Studio Photo

Ambrose出世無耐開始，老公就決定每日都同佢影相，到佢一歲大嘅時候就可以做一幅365日嘅人頭相海報留念，我都幾鍾意呢個概念，一來諗住咁多人頭相張海報都應該好震撼，二來bb真係日日都唔同樣，表情成日都唔同，日日同佢影低d相留念，捕捉bb唔同嘅表情，某個程度上都係一種成長紀錄。因為日日都影相，Ambrose嘅相庫都好大，我好鍾意入哂d相入iphone，返工搭車、lunch、臨瞓，總之係無時無刻都會攞出黎睇吓，唔會厭！就係日日都影相，我從來都無諗過要帶佢去影樓影相！但係唔知點解有一排上得baby kingdom多，見好多人都會帶bb去影，d造型真係好得意好鬼馬。突然間又覺得bb過左一歲可能影唔返d咁得意嘅造型，而且自己影果d就一定唔會有特別嘅造型衫同背景，加上我地影bb就影得多，一家三口嘅相實際真係唔多又唔太靚咁。check過影bb造型相重平過大肚相好多，幾百蚊都有交易，當影吓全家福都好丫，心郁郁之下又有d擔心老公會抗拒影相，真係十五十六，好彩佢都唔抗拒，重要佢話好之後我過左一排都未book studio，佢倒番轉黎催我快d約期！！

去番影大肚相間studio影bb相，其實係太花多眼亂，間間都好似好好，影到好得意咁，懶得去做research，呢間之前影過大肚相ok，價錢又差唔多最平同埋網上評語都好好，唔諗咁多，book左先，最緊要都係bb狀態好，咁點影都靚架啦！呢間studio原價$388包28張相四個造型，要哂全部相都係加多$300，因為係baby kingdom 0908 媽媽會，又有額外優惠，送多一個造型同十張相，真係幾抵！因為都係本住個心係影吓d得意造型衫同全家福，覺得唔係一定要一大堆相至得，相我地都大把麻，所以我嘅策略係除非超靚超水準，如果唔係我一定只攞38張相就走，唔會加果三百蚊，寧願將果三百蚊加多少少影多一次又可以有唔同造型！老公聽到之後覺得有d唔可能，佢覺得棟相好煩，而且佢相信我睇完相都係好難決定要邊d同唔要邊d到最後都會要哂，可能係有影結婚相同大肚相嘅經驗啦，女人通常都唔太理智，hohoho，如果唔係都唔會有“除非”啦！

約左5月29日下晝六點鐘去影相，其實呢日都算忙，Ambrose啱啱果朝上佢人生第一堂playgroup，上完堂我地重走左去圓方食lunch同行街，佢都無咩點瞓到，為左佢影相果時狀態好d，我地食完lunch，只係去左買對鞋仔就返屋企白白豬同覺覺豬喇！好彩佢都好合作瞓左，重要幾冧吓，都無幫佢換套靚衫，只係著住件睡衣，瞓住覺抱佢出去喇！揸車途中都見個天好黑好似就快落大雨咁，都未泊好車，老公都已經不斷催促我地快手快腳落車過對面馬路果座大廈，佢平時唔會催人，今次就係咁叫快d快d！一落車已經有幾點細雨，行多兩步果d雨都灑得好大粒但都只係幾粒，啱啱話口未完粒雨咁大粒就已經倒水咁落起上黎！我地無傘，又驚潺仔搴咁樣一淋又病左，好彩少少嘅係佢出黎時瞓緊覺，咁我地就連人帶被仔抱左佢出黎，無傘都叫有張被仔遮住，我就踩住對超高跟鞋起勢跑到對面幢大廈！揭開張被仔睇吓Ambrose，佢d頭髮都濕左塌左d，個樣好攪笑，佢都係第一次做落湯雞架喇！我地唔敢即刻入lift，因為架lift嘅冷氣都好勁，驚Ambrose攝親！

過左一陣我地先上樓，上到去d工作人員就俾相薄我地棟造型，原本我好想要天使造型，不過又鍾意寫真（即除哂衫淨番條片），呢兩個造型實際又好似都幾類似咁，結果我地都係要左寫真、家庭、村民、廚師同消防員呢五個造型！

等左一陣就開始影廚師造型喇！換左套衫戴左廚師帽，真係幾得意！攝影師俾左一盤蔬果道具俾Ambrose，佢只係攞左蕃茄同薯仔。有個女仔係咁引Ambrose望鏡頭同笑，都唔使我地去攪，都幾好！影左一陣個攝影師就攞個鑊同鏟俾Ambrose，不過俾左兩次Ambrose都唔攞，一味攞住個蕃茄想食，我地見到咁咪想同佢轉枝粟米或麵包黎影吓，等d相唔使一味都係蕃茄同薯仔，點知個攝影師話得喇，呢個造型影夠喇，要轉造型喎！雖然都覺咁快嘅，不過見Ambrose狀態都唔太差就見好就收，快d轉造型影埋去！

