創意畫班@比賽班第二堂(3y2m)

今堂第二堂，又係媽咪收工去接放學！今日先至認真睇吓比賽班果張poster，原來個比賽主題係「樂在畫中」，之前完全記錯左！不過呢個主題都係好open-ended嘅，所以其實真係天馬行空，畫咩都得，哈哈！

 

老師攞左Ambrose畫嘅畫出黎睇，真係出乎意料之外咁靚！之前見佢起稿時都覺畫得比較豐富，到上色可能都有一定難度，仲諗住最後會油過左界而要被迫cut咁d公仔走，因為分分鐘俾Ambrose油到遮住哂！但竟然又無喎！幅畫靚到有d覺得係咪Ambrose畫同油架，但媽咪收工响門口“莊”左Ambrose一排，都係見老師耐唔時過去講佢知應該點畫，Ambrose先至動手畫，最多見老師畫過一兩筆，猜想可能幫Ambrose修飾番魚嘅輪廓，好多時都係Ambrose畫吓又等吓老師黎教佢咁！

 

今堂老師同媽咪講，話Ambrose好奇怪，話佢每次用黑色粉彩都會不受控咁油到亂哂，一pat野，就好似火車d車碌同魚上面有一堆綠色嘅樹，都俾Ambrose油衰左！媽咪都不明所以，平時Ambrose又無話會見咩色就起勢畫，車碌就可能有機會佢想畫大d所以越油越衰；樹，媽咪只可以諗可能老師教佢畫線條，佢唔知係咪以為油顏色就係咁油囉！媽咪擔心地問老師油到咁點算呢？老師好淡定話等佢油埋個底色，會俾d紙俾Ambrose搓粒痴上去遮一遮喎，果然係畫畫老師，可以諗到咁樣執生！

 

期待下一堂嘅完成品呢！

 

我的生日@2012

今年生日正日係星期一，原本轉左工，多左假，其實想生日放假抖吓，但因為黎緊十一月又要搬屋，應該又會攞吓假，計吓出年二月新年個檔期，攞兩日放九日，同埋四月又要攞假去旅行，都係算啦，留番D假有時有咩突發野要放都有假放丫麻！

 

由於唔放假，爹爹當日又要返工，所以上星期五已經一家三口出左去L Hotel食Buffet喇！一向都鍾意L Hotel嘅Buffet，雖然遠左d，但環境好、服務好、食物啱口味，而且價錢又抵，所以去食Buffet，呢度係我地嘅不二之選！不過今次就有d失望啦！感覺上少左野食，好似沙律咁，連蕃茄仔都無埋，又無粟米粒，只有幾款菜，都幾寡囉！生果可能菠蘿唔當造，所以又無左，取而代之係橙粒，都幾奇特！西瓜唔甜，蝦蜜瓜無味，配埋又係淡貿貿嘅火龍果，生果同沙律呢part我至愛已經fail左喇！好彩仲有無限嘅蟹腳、翡翠螺同枇杷蝦，仲有北海道牛乳奶凍，都好啱食！希望今次只係個別事件，下次再去會正常番啦！唔知點解我幾鍾意呢度！因為生日，酒店送左個火焰雪糕蛋糕俾我地，黎嘅時候至點火，不過一點再攞上台，d火已經熄哂，快得好緊要！好耐都無見過火焰雪糕蛋糕喇，對上食果次可能係大學時代了，所以都有驚喜！

 

今日正日生日，返工都係無聊聊，新工無人知我生日，都係正常返工食飯放工！原本放工都無諗住出去食飯，老公話反正Ambrose上小演員班都要放七點，都係放左學食埋飯，買埋蛋糕至返屋企喎！所以上完堂，是但去左間唔使等位嘅板長食壽司，食完飯後Ambrose已經急不及待去買蛋糕！真係唔知邊個生日，佢係咁睇蛋糕，睇中左一個布甸蛋糕一定要買，我其實嫌個蛋糕大，得幾個人食好似好難食得哂咁，而且，硬係覺得布甸蛋糕咁新穎嘅野，老公同Ambrose都未必鍾意食！不過點拗都拗唔過Ambrose，佢係咁“捱”住人地個玻璃櫃指住話要個蛋糕，又跳又想喊咁款，最後我都要屈服啦！

 

買完蛋糕返屋企切，Ambrose都好落力幫手打開個蛋糕同set野！我自己就去左攞上次買番黎嘅煙花candle點，yeah！好靚！之後Ambrose又當正係佢自己生日咁，又話要切蛋糕分蛋糕，oh my god！真係俾佢笑死！

 

無expect到收到禮物，因為近排為間屋都好煩好忙咁！點知老公竟然買左個Chanel手袋俾我，真係好驚喜！仲要係我鍾意嘅shocking pink系列，好開心！

 

