2011年5月31日

今晚媽咪同Ambrose在家動手做手工呀！首先係膠水點點畫。媽咪將普通膠水加左d顏料，等d膠水有色吸引d，同埋可以清楚俾Ambrose睇到膠水在樽入面流動。媽咪俾Ambrose隨意在畫紙上點點點，出黎嘅效果都唔錯，顏色係淺左少少，無法啦，因為膠水本身係透明，色唔出，應該用白膠漿好d，不過媽咪又搵唔到有海棉頭出嘅白膠漿，唯有用住膠水玩吓先啦！點左一輪之後，媽咪就俾左之前Ambrose撕紙嘅紙碎佢痴上幅畫度，不過Ambrose對於咁樣痴野上去無咩興趣，可能佢都唔知做咩，哈哈，所以佢都係不停兩隻色點黎點去就算！

 

之後媽咪話整機械人（奶奶話係小露寶喎），媽咪之前將飲完嘅飲品紙盒洗乾淨吹乾，用膠紙封口，再用色紙包好，就成為左機械人個身。另外，再用紙條造左好幾條彈弓，呢d就係機械人嘅手腳。再買左活動眼睛，用包身剩餘嘅色紙剪半圓成為機械人嘅口。其實媽咪有諗過可以同Ambrose包盒嘅，不過又驚佢見到係飲品盒又會攪攪震，所以都係包左先好d！媽咪一攞d材料出黎話做手工，Ambrose已經好興奮同期待咁！當然呢個小手工，Ambrose主要都係幫手貼，唔係要佢做d咩高難度嘅野，可以俾佢覺得有成功感，有興趣下次又一齊做麻！果然，Ambrose對於貼野係有興趣嘅，當然啦，媽咪就係吼準佢呢期好鍾意玩貼子而為左迎合佢先會有呢個手工！見到Ambrose好努力去貼機械人手腳個樣，真係覺得媽咪之前一晚漏夜準備材料真係無白費心機呀！最估唔到係Ambrose竟然唔抗拒搽膠水，再用手攞起有膠水痴立立嘅咀痴上個機身度，媽咪以為佢一定會唔肯添！

  

整完機械人玩左一陣之後，媽咪攞出自製嘅相機俾Ambrose做裝飾。其實媽咪係用左一個唔要嘅細紙盒，size係Ambrose手形嘅四方盒，媽咪用色紙包好，在中間開孔望穿，在盒上用紙彈弓做左個制可以撳落去扮影相。Ambrose一見到嘅時候都覺得好得意，係咁攪個制，因為媽咪用太陽形狀嘅海棉貼子對貼做個制，佢就係咁講“伯伯”（即係太陽伯伯）！媽咪俾左好多海棉貼子俾Ambrose裝飾個相機，Ambrose都好有心機貼，原本平時佢搣海棉貼子都有少少難度，只係一時得一時唔得要媽咪幫手撕開少少俾佢繼續，今晚佢好努力，自己撕到好幾張自己貼上相機度，有時佢要媽咪幫手，媽咪都會同佢講再試吓，因為佢好叻，自己撕到，再俾心機就得架喇！最後Ambrose裝飾完相機，好開心咁攞起影媽咪！個樣好攪笑呀！

2011年5月29日

上完幼潛，無所事事，唔想行商場，又唔多願咁快返屋企，媽咪响最後一刻諗到要去圓方，一來果度泊車平，二來媽咪一直都想同Ambrose去圓方平台上嘅遊樂場見識見識，三來又諗住玩完行一陣都唔錯，呢度名店多呀，嘩哈哈！  

因為完全未去過，泊車又無特別就位泊，泊完車之後搵左一輪，再要問保安員先搵到個遊樂場。時值正午時份，Ambrose又正係要瞓覺嘅時間，見佢都有少少攰，見到遊樂場都無話好興奮咁！圓方嘅遊樂場都算大，幾個大型組合係適合唔同年紀小朋友玩，媽咪見最大嘅組合又繩網又捐黎捐去，都有衝動走去玩吓！大組合之外重有獨木橋，呢個都啱Ambrose玩，只係爹爹要在旁扶住以防萬一。另外就係搖搖車同搖搖板等，不過Ambrose興趣不大，次次都走上去一陣又走番落黎，唔係真係玩咁！最後有一個圓形踩單車先會轉嘅氹氹轉，Ambrose腳唔夠長踩，但爹爹都放Ambrose坐上去，不過Ambrose可能見有好多哥哥踩得好快，佢話驚驚呀！爹爹要哥哥踩慢d至得，玩左幾個圈，爹爹抱走Ambrose等哥哥們可以盡情狂踩，哈哈！  

玩左一個鐘左右，都係時候返屋企抖吓，媽咪諗住等Ambrose瞓吓再出發去沙灘或者樓下泳池玩吓水！  

不過Ambrose返到屋企唔瞓，攪左成個幾鐘都氹唔到瞓，結果又唔係好啱時間去沙灘，樓下泳池又無陽光到，爹爹驚水太凍，結果本來諗住好失望咁邊度都唔使去，最後決定去舅婆家食飯，順便去佢會所個室內泳池玩，yeah！  

六點鐘先至去游水，係有少少晏，不過夏天太陽未落山，個天都係光嘅，又係室內池，無所謂啦！Ambrose開初都有少少怕，爹爹媽咪落左水佢都唔敢落水，不過抱住佢玩左一陣之後就愛上左游水喇，玩到咯咯聲笑，成個泳池佢最嘈呀！佢重要想掙脫爹爹手，想自己扶住個水泡自己游添呀！不過因為個水泡穿左落個身同埋落左水之後原來都幾鬆吓，加上唔係bb池係大人池，爹爹當然唔俾佢自己游啦，下次出去bb池就得！玩左四十分鐘，又係時候返上去舅婆度整理吓食飯！舅婆好好人，幫爹爹同媽咪出左張住戶證，咁以後爹爹媽咪就可自己去游水同用會所設施，唔使下下打攪佢地喇！

幼潛三期 – 第六堂

今堂又係爹爹同Ambrose入課室上堂，媽咪行街街去，哈哈！  

今堂又玩番之前教嘅拉拉手，不過爹爹話Ambrose唔多ok，之後唔拉手，轉左搭膊頭，一樣唔多ok喎！睇黎真係要佢平時同我地同埋表姐們拉多d手搭多d膊頭至得喇！  

之後係自己篤檸檬水飲，呢個爹爹話好ok。Ambrose由拮檸檬入杯、倒水、用匙篤檸檬都係自己一手一腳攪掂，呢個遊戲啱哂而家咩都要自己做嘅Ambrose啦！姨姨首先要小朋友篤檸檬幾下試飲，之後篤多d再飲，話係要小朋友明白，篤得越多杯水越酸呢個因果關係喎！  

之後就係玩大波波，爹爹話個波重大過屋企個健身波，姨姨要小朋友瞓／坐在波上面碌前碌後碌左碌右，訓練平衡喎！呢個遊戲其實應該難唔到Ambrose，因為平時佢都好鍾意玩，完全無問題，不過唔知點解，爹爹話Ambrose呢個遊戲一般，唔知係咪個波大左，佢覺得驚d？定係呢度個環境佢唔鍾意呢？事關Ambrose好似係轉番黎呢度上堂之後就對大肌肉遊戲好抗拒，會唔會呢度令佢無安全感呢？

2011年5月28日

今日約左雅雯落公園玩，原先預住十點就去玩，點知Ambrose十點先起身，唯有食少少野就出門落公園玩。住左呢個屋苑幾年，真係唔知原來樓下平台有幾個遊樂場，重要係都幾啱Ambrose年紀玩。其實平時嘅Ambrose都唔係好鍾意玩，佢通常都係爬完唔slide，又會眼定定睇人地玩，有轉盤大珠就玩呢d，真係失卻左去公園玩嘅意義咁！不過今日嘅Ambrose又唔同左喎，唔知係咪有雅雯陪佢玩，佢竟然好投入同主動玩唔同嘅野，真係第一次見！第三個遊樂場嘅slide係氹氹轉，又要爬得好高，Ambrose都可以自己爬上去slide down，跟住又再爬上去slide，一連玩左幾十次先停，好利害呀！媽咪都未見過佢去遊樂場會玩同一樣野咁多次架！唔知係遊樂場吸引d定雅雯吸引d呢？！媽咪怱怱落樓都無點準備水俾Ambrose，求其倒左半杯就行，點知Ambrose可能玩得太慶起，佢竟然飲哂果半杯水都嫌唔夠，媽咪又係第一次見佢一次過飲咁多水，果然去公園玩對小朋友真係好好呀！玩左個幾鐘，媽咪同Wing姨姨都無哂力，見到正午時份，太陽猛烈，都係返屋企抖吓，Ambrose又肯拖住雅雯手一齊行，真係兩小無猜喇！不過到屋企樓下雅雯同Wing姨姨要走喇，Ambrose死拉我隻手唔肯入大堂，似乎好唔捨得雅雯咁，都要媽咪氹左一輪先肯返歸，唔通Ambrose開始需要朋輩，需要有自己嘅社交生活？  

