轉讓全新I-pen適用之Robin發聲英語圖書 – Read and Learn About Set 2

I-pen適用之Robin發聲英語圖書 – Read and Learn About Set 2，以科學自然現象為主題，讓孩子從閱讀中增長知識。一套五書連Data CD，全新，原價$185，現轉讓價$110，由於書重，只作屯門面交，有興趣請私人留言給我！

轉讓Eye Stickers

之前買落嘅eye stickers，成卷有成2000 pieces，雖然眼仔貼紙做手工都幾有用，媽咪DIY聖誕咭都係用佢，快靚正，之不過2000pieces又真係用極都用唔哂，一千對眼喎！所以媽咪決定轉讓部份眼睛貼紙，一來唔好浪費，二來又當幫補吓啦！眼睛貼紙共有六個款，媽咪以呢六個款為一張貼紙計，現售$2一張，十張以上九折，可郵寄，郵資另付，有興趣請私人留言給我！

（黃色Lego粒為Duplo系列）

2011聖誕禮物

今年聖誕節，Ambrose真係大豐收呀！

 

聖誕禮物一共有五份，醫生套裝係嫲嫲送嘅，工具檯組合係姑姐姑丈送嘅，Lego警車set係爹爹媽咪送嘅（其實係媽咪買嘅，呵呵）！Lego基本組件一箱，媽咪想買好耐架喇，聖誕前去反斗城買禮物俾表姐時，爹爹好想買麥坤搖控車俾Ambrose，但媽咪嫌貴又唔係太益智唔想買，一心想買Lego，俾Ambrose揀，佢又只係見一份想要一份，重要係佢揀禮物準則只係要夠“Big”，真係唔多可靠，所以最終係一樣都無買，只係攞番之前買落而又收起左嘅警車set作為聖誕禮物就算！真係估唔到，媽咪同Ambrose响聖誕節果晚參加左朋友嘅聚會，而個聚會又係一個BB聚會，所以禮物都係BB玩具／用具為主，Ambrose自己去抽，竟然好好彩咁抽到盒媽咪好想要嘅Lego基本組件一箱，媽咪同Ambrose都超開心，Ambrose重要成晚mark實份禮物唔放手唔俾人掂，哈哈！而最後果份Lego小賣部加貨車set係Ella姨姨特別送俾Ambrose架，真係多謝哂Ella靚姨姨！媽咪同Ambrose真係開心到暈呀！

最衰都係你

Ambrose又語出驚人喇！

 

Ambrose同大表姐一直都玩得比較顛d，但表姐大Ambrose幾歲，所以有時佢兩個一齊玩都要睇實d，佢兩個一時糖痴豆，一時水溝油！話說有一日嫲嫲帶左Ambrose過去表姐度玩。兩個人玩得顛起上黎，表姐走左上沙發度跳落地下，之後Ambrose就有樣學樣想走上去跳落黎。但Ambrose其實重細，路邊果d路駁矮矮地咁跳都重可以，沙發咁高跳落黎佢一定勁衝前撞到啦，所以嫲嫲一見到就即時叫停Ambrose唔俾佢跳。無得跳嘅Ambrose唔知點解竟然遷怒於表姐，大大聲話表姐“最衰都係你”！媽咪其實無在場目擊整件事，只係聽返黎，不過所有人都覺得Ambrose咁講野真係好神奇，究竟點解佢會識咁樣罵人、怪責人，不過想像佢講呢句說話個樣都覺得幾好笑嘅！

 

Ambrose平時都算係惡死同霸道，而家唔知點解重識罵人，真係有少少擔心佢大個會係小霸王！性格真係天生，希望後天嘅教育幫到佢啦！

Gakken Workbooks

之前上淘寶就已經見過呢套workbooks賣$84人仔，不過問過成9kg，運費分分鐘同貨價差唔多，重要咁重寄黎公司再由媽咪托番屋企，簡直無可能，所以無買！之後無啦啦有間網店做團購，$199一set三本，計落雖然同淘寶差唔多，但好似响香港買有d質數掛！於是媽咪就聯同Wing姨姨、Ellen姨姨一齊團購呢set書，三個人買加埋就真係抵過淘寶好多，因為免運費，買得越多就越抵過响淘寶買，哈哈！

 

不過好衰唔衰送左去Wing姨姨公司，攪到佢要自己托番黎俾我地，真係辛苦哂佢喇！終於都攞到套書番黎，一本都已經好厚好重，重要三本，淘寶seller話要9kg，果然無呃媽咪！打開2歲果本睇，有連線有手工剪貼又填色，好多元化，d公仔又好靚，紙質好掂，成本都好colourful，以$199呢個價買呢三本好似電話薄咁厚嘅workbooks，都咪話唔抵！哈哈！

長洲兩日一夜

爹爹book左長洲華威酒店廿三號住一晚，諗住Ambrose未去過長洲，一家三口搭吓船，去吓離島行吓玩吓hea吓！

 

Ambrose知道去長洲會搭船，不知幾興奮，成日都講要搭船！之前果晚同佢講完去長洲一事，諗住第二朝瞓醒佢會唔記得，點知起身問佢今日去邊度，佢竟然答到，可想而知佢平時真係選擇性地聽我地講野呀！

 

多得Ellen姨姨提點，爹爹決定搭西鐡直出碼頭上船，因為全程bb車都可以唔使收喎！結果都真係唔使收，只係去到香港站唔知點解無濶閘出F出口，走左去問個客服，教我地出另一個出口行天橋過碼頭，但出到去發現有一行樓梯要落，Ambrose瞓著左，所以結果就係由爹爹連人帶車搬啦！去到碼頭買飛，見豪華座同普通座差少少錢，就買左豪華座，點知買完先知豪華座要上兩層好直嘅樓梯，爹爹今次真係辛苦喇！

 

豪華座有檯，係方便少少，加上窗全密封，好暖！不過Ambrose係都要出出面睇海景，啱啱撞正天氣轉凍，海風又大，真係吹到頭都甩呀！好彩唔覺意同Ambrose攞左頂帽跟身，要佢笠住先可以留响出面睇海。媽咪怕凍，同爹爹Ambrose影吓相就入番船倉度，可憐爹爹吹到死死吓，哈哈！

 