第二個造型係消防員。其實著完套深藍色衫都唔覺得話好特別，不過原來一影嘅時候個女仔先即刻笠頂消防帽落Ambrose個頭度，真係幾型吓！一路影Ambrose就一路除帽，結果係要一路引佢引到差唔多就即笠帽快影。

又係好快咁話影夠就轉左村民造型！攝影師俾左兩條臘腸Ambrose揸，個女仔又幫Ambrose笠左頂大竹帽，好村民！哈哈！Ambrose揸住兩條臘腸好鬼開心重係咁“fing”，不過依然係唔鍾意有帽係咁抆。抆跌左頂大竹帽個女仔就俾左頂細竹帽俾佢，三角型細細頂都好cute！之後重有頂大圓中間有洞嘅竹帽，帽邊綑住塊黑布，個女仔諗住俾Ambrose戴，點知一揚出黎都未戴到Ambrose就喊，唔知係咪俾條黑邊揚一揚嚇親！見佢唔鍾意頂帽我地就好快手咁俾左條紅衫魚俾佢揸住，好攪笑！不過咁樣喊一喊佢又借d易唔係幾好心情咁喇！攝影師可能見佢都難引笑左，重想喊想喊咁，就話呢個造型又影完！

再之後就係寫真！入到去間有張大白紙佈景嘅房，同Ambrose除哂衫得番條片，見地上有兩個藍色波波，心諗見到果d擺响度嘅demo相都係彩色波波，重要好多好colorful咁好靚架麻，而家得果兩個，重要係我唔多鍾意嘅藍色，我無出聲，諗住影影吓會加落去啩，咁咪照影囉！唔知係咪間房舖左張大白紙响地上，而Ambrose呢個造型又唔係好似之前果幾個咁要坐响個佈景仔前面，佢好活躍咁係咁爬，爬到個攝影師都影唔到佢，重係咁叫我捉番佢坐番中間俾佢影。之後好快佢地又攞左隻大bear bear出黎，影一陣，又攞左條大毛巾黎影。其實我都好鍾意大毛巾蓋住個頭呢d咁standard嘅bb相，奈何我一放條毛巾上Ambrose個頭度佢就同我抆走佢，見個攝影師都唔係standby咁一等我放佢就影，我覺得佢無好好捕捉Ambrose囉！又係影左一陣佢又攞張藍灰色嘅紗出黎，Ambrose爬去邊塊紗就跟到邊做背景，不過佢係拿埋一注咁做背景，都唔知佢做咩！期間Ambrose都不受控咁爬，要佢坐佢就趴，要趴就坐，而且又唔係好肯笑，個攝影師又係咁叫我捉番佢去中間，佢講到我都有d忟，因為我feel到佢有d唔耐煩，我心諗bb仔係咁架啦，Ambrose都算叫做易引得笑，就算佢無笑都無咩唔妥架，佢都係俾頂帽嚇喊左一陣，氹左一陣又無事啦，表現好好，佢周身郁係好正常，你做攝影師係咪應該係你去就番個bb去捕捉佢嘅神態呢？佢就係咁坐住張碌碌椅碌前碌後去就番Ambrose爬前爬後，爬唔啱位就叫我擺番啱佢，又唔見你唔坐張椅行吓去就位，更加無擒高趴低去影，同我之前影大肚相真係差得遠！重要影影吓相打幾個乞次走左出去，返黎影左都係一陣就話影夠，我都未黎得切反應話咁少道具佢就出左去喇！因為Ambrose夠鐘食奶，我都係拿拿林同佢著返衫就餵奶，唔得閒去追究道具問題！不過餵奶期間我見到擺出黎嘅相，人地都係寫真，人地就有好多colorful嘅道具，有馬仔車仔椅仔，甚至於果d波都係一地都係彩色架，無見到都無咁嬲，一見到再諗番頭先果d咁流嘅野，真係早知要天使造型都叫做有d野睇吓！因為我對於寫真照都有expection，覺得呢d先係考到攝影師技巧，果d著造型衫真係有幾難影得好丫？著左衫放係個佈景前加少少道具，只要bb唔喊，就算唔笑都叫得意啦，無難度！反而寫真就唔同，因為係無特定模式，真係要捕捉，而家又唔係我bb暴喊而影響到影得唔好，而係我feel唔到佢有heart去影，我心裡面已經有七成決定一定唔會要哂d相，其他果三成就係等影埋最後家庭照先算嘅！