結果Ambrose真係唔食蛋糕入面果大舊布甸囉，所以基本上個蛋糕雖然大，其實都係唔難食得哂，最後只係留左一件第二日食，好輕易就ko左喇！

烈火童心 (3y2m)

終於等到Ambrose夠三歲，可以同佢報名玩烈火童心喇！其實一早同Ambrose報左名，但一直都無同佢講呢件事，費時佢日嘈夜嘈講足幾個月就煩喇！

 

今次由於爹爹要返工嘅關係，媽咪要自己湊Ambrose出去九龍塘咁遠，仲要屋企樓下無直車去到，媽咪真係第一次一個人湊佢去咁遠！好彩最後約埋blog友Herman媽咪一齊搭的士出去，咁就輕鬆好多！

 

之前一晚同左Ambrose講會去做消防員，佢都不知幾開心，一落的士就好想快d去到會場！本身見到Herman時怕怕羞羞嘅Ambrose，去到會場之後，即時醒神哂，開始肯同人玩！哈哈！

 

登記好，攞左條褲之後，因為係連身褲，而且個節目有成個鐘，媽咪要Ambrose去一次vivi先，佢就唔多願，好想快d換左條消防員褲，非常心急！換好左褲之後，出去影吓相，好快，就要排隊入去上堂喇！原本媽咪見Ambrose近期去上芭蕾舞同跳舞班都扭扭擰擰，有d擔心唔知佢肯唔肯同成班唔識嘅人入去上堂，加上現場人多又嘈，呢d環境Ambrose好易怯場！但原來媽咪擔心都多餘，只見Ambrose搭住Herman膊頭，開開心心咁跟老師入左去，同媽咪拜拜都無呀！

 

其實成日聽見d人話好玩，但小朋友入左課室後有咩做，家長係完全唔知，又睇唔到，總之一個鐘後黎接番小朋友，換衫走得！媽咪今日覺得自己好似d粉絲追星咁，全程揸住部相機，係咁影，又要捕住Ambrose响課室行出黎同佢影相，又要跟住佢行去畢業台前同佢影相，真係幾搞笑！

 

雖然唔知Ambrose响入面有咩做過，但問番Ambrose好唔好玩，開唔開心，佢又話好玩開心，問佢下次仲黎唔黎做警察，佢又話黎，咁證明佢都enjoy，做左d咩，其實已經唔重要啦！

 

今次，真係要多謝Herman媽咪預埋Ambrose去玩，今日Ambrose同Herman玩得好開心！

Home Art Jamming@樹葉畫@ 21/10/2012 (3y2m)

一直都想同Ambrose玩樹葉畫，但唔知點解次次執左d樹葉番屋企諗住得閒時玩，第二日總會唔見哂d樹葉！

 

今日星期日，畫班補完堂同Ambrose玩左一陣，返到屋企樓下又見到成地樹葉，所以索性執完上樓即刻同佢玩！Ambrose聽見話執樹葉返去畫畫，不知幾開心！叫左佢執d大葉執d細葉，佢就唔大唔要！

 

其實原意諗住有大細葉可以印吓唔同圖案，咁都幾得意，但Ambrose執親塊塊葉都咁大，好難再印唔同圖案喇，就由得佢隨意印吓就算！

 

印左一輪，佢又溝色喇，不過佢唔响色碟上溝，而係在葉上用唔同顏色油上，媽咪見佢油到似聖誕樹，索性教佢响張新畫紙上印完再加上樹幹，咁就名符其實嘅聖誕樹！之後Ambrose竟然自己畫左個聖誕老人响隔離，雖然唔係好靚，但係佢自己嘅意思，仲要識同聖誕老人畫聖誕帽，媽咪覺得佢係利害呀！畫完一幅聖誕樹及聖誕老人之後，Ambrose又話要再畫多一幅，今次佢印左一棵樹，而聖誕老人佢就用左藍色！媽咪就覺得呢個似雪人多過聖誕老人喇！哈哈！

 

之後Ambrose畫左架車出黎，媽咪問佢呢架係咩車？佢話係貨車，再問佢咁架車載咩貨架？佢就話水果，之後就畫左d水果上去！Ambrose好快咁畫左橙同蕉，其實都幾似！之後就話畫西瓜，佢話西瓜係綠色同紅色，媽咪話貨車西瓜未切，個皮係綠色，不過Ambrose唔理，係都要畫埋紅色上去，哈哈！之後仲有蘋果，由於無黑色，所以Ambrose用左藍色畫“訂”，再畫梨，今次條“訂”又畫到好長，攪到唔似喇！教埋Ambrose畫菠蘿，不過佢用左粗畫筆，根本畫唔到咁濟，哈哈！最勁係畫士多卑梨，佢竟然好小心奕奕咁點細細點！

 