爹爹book左華威酒店海景房，個view真係正，如果係夏天就好，可以去埋沙灘，而家凍冰冰，見到都覺得超凍呀！去到酒店嘅Ambrose超開心，周圍攪，又一定要開露台個落地玻璃，凍鬼死人！媽咪擔心Ambrose凍，同佢執左好多衫，點知去到酒店先發現，媽咪唔記得同自己帶瞓覺衫，真係大意！

 

响酒店check in左擺低行季之後就出左去周圍行，酒店樓下就係公園，所以Ambrose又點會唔話玩丫！同佢玩左一陣都唔肯走，都係要出動到去搵單車踩搵野食先肯離開！

 

長洲其實好細，除左踩單車真係無咩好做！所以响街頭食左好多唔同小食之後，一家三口就去搵車租喇！家庭車係一個人踩兩個人坐後面，唔同大尾篤嘅家庭車，要兩個人踩，所以今次媽咪可以偷懶，哈哈！不過沿海邊踩單車，真係好大風，又係吹到頭都甩， Ambrose似乎好受落，成日叫爹爹快d快d，哈哈！中間有小事故，就係架單車甩鏈喇！好慘，因為已經踩到好遠，要返去換車都唔係易，爹爹唯有獻出佢人生第一次整甩鏈，好彩都俾佢整到，唔係又凍又要行番去就勁金喇！

踩吓踩吓又經過另一個公園，Ambrose又話要去玩，咁就陪佢去玩啦，反正唔踩單車，呢度又無咩好行，佢想去公園玩就玩啦，無其他行程趕住去嘅！玩完一餐之後，已經天黑喇，因為下午都無食過正餐，所以都係早d去食晚飯喇！

 

搵左檔大排檔食吓海鮮，Ambrose就開心啦，有佢鍾意食嘅蝦，係咁叫爹爹搣俾佢食！呢一餐真係好抵，有五餸一湯加兩碗飯一枝汽水，都只係二百蚊，五餸之中重係有蝦、聖子同魚架喎！

 

食完飯，行去超市買左d零食生果就回程返酒店，响室外玩左成日，真係凍左成日，返到酒店先至有暖嘅感覺呀！其實返到酒店好早，爹爹媽咪又發現有套叫“零秒出手”嘅劇集好好睇，同埋Ambrose一齊睇，哈哈！

 

夜晚，由於Ambrose有足夠嘅衫，所以暖爐唔可以開到最熱，如果唔係佢就出汗！可憐媽咪無帶瞓覺衫，只係可以著件底衫瞓，好彩因為諗住第二日就會最凍，所以唔覺意攞多條heatech嘅打底褲，所以勉強都有套瞓覺衫褲瞓覺！不過可能衫褲同被都薄，而華威酒店又唔係真係好似酒店咁有暖氣，又近海邊，媽咪半夜紮醒左之後覺得好凍，點瞓都瞓得唔多好囉！加上個枕頭好扁呀，瞓到周身骨痛！

 

第二日，懶吓床十點幾起身，真係好凍！原本諗住出去搵野食，但見原來酒店地下有酒樓，都係唔出去喇，飲茶算啦！原本Ambrose成日嘈住話去沙灘，媽咪都好想去，不過天氣實在好凍，海邊好大風，所以最後都同個沙灘無緣喇！飲完茶執埋行季就check out喇！走果時又經過公園，Ambrose例牌玩左陣！

 

長洲之行終於完結，我地搭十二點三船離開喇！呢一程船，Ambrose又要坐出面睇海，媽咪真係頂唔順，又係同佢影左少少相就入左船倉等喇！哈哈！今次好彩d，媽咪入左船倉一陣，就見爹爹同Ambrose返入黎，爹爹話Ambrose話真係好凍呀，爹爹問Ambrose返入去好唔好，佢話好，爹爹終於都可以唔使再吹風，哈哈！

 

落船行左陣IFC，Ambrose又瞓左！突然間覺得Ambrose大個左好多，見佢瞓响bb車度原來已經唔止突哂腳仔出黎，原來佢迫到無得轉身，架bb車已經係歐洲大車，比起好多車已經大左好多，Ambrose細個時瞓都不知幾鬆動，原來唔經唔覺佢已經大到連坐呢架車都咁迫！

 

呢一次長洲之旅，Ambrose出奇地好開心好興奮，全程成日都自己唱歌又笑又叫，爹爹話估唔到佢咁鍾意長洲！雖然咁樣入去住一晚無咩特別野玩，只係好hea咁踩吓單車同去公園玩，但見到Ambrose咁興奮真係覺得咁樣又有咩所謂，最緊要係佢開心，我地開心啫！做d咩又有咩關係呢？

 

 

 

 

Tunnel

想寫低好耐，但成日都唔記得，腦退化得好緊要！

 

早排無啦啦聽到Ambrose講tunnel，佢又走埋DWE嘅poster度搵個tunnel出黎指住話tunnel，當時就已經好surprised！因為爹爹媽咪其實都無特別教過Ambrose呢個字，基本上用DWE都係麻麻地勤力，歲半打後加埋返左學後更加陷入停用狀態咁濟，套教材一直都唔係用得好好！但估唔到Ambrose响咁嘅用法之下，竟然似乎都吸收到，而家先至output出黎！

 

但最surprised嘅係，Ambrose唔單止認到個位同圖（相信佢唔係真係認到英文字），佢係真係明白tunnel嘅意思！有一日，唔知點解佢攞到爹爹嘅書立，個書立就係好傳統果種，中間有個洞嘅。Ambrose攞哂佢d車仔出黎又排隊，佢將d車仔一路排，一d重走埋入書立中嘅洞度，媽咪見到覺得好奇怪，做咩無啦啦排緊車仔走去擺個書立落去，Ambrose笑笑口指住個書立話“tunnel”，媽咪真係覺得好似喎，咁都俾佢諗到，超叻！亦都因為咁，媽咪相信佢係明白“tunnel”嘅意思，而唔係記得poster上某個位某幅圖就係“tunnel”！

自製聖誕咭

從來都無諗過要幫Ambrose寫聖誕咭送俾人，因為覺得無咩意思，一係捉住佢隻手寫，一係父母代寫，其實佢都無真正參與過，不如慳返，又環保d！

 

