩哈哈！雖然佢係壽星仔，但其他人都無意思免佢唔使輸，所以遊戲繼續！而最後贏左果個一定係大表姐囉，因為成班都只係得果三歲嘅小朋友第一次玩，同個六歲玩過好多次嘅小朋友，其實唔玩都知佢一定會贏啦！

 

玩完遊戲，抖多一陣就切生日蛋糕喇！個蛋糕媽咪只係响爹爹去攞時影左幅相俾媽咪睇過一次咋，媽咪自己都好心急睇吓個蛋糕真身！不過班小朋友重心急，個個都圍哂去張檯度等開盒！一開出黎大家都嘩嘩聲，大家都俾蛋糕上嘅咸蛋超人公仔吸引住，七口八舌咁問d公仔係真定假，食唔食得，攞唔攞得！哈哈！其實個蛋糕加左d公仔後真係幾靚，個咸蛋超人朱古力牌比想像中要好！不過諗諗吓如果無左d超人公仔，其實個蛋糕咩都無，只係做多左一層火山，而上次在舖頭以另一款超人蛋糕做參考，蛋糕面上有好多彩色波波，師傅都無做到，只係唧左幾朵忌廉花，d超人公仔仲係媽咪提供，講真，收八百幾蚊，其實都幾貴囉！嘩完一輪，都係切蛋糕嘅時候，媽咪攞出之前準備左嘅煙花candle，點起，三枝煙花不斷放，真係好靚，亦都好切合超人蛋糕主題，媽咪覺得真係幾perfect！

 

未食完蛋糕，班小朋友已經又走哂出黎玩！今次仲搵左個有份量嘅爹爹出黎扮怪獸，成班小朋友攞哂長棒，扭波劍同槍去打怪獸，真係好開心！本來場地只可book四個鐘，理應到九點，不過因為開始遲了，而間房咁夜都唔會有人再用，所以我地可extend多一個鐘，俾小朋友玩多陣，同埋預時間執番d野！

 

最終，本來叫左朋友們唔好買禮物來，仍然有一堆禮物要攞番去！花左半日時間整嘅氣球佈置，始終都帶不走，只有兩個哈哈笑小座同埋大米妮頭俾大二表姐取回家，其餘嘅都只可以留在場地，真係好唔捨得，但又無可能又車回家！本來所有鋁質氣球都聲稱可以放氣收藏下次再用，不過放左一個party signage之後發覺氣球面都皺哂，而且未能完全放氣，摺唔埋，所以都要忍痛放棄佢地！

 

終於，Ambrose三歲生日响九點半正式結束！

好難得嘅一家三口合照

氣球佈置

氣球佈置加banner

party signage

咸蛋超人蛋糕加煙花candle

吹氣動物長棒

生日會部份物資sponsered by ellen and kula

Ambrose三歲生日會 – 扭波篇

參考天天生日會，發覺原來只要有氣球，班小朋友已經玩到顛哂，基本上呢個item係must buy嘅！不過由於媽咪唔識扭波，如果純粹泵個氣球出黎玩又略嫌單調左d，所以媽咪唯有上you tube學扭波，扭番d槍槍劍劍先至有氣氛！其實媽咪都好驚扭波嘅聲，果d似爆非爆嘅聲真係令人無勇氣一手扭落去！但，媽咪唔學就無人整架喇，所以都要一鼓作氣去學囉！

 

結果，發覺在香港普通店舖買到嘅扭波氣球，又薄又易爆，媽咪已經被嚇到魂飛魄散喇！簡單嘅劍都還可以扭到，但要扭laser gun又或者花，根本就無可能！加上見到you tube示範果d望落都好似長好多，唔明點解自己買果d好似完全唔掂，後來，媽咪發覺原來扭波氣球原來有分不同粗度，而其中一隻260就係常用粗度喇！為此，媽咪總覺得平時買到果d唔係standard，所以媽咪一心要買呢隻260！

 

媽咪於是响淘寶搵呢隻260扭波氣球，其實都唔知係咪真係有分別，又唔知淘寶嘅質素係點，都係撞彩咁去買。

 