返左屋企原本都諗住要Ambrose食埋粥玩一陣再瞓覺，如果一覺瞓兩三個鐘就perfect，時間啱啱好去上playgroup。不過如意算盤打唔響，Ambrose返左屋企飲左一包蘋果汁之後就開始有少少扭計，唔食粥要瞓覺呀！媽咪本身重“不”起左一碗粥攤凍俾佢食架麻，無啦啦要瞓覺，咁又要陪佢瞓喇！一等Ambrose瞓左，媽咪即叫外賣，好肚餓呀！Ambrose呢一覺只係瞓左一個鐘頭鬆d咋！媽咪只係夠時間食左個晏，執左少少野，又要全情投入陪Ambrose玩！  

媽咪見朝早同Ambrose著果對cros好似頂哂指，Ambrose跑左幾次都跌左幾次，所以媽咪諗對鞋仔應該唔著得喇，見無野好做，玩左一朝好攰，媽咪決定同Ambrose出去shopping買鞋兼返playgroup！  

今堂playgroup主題係Different kind of food around the world，生字有：Asia - dim sum & hot tea / America – french fries & coke / Africa – ham。  

上完堂又係時候返婆婆度食飯喇！

 

2011年5月27日

今日放工返黎見到Ambrose竟然可以自己攞起尋日買番黎嘅觸感玩具玩，真係好驚訝，尋日都重係驚到要側哂身避，今日已經好自在咁攞起黎玩，真係好神奇呀！  

食完飯，雅雯過左黎玩。Ambrose一如以往好似d猩猩咁又叫又跳好興奮咁款，真係唔明點解次次都係見到雅雯都會係咁！之前Ambrose好霸道唔俾人掂或者接近佢嘅玩具，今日佢又唔同左，可以同雅雯一齊彈琴，玩鎖板、插柱、輪住玩slide，又為左要雅雯一齊玩開口叫“雯”。今日嘅Ambrose又好似正常番，一切都好好，媽咪都無咁擔心佢唔知幾時整到雅雯！最好笑係我地要佢鍚鍚雅雯，佢竟然真係行埋去，嘟長個咀，見錫唔到竟然撳實雅雯塊面錫落去，笑死我地呀！雅雯要走時，Ambrose無送到門口，媽咪見到佢行左去個琴度背住度門，但對眼又莊過黎，好似好失落咁！

2011年5月26日

今日媽咪好urgent要睇個專科醫生，真係超難book，唔係識人幫媽咪攝期，真係下下都話等個幾月先有期，有事都死左喇！媽咪見反正都book左專科下午睇，醫生之前都有見議媽咪去做糖尿病檢查，只係媽咪一直未有時間去做，今日反正都係no paid sick leave，不如一次過做埋唔好浪費呢日假喇！  

同返工一樣咁早起身出門口去贊育二樓飲糖水，超眼瞓又無野好做咁坐左兩個鐘再抽血，真係好攰，果杯咁嘅糖水，原來唔係大肚婆飲都會好想反胃嘔番出黎，飲完果幾個鐘真係唔多好受，唉，重話每年都要驗一次，真係想死呀！姑娘話有事會收電話，無事一個月內收report喎！希望收report啦！  

驗完糖尿十一點半，行番落山搭叮叮過中環，趁住未係lunch hour，都係快d食埋野先再行！專科醫生book左三點十，呢個咁大嘅time gap真係唔知可以蒲去邊。媽咪只係諗住落佐敦行一間想行好耐嘅教具用品店，唔知一間店可唔可以消磨幾個鐘？！  

過到去佐敦，媽咪都來來回回搵果間店舖搵左好幾次都搵唔到，係要問大廈詢問處先知自己正身處果間店舖嘅大廈內，真係神奇，個名都唔啱嘅！哈哈！最終媽咪足足花左十五分鐘去搵呢間店舖，而呢間店舖又出乎媽咪想像中細！推門入去成間舖只有媽咪一個人，兩個sales好忙做編班嘅工作無理媽咪。密密麻麻嘅貨品放在貨架上，媽咪真係無咩心機咁樣睇野，又唔可以話亂，不過真係要摷咁樣囉！好彩媽咪怕自己唔記得想睇咩而抄低左，媽咪下下搵唔到嘅時候就去煩住個sale要佢攞俾媽咪睇！執吓執吓，今日响呢間店舖嘅戰利品有：sea life stencils、plastics eyedroppers、嘴唇形發聲器(用嘴吹會有聲)、art and crafts trays、畫筆、夾、觸感青蛙/豬/斑馬，媽咪超開心呀！好想買呢d野好耐架喇！  

買完野重好早添，媽咪諗起去太子行吓睇吓有咩要買定過新加坡。就係咁，媽咪又買左枝防鼻敏感殺菌嘅spray，諗住攞返公司噴吓會唔會好d！再買左bb牙刷同飲品，真係越買越多野！  

行到攰哂，又係好突然覺得無哂力，唔食野係支持唔到落去，即時入左間茶餐廳，歇斯底里地好想佢地快d有野食有野飲俾媽咪頂住先，真係唔明點解次次都係無啦啦會咁樣，一餓就去到極點，食遲一陣都覺得會死咁！食埋野去見醫生，攪得掂黎都五點鬆d，塞埋車返屋企，已經係六點幾喇！同平時放工相比都只係早左少少咁多咋！  

媽咪經過商場一間就快要結業嘅玩具店，忍唔住走入去行吓睇有咩平野買，最尾買左幾張貼子、貓貓雪櫃磁石貼、水泡同浮衣！一返到屋企就俾Ambrose試浮衣，似乎都啱身。再攞埋果d觸感玩具出黎，Ambrose超抗拒，哈哈！係咁避開好似好驚咁，個樣真係好幾攪笑！

 

2011年5月23日

今日未收工就收到爹爹電話，佢話聖彼德堂收左Ambrose waiting咋！媽咪真係好失望呀！雖然媽咪曾經對呢間同另一間學校難以取捨，知道waiting其實亦即表示Ambrose好大機會要讀另一間，媽咪唔使煩選邊間好，但係某程度上無得選又有點戚戚然！  

今晚收工同Ambrose玩插柱玩具，見Ambrose揸住木柱逐個孔試入，睇黎佢對大細粗幼未係好掌握到，可能係因為插柱有成十個咁多，相對難度亦高好多掛？！媽咪於是教Ambrose插啱柱嘅話用手去摸係無隙縫而且唔可以攪動，而如果插錯嘅話係相反，Ambrose似乎有所領悟，時不時都去摸去感受個孔同柱邊嘅關係。Ambrose玩完又玩，前前後後玩左半個鐘至捨得收埋。  

之後Ambrose話要砌puzzle，雖然幼潛姨姨話佢地呢個age最好玩直線分割嘅puzzle而唔係波浪分割，不過因為媽咪都無見過有得買，所以不了了之。Ambrose攞左果盒puzzle係動物主題嘅圖文配對puzzle，兩塊puzzle為之一pair，一塊係英文字，一塊係公仔，媽咪諗住Ambrose想玩就由得佢，當換個方法以玩嘅形式幫Ambrose認吓字都好。媽咪首先攞好一pair出黎，用手指住個英文字讀一次，再指住幅圖，示意Ambrose砌落去，估唔到Ambrose真係砌到，真係好意外呀！不過盒puzzle嘅字真係好深，媽咪有d見都未見過，讀都唔識讀，重有一幅圖係勁似reindeer，但竟然唔係，係其他野，真係勁深呀！睇黎媽咪自己都要查吓字典先可以再同Ambrose玩喇！  