直至月頭同Ambrose玩cube stamps，見到Ambrose印英文字母，媽咪突然諗到Ambrose唔識寫，但係可以幫手印名，都唔錯喎，所以由月頭開始，媽咪就有idea自製聖誕咭，要Ambrose參與到製作！

 

當晚其實已經把握機會，先印左好幾張有人名同Merry Xmas嘅字咭，印好之後先至諗點整張咭，哈哈！今次DIY聖誕咭真係好艱辛，因為媽咪一直都好堅持Ambrose有份參與，所以好多時媽咪要等Ambrose瞓左之後先至可以構思同預備材料俾佢整咭！又因為一張咭實在太多工序牽涉其中，Ambrose唔可能全部都參與，所以又係要等Ambrose瞓左之後先至可以由媽咪加工！一個晚上其實唔係好多時間，每晚做少少，結果先至發現原來大半個月前開始製作，時間都真係唔係好夠！做好咭仔之後，又要度身做埋信封，媽咪又唔係好識整，結果第一晚做信封，諗住好易，都整左一晚，試左幾個鐘先至整到一個咁多，真係嘔心瀝血！製作到後期，媽咪簡直唔想開工，因為實在太攰喇！下年真係要再三思！

 

今年一做就做左十幾張出黎，不過由於後期時間緊迫，有d入左信封都唔記得影相，真係可惜！

 

所有聖誕咭嘅咭面公仔，全部都係Ambrose親手做嘅，呢個係媽咪嘅堅持；而信封，Ambrose都有參與某d信封嘅製作，主要係塗膠水貼；至於內文，因為係印印仔加托印，好大部份都係媽咪做嘅，無法啦，真係太多工序，又太多咭要整，無時間俾Ambrose亂黎，所以都係俾佢整封面好d！可能今年媽咪突然要整咭，真係無咩計畫過點整，都係隨做隨諗，所以早期做果d係唔多靚（送俾老師粉紅色信封果兩張），哈哈，中期果d做順左就靚d，後期因為太攰太辛苦，又無咁靚，求其d（黑色咭紙果兩張），哈哈！

Alphabet Stamps and Scented Stamp Pad

之前托表姨媽响Discount School Supply買嘅字母cube stamps好係幾好，夠哂大粒好揸手，但字母比相像中大，想用黎做咭，會有d唔方便，加上之前俾Ambrose玩，佢印完一邊再想印其他邊，一手又揸番落去有顏色果度，成隻手污糟哂之餘，重攪到印到花哂，哈哈！所以呢set cube stamps都係用黎玩就得，要正經攞黎印咭，真係唔太得！

 

有見及此，媽咪就去左買呢盒Alphabet Stamps，用黎DIY咭仔送俾人就最啱！呢盒有埋個盒企企理理，易收藏，Good！媽咪最鍾意嘅係印仔成個係用膠做唔係木做，印完就可以好方便攞去用水洗，如果平時木印仔就唔係幾得喇，乾又要耐d，都係膠好！呢盒stamps重可以用黎做matching，哈哈！因為每個英文字母一格格擺放，而個盒底重印有英文字母，如果攞哂d印仔出黎，小朋友係可以根據個盒底英文字母擺番好哂d印仔，真係一物兩用呀！

 

至於個Stamp Pad，已經有好多個Stamp Pad嘅媽咪，一見到呢盒係靚靚嘅粉紅色就忍唔住買番個，因為屋企無呢隻色！不過好失望囉，以為隻粉紅色印出黎就好似盒面公仔咁出色，點知印出黎嘅色一d都唔出，重係印好多次先沾到墨水，印出黎超淺色，真係激氣呀！

6 cubes puzzle

想買cubes puzzle俾Ambrose好耐喇，不過市面上常見嘅都係9至12 cubes，對於Ambrose咁細個嘅小朋友黎講，其實會好複雜，所以媽咪一直都想搵4至6 cubes嘅puzzle！4 cubes媽咪其實無見過，只見過6 cubes，不過由於每次見到有嘅時侯，往往都只係得 一兩 盒咁多，重要成日都係公主款式，所以媽咪真係買唔落手，唯有等呀等啦！

 

今日過左去Book Buddy，竟然俾媽咪見到有toy story 6 cubes puzzle，得番一盒，媽咪二話不說攞起就買，哈哈！不過其實都略嫌呢d卡通人物puzzle都係太花巧，要成功砌出黎都好似幾複雜咁，唔知有無d簡單線條又或者係實物圖像嘅cubes puzzle呢？

M&S收獲

星期日，返左成日工，攰到死！不過，見身在佐敦，又難得有人湊住Ambrose，於是，媽咪蛇左過尖沙咀shopping！

 

又係離唔開睇Ambrose嘅野，真係死性不改！去左M&S，諗住睇吓有無返學嘅白襪仔，無睇啱，好自然又行左去睇有咩野食買，哈哈，黎得M&S，媽咪通常都要去買包fruit gum，yummy！！！

 

點知行左去賣野食果度，竟然見到有少量童書及玩具做特價，忍唔住又買野喇！買左一包card fire station，係可以自己設計嘅fire station立體場景，好似都幾得意咁！原價$125，特價$75，平時唔多見有呢類野賣，一見到又唔貴，即買！最衰唔係立體車，唔係應該重好玩！再買左盒sticker pack，一盒入面有四本唔同主題嘅sticker and activity book，除左貼貼紙，亦有少少手工整吓。原價亦係$125，特價$75，媽咪見公仔都幾靚，又有得貼貼紙，又有得玩，雖然係最後一盒，盒面有少少摺痕，但咁嘅價錢包四本書仔，都幾抵，買埋佢返屋企，送禮自用都啱丫！

 

Mould and Paint Christmas

之前學校話有聖誕吊飾比賽，媽咪懶，唔多想做，咁啱行DYMOCKS見到呢盒Mould and Paint Christmas，好似都幾方便，開粉倒模上色，就可以做出聖誕磁石吊飾，又可以DIY玩吓，所以買盒番黎，諗住有時間整嘅話就偷雞整呢個交返學，嘩哈哈！

 

之不過，由於呢半個月以黎嘅夜晚時段都好忙，要準備材料同埋同Ambrose一齊趕製聖誕咭，真係無咩時間玩呢盒野，睇黎，可能要留到出年聖誕先至可以玩喇，到時Ambrose都應該幫到少少手整掛，哈哈！

