幼潛

原本我係好想記低Ambrose上每堂幼潛嘅情況，但係呢個媽咪實在太懶喇！頭一兩堂寫唔切，之後想寫時記憶又開始模糊，再過多 一兩 堂之後，就覺得一次過寫番哂好難，倒不如一次過寫番個總結罷啦！

其實十堂入面我地只係無上一堂，果堂重要係可以影相嘅添，好可惜！開頭上果兩堂我同爹爹都有輪流入房同Ambrose玩，原來大家都不期然對個姨姨無好感。我覺得佢好似好惡咁，無咩笑容，我有一堂唔記得帶手冊，佢已經燶面叫我下次一定要記住，攪到我之後去上堂都好大壓力，成日就係要自己記住本手冊！同之前上Dr Poon唔同，果度係好正面好多笑容不過就有少少混亂，可能我地上堂時bb重細啦，呢度就好似嚴格d，唔係只係玩咁！而爹爹就話覺得個姨姨有d不可一世咁，覺得你地d人個個仆黎上我地d堂，覺得自己好勁咁喎！

不過之後再上落去，我開始發覺雖然幼潛呢度好似唔同出面playgroup咁musical同玩吓hea吓居多，呢度真係上堂嘅地方，家長同bb一齊去學點玩遊戲去幫bb訓練大小肌同social skills等，姨姨教左玩咩遊戲之後，自己玩一陣，佢係會逐個埋去睇吓同糾正番，係幾有用，只係個姨姨cool一d，我覺得都接受到。同埋最唔同嘅係呢度如果玩玩具，或者有一d野好吸引bb嘅，姨姨唔會即刻俾bb得到，一定要佢地坐靚靚數十吓先得到，目的係訓練佢地耐性同專注力，如果出面嘅playgroup一定唔會咁！呢方面我都比較欣賞，雖然我都要花九牛二虎之力捉實Ambrose，要佢坐靚靚，要佢耐心等待，但過左兩三堂之後，佢都有時做到，我覺得係進步，亦都開始覺得雖然呢度感覺嚴格一d，但呢度係可以學習跟rules，其實係好嘅！

幼潛上到後期時我地發現Ambrose真係實在太鍾意掉野，好多時佢會摷哂佢書櫃嘅書同咭出黎散落一地，所有玩具倒哂出黎至安落，倒左出黎佢其實又唔係玩，只係要成地都係一片混亂佢先歡喜，我都不知幾煩惱點解佢要咁做！响好無助嘅情形下，有一堂落左堂之後我留响度問姨姨睇吓有無問題同點可以幫到改善，點知佢又出奇友善咁安慰我同教我方法，我覺得好好，因為呢度唔係真係收左你錢之後上堂玩吓hea吓就算，即使有我呢d課堂上無cover過嘅問題，我去問佢意見，佢都會理我同幫我，所謂親職教育，係真係教育家長點去培育小朋友，呢度就係一個咁嘅地方。呢一次傾談之後，雖然我好難實行佢教嘅方法，但有少少都可以做到，而Ambrose都仍然係掉野，但感覺比以前好像改善左少少！我對幼潛亦因此比較推祟！

課堂最後一堂係做評估，呢堂係可以影相，但我完全唔記得左！一入課室就見人人都揸住單鏡機，先醒起影相！重要呢一堂係可以父母兩人一齊入房同bb玩，都唔知點解我會唔知！重要一開始原來頒畢業證書，好慘，我無相機，爹爹又在樓下等位泊車，到Ambrose出去攞張證書時，都係其他家長幫我影相，而Ambrose人生第一次咁正式攞證書（之前Dr Poon都有證書不過係派嘅）爹爹竟然錯過左，我見勢色唔對都急call爹爹快d是但搵個位泊好車上黎，都係趕唔到！好彩影大合照都趕到，不過我地都無相機，真係嘥氣！

呢堂做評估係逐個逐個做嘅，所以未做時都係free play，同埋之前姨姨已叫我地預備咁多同學仔嘅小禮物比bb呢段時間逐個去送， social time，我就係成日都驚自己唔記得買同攞呢d小禮物，滿腦都係呢樣野而唔記得左可以影相呢樣野，俾爹爹怪責我咁無記性，激死人！

Ambrose第二個做評估，我開頭重以為坐埋去要聽姨姨叫做咩做俾佢地睇，睇吓識唔識，點知原來唔係，等我之前都好擔心Ambrose做唔做到，事關我自覺佢小肌肉比大肌肉係差d，一d細動作佢係重未做得好！原來個評估係個姨姨根據佢十堂嘅觀察對Ambrose有個總結，我估唔到班上有成八個bb，佢竟然都睇到Ambrose嘅野，重要係我自己都認同嘅，不由得令我對佢改觀！太濕碎嘅comment我又唔太記得，不過佢話遲d有份written report會收到，幾好！姨姨話佢大肌肉都ok，不過行都未係好穩，雖然我覺得Ambrose都係但我以為個個bb都係咁上下添，佢講出黎可能係未夠掛，佢有suggest我地多d同Ambrose去公園行石“駁”令佢嘅平衡感好d！之後佢提到Ambrose嘅專注力响呢個階段係好好，叫好突出添，其實都有少少“R”頭，我地一向都覺得Ambrose專注力麻麻，睇故事書成日又走左去，玩玩具又玩吓呢樣又攪吓果樣咁，呢d都叫有專注力咩？！不過姨姨同我地講呢個時候嘅bb要佢地坐定定一分鐘都幾難，佢話佢留意到Ambrose係真係可以專注聽佢講咩野，同埋雖然有時佢會自己行左去，但一陣之後佢又會自己返黎再聽。佢咁講之後我又再諗起上堂時Ambrose真係有聽姨姨講野，姨姨有玩具同野食話邊個想要就舉手，Ambrose通常係第一個；姨姨講野，雖然有時佢係會企起身，但佢唔會走出去攪。最重要係點名或者輪住出去玩或者攞玩具，Ambrose通常都係第一個舉手，但果時我發現姨姨唔係即時俾佢，有時重要俾左遲舉手嘅bb先俾佢，點名重係一堂比一堂後叫，但Ambrose都無野，會等無扭計。而家咁諗唔通姨姨就係覺得佢專注力好所以刻意遲d俾同點佢名？！真係唔知，不過聽到佢咁講都好開心，可能我地對佢要求高所以唔覺佢專注力好啦，咁如果以佢年紀黎講係好，咁我地都要調節番我地對佢嘅要求喇！哈哈！

上幼潛覺得幾好，我重同Ambrose報埋下期，抽中左，不過地點就要去到觀塘咁遠！