政府第二次產檢

今日去贊玉做產檢，話就話第二次，因為第一次只係見姑娘同抽血，都無咩做過，所以我覺得今次先係第一次咁！

 

今日要見醫生，都唔使等好耐就叫我。入到間房見到醫生都嚇一跳，佢個様重後生過我，我都好質疑佢得唔得，再望下個牌，原來係實習醫生，心裡面都無咩期望！又係問下你d好standard嘅問題，問我自己有無睇私家，我話有，佢重叫我下次攞埋私家嘅片黎睇，我心唸有無攪錯，我無睇私家嘅話，咁你咪咩都無得睇囉！我重主動話佢知我嘅預產期早左，佢又入埋落電腦度，再問下其他野，又反問我幾時預產期，我真係俾佢激死！之後就檢查乳房，我同佢講上年七、八月嘅時候做左個女性健康檢查，唔知係咪咁，佢都無咩檢查第二度，就用機聽小b心跳，佢都係俾左五秒咁多我聽就停左！之後就起得身嘞！

13 week 1 day (adjusted)

今日約左私家照OSCAR，目的係睇下小b會唔會有唐氏綜合症。首先係抽血，然後度頸皮，醫生話1.6mm，好正常喎！驗血報告一星期先有，到時就會知最後結果！不過我都放心嘅，小b頸皮係正常嘅，我覺得問題唔大！醫生重話我知小b大左一個禮拜，而家已經13 week 1 day，預產期由9月9日改早到9月2日，醫生重話好大機會最尾會係8月bb，咁都唔錯吖！

12 week 1 day

放左一個禮拜病假，腰肚痛又真係好左好多，唔通返工真係太操勞？

 

不過放左一個禮拜假，我都好似坐牢咁，事關奶奶日日都响度監視我！可能試過一次放長病假，兼且我成日都話肚痛，佢覺得呢d野係唔好同唔正常嘅，所以今次非常緊張，晚晚响我屋企瞓之餘，日日放左工十點幾就响我屋企嘞！唔可以話佢唔好嘅，因為佢煮足咁多餐俾我食，重就埋我幾時起身先煮，係好唔話得！

 

不過，因為我食唔落，加上佢覺得睇西醫只係知小b無事而唔會有藥去幫到我，所以佢捉我睇中醫。我真係唔想，我覺得呢個時候最好唔好攪咁多野，搏唔過，而且又唔知同個中醫夾唔夾，我唔想試！不過奶奶好堅持，話呢個中醫佢同事作小產都睇到生喎！我都唔知點say no，半推半就都去啦！d中藥都難飲架！試過有一晚飲完食晚飯，食唔落之餘重嘔埋出黎，重有好多次食完藥之後個胃好削好唔舒服咁，我都開始好怕食中藥！除左被迫睇中醫食中藥之外，奶奶又要我食多d野，不過我真係無胃口，根本食唔到，一日三餐之餘又煲湯，又生果，真係食唔到咁多！可能佢成日都煲藥材湯同炒菜心西蘭花，我而家都有d陰影！呢個禮拜，我大部份時間都响張床度，因為奶奶一見我坐sofa或者坐埋電腦，唔使十分鐘就會叫我入房休息，唔好坐喎！好彩我之前買左幾本書咋，唔係邊瞓到咁多喎！

 

呢個禮拜，我好期待星期六老公放工，因為我相信老公放假同我一齊，奶奶就會返屋企，咁我就自由嘞！

11 week 1 day (adjusted)

條腰痛左好耐，之前特登去左荷花買左個月亮枕，坐响度包住成條腰可以舒服d，但係都無咩好轉！上個禮拜開始個肚又痛，真係辛苦到想喊！上星期五同Ellen Law放左工行街，唔係行左好耐就累得要命！不過總算買到要買嘅孕婦內衣褲，好開心！不過腰痛肚痛都令我好辛苦，又擔心！之前中醫講過如果有腰痛肚痛又覺得好“聚”就要小心，可能作小產！我唸吓唸吓，又睇吓書，本書都有咁講，我又忍唔住同老公講，老公叫我睇醫生！不過星期六下午無醫生睇，我唔想又入急症，因為forum d人話政府見你作小產係唔會有咩幫你，私家嘅就會打針或俾藥。我即刻check吓平時個專科醫生，佢原來星期日會開，咁我哋唸住星期日佢開門即刻book佢睇吓最快幾時有得睇，原本以為即日都可能有機會，不過醫生去左做手術，所以無得睇，姑娘問我睇咩，我咪話佢知我腰痛肚痛，點知佢話正常，我梗係唔放心啦，佢又講一大堆理論話係正常，我忍唔住問咁即係最快幾時有期？佢先話23號，唉！我本身都約左26號覆診，如果等到23號就唔爭在等到26號啦！個姑娘叫我觀察多幾日先喎！唉！佢都唔知我痛左成個禮拜先至搵醫生，重點觀察多幾日喎！

 

