二十一個月嘅Ambrose，仍然唔係識講好多野，來來去去都係爹爹、媽媽、嫲嫲、爺爺、波波、車車、水水，奶奶、咀咀、餅餅、包包、duck、car、腳腳、畫畫等等，字數真係唔多，重要全部都係叠字，媽咪決心等到兩歲要同Ambrose去做評估。今日放工返到屋企，媽咪第一次聽到Ambrose講“巴士”，好驚訝！Ambrose終於發到兩個唔同音嘅字喇，媽咪即時教埋Ambrose“的士”，Ambrose即刻學識，真係好神奇呀！好多人話小朋友聽得明就唔怕佢唔識講野，到佢一識講就會連珠爆發咁係咁講，唔知Ambrose係咪好似呢d小朋友咁，遲講但一講就識好多呢？希望係啦！
2011年6月28日 星期二
分顏色派筷子 – 下集
自從發現Ambrose識分筷子顏色分派俾大家之後，而家開飯都會叫Ambrose派筷子！不過Ambrose一聽到開飯第一件事係衝入廚房，佢唔係攞筷子派喎，而係攞自己隻碗出去，真係笑死人！佢攞左自己隻碗至去派筷子，哈哈！唔好以為佢識分顏色去派俾唔同嘅人好醒，因為佢真係只係識派俾人，而唔係放响果個人坐果個位度，就好似爺爺好左洗手間，Ambrose就攞住對筷子走去洗手間度拍門，嫲嫲响廚房煮緊餸，Ambrose又係攞住對筷子走去廚房俾嫲嫲，真係唔知好嬲定好笑，哈哈！
2011年6月28日
尋晚半夜爹爹醒左摸吓Ambrose，發覺Ambrose原來發燒呀！半夜四點半，媽咪起身攞藥俾爹爹餵藥，Ambrose瞓瞓吓俾爹爹抱起自然就有d脾氣，佢係咁喊，真係好可憐，重要食藥飲水，媽咪都覺得好陰公，不過發燒一定要食藥，一刻都唔等得，無辦法啦！食完藥，Ambrose好快又瞓番，應該係Ambrose都無點醒過，因為佢一直都合埋眼，只係喊囉！平靜左之後爹爹又話要貼退熱貼，媽咪都話唔好架喇，Ambrose啱啱先收聲，係都等佢再瞓林d先貼啦，凍架麻！爹爹又唔聽，一貼Ambrose又喊過，又扭又搣，最尾張貼熱貼都甩埋，浪費哂啦！
媽咪今朝起身真係打眼唔開呀，完全唔願郁，超辛苦！摸吓Ambrose又無咩野，同佢探熱已經無燒，媽咪都放心返工！
放工返屋企，大家都七嘴八舌講話點解Ambrose無啦啦發燒流鼻水，又話可能係星期日無太陽走去游水凍親。媽咪心諗梗係唔係啦，一定係表姐傳染Ambrose囉，兩個表姐啱啱至病完，正確黎講係未病好哂，未病好又成日一齊玩，又攬頭攬頸又鍚面又鍚咀，成日都哄到咁埋，都算喇！重要係果日游水，Ambrose彈到一面水，嫲嫲成日又話唔好“頁”住塊面同眼，咁游水就係咁架啦，邊個面同眼唔濕架，又話要抺水，媽咪無啦啦點會有毛巾抺面架！姑姐同兩個表姐抺完面果條毛巾，一個唔該走去同Ambrose抺面，叫佢停都趕唔切！都唔知話佢定唔該佢好，真係激到媽咪彈起！係人都知毛巾係唔可以共用架啦！何況條毛巾已經係兩個表姐共用左，再抺落Ambrose度，一個表姐d菌，Ambrose可能都頂得順，兩個加埋，重要係直接抺落佢口面度，幾好抵抗力都無用啦！媽咪果刻已經好唔滿意囉，游水就游水啦，抺咩面喎！真係唔病尤至可，一病媽咪已經即時諗係條毛巾囉！咩凍親咩潺仔都唔係囉！聽到媽咪都嬲嬲地呀！
2011年6月26日 星期日
2011年6月26日
今日返完哂幼兒樂園同幼潛後，我地又係即走返左屋企。估唔到連續返左兩個幾鐘嘅Ambrose真係好攰，上左車，食左幾塊餅餅同飲左啖水之後，好快就瞓左，媽咪開始諗Ambrose第日返學要幾個鐘，唔知佢頂唔頂到？！
返到屋企又例必醒左唔瞓，果然，一抱落車已經醒，返到屋企見到表姐就更加唔瞓。食完野，抖一陣，等埋姑姐同二表姐過黎，執好哂游水物品，三點九就一班人落左樓下游水喇！
今日其實全日都無太陽，講真，真係麻麻地啱游水，唔係因為之前應承過Ambrose去游水，表姐們又黎哂，浩浩蕩蕩咁，媽咪都想唔去！果然，一落水真係凍到震，小朋友反而顧住玩唔覺，大人睇住傍住小朋友唔多郁，真係超凍！
玩左一陣，二表姐上水去vivi，返黎之後就係咁話凍，個身又震，但佢震住都話要落水玩，好攪笑！不過為左健康著想，姑姐都係抱番二表姐上樓唔游喇，淨番大表姐同Ambrose。不過最後都係媽咪凍到打冷震，結果全程都係玩左一個鐘頭就走左喇！
小插曲係二表姐响岸想落bb池時踩落水打橫瞓左落去，成個人浸左落水，果一刻姑姐其實係同緊我地一家三口影合照，結果當然係影唔成啦！另一小插曲係媽咪上左岸打點物件同著番衫時，見到Ambrose响bb池中一個轉身企唔穩成個人打橫瞓落水，佢瞓落水果吓都有掙扎想起身，同埋見到佢面容係真係嚇一嚇咁，爹爹媽咪即時去撈番Ambrose上黎，佢一上水就喊，真係好可憐又可笑！
游完水上樓，真係好餓，雖然其實都唔係真係游，似浸水多一d，但都好餓，結果奶奶烚左成打蛋俾大家食，最攪笑嘅係我地唔係開台坐椅食，而係好似去picnic咁响地下舖住張膠台布坐响上面食，真係好有風味，哈哈！
幼潛三期 － 第十堂
今日係幼潛最後一堂，經過上兩期嘅經驗，媽咪知道係一去到就頒證書同影相先，之後先會做評估交換禮物，所以雖然今日Ambrose之前有堂幼兒樂園要上，媽咪都係上上吓堂急急腳要走人，趕住過番幼潛呢度畢業，唔好miss左頒證書呢個重要環節！
好準時過到去，點知，今次姨姨竟然唔係頒證書同影相先，今日竟然係做左評估先！唔知係咪因為知道我地有學生呢堂又撞左幼兒樂園，所以咁樣調動左俾我地唔好錯過畢業禮時間呢？不過如果係嘅話，安排真係差左少少，因為媽咪都唔知調左，依然响果邊早走過黎，真係好失望！因為黎到又未做得評估，大家都係free play吓，送吓禮物仔，早知係咁，媽咪响果邊跳埋舞先啦！
唔知點解Ambrose而家上親playgroup好多時都要痴實媽咪，又要坐媽咪大脾，又挨住哂，媽咪要佢行出去攞野玩佢都唔願咁，一係要媽咪拖住一齊出去，媽咪真係投降喇！同班一個同學仔就啱啱相反，唔會痴住爹爹媽咪，只係不斷周圍行周圍玩，唔會搵爹爹媽咪，媽咪聽見佢地嘅對話，話個仔真係唔搵佢地，佢地走左去個仔都唔知，媽咪就忍唔住出聲話Ambrose同佢相反，痴到實一實，去廁所都去唔到，同學仔爹爹就話佢寧願個仔痴佢好過搵都唔搵，哈哈，如果大家撈番勻就好喇，又唔好唔痴，但又唔使吓吓都要痴到實！
Free play左一輪，又交換左禮物，都重未到Ambrose做評估！今日Ambrose就豐收啦，好多禮物呀，淨係泡泡槍都有兩枝呀！其他家長買小禮物都幾落本，一盒日本餅仔都十幾廿蚊，人人一盒，泡泡槍都差唔多要咁嘅價錢，又有架飛機仔，好靚又啱玩！反觀媽咪真係又懶又無記性，唔係唔記得左去買禮物就係無時間去買，咁樣攪一攪已經一個星期，最後媽咪都係攞左平時Ambrose食開果隻有機提子乾，個別一盒盒咁派俾小朋友就算，真係慳家，哈哈！見有d家長準備嘅禮物有d有包裝，媽咪都有少少後悔，早知都係同Ambrose一齊包禮物啦，又可以親子做吓手工，禮物細細有包裝都好似望落有d心思麻，而且小朋友拆禮物應該都好開心架麻！