大家來刷牙

由細到大，Ambrose都唔鍾意清潔口腔。細細個得果個幾月人仔，媽咪用紗布包住手指伸入佢個口度抺，佢一定鬼殺咁嘈！再大少少，佢重會擰頭唔俾你擺隻手入去！再大d，佢重識得死合埋個口，點都唔俾你有機可乘撩隻手指入去！所以由細到大，媽咪同Ambrose清潔口腔簡直係一場角力賽！

 

後來媽咪索性俾牙刷Ambrose自己刷牙，Ambrose都麻麻地，就算係肯，都只係不停咬枝牙刷，媽咪見佢肯咬都叫好過無啦！為左引起Ambrose刷牙嘅興趣，媽咪真係千方百計，又換牙膏又換牙刷，又勁讚佢叻，不過效果都係一般！

 

直至「大家來刷牙」嘅出現，似乎Ambrose開始接受到少少刷牙喇！可能又加上學校又有教刷牙啦，兩方面夾攻之下，Ambrose有時臨瞓都會自己話刷牙，然後刷完牙就一定要媽咪同佢上床睇故事書！呢本「大家來刷牙」，基本上唔可以話有咩故事可言，入面其實係每頁有一個立體動物，都只係講話佢地刷牙嘅方向同埋反問讀者係點刷牙，媽咪好少可以認真同佢讀完d字，因為本書入面有把大牙刷可以俾小朋友攞出黎同動物刷牙，所以其實Ambrose唔係要媽咪同佢講故事書，而係佢好心急想同動物刷牙，刷完牙之後，佢重好叻咁將枝牙刷放番去獅子隻手度，擺返原位架！同完動物刷牙，Ambrose就好滿足咁可以關燈瞓覺！有時Ambrose唔會自發話刷牙，不過每當媽咪一提起刷牙，佢都無再好似以前咁極力反抗唔刷，甚至乎有時佢一聽到話刷牙，都會好順攤咁跑去廁所擠牙膏，睇落係佢唔記得刷牙多過唔鍾意刷囉！呢本書，已經續借左兩三次喇！聽講只可續借五次咋！本來想睇吓書局有無得買，怕Ambrose之後又唔肯刷牙，都係買定一本放响屋企，點知本書香港無得賣，要响台灣買！訂一本書運費都幾貴架麻，都係再睇吓Ambrose情形點先啦！希望佢快d習慣唔用書都肯刷牙啦！

口頭嬋

人地話兩歲開始，小朋友就會進入Trouble Two，係小朋友嘅反叛期，每事都會與大人對著幹，有佢地嘅主意。呢個階段係小朋友進入左獨立期，佢地發覺原來可以按照自己嘅意願自主，有佢地嘅操控能力，唔一定要聽哂大人嘅話！果然，一踏入兩歲嘅Ambrose就已經識得講“唔好”同埋“唔得”，總之我地同佢講咩都好，佢都會話“唔好”同“唔得”，無野會係答“得”架！呢個問題真係令人好頭痛！食呢樣又話“唔好”玩呢樣又話“唔得”，返學要換校服要同佢除睡衣又“唔得”，總之就係難攪啦！如是者，Ambrose係咁講“唔得”同“唔好”都講左幾個月喇！開始，佢都偶然會答“得”嘅，如果係關於食野嘅話，哈哈！佢講“唔得”同“唔好”嘅程度，簡直係變左口頭嬋咁！問親佢野都一定答“唔好”同“唔得”先，好protective架！不過而家有時問佢可唔可以請媽咪食一粒提子，佢都話“唔得”，但同時間就响個碗度開始“篤”一粒俾媽咪，甚至好堅持送入媽咪個口入面，真係唔知佢想點！總之，佢而家講嘅“唔好”同“唔得”好似講慣左咁，唔理三七廿一，“唔好”左先，希望佢呢個口頭嬋會隨住佢長大而無左啦，唔係都真係幾煩吓架麻！

按摩

最近買左個熱石按摩器，枕响肩頸又得，腰背又得，甚至小腿都得！無啦啦點會走去買？哈哈，因為姑姐屋企有一個，佢極力推薦呢個按摩器俾媽咪，試用過又真係幾好，按住又暖暖地咁，唔錯唔錯！試完即刻叫佢幫媽咪買番個！佢識人平d麻！重送多個細嘅便攜式按摩器，Ambrose稱之為“八爪魚”，哈哈！佢真係超鍾意呢隻“八爪魚”，响姑姐屋企已經係咁攞人地果個黎玩，到而家自己屋企都有，佢就當左呢隻野係佢玩具，死攞住唔放手。最終，Ambrose要為呢隻八爪魚貼上自己個名字貼，據為己有！

聖誕親子吊飾比賽

又收到通告話有聖誕親子吊飾比賽喇！經過上次中秋嘅燈飾比賽之後，媽咪已經決定唔再參加。點解？第一，媽咪真係唔係d有創作力嘅人，手工勞作真係麻麻地，重話要係吊飾，真係難到媽咪，唔識整！第二，上次中秋個燈籠，真係媽咪嘅嘔心瀝血嘅傑作，用左幾個深宵，攪盡腦汁先至趕起，實在太辛苦喇，媽咪唔想再黎多一次！第三，原來學校呢d比賽，係無分級別嘅，即係話N班至K3都一齊比賽，媽咪就覺得唔多公平。始終係親子手工比賽，都要顧及成品係咪真係小朋友可以一齊幫手整至得，所以對於N班黎講，所做嘅就自然比較簡單，而K3嘅就可以複雜好多，靚d！但係比賽又以投票定輸贏，基本上，大部份嘅人都一定會投俾果d好大型好複雜嘅作品，而呢d作品往往又一睇就知完全係大人做，K3嘅小朋友都未必做到果種！加上投票人係無限，任何人隨時隨地就可以投，投幾多又無人理，呢個形式嘅比賽真係好唔公平同合理，亦都唔見得學校好鼓勵親子咁！媽咪唔係計較輸贏，不過咁辛苦做出黎嘅手工，原來只係幫學校攪吓氣氛，俾其他人評頭品足，媽咪真係唔想浪費心血！

 