玩完puzzle都重未夠鐘瞓覺，媽咪諗起第一期幼潛教過撕紙可以練手指靈活同手腕力量，媽咪決定攞d雜誌紙俾Ambrose撕，一來可以有機會郁多d對手，訓練小肌肉，二來撕出黎嘅紙可以收起下次做手工時用，一舉兩得！估唔到一直都無俾Ambrose撕紙，原來佢而家都似模似樣，可以控制得好好，揸實紙頭慢慢撕，成條長長紙條就咁撕到出黎，好叻！

幼潛三期 – 第五堂

今堂第一個遊戲係穿長通粉 / 飲管。雖然近期媽咪發覺Ambrose突然又肯玩穿動物木珠，不過唔玩得太耐，媽咪通常都係見好就收，佢一唔肯玩就收埋，等佢無咁唔鍾意。上幼潛已然係第三期，唔知點解每期上堂都一定有毛絨條穿通粉／飲管，證明呢個遊戲真係對小肌肉有好好嘅訓練效果。媽咪見到又係穿野時，都有d頭痛嘅感覺，因為唔知道Ambrose有無心情穿，如果無，媽咪又要對牛彈琴咁起勢氹，如果唔係坐定定响度唔做又有d異相咁！今次穿粉，其實又比之前一期教嘅有唔同要求，之前可能係將毛絨條對準到入孔就已經夠；再之後可能係真係入到孔就夠，唔使小朋友將粉推下；呢期嘅要求係入到孔之後，小朋友要推粉落條底，姨姨話家長可幫手揸住毛絨條一端等小朋友用手推粉落去易d。一開始姨姨派左通粉俾小朋友穿，Ambrose都肯穿，重要係差唔多穿滿哂一條，可以圍起在頸上，呢個時候助手姐姐攞左飲管粒黎換走d通粉，佢重將Ambrose穿好哂嘅通粉拉番哂出黎攞走，媽咪見到都覺得浪費哂Ambrose嘅心機呀！媽咪唯有再叫Ambrose穿飲管啦，點知今次佢唔肯穿喇，真係多得姐姐唔少，媽咪氹左一陣，最後媽咪話你唔穿咪無得戴上頸到靚靚囉，Ambrose聽到呢句之後突然又好積極穿番，原來呢個仔都好貪靚！Ambrose今次穿飲管重利害，唔知係咪媽咪在家教佢穿完要推珠落繩尾，佢竟然自己一手一腳穿好飲管推埋落毛絨條底，一粒到一粒，雙手雖然唔算好靈活，但手腳慢慢地都做到入孔放手捉住飲管同毛絨條推落再攞起毛絨條頭又入另一粒。Ambrose一粒接一粒穿，好快又穿好左，媽咪將毛絨條圍在Ambrose頸上綁個結就成為頸鏈，Ambrose係第一個完成頸鏈嘅小朋友，姨姨都讚佢叻呀！再睇吓其他小朋友，有d都未穿好，有d直情點氹都走左去無興趣入，原來Ambrose真係好叻，俾姐姐催毀左第一條都肯再穿過同埋咁快完成，媽咪真係好想鍚啖Ambrose呀！  

第二個遊戲，姨姨派小朋友兩枝絲帶棒，要小朋友揸住fing，但姨姨要求小朋友手肘唔屈曲，只轉動肩膀去fing絲帶棒，其實都幾難，因為小朋友見到絲帶棒就已經起勢fing，家長又好難捉實小朋友手肘唔俾佢屈埋，媽咪都係係咁易撳住少少就算。玩得一陣之後，姨姨開音樂要小朋友跟住做動作，大致其實都係向左向右，up and down，畫大圈圈細圈圈，主要都係大肢體郁動，Ambrose雖然無跟足同埋都有屈曲手肘，但似乎佢都幾有興趣玩，媽咪見絲帶棒似乎都唔係好難整，等媽咪遲d有時間又整番幾枝俾Ambrose練吓肩膀先！  

第三個遊戲就係勾圈圈。姨姨準備左兩桶水，水中有好多唔同玩具圈鎖匙串，姨姨要小朋友每次一人企一邊用一直勾，勾番d圈圈上黎放在毛巾上，每人每次限勾兩次就要輪到下一個小朋友玩。Ambrose玩呢個麻麻地，雖然佢都勾到圈圈上黎，但佢並唔係跟姨姨要求咁利用手腕轉動勾起同放低d圈圈，佢當左個勾係匙咁响d水度攪攪吓，咁點都勾到少少嘅，同埋放低d圈圈佢係用力fing甩囉，哈哈！睇黎手腕同肩膀都要好好訓練一下至得喇！呢個遊戲响屋企都唔難實行啫，等媽咪物色到相似嘅勾，又可以玩喇！

2011年5月21日

今日爹爹同事帶我地去配平眼鏡呀！早上十一點响碧堤會合，同事陪我地食早餐之後重帶我地入會所嘅playroom玩！Ambrose就開心啦，果度全部都係軟墊玩具，唔怕整親，佢左行行右行行，不知幾開心！Playroom入面有個小丑造型嘅大滑梯，原本Ambrose驚小丑，爹爹係咁氹佢上去slide，點知一slide就愛上左！條slide又長又滑，平時Ambrose玩親slide都會啜住唔係好“線”，呢條真係夠哂滑，夠哂刺激，可能係咁，佢愛上左，重自己爬上去再玩！哈哈！  

玩左一陣就出發去配眼鏡，同事之前一直都同我地講間野都幾“up dup”，但去到真係再比想像中重“up”，雖然如此，媽咪都好勁，在櫥窗選左同一牌子幾款鏡架出黎之後，一戴上就已經可以敲定要邊款，前後都無五分鐘，好快！到爹爹選鏡架，佢就無媽咪咁快喇，不過都係選左一陣又攪掂埋！媽咪驗眼時Ambrose帶住副黑超走入黎俾我睇，要我讚佢靚，不過又真係好型，副鏡係兒童黑超，真係好fit，不過成二百蚊，對於現階段嘅Ambrose黎講，真係可能戴唔夠一日就整爛，又或者新屎坑肯戴一陣就唔戴，所以即使又型又fit，媽咪都係無買俾Ambrose，等佢再大d先啦！最後媽咪再選多副黑超，即時戴走，媽咪要開始好好保護眼睛喇！三副眼鏡，分別係coach近視鏡，不知名變色近視鏡加Ray Ban太陽眼鏡，埋單只係二千一蚊，好抵！  

配完眼鏡行左一陣就返屋企，小休一下再出發上shining garden playgroup。今日主題係family，生字有：grand pa/ grand ma / daddy / mummy / baby / sister / brother。  

今日本來plan左去姑姐屋企bbq，不過二表姐發燒要休息，最後改左返良景韓國燒烤！

 

Moon Sand

世事嘅野真係好神奇，尋日先俾媽咪無心之下買左montessori插柱，今日媽咪lunch time行玩具街又俾媽咪見到一直想買俾Ambrose玩嘅moon sand！原本知道有呢種沙，都四出搵邊度有得買，不過香港似乎無再賣喇！媽咪連日上amazon睇，重諗左諗右好唔好訂番黎玩吓呢？點知今日俾媽咪見到又係一千零一盒，盒面殘舊，不過有膠包住，ok架，主題重係caslte，價錢又勁平，都係百幾蚊，真係開心到死呀！行過另一間，又係有一千零一盒moon sand，主題係仙子，媽咪無咩興趣，無買！返到公司又忍唔住上amazon望吓純訂沙大概幾錢，因為媽咪驚set裝入面d沙唔夠玩，但上網睇完又覺得點都唔夠香港平，所以收工時又走番去買番盒仙子，唔理佢啱唔啱心水，但求入面有多兩包唔同色嘅沙，哈哈！今日真係超開心呀！