全家福都只係影左一陣，影左幾張三個人嘅相，pose都其實叫做正正經經，無咩活潑得意嘅感覺，之後就係我同老公個別同Ambrose一齊影嘅相，每人都係幾張，跟住就話影完喇！可能我真係有expectation，所以佢話影完果吓我覺得好odd，唔係麻，影左幾張咋喎，全家福係最快影完嘅造型！

工作人員叫我地等大概十分鐘就可以睇相，我等緊果陣已經同老公講話一定要棟相，因為我好相信d相唔會有驚喜，老公又話棟相咪要好耐囉，佢話佢見之前果d人都係一有相睇，諗都無諗就話要哂，佢話無人棟相喎！咁我又覺得佢係有得棟架麻，而且我覺得5個造型38張相都叫唔太少，佢又唔係影得多咁，撇開有一部份眨眼唔靚甚至乎穿崩，應該唔會要响好多相之中棟38張，同埋都係果句，每個造型其實有幾張都好夠，貪得意之麻，留番果三百蚊再影過重多變化啦！我地一路等先發覺佢地原來就收工，有d工作人員重陸續放工，唔怪得知佢地好有效率咁快就話“夠”啦，原來係“夠”鐘收工！

都唔使十分鐘就有相睇！一共144張相，比我心目中所諗嘅多，我地好快scan左一次，一睇完已經有個姐姐仔出黎木口木面咁同我地講個價錢，簡直係背台詞咁係咁講，package幾錢，要哂d相又幾錢重有咩送，送果d野又點點點，我好有禮貌咁等佢講哂就同佢講我唔要哂，我覺得自己真係好勇架，其實三百蚊唔係多錢，可能好多人都費時煩或者基於唔好意思之下要哂，但係我又真係意難平，氣難下，我又唔係覺得影得好差，之不過又唔係話好好，佢又fail左我對寫真同全家福嘅expectation，我屋企嘅相庫有好多Ambrose嘅得意相同靚相，只係平時未必著到好靚個景又“是正”咁影到之麻，咁我有咩理由重要俾多三百蚊買哂呢d咁普通嘅相啫！個姐姐仔話唔緊要，繼續木口木面同我地講，唔要邊張相delete enter就得，咁我反問佢我可唔可以另開一個folder放番我要嘅相落去，因為有時棟相你都會睇前睇後比較過先決定到要邊張唔要邊張，如果delete左就好難比較決定，點知個姐姐仔都好寸，又係木口木面同我講話佢地只可以delete enter果d相，因為佢地都重會有留底嘅，佢話好多媽咪都係棟完一大餐最後都係會要哂d相喎，真係抵得佢丫，咁你係咪都睇死我又係得個棟字最後咪又係要哂但又阻住你收工丫？佢講完都轉身走左，得番我同老公坐响度，老公等我棟，我覺得even到果個moment，佢都唔信我真係可以堅持到要38張，埋單$388走人！

講真，其實都好難選擇，因為真係要來來回回咁睇邊d要邊d唔要，如果之前delete得多之後果d又要唔落唔夠數又唔抵同埋已經delete哂好難返轉頭，如果之前果d又要得多之後又有好多想要咁過左38張又少過144張嘅話，好似要哂都無咁嬲啦！加上部機只可以開一張一張黎睇，一唔係就細細張咁show哂出黎你又睇唔得清楚黎棟！Anyway，我最後都用左唔夠十五分鐘就攪掂左，一張都無多！一攪掂左就有個男人走出黎都叫有少少禮貌咁問我地做咩唔要哂d相，老公都好客氣咁話d相張張差唔多，加上我地唔會只影一次，所以費時要哂，老公已經唔係評論佢地影得麻麻，點知個男人話bb個樣一日一日唔同，有d相係影唔番，唔要哂可惜喎！我要哂就好可惜喇，都無我屋企果d咁靚呀！一日一日唔同喎，我夠知啦，我日日都同佢影相架，唔好好似覺得我地慳住果三百蚊至得架！都同你講話唔會影一次啦，都唔醒水叫我地再book過，原本都有諗再影都去番呢度，雖然話影得唔太好，但都唔係差嘅，我相信係攝影師嘅問題，不過經過呢番對話，我已經決定左唔會再去呢間喇！

計埋棟造型換衫影相餵奶等相同棟相，全程都係啱啱兩個鐘！我地真係好有效率！走果時老公都問我打算幾時再影過，佢話見响studio嘅閃光燈係咁閃，驚對Ambrose對眼唔係幾好，叫我唔好近期再影。咁我又覺得都叫影過吓造型相，貪得意啫，無所謂一定要好多先夠，所以都係諗住Ambrose一歲生日咁上下先再去影過喇！到時佢識企咁著自己衫影重好啦！