就係咁，媽咪一直都無諗住要整，直到要交嘅deadline前一日，媽咪因為要幫Ambrose諗DIY聖誕咭送俾朋友仔，不斷去諗不斷去上網睇，終於無啦啦俾媽咪見到有d簡單嘅手工，而咁啱家中亦有齊大部份材料。由於估計製作時間應該不多，所以媽咪响限期前一日終於的起心肝去做呢個吊飾喇！

 

原先只係諗住做個環，超簡單，但又見到pom pom聖誕樹又好靚好簡單，媽咪同Ambrose都可以輕鬆handle到，兩樣都好之下，都係做哂兩樣出黎睇吓邊個靚d交邊個啦！

 

之不過，做起哂之後，發覺將個環同聖誕樹二合為一重靚，哈哈，就係咁，媽咪將兩個本來分開嘅吊飾合埋一齊，perfect！！！估唔到真係幾好，幾靚！最好係，真係方便易做唔太花時間！有野交番學校點都好少少嘅！

我唔睬你

呢排Ambrose成日都會有d語出驚人嘅金句，繼之前嘅“唔好攪我d野”同埋“我唔開心”，重有一早已經識講但媽咪一路都無記錄過嘅“我唔睬你”。次次聽到都俾Ambrose笑死，因為佢真係俾個嬲樣你再講“我唔睬你”，有時媽咪會整蠱佢，同佢鬥講“我唔睬你”，你一句我一句咁，講多一陣，Ambrose就會忍唔住笑番！

 

唔知之後佢重有咩搞笑金句彈出黎呢？

我唔開心

都話睇電視荼毒人架啦！呢排唔覺意睇左萬凰之王，睇完又忍唔住追落去，媽咪已經覺得唔係幾好架喇，不過諗住都係一套劇啫，睇完呢套劇媽咪唔再睇架喇，所以媽咪都好想快d大結局，咁生活又可以變返以前一樣，食完飯可以多陪Ambrose玩，做吓練習，咩都好啦！

 

今晚終於都大結果，一做就兩個鐘！原本爹爹陪住Ambrose都相安無事，點知Ambrose無啦啦話想要筆筆畫野，爹爹竟然叫Ambrose問媽媽得唔得（平時d筆會收起，如果唔係全屋嘅牆一定花哂）。Ambrose興高采烈咁跑黎媽咪度不斷話要筆筆，但媽咪掛住睇電視，唔想俾左筆筆佢自己一個人畫，一定會出事，又見Ambrose差唔多夠鐘瞓覺，所以媽咪都一一拒絕，係咁話唔畫喇，明天先玩啦！Ambrose要起一樣野上黎都會幾扭，佢知道媽咪掛住睇電視，佢就一手拉住媽咪手，想媽咪離開沙發去攞筆同佢畫畫，當然，媽咪又係死都唔起身，由佢拉由佢扭叫！Ambrose扭左一輪都唔成功，突然間靜左落黎，無拉媽咪，自己坐左响地下，“dup”低頭扁哂嘴話“我唔開心”！真係嚇左媽咪一跳呀！除左再一次分到“我”之外，媽咪都係第一次聽見Ambrose話唔開心！原來兩歲人仔已經明白開心同唔開心喇，重要講埋出黎話唔開心，媽咪聽到心都痛埋！即刻要同Ambrose道歉，再去攞筆筆陪佢玩啦！

 

呢排Ambrose開始講野有紋有路喇，真係開始大個仔喇！

排隊隊之二

自從Ambrose開始玩排隊隊之後，佢極之沉迷排隊呀！每日都會攞哂d玩具出黎排，媽咪放工返去一開門，就成地都係唔同隊伍，真係好誇張！最慘Ambrose排好哂之後係珍而重之，唔俾人攪佢d隊伍，就連自己行路都要好小心唔好踢到佢地，一踢跌左或斜左嘅話，佢會即刻去再排番好，唔到你唔服！

 

今日同Ambrose見完培正，過左去海港城睇Toy Story聖誕裝飾，之後去左Pizza Express食午飯。侍應哥哥好好，俾左一份貼子俾Ambrose玩，其實係Pizza嘅配料貼子，俾小朋友自己design個pizza。Ambrose攞左份貼子出黎貼，並唔係貼响個pizza面上面，而係貼响張檯上面排隊隊！唉！真係太沉迷喇！叫左佢唔好貼檯，佢又唔理，照貼可也！問題係張檯係雲石檯，無檯布，爹爹唔想Ambrose貼左d貼子上去，走果時又要搣番，搣番又驚搣到一撻一撻，所以爹爹唯有出手，想話自己搣左d貼子！點知Ambrose好嬲咁話“唔好攪我d野！”爹爹當堂縮手！唔係因為驚左個仔，而係覺得Ambrose講野咁老積真係好神奇！Ambrose平時唔識講咁嘅野，最多都係講“唔好”，“唔好攪”又或者“NO”，甚至乎Ambrose都重未係好分得清“你”同“我”，爹爹同媽咪完全未聽過亦都無諗過Ambrose會識講呢句“唔好攪我d野！”，當堂忍唔住笑！哈哈！

 

Ambrose真係越黎越大個仔喇！

面試@培正幼稚園

終於輪到最後一間幼稚園面試喇，呢兩個月嘅星期六日真係忙夠喇，隨住今日見埋培正，終於都可以抖吓，實在太好！

 

媽咪對於培幼嘅面試，係最無把握嘅！因為培幼要求小朋友自己入班房面試，家長無得陪同，以Ambrose咁痴人嘅個性，真係無咩可能！不過點都好，媽咪都希望一試，唔係第日Ambrose會怪媽咪試都唔俾佢試重衰！

 

有過之前爹爹陪入面試但分開坐而暴喊嘅經驗，之後嘅所有面試都係由媽咪陪同，呢間都唔例外！今早同Wing姨姨及雅雯一齊出去面試，Ambrose可以輕鬆一下！爹爹陪我地一齊入學校，本來諗住响個登記位度就走，但Ambrose唔肯，係都話要爹爹一齊！媽咪真係好擔心！操場已經有童軍負責分班房舉牌，我地按收據上嘅班房行左去排隊等候。爹爹驚正式同Ambrose道別會攪到佢扭計，所以就一直企响Ambrose後面，過左一陣之後靜雞雞走左！

 

