Home Art Jamming @街境 (4y9m)

Ambrose以十分鐘時間，畫左一幅街境出黎！ 

Home Art Jamming @Man with Gun (4y9m)

呢幅畫，係有d九唔搭八。唔知點解有架車，但角落又有個蛋糕，仲要寫埋“I like Cake”！唔知Ambrose諗咩？！ 

Home Art Jamming @爹爹與蘋果 (4y9m)

呢幅畫，唔知Ambrose係咪畫緊爹爹呢？哈哈！問佢地下果d係咩？佢話係蘋果跌哂落地喎，至於點解跌哂落地，佢又無再講，不過見到就覺得好搞笑！

Home Art Jamming @老虎 (4y9m)

自從Ambrose畫班學過畫老虎之後，佢就無啦啦變身小老師，係都要教爹爹媽咪畫老虎，家中已經畫了無數張老虎了，服左佢！見佢真係一步步教到爹爹媽咪畫到老虎，就覺得老師真的教得好，原來老虎不難畫的！問Ambrose點解老虎腳打哂交叉的？佢就答係因為老虎行緊路係咁樣架喎！有時候，不得不服佢嘅小腦袋，咁都有留意到同埋真係會畫番出黎！

Home Art Jamming @給媽媽的信 (4y9m)

一個早上，Ambrose起身又去左畫畫，媽咪仍在睡覺！過左一段時間後，佢走左入房遞了一封信給媽咪，入面原來係一幅畫，so sweet，唔起身都唔得，哈哈！

Home Art Jamming @媽媽過馬路 (4y9m)

Ambrose畫了這幅畫媽媽過馬路嘅畫，其實見佢畫得好快，真係唔使十分鐘就畫好，但油顏色就有d求其。今次又覺得Ambrose又進步了，之前佢畫嘅雀仔，都係一橫再加個Ｖ字，呢幅畫，佢畫嘅雀仔，係有埋個頭同個嘴嘅，無人教佢咁畫，可能係佢自己悟到出來！

另外，以前佢畫紅綠燈，都係就咁畫三個圓形油番顏色就係，今次見佢有埋個底板，仲有枝杆仲頗有心機咁間住黑白色咁油，哈哈！

Home Art Jamming @媽媽的大肚腩 (4y9m)

Ambrose畫了這幅畫送俾媽咪，佢話係媽咪喎！媽咪問使唔使畫到媽咪個肚腩咁大呀？佢話，係呀，我鍾意丫麻，你個肚腩都好大呀！

激死！

Home Art Jamming @媽媽(4y9m)

Ambrose鍾意畫人，所以成日都會有人嘅畫，媽咪真係見慣不怪！呢期佢興畫媽媽，眼睛會留白咁畫，感覺較以前畫得細緻了一點！Ambrose話要送媽咪一個蝴蝶結，佢意思其實係紮辮用的，但事實係媽咪唔會紮辮。可能，佢好恨媽咪紮辮掛！佢成日同媽咪講，好鍾意媽咪長頭髮。媽咪以前係短頭髮的，媽咪問Ambrose媽咪去剪頭髮好唔好，佢一定話唔好，哈哈！

Home Art Jamming @熊屋(4y9m)

又在紙堆中發現呢幅畫，全鉛筆畫的，Ambrose甚少用鉛筆畫全幅畫，所以感覺幾特別！ 

Home Art Jamming @蜘蛛(4y9m)

之前畫班學過畫蜘蛛，其實已經隔左一段時間。有日Ambrose自己响屋企畫到無野可畫，問媽咪畫咩好，結果，媽咪諗起蜘蛛，就叫佢試吓畫番出黎，估唔到，佢都仲記得，唔係又同媽咪講唔記得！媽咪問Ambrose，蜘蛛腳上咁多一點點咩黎架，佢話係蜘蛛腳毛，嘩哈哈！仲記得媽咪同佢講故事時，Ambrose問點解蜘蛛可以响個蜘蛛網上行走，而其他昆蟲會痴住，媽咪當時答，可能蜘蛛腳上有特別的毛，所以唔會痴住，其實媽咪都唔太肯定係咪咁，講完之後就同Ambrose講，等媽咪check吓資料再答番佢，點知媽咪已經忘記得一乾二淨，無check到，但佢仲記得蜘蛛腳有毛！

Home Art Jamming @結婚(4y9m)

Ambrose話呢幅係爹爹媽咪結婚喎！爹爹件衫，又真係幾似王子衫，個袖泡起架，哈哈！媽咪就著高跟鞋！兩個都有皇冠的！不過，媽咪對手，又係無左嘅？！同埋，可唔可以擦胭脂唔好咁重手呢？？？

Home Art Jamming @單車樂(4y9m)

自從Ambrose識踩二輪單車之後，爹爹更有動力陪Ambrose踩單車，唔知係咪咁，Ambrose自己無啦啦就識畫單車，雖然唔係好精細，也算是好開始，多了一點點除了畫人仔的題材，哈哈！

Home Art Jamming @一家三口 (4y9m)

又係响Ambrose超混亂的窗檯上找到的一幅畫，佢話係我地一家三口喎！爹爹就最搞笑，佢畫埋眼鏡同點點鬚根，而媽咪對手就唔見左！問佢點解媽咪無手嘅？佢好認真地望了一陣，之後尷尬地說，因為唔記得左，哈哈！

星星老師@第四十堂(4y9m)