再畫多兩幅，一幅又係車，不過可能太晏喇，佢都開始無咩精神畫，所以其實畫得好求其！又無啦啦話車前面有個白雪公主，哈哈，畫到不似人形就真！仲有就係麥當勞，佢畫完個框同個“M”字就攞俾媽咪睇，話係麥當勞，之後佢繼續畫人仔，佢竟然將張畫紙掉轉左畫都唔知，證明佢真係攰到就黎暈低喇！

 

一個鐘頭畫左六幅畫，都咪話唔攰！所以，媽咪都係捉佢去瞓覺喇！

Harry哥哥的萬聖節(3y2m)

因為Ambrose鍾意Harry哥哥，所以媽咪一直都好留意Harry哥哥有無show舉行！本來之前都見過Harry哥哥有個萬聖節show，但可能近排媽咪工作繁忙，完全忘記了！直至十月中左右，先至記起Harry哥哥的萬聖節show，上網買飛時已經無咩位喇！問埋Ellen姨姨去唔去，因為佢呢排唔多舒服唔想周圍去，所以決定唔去，即係只得媽咪同Ambrose去睇！咁買飛反而易買d，因為如果要買四連位，其實已經太遲喇，無哂位！有嘅又係山頂或者側位！媽咪諗住Ambrose都開始大個仔，加上呢個始終又係音樂會，想佢可以睇清楚樂器嘅樣，所以媽咪prefer買貴飛坐前d！不過前面嘅位又只有單丁位，無兩個連位喇！實在太遲買飛，臨開show前兩星期至買飛，真係impossible！不過好彩地，俾媽咪諗起上次Wing姨姨嘅買飛法！就係用學生半價優惠買一張貴價飛，再是但買一張正價飛，入場時就有兩張飛入，但可以坐貴價位！咁都work喎，反正Ambrose次次入場都真係要坐媽咪大脾至得，佢果個位，永遠都係放行李多過真係坐！於是，响開show前兩星期，媽咪竟然買到第十五行嘅中間冷巷位，算係幾前吓喇，好開心！

 

今次都係媽咪第二次自己湊住Ambrose入場睇show無人陪喇！之前睇Cinderella太長無睇哂，今次只係一個鐘，而且加上有Harry哥哥，媽咪完全唔擔心搞唔掂！有過咁多次睇show經驗，Ambrose次次都好緊張，成日d人一入場佢就好緊張一定要跟住入，慌死遲左唔等佢咁！次次話開場果個時間，d人永遠都未入齊，次次都要等十至十五分鐘至真正開始！所以唔好話早d去到等入場，只係準時去到入場再等開始其實真係差唔多，免得Ambrose係咁話緊張！

 

今次主題係萬聖節，原本Ambrose都有造形衫，但之前一日上興趣班時又係要著Halloween衫，所以洗左無衫著，只係著普通衫，好彩佢見到其他人有悉心打扮都無嘈自己無咋！

 

音樂會都係一貫Harry哥哥show嘅作風，有d魔術，有d搞笑，有少少故事，加埋管絃樂嘅配合，真係幾啱小小朋友！今次個show有少少特別，請左個沙畫大師表演，只見個大師係咁用手在沙上畫又不斷撥沙，真係畫得好似同好快，勁呀！不過Ambrose就係咁話人做咩撥哂d沙落地下，話人唔啱，真係唔知好嬲定好笑！今次Ambrose有進步，當Harry哥哥問問題同叫人舉手上台，Ambrose都有舉手嘗試，之前佢可能仲細未識又或者多數發呆，不過可能坐第十五行都未夠前，Harry哥哥無叫佢上台！Ambrose無得上台就係咁問媽咪點解Harry哥哥唔俾佢上台，真係俾佢笑死！

 

音樂會中間有一段係邀請左小朋友上台，講話有隻怪獸走出黎，小朋友要同Harry哥哥打怪獸。其實隻怪獸只係上身套左類似龍蝦造形嘅套，雙手係長長嘅箝，可能加上左比較恐怖嘅音樂，Ambrose竟然嚇得有 d想喊咁，好彩前面有個姨姨幫手話Harry哥哥會打低隻怪獸，而Harry哥哥又真係好快就打低左佢，所以Ambrose至平定左，真係唔話佢細膽滕雞都唔得！

 

完場時Harry哥哥邀請小朋友到台前一齊跳舞，本來媽咪都唔想行落去，點知Ambrose又話去，難得見佢咁講就陪佢顛吓！去到台前其實有好多小朋友，好迫！有d家長仲將小朋友放在台上同Harry哥哥一齊跳，其實場面都幾混亂，不過又真係幾好玩！本來媽咪叫Ambrose上台玩，點知佢又話唔好，俾佢激死，之前又好似好恨上去玩，有得上去時又話唔上！媽咪估計可能台上台下都勁多人，呢個細膽嘅Ambrose一定係怯啦！最後，媽咪抱住佢响台下近距離睇Harry哥哥，都唔錯嘅！

