Ambrose第一次上堂，因為响尖沙咀，我一早叫定老公請假車我地去，唔使我第一次去就咁狼狽。諗住有車，我地重他他條條食埋個早餐先出發，本來都順順利利，去到唔知邊度竟然塞車，眼見就黎遲到，我同奶奶就抱住Ambrose落車先，我地重要响山林道嘅街尾對落果條樓梯底落車，奶奶抱住Ambrose上條長樓梯，我就攞住Ambrose嘅奶粉袋，一路行一路望座大廈响邊，因為一早諗住老公車，所以連地圖都無睇過，根本無concept响邊度，行到死死吓！一路差唔多行到去街頭先搵到！
上到去，發現開始左唔係好耐，都只係介紹緊，我地亦唔係最遲嘅，都好好彩！其實上左baby kingdom睇過，有0908媽媽join左呢個playgroup講番第一堂嘅內容，所以大概都知會玩咩。開始熱身唱歌仔拍手掌，介紹吓同班嘅bb（每班8個bb），不過d歌仔我地都唔知歌詞佢又無貼出黎，都係跟住唱，第一次，甩甩漏漏咁，是是旦旦唱左就算。
好彩Ambrose响車度飲左支奶瞓左一陣，都叫狀態ok，去到無扭計，無喊，Dr Poon講野又係咁望住人，不過其他bb都好奇咁周圍爬，Ambrose就坐定定望，無主動爬出去，係有其他bb爬埋黎，好攪笑！第一個遊戲係抱起bb，另一人就對住bb扶住佢下盤，一路唱一路好似鐘擺咁左右兩邊搖，唱到幾多點就舉高bb，我開初唔知咁玩，自己話抱bb，因為其實Ambrose唔係好痴我，我諗住抱佢多d會痴我d，點知原來抱住佢對面重有人扶佢個下盤，早知我做扶果個啦，我舉Ambrose舉到手都軟埋，但係佢就對住奶奶玩到笑哂，老公掛住拍video，佢無一齊玩！
玩左一陣又轉左坐番低休息吓兼玩第二樣，Dr Poon開始派膠匙俾bb，Ambrose一見對面個bb有膠匙，二話不說就衝左去對面想搶，雖然我主張係放任佢玩去探索（只要唔係會有機會受大傷），我驚其他家長介意，覺得我無家教，咁我唯有一齊衝過去阻止，好彩Dr Poon都見到，即刻番轉頭派匙俾Ambrose。呢個遊戲係要俾兩隻膠匙俾bb，睇吓佢地會唔會攞住匙柄去對敲兩隻匙，咁可以訓練手眼協調，之後再試吓俾第三隻匙睇bb有咩反應，Ambrose就放低哂兩隻再去攞第三隻，之後再試一次佢就放低一隻去攞，唔知咁即係代表咩，不過識得攞第三隻都叫ok啦！不過响其他bb落力敲嘅時候，Ambrose就敲兩野就掛住食隻匙，Dr Poon話bb係鐘意放野入口，你越阻止，佢擺野入口嘅時間越長，因為佢會鍾意放入口你去抆出黎果種刺激，奶奶就好似唔係好認同，覺得無理由佢擺野入口都唔阻止！而且老公同奶奶都唔鍾意bb玩匙，驚俾佢玩慣左第日去酒樓佢又會照玩d筷子同匙喎！
之後派左個膠筒同幾個膠圈，放落去俾bb聽係有聲，Dr Poon話bb一定會攞哂出黎，我地就要教佢放番入去，不過Ambrose都係一味食，對於我地教佢放番入去係無咩反應！再之後又派左絲帶，俾bb睇住放入去，同膠圈唔同，絲帶放入去係無聲，bb會望落去睇吓，不過Ambrose無理，攞條絲帶俾佢一係就慣例開摩打咁搖對手，一係就拋左去唔玩，Dr Poon話有d bb係會攞住條絲帶從頭到尾抆直佢，可能Ambrose重細，未識啦，佢連個膠筒咁大個都可以由頭食到落尾，好滋味咁！班中其他bb月歲應該相差唔過三個月，最大都係十一個月，Ambrose唔知係最細定尾二細喇，所以見其他bb都識嘅野Ambrose唔識我又唔覺得好緊要，响屋企玩多d咪得囉！同埋我始終相信放野入口係佢要去探索去認識，又或者係佢牙痕，總之呢個係佢嘅需要，我相信佢滿足左口腔期佢就自然唔會咩都放入口，時間問題！
玩完呢樣之後都差唔多時間，一個鐘嘅playgroup真係好快過，唱埋tidy up 同bye bye歌就正式完結！
Ambrose第一次上playgroup都算係咁喇，無喊無扭計要抱住痴住先得，某個程度上我自己覺得even上playgroup玩遊戲未必真係好有得著，因為今堂教嘅野我地自己响屋企都有玩過差唔多嘅，不過可以俾Ambrose同其他差唔多大嘅bb一齊玩，從玩嘅過程可能學到social skills，problem solving skills都係一件好事，希望佢玩多幾堂可以train到佢自己一個人都可以玩一陣，唔使無時無刻都要有人陪玩就好喇！
沒有留言:
張貼留言