結果，淘寶260扭波氣球真係同平時買到嘅唔同，厚身d同埋堅韌d，真係要讚！有左呢d厚身嘅扭波氣球，媽咪開始左每晚對住you tube學扭波嘅生涯！呢段時間真係超辛苦呀！因為除左自己好驚扭波，心理上都要去克服扭波嘅聲之外，其實可能自己真係無咩天份，睇住you tube見人扭好易好輕鬆，但到自己嘅時候就扭極都唔順、唔得！加上因為媽咪知道生日會當天根本上無可能可以睇住you tube去扭，即係話，除左要學識扭第一次之外，媽咪亦都要練習憑記憶可以扭番出黎！籌備時間唔係太多，加上260到手之後先至真正可以開始練習，真係好大壓力！再加上有幾晚實在太攰，忍唔住走左去瞓無練習，第二日起身之後又好後悔！

 

本來媽咪target學嘅槍劍已經學識，但後來媽咪發現其實黎生日會嘅小女孩亦唔少，為左顧及呢班女孩，媽咪又要學吓扭神仙棒、花花同蝴蝶等！鎖定左幾段學扭花花嘅片，足足學左幾晚都扭唔到一朵，真係超級沮喪，好彩神仙棒同蝴蝶都勉強可以！

 

最難果朵花，爹爹同媽咪扭過幾次，都係唔得！想像一下一條扭波氣球，對摺左之後，再要分成三圈，再三圈成S形摺叠，去到呢part，其實成條氣球已經好脹架喇，再要將叠埋一齊嘅三圈大力對壓，在中間處交叉對扭，點樣可以扭到呢？第一，媽咪對手唔夠大去一下攞哂成叠圈；第二，再要用力壓實交叉對扭，真係要好大力，you tube嘅人好輕鬆就扭完，真係難以置信！就連爹爹都要用好大力氣去扭，但連260氣球咁堅韌都爆。好可能當中有d竅門爹爹媽咪真係唔知，學極都唔識，所以媽咪唯有放棄了！

 

响好無助嘅時候同姑姐講起，佢又開始學扭花。證明媽咪真係無天份囉！姑姐一開始扭唔到六瓣花花，都係四至五瓣，但都叫成功扭到丫。媽咪係未試過成功扭到一次，哈哈（不過其實媽咪由始至終無捨難取易試扭少瓣數嘅花就真嘅）！姑姐學扭而初次成功扭到五瓣花嘅時候，其實已經係生日會前兩天！

Ambrose三歲生日會 – 場地佈置篇

未知道生日會Banner係咪真係可以順利整到，如果無，個場地又唔係細，真係會好寡！所以媽咪一方面拜托表姐設計banner，另一方面不斷諗點佈置場地！其實場地佈置都離不開氣球，所以在當初訂260扭波氣球嘅同時，媽咪都順便睇埋普通氣球！估唔到淘寶入面嘅店舖好專業，成間店舖可以只賣唔同種類氣球，而且亦有唔同佈置packages，同埋參考圖片！有d簡單嘅佈置如氣球花更加有短片睇哂點整，真係俾到唔少ideas俾媽咪！

 

不過响搵氣球嘅時候，媽咪其實想試訂氦氣回來自己泵氣球，因為媽咪在網上睇中左一對行走米奇米妮，用氦氣泵好之後可以自己企起身，高度應該高過Ambrose少少。同樣產品在香港買已入氦氣嘅米奇都要二百幾蚊，一對就已經四百幾蚊喇！一枝細氦氣around二百左右，行走米奇米妮共百四，其實都唔係平左好多，但一枝氦氣應該夠泵一對行走米奇米妮之餘仲可以再泵多少少其他氣球。同爹爹商量過，佢都係覺得唔安全，始終唔知道入面氣體會唔會爆喎！咁又係嘅，大陸嘅野真係要好小心至得！爹爹話寧願貴少少在港買已入氦氣嘅行走米奇米妮！

 

不過要買都唔係容易事，要去到好遠至有得買，仲要諗埋點樣攞兩個咁大嘅氣球返入屯門！揸車當然係得啦，不過為左兩個氣球過海攞又好似油錢都蝕埋，真係唔值咁！而且就算有行走米奇米妮，亦唔代表唔使其他裝飾！所以媽咪決定放棄行走米奇米妮，索性用全普通氣球加一d鋁質氣球做佈置！

 

無行走米奇米妮，媽咪見有鋁質立體大米奇米妮頭，好靚，所以諗住一定要買！至於點整，之前都無咩概念，但後來見到網上圖片，見有人整左氣球柱，柱上面就係綁左大米奇米妮頭，超得呀！咁樣整米奇米妮真係唔錯，可以自己控制高度，而且全部都只係用普通氣球就可以，唔使再買咩氦氣！

 