 

最後，夠鐘完場，Ambrose係咁同Harry哥哥講bye bye，但太多人叫住Harry哥哥喇，Ambrose又唔夠大聲，Harry哥哥都無同佢bye bye，佢又係好耿耿於懷，狂問媽咪點解Harry哥哥唔bye bye佢！仔呀仔，無法啦，咁多人，下次媽咪應該早少少同你出去排隊等簽名，咁你就可以同Harry哥哥影相同講bye bye啦！

 

總括黎講，今次個show真係好抵睇，又有管絃樂又有Harry哥哥同埋沙畫，仲要都比較坐得前少少！下次睇Harry哥哥嘅show真係要買貴飛了，不過好可惜，黎緊嘅聖誕節，因為就Ellen姨姨一定要四連位，所以無買到貴飛，買左幾後吓，唉！唔知到時Ambrose會唔會好失望呢？

創意畫班@第七堂 (3y2m)

今堂畫蟹蟹，好似簡單左少少！睇Ambrose畫得都幾亂吓，平時佢响屋企畫嘅蟹腳，好似仲清楚d靚d咁！

創意畫班@比賽班第一堂(3y2m)

上個月就已經見到有比賽班可以參加了。比賽班其實係額外嘅畫班，貴過平時嘅畫班，上三堂，完成左一幅畫，之後就攞住果幅畫去比賽！好似上個月個比賽係PENTAL搞嘅，所以比賽要求都要用番佢地嘅顏色！不過由於上個月嘅比賽班撞正爹爹生日澳門之旅，就算請假補堂都搵唔到邊日上到，加上又未知Ambrose轉左過來新畫室後嘅情況係點，所以上個月嘅比賽班最終都無報到名！

 

 

以為唔會成日有比賽班，點知今個月又有！今次個時間其實幾好，有星期日班，正好而家星期日無安排任何興趣班上，真係perfect！不過都係媽咪大意，以為呢d班一報就有，完全無諗過無位，一早知有比賽班唔報，到人地deadline先至去報，星期日已經full左了！左問右問其他時間，好多都已經full左，有嘅都係下午較早嘅時間，Ambrose應該未瞓醒，夾黎夾去無時間可揀，老師最後都好好，竟然俾左個星期三，六點至七點嘅位Ambrose，睇埋爹爹更表，三堂有兩堂都湊到返學，都應該無問題啦！

 

其實都有問過老師Ambrose參加會唔會有問題，老師話ok（當然啦，比賽班其實係貴好多架麻）！媽咪有d擔心，因為見之前嘅比賽班都要用鉛筆起稿，Ambrose都未試過，但老師話其實真係可以俾Ambrose體驗吓，唔係一定為左比賽，咁都啱嘅，既然老師話無問題，媽咪又覺得Ambrose越來越有興趣畫畫，都係乖乖交錢報名啦！

 

今堂第一堂，由嫲嫲湊Ambrose去畫班，媽咪收工去接放學！老師攞左Ambrose畫嘅畫出黎睇，幅畫其實未油起，不過已經用哂鉛筆起稿！成幅畫有火車、火箭、海豚等海底世界，老師話係Ambrose自己嘅意念，將唔同嘅野mix埋左一齊。老師話Ambrose都ok ，畫得幾快，而且自己有自己想畫嘅野，一講就畫喇！媽咪其實覺得幅畫好靚，又有少少疑惑係咪真係Ambrose自己畫，老師話係Ambrose自己一手畫出黎，但魚嘅形態，就要教Ambrose點畫，要畫出來佢自己跟，咁都ok嘅！最明顯係枝火箭，唔使問都知係Ambrose畫，哈哈！之前媽咪在外面見到其他同學仔全部都大過Ambrose，都有擔心佢會唔會跟唔到，點知原來人人畫嘅野都唔同！正如老師所講，Ambrose真係畫得好快，佢已經起好稿，開始油顏色喇，有d同學仔只係起左稿咋！老師話比賽有主題，唔記得左係咪「童心童畫」之類，所以其實都唔算咩特定主題，學生可以自己鍾意畫咩都得，所以人人幅畫都唔同！

 

以Ambrose進度，似乎畫多一堂都可以完成咁，咁最後一堂咪無咩好做囉？！期待盡快Ambrose嘅大作！

蜘蛛俠睡衣

擺低左Ambrose成日，見到呢套蜘蛛俠睡衣即買，佢果然好鍾意，就當係補償啦！

籌備搬家了

七月尾簽左約賣樓同買樓，等呀等的，終於都收左樓喇！住緊果度其實九月尾已經成交左，不過新業主好好人肯租番俾我地住多兩個月，等我地一收樓執埋間屋搬過去！

 

