Ambrose三歲生日會-落實篇

一直以來，都無諗過要同Ambrose開生日會，呢兩年都係屋企人聚埋食一餐同切蛋糕就算，係一歲果陣join左baby kingdom 0907bb生日會，算係比較大陣像！早在Ambrose生日幾個月前，已經分別有朋友同埋同學仔問會唔會一齊攪生日會，當時都仲係覺得攪生日會真係好煩，而且今時今日d小朋友攪生日會真係幾貴囉！媽咪一直都唔鍾意同Ambrose去playhouse玩，如果生日會搵場地，似乎又無可避免要去呢d地方，所以媽咪都係諗住屋企人切蛋糕就算喇！

 

不過同學仔媽媽們都似乎好想我地攪生日會咁，唔明點解，佢地耐唔時都會問媽咪攪唔攪？媽咪於是嘗試搵吓有無啱嘅場地攪生日會，做吓資料搜集至決定啦！本來，知道愛琴海岸會所有活動室，攪生日會就至啱，出面就係室內遊樂場，即係話唔使點諗有咩玩，叫埋野食就可以開得生日會，好方便。不過呢度只可預訂兩星期前嘅場地，由於會有機會book唔到，而兩星期前預訂如果真係book唔到再搵地方又趕又未必有，所以呢度就否決左喇！之後媽咪再搵到柏麗一間可包場嘅中心，平時佢地開playgroup，只有星期日可俾人包場攪活動，所以場內都有唔少啱小朋友嘅玩具，地點又在市中心，其實真係唔錯。不過package$2000只包十個大人十個小朋友場地及食物，媽咪計過，一個小朋友通常都會有父母一齊出席，即係大人quota一定好快爆，而extra大人收費要過百元一個，反而extra小朋友只係幾十蚊，真係好貴囉，仲未計生日蛋糕唔包！如果自己一個人攪，可能都可以同中心傾二十人唔分大人小朋友，但就算係咁，都係貴架喇，除左自己一家三口，即係可請5-6個家庭，咁樣，其實自己屋企迫迫地攪都唔係無可能丫，使咩咁貴丫！如果同同學仔一齊攪咩，又驚到時好多野要夾會好煩，例如蛋糕要整咩樣己經有問題啦，因為其他兩個同學仔都係女仔，一齊整都唔知有咩公仔佢地都會鍾意！最大問題係，各自請人來生日會，又會令生日會好怪咁，咁同出席人地個生日會又有咩分別呢？加上一齊攪又唔會慳左，衡量過價錢同自主權之後，媽咪都係放棄左喇！

 

直至七月尾左右，出席天天生日會，地點正正係愛琴海岸會所。呢次生日會，未開前小朋友在室內遊樂場已經玩完一輪，之後入左活動室開餐，雖然無集體遊戲，但小朋友只係玩汽球已經玩得一餐，好鬼開心。媽咪突然又覺得，咁樣响度攪生日會其實都好簡單，只係安排好食物就得喎！及後，再同天天媽咪傾開，佢話，到小朋友大個左，要攪生日會就唔係呢回事，而且亦未必鍾意攪生日會，所以生日會其實都唔係可以攪好多年，所以要珍惜喇，呢d係佢地大個左嘅美好回憶，就好似我地大左成日都問呀媽點解當年唔同我地攪生日會，點解呢樣點解果樣。咁又係嘅，諗番自己當年無嘅野其實都不無遺憾！所以媽咪突然間覺得，如果唔係太麻煩，經濟又唔係唔許可，咁不如都係同Ambrose攪個生日會啦，反正佢返左學都有好多同學仔，生日會有朋友仔同學仔一齊，其實都幾開心！

七月尾，媽咪終於決定要攪生日會，諗住攪中午時間，一來小朋友可以早d玩早d回家休息，第二日仲要返學；二來攪中午生日會似乎要預備嘅食物可以比夜晚生日會更簡單！八月十九日係Ambrose生日，即係話八月四日先至可以book場！

 

等呀等，等呀等，爹爹八月頭打去會所再三確認如要book八月十九日最早是不是八月四日才可book場？結果，被告知八月十九日下午會所有活動舉行，只有五點後或十二點前才可book！突如其來的變動，真係有少少失預算，不過都無辦法，又無理由一大早就攪生日會，所以，結果，都係要攪個晚間生日會！又因為這突然嘅變動，爹爹擔心夜晚時間會很快俾其他人book埋，所以八月四日當日一早，會所七點半一開門，爹爹就飛車過去當面book場了！

 

總算，落實左Ambrose三歲生日會係會舉行喇！