不過媽咪上網見人整氣球柱大多都會用底座作支架，而柱頂嘅大氣球通常都泵左氦氣令個氣球唔會頭dup dup，媽咪諗左好耐，究竟唔用底柱同氦氣，係咪都可以整到咁嘅效果呢？於是又上you tube不斷搵片睇同研究，但都無咩結論咁，始終唔實習過唔知真係得唔得！但又真係無可能响屋企實習一次得至訂氣球返黎，一來咁早整左都留唔返去生日會用，二來整完先訂可能唔夠時間！最後，媽咪再三研究，覺得應該可以，所以都係冒險一試，訂左一大堆氣球返黎！

 

由book到場地至生日會當日短短兩星期，媽咪可以話超級辛苦，因為每晚都要等Ambrose瞓左至可以靜落黎做野！又要上網搵片學扭波，同不斷好似溫書咁睇片，務求要將所有野記入腦，生日會當日就好似考試，溫哂書當日就要發揮哂出黎，其實把握只係一半一半而已！尤其是氣球柱，真係唔知整唔整到，扭波都重可以不斷練習，但氣球柱真係要即日整，得就得，唔得就無架喇！最慘係媽咪滿腦嘅諗法只有自己知，只得媽咪一雙手做，無其他人可以幫手！而如果早一兩日整定d氣球又唔可行，一來有可能漏氣或爆，二來亦係最關鍵原因點解唔可以整定，就係剛泵好嘅氣球表面會好有光澤好靚，但放耐左之後就會暗淡無光！要即日一次過一個人整好哂所有佈置，而且又未試過，媽咪真係覺得好大壓力，可能讀書果陣都無咁誇張，哈哈！

 

八月十九日早上起身，等爹爹湊走Ambrose返畫班，媽咪就開工喇！開初只係試整哈哈笑小座，本身只係由一層細波加一層大少少嘅波組成，但媽咪嫌放在地上又矮得濟，放在檯上又大左少少，結果媽咪自己再加多一層大波，整好之後，高度perfect，同Ambrose差不多高，哈哈！

 

整完哈哈笑小柱，媽咪對整氣球柱開始有少少信心喇！不過由於諗住去到場地至整，所以先整左幾朵大花先！整整吓花又諗起之前買嘅勁粗長氣球，諗吓其實佢可唔可以自己企到支撐住一個鋁氣球呢？如果可以，咁可能用一個長氣球就可以頂住一個鋁氣球，造工應該簡單同快好多！所以媽咪忍唔住一試，結果，可能媽咪太貪心，將長氣球吹得太長太高，紮好左之後就發覺因為可能太高嘅關係，柱身有d搖擺！網上見有人會紮一個已入左少少野嘅氣球响底部，目的應該係用重量定住條柱，媽咪即時叫爹爹買包鹽返來，入好再紮在柱底，但似乎唔係柱不夠重要而搖擺，而係柱與底座之間駁位支撐點有d薄弱令柱身搖擺。於是媽咪又試整多一圈氣球加在駁位位置，得左！成條柱即時有支持，可以唔搖喇！

 

媽咪發覺整落似乎都唔係想像中咁難，於是開始試整氣球柱喇！整好左各層氣球後綁埋一齊，開頭都驚會好似之前條柱咁會因為太輕太高而支撐唔到，不過原來擔心都多餘，媽咪好順利整好左兩條氣球柱喇！

 

其實响媽咪整緊氣球柱之時，Ambrose已經放學返來，本來要佢去瞓覺，媽咪就閉門工作，點知佢又唔瞓，係都要迫入書房睇媽咪做咩，結果就俾佢知道媽咪攪咁大壇野，即時唔肯瞓，話要睇，又話要幫手泵波，真係多得佢唔少！

 

見咁順利整好氣球柱，其實媽咪都有少少懷疑架車可唔可以一次過載咁大堆氣球過場地架喇，不過爹爹隔空無見過成屋氣球佈置又話得，而媽咪又因為樣樣咁順利好想快d完成埋開始扭定波波，咁去到可以無咁忙，所以媽咪攞埋大米奇頭出黎泵氣，順便又睇埋個效果！點知媽咪可能太貪心，明知鋁氣球唔可以泵太脹，媽咪又怕擺一晚好快漏氣，所以泵多少少，脹d好睇d！點知泵好左備用嘅時候個米奇頭突然爆左！媽咪見到真係好想好想喊，因為成個場地佈置嘅重心就係呢對米奇米妮柱，而媽咪係無買spare嘅大米奇米妮頭，只有細頭！企响隔離嘅Ambrose見到媽咪好傷心嘅樣，又見米奇頭爆左，隔左幾秒後話我好唔開心呀，之後暴喊！唉！媽咪何嘗唔係丫，兩星期以黎嘅心血、期待，就連最令媽咪困擾嘅氣球柱都可以完成到，就响臨門一腳嘅時候爆頭，真係唔知用咩黎形容媽咪果刻有幾沮喪！如果爆果個係米妮頭都無咁傷心丫！