其實都係原區搬，無咩特別，無辦法啦，兩邊嘅屋企人都住呢區，加上一堆複雜嘅問題，無辦法搬出去第二區，唯有趁樓價升，換一換個好少少嘅環境俾Ambrose住啦！

 

七月尾簽左臨時約之後，都有去睇過傢俬裝修嘅野，不過屋企嘅緊張大師成日都驚有變動，一日未收樓一日都唔敢咁早take action，所以都係睇完知道下大概想要咩就算，所有野都係留番收左樓至搞喎！

 

上星期終於收左樓，仔細望左有咩要整，同埋度好哂尺寸，今日趁放假，我地兩個都忍痛擺低左Ambrose走去訂傢俬同買部份電器！原本其實之前都已經睇好左大概鍾意邊d野，仲以為一行入去就可以買架啦，點知都係要再揀吓睇吓問吓，結果搞左成日都只係訂左大床、梳化、Ambrose床同埋買左浴室寶！今日睇左吊扇燈，未決定到買唔買，一來貴，二來唔知係咪真係涼，所以都要再睇吓諗吓先，反正都冬天，唔急用嘅！

創意畫班@第六堂 (3y2m)

今堂整輕黏土書籤（定係手偶？），Ambrose整左蟹同白兔，好得意呀！見其他同學仔都係整呢兩隻動物，但人人都唔同，就好似兔仔條裙咁，已經好明顯人人不同了，真係幾好！

 

Ambrose好似好鍾意呢個手工咁，放左學都一直要揸住唔放！

第一次跳舞表演 (3y2m)

幫Ambrose報嘅小演員班，估唔到返左幾堂就有通告話有表演喇！可能因為近萬聖節，同埋男仔無咩戲服嘅關係，女仔係仙子裙，男仔竟然係熱到死嘅南瓜衫！

 

上日上小演員班放學就見Ambrose著住南瓜衫係咁抓頸，可能唔多舒服，本來見咁難得想同佢影張相，佢已經急住要除，影唔到！問佢去表演好唔好，佢都話好，但就話唔著南瓜衫，媽咪都知出事了！

 

表演當日原本有半堂芭蕾舞堂，為左唔好再刺激Ambrose，媽咪特意唔去上堂，專心等夠鐘集合去表演！學校租左架旅遊巴士載學生同一名家長去表演場地，都幾好，起碼媽咪唔使煩搭車！Ambrose搭旅遊巴時不知幾高興，但當去地表演場地（商場），佢就開始唔出聲喇！叫佢換定衫等入場，佢又話要入到去先，媽咪見件南瓜衫又真係好熱，個商場又真係無咩冷氣，件衫又一著就係，所以都由得佢一陣至著！點知呢d都係佢嘅藉口，當要排隊行入場地側邊standby時，佢又面露痛苦神色，又話唔著件衫唔跳舞喇！媽咪不斷氹都無用，再用力拉佢埋去時，佢又大力向反方向拉媽咪走！老師走來話由得佢唔著南瓜衫，媽咪又再氹佢話就咁上台，佢都唔肯，個樣真係好苦，想喊想喊咁！

芭蕾舞班與小演員班之進展 (3y1m)

自從九月份幫Ambrose轉左跳舞學校，惡夢就開始左喇！

 

第一堂嘅芭蕾舞班係即報即上，完全無預備之下，又上完畫班等左一輪至夠鐘上，去到又多小朋友在門外喊，果次係Ambrose第一次返興趣班喊。以為係好個別事件，點知之後嘅芭蕾舞班與小演員班都係絕大部份唔多順利嘅情形之下上堂！次次同佢返親芭蕾舞班，一係換左衫又唔換鞋，一係就要開左門d人出黎先至換，一係就樓下都未到就已經講話唔返，總之就好煩啦！小演員班係平日黃昏六點鐘，媽咪未放工，所以都叫做少左機會湊佢返學少左折磨，但放學都係由媽咪放工返黎接佢，好彩，好多時其實佢入左去課室上堂，佢又一切正常，老師仲話佢好開心，無問題，見佢出番黎時又係笑咪咪，所以真係唔明究竟Ambrose做咩次次都咁唔想入去囉？！

 

一直都唔明點解Ambrose對於間學校反應咁大，有一次，佢又係喊哂唔肯入去，結果幾經辛苦入左去之後，副校長放學同媽咪講，佢問Ambrose係咪對芭蕾舞鞋太緊，佢話係，媽咪果個星期即時幫佢買過對新嘅跳舞鞋，以為一切會順利番，點知佢開頭連著對鞋都唔願，真係令人頭痛！

 

每一次見佢唔肯入去跳舞，又要氹又要罵先至可以令佢入去，媽咪每次個心都好唔開心，成日都諗，究竟咁樣係咪叫做迫佢呢？究竟當初係咪唔應該同佢轉學校呢？究竟媽咪係咪唔應該堅持要個男仔學跳舞呢？究竟係咪因為一朝早要上兩個興趣班唔work呢？究竟Ambrose係唔鍾意跳舞定唔鍾意個地方？究竟係咪因為芭蕾舞班時間太晏Ambrose太眼瞓所以特別難搞？真係好沮喪！