好喇，等左好耐終於都做評估，點知原來同之前果期唔同，反而又係同第一期一樣，坐埋去，助手姐姐負責引小朋友玩而唔係測試小朋友識唔識，而姨姨就同家長講一下佢觀察到小朋友嘅野！有好有唔好啦，好咪係有時Ambrose唔係叫就做，有時識做都未必俾你睇到，如果測試唔做又好似無意思咁；唔好咪就係好似有少少求其囉！姨姨首先話Ambrose專注力非常好，其實都唔係第一次有老師咁講，而且亦唔係最近先咁講，真係由細到大唔同playgroups唔同老師都咁講，媽咪亦都開始相信Ambrose專注力真係好唔錯！不過就唔明點解响屋企時又唔係好似出到去時咁好囉！除左dwe書有時可以睇哂一本六十幾頁之外，其他書都係攞一本又未睇完又攞另一本，真係唔明點解！另一方面去睇，佢又可以玩畫畫好耐都唔走，做手工又會坐定定做哂去，所以可能佢嘅專注力都要睇佢玩d咩喇！
另外，姨姨都有提到Ambrose小肌肉幾好，頭二三指運用得唔錯，手指收得幾好，只係手指力度未係好夠力，呢個就有待訓練，唔係問題！媽咪真係估唔到，一直覺得Ambrose小肌肉唔好，反而姨姨話好！姨姨再講大肌肉時，反而就話可能之前Ambrose無做到所以令到姨姨睇唔到佢大肌肉嘅問題，所以姨姨感覺上Ambrose嘅大肌肉係有待訓練改進咁！媽咪响呢方面就有保留，因為之前果期嘅幼潛，Ambrose一直都表現好好，重好enjoy玩大肌肉遊戲，而最後個written report返黎，Ambrose响絕大部份項目都攞左表現突出嘅成績，媽咪相信呢一期幼潛係有d野令Ambrose改變左，媽咪真係唔知點解，亦無頭緒，但媽咪相信Ambrose嘅大肌其實唔錯，只係唔願意响人前表現出黎定其他因素影響啫！
姨姨最concern反而原來係social skills，以姨姨口吻，佢係以令人擔心去評Ambrose，媽咪真係有少少驚訝！媽咪一直都覺得Ambrose响social skills方面的確係差少少，佢唔會好似其他小朋友咁行黎行去爭吓野玩又或者一齊玩，硬係自己攞完件玩具之後就返黎媽咪度玩，好似唔多理其他人咁，但媽咪又覺得呢個年紀嘅小朋友都係咁上下，起碼佢都肯行出去攞！不過Ambrose就真係會俾人搶野玩時個樣都會幾不知所措咁，好多時候都係望吓望吓又唔敢出聲扁哂咀，極端嘅時候就會喊，無論佢係搶得番定俾人搶左都喊，呢方面媽咪都有留意到，係弱d，不過講到令人擔心又真係好似好大件事咁！唔知姨姨係咪因為見Ambrose頭幾堂都想喊想走又唔玩大肌肉遊戲，同埋之後有d係爹爹陪佢上堂玩果d拉拉手搭膊頭遊戲都唔多願，所以覺得Ambrose嘅social skills令人擔心呢？！其實媽咪已經盡量同Ambrose上多d playgroup，等佢見多d同多d其他小朋友玩，另外都有抽時間去其他小朋友屋企玩吓又邀請小朋友黎屋企玩，重有表姐個個星期都過黎overnight陪Ambrose玩，如果咁樣都訓練唔到social skills，媽咪真係諗唔到重可以做d咩，真係好頭痛，希望Ambrose返左學之後多好多機會同小朋友接觸會有所改善啦！
最後，姨姨都有唔同建議俾媽咪，好似俾唔同質感嘅野俾Ambrose掂，媽咪都好盡力同佢試架喇，係姨姨highly recommend嘅沙灘，媽咪真係難d同佢去，因為真係要等爹爹一齊先去到，一來好多野要攞去媽咪一個人真係有d困難，二來係安全問題，沙灘咁多人又有海水，真係要睇到實一實！不過媽咪都要趁住今個夏天，努力安排多d時間去沙灘至得喇！
做好哂評估，又係時候頒證書，今次Ambrose大個仔喇，叫到Ambrose個名出去攞證書時，媽咪都無再同佢一齊出去影相，就等佢同姨姨合照，爹爹就攝錄成個過程留為紀念！影埋大合照大家就分道揚鑣喇，無之前果期咁有d依依不捨嘅感覺，亦都無交換聯絡方法，呢一班就係咁無緣份！
幼兒樂園第一堂
早幾日先收到通知Ambrose有位可返幼兒樂園喇，不過因為要就啱年齡上堂，姨姨編排左星期日上午十點上堂，對於住屯門嘅我地黎講真係好早。不過媽咪對呢個機構嘅playgroup一直都幾滿意，所以之前先會連報幾期幼潛，而家幼潛超齡，要上幼兒樂園，重要咁早，媽咪都一於照上。幼兒樂園其實溶合左幼潛同埋學前適應，係會似返學多一d，Ambrose九月都開學喇，所以媽咪咁早都同Ambrose上呢個playgroup，係希望Ambrose會响同一機構所攪嘅playgroup有熟悉感，易於適應，知道返學係點，對於佢九月開學會有多d幫助！而且據聞幼兒樂園會比幼潛多做手工，課程完結時又會派番個profolio俾家長，家長見證小朋友嘅成長，聽落都唔錯，所以媽咪好想Ambrose有得上囉！
今日第一堂，其實又撞正幼潛最後一堂要做評估同畢業禮，所以Ambrose唔可以上哂呢堂，一定要早走過番對面上幼潛！姨姨之前叫媽咪預備毛巾仔同膠盒响茶點時間用，同埋兩張相做名牌同貼在膠盒上俾小朋友認番自己毛巾盒。姨姨首先教媽咪入課室嘅流程，課室右手邊會有個掛袋，小朋友返到黎自己攞番自己名牌掛在身上，再放手冊落第一個大籃度，再放毛巾盒入第二個籃仔度，之後就可以自己搵椅子坐，攞玩具玩！姨姨話小朋友每次只可攞一份玩具埋位玩，係要連埋個籃嘅，玩完想換玩具，要將玩具放入籃度放返原位先可攞第二份玩具。媽咪覺得都唔錯，因為Ambrose平時就唔係攞完一樣收一樣至攞第二樣，佢係攞完唔執又再攞第二樣，攪到一地都係玩具。不過可能家中嘅擺設唔同，唔會好似呢度咁放得咁整齊，一格一份玩具，又無台仔俾佢攞完埋台仔玩，所以佢玩到亂哂。媽咪之前已經發覺dwe送嘅書台係for睇書，台面係斜落，如果要做其他野，好似做手工、砌積木、貼貼子等等，斜台真係好唔方便，媽咪好想買張台仔俾Ambrose，等佢坐得好d，順便等佢習慣第時返學係坐台邊坐椅子，再唔係bb咁坐在mat或者坐媽咪大脾玩，不過爹爹又覺得無需要，媽咪唔買得，今日上堂又見到在台玩玩具，真係又整齊又坐得直，媽咪真係要努力爭取買張台仔俾Ambrose至得喇！
Free Play左一輪姨姨就話正式上堂，已有幾張椅子放左响出面，小朋友自己搵個位坐低，家長可以自行攞椅子坐在小朋友後面，呢個安排唔錯，因為第日返學，Ambrose都要自己坐，唔再係痴實媽咪，媽咪坐响後面睇佢，佢又可以慢慢適應，唔會話無哂安全感！首先姨姨點名，之後就指住月曆講今日係二零一一年六月二十六日星期日，俾小朋友知道日期概念。之後姨姨攞左本有關帽子嘅故事書，講故事，另外姨姨重有一頂真實嘅帽，姨姨一路講，一路用頂真帽演繹，到最後，姨姨逐個小朋友請出黎去戴吓呢頂帽，Ambrose試戴果陣重笑添，哈哈！