連堂嘅第二件作品，就係畫老虎喇！真係唔錯，大多數時間，手工同畫畫嘅主題都係一樣的，可以俾小朋友更深印象！Ambrose其實以前都學畫過老虎，但之前畫果隻，感覺似一隻貓多d。可能因為要用鉛筆起稿嘅關係，加上似教寫生咁，要畫得好細緻，但以Ambrose年紀，好難畫，再上埋色 真係麻麻地。今次呢隻老虎，以Ambrose年紀應能handle的，樣子亦較可愛！雖然算不上好靚，但媽咪感滿意了！

星星老師@第三十九堂(4y9m)

今日因為老師有事，所以改左時間，提前一天上課。又因為老師提議可以上連堂，那下星期可以不用上，見Ambrose同學仔都連上，所以都比佢連上，係怕佢捱唔住眼瞓囉！

今堂其中一個作品，就係呢個老虎盒喇，哈哈，真係估唔到，個盒都可以變出一隻老虎，好實用，又幾靚！不過見Ambrose好似無留意個盒開關嘅位置，見佢痴左d黏土上去，都驚個盒開關唔順，不過試左又ok喎，真係神奇！但最好唔好成日開關了，開關幾次可能條尾巴好脆弱好易斷了，哈哈哈！

Buffet @Disneyland Hotel (4y8m)

去過廸士尼酒店食Buffet之後，Ambrose竟然念念不忘，無啦啦會提起想再去食。尤其是當同佢去完廸士尼樂園玩完要離開果時，佢就會問，而家係咪去食Buffet，哈哈哈！原來，佢真係好想再去，唔係隨口講嘅！ 

Home Art Jamming @DIY 書仔 (4y8m)

呢本DIY書仔，應該係Ambrose好幾星期前，甚至可能係個幾兩個月前自己整嘅！不過因為整完之後媽咪無即時收埋，之後想記錄時發覺唔見左，揾黎揾去都無，以為佢可能攞左黎剪紙，所以不了了之。某日，又見到佢走番出黎，所以媽咪即時收起左，哈哈！

星星老師@第三十八堂(4y8m)

今堂Ambrose畫花，媽咪覺得望落有少少似油畫咁！

Home Art Jamming @全家福 (4y8m)

呢幅畫好靚呀！唔知Ambrose係幾時識畫彩虹嘅呢？仲要彩虹兩邊都有舊雲，都幾搞笑！Ambrose本來只係畫左媽咪同佢自己，媽咪見右下角有少少位，就同Ambrose講，不如畫埋爹爹啦。佢好堅持話唔夠位，媽咪就話，唔係呀，右下角有位喎，佢就話個位咁細，爹爹好高架麻，都唔夠位畫。哦，原來Ambrose覺得係要畫哂成個人連埋對腳至得，所以覺得無位，哈哈！於是媽咪同佢講，夠位畫架，爹爹企得好前，响我地前面，所以可以只係畫佢個身，唔使畫腳都可以呀！Ambrose真係諗左一陣，可能佢完全無諗過原來畫畫係可以咁，唔一定要畫哂whole picture，俾媽咪講完之後，理解左一陣，佢就好開心咁話，都得喎，咁就畫左張全家福喇！

Home Art Jamming @瘦雞與復活蛋 (4y8m)

Ambrose畫的雞也太瘦吧！復活蛋也未免有點小，哈哈！真係求其得緊要！

Home Art Jamming @聖誕老人爸爸 (4y8m)

Ambrose畫的這張聖誕老人，其實是爹爹，哈哈！仲有個雪人，成幅畫都算有少少構圖吧！媽咪同Ambrose講，聖誕老人袋禮物呢？佢就話無位畫喇，媽咪提議佢可以照畫禮物袋，不過d禮物太多，趺左出黎，咁咪有位畫禮物袋同禮物囉，佢聽到後好開心，即時畫埋，哈哈！不過個袋就唔多太似架喇，勝在佢自己諗自己畫，自己覺得似就得啦！

Home Art Jamming @聖誕老人 (4y8m)

最近實在很忙，沒時間為Ambrose的家中畫作拍攝記錄，這張聖誕老人也不知是何日的作品，大概是五月某天吧！也不是畫得特別靚，填色也很求其，較欣賞的是聖誕樹由三隻深淺不同的綠色畫成，好似有d層次咁，哈哈！

星星老師@第三十？堂(4y8m)

媽咪這陣子很忙，總是沒時間寫blog，update 下Ambrose各方面的事。關於遊玩的，更是沒時間詳細記下甚至完全沒記下。簡單如上畫班或家中作畫的記錄，也要等上個多月才有時間勉強update一下！ 

星星老師@第三十七堂(4y8m)

今堂Ambrose整左個母親節花籃，真係好靚、好特別呀！因為Ambrose星期五下午在九龍有興趣班要上，所以多數星期五夜晚都會一家三口逛尖沙咀。原本Ambrose上完畫班後，佢可以放低個花籃，但當媽咪見到佢嘅時候，佢仲攞住個花藍，佢即時送左俾媽咪，哈哈！爹爹話Ambrose死都唔肯放低個花藍喎！仲要，當媽咪收到及讚美一番後，提議不如先放在車上再去行街食飯，佢都一樣唔肯！終於，媽咪整晚時間，都要小心奕奕咁攞住個花藍行街街！不過，真係幾sweet嘅！

星星老師@第三十六堂(4y8m)

上堂畫左蜘蛛，媽咪同Ambrose都以為今堂會整黏土蜘蛛。不過意外地，放學見到作品時，才發現今日整漢堡包！包面係bear bear熊樣，好可愛呢！