 

今個星期，媽咪湊Ambrose返芭蕾舞班，明明畫班前同佢講左畫完畫會去跳舞，佢又好開心話好。畫完畫再同佢講會去跳舞，佢都無問題，係媽咪見未咁快夠鐘上堂，行左另一條路諗住同佢去買少少野就出事喇！行到一半佢可能認得條路會經過冒險樂園同埋一間童裝店門外嘅車車，佢已經話要行上去，媽咪果時都未意會到有問題，反正要上去買野就上啦，點知一上去佢就話要揸車車，媽咪話要買野，唔夠時間，下次先，佢就開始發難，之後就話唔上跳舞班！後來，媽咪計落都有時間，都有比佢去揸車車，但就同佢講左只可玩幾分鐘，佢又歡天喜地去玩，玩玩下又話唔去跳舞，真係頭都大埋！幾經辛苦叫到佢走，佢都仍然話唔去跳舞，甚至拉媽咪嘅手走！到去到學校門口，又死都唔肯換衫，搞左一輪，換到衫又換唔到鞋！期間佢不斷都有話唔跳舞唔入去，仲要忍住眼淚同媽咪講，唉！媽咪真係唔知可以點！眾目睽睽之下，媽咪已經又氹又罵左好耐，眼見都換到衫，以為都可以入去，佢又楚楚可憐咁樣，繼而喊住係咁話自己好眼瞓，好攰，做咩唔俾佢瞓覺？！媽咪真係無計可施，明知Ambrose未必係真眼瞓，佢只係聽見媽咪問佢係咪眼瞓，之後就不斷捉住眼瞓呢個理由係咁嘈！為左息事寧人，媽咪都已經放棄喇，行埋去同reception姨姨講，問其實有無其他時段係早少少，想改時間上堂，今堂唔上喇！好彩地，姨姨話同日十二點有一個位可俾Ambrose試下，睇吓改早左會唔會好d！就係咁，又再試吓早九個字上好唔好d啦！而姨姨同老師見媽咪無哂符個樣終於出口氹Ambrose，好成功咁氹左Ambrose入去上堂，總算鬆一口氣！

 

但今堂咁嘅情況，足以令媽咪嘅心情跌破谷底，總覺得自己好似好衰好怪獸咁迫Ambrose跳舞，但明明媽咪原意都唔係咁！唉！放學見到Ambrose個樣，佢又係開開心心咩事都無，咁先令媽咪唔知究竟點好，亦為之前對Ambrose過份嚴厲好歉疚！

 

同爹爹商量過，由於小演員班學費已交到聖誕節，而下堂開始又改早左上堂，大家都覺得可以俾Ambrose再試試，始終新學校新同學新老師可能未必適應，加上時間又真係晏左少少好攰咁！如果之後改早左時間情況都係咁差，咁就學到聖誕就放棄喇，太勉強大家都唔開心！

 

決定左之後，再同Ambrose講，雖然唔知佢明得幾多，但佢都有答應左如果真係覺得唔開心，都一定要等到聖誕後至停學，唔可以而家成日扭計發脾氣囉！

 

希望之後情況有所改善啦！

Pom Pom手工

今晚突然諗起之前買左嘅Pom Pom手工套裝，攞左出黎同Ambrose玩！其實套手工入面有教點整，大致都係示範整花、蟲蟲同甲蟲。Ambrose一見到pom pom就一定要用最大果個，所以搞到條蟲蟲頭大身細！整完蟲蟲再整花！之後只係剩低一個pom pom同好多毛絨條，結果媽咪話整埋八爪魚，雖然d腳係幼左d，無所謂啦，旨在整下玩下嘅過程啫！

綠田園半天遊

之前其實都去過綠田園，上佢website見話有好多野玩，去到又唔覺有野玩喎，所以一直都唔覺得呢度有咩特別！

 

早排上facebook見到友人仔仔玩賽車同埋划艇，好似好好玩咁，原來正正就係綠田園！今日爹爹放假，決定帶Ambrose 同表姐們去玩！去到當然玩賽車先啦！其實都幾貴，$30十五分鐘，d車又好難踩，搞到本身無瞓晏覺又眼瞓到暈嘅Ambrose都忟哂！加上好多小朋友一係踩得快，又鍾意撞埋黎，又會wrong way咁行車，真係玩到嬲嬲地！基本上，都未夠鐘我地都差唔多去還車喇！

 