 

安頓左Ambrose之後，佢話要吹埋個米妮頭，好啦，見佢咁慘就順吓佢啦，點知佢企响小矮櫈上面un吓un吓就成個人V形咁un左落地！原本以為好彩無撞到頭仔，只係pat pat痛，點知原來佢跌落地果下“及”到條脷，條脷滲血暴喊囉！

 

泵好左個大米妮頭，媽咪發覺唔可以紮上去氣球柱上面，驚柱太高陣間上唔到車！同埋將所有佈置攞哂出黎之後就開始驚覺，唔知上唔上得哂架車度？！原本都仲想整多幾朵氣球花，都係要收手喇！雖然距離心目中要做嘅佈置仲差少少，不過諗落都唔係好多未做起，去到場地整埋都ok啦，個心當堂定哂！

 

至於無左個大米奇頭但已整左條柱出黎，可以點？原本爹爹話去搵吓有無類似嘅氣球賣，不過由於佢又要去攞蛋糕，又要分別接兩個表哥表姐過來，又要打點所有物資運送，佢都無時間理喇！好彩媽咪買左幾個鋁氣球，將其中一個印有Happy Birthday嘅星型鋁氣球紮上去，勉強都ok啦！見有細米奇頭而又未諗到點整，將佢泵脹左用膠紙就咁痴上星型氣球上，都不失可愛嘅！

Ambrose三歲生日會-蛋糕篇

Ambrose兩歲前成日都會去尖沙咀山林道上playgroup，記得一歲生日前，爹爹媽咪曾經經過山林道入面嘅一間蛋糕店，見到d立體蛋糕好靚，有公仔可以放上去，顏色又好colorful，不過價錢好貴，當時心諗，小朋友生日咋喎，使唔使咁誇張？！

 

不過三年下來，呢d立體蛋糕已經大行其道，就連傳統餅店美心都有做立體蛋糕！媽咪有見Ambrose今年三歲，已經識懂事好多，所以今年想買一個立體蛋糕俾佢開心吓！

 

一個立體蛋糕起碼要三磅重，其實如果唔攪生日會，只係家人一齊切蛋糕，三磅己是一個很大嘅蛋糕了！雖然之前都未落實開唔開生日會，但媽咪已經決定今年要訂個立體蛋糕了！

 

咁啱Ambrose去完天天同竣竣生日會之後，佢同媽咪講想要一個咸蛋超人蛋糕！本來媽咪一心諗住買thomas就算架喇，因為呢款公仔common一d，要訂都好方便，但聽見Ambrose咁有主見咁要求超人蛋糕，又點忍心拒絕佢丫？！

 

不過，要知道咸蛋超人並唔似thomas同公主果d咁common，雖然之前有段時間hit過一排，但到最近又俾spiderman取代左！媽咪上網搵咸蛋超人立體蛋糕，其實都不外乎係白底紅邊加兩隻黃眼嘅Q版超人頭蛋糕又或係半身蛋糕，媽咪覺得顏色似乎太少了，整體感覺好plain，唔吸引！不過礙於Q版咸蛋超人本身係咁嘅樣，唔想太單調，真係要自己諗一諗點整好喇！

 

諗蛋糕款嘅同時，媽咪已經鎖定左山林道呢間蛋糕店訂，原因係好多人話佢嘅蛋糕好味，而且蛋糕款可以同師傅傾！由於媽咪完全無idea整咩款好，覺得師傅可能做開有idea可以brainstorm一下，加上立體蛋糕要提早三星期訂，所以媽咪八月頭走左去呢間蛋糕店度訂左先！

 

