Home Art Jamming @魔術師 (4y8m)

Ambrose自己畫左個魔術師出黎，真係幾靚！

唔記得佢由幾時開始，畫眼睛嘅時候識得留兩至三個白色圓形，好似人地畫漫畫少女嘅眼睛咁，的確係醒神好多！ 

星星老師@第三十五堂(4y8m)

上兩堂，老師話畫比賽畫。今堂又恢復正常，畫蜘蛛！老師話，Ambrose一聽見話畫蜘蛛，即時話要畫蜘蛛俠，哈哈！當然，老師唔會俾佢咁做啦！

蜘蛛網上有其他昆蟲，好現實呀！老師先俾小朋友睇有關蜘蛛嘅圖片，俾小朋友對畫嘅野有概念，真係幾好！其實Ambrose都知道蜘蛛係食昆蟲，不過佢就唔多明點解其他昆蟲會痴住响個網上面，但蜘蛛唔會痴住。媽咪見Ambrose畫嘅蜘蛛腳上有毛，就同佢講，d毛係可以令蜘蛛在網上行走唔痴住架，雖然唔知係咪真係咁，但呢個都勉強解釋到少少掛，哈哈！

Ambrose的生活小趣事 2014 04 23 (4y8m)

                                                             究竟呢堆野係咩黎嘅呢？ 

BBQ@羅氏(4y8m)

今日約左爹爹嘅大學同學一齊BBQ，當中有幾個小朋友，可以同Ambrose一齊玩喇！其實媽咪對BBQ都係麻麻地，一來唔多食肉，二來媽咪最怕熱同蚊蟲，不過一大班人去，都幾開心嘅！

場地都幾企理乾淨，今日係復活節假都竟然唔係太多人，有d意外，不過因為人唔多，都幾舒服！最好嘅係我地個爐旁邊有一片空地，一班小朋友可以响度玩，大人燒住野食都可以望到，放心好多！

場地入面其實有得餵小動物，不過種類唔多，都係得兔仔、羊仔同豬，不過呢d其實又唔使多嘅，Ambrose嘅興趣唔係好大，餵過都已經足夠喇！另外，場入面都有幾架單車同滑板車，數量唔多，不過都叫做有得玩吓，都ok嘅！仲有就係有得摘士多卑梨，不過由於而家已經四月喇，士多卑梨已經唔靚又細粒，媽咪同朋友仔就決定去摘蕃茄，哈哈！Ambrose好鍾意食蕃茄，所以真係啱哂，摘完洗乾淨就即刻食，正！

食物方面，味道唔錯，種類算係一般啦，一般燒烤場有嘅野都有囉，無咩特別！不過，我地成班廿幾個人，次次攞住個盤去取食物（其實我地仲係坐响取食物嘅地方前面），都唔知點解每次都係俾得好少，好似雞翼都係俾三、四隻，丸就幾粒，咪成日都要去攞囉，都幾煩！仲有就係，明明任燒四個鐘，到最後半個鐘嘅時候有人走埋黎話我地得番半個鐘，唔可以再取食物喎！咁都有？！半個鐘，其實都可以燒到好多野囉，點解可以提早cut左唔俾食物架！都仲同佢地計，之前因為場地隔離有火警，佢地d人走哂去救火，搞到無人on duty俾食物，果度都無左約半個鐘啦！雖然媽咪都已經唔食，但總覺得咁樣好唔合理囉！ 

長洲遊(4y8m)

復活節假期嘅第二日，帶左Ambrose去長洲行吓。對上一次去長洲，應該係Ambrose約兩歲左右吧，當時在酒店過了一晚，輕輕鬆鬆的，感覺長洲也是一個假日好去處。可今次因為適逢復活節，由去到碼頭開始，就是一片人海，水洩不通，即時興緻大減。 

麥坤黏土車@星星老師 (4y7m)

一早幫Ambrose報左呢個特別班，個班勁快full，好彩媽咪咁啱見到個post，遲多幾分鐘的話，都已經報唔到了，哈哈！

今日媽咪放假，可以自己帶Ambrose上堂！初時仲以為只係麥坤造型的黏土車，點知落堂至知，原來架車嘅車碌唔係黏土造，係膠做的，有車軸，成架車真係可以郁架，真係好驚喜！ 

Home Art Jamming @姑丈一家 (4y7m)

Ambrose今晚同表姐們玩完之後，回到家沖完涼，就見佢埋檯畫畫。畫完後，佢話係姑姐、姑丈同兩個表姐！媽咪問佢做咩畫佢地嘅？佢就話，因為驚掛住佢地，所以要畫佢地出黎，仲要貼响房門，真係好可愛！

銀獎@Gnet Star世界兒童繪畫大獎賽2014 (4y7m)

上年十月時參加了Gnet Star世界兒童繪畫大獎賽2014 ，好幸運，Ambrose得到了銀獎。頒獎禮於半年後的今天舉行，由於媽咪沒有另外付費參加畫展，所以Ambrose得獎的作品並沒有展出，今天出席頒獎禮，純粹攞獎，攞完就走，Ambrose對於幅畫已經無咩印象，事隔咁耐，佢都唔知發生咩事，哈哈！

繪畫比賽得獎大多只有證書，最多也只是一個小小獎牌，對於Ambrose恨拿獎盃的心情，難免有少少遺憾。

得獎作品 -復活島遊歷記

寫中文字(4y7m)

今日同Ambrose做興趣班的功課，其中一頁是中文字配對，真的教媽咪驚訝不已！這一頁是Ambrose自己做的，媽咪以為他即使配對對了，也不會寫對字，因為除了“老”字係學過點寫之外，其他字都未學過未寫過，仲要筆畫咁多，諗住佢對住抄都未必會啱，點知轉過頭竟然見佢抄字全對。

似乎Ambrose又長大了不少呢！

Home Craft Time @黏土猩猩 (4y7m)

好耐都無同Ambrose玩黏土了，今日心血來潮同Ambrose玩黏土。佢有好多野想整，不過媽咪一見到有d難度的公仔，都會好意咁氹佢不如整d簡單少少的，事關Ambrose太簡單的不願做，太難的一定會叫媽咪幫手，終於揀左整猩猩，望落都ok易整！但整整吓發覺隻猩猩前重尾輕企唔到，已經整到尾聲至企唔到，真係有點泄氣！Ambrose唔知點解好鬼醒，竟然提議要用黏土包筷子撐起隻猩猩，話整條尾巴俾佢喎！聽到呢個提議，媽咪有點驚呆，覺得Ambrose實在太神奇了，點會諗到咁樣整呢？！當然，因為隻猩猩唔係好大隻，用筷子撐實在太大枝了，最後媽咪建議改用牙簽，Ambrose同意了，於是用黏土包好了牙簽插入了猩猩的後面扮尾巴，咁就可以撐起隻猩猩了！