第一次發到兩個音

二十一個月嘅Ambrose，仍然唔係識講好多野，來來去去都係爹爹、媽媽、嫲嫲、爺爺、波波、車車、水水，奶奶、咀咀、餅餅、包包、duck、car、腳腳、畫畫等等，字數真係唔多，重要全部都係叠字，媽咪決心等到兩歲要同Ambrose去做評估。今日放工返到屋企，媽咪第一次聽到Ambrose講“巴士”，好驚訝！Ambrose終於發到兩個唔同音嘅字喇，媽咪即時教埋Ambrose“的士”，Ambrose即刻學識，真係好神奇呀！好多人話小朋友聽得明就唔怕佢唔識講野，到佢一識講就會連珠爆發咁係咁講，唔知Ambrose係咪好似呢d小朋友咁，遲講但一講就識好多呢？希望係啦！