第一次跳舞表演 (3y2m)

幫Ambrose報嘅小演員班，估唔到返左幾堂就有通告話有表演喇！可能因為近萬聖節，同埋男仔無咩戲服嘅關係，女仔係仙子裙，男仔竟然係熱到死嘅南瓜衫！

 

上日上小演員班放學就見Ambrose著住南瓜衫係咁抓頸，可能唔多舒服，本來見咁難得想同佢影張相，佢已經急住要除，影唔到！問佢去表演好唔好，佢都話好，但就話唔著南瓜衫，媽咪都知出事了！

 

表演當日原本有半堂芭蕾舞堂，為左唔好再刺激Ambrose，媽咪特意唔去上堂，專心等夠鐘集合去表演！學校租左架旅遊巴士載學生同一名家長去表演場地，都幾好，起碼媽咪唔使煩搭車！Ambrose搭旅遊巴時不知幾高興，但當去地表演場地（商場），佢就開始唔出聲喇！叫佢換定衫等入場，佢又話要入到去先，媽咪見件南瓜衫又真係好熱，個商場又真係無咩冷氣，件衫又一著就係，所以都由得佢一陣至著！點知呢d都係佢嘅藉口，當要排隊行入場地側邊standby時，佢又面露痛苦神色，又話唔著件衫唔跳舞喇！媽咪不斷氹都無用，再用力拉佢埋去時，佢又大力向反方向拉媽咪走！老師走來話由得佢唔著南瓜衫，媽咪又再氹佢話就咁上台，佢都唔肯，個樣真係好苦，想喊想喊咁！

搞左一輪，要上台喇，人人都興高采烈衝上台，Ambrose就死都唔肯行一步，媽咪都無得勉強，即使係推左佢上台，佢喊的話都好難堪啦！所以由得佢在台下睇！頭一輪唔上台，媽咪都預左佢最尾果輪都唔會肯上，果然！甚至乎老師俾左粒道具大糖佢响台下揸住自己鍾意跟住跳都差d唔肯攞，攞左一陣就俾番媽咪！成個表演，佢都响台下得個睇字！安慰少少嘅係，當日其實有一個同齡嘅女仔同埋一個k3嘅男仔又係唔肯上台表演，唔係只係Ambrose一個囉！

 

好彩學校有安排旅遊巴來回表演場地同學校，如果唔係，今次媽咪一個人湊住Ambrose去咁遠，又攞哂單鏡機同攝錄機出去，仲要對住個扭計唔上台嘅小朋友，如果再要搵車返屋企，媽咪一定顛左囉！

 

今次表演失敗，媽咪都明白可能商場人多又嘈，Ambrose已經唔係咁鍾意跳舞（定老師？定學校？），响咁嘅心情之下，要勉強佢上台可能係過份左，所以媽咪心情都ok嘅！不過回程上車時，有家長走來同媽咪講，叫媽咪千萬不要放棄，話小朋友開頭係咁，只要唔放棄，佢地有一日又會開開心心咁上台，呢個係必經階段咁話！呢番說話再一次令媽咪又重新諗番究竟應唔應該要佢學跳舞，應唔應該點點點嘅一連串問題，心情真係好矛盾！