玫瑰疹

十二月五日，Ambrose上最後一堂幼潛，狀態同平日無大分別，上完堂後，因為有標位泊車，我地四圍行左一陣先返屋企。新買car seat固定在一個位上，回程時Ambrose係曬住瞓著左，我曾經都有猶豫佢咁樣會唔會好熱，但見佢又無出汗，摸佢又唔係好熱，諗住佢既然肯坐car seat又瞓著左，小小太陽都無咩所謂啦！

泊好車，爹爹抱Ambrose返屋企，覺得佢好熱，幫佢量體溫，發現Ambrose發燒！不過因為我覺得佢啱啱曬完有可能都係偏高，所以又隔左半個鐘同佢量，依然係發燒！真係好突然！見Ambrose瞓左，唔敢摷醒佢食藥，諗住貼左退熱貼等佢抖吓先再算！到黃昏時，呀姨同奶奶都返左黎，知道Ambrose重發緊燒，都係決定餵藥喇！

Ambrose呢一晚都瞓得唔係幾好，佢一直都無退過燒，體溫一直徘徊在三十九度中至四十度鬆d，係食左退燒藥頭一個鐘先會稍稍退到三十八度中尾，成晚都耐唔時幾聲喊，係無原無故，唔係甩左奶咀，攪到我地都無覺好瞓！

十二月六日，Ambrose重未退燒，見佢無其他病徵，食左幾次藥加貼埋退熱貼都唔退燒，加上一早起身見佢鼻孔有d乾左嘅鼻血痴住，再望吓佢張床單又有幾滴血，真係好擔心！而我星期六開始已經無原無故全身肌肉骨頭好痛，頭又痛，有d閃電嘅痛，平時只會係頭痛先會，而家係全身都係咁，見Ambrose發燒，唔知我地係咪感染左d咩不知名病毒，好驚！我請左日假，一齊同Ambrose去睇醫生喇！

醫生睇左一輪，話Ambrose喉嚨發炎令佢發燒，發燒高又會令佢流鼻血喎，都唔知係咪嘅！Ambrose都唔係好肯丫大口俾醫生睇，個醫生都係睇到一兩秒之後話佢喉嚨發炎，佢咁講咪咁聽囉！而我，因為我無感冒病徵，佢反問我呢幾日有無體力勞動過，真係俾佢激死，如果我有我周身痛都知咩原因啦，重走黎睇醫生咁白痴咩！佢都無咩結論，話可能係吽感冒喎，俾左d骨痛藥我！

返到屋企餵左藥俾Ambrose食，佢又瞓左！食左兩次，計埋之前果日嘅三次，即五次藥都退唔到燒！爹爹又要返夜，check左保險後，佢不斷交帶話有咩事唔好諗咁多送入醫院先，攪到我都好緊張！當時我就已經話既然入醫院好似係遲早嘅事（因為一直都無退燒跡象），不如趁佢未返工執定野即入，好過佢返左工得我同奶奶重難攪！當我地諗住入醫院執緊野嘅時候，奶奶就四出打電話問人，問完一輪後話Ambrose除左發燒其他都無問題，食得瞓得玩得，都叫精神，又叫我地唔好入醫院，再睇吓先！入唔入，入唔入，真係好難下決定！入又驚攪一餐又抽野驗又瞓唔慣會驚，好陰公；唔入又驚佢咁燒發唔知有咩野事。擾攘一排之後，都係覺得Ambrose都好精靈，估計有機會係出玫瑰疹，所以都係再睇多一日至算。呢一晚，爹爹返左工，得我睇住Ambrose，又係成晚無覺好瞓！

十二月七日，起身時Ambrose都重係發燒，同姨姨夾手夾腳餵左退燒藥就出門口返工喇！其實都幾唔想返工，Ambrose咁耐以黎第一次發燒咁耐都唔退，我當然想睇實佢啦，但工又一定要返，無法，唯有希望佢盡量瞓多d快d好番啦！下午時候打番屋企問Ambrose情形，原來早上退過燒，知道後都總算鬆一口氣。但當我放工返去時，Ambrose又再發燒，原本重期待佢退左燒之後會出玫瑰疹，點知重未燒完，一日唔出疹，一日都唔知佢係咪真係因為出疹而燒，好煩！

十二月八日，Ambrose半夜都已經退左燒，今朝由爹爹湊佢。中午時候爹爹打俾我話Ambrose好似出左少少粒粒，唔知係咪出疹，我即刻好肯定係啦，因為玫瑰疹特性係發燒，退左燒之後會出疹，Ambrose情況一樣呀！爹爹問使唔使睇醫生，我覺得無咩必要喇，既然燒都退左，疹都出左，其實真係無咩可以做。下午四點幾五點，爹爹再打俾我話Ambrose粒粒越黎越多，面又有，身又有，佢都係唔放心，要同佢睇醫生，都好嘅，俾醫生confirm一下安心d麻！醫生certified係玫瑰疹，話出疹期間盡量唔好出街，因為抵抗力會好弱，而且因為都有傳染性，都唔好去人多地方，通常黎講係只會傳俾同齡小朋友唔會俾大人，而大人應該都有抗體，所以唔驚喎！就係咁，Ambrose要閉關喇！

十二月九日，出疹越黎越多，成身成面都係！

十二月十日，面部嘅疹有d退喇，但肚同背都重有！

十二月十一日，我放假，但要同Ambrose閉關，爹爹返工，全日只得我一個人湊Ambrose，無得出街消磨時間，單對單湊足一日，都咪話唔辛苦！好彩係中午時份大哥陪媽咪過黎，可以幫手同Ambrose玩，我可以分身去煲蕃茄薯仔湯！玩完之後Ambrose大覺瞓，我又可以做吓自己野同休息吓！時間都叫易過！基本上見Ambrose身上都無哂疹喇，一心諗住明天星期日應該都可以出去啦，點知夜晚同佢沖涼時發覺大脾同小腿嘅疹都未退，唯有希望第二日瞓醒退埋先有機會出關喇！

十二月十二日，疹退哂喇！姑仔一家話去影燈飾同食buffet，幾經考慮，我地都決定出關，哈哈，不過黃昏時間出發，務求唔會吹太多風，叫去過吓街咁啦！Ambrose同我地食buffet真係幾抵，唔使錢，但佢又好鍾意食野，係咁要食，我地都俾佢試左好多唔同嘅野，不過佢最鍾意食始終係西瓜，係咁指住要食，一無哂就喊，好好笑！