等左一陣，開始可以上樓喇，Ambrose自己行樓梯，唔知點解只係上二樓，但上兩層樓梯都好似行左好多咁，行淨半條時Ambrose放慢哂腳，媽咪問佢係咪攰，佢竟然話係，哈哈！入到班房是但搵個位坐，老師話佢會根據收據編號分組過第二個課室面試，每組五至六人！我地唔係第一組，都好，唔想坐低一陣，未玩夠就要去面試！

 

過左唔知幾耐，好似叫左一組定兩組人就輪到我地，媽咪拖住Ambrose行去排隊，老師呢個時間就貼名字label，搞掂左都重未即時行得，媽咪個心都不知幾想快d入去見完走人！可能因為等左一陣，Ambrose原先都肯揸住張收據，佢係都要俾媽咪揸住，媽咪已經不斷同佢講，要佢幫媽咪俾老師，做到就好叻仔！呢個時間，門開左，隊頭小朋友開始行出去，但都唔知第幾個小朋友扭計，停左响度唔行，又有小朋友喊！之前媽咪上網聽人講話小朋友要自己跟童軍行長走廊去面試，諗住Ambrose一唔見親人就一定會喊，一早打定輸數！不過唔知係咪我地好彩，小朋友只不過一開門行兩三步過對面間班房面試，基本上都唔算要行一段路，感覺都唔算好驚！雖然如此，都有小朋友唔行又喊，塞住左個門口。可能Ambrose見到前面咁混亂，又有小朋友喊，佢好似都知知地有問題，即時拖實媽咪隻手，媽咪唯有拖佢行出去，呢個 時候有 老師伸手黎拖Ambrose入課室，由於門口真係塞住幾個扭計小朋友同家長，又有老師幫手拖小朋友入去，場面都幾混亂吓，為左唔好塞住哂門口，同埋唔想俾Ambrose有機會話唔好同發難，而老師都有勸喻家長盡快離開免得小朋友重驚，所以媽咪幾乎一鬆開Ambrose手，就成個人彈後左離開現場，直去到樓梯口家長等侯區度等！

去到等候區，己經聽到小朋友喊聲，不過就唔知道响邊間房傳出黎，亦唔知係咪自己個小朋友，每每有大喊聲，媽咪同另一個家長都緊張到探頭望入走廊，睇吓係咪自己小朋友喊，睇吓小朋友會唔會要出番黎冷靜吓先再見過！媽咪真係好緊張！哈哈！大概過左五至十分鐘左右，老師終於話可以接番小朋友喇！其實都唔知係咪五至十分鐘，因為唔知Ambrose有無喊，又唔知佢入到課室點樣，呢段時間感覺上其實幾漫長，但看看錶又唔係真係咁耐！

 

媽咪一聽可以接番小朋友，己急不及待第一時間衝入走廊直去課窒，不過原來已經有老師拖住小朋友出黎喇！但媽咪唔見Ambrose，重諗住係咪唔係佢個課室放人呢？其實可能媽咪太緊張，好心急快d見番Ambrose，哈哈！再望吓，就見到有個老師一手拖住一個小朋友最尾先出黎，其中一個就係Ambrose喇！媽咪遠距離望吓Ambrose，佢無喊，不過眼少少腫，媽咪諗緊佢究竟有無喊過呢？再行近少少，媽咪再仔細睇，先至發覺Ambrose應該係早起身面腫眼腫，因為佢個樣同之前未入課室係一樣嘅，眼眶無淚水無紅，媽咪好意外Ambrose真係無喊！接過Ambrose後，媽咪問Ambrose有無喊，佢真係答無喎！之後媽咪叫Ambrose同老師講再見，不過因為個個家長都响走廊接小朋友，老師又忙住入課室準備下一輪面試，Ambrose又唔係第一時間大大聲講到再見，見老師已經行開左，由佢啦！

 

離開走廊去到樓梯口，媽咪忍唔住蹲下去望吓Ambrose，再三檢閱佢雙眼，真係無紅無淚水，真係覺得好神奇！本來從來都唔奢望Ambrose唔喊自己入去課室，重諗住可能有機會要返侯見室冷靜吓再見過，估唔到佢真係做到，真係好想攬實Ambrose啜一大啖，讚佢勁叻仔！Ambrose又成長左喇！講番Ambrose，佢一出黎其實都無咩笑，不過又無話唔開心咁，無咩特別，見到媽咪接佢時又無話一見到就喊，反而即刻俾媽咪睇佢手上面嘅動物貼子，似乎心情真係好好！唔知係老師嘅功勞定係張貼子幫到唔少忙，哈哈！佢出到樓梯口時，見到有一缸金魚，超興奮咁話有魚魚呀，學校有魚魚呀！媽咪忍唔住問Ambrose，呢間學校有魚魚，你鍾唔鍾意呢度呀？佢好開心咁答媽咪“鍾意”！

 

媽咪嘗試問Ambrose入到課室做d咩，老師問左d咩？當然，要响Ambrose口中得到答案，真係好難！只係問到入去無唱歌仔咋！唔知Ambrose响課室入面嘅表現係點，不過佢可以無喊入去，無喊出返黎，响媽咪心目中佢已經攞爆分架喇！跟住有無offer都係睇佢同學校有無緣份，佢有無運氣喇！

萬凰之王

自Ambrose出世之後，媽咪已經戒左電視，夜晚食完飯之後就全情陪Ambrose玩，計起上黎，原來都有二十七個幾月無睇電視！基本上媽咪係連點開部高清盒同電視邊一台都唔多知，唔係講笑！

 

不過最近睇左萬凰之王，真係害人不淺呀！媽咪晚晚都睇，雖然未必次次都睇足全集，但點都有半隻睇到！有時候Ambrose都一齊睇埋，一話睇皇上佢就醒目地跑去沙發坐好等睇電視！

 

唉！雖然好睇，但媽咪已經好想快d做完，唔使再浪費時間追劇，集中多d同Ambrose玩好過啦！

K1面試總結

1)   高德根（下午班申請表）＞＞下午班offer＞＞無留位

2)   九龍塘啟思（上午班考慮下午班）＞＞下午班offer＞＞無留位

3)   保良局易桂芳（上午班考慮下午班）＞＞下午班offer＞＞留位

4)   保良局田家炳（上午班）＞＞上午班offer＞＞留位

5)   青山聖彼德堂（上午班）＞＞上午班offer＞＞留位

6)   青山聖彼德堂兆麟苑（上午班）＞＞抽唔中又無申請waiting

7)   梁李秀娛（下午班申請表）＞＞下午班offer＞＞無留位

8)   根德園（上午班考慮下午班）＞＞waiting

9)   雅麗斯（上午班）＞＞唔肯要下午班唔waiting＞＞rejected

10)   培正（上午班）＞＞未面試

 