2011年5月17日

今日收左工走左去大眾搵吓有無海棉棒，因為媽咪睇Ambrose嘅粗魯行為，之前買左果set海棉棒可能好快就玩完，一定要買定replacement先得呀！之前在三聯成日都見有得買，到真係要買時又無哂，好彩醒起大眾，果然俾媽咪搵到，哈哈！買完海棉棒又忍唔住走左過去反斗城，望吓有無特價貨，今日望落去個貨架都無咩特別，好少野，但响媽咪準備走嘅時候就見到有個勁殘舊嘅盒，望落係木玩具，媽咪攞上手一睇，原來係little montessorian嘅木圓插柱，媽咪望吓個價錢牌，$120唔係話好平，不過以montessori嘅玩具黎講，$120應該係荀價，一千零一盒，媽咪即時攞住行去俾錢！超開心！  

爹爹之前見到媽咪upload左Ambrose畫畫相上facebook，佢見今日放假，食完飯之後又撩Ambrose一齊畫畫，Ambrose梗係話好啦，早兩日畫完之後d工具洗好放左响廁所未收，佢就成日要媽咪同佢畫，今晚一聽見我話好，即時走入廁所攞野啦！  

不過媽咪有新idea，就係波子畫，媽咪諗住懶，唔整膠台布，玩波子畫應該唔使點舖地麻！首先準備一個大膠箱，入面放一張畫紙，另外一個容器裝顏料，媽咪將十粒波子放入容器內，令到每粒波子都醮到顏料，再俾隻匙Ambrose，要佢逐粒波子“不”出黎放入大膠箱內，一來係準備作波子畫，二來又可多個玩法要佢“不”波子練吓手力！不過Ambrose“不”左幾粒之後，開始不顧一切，就咁用手執起放入個箱度，真係好心急！放好哂之後，媽咪教Ambrose兩手攞住個膠箱搖，向上向下向左向右同埋打圈，d波子係會隨住滾動而畫出唔同線條，Ambrose玩得不亦樂乎，可能覺得好得意，咁都畫都畫！不過媽咪覺得個箱唔大，其實可少放一半波子，咁樣滾動出黎嘅線條唔會咁多，真係要花d時間去搖先靚，而家十粒太多，成幅晝都滿哂咁，唔係媽咪心目中嘅野囉！奈何Ambrose唔俾媽咪攞走d波子，咁就由佢啦，下次媽咪攞少d至得喇！  

玩到咁上下，Ambrose自己話唔玩，主動收拾波子，媽咪見顏料已開，唔玩波子畫顏料又要倒真係浪費，所以最後响無舖膠台布情形下俾左畫紙Ambrose畫畫喇！Ambrose手指指要媽咪開哂唔同顏色俾佢畫，不過因為有著之前畫畫嘅經驗，開哂咁多隻色落色碟度，Ambrose都係左叉右叉撈亂哂d顏色，油出黎都唔係原本分明嘅色調，所以媽咪今日唔再開其他顏色出黎，玩完開左果d就算喇！Ambrose對於手手腳腳都有濃烈興趣，由玩神奇畫板都要畫手同畫腳，到而家玩水彩都要印手掌！Ambrose經過上次玩完嘅經驗，佢今晚已經二話不說攞起海棉棒點顏料塗响自己手掌，再自己印落畫紙度，好enjoy！爹爹忽發奇想，叫Ambrose一隻腳放入個顏料盒度，再印上畫紙，小腳掌又出埋黎！Ambrose玩左一次之後發覺腳掌又印得，又係用海棉棒點色塗腳，不過佢要抆隻腳掌上黎，又要揸住枝棒點色同塗，真係有少少協調唔到，都係媽咪出手幫Ambrose塗腳俾佢自己印！玩完哂d顏料，媽咪話要bye bye畫畫，下次再玩過喇，Ambrose依依不捨望住，爹爹抱起佢去洗手洗腳，今晚嘅Ambrose畫室又告一段落喇！今次Ambrose已經無上次咁緊張，佢一身都係顏色都無再嘈要媽咪同佢清理，同埋竟然唔係坐定定，佢肯行呀！不過就大件事喇，因為今晚媽咪懶無舖膠台布，諗住佢唔會點郁無所謂，重要今晚腳掌都玩埋，哈哈！一地都係顏色呀！

2011年5月15日

今日上完幼潛之後，爹爹媽咪同Ambrose就直去探心悠bb同Gigi姨姨！媽咪好耐都無見過Gigi姨姨喇，佢大緊肚時約過媽咪幾次見面都見唔成，Gigi姨姨係媽咪結婚時嘅姊妹，媽咪真係遺憾無見到Gigi姨姨大肚個樣呀！  

可能好耐都無見過初生bb，媽咪覺得好得意呀，細細粒咁，媽咪都開始唔係好記得Ambrose初生時係有幾大粒喇！Ambrose唔知點解無咩點瞓過去到陌生人屋企都好自在，又跳又叫好開心咁！當媽咪行入房睇心悠時，佢又要入埋去睇，媽咪見到Ambrose望住心悠，真係一臉好奇，唔知點解媽咪覺得Ambrose知道果個係bb，佢識得細細聲唔出聲唔好嘈！之後媽咪叫Ambrose同心悠shake hand，Ambrose都識得細細力，真係好可愛好乖呀！唯一係佢今日唔知點解對包裝檸檬茶好有興趣咁，又要幫手派俾人，又要拎上手玩，最慘係佢掉扁左一盒，真係一個頑皮仔！  

可能心悠唔慣有咁多人睇住佢食奶所以唔係好肯食，攪到Gigi姨姨要企起身餵奶先得，雖然坐左一陣有d唔捨得，但爹爹晏少少又要返通宵更，媽咪都係話走先喇！  

返到屋企，爹爹要眠一眠再出門返工，媽咪開始唔知同Ambrose玩咩好，重有成晚流流長都係自己一個人湊仔，Ambrose又無窮精力，真係要諗d野出黎玩耐d至得，唔係d時間唔知點過！  

媽咪之前已經買好哂廣告彩、畫筆、大印、顏色碟、海棉棒同手工衣，成日諗住同Ambrose畫畫，今日見無咩好做，材料又ready，媽咪就的起心肝試吓一個人同Ambrose畫大作，真係一大挑戰！首先媽咪在地上貼左一張大膠台布，再將唔同顏料唧落顏色碟加水開稀，在地下再舖一張大畫紙，Ambrose見到媽咪整呢樣整果樣都好有耐心等，只係有少少多手攪卷膠紙！一切準備好，媽咪幫Ambrose著上手工衣，再俾左海棉棒Ambrose玩點點晝，不過唔知點解d顏料唔知使唔使溝開，因為媽咪發覺海棉棒點點畫都幾濕，完全唔係媽咪想要嘅野！  

玩左一陣，Ambrose見有大印，又攞黎玩，不過因為媽咪其實無買stamp pad，要玩大印就要用海棉棒或畫筆點顏料塗在個印度先印到，Ambrose似乎未係好掌握到，都係媽咪出手幫佢塗，再叫佢自己印！玩完印又到畫筆，媽咪又係覺得畫筆畫出黎效果麻麻，唔知係咪因為係平頭畫筆，Ambrose唔可以好smooth咁掃畫，好多時畫一筆，落筆果下就有色，一拖過去就開始無色，唔靚，不過第一次俾Ambrose接觸畫畫，無所謂啦！  

其實Ambrose一路玩，對手一路都整到有顏色，開頭佢一見到時，成日都伸對手出黎想我同佢清理番，媽咪同佢講，畫畫係咁架喇，一係自己小心d唔好整到，一係就玩完一次過媽咪同佢洗，佢似明非明咁應完媽咪，轉過頭整到又係伸對手俾我，媽咪話而家洗手即係唔玩，收野架喎，一陣間玩完媽咪先洗番啦，講左幾次之後，Ambrose終於都無要我同佢洗手喇！佢重攪笑到自己攞住枝海棉棒索左色，响自己對腳印印印，攪到一手一腳都係顏色，好污糟呀！媽咪見到其實又覺得幾開心喎，因為媽咪刻意唔同Ambrose抺手其實都係想佢接觸多d唔同嘅野，唔好吓吓有少少污糟就好抗拒，結果媽咪無估錯，Ambrose真係要媽咪幫佢抺手，只係媽咪估唔到Ambrose似乎都幾鍾意畫畫，所以氹左一陣佢都開始唔介意到自己整污糟埋對腳！總算係一個好開始丫！不過Ambrose始終都唔係太自在，玩左個幾鐘頭，佢係一直坐响同一個位，半步都無郁過架，哈哈！似乎要玩多d至得喇！  