之 後 老師有張工作紙，入面有好幾頂帽、衫同襪，姨姨要小朋友用crayon圈出工作紙上嘅帽出黎。媽咪覺得都幾難，要Ambrose選對帽子唔係問題，而係要佢準確地圈出帽子，真係好難，佢平時連圓形都未畫得靚啦，何況而家要圈指定嘅野？！姨姨講完並唔係由得家長同小朋友圈架，而係自己示範一次，再邀請小朋友一齊示範一次，咁樣小朋友就容易明白要做d咩！做完示範，姨姨話要送每個小朋友一頂帽，姨姨有d膠粒貼子可以俾小朋友自己裝飾自己頂帽，而貼子果塊底紙，當然係由小朋友自己搣啦！工作紙同帽派左俾小朋友之後，小朋友要交俾家長，然後姨姨要小朋友按自己張椅子嘅顏色收番好叠起，Ambrose張椅子係巴斯光年青色，佢毫不猶豫行左埋去青色椅子度叠起左，good job！！！
行返埋台，媽咪同Ambrose開始做工作紙，媽咪問邊度有帽，Ambrose可以用手正確指哂d帽出黎，不過講到用crayon圈，真係唔得囉！媽咪唯有捉住Ambrose隻手一齊圈，俾佢感受自己做緊咩，不過當媽咪圈左一個之後，Ambrose似乎有所領悟知道圈係咩一回事，佢想掙脫媽咪手自己黎，不過佢並唔係圈帽子，而係想圈隔離果對襪囉，媽咪唯有又捉住佢隻手去圈其他帽子喇！其實媽咪都唔係太贊成捉住Ambrose手去做野，第一二次就可以咁做去示範同俾佢感受點做，但媽咪覺得之後都要放手俾佢自己黎，唔錯唔學到野，不過今日特別一d，要快d做完趕下一場嘅幼潛畢業禮，媽咪都係捉住Ambrose先，等佢快趣攪掂就走先！至於頂帽，唔知點解其他兩個小朋友分別係一男一女，派嘅係橙色同黃色，Ambrose果頂係粉紅色囉！媽咪雖然唔抗拒男仔著粉紅色衫，不過其他配件媽咪就唔多想喇！Ambrose對於搣貼子裝飾物件已經架輕就熟，不過今次嘅膠粒貼子好厚，張底紙真係好難搣，媽咪都要出手幫一幫手至得。可能今日係第一堂，Ambrose對於周圍環境都好好奇，佢一路裝飾一路周圍望，好唔專心，同平時响屋企做手工真係差得遠，無辦法啦，新地方、新課程，唯有希望過多兩堂佢習慣左會專心返啦！
裝飾完頂帽，媽咪同助手姐姐講要走先，姐姐話之後時間係聽歌仔跳舞時間，再之後係茶點時間，不過媽咪真係驚miss左畢業影大合照時間，所以都唔敢再留，一定要走喇！同班都有個同學仔幼潛同Ambrose一班，見我地走佢都一齊走！關左門等緊lift時就聽到課室有歌仔播緊，Ambrose又好緊張咁望住度門，好似好想入番去玩咁，媽咪唯有話下次啦，下次我地一定會上足全程架喇！
2011年6月25日 星期六
2011年6月25日
今日Ambrose好勁呀，朝早又係八點醒左想叫媽咪起身出去玩，但係媽咪無理佢又瞓番，再醒嘅時候已經係十一點幾，Ambrose今日最终係十二點先起身呀，破哂紀錄！
起身食左粥，媽咪陪Ambrose玩左一陣，爹爹就起身喇，爹爹今日真係瞓得少，如果媽咪今日同Ambrose出左去玩唔嘈住爹爹，爹爹應該都可以瞓到四點，不過無法丫，其他姨姨屋企又唔去得，正午時份又唔想落遊樂場玩，唯有靜靜地在家玩囉！
爹爹起左身梳洗後陪媽咪Ambrose行陣市中心，不過媽咪又係突然無故好肚餓，一定要食野，所以爹爹剛啱在家食左外賣下午茶餐都要坐低同媽咪食野，哈哈！食完野，又差唔多時間上shining garden playgroup喇！
唔知點解媽咪開始無咩心機陪Ambrose上呢個playgroup，可能因為除左每堂主題唔同學生字唔同之外，上堂內容同形式係千篇一律，話哂媽咪陪Ambrose上左成二十堂，媽咪真係覺得好悶呀！所以就連今堂學左咩生字，媽咪都唔係好記得，大致都係整pizza，生字係cheese ./ ham 咁上下，要睇番張工作紙至記得囉！所以媽咪已經決定返埋呢一期shining garden就唔再同Ambrose報呢度喇，等返埋nursery之後再搵吓有咩興趣班上好過！
今晚爹爹返夜，所以佢送左我地去上playgroup，睇左一陣之後就走左喇！今晚又係得番媽咪同Ambrose一齊，不過爹爹安排左表姐過黎陪Ambrose玩，Ambrose不知幾開心，兩個人成日都攬頭攬頸又錫錫，有時真係唔明點解佢地咁投契，Ambrose細細個已經係見到表姐就好開心會大笑果隻，反而同二表姐同年唔同月，年齡咁近，大家都無咩交流！
見表姐响度，佢又問媽咪想玩手印，媽咪諗Ambrose次次都係自己畫畫，不如今次表姐同佢一齊玩，唔知會唔會有咩新主意呢？！就係咁，媽咪決定開壇，舖地攞畫紙倒顏色，兩個小朋友都不知幾興奮。今次媽咪放棄唔用色碟，用左幾個細杯仔載住d顏色，等Ambrose唔會咁易將d顏色溝埋一齊。不過媽媽實在失策，未有預備足夠咁多色嘅畫筆，只係就咁將顏色一杯杯放左出黎，Ambrose二話不說已經一手撩吓呢杯，再攪吓另一杯，d顏色好快又溝埋喇！表姐見到都怪叫！兩個人畫畫，每人一張大畫紙，各有各畫，無交流，媽咪以為佢地會攪吓對方幅畫搗亂，點知又無！Ambrose坐响地下畫畫同企／坐响台邊畫有d唔同，坐左响地佢又好少大動作好少郁，所以佢成日畫都係畫同一個位，其實媽咪係希望佢扒個身去畫，咁樣可以練到上肢嘅力，奈何Ambrose只係得個坐字，媽咪要不時轉動張畫紙，等佢唔好油死一邊咁浪費麻！玩左一陣之後，表姐已經投訴顏色俾Ambrose撈埋哂，媽咪見顏色又用得七七八八要加添，所以索性又攞埋個色碟出黎俾表姐用，再倒左一杯水出黎教表姐洗筆！表姐好似Ambrose之前咁，手上衫上有少少污糟都嘈嘈斃，不過玩得耐，見Ambrose雙手已經污糟哂，又見Ambrose畫花對手想打手印，表姐都忍唔住摺高衫袖油到一手都係，小朋友都係打手印腳印最開心，哈哈！表姐重激到油埋下手臂打埋手印，佢重不斷話好好玩好開心！不過Ambrose今次好唔乖，佢竟然油油吓就去油地下，媽咪已經阻止佢，但佢都唔係好聽到咁繼續油，真係激死人呀！好彩d顏色真係好易抺走，唔係媽咪一定會咆哮呀！畫完畫，表姐去沖涼，媽咪就同Ambrose洗番乾淨對手，真係好污糟，就連手指甲邊都填滿哂顏色，洗到表姐都沖完涼出黎，啱啱好輪到Ambrose沖涼，表姐就幫媽咪手洗番乾淨d畫具！大功告成之後，又係覺覺豬嘅時間喇！
2011年6月21日 星期二
2011年6月20日 星期一
Disney’s Hollywood Hotel Dinner Buffet
今朝一早，爹爹打俾媽咪話姑仔約我地一家去Disney’s Hollywood Hotel食dinner buffet，一向都唔太喜歡食野要食咁耐嘅爹爹媽咪真係麻麻地想去，重要媽咪要收工自己由灣仔出發入酒店，對於地理白痴同坐慣車嘅媽咪黎講真係好麻煩，不過姑仔約過爹爹媽咪好幾次都推左，之前姑仔已經湊過Ambrose去Disney Hotel食buffet，反而爹爹媽咪一次都無去過，媽咪見昨天係Ambrose二十二個月嘅生日無慶祝到，今次都唔好再推姑仔一家喇，就當係慶祝Ambrose二十二個月生日，等佢同表姐們一齊玩，同爹爹媽咪一齊食buffet開心吓啦！
