又有一段時間無同Ambrose做手工喇！媽咪真係懶左好多！想來應該係媽咪轉左新工之後開始更懶，以前唔做手工都會勤力少少陪Ambrose做吓功課油吓顏色，轉左工之後個人攰左，唔好話手工，功課油顏色都少做左，同埋睡前嘅故事書都有時因為Ambrose太夜瞓而取消！媽咪不時都有點罪疚感，總覺得Ambrose既然喜歡做，就更應加倍陪佢做，興趣就係咁樣培養出黎！
今晚趁住Ambrose未沖涼可以玩得污糟d，媽咪決定同Ambrose玩輕黏土！Ambrose原本係自己顧住玩，十問九唔應，又玩到周圍都係玩具，一聽到媽咪話玩輕黏土，只係一句說話，佢就自己即時行埋張檯度執清張檯嘅野準備開工，真係好笑！媽咪响佢心目中嘅地位僅僅可以凌駕爹爹，往往就係art and craft同功課時間，哈哈！
今次唔再用Jusco嘅輕黏土喇，上次玩過濕左d，幾黏手吓，完全唔係上畫班果隻non-mess黏土！上次之後响灣仔玩具街又買左另一包輕黏土試吓，都係白色，貪佢可以自己撈顏色出黎唔使成包一隻色咁浪費！買嘅時候都係估估吓，唔知好唔好，見只係＄10，平平地試吓！今晚開出黎玩，好好呀！抆佢出黎好有彈性，亦唔痴手，媽咪就係要呢種喇！
當然，因為要撈顏色嘅關係，始終都係會整到成手污糟哂，但都可以接受，起碼黏土真係唔會痴到成手都係好難搓！本來Ambrose話要紅色，不過黏土係白色，結果搓完出黎已經變左粉紅色！估唔到Ambrose有留意呢個變化，佢話“我都唔係要粉紅色”，嘩哈哈！
黏土包裝袋上有海星同八爪魚，Ambrose叫媽咪整海星，自己整八爪魚，但媽咪整到d海星角唔靚，整黎整去都麻麻地，之後就放棄左！一齊同Ambrose整八爪魚！隻八爪魚身係Ambrose做嘅，只有眼同咀咁細緻係媽咪幫手！
整完八爪魚，見Ambrose其實都幾鍾意搓圓波波，媽咪靈機一觸，叫Ambrose搓好多個圓波波出黎整條蟲蟲！d蟲腳，又係好細緻，但Ambrose都好努力咁整，見佢整得有少少輪盡，媽咪都要出手幫吓忙啦！
後記：呢隻輕黏土乾左之後都係有少少彈性咁，同上次果隻整完唔太smooth邊位又碎濕濕，真係好好多！
輕黏土真的好適合小朋友玩呀，比泥膠更變化多端
回覆刪除