同Ambrose畫左四幅畫，又印埋手印，Ambrose又叫媽咪一齊印手，媽咪一於括出去奉陪到底，哈哈！玩到成七點，媽咪已經好肚餓，見Ambrose咁污糟，一定要同佢沖涼先，所以快手執埋d野同Ambrose講下次再玩喇！Ambrose依依不捨咁跟媽咪入廁所沖涼，媽咪一開水就發覺d廣告彩果然係washable，真係一洗就甩，好易洗呀！貴d真係貴d，呢d錢真係唔慳得呀！沖完涼重要出去善後，好彩嘅係Ambrose由頭到尾都係坐同一個位無郁過，媽咪撕走張膠台布之後地板其實只有少量顏料，濕布一抺就乾淨哂，原來畫畫都可以咁乾淨，媽咪即時愛上左呢個親子活動呀！又可消磨多d時間，又俾到Ambrose接觸唔同畫畫工具，唔同工具畫出黎嘅效果，又train到佢對手掂顏料都唔怕，同時可以啟發佢創意，培養佢呢方面嘅興趣，真係一舉幾得！  

沖完涼食埋粥，媽咪都叫左外賣晚餐，食埋野都只係八點半，見重未瞓得覺，媽咪又帶左Ambrose落惠康行吓，點知竟然俾媽咪買到超特價嘅學習褲，雖然一個人湊住Ambrose又要買埋d咁重嘅野，不過真係好抵，唔買真係對唔住自己！買左d車厘子俾Ambrose，即刻又返屋企開餐！無驚無險，又到瞓覺時間，Ambrose乖乖無蝦媽咪，好快瞓左覺，媽咪終於可以抖吓喇！

幼潛三期 – 第四堂

今堂爹爹話同Ambrose上幼潛，雖然媽咪有少少唔放心，好想親自上堂，睇吓姨姨教咩遊戲，等媽咪學左有時都可以响屋企同Ambrose玩，不過爹爹其實唔係成日放假同到我地一齊，又未必一定有車位泊到車，變左佢一定要留在車上等我地，所以見今日咁難得有假又有位，媽咪都係自我放鬆吓，行吓街入吓標等爹爹同Ambrose放學喇！  

十一點鐘嘅加連威老道其實無咩好行，因為好多店舖都未開門，原本諗住行吓龍城，睇吓有咩啱買去新加坡用，不過一行埋去已然發現門外已經企滿坐滿一堆人，又行季又大袋咁响度執貨，龍城入面人頭湧湧，全部都係大陸自由行，媽咪見到完全無動力入去同人迫，唯有行遠少少去卓悅行吓，買左包尿片，放上車嘅時侯，媽咪都係快手快腳唔敢太慢，驚d人以為我開車走會駛埋黎等！無驚無險，擺低左又行吓cotton on，買左條連身裙同連身吊帶裙褲，今次媽咪見得兩件衫咁輕，都係費時又擺返上車，行去入埋標，直接上課室門外接放學！  

爹爹同Ambrose放學出黎，媽咪只係問爹爹今日Ambrose上堂有無d咩特別唔肯玩，點知爹爹已經好急不及待想講番教左d咩遊戲俾媽咪聽，佢話驚唔記得左喎，哈哈！  

第一個遊戲係用手推動一個大滾筒，要小朋友用手推前個滾筒但唔好連埋個人都跟埋個滾筒碌前，要小朋友用手控制滾筒前後，爹爹話Ambrose可以做到。之後就係要小朋友捐入個大滾筒入面，家長用手慢慢推動個滾筒，爹爹話Ambrose半推半就試左一次，想佢再玩第二次都唔肯，佢重話好多小朋友都麻麻地呢個遊戲，就連d家長都退到好後，唔係幾想俾小朋友試，梗係啦，媽咪諗落去真係好危險咁，雖然有家長一齊玩，但個情形就好似叫個小朋友入個洗衣機嘅滾筒度開機攪喎，重係要自己用手攪自己個小朋友，有邊個家長夠膽丫，唔驚自己唔小心整到小朋友咩？！不過媽咪聽到今次Ambrose都試左一次先唔肯再試，覺得佢都有進步，比起之前果幾堂睇完示範死都唔肯試，已經好好多喇！爹爹話呢個遊戲係訓練小朋友平衡，鬆手肘嘅能力喎！最好笑係姨姨問各位家長鬆手肘嘅能力响生活中幾時會用到，無人識，姨姨話搭lift好多人要迫入lift果陣會用到喎，真係“啤”一聲！哈哈！不過媽咪都明白小朋友呢個年紀要做到鬆手肘呢d動作時並唔係好似我地大人想像中咁易，佢地真係可能郁兩郁咁大動作就會企唔穩，媽咪好理解，不過實行就有困難喇！  

之後就係教拉手歌，不過爹爹完全學唔識點唱番俾媽咪聽，我都明嘅，幼潛d歌係中文，旋律不嬲都係麻麻地好聽，又係好難唱 一兩 次就記到嘅！爹爹話唱拉手歌都要小朋友亙相拉手，不過佢話Ambrose抗拒同其他人拉手，就連同爹爹拉手都唔肯！姨姨話拉手遊戲係社交訓練黎，小朋友唔願意掂到其他人，對於將來要返學時排隊拖手一齊上堂係有影響，小朋友可能會有社交障礙，所以要多d同小朋友拉手等佢地習慣喎！  

再之後，姨姨將一d藍莓同餅餅唧滿cream，等小朋友要用手在cream度摷番野食出黎食，爹爹話Ambrose都肯摷，只係唔知點解佢只摷藍莓唔摷餅乾！姨姨話呢個遊戲同拉手遊戲都係有差唔多功能，都係睇小朋友肯唔肯掂唔同質感嘅野，當然肯掂同唔抗拒係最好啦又係！  

爹爹話上完呢堂之後都覺得Ambrose唔願意同人有身體接觸，所以佢話要記實姨姨講過嘅野話番俾媽咪知，佢覺得好重要呀！媽咪聽到再諗起之前同Ambrose去沙灘同埋玩大粒西米，Ambrose都唔係太鍾意，再一次又令媽咪擔心Ambrose會唔會感覺統合有問題呢？唔願意掂唔到質感嘅野，唔願意俾人掂到，其實好似睇落唔係好大件事，不過再諗如果一直都係咁，第日返學點呢？會唔會因為咁而被孤立呢？媽咪真係要好好諗吓有咩野可以幫到Ambrose至得喇！

2011年5月14日

今日一早爹爹媽咪同Ambrose去聖公會青山聖彼德堂幼稚園面試，呢次面試媽咪真係等左好耐！因為通常幼稚園都係九月十月開始收表，但係呢間要夠十八個月先肯收，又分左月份進行面試，Ambrose八月出世就要等到五月先有得見，真係全區最遲嘅一間。爹爹媽咪對於呢間學校都好有興趣，加上表姐們又係讀呢度，點都有個照應。不過呢間收學生收到八月為止，即係話Ambrose係細仔，都係抆車邊夠月齡去見咋！所以雖然心儀呢間，媽咪之前已經報左幾間以防萬一！  

今日九點面試，爹爹媽咪早左出門，去到學校reception都未ready，不過有老師見我地入左黎都好有禮貌招呼我地，等左一陣就有老師叫我地入房開始面試！不過其實見完之後，媽咪唔覺得係面試，除左一開始老師有問Ambrose叫咩名之外，所有野都唔似係考佢咁！當然Ambrose係連名都唔識講，無答老師啦，佢個金口，真係好難撬開！不過Ambrose都算好合作，老師同佢玩lego，佢又同老師玩，老師要佢俾野俾唔同嘅人，佢有照做，即使係要佢俾佢至愛嘅動物 公仔俾 老師，佢都無拒絕，真係好乖！之 後 老師同佢玩個有釘嘅木柱，要佢攞番d板塊出黎，雖然佢之前都未玩過呢d野，而且難度都幾高，但Ambrose都做到，佢攞哂出黎之後見隔離有一條柱重有板塊，佢想攞埋出黎，不過媽咪同Ambrose講果幾塊係鎖左响度攞唔出，老師都唔使佢攞架！玩左一輪，其實真係無咩問我地野，只係問Ambrose有無咩特別敏感，媽咪真係唔知點答，因為Ambrose細個有少少蛋敏感，媽咪一直都無俾蛋Ambrose食，係最近諗住就黎返學，加上會去旅行，至同佢又試吓，不過又無正式一連食幾日，所以未試真！媽咪某個程度上唔太想講，因為細仔已經係蝕左架喇，如果加埋有敏感，唔知學校點諗，俾著自己都收個唔使take risk同take extra care嘅學生啦，但唔講又驚真係收左第日返學就麻煩，真係矛盾！  