其實當日去到媽咪都仍然無idea點整個蛋糕，只係唔想成個蛋糕咁求其整個白色咸蛋超人樣！去到店舖時，師傅聽到媽咪唔想咁整，推介左一個最近整嘅超人蛋糕，其實都只係一個兩層高嘅蛋糕，有好多唔同色嘅粒粒，再加上現成嘅超人公仔痴上去，雖然唔係咸蛋超人，但師傅叫媽咪買幾隻咸蛋超人公仔放上去，咁睇落又似乎都幾好，起碼食左個蛋糕，d公仔都可以留番黎玩，唔會咩都無！其實都覺得師傳都無心同媽咪諗架喇，都係推一個整過嘅蛋糕款改動吓啫，不過算啦，如果人人都搵佢由零諗起，佢都會好忙喇，所以見佢推介果個款總好過一個白色人頭蛋糕，所以都同意了！同埋原本蛋糕後面有個朱古力牌，佢話整咸蛋超人logo ，其實媽咪都唔知logo係咩樣，見原先個蛋糕好似係五星戰隊，個logo其實係一堆字，唔知咸蛋超人個logo又係咪字，好似怪怪咁，所以提議左師傅，不如整個咸蛋超人頭，好過整logo，唔係到時Ambrose唔知係咩黎就浪費心機喇！

 

就係咁，好似好簡單就攪掂左個蛋糕！不過師傅都好好，叫我三日前交番d咸蛋超人公仔返去，如果中間個蛋糕有野想改都可以，所以其實落左訂，都仲可以諗吓再通知佢想點整！

 

咸蛋超人公仔，又係一大難題！之前hit過一排就好多地方有得賣，又靚又多款，而家過左氣，度度都無啦！仲要受蛋糕所限，太大隻公仔又唔擺得，真係唔知可以去邊度搵喇！上網見到有人bid扭蛋咸蛋超人公仔，靈機一觸去留意附近嘅扭蛋機，果然有收獲，不過得一個系列，仲係成個系列得三個公仔，個咸蛋超人仲要唔係傳統紅色，而係藍色！唉！算啦，搵唔到都要扭！$16一隻，一連扭左兩隻出黎都係同一款超人，媽咪覺得唔對路，幾時先扭齊三隻？

 

最後媽咪都係放棄喇，搵日落轉福榮街搵好過喇！

 

八月十一日，終於出左福榮街搵，皇天不負有心人，真係俾媽咪搵到！本來屬意想要Q版咸蛋超人，不過Q版得一款，質素又麻麻地，都係正常版多款少少同型d！最後揀左一款係有Ambrose鍾意嘅箝箝怪獸，真係好心滿意足！八月十四日，交左d咸蛋超人俾師傳，順便，媽咪有個idea，將原本平平無奇嘅第二層蛋糕，改為做一座火山，火山頂淋上橙紅色朱古力扮岩漿，配合番咸蛋超人打完怪獸好興掉隻怪獸入火山嘅情節！不過好唔好彩，當日落到店時師傅放假，媽咪只可以就咁講低俾店務員知就要走！

 

離開之後個心忐忑不安，一來唔知交去d咸蛋超人係咪可以放得上個蛋糕度（唔知會唔會高得濟同企唔穩）；二來又唔知火山idea做唔做到！好彩夜晚時師傅打黎同媽咪講可以做到，蛋糕造型總算confirmed，可以將心思放到其他籌備項目度喇！

Ambrose三歲生日會 - Banner篇

生日場地都未可以接受預訂，媽咪已經當場地confirm左黎辦，唔係嘅話，真係未必夠時間做！

 

有天天生日會做藍本，媽咪其實都應該好輕鬆，只要攪掂食物安排，其他似乎都唔係咁緊要！有見天天生日會有張靚靚Banner，真係sharp好多！其實間活動房都唔係細，樓底又高，如果唔整d裝飾，就咁擺d野食出黎，真係好似好dry，所以媽咪都有諗過整Banner！問過Kula佢嘅banner只要幾十蚊就已經有6 x 3尺喇，真係好抵，但大前提係佢有朋友幫手design，佢只係將個稿send去print shop印出黎就得！媽咪完全唔識design呢d野，又唔知用咩software，似乎又無人可以幫手design！探聽過爹爹整banner嘅software係點同埋易唔易整，都似乎無咩結果！唔直接叫爹爹整係因為最近爹爹都好忙，而且又唔知道爹爹會唔會反對，覺得做得太多，所以媽咪寧願自己解決！既然無人識整，咁就上網睇吓有無人講！睇左一輪，總係覺得自己整真係唔多work，再睇埋俾錢人design，真係好貴，quote左一間要四百蚊，仲係細細張嘅，發覺可能要放棄Banner了！

