BBQ@羅氏(4y8m)

今日約左爹爹嘅大學同學一齊BBQ，當中有幾個小朋友，可以同Ambrose一齊玩喇！其實媽咪對BBQ都係麻麻地，一來唔多食肉，二來媽咪最怕熱同蚊蟲，不過一大班人去，都幾開心嘅！

場地都幾企理乾淨，今日係復活節假都竟然唔係太多人，有d意外，不過因為人唔多，都幾舒服！最好嘅係我地個爐旁邊有一片空地，一班小朋友可以响度玩，大人燒住野食都可以望到，放心好多！

場地入面其實有得餵小動物，不過種類唔多，都係得兔仔、羊仔同豬，不過呢d其實又唔使多嘅，Ambrose嘅興趣唔係好大，餵過都已經足夠喇！另外，場入面都有幾架單車同滑板車，數量唔多，不過都叫做有得玩吓，都ok嘅！仲有就係有得摘士多卑梨，不過由於而家已經四月喇，士多卑梨已經唔靚又細粒，媽咪同朋友仔就決定去摘蕃茄，哈哈！Ambrose好鍾意食蕃茄，所以真係啱哂，摘完洗乾淨就即刻食，正！

食物方面，味道唔錯，種類算係一般啦，一般燒烤場有嘅野都有囉，無咩特別！不過，我地成班廿幾個人，次次攞住個盤去取食物（其實我地仲係坐响取食物嘅地方前面），都唔知點解每次都係俾得好少，好似雞翼都係俾三、四隻，丸就幾粒，咪成日都要去攞囉，都幾煩！仲有就係，明明任燒四個鐘，到最後半個鐘嘅時候有人走埋黎話我地得番半個鐘，唔可以再取食物喎！咁都有？！半個鐘，其實都可以燒到好多野囉，點解可以提早cut左唔俾食物架！都仲同佢地計，之前因為場地隔離有火警，佢地d人走哂去救火，搞到無人on duty俾食物，果度都無左約半個鐘啦！雖然媽咪都已經唔食，但總覺得咁樣好唔合理囉！ 

講起火警，今次就有機會俾Ambrose體驗一下！話說場地隔離少少嘅地方，就係養兔仔嘅。我地到左無耐，因為未齊人嘅關係，所以先去左餵兔仔，餵嘅時候已經見有少少燶味同少少煙，望吓源頭就响隔離間屋對開嘅空地，聽見人話係燒垃圾，大家都不以為意，因為在村屋嘅地方，燒垃圾都唔係唔常見的。之後，過左段時間，有人發覺d煙越黎越大，以至再行埋去睇時，已經係好大火喇！於是就有人大叫有火，場地嘅人就走左去救火，不過佢地用平時淋水嘅水喉去救火，d水流得好慢，再加上個火都幾大，基本上工作人員都唔可以企太近去救火，所以都唔多救到！同時間，工作人員已經報警了，媽咪見火源正靠向一村屋，都有點擔心，唔知屋入面有無人，同埋有無gas爐具之類，會唔會燒過去就會爆炸，咁真係大件事，因為燒烤場其實只不過距離火源幾十米咁近，唔知我地會唔會有危險。正在擔心之際，見到工作人員開始搬d滅火筒過去救火，而火勢似乎開始減弱了！同時間，見到消防車駛過左路口，大家都好搞笑咁係咁揮手大叫話過左龍喇！然後到消防車黎到，又因為路口有其他車泊左响度，消防車入唔到，消防員就不斷叫車牌號碼，叫人快d駛走d車，氣氛其實都幾緊張架！不過，都唔多明白，點解d人明知有火警，明知消防車黎左，明知佢地入唔到黎要叫人駛走d車，d人都可以咁唔alert ，叫極都無人出黎！到真係叫左好耐有人行出黎，個人都係慢慢行去開走架車，點解可以咁樣架？！

Ambrose見到消防員其實都唔係特別興奮，不過佢就好投入！當消防車過左路口時，佢都有舉手大叫“呢度呀”，好肉緊！之後當消防員落車行去火源時，佢又係咁同消防員打招呼，不過消防員當然唔得閒理佢啦,，或者應該話睇佢唔到，一心只係行去火源掛！Ambrose慘食檸檬後，又問媽咪點解消防員唔理佢架，媽咪唯有安慰佢話消防員趕住去救火，好危險呀，所以可能睇唔到佢啦！

其實消防員到後，基本上，場火警都好快平息左。呢次都係媽咪第一次體驗真正嘅火災，雖然火勢同影響範圍唔大，但眼見個火其實只不過由少少煙開始，一下子就變得好大而且好熱，感覺真係幾得人驚。好慶幸，爹爹之前為家中添了一枝迷你的滅火筒，感覺如果有事的時侯，真的可起少少作用。