就係咁，媽咪無啦啦星期一收工就入廸士尼食buffet，真係好奇特！媽咪之前在公司check左由灣仔去hollywood點去，原來响灣仔搭E11去到青嶼幹線收費站再轉R8入到disneyland，可步行或坐酒店shuttle bus入酒店。媽咪覺得都尚算簡單，重諗咁樣可能都好早就入到去添！點知上左巴士媽咪收到留言，原來之前幫Ambrose報嘅幼兒樂園有消息，係姨姨打俾媽咪傾詳情，但姨姨講野實在太快，巴士又嘈，媽咪完全聽唔到姨姨講嘅電話號碼。因為學位好緊張，媽咪擔心唔快d覆電話會無左個位，所以媽咪不斷聽留言嘗試聽真d個電話號碼，再不斷試打唔同號碼，點知都係失敗！再打去俾Ellen姨姨叫佢幫手check中心電話，打左都係failed call，真係激死人！媽咪又唔甘心再聽番留言睇吓會唔會聽到多少少，點知都係唔多，忟到媽咪死死吓！最後媽咪唯有放棄，好忐忑咁諗第二朝一早打番去應該唔會無左個位掛！呢個時候媽咪抬頭望吓四周，發覺唔多妥，點解好似唔係好山卡拉嘅？點解會有樓嘅？媽咪白痴到諗原來青嶼幹線轉車站都幾入架喎！點知無啦啦廣播話下個站係東涌消防局，唔係呀麻，東涌？？？入左東涌，咁青嶼幹線响邊呀？媽咪忍唔住問司機係咪過哂站，司機話入左東涌喇喎！媽咪真係啞左！之後媽咪已經即問架車去邊，司機話去機場博覽館，媽咪都唔知响邊，只係知好遠咁，媽咪再問最近嘅地鐡站响邊，司機話呢個站落車行入去就係架喇，媽咪就即時仆落車喇！
唉，原本以為响轉車站轉車真係perfect，唔使點行，點知一時唔為意要撳制落車就入左黎東涌，媽咪都唔知點去disney喇！重要行餐死行入去地鐡站！行到去又傻更更咁睇點去，去到月台等左一陣就有車上，重以為都好快啫，點知架車停左响度係咁上客唔開，媽咪個心又急又嬲！最衰媽咪完全唔知東涌去disney又或者欣澳去disney有幾遠，唔係媽咪其實好想跳上的士去就算，唔好煩！東涌去欣澳，真係幾遠吓，定係媽咪心急呢？！去到又要轉車，oh my god！！！要行上樓梯過橋去對面落樓梯先到disney線月台，有無咁煩呀？重要係室外，媽咪等完又等都未有車，係咁有野咬到周身痕，媽咪真係超級後悔應承左去食buffet，又唔係去開disneyland玩，無啦啦收工入去食buffet真係得個攪字！餵蚊餵左成十幾分鐘先至有架disney列車黎到，搭左一陣就到disneyland。不過只係disneyland咋喎，未到酒店，媽咪已經忟到爆炸，如果有人同媽咪一齊，佢一定遭殃呀！
落左車，周身痕，再望吓果條迎樂路，要行到去盡頭好似好遠咁，媽咪又熱又痕，都係走去搭shuttle bus，遲都遲左咁多，唔差在啦！行到去車站，見有車上，真係萬幸，因為媽咪見到個牌寫住十至十五分鐘一班，超耐囉！上左車又係要等開車，點解度度都要等架，好煩！架車一開媽咪以為好快就到，因為上網話由disneyland行十分鐘過去就到酒店架麻，唔係媽咪係咁轉車又等車，都會選擇行過去，但係架車一路駛，媽咪就覺得好彩都係搭左車，間酒店都幾入吓囉！
七點四十五分至五十分左右去到酒店，見到Ambrose埋頭食野，原來佢地七點鍾已經入左黎食野，Ambrose由頭帶到尾，無停過！媽咪點解要咁趕住入黎，就係唔想Ambrose一味食，呢個仔係大人食完台上無野佢先肯收手唔食，大人一日未離台，一日重食緊野，佢都一日唔會收手，唔識叫停唔食！媽咪驚佢係咁食食濟呀！加上，媽咪始終唔放心，姑仔佢地會俾d咩Ambrose食，哈哈！
呢餐buffet其實真係無咩野食，可能爹爹同媽咪都唔食熱盤，冷盤只係好standard嘅salad bar，海鮮只有凍蝦，凍青口同凍蟹腳，真係無咩特別！Ambrose都真係好好笑，媽咪攞碟生果返黎，佢趁媽咪轉身同爹爹講野，一手伸長去攞媽咪碟入面嘅西瓜，好快手，好好笑！見Ambrose超眼瞓又要扭食，爹爹同媽咪都係快食，九點三已經埋單走人！好彩Ambrose下午已入左黎playroom同草地玩左幾個鐘，叫玩返夠本，當回本囉！唔係呢餐buffet真係超唔抵，雖然已經係特價左，不過真係令人好失望囉！
2011年6月19日 星期日
2011年6月19日
唔經唔覺Ambrose今日原來已經二十二個月喇！不過媽咪無預備咩慶祝活動俾佢，都係等兩歲一次過先啦！
今日上完幼潛又係返屋企抖吓。因為响新加坡時已經應承左Ambrose最尾果朝起身落酒店泳池游水，點知果朝無太陽又有風，爹爹驚落水凍就cancel左，攪到Ambrose果朝真係一起身走黎拍媽咪，係咁一路“shu”一路做游水動作，好期待我地同佢去游水咁！果日無去到，爹爹應承左Ambrose今日同佢去樓下泳池游水，所以上完幼潛真係要抖吓先得！不過Ambrose就唔係咁諗啦，佢返左屋企唔肯瞓，攪左一大餐到最後都係無瞓過落去游水，初初Ambrose都有少少吽，不過一見泳池門口又好high！
去到泳池Ambrose更加係笑唔停，成日尾尾咀笑，媽咪覺得佢一定好開心！Ambrose首先去bb池，不過當佢踩左入去發覺自己企到响度嘅時候佢就指住要去大人池，就係咁，我地又一齊去左大人池玩！估唔到Ambrose真係好鍾意游水，佢一去到大人池就已經識得游水姿勢，爹爹成日都驚水泡太大“線”左佢落水，不過玩左好耐Ambrose都係雙手扶住水泡，無話好想要“線”，我地又覺得好似ok喎！Ambrose玩多一陣就唔俾爹爹扶佢，想要自己游，爹爹唯有近距離跟住用手唔掂佢咁兜住以防萬一！今日游左一個鐘頭鬆d，都差唔多五點幾喇！响呢個屋苑住左咁耐都係第一次黎泳池游水，原本唔太鍾意呢度，不過黎過又覺得呢度都幾好，勝在夠近，一游完包條毛巾就上樓沖涼，超方便！
因為之前Ambrose無咩點食野，游完水上屋企就好扭計，大家都估佢眼瞓，點知俾咀佢又好似唔多得咁，最後話煮野食佢食，佢又ok，咁即係肚餓啦！嫲嫲煮左烏冬俾Ambrose，點知Ambrose一路食一路响張high chair釣魚，最後重瞓著左，之後爹爹想話抱Ambrose入房瞓，點知一郁佢就醒醒地，勁喊！原本諗住氹佢一陣會瞓番，點知佢一見入左房喊得好激動，放左上床都自己走番落床，跑跑跑出廳，要食埋d烏冬，Ambrose一定係又攰又餓呀，真係好可憐，但又好好笑喎！
食完野以為Ambrose會瞓覺，點知佢重精神過未游水之前，真係玩謝爹爹媽咪！玩左一大餐又到七點幾食飯，Ambrose又跟住我地一齊食！今次佢又係一路食一路釣魚，最後豬埋！爹爹今次等佢瞓林d先敢抱佢入房瞓！Ambrose真係攰得好緊要喇，爹爹抱佢入房都無醒過，睇黎呢一覺係會到明天喇！
今日媽咪開飯時見Ambrose想攞起筷子玩，本來想搶番唔俾玩，不過媽咪又忙住攞餸出黎，只係用把口叫佢唔好玩筷子，當然，叫又點可以叫停Ambrose丫！不過正因媽咪忙住唔得閒即時制止，出乎意料之外，媽咪行番出黎嘅時候先發現原來Ambrose係想派筷子，媽咪完全唔出聲無提Ambrose，見到Ambrose真係可以將同顏色筷子攞起成為一對再派去各人個位度，而各人筷子顏色係特定嘅，媽咪係粉紅色，爹爹係粉藍色，嫲嫲係青色，爺爺係深藍色，Ambrose竟然可以派啱哂，真係好叻呀！爹爹同爺爺重話佢地都唔知d顏色係點分（自己用咩色都唔知架）！Ambrose原來平時睇睇埋埋知道好多野架，如果唔係媽咪忙住無制止佢都唔知道佢記得各人用咩色筷子，睇黎媽咪真係唔應該成日唔俾佢做呢樣就果樣，可能佢其實係想做一d唔係大人心諗嘅頑皮野都未定，只係大人永遠都default左小朋友貪玩咩都唔俾做唔俾玩，可能最後就埋沒左某d野都唔知道！以後Ambrose食飯多左個新任務喇，就係派筷子，呵呵！