我奶奶知道之後，分散叫人幫手睇下邊個醫生有期，今朝早九點半我重瞓緊嘅時候佢就打俾我話搵到一個响銅鑼灣，約左十一點半有得睇，咁我就仆起身梳洗食早餐出門口嘞！由屋企去銅鑼灣要轉多程車，如果係平時我一個人嘅話我會响金鐘或灣仔轉的士，但奶奶同我一齊，佢話响灣仔轉叮叮，我梗係唔敢講我想搭的士啦！其實我知道落左車後行去搭叮叮都遠遠哋，我又腰痛肚痛，唔想行，好彩奶奶見原地有巴士去銅鑼灣，咁就話唔行等巴士嘞！今日無啦啦又涼左，企响度等巴士都好涷，其實都遲到，唔明點解唔唸下搭的士，我可以無咁辛苦！

 

十一點八先到診所，原來都要等好耐，差唔多一點九先到我，等到傻左，無辦法啦，約到都好好！醫生問完一輪，佢話怕我腎有事，拍完條腰，好似無咩唔妥，再去照小b先知有無問題。姑娘問使唔使叫埋我奶奶入黎睇，其實我都好緊張，所以唔係幾想，醫生又問多次，咁唯有話好啦！醫生一照就睇到小b，佢重好活躍，我見佢彈左幾下，好似游水咁，醫生想度佢有幾長，都話佢好活躍，應該無咩事，見到佢彈下彈下好似好好玩咁，我都相信小b係ok嘅！我問醫生之前我嘅醫生話有隙，所以stick得唔太實，而家重有無？佢話佢見唔到有隙喎，重好似好奇怪點解有呢個說法咁，我無理啦！佢話見唔到，可能已經生埋左，即係無事啦！不過因為之前試過見啡，而家又腰痛肚痛，醫生都俾左幾日假我休息下，都無藥食，咁就九百大元，真係好貴！不過唔睇又唔安心嘅！

情人節

今個情人節將會係最後一個我同老公二人世界嘅情人節嘞！唔知第日會唔會整整吓唔慶祝呢！有左小b以黎都唔係幾舒服，所以都無咩心機唸禮物嘅野。後來，見老公話佢個shaver唔見左個charger，咁我就決定買個新shaver俾佢嘞！等老公放工要開會，我自己去買，再收埋响屋企。情人節我哋都唔興出去湊熱鬧，都係留响屯門，我就決定食泰國野，好掛住冬陰公呀！今年老公就無咩心思啦！我feel唔到佢自己出街買禮物嘛！佢就攪笑啦！收埋份禮物响床下底，點知我有一日搵野打開見到有一大包Chip and Dale床舖套裝，重以為奶奶買俾小b嘅，原來係老公嘅情人節禮物，我都未聽過有人會送呢d野做情人節禮物嘅！講真，自從大學住宿舍之後，我就唔會買卡通公仔床單，因為覺得有d低能咁，而且我都偏好花紋床單，亦對床單嘅針數有d要求，所以我會買死一個牌子，有保證之餘重match番已有嘅被舖嘛！我都記得老公都講過唔鐘意卡通公仔床單，對於呢套Chip and Dale床舖套裝我真係好意外！老公話襯番小b，好似開心d喎！但係佢對於呢d野真係門外漢，個被袋我吔明明係加大佢就買左雙人，原來佢咩都唔知，好彩佢重記得張床幾闊啫！

 

對於套床單，無可否認係好cheerful，但係真係唔得！Chip and Dale床舖套裝，牌子自然係Disney，我見袋面寫嘅針數係280針，唔係好低嘅，不過摸落唔似有280針囉！雖然我話我有要求，但係我都唔係高嘅，一般而言，我用開果隻牌子300針以上都ok架嘞！呢隻Disney話有280針，好似都唔係差好遠啫！點知用左一晚，我忍唔住同老公講，“好鞋呀”！我已經瞓得好差，加上套床單同個被袋都“鞋”到死，瞓唔到囉！老公就話都唔係咁誇張，但都認同好“鞋”囉！所以我哋都速速換番出黎嘞！真係嘥哂！不過，呢件事件俾我知道Disney床舖真係唔可以買囉！

 

我買果個百靈牌shaver，老公就好鍾意嘞！佢話好型喎！重要有得電動清洗，有成個座响度，好型喎！佢重影埋相放左落佢facebook度哂命，超攪笑！

9 week 4 day (adjusted)

今日返去覆診，睇吓小b有無事。上次小b有1.39cm長，今次有成2.66cm長，兩星期1cm，好叻！醫生幫我照，佢話重有一條隙，大概1cm長，0.5cm闊。我忍唔住話小b得2.66cm，但條隙都成1cm喎，比例都好大啦！醫生話ok，因為小b係2.66cm，不過成個胎囊都唔太細，比例上都可以，都唔太擔心喎！咁我都ok放心嘅！同醫生講我條腰好痛，佢只係話我好似比其他人痛早左，但佢又無再問落去，好似好正常咁，我就無追問嘞，雖然我都有d擔心唔知會唔會痛足咁多個月呢！

9 week (adjusted)

今日係我放完長假後嘅第一個工作天，放左咁耐假，真係好唔慣！放假嘅時候日日都瞓到好晏，今日要早起，之前果晚又緊張到成晚醒，重有成八個月流流長，以後都係咁都唔知點算！