玩到咁上下，老師話因為上午班學位緊，問我地會唔會考慮下午班，媽咪無直接答老師好定唔好，只係話Ambrose係個好早起身，好準時有規律嘅小朋友，每日都會七點起身，下午要瞓晏覺，所以媽咪唔想俾佢讀下午班，驚好難適應。事後爹爹同媽咪講，話媽咪咁樣答好好，又無拒絕但又擺明話唔好，哈哈！  

最 後 老師送左一個搖鈴俾Ambrose作結，Ambrose呢個時候終於肯開口同老師講謝謝，算佢啦！老師有comment話Ambrose專注力幾好，媽咪反問點解咁講，老師話Ambrose全程好乖好定坐响度無行開過，要佢做嘅野佢有聽有去做，雖然佢未識講野，但明顯明白全部意思，佢話唔係個個小朋友都可以係咁定，媽咪聽到當然好開心啦！不過面試前後都無十分鐘，又見老師唔係特別要考Ambrose，媽咪感覺學校唔會收Ambrose囉！懷住緊張嘅心情去，又懷住不安嘅心情走！點都好啦，都叫見左，收唔收真係聽天由命喇！  

面試完，爹爹送Ambrose返屋企，再同媽咪接婆婆覆診，時間真係好緊湊！  

今日原本以為覆診都好快走得，但因為婆婆同醫生講隻眼好似多左閃光，醫生話為左安全計都係要滴眼水放大瞳孔照眼底，就係咁，原先個幾鐘可以走得，變成三個鐘先走得！可憐爹爹要一個人行街打發時間等我地，媽咪又凍又餓又急尿唔敢行開，真係慘！  

覆診完，爹爹媽咪同婆婆上左新世紀食午飯，因為媽咪想話去mothercare睇吓potty，想買個細細地嘅potty俾Ambrose自己可以自行如廁，不過最後媽咪都睇唔啱！食完午飯，又係時候送婆婆返屋企，爹爹媽咪返到屋企小休一陣，又要出發同Ambrose返shining garden playgroup喇！  

今堂主題係oven food，生字有： bread / chicken / pizza / cookies / ham。  

上完堂，去左吉之島，會合埋姑姐同表姐們，買埋壽司回家，三個小朋友又可以聚埋一齊玩，真係好開心！

大澳遊

是日同姑姐一家齊齊搭船去大澳行吓，來回程Ambrose都係上船無耐就瞓左，好乖！不過今日真係超曬，媽咪無咩準備，只係同自己同Ambrose搽防曬搽左兩次，重要只係搽面，點知d太陽真係唔覺唔覺，媽咪後頸位曬到紅哂，回程時開始痛添呀，真係唔好睇少太陽嘅威力，好彩Ambrose對手仔都係少少紅，唔似媽咪後頸好似burn左咁，下次出戶外玩，都係唔理三七二十一，一定要搽哂防曬至得！  

今日我地臨走時先搭船仔出海睇海豚，不過真係失望，一條都睇唔到呀！不過坐船仔出海兜左個圈，算係睇過吓大澳d景同建响水上面嘅屋，都叫到此一遊！  

整體上今日都玩得好開心，行吓睇吓野食吓野，幾個細路一齊外遊，去邊都開心！屯門去大澳真係幾方便，有時間無咩野好做，都可以再去過，想同Ambrose睇海豚呀！

大粒西米

今日爹爹竟然買哂材料整南瓜西米露，好耐都無食過喇！哈哈！真係有d驚喜！  

媽咪見爹爹發緊大粒西米，突然又諗起之前果期幼潛姨姨有同我地玩大粒西米，靈機一觸要爹爹撈起少少西米，等食完飯同Ambrose玩吓，睇吓佢過左一排，再掂呢d痴立立嘅西米又會有咩反應。  

不過因為媽咪發現爹爹發西米時都發左一排，撈上黎嘅西米無上次上堂時果d勁痴手，就連媽咪上堂玩果時都好難先整得走哂，今次無上次咁痴手，難度就低番少少，都好丫！首先大表姐一d問題都無，因為西米用左最大粒果隻，佢重張西米痴落耳珠度扮耳環；二表姐比較抗拒，整唔走就係咁叫人幫佢，平時已經係眼淚汪汪嘅雙眼，就更加覺得佢好可憐好想喊，唯有快快同佢整走d西米啦；Ambrose呢，一放上手佢都有皺眉，但又未至於勁唔鍾意，媽咪叫佢試吓自己整甩西米，佢又好俾心機整走，一粒一粒慢慢搣走痴番上台，媽咪見Ambrose好似都唔太抗拒，趁佢一路搣走西米又同時痴番d西米上佢手，攪到Ambrose搣極都重有，玩左一陣佢終於都發脾氣，當然媽咪要見好即收，幫佢搣埋餘下果d，再同佢洗手啦！  

媽咪覺得Ambrose都算有少少進步，上次佢玩左一陣頂唔順就喊，今次都無，所以媽咪諗住要耐唔時同佢玩多d觸感遊戲至得，要訓練佢接觸多d唔同質感嘅野，唔好怕左驚左至得！

第一次去沙灘

今日爹爹朝早放工後無瞓覺就同我地出去上幼潛，媽咪諗住同Ambrose上完幼潛就返屋企大家都抖吓晏d再去沙灘玩，點知可能表姐响度，兩隻野都唔願瞓，可憐媽咪想瞓都無得瞓呀！終於忍唔住，四點鐘，爹爹起身話出發喇！執埋野出發去黃金沙灘！

滿心歡喜帶埋之前買左嘅沙灘玩具同泡泡水同Ambrose玩，點知爹爹除左Ambrose對鞋將佢放在沙灘上果刻開始，佢成個人硬哂，雙手手指張開，唔肯行唔肯郁，皺哂眉咁，又係咁指住對腳d沙，想要人撥走佢！無辦法之下都係由爹爹抱住佢，搵到個位置舖好膠布沙灘蓆之後，想話放Ambrose落地坐，佢死都唔肯咁，唯有將沙灘玩具有個隔放在沙上面再放Ambrose去坐，先勉強ok！不過Ambrose坐落左之後都唔郁，同埋又係咁示意腳上有沙，雙手手指繼續張開，真係好似好緊張咁，全程無笑容！媽咪唯有叫Ambrose吹泡泡緩和情緒，之後就嚐試俾沙灘玩具“不”沙！哈哈！呢個Ambrose真係對沙無好感，佢揸住個剷“不”沙，但佢係揸到好高，而且另一隻手係唔攞模架，要媽咪揸住佢先“不”沙落去，以防有沙走上手度！之後佢又好似無咩興趣咁，反而對個水壺都肯玩吓攪吓，點知，佢自己玩玩吓唔小心一倒，倒哂d水落自己條褲度，登時大喊！真係好可憐咁！

媽咪見佢一d都唔enjoy，唯有俾佢食野啦，一如佢性格，食野真係好緊要，一聽到有野食就停左唔喊，重要催住媽咪快d俾佢食！今日Ambrose破例食蛋，似乎佢對蛋黃麻麻地，係蛋白就有興趣d喎！雖然話食野係大過天，Ambrose食住野對手都仍然係張開同硬哂咁，一直都無鬆懈過！今日Ambrose有另一個第一次，就係第一次食雪糕喇！雖然之前去長隆時媽咪有俾過 一兩 啖超細啖雪糕佢食，不過真係好少，今日佢自己揸住杯雪糕食，津津有味咁款，可惜食食吓跌左落沙度無得食喇！

六點幾，係時候走喇，同Ambrose除左條褲仔，著番對鞋仔，企响沙上嘅Ambrose先稍為輕鬆少少，又fing手又“啦啦啦”唱歌，可能下次都係唔好同佢除鞋住會好d啦！今日Ambrose可能真係處於緊張狀態好耐，佢今日八點幾就响坐車途中瞓左，即使係抱佢落車行返屋企都整唔醒佢，真係罕有呀！