幼潛三期 － 第九堂
雖然尋晚先落機執野執到好攰，今朝一早媽咪都起到身，叫醒爹爹同Ambrose起身返學。
今堂一開始姨姨先講故事，又係之前一期講過嘅“我會上小馬桶”，詩詩姨姨所演繹嘅故事同之前張姨姨有少少唔同，不過都係帶出小朋友大個要自己上廁所喇！講完故事，姨姨又係有個公仔攞左出黎，再示範一次去小廁所嘅步驟，Ambrose全程坐定定聽住睇住，唔知佢明得幾多，唔知佢幾時先可以戒到片片呢？
之後姨姨每人派左一籃相片，家長根據相片問小朋友相中小朋友做梗d咩？當然，好多小朋友都未識講，姨姨要家長擺幾張相片出黎問小朋友邊張相係咩邊張相係咩要小朋友指番出黎，其實呢個媽咪唔覺得太難，Ambrose除左唔多識講野之外，佢係可以明白好多野，所以媽咪索性將所有相片擺出黎一次過問Ambrose，而Ambrose亦都可以指出啱果張相出黎。姨姨未到之前，媽咪同Ambrose已經玩完呢個遊戲好幾次，Ambrose通常對於佢已經識嘅野係無興趣玩太耐，所以佢玩左幾次之後就開始自己收拾番d相放入個籃度，咁啱詩詩姨姨就黎到睇佢，詩詩姨姨知道Ambrose識，只係唔講，所以姨姨都好堅持唔俾Ambrose只係指，姨姨一定要Ambrose講出黎，估唔到Ambrose都真係可以跟姨姨講到單字，好似飲水水就講水，食野就食，畫畫就畫，玩波波就自己識講波波等等。姨姨咁樣一迫令到媽咪覺得原來Ambrose真係要迫先講野，媽咪真係要堅持，就算佢係跟口水尾講都要佢跟一次講，希望佢跟多幾次自己就識講啦！姨姨話以前小朋友細嘅時候家長指住圖講番圖係咩，不過而家小朋友大左，係要反問佢地，而唔係直講俾佢地知係咩黎，一來咁樣比較亙動易上心d，二來亦都俾小朋友知道有問要有答！
最後，今堂竟然玩波子畫！Ambrose未開始講解時見到有好多杯唔同顏色放左出黎，已經蠢蠢欲動喇，媽咪要keep住同佢講要等待，證明Ambrose真係好鍾意畫畫（玩顏色？！）其實波子畫之前Ambrose已經响屋企玩過，媽咪响網上自學番黎同Ambrose玩，原本都只係諗住係比較動d嘅畫畫方法，可以大動作郁動手腳，對於小小朋友黎講都幾唔錯，亦都可以俾佢知道原來有顏色浸過嘅波子碌過張紙係有痕跡嘅，呢個係因果關係，媽咪只係諗到呢d幫助。今日上幼潛玩到波子畫，媽咪至知呢個遊戲係有好多方面嘅得著！除左媽咪諗嘅野之外，原來玩波子畫係可以訓練到追視，而追視對小朋友睇書係有好大關係，姨姨話追視好就唔會睇書睇睇吓呢一行無啦啦走左去下一行。姨姨唔講媽咪真係唔知原來追視唔好嘅小朋友真係可以睇到呢行又走去下行，原來小朋友唔係蠢唔係唔小心，只係追視差至會咁樣，多加訓練係有幫助。媽咪聽完姨姨講真係恍然大悟，有時d野唔係大人諗咁簡單，有d野大人覺得好似好理所當然嘅，其實小朋友係要不斷訓練同嘗試，唔係大大吓就會識咁簡單囉！波子畫嘅得著亦可以訓練到雙手協調，手眼協調與及上下左右嘅概念。姨姨示範時媽咪一邊同Ambrose講番之前點玩點玩，媽咪想勾番Ambrose嘅記憶，不過姨姨玩呢個波子畫其實同媽咪玩果個有少少分別。姨姨俾果個係一個好淺但大細啱啱好嘅盆，小朋友一碌好易將粒波子碌左出個盆度但操作尚算方便，而媽咪俾嘅係一個幾深幾大嘅兜，深就唔會易碌波子出黎，不過大就大左d，Ambrose操作起上黎就輪盡d囉！姨姨重有唔同顏色俾小朋友碌，之前媽咪就只有單色，媽咪又覺得姨姨嘅多色似乎又唔錯，可以吸引小朋友去碌！雖然Ambrose之前已經玩過一次，不過個盆太細喇，佢成日都將個盆棟高唔識兜番住粒波子，佢整跌左幾次波子，攪到媽咪不知幾忙！不過媽咪覺得Ambrose碌嘅波子畫都真係幾靚，呵呵，不過就要下堂乾左先有得攞！姨姨响空閒時靜靜行左過黎問媽咪，佢話聽見我地又玩過呢個波子畫，想睇吓我地响邊度學番黎，不過媽咪都係一句話自己玩唔係學架，姨姨就好似好欣賞媽咪咁，重不停讚媽咪好好，媽咪真係覺得好好笑，估唔到媽咪亂跟一餐嘅野俾老師讚好，重要原來咁有得著嘅，媽咪一定要多d同Ambrose玩至得喇！
2011年6月18日 星期六
2011年6月13日 星期一
2011年6月13日
真係千算萬算，已經唔同Ambrose返學，又無同病左嘅heihei玩，好小心諗住過渡埋呢幾日明天上飛機去旅行，點知尋日玩泡泡水就見Ambrose鼻下有少少鼻水咁，重以為佢玩泡泡水擺得太埋，為左安全計媽咪又俾埋保嬰丹Ambrose食，今朝一早，肯定Ambrose真係病左，佢d鼻水長流不息,體溫重要係發燒邊緣37.7，今日幼稚園個適應playgroup都係唔上得喇，一定要休息吓快ｄ好番！
今日全日Ambrose都係發燒邊緣，之前幫佢配左藥去旅行，所以都係食埋果d藥，但只得三日藥，又要再去配多三日以防萬一，唉，真係臨去旅行先黎病，即時令到爹爹媽咪好擔心！媽咪夜晚執行李時都要分開兩個行李箱放，Ambrose嘅一箱，爹爹媽咪一箱，以防Ambrose真係發起燒可能要迫不得已放低佢响香港唔使又再執過d野，媽咪一路執個心都幾翕架，原本同Ambrose去新加坡都係為左佢，如果最後都係得番爹爹媽咪去，真係無癮，至少，兩個人去旅行，俾媽咪選會去泰國囉！
希望明天Ambrose好番可以順利起行啦！
2011年6月12日 星期日
2011年6月12日
今日本身約左Ellen姨姨湊HeiHei過黎畫畫，不過十一點半Ellen姨姨打俾媽咪話HeiHei流鼻水，媽咪擔心Ambrose過兩日出發去旅行先黎病，雖然好難得夾啱Ellen姨姨時間過黎玩，媽咪都婉拒左，等Ambrose去完旅行點都得啦，但旅行前真係小心d好！就係咁，原本今日節目好好，變成無節目，重要得媽咪一個人湊成日，諗起都有d頭痛，成日流流長，要動吓腦筋點快過d至得！
不過Ambrose乖乖，同媽咪一瞓就瞓到十一點半，起得身梳洗落樓下食少少野，都已經係十二點幾一點嘅事。食完野，媽咪同Ambrose行十蚊店，睇吓有d咩得意野買，點知呢個Ambrose瞓到咁晏，佢竟然食完野好似好攰咁，行路都無咩精神咁！原本媽咪重諗住行埋十蚊店去Ellen姨姨屋企借條學行帶去新加坡綁實Ambrose唔好走失，點知媽咪問佢係咪好眼瞓時佢真係點頭話要返屋企瞓覺，真係估佢唔到呀！
媽咪同Ambrose返左屋企，玩多左一陣就瞓覺，今日d時間好似好快過，哈哈！Ambrose瞓醒後食埋野，媽咪就諗同佢玩咩好。本身諗住同唔到HeiHei畫畫，自己都可以留在家畫，不過媽咪望吓個鐘，要畫畫前後需時起碼個半鐘，加上次次畫完畫都要沖涼，但夜晚又要去婆婆度食飯，食飯又會攪到污糟哂，媽咪又唔想，所以時間唔許可都係唔畫喇！媽咪諗起之前買嘅豉油魚仔同食用色素，加上剛才又在十蚊店添購左一set魚蟹魷魚公仔加撈網仔，媽咪一於同Ambrose玩撈魚仔蟹仔啦！