之後就去左划艇區，又係$30十五分鐘，呢隻艇仔就幾好玩喇！開頭仲驚Ambrose咁細一個人坐艇自己操作有難度，又驚佢會自己起身有危險（雖然水深只有一呎其實都唔驚嘅），但原來所有擔心都多餘，見佢上左艇划吓划吓，好快就掌握到咁，而且玩得幾開心！不過開頭玩時就差少少，個池唔大，但就有八隻艇，搞到好似玩碰碰船咁，係之後有人唔玩，工作人員搬開左幾隻船，鬆動左好多，又好玩左好多喇！其實話就話$30十五分鐘，但就觀察所見，應該無人得閒計時，好多人都應該玩過左十五分鐘都未走囉！之前賽車雖然有張貼紙寫住你幾分鐘入場，都同呢度一樣啦，無人真係會檢查你玩左幾耐，趕你走，可能唔係真係咁多人，所以佢地都無嚴格執行啦！

 

玩完划艇，表姐要玩大滾筒，Ambrose同二表姐唔夠大玩，所以坐埋左一邊休息加食野！食完野，兩個小朋友去左玩電車，出乎意料之外，電車算平喎，只係$20十五分鐘，Ambrose不知幾鍾意玩，搞到爹爹係咁讚架車好，好想買番架俾Ambrose，成個大細路咁！

 

玩完電車，又話坐低食野，結果一群人買左兩份三文治入左餐廳坐！爹爹一路坐一路見出面有人踩水上單車，又話想同Ambrose玩，問過可以坐三大三小，$60二十分鐘，都唔貴！但大表姐完全無興趣，所以最後只有爹爹媽咪姑姐二表姐同Ambrose去踩水上單車，而大表姐就去跳彈床！爹爹買左一包魚糧餵魚，兩個小朋友係咁掉魚糧入湖內，好多魚都圍過黎食，架船一路行，都有一大抽魚跟住，好利害！真係好難想像個湖入面有幾多魚，因為同時間有好幾隻船，船上嘅人都在餵魚，又係圍住成隻船！小朋友有得餵魚就好開心，媽咪見到果d魚咁多圍住哂張大個嘴，其實覺得幾恐怖，想像一下如果跌左落水，周圍都係呢d魚，都咪話唔驚！

 

餵完魚，會合埋大表姐，準備離開！可惜，大表姐玩完又係發脾氣，嬲到媽咪死死吓，原本打算去佢屋企都係要打道回府！Ambrose眼瞓到死一聽見媽咪話唔去表姐屋企就細細聲話要去，講左幾次，怪可憐的！但媽咪真係頂唔住大表姐嘅睥氣，如果真係去，三個小朋友一定又會嘈交，大表姐一定又再顛過，到時又會更唔開心，何況大表姐已經發脾氣話叫媽咪呢個舅母唔好去佢度，媽咪真係唔會去！就係咁，原本只係想罸大表姐，最後嘅結果好似連Ambrose都罸埋咁！唉！

 

總結，今次去綠田園都幾好玩，下次有機會都會再去！不過原來平日係無得玩呢d野，只有星期六日假期先有，怪唔知得上次去咩都無，靜英英咁啦！

創意畫班@第五堂 (3y1m)

今堂放學見Ambrose笑咪咪捧住本畫薄出黎，一見到媽咪就同媽咪講，呢個係南瓜仔！哈哈！其實媽咪都知道係南瓜，不過見下面畫到似八爪魚嘅腳，就問佢，呢隻唔係八爪魚咩？佢一聽到就好激氣話，係南瓜仔黎架！媽咪再指住下面好似腳嘅野問佢，咁呢d係咩黎架？佢話係葉喎！嘩哈哈！

 

講完一輪，老師行左出黎同媽咪講，話Ambrose好搞笑，係都要畫好多骷髏骨頭喎，呢隻仔真係唔核突唔恐怖果d都唔鍾意！當媽咪問老師係咪全幅都係Ambrose自己畫時，老師話係，而且再讚Ambrose油顏色油得好密，如果以一個三歲小朋友黎講，佢已經好叻喎！而且畫野時攞位都幾好、幾準！雖然媽咪唔知點謂之準，但聽見老師嘅評語，當然少不免有點心花怒放啦！

 

呢幅畫，色彩亦好靚，爹爹一見到幅畫，都問，係咪真係Ambrose畫架？哈哈！

戒奶咀及尿片

一直寫blog都集中寫Ambrose嘅野多，竟然，有一日發現，媽咪完全忘記了要記下Ambrose咁重要嘅成長歷程，就係戒奶咀同尿片喇！

 