媽咪有d擔心，以前Ambrose上幼潛赤腳行唔同質感地墊係一d都無問題，呢排見佢好多野都驚，今日去沙灘又係好唔鍾意咁，再回想平時食飯，一有飯痴响手就要人同佢整走，總之有野痴响皮膚上佢就唔多ok，除左貼子之外，媽咪之前睇過有研究話剖腹生嘅bb缺乏左產道嘅擠壓刺激，可能會對於日後有唔同程度嘅感覺統合問題。Ambrose又係剖腹生嘅，媽咪覺得佢又真係對於皮膚觸感刺激特別抗拒，細個時已經唔俾人同佢抺口腔，由細到大同佢抺面好似打仗咁，攬佢（唔係抱）耐少少都會推開人，唔通佢真係對於觸感特別抗拒？媽咪要搵吓資料研究吓至得喇！

幼潛三期 – 第三堂

今日媽咪又唔記得左幼潛第三堂係可以爹爹同媽咪可以一齊入課室上堂同影相呀！當媽咪一入課室嘅時候，真係想大叫，又唔記得左喇！今日適逢帶埋表姐出黎，就算爹爹有位泊車都唔可以帶埋表姐一齊上堂啦，媽咪真係失策呀！唯有用電話係咁易影低Ambrose上堂情形啦，不過都好難架，Ambrose成日坐住媽咪大脾，媽咪最多都只係影到佢側面，又要兼顧上堂，最尾媽咪都係放棄左專心上堂玩遊戲算喇！

今堂第一個遊戲係每人派一塊鏡，家長要小朋友對鏡指出眼耳口鼻所在，之後教小朋友對住塊鏡伸條脷出黎，之後姨姨派左少少果醬俾家長，要家長用棉棒搽在小朋友嘴邊，要小朋友伸脷嚐試去舔番d果醬。姨姨話呢個遊戲係令小朋友多d郁動條脷，對於口肌同脷嘅伸展擺放都可以訓練到，而脷嘅郁動係對發音有好大幫助。姨姨話有d小朋友發唔到某d音，可能就係平時少郁脷，唔識得擺位喎，所以舔呢個動作係幫到小朋友多郁脷，家長可以試搽唔同位置等小朋友去舔，玩熟左就可以再搽遠少少增加難度。呢個遊戲雖然媽咪都未同過Ambrose玩過，不過就一直都知可以咁玩去幫小朋友講野，今日上堂同Ambrose玩，佢又ok喎，不過媽咪發覺原來Ambrose條脷係好圓架，伸左出黎同個嘴形一樣，睇黎佢都係遺傳到媽咪不善辭令嘅缺點喇！

之後姨姨派左一個盤，入面有兩件物件同果件物件嘅相片，首先家長要攞住物件同相片教小朋友“一樣”，之後就係家長攞住相片要小朋友攞出該物件出黎。其實對於Ambrose黎講呢個遊戲係無難度，佢都唔使諗就做到，媽咪就諗緊點解好似咁簡單。Ambrose平時响屋企玩影子咭，揸住個圖像去搵番佢個影出黎都得，更何況只係攞住張相搵一樣嘅物件？！Ambrose極快玩完之後就係咁望住人地果d，想要同人交換玩，好啦，俾佢換到之後，因為一個盤得兩件物件，佢又係好快咁玩完，又係咁望人地果份，但同學仔又未玩完，Ambrose一路用隻手推自己果份俾人，又想用手去攞同學仔果份，真係服左佢，姨姨見到就同佢再換多一次，玩埋就等埋其他同學仔完成就clean up喇！姨姨話呢個遊戲係教小朋友“一樣”嘅概念，唔係平面同平面嘅一樣，而係平面同立體嘅概念，而且“一樣”概念係會再發展到類似一樣概念，佢問家長知唔知平時有d咩係一樣或者係類似一樣嘅概念？媽咪真係諗到頭大都唔知，姨姨話將來返學讀書寫字，小朋友要由黑板上抄文字，就會用到呢d概念喎，真係唔講唔知，哈哈！

之後姨姨攞左架滑板車出黎，又攞左隻樹熊公仔出黎示範，原來呢個遊戲係要小朋友盤膝坐在滑板車上，雙手按在板上，姨姨同助手姐姐一人在一端，家長在兩人中間，姨姨負責推滑板車過對面嘅姐姐度，而家長在中間用手兜住以防小朋友中途失平衡跌落黎。Ambrose睇完之後就已經拍心口話驚喇！姨姨叫小朋友想玩嘅就出去坐上去，媽咪見到有唔少小朋友有興趣去玩，亦有八掛要行出去睇但又唔係玩嘅，亦有好似Ambrose一樣唔想玩，不過都係得一個小女孩囉！而Ambrose應該係全場最細膽嘅一個，佢唔單上拍心口，重擰哂頭，重要人人都忍唔住行出去睇，佢一步都唔郁，成個人捱住媽咪度，媽咪都知要佢玩應該好難喇，都有不斷氹佢試，佢都唔肯！直到全班都試哂，姨姨就話唔玩不如出黎推樹熊玩啦，另一個唔肯玩嘅小女孩終於都行左出去推，但到Ambrose時佢死都唔去，又拍心口又擰頭，媽咪真係唔明佢點解成日都驚，重係呢排先開始，但媽咪都唔敢勉強佢喇！呢個遊戲主要係訓練小朋友平衡力喎！

排隊攞手冊時，姨姨同媽咪講要媽咪平日試吓將Ambrose放上碌碌椅上等佢坐穩就推，不過媽咪話佢平時在家都有玩過吓，唔知點解黎到呢度又唔玩！媽咪見Ambrose近排成日拍心口話驚，忍唔住問吓姨姨有咩睇法，姨姨話小朋友可能係聽到某d聲嚇親，又或者有d低頻聲令佢地驚，有d野可以好突然喎，而平時唔驚，無啦啦而家又驚，即好似有d小朋友之前識自己vivi但突然一日開始又唔得，佢話呢d都係倒退行為，係要一段時間先無事喎！其實媽咪重想問多少少，不過下堂嘅家長同小朋友又已經陸續到左，真係有d唔方便，都係等媽咪再觀察吓至再問喇！

Shining Garden –Little Learner (第十堂)

今堂開始Ambrose返shining garden playgroup轉到去星期六嘅五點鐘，比起之前嘅三點九，時間係好用d，起碼有時爹爹放假想去吓街，都唔使閘住左要三點九趕返去返學，真係唔可以去得邊，加上Ambrose三點九呢d時間係瞓覺時間，次次要叫醒抱醒佢去返學，去到又吽哂咁，真係唔係幾好，所以媽咪都係同佢wait五點鐘呢堂，等大家都唔使太辛苦！  

今日playgroup主題係母親節，真係唔講唔覺原來明天已經係母親節，不過對於我黎講，感覺又真係唔大，可能要到Ambrose再大d返左學，咁可能先至會有佢整嘅禮物，到時或者會比而家期待嘅！唔知係咪轉左首新hello song，加上我地又斷斷續續咁返學，所以今日Ambrose唱hello song都係得個望字，係到weather song先好d！母親節主題都係用花花教顏色，Ambrose有玩matching遊戲，今堂都叫ok！

白內障晶片手術

今日係媽咪手術日，我d大假無哂，要去到八月先reset番，所以今日好無奈都要詐病唔番工，陪媽咪做手術。我地無選擇去醫院做，只係响診所做，因為平d，同埋就算响醫院做都係要即日出院，咁不如診所做唔使俾醫院賺咁多啦！  

姑娘要我地十一點九到，但佢話真正做手術時間係一點鐘。今日我地早左少少到，去到簽吓紙同滴眼藥水，等左個幾鐘，見前面嘅人都同姑娘所講做半個鐘左右，點知媽咪好快，四、五個字就出番黎，真係極速呀！見媽咪隻左眼皮比平時腫左少少之外，好似唔覺有咩唔同，係可能滴左好多眼藥水，隻眼水汪汪咁！佢一出黎重同我講點樣點樣，我驚到叫佢唔好同我講係點，哈哈！醫生話做完手術可以正常活動，行街睇戲食飯無問題，不過媽咪聽其他人講咩都唔好做，又唔可以烏低身，總之好似人地坐月咁咩都唔做得咁，真係點講佢都唔會聽。所以，做完手術我地咩都無做，野又無食，即時開車返屋企叫外賣食同抖吓。我陪左媽咪個幾鐘，見無咩野可以幫手，都係快d趁有少少時間，去左剪頭髮，睇醫生攞醫生紙同埋買衫，嘻嘻！