媽咪首先加d熟水落個小兜度，加左 一兩 滴食用色素，盤水就即時變得碧波蕩漾，咁樣做係因為媽咪希望Ambrose可以睇清楚水嘅流動，一擠一放d水會入同出，呢個係因果關係，但因為Ambrose成日都會放野入口，媽咪都係整d可以食得嘅水俾佢至安全。媽咪一攞d魚仔出黎，Ambrose已經笑哂，好期待好想攞上手，媽咪教Ambrose放條魚仔入水中擠擠擠，咁就可以餵飽魚仔，不過Ambrose就只係咁揸住條魚係咁游，笑騎騎咁，都唔係好餵到魚，媽咪唯有出手幫佢完成左十幾條魚仔。之後媽咪响廁所企缸放左一盤水，擺左之前十蚊店嘅魚仔蟹仔，再加埋呢十幾條綠色魚仔，媽咪示範左一次撈魚，Ambrose好叻跟住玩，撈完上黎又倒番落水再撈過，好enjoy！媽咪見Ambrose一路玩都係蹲响度無郁過，腳趾抓實地下抓到屈住哂，媽咪又唔夠力將盤水搬出廳玩，媽咪唔想佢蹲太耐，驚佢玩得攰同投入果時一個唔覺意中左個頭落水。加上廁所又迫，媽咪陪佢玩到攰哂，所以媽咪唯有叫停Ambrose唔好玩喇，點知佢都唔聽人講野，埋頭埋腦係咁撈。媽咪無辦法，唯有鬆開個塞，托高少少個盤等d水流走，就係因為咁，Ambrose蹲得太低，佢又係著body，佢件body底濕左，媽咪又要同佢換衫，真係攰死人呀！
玩完換好衫，約左Ellen姨姨响樓下等，攞埋條帶再一齊行過去婆婆度。去到婆婆度見到表哥，好似好生保咁，媽咪叫左佢兩個出走廊玩吹泡泡，其實兩個人都要做吹果個，都係各有各玩，玩左一輪，都係時候食飯喇！婆婆呢度真係方便，想玩泡泡一開門就玩到，唔使行落樓去d少人地方或公園玩，媽咪次次去都一定記住帶泡泡水，玩住等開飯，哈哈！
幼潛三期 – 第八堂
今日爹爹要返工，媽咪要返學就要獨自同Ambrose搭西鐡喇！不過因為早兩日落雨，天氣唔好，爹爹叫媽咪唔好上堂，留家休息，媽咪其實唔想唔返學，始終幼潛嘅得著多一d，而且幼潛無請假呢回事，唔返就即係白俾錢，媽咪梗係唔多願啦！不過媽咪都要向現實低頭，一個人湊Ambrose出去咁遠，媽咪都未試過，已經係一個挑戰，重要落埋雨，媽咪真係驚攪唔掂，最後媽咪都係同意爹爹唔返學，免得淋病左又麻煩！一旦決定左之後，媽咪就放心瞓覺喇！點知瞓到成十一點幾先起身，發覺天氣不知幾好，真係飲恨呀！
2011年6月11日 星期六
2011年6月11日
今日一早去接婆婆覆診，今日早左去到診所，一樣好多人，不過好彩唔使等好耐，頭尾都係個幾鐘就走得，算快！未見醫生前姑娘同婆婆驗眼，媽咪見過未做手術前婆婆驗眼嘅情景，真係嚇媽咪一跳，媽咪估唔到婆婆竟然近在兩三尺內有多幾多手指豎出黎都睇唔到，唔好講話十尺外果個大E字腳向邊！今次驗眼，雖然婆婆都係睇唔到大E大Z定大K，不過媽咪感覺到婆婆係可以睇多少少近距離豎起左幾多隻手指，其實尺數有兩三尺，係唔多，不過比起之前，半尺都叫多左，都係好事架喇！見埋醫生，一切順利，醫生轉埋隻眼藥水俾婆婆，走得！
Ambrose今日無人湊，所以爹爹要湊住佢等我地。爹爹同Ambrose去左新世紀等我地，玩左遊樂場，媽咪同婆婆去左Pokka度食野，又貴又唔係特別好食，至激氣係service唔係幾好，唔係婆婆嫌三嫌四，媽咪一定求其搵間野入去食就算，唔會入呢間囉！
送埋婆婆返屋企，爹爹要媽咪打去cancel今日堂playgroup，一來大家都真係好攰唔想又頻撲出去上堂，二來過幾日之後就去旅行，爹爹話唔想Ambrose頻撲上堂易病喎！所以今日過左一個悠閒嘅星期六呀！
2011年6月6日 星期一
2011年6月5日 星期日
童愛藝術
上完幼潛過左海港城食野兼行吓，本來媽咪想話行吓反斗城同book buddies，點知爹爹一句話又行反斗城就取消左，連帶隔離嘅book buddies都不宜久留，媽咪唯有行去睇吓Itsmagical有咩得意野！媽咪之前見有個jumbo stamp pad，可以俾Ambrose成隻手放上去再印手印，好方便，媽咪好想買，因為自己用顏色開出黎嘅話，d顏色又唔均勻，而且要倒好多顏料出黎先可以做到手印，又會攪到好混亂，有左呢個jumbo stamp pad，印手印真係話咁易啦！不過媽咪見一個都成$69，而且又得兩隻唔靚嘅色，媽咪真係唔捨得買。見美國有唔少art and craft accessories幾平，研究左一輪响美國訂番黎之後，又覺得運費頗貴，又有d唔做international order，其實都幾煩，最後媽咪都諗住响Itsmagical買住一個睇吓Ambrose鍾唔鐘意先，見今日多左隻橙色，雖然望落都唔係好靚咁，不過都總好過深藍色同好似深藍色嘅深紫色啦！所以今日嘅收獲係一個橙色jumbo stamp pad！
買完野，媽咪行過去mothercare睇野，爹爹就推左Ambrose想搵個位坐吓等媽咪，點知行行吓媽咪收到爹爹電話，佢話佢去左一個叫童愛藝術嘅攤位坐低左！媽咪行左過去睇，原來係unicef籌款，只要捐$50就可响其中四個counter玩art and craft，加多$50就可畫埋油畫。開頭爹爹捐左$50，我地諗住都只係玩果四個counter都好夠喇！
媽咪見到有其中一個counter係crayola嘅，而玩嘅係fingerpaint，因為媽咪呢排都有諗過買佢隻fingerpaint，但媽咪又一直用開佢嘅kids paint，所以好想睇吓質感有咩唔同，所以媽咪第一時間衝左埋去喇！不過負責人好似對我地咁細嘅bb無咩興趣咁，我地自己攞起手工衣著（同屋企果件一模一樣，Ambrose二話不說都識伸手去著喇），之後坐左响度等。眼見個工作人員擠左d顏料响塊膠片上，但原來唔係俾我地，佢係俾我地之後嘅小女孩，重好有心機响佢張畫紙度畫手指畫，完全無理我地，亦都唔似想理我地。媽咪見到咁，就問隔離個姐姐係咪可以玩架喇，佢只係將一塊之前擠左嘅顏色膠片俾我地，任我地自己玩，無話示範手指畫，媽咪覺得有d俾人輕視囉！不過Ambrose一見有顏色玩就開心，佢自己畫畫撈撈，自得其樂，媽咪陪佢玩都無再諗喇！只見Ambrose最後將膠片上所有顏色撈埋哂一齊再印印印，用哂成張膠片顏色，媽咪好衰咁心諗，Ambrose叻仔，用哂佢地d顏色，撈到佢地一定要清理張膠片，總算出左氣啦！媽咪同Ambrose玩緊時都有問姐姐其實kids paint同fingerpaint有咩分別，姐姐好尷尬咁話佢都唔係好清楚，但佢就話應該只係新裝同舊裝嘅分別，而新裝嘅顏色又再sharp一d，媽咪試落質感係差唔多，係黃色嘅kids paint比較水d，一倒就倒好多出黎，而fingerpaint好似杰身少少，方便用幾多擠幾多！媽咪諗，兩隻顏色應該係一樣，只係唔同名呃d人去買咁囉！哈哈！畫完畫，媽咪再同爹爹講番頭先嘅遭遇，原來爹爹都覺得d人唔想理我地，唔知係咪見Ambrose咁細，覺得我地唔係佢地嘅target所以唔理我地，媽咪覺得呢d人實在太短視囉，bb細唔代表我地唔係target customer，媽咪之前一樣幫襯左佢地唔少野，佢實在太看低我地喇！