 

八月二日，就係將要放棄嘅時候，媽咪突然諗起Vivian表姐好似係做Graphic
Design，即管問吓佢，結果佢話有齊哂圖同相其實都好快可以攪掂，所以媽咪厚顏地請Vivian表姐幫手設計 banner，好彩佢無托手踭！不過咁急搵人幫手，媽咪當然要先預備好哂相片同圖片啦！相片一定無問題，因為多數相都係單反影，解像度都夠高！但咸蛋超人嘅圖片，一來好難搵，二來搵到嘅像數都唔會高，媽咪搵左成晚，先勉強搵到幾幅圖，都唔知用唔用得著，要俾左Vivian睇左先！

 

果然，圖片真係麻麻地得，但Vivian話做banner唔會近睇，唔太高要求都可以接受，媽咪無異議，畢竟要求別人幫助，提供嘅資源又有限，要求自然唔可以太高了！

 

八月十二日，收到初稿，其實只係原本download嘅圖再改動左少少，同埋其中一個超人係key左Ambrose個頭上去，呢個係媽咪唯一要求，估唔到又真係做到，好鬼攪笑！不過其中一張相係同媽咪合照，其實原意只係搵唔到Ambrose正面靚仔相，諗住唔夠相可裁呢張相嘅樣出黎用，點知連媽咪都見埋樣。因為始終係Ambrose嘅生日會，媽咪要求Vivian表姐換過一張相。

 

八月十四日，收到修訂版本，無野要改喇，所以一返工就send去print shop攪printing，即時去7-11俾埋錢proceed印刷了！

 

八月十五日，原本print
shop話交錢後48小時可取件，可能媽咪寫左第二日取，而佢地又做到，所以一日時間就可以去攞喇。咁心急要攞嘅原因係諗住Banner印出黎之後有咩唔妥都仲有時間執麻！

 

結果，收到Banner後好滿意，雖然放大左之後真係有少少唔清，但其實遠睇又唔係咁大問題！今次呢張Banner整左7x3尺咁大，只係用左$49！真係超級多謝Vivian表姐嘅幫忙，如果唔係生日會真係會失色不少喇！

Ambrose三歲生日會 – 食物篇

原本諗住生日會在中午舉行，食物可以預得簡單一d，點知中午無場，被迫搞夜晚，成件事好似複雜左！之前諗嘅小食應該唔夠，一定要有飯粉類飽肚食物！但太多食物又好難安排，當然叫到會一定得，但價錢貴！

 

粗略估計生日會人數有四十人左右，幾十人嘅食物如果要自己整哂真係好花時間，而且要保持各食物嘅熱度有一定嘅困難！另外，因為之前見識過表姐聖誕節時大收禮物大拆禮物嘅瘋狂情景之後，媽咪真係好唔希望同樣嘅事情再發生，因為實在太奢侈了，好多小朋友未必可以咁幸福可以有一件玩具，而大表姐當日就有成廿幾份玩具拆都拆唔完，而且毫不珍惜，見到都令人有心有戚戚然！所以今次生日會，媽咪決定呼籲朋友們不用預備禮物，如果想表達心意，不如幫忙帶一份食物來生日會，一來可減輕媽咪預備食物嘅壓力，二來亦可以環保d，唔想為送禮物而送禮物，始終別人送嘅禮物未必咁啱心意，都係浪費嘅一種！

 

好可惜，只有朋友仔們未買禮物，可以幫手整野食，同學仔們可能一早已不停追問媽咪攪唔攪生日會而知道生日會一定攪成，只是地點形式問題，所以各同學仔都已預備好禮物，無可挽回！

 

Idi整菠蘿腸仔，Wing整雞翼，嫲嫲整魚蛋燒賣，姑姐整沙律，Zina整rice pudding，媽咪同Ambrose負責啫喱！餘下嘅芒果糯米磁，炒飯及炒米粉，決定叫到會解決！

 

雖然食物唔算多款，但念及仲有一個三磅生日蛋糕，加上成班小朋友一定掛住玩唔會點食野，大人要睇住小朋友又會懶得食，基於party慣例一定有好多食物淨番，所以即使感覺唔係極豐富都好，媽咪覺得足夠了，反正朋友來生日會都不為食而來吧！

 

生日會前一晚，同Ambrose一齊整二十杯啫喱，Ambrose不知幾開心！一路整仲一路係咁話好香，好想就咁“食”左d啫喱咁款，好鬼好笑！