原來不知不覺報左咁多間幼稚園，唔列出黎都唔知，其實重有好幾間報左無去，同埋諗過要報而最終無報，只係呢十間去左面試，睇落都好誇張！不過收到上午班嘅其實都只得兩間，重要係唔同時間知道結果，好彩都係報左咁多間，唔係可能一個offer都無都似！

面試結果@根德園

呢間面試 時 老師話預三至四星期就有通知，媽咪上過網睇forum，有上年媽咪報料話月尾會有信，所以一直都不以為意，諗住月尾至月頭先有信！點知星期六爹爹下午响信箱見到封信，攞上樓俾媽咪，兩個人都想親自拆封信，大家都超緊張！緊張到媽咪完全無為意封信其實好薄，其實都應該知道無行，但真係太緊張，手都震埋咁拆信，睇左頭一行話因為今年好多人報，已經知道唔收Ambrose，好失望！呢間面試前其實我地都無咩信心，因為知道要唱歌，以Ambrose性格一定唔會，但佢又竟然做到，可能因為咁，爹爹媽咪覺得面試表現真係唔錯，機會又高番d，就係咁，由無咩expectation到有所期待，到收信話唔收，真係幾大打擊！

 

不過雖然唔收，Ambrose都入到waiting list，都叫好過收reject letter嘅！再上forum八吓，開頭諗住可能全部人唔收都係去waiting，點知原來有人真係收reject letter，咁入左waiting list都叫不幸之中嘅大幸，即係都重有機會嘅！報得根德園嘅家長相信同時都報左好多名校架喇，好似KM，SC重有果d龍校，果d學校都未放榜，相信好多人都會留左根德園再等埋其他學校放榜至決定要邊間，咁可能樂觀d諗，過左交留位費deadline同埋出年五六月真係要交學費嘅時候，就會有位漏番出黎，waiting都重有希望！

 

暫時所報嘅幼稚園都差唔多見哂，只欠 十二月三日 嘅培正，幼稚園面試將正式告一段落，終於可以抖抖喇！

衰人

平時搭村巴返工，我都慣性一係坐窗口位，一係就坐三人座果邊嘅中間位。有人話中間位咁迫，唔鍾意坐，但我又唔係咁諗，坐走廊位係鬆d，不過d人一路上車一路撞住你入，真係麻麻地囉，重要開車後會比較“浪”，瞓著左又容易d“西”出去，我一上車就瞓，所以唔會坐走廊位！可能我細粒啦，就算坐中間位都唔算好迫！

 

不過有d人真係好乞人憎囉，明明自己坐住三人位嘅走廊位，到我行埋去叫佢唔該借借想話坐入去中間位度，佢果時先至一個唔該自己坐埋去中間位度，俾個暖座你坐，有無諗過人地感受架？？？如果一早要坐中間位，做咩唔一早坐入去先喎，係要等人地要坐先至自己坐入去，分明就係睇左係咩人坐落黎，先至決家自己坐邊個位啦，呢d人真係好自私囉！正一衰人！通常我first priority都係搵左兩個女人坐嘅三人位先架麻，見有就一定行左埋去先，你一個唔該坐左我個中間位要我坐走廊位，咁一早知道嘅話我唔行埋去啦，行返轉頭又無左d中間位坐喇，真係好想鬧佢囉！俾著自己早上車都唔會坐住走廊位等人黎先坐中間位啦，唔明呢d衰人咩心態！而家又唔係乞你個位，我都有俾錢架！！！

面試結果@雅麗斯英文幼稚園

同呢間幼稚園都無咩緣份，之前完全無諗過要報，係學校同學報，朋友又報，所以又走去報吓咁！去到open day交form又要排隊又要等，煩到死，但既然去左，都有排隊交嘅！點知俾個時間我係下午三點半，晏覺時間加上爹爹要返工，得媽咪自己湊Ambrose去，又已經有唔同學校offera，已經好煩有offer交唔交留位，交吓交吓又幾間咁多，真係大破財，所以就更加唔想去！

 

面試日Ambrose都係好晏先起身過去見，平時有問必答嘅佢 都唔答 老師問題，已經知道唔多得架喇！果日去旅行時，學校打黎又問媽咪上午學位好full，下午考唔考慮，梗係唔考慮啦，媽咪簡直係九秒九答個老師唔考慮，大家再無野問對方，好快收左線！係之後先至諗起，究竟唔要下午係咪都有得waiting上午定係唔要下午即係turn down左佢地連上午都無得waiting呢？後尾問番d朋友仔先知原來佢地都有收call，有即時問有無得wait！媽咪無問呀，算罷啦，有就有，無咪無囉，都唔諗住去呢間架喇，點都無所謂啦！

 

早兩日收到信，揭盅喇，原來唔要下午又無問有無得wait上午，係無得wait上午囉，應該係reject letter喇！哈哈！呢間應該係Ambrose報k1以黎第一間收reject letter喇！都唔知邊個reject邊個！一早面試時未問Ambrose野已經知道無哂上午班架啦，個老師好似魂遊咁，等埋Ambrose唔答老師問題，同埋老師勁游說媽咪要下午班就更加confirmed啦！媽咪直覺真係幾靈架！

 

不過其實呢間學校校舍媽咪都覺得唔錯架，可惜感覺係二線左少少，估唔到呢間咁多人報喎！唔收都好嘅，費時又煩留定唔留位好！但佢有度唔好囉，朋友仔報全日班，見完哂，出offer前打電話俾朋友話學校出年唔開全日班，問佢地考唔考慮下午喎，都唔知有無攪錯囉，無全日班應該要報名時同人講囉，有d家長根本一定要全日班先攪得掂架麻，無全日班可能人地都唔報名啦！收左人報名費，浪費哂人地嘅時間走去面試，都唔知有無人會撞期而要取捨去邊間見好架麻，面試完哂先話俾人知唔開全日班，好唔caring囉！有d懷疑係咪一早知又唔出聲，等多d人報佢又有得收報名費之餘再同佢間學校做吓勢！雖然唔係好關媽咪事，不過一聽到就嬲啦！咁都得！！！同九龍塘啟思出offer時先話俾人知佢地今年無學卷，真係無分別呀！