之後媽咪同Ambrose去左玩泥膠，媽咪知道Ambrose唔多鍾意泥膠架喇，不過見有得免費玩，一於捉佢去玩吓試吓，可能佢又接受到呢？！點知Ambrose真係麻麻地，叫極佢都唔肯掂舊泥膠，媽咪唯有自己扮玩得好開心黎引佢，不過真係無咩效，Ambrose只係應媽咪要求，係咁易掂一掂舊泥膠（媽咪係叫佢大力按落個模到架）！玩左一陣，Ambrose係咁擰頭，媽咪唯有見好就收啦！
呢個時侯媽咪見到原來畫畫果度有成台一盒盒顏色任“不”攞黎畫畫，好似幾好玩咁，而Ambrose又係咁想行埋果台顏色台度，爹爹見佢有興趣，就走左去捐多$50玩埋畫畫喇！
姐姐同Ambrose著好圍裙，Ambrose行到去畫架前，真係似模似樣，成個小畫家咁！媽咪幫Ambrose去攞顏色返去畫，原來呢d顏色係塑膠顏料，質地好杰，畫上畫布會“章”住咁，質感都幾得意，望吓原來呢個counter就係而家好流行嘅art jamming，媽咪不知幾開心，$50可以體驗吓，真係好抵，而且今日所有作品包埋呢幅畫都可以攞返，媽咪覺得超好囉！Ambrose係咁畫，又用畫筆，又用油掃，又用海棉，佢重一個唔該fing左d顏色上媽咪條褲同鞋度，地下都有呀，而佢自己就一衫都係顏色之餘，對手係污糟到爆呀！好彩姐姐走埋黎話唔緊要，佢就係見Ambrose玩得咁開心同咁有興趣畫，佢靜雞雞俾左塊display嘅畫布俾Ambrose畫多一幅，媽咪真係覺得姐姐好好呀！媽咪多口問姐姐art jamming少少資料，原來响銅鑼灣玩一節三個鐘都要二百幾三百蚊，而如果响中環就重貴d，要三百幾四百蚊一次！媽咪今日以$50可以同Ambrose體驗吓，真係超值！玩左今次，媽咪都係等Ambrose大d先同佢再玩呢d畫喇，太貴喇，大d先啦！
畫完畫洗乾淨哂手腳，再去另一個counter做眼鏡，都係攞左d紙油顏色，油好之後俾工作人員貼在所選眼鏡框度帶，都幾cute架！不過對於Ambrose黎講太大喇，佢自己都feel到，唔多願帶走左去！
最後再攞左張puzzle plain咭，又係隨意畫野，畫完可砌上出面display度隨意創作，不過爹爹又覺得係Ambrose手筆，唔捨得留响度，所以我地無砌上去攞走埋喇！本來重有穿珠手工，不過玩到周身污糟哂，又玩左好耐，最後爹爹話唔好再玩喇，返屋企抖吓喎！
今日花費左$100，有咁多野玩，玩左好耐，又有意義，真係好正！如果成日有呢d商場活動就好喇！
幼潛三期 – 第七堂
今堂上堂前重同爹爹傾邊個入去上堂，結果媽咪諗住有兩堂都無陪Ambrose上，就話都係媽咪陪上啦！
不過媽咪好後悔囉，因為媽咪見到台面上有好多香蕉，諗起呢幾次上堂都有有關食物嘅遊戲，心諗d蕉唔係我地用架麻？！點知真係！！！媽咪成世人都唔多鍾意香蕉，一定唔食，而且重覺得好臭，真係唔好响媽咪視線範圍內食蕉，蕉就好似榴槤咁，有d人覺得好香，有d人就覺得好臭，而我係覺得d蕉係勁臭果d人囉！一開始姨姨就要小朋友搣蕉皮，當然係要媽咪幫手搣左個頭先啦，真係難為媽咪，要近距離嗅蕉之餘重要用手搣，要掂條蕉，真係攞命！不特止嘅係Ambrose搣到尾成條蕉趺落黎，果條咁嘅蕉又熟又爛，媽咪要用手接住放响碟上面，咦，超核突！！！之後姨姨要小朋友用刀切到條蕉一片片，我好想叫救命，因為Ambrose一定係拮把刀落去唔係真係拉動隻手前後去切，媽咪又要用手幫手按實條蕉，又要教Ambrose係要切而唔係拮，見到條蕉又熟到咁深色，又要掂，真係超極後悔囉！最後姨姨要小朋友用叉拮起食，Oh My God！！！一來Ambrose本身同媽咪一樣係唔食蕉嘅，二來Ambrose一直都會同媽咪分甘同味，有野食都會俾媽咪食。果然，佢自己食完又吐出黎，媽咪要接住佢咬過又吐番出黎嘅爛蕉，真係好核突，Ambrose之後又拮起另一片俾媽咪食，真係想嘔囉！媽咪唯有同佢講媽咪同佢一樣唔食，唔食其實唔係問題，但其他家長小朋友又食緊，姨姨又睇住，媽咪好驚姨姨話媽咪自己挑食令到小朋友都挑食，真係有少少壓力囉！好彩姨姨都見Ambrose係咁吐，佢先話小朋友唔食就由得佢家長可以自己食埋佢，媽咪即時出聲話Ambrose唔食之餘，媽咪都唔食架，驚左成堂Ambrose塞俾媽咪食添呀，全班人大笑，哈哈！
之後姨姨派左一張紙，上面間哂線，媽咪見到一格格都知咩事，又係貼貼子，不過今次姨姨要小朋友由上而下同左至右咁貼過去，唔似以前咁隨意貼，姨姨話咁樣係俾到小朋友空間感，亦都比佢知咩係上下左右，同埋最重要嘅係將來返學嘅寫字模式係咁，俾佢地習慣喎。貼完貼子重要貼飲管，再將張紙對摺痴實，咁就可以做枝旗仔喇！Ambrose第一下就已經唔係貼左上角或右上角，佢貼左落中間，媽咪唯有由佢開始果格開始由上而下由左至右，點知姨姨見到我地由中間開始就話媽咪無聽書，真係冤枉囉！Ambrose又係第一個貼好貼子做好旗仔，自己係咁fing係咁玩，又當枝旗係刀仔鋸鋸吓，好攪笑！媽咪望吓其他小朋友，原來媽咪一直都以為好易嘅手工唔係真係咁易喎。媽咪見其他小朋友重貼緊貼子，一係唔多想貼周身郁，一係就唔貼要家長貼，同埋其實貼飲管並唔係真係要搽哂膠水自己貼，而係一早痴左雙面膠紙，小朋友只係搣番個底出黎貼，但好多小朋友都唔整唔搣，總之媽咪見有d家長頭都大埋，為左趕進度都係自己做左就算，媽咪好慶幸Ambrose都ok喜歡做手工，可能同佢鍾意貼貼子呢個興趣有關啦！所以媽咪真係要多d陪Ambrose做手工，訓練佢專注力，呢樣野真係好緊要呀！
媽咪失憶，平時一堂幼潛有三個遊戲玩，媽咪只係記得兩個，點都諗唔番第三個遊戲係咩，真係渣渣！
2011年6月4日 星期六
2011年6月4日
尋日先去完Disneyland，玩到散哂，今朝早就同Ambrose過左去雅雯屋企玩，估唔到媽咪咁都頂得順，重有精力陪佢去玩，哈哈！今日Ambrose好攪笑，自己攞起左一枝長棒，無啦啦用咀咬／吹住棒頭，雙手在棒下，頭微微向下，雙眼合埋，一面陶醉好似吹緊色士風咁，真係俾佢笑死，諗唔到佢响邊度學返黎，因為似乎佢都應該無見過吹色士風，不過媽咪諗可能佢唔係扮吹色士風，而係笛之類，會唔會係之前睇過管絃樂果時學返黎呢？！如果係嘅話，咁Ambrose觀察力都唔可以睇少（因為媽咪次次都買最平最遠嘅飛，哈哈），真係應該同多d佢去音樂會至得喇！今日佢同雅雯運波波，玩得不知幾投入，估唔到運波波都可以玩到咁耐！撞啱雅雯食飯時候，Ambrose都痴住食蛋飯，點知可能佢唔太鍾意d飯太黏，佢一路食一路吐番出黎，媽咪再嘗試俾佢食，但Ambrose一向都唔太愛黏立嘅食物，所以媽咪都無佢辦法，一於收起唔俾佢食喇，費時佢失禮人呀！