Ambrose一直都有食奶咀嘅習慣，不過都只限於要瞓覺嘅時候，醒左都會即時俾番奶咀大人，有時侯坐車更加可以唔食就瞓左！由於只係瞓覺時要食，又唔係行黎行去都要食住奶咀，大家對於佢幾時戒奶咀都不以為然，總覺唔係咁迫切。不過媽咪偶然都提過話要戒奶咀，始終都返左N班，其他同學朋仔友都無人再食奶咀，而且據聞食奶咀對牙齒同牙較都唔好，媽咪成日擔心Ambrose咁遲至識講野同食奶咀可能有少少關係，所以一直都想同佢戒奶咀。當然，初初嘅阻力都幾大，家人都覺得食奶咀可以定時同佢去瞓覺（一見奶咀就知道要入房瞓），同埋只係未瞓著至食，唔使強行要佢戒！同埋最好等長假期先戒，因為驚佢扭計，半夜會喊，攪到大家都無得瞓！

 

如是者，一直到Ambrose兩歲六個月左右，突然有一日，爹爹心血來潮同Ambrose講，話姑姐掉哂佢嘅奶咀，要佢自己就咁瞓！神奇地，Ambrose可以唔使奶咀真係就咁瞓左！頭幾日，Ambrose都有問起要奶咀，仲係不斷重複講，爹爹媽咪都無理佢，過左幾日之後，Ambrose已經無再問喇，正式同奶咀say bye bye！

 

至於尿片，記得Ambrose初入N班時都仲要著片，曾經都有擔心過佢戒唔到片，因為眼見朋友仔都陸續戒緊，Ambrose似乎都未ready！同過老師講，老師只係話冬天唔好戒住，但到上學期嘅家長日，老師都話要在k1前戒左好d，攪到媽咪都好緊張！

 

小朋友發展真係好唔同，當人人都在努力試戒片，界乎得同未得之間，Ambrose都只係一舊飯，依然著片！但唔記得幾時開始，佢已經可以vivi出聲，甚少失手，記憶中Ambrose失手濕褲只係試過兩、三次！同佢出街，唔使帶定spare衫褲換！所以，有時媽咪真係覺得，有d野真係急唔黎，佢ready的話，其實一日已經識喇！未ready的話，train幾耐勞氣幾耐都未必有用！日片已經忘記了幾時戒到喇！最記得係Ambrose每次poo  poo都一定要在片度，所以有一段時間，由於Ambrose已日頭全面著底褲無片，只有瞓覺前才轉著片，佢真係要等到轉左著片先話poo poo！仲有就係有時可能佢想poo但又只有底褲，佢都死忍唔去，攪到咁鍾意食野嘅佢都無胃口食野！總之，如果見佢唔願食野，大底都係因為佢想要poo poo，只要同佢著番片，poo左佢就正常番哂，真係好搞笑！

 

但問題係在片poo poo並唔可以長遠，最終都要佢學識在馬桶poo！試左好多次，氹佢去馬桶坐佢死都唔肯，就算坐左上去佢都poo唔到！終於，在兩歲七個半月左右，有一次去左海港城，Ambrose突然想poo，爹爹同佢去左小朋友廁所，傾住計氹住之下，Ambrose人生第一次在馬桶poo到！爹爹行出黎時真係笑到見牙唔見眼，哈哈！大家都話呢個廁所太舒服喇，連Ambrose都軟化肯poo poo！不過之後返左屋企，又打回原形了！雖然如此，爹爹都不斷嘗試氹Ambrose坐一陣馬桶至俾片佢著！過左約兩星期，Ambrose終於又可以在馬桶poo poo了！果時Ambrose應該兩歲八個月左右！

 

日片已戒，淨低嘅係瞓覺片！晏覺片其實已經係時著時唔著，都唔記得幾時全面戒埋，因為就算著左片，佢都完全無濕片！著，只係以防萬一！

 

兩歲十一個月，曾經有同Ambrose戒夜片，因為見佢長時間早上起來片都係乾！點知一戒就出事，連續幾晚vi濕成張床，半夜要清潔換床單，試左幾次之後，真係怕左！

 

三歲生日，爹爹媽媽其實一直都同Ambrose講三歲大個仔架喇，就响生日果晚，生日會後回家至發現家中無片，唯有唔著片瞓，又再試吓戒夜片啦！今次，成功左！由生日果日到而家，都無失過手，Ambrose三歲正式同戒片喇！

Color Me Stickers

今日去左Book Buddies買左呢包Color Me Stickers 俾Ambrose，等佢油完可以貼吓自己嘅玩具箱裝飾吓，哈哈！

創意畫班@第四堂 (3y1m)

今堂上堂前氹Ambrose話去畫畫，點知去到先知原來今堂做手工，仲以為Ambrose會好失望，但見佢出黎時揸住自己整果隻彈弓狗，珍而重之好鍾意果樣，媽咪似乎都係諗多左喇！

 

媽咪相信，Ambrose係畫畫同手工都同樣鍾意嘅！

 

呢隻彈弓狗，真係幾有創意，個鼻唔知係咪用而家好興果隻magic corn做嘅呢？條彈弓又可以响邊度搵呢？好想再同Ambrose整多一隻呀．．．．．