意外收獲

開學之前已經覺得Ambrose無咩重過，開左學三個月，學校keep住度高磅重，原來Ambrose只有高左無重過，唔怪得知佢著開加大碼嘅褲仔有時會因為尿濕左又或者poo左重重地而墮左落去，攪到有時會露股隙，又或者會嘈住話poo poo跌出黎，哈哈！啱啱月頭Ambrose腸胃炎，短短幾日唔食野唔飲野只係瞓覺，病完之後好似再瘦左咁，連佢平時著開嘅牛仔褲有時都見佢要抽褲，亦都試過鬆到跌左落黎，要同佢再adjust過入面嘅象筋！而家都唔知究竟好唔好同佢轉返細 一碼 嘅褲仔好？！好彩Ambrose不嬲都有d肉地，高左瘦左都唔係太瘦，如果唔係真係心痛死！

 

呢次病左竟然有意外收獲，就係戒左夜奶喇！早响一歲鬆d已經想Ambrose戒夜奶架喇，健康院話好d麻，加上Ambrose唔願刷牙，臨瞓重要飲枝奶即刻瞓，真係唔多好。奈何Ambrose唔見枝奶唔識去瞓覺，加上嫲嫲成日話bb仔係要嘆枝奶瞓先至夠飽，無得飲好慘，攪到遲遲都戒唔到夜奶！今次腸胃炎，係Ambrose自己無胃口咩都唔食，醫生又話唔好飲奶，好難消化，所以順理成章唔開奶，哈哈！難得Ambrose又唔嘈麻！無飲奶幾日，到Ambrose好番之後終於識得問我地攞奶飲，媽咪死都唔俾，氹佢唱歌仔分散注意力唔好再扭奶，半推半就咁啦，同埋要响床碌個幾鐘至瞓得著咁！頭兩晚見Ambrose扭得勁狂要飲奶奶又咁耐先瞓得著，媽咪都有心軟過架，諗住佢瘦左咁多，俾佢飲奶瞓都好丫，追番d磅數，不過難得有個咁嘅機會戒奶，錯過左又唔知等到幾時先戒到，最後好彩媽咪堅持，過左幾晚之後，Ambrose無再問攞奶奶瞓覺喇！Yeah～～～

 

不過佢重未戒到食奶咀瞓覺囉，唔知點同佢搣甩個奶咀好呢？！

排隊隊 (2y3m)

呢排Ambrose唔知做咩，忽然愛上左排隊隊。先係成日要求大人同佢一齊真人排隊（唔知排咩架），早排病到死死吓瞓左幾日，突然有一日媽咪瞓醒出房就見到Ambrose將以前貼响玩具盒做decoration嘅動物貼子搣哂出黎，再貼落地上面排隊！搣到佢隻手指側邊都起左個水泡，唉！不過佢又真係好有心機排嘅，所有貼子都貼到是是正正，無倒轉架喎！之後佢重攞埋車仔呀、動物呀同埋lego人仔排隊，所有野都會係同一方向，無話亂架喎！呢晚佢重攞埋入圖形果d形狀粒黎排埋一份添呀，服左佢呀！排左嘅隊又唔俾人郁，唔俾人收拾，攪到本來屋企個廳好鬆動，就係因為佢係咁排隊而淪陷左！開飯要開檯要就住佢d隊黎開，推椅子同high chair就變成抖起哂先埋到位！有好有唔好啦，平時Ambrose係都要人陪佢坐陪佢玩，但排隊隊又可以自己慢慢砌慢慢排唔使理佢，對專注力同手眼協調都係好好嘅訓練，尤其是排lego人，佢真係要好小心先排到唔跌，跌一個人仔可能會好似骨牌咁跌好幾個，要重新黎過！

面試結果@聖公會青山聖彼德堂幼稚園／聖公會青山聖彼德堂兆麟苑幼稚園

學校旅行之前已經收到信Ambrose收左青聖嘅上午班，比起之前保田收左上午班，今次青聖有上午班offer就比較開心，可能始終上年想入呢間嘅N班，最終都wait唔到有位，而家終於收左，算係完左個心願啦！不過隨住Ambrose番新一代咁適應同開心，又學到野，反而呢一刻有青聖嘅offer又未至於好雀躍，同埋未係覺得好吸引要轉校咁！收到青聖offer時，兆聖未有結果，好彩青聖交留位費期限係11月24日至11月30日，兆聖今日可以上網睇結果，所以都重可以睇埋兆聖有無offer先至交留位，唔係又要雙重破財喇！

 

兆聖今日六點後可上網睇結果，不過媽咪同爹爹都撳左一輪唔見有update，到等到轉左字眼有收生結果時，再撳入去又話找不到，再上baby kingdom見已有媽咪打左去學校話睇唔到，學校即時fix個問題，又要等，終於都唔知六點幾多可以撳到入去睇，結果兆聖上下午都無offer。雖然係有少少失望，但媽咪竟然有鬆一口氣嘅感覺！兆聖之前聽好多唔同人講要識人至入到去讀，而呢間收生其實只係抽籤，同面試表現無太大關係，爹爹媽咪唔識人攞學位，而Ambrose面試時有喊但都keep到有問有答，算係唔太差，當然又唔係smart，媽咪都唔抱太大希望。但邊有咁多人識哂入面嘅校長老師攞哂d學位架，點都有d真係唔識人入到架麻，收生只係大抽獎，有時都會諗會唔會咁好彩！哈哈！呢間係區內好熱門嘅學校，超多人報，重三文兩語，校舍環境好，其實媽咪覺得有學卷幼稚園黎講，呢間算係好好，如果要轉有學卷幼稚園，呢間係首選！不過新一代係全英文幼稚園，學卷學校完全做唔到咁嘅語境，校舍又大又好，有時都諗如果抽中左兆聖，咁熱門又係學卷幼稚園，唔要又好浪費，但要放棄新一代又唔太捨得！所以知道抽唔到時，其實媽咪除左有一下子失望之後，心情反而輕鬆左好多！

 

而家青聖有offer而兆聖無，當然就好易決定要交埋青聖嘅留位費啦！