玩左一輪，下午又去左上shining garden playgroup，今日主題係dragon boat，因為就到端午節喇！雖然主題係叫dragon boat，不過只係手工係，學生字只係教shapes，係以唔同形狀嘅糉黎教shapes，媽咪就覺得麻麻地喇，因為d糉隻隻都有繩綁住，又係比較cute化，角係圓角嘅，媽咪覺得唔係好突出到真正嘅形狀，可能有少少confused囉！果然，平時Ambrose一定分到唔同形狀嘅，今日上堂要分糉時，佢都有一次將個糉想放錯落第二度，平時佢玩matching遊戲都未試過錯架麻，所以媽咪覺得呢堂設計有少少求其，其實可能用dragon boat做主題，教小朋友咩係端午節，會有咩食，有咩做，媽咪覺得咁樣先叫配合主題囉，而唔係用左dragon boat做主題無啦啦教形狀，d形狀又唔係做得好，今日真係麻麻地呀！
上完playgroup都六點喇，媽咪第一次同Ambrose响商場行住等爹爹放工一齊食飯，爹爹成八點幾先返到黎，媽咪就行足兩個幾鐘，真係散哂呀！不過咁樣嘅三人世界撐台腳又唔錯喎，平時都係一班人多，有時得自己一家三口又有一家三口嘅樂趣嘅！
2011年6月3日 星期五
遊廸士尼
之前媽咪响facebook抽到兩要廸士尼入場卷，一直都未有時間同Ambrose去玩，拖拖吓張入場卷又就黎到期，爹爹返左shift之後要夾埋爹爹去又有少少難度，結果媽咪無辦法之下唯有衰衰地病假一日同Ambrose去玩啦！因為媽咪除左唔想浪費左張入場卷之外，最重要係媽咪想用埋張入場卷補差價upgrade做annual pass，所以如果唔去，唔止係浪費左張卷，重係浪費左以平過半價黎買張pass嘅機會，所以衰衰地都要病假啦！
Ambrose又係响搭車途中瞓左，落左車upgrade埋張pass，入埋閘見到個mickey頭，爹爹就忍唔住叫醒Ambrose，Ambrose懞鬆鬆咁驚覺自己入左廸士尼，醒哂！因為今日係平日，園入面唔算多人，排得最耐嘅遊戲都唔使三十分鐘，算係咁啦！今日玩左好多野呀，旋轉木馬玩左兩次，Winnie the Pooh兩次，小飛象一次，咖啡杯一次，小小世界唔記得兩次定三次，巴斯光年Ambrose玩左一次，媽咪响Ambrose瞓左期間自己入去玩左一次，無人玩，唔使排，可以好free影相，adventure land嘅船一次，tomorrow land果個好似小飛象形式嘅飛上去轉都係一次（都唔知佢叫咩名，哈哈！），連之前有朋友想同囡囡玩嘅揸車車（又係唔記得叫咩名）Ambrose都竟然夠高可以玩埋一份，又玩左一次！嘩，估唔到今日真係玩左唔少野！
行行吓見到有水玩，見天氣咁熱，忍唔住叫Ambrose一齊行入去玩水，佢見到有水氣周圍飄好濛瀧咁都有d猶豫，不過當佢見到有幾盆水可以伸手入水玩就開始顛起上黎，係咁撥水，結果佢一身濕哂，媽咪完全無諗過會玩到濕身，所以都無同Ambrose預備spare嘅衫褲，媽咪好無奈當街同Ambrose除左件底衫，用毛巾仔攝住心口位置，等件濕嘅面衫唔好咁“醃”住個身攝親囉，下次去一定要帶多套衫先好同佢玩水喇！
差唔多走果時Ambrose係咁扯住我地入園方向，爹爹後來發現佢原來係想睇ballon，結果一向唔捨得入園消費嘅爹爹媽咪，最後都因為見Ambrose好似好想要個ballon，都消費左一百蚊買左一個俾佢玩，Ambrose一攞到ballon果然好專心咁玩，又抆又扯又追，爹爹同媽咪叫極佢都聽唔到咁！
今日雖然係熱左少少，但玩到咁多野，真係覺得好完滿好開心，Ambrose又好似好鍾意玩機動遊戲，媽咪見到佢開心都覺得好開心，而且又可以以六百蚊upgrade左兩張annual pass，真係超抵呀，未來呢年，真係要同Ambrose去多d玩至得喇！
2011年6月1日 星期三
2011年6月1日
呢排Ambrose對puzzle有興趣，早排佢响媽咪書櫃下摷到一盒alphabet floor puzzle，係一列長火車，車上除左有字母重有好多唔同動物小丑汽球公仔，可能係呢d吸引住Ambrose，所以佢响媽咪果三盒puzzles中只係摷呢盒出黎玩。二十一個半月嘅Ambrose重未識講好多野，又未認得英文字母，唔知佢係behind左定未到文字敏感期，不過媽咪見佢對盒floor puzzle有興趣，當然唔會放過機會，同佢一齊玩啦！Ambrose唔知點解知道puzzle係要逐塊砌上去，所以原則上媽咪唔使教佢“砌”呢個概念，媽咪只係順住字母排序，每攞起一個字母puzzle，都會盡量放在Ambrose眼前俾佢睇到再讀一次至俾佢，Ambrose就會好努力自己砌落去，由於呢副係真puzzle，每塊puzzle都係波浪形有凹有凸，所以對Ambrose黎講砌上去係有難度，不過媽咪都俾佢自己發揮，由得佢試，結果係有d佢可以砌到，有d就要媽咪提佢至砌到，不過媽咪已經覺得Ambrose好叻架喇，比起之前上幼潛只係將兩張直線puzzle拍埋一齊，呢個真puzzle所需嘅技巧又高左，雖然佢唔係認到個圖去搵去砌，但要攞起puzzle，由高而下砌啱位真係叻左好多喇！呢排媽咪放工，Ambrose都必定捉住媽咪同佢玩一次，砌完架火車，佢重會自己“砵砵”聲推住架火車，好開心咁，玩完又會自己拆番放番入盒！
今晚食飯後，媽咪又繼續手工時間。首先媽咪俾左張畫紙同水彩畫筆Ambrose塗鴉，一如以往，Ambrose係好鍾意亂畫一餐，又將唔同顏色溝埋一堆，又用手玩顏色，整到一手都係，媽咪由得佢玩，因為Ambrose未沖涼，唔整污糟幅牆嘅大前提之下，媽咪係唔會阻止嘅！玩到咁上下，張畫紙都畫滿哂顏色，媽咪就同Ambrose去沖涼，沖完涼之後，d顏色已經乾哂喇！媽咪再將之前留起嘅廁紙心攞出黎，再將又係之前用剩嘅色紙包起個心，張紙竟然啱啱好夠大，哈哈，真係預都無咁準呀！其實媽咪係可以俾Ambrose自己包色紙，不過為左Ambrose快d可以睇到做緊咩，媽咪都係快手包好，再剪兩條鬚鬚，貼埋圓點貼子做眼，將之前Ambrose塗鴉嘅畫紙剪成蝴蝶翅膀貼上包好嘅廁紙心上，咁就完成左一隻蝴蝶喇！媽咪準備左大量圓點貼子，要Ambrose自己幫蝴蝶貼貼子變靚d，Ambrose知道自己係負責貼貼子，超合作咁係咁貼，直到所有貼子貼完為止。 Ambrose整好隻蝴蝶都玩左一陣，係咁飛飛飛，媽咪好滿意呢個手工，一來可以俾Ambrose玩佢至愛嘅塗鴉，二來又可以郁多d小手指，三來係帶到一個概念俾佢，原來物件係可以透過唔同組合變成另一樣野出黎，媽咪諗，呢個應該係好初步嘅創作整合概念，俾Ambrose多d認知！經過呢兩晚嘅手工時間，媽咪發覺Ambrose做手工都幾夠專注，唔會玩玩吓走左去，亦都唔會一見到就無興趣要走，Ambrose係會睇媽咪攪咩鬼，再聽媽咪話做咩，自已再動手做，媽咪覺得除左睇書，做手工都可以訓練專注力，而從做手工中，又可訓練埋手部靈活度，培養藝術創作等氣質，真係一舉幾得！媽咪真係要努力諗多d／學多d唔同手工俾Ambrose玩至得喇！
訂閱：
文章 (Atom)