眼科檢查

前排我陪媽咪驗眼，得知原來媽咪眼睛視力唔好嘅原因唔係我一直以為嘅青光眼，而係一直已知嘅夜盲症，真係有d驚訝！因為一直以黎都以為夜盲症係名符其實咁夜晚睇唔到野，但原來夜盲症係會慢慢令眼睛退化，損壞眼睛視野，重會好易伴隨青光眼同白內障，而媽咪其實就只有夜盲症，無青光眼，眼壓無問題，係有白內障囉！多口問醫生關於夜盲症遺傳問題，因為一直以黎都話係傳女唔傳男，但近年發覺有個表哥病發，真係有d擔心，上網睇呢個病又唔太多資料咁！  

原來醫生話夜盲症遺傳係可以以唔同形式出現，唔分男女，可以隔代，大部份患者係三十至四十歲時病發，未病發前係無野可以驗到出黎，病發左亦都無藥可醫，聽完真係好灰！咁即係話即使我而家無事，都唔可以保證一年後、五年後甚至十年後我都係無事。我只有等，等有一日發覺夜晚睇唔到野，先至知自己有無遺傳到！咁即係話，即使我無事，即使Ambrose係男仔，都唔可以保證佢對眼可以永遠都明亮，佢望出黎嘅世界永遠都廣濶清明！一直以黎睇住媽咪眼力唔好，真係受左好多苦，生活上亦都有好多限制，我以為自己而家無事，呢一世都可以無事，但係而家有人做黎話我知，唔係架，而家無唔等於你無，只係可能未出現。我真係難以想像自己有一日都可能好似媽咪咁，好多周邊嘅野都睇唔到，睇嘅野矇查查，因為咁樣成日撞傷跌傷，因為咁樣而受盡白眼，因為咁樣而唔好可以去好多地方！如果話唔驚真係呃人，有邊個會想咁樣過人生，但作為一個母親，除左擔心自己將來要依賴其他人而活，更加擔心嘅係Ambrose，唔論將來係一個咩社會，作為一個男仔，比女仔更要有承擔，更要有能力照顧到自己，我真係唔願意去諗如果有一日佢會好似媽咪咁，佢又可以點面對同自處呢？如果一定要有人受嘅話，我寧願果個係我，唔係佢！  

今日就聽醫生話，去左做眼科檢查，結果醫生話我對眼好靚，暫時未見到有夜盲症嘅痕跡，不過為左安全計，都要每年驗眼。

婆婆生日

今日Ambrose十點起身，媽咪今次鮮榨一個橙做橙汁，再加一塊厚麥包作為Ambrose嘅早餐，見Ambrose肯食而且都幾享受咁款，真係好開心，一來媽咪專登整俾佢食佢又食得咁開心，媽咪自然開心；二來Ambrose已經可以脫離唔飲早奶，可以食固體早餐，係媽咪一直希望嘅事！不過因為屋企部攪拌機係只攪唔隔渣，媽咪為左想Ambrose用多少少飲管杯訓練口肌，所以俾Ambrose用飲管杯飲橙汁，點知啜到一半之後，成條管都塞哂橙肉，啜唔到，媽咪又要同佢轉番普通杯至飲到！媽咪以為一個橙加一片厚麥包應該可以做一餐，但爹爹十二點起身時知道話唔可以，要食粥，所以媽咪又餵粥，Ambrose食完一碗之後竟然重要添食，媽咪唯有再加多半碗仔俾佢，原來橙同麥包真係唔可以頂好耐！唔知係咪一早食橙太消化所以重易肚餓呢？

食完粥，我地就同Ambrose出去行吉之島，唔知Ambrose係咪食得太飽，出到去無耐佢就瞓左，見佢瞓左，我地又拿拿林走去食野先，唔係就又係無啖好食喇！今日响吉之島買左Ambrose牙膏同食物較剪，買完野，我地又慢慢行去置樂諗住睇吓魚仔同買泵仔。沿路行去時見有個公園，忍唔住同Ambrose入去玩，Ambrose又係得個爬字，爬左上去個組合架上唔slide，眼定定睇人玩，見有轉轉轉又用手轉吓佢，真係唔似其他小朋友咁行黎行去爬上爬落又會slide，真係唔明佢做咩。公園都幾大，組合架對面有坐地嘅小走廊，走廊牆上有齒輪狀圓圈可俾小朋友轉轉轉，又有大圓珠推推推，Ambrose都係比較鍾意玩呢類活動，所以佢响呢邊都叫投入咁玩，唔會成日企响度睇人玩（因為唔係爬同“sir”滑梯，呢類活動係少d小朋友玩，所以無得俾佢望，哈哈）！玩到最尾又去左隔離上搖搖龜，搖搖豬，重有架大嘅搖搖車，好多小朋友都响車上面玩。Ambrose都坐到司機位，可以揸軑盤，不過佢又唔係手長，又要想捱住背脊，又要想揸住個軑盤，伸到手長長，個身郁黎郁去就位，見到都好攪笑！最後玩埋個搖搖恐龍，媽咪話太熱喇，都係唔好再玩，要走喇！爹爹非常體貼咁買左枝水俾媽咪飲，Ambrose見到又話要飲，重要唔用飲管好似我地就咁飲！枝水其實都好大枝，對Ambrose黎講又高又重，爹爹媽咪都有d擔心Ambrose一倒一飲就成身都係水，但見真係太熱要補水，就戰戰兢兢咁由Ambrose自己試飲，點知Ambrose又飲到好好喎，無漏，真係估唔到佢咁叻仔！

行左一陣，又係時候返屋企抖抖，因為今日婆婆生日，夜晚出去食飯呀！

今日Ambrose真係突然又大個仔左，出街要選鞋著，飲水要同大人一樣就咁口對樽飲，而且夜晚食晚飯佢又自己“不”飯食，同埋用埋玻璃杯飲水，重係似模似樣，揸杯好似人地揸紅酒杯咁揸，又識得細細力攞同放個玻璃杯，連佢自己都覺得自己好叻，係咁要人斟水俾佢飲，真係好好笑，唔知以為果d係酒飲到佢high哂！哈哈！

食完飯，表姐上左我地屋企玩，兩個人雖然唔係成日見，都好投契，兩個人係咁玩廚房玩具，好開心！

悠閒一天

今日Ambrose好好瞓呀，一點鬆d瞓，一路瞓到四點幾，食埋粥仔換好衫可以出街嘅時候，都已經係五點幾喇！見咁晏，爹爹同我地去左碼頭，推吓單車仔行海邊，又吹吓泡泡水！Ambrose都係一個幾特別嘅小朋友，人人一見bubbles就去追，去捉，佢唔係架，佢係企定定睇人玩，再唔係就係搶住要自己吹！今日佢又係咁喇，要搶住吹，媽咪知道吹泡泡可以練到口肌，幫助講說話，所以都由得佢吹！估唔到佢今次大有進步，可以自己吹到泡泡，唔似上次南生圍咁，偶然先得！可能Ambrose都好開心自己吹到，佢要自己揸埋個樽，自己控制去點水同吹，雖然爹爹同媽咪都好驚佢會倒瀉，但唔試過又點知呢？結果原來都還可以喎，只係有 一兩 下Ambrose擺枝棒棒太埋個口度，好似沾到泡泡水咁，不過媽咪諗都無傷大雅掛！

原本推車仔行海皮係想睇個海，點知原來海皮圍欄係密封無孔望唔過嘅，爹爹要抱起Ambrose先可以睇到海，坐在車仔上只係可以睇到幅牆，真係掃興！沿途見有人釣魚，DWE書成日都有講fishing，今次見到有人真係釣魚，又可乘機教吓Ambrose真釣魚就係咁架喇！再指吓個海話係sea / ocean，指吓船係boat，加深番之前上playgroup教過嘅字，悠悠閒玩吓學吓睇吓，真係唔錯！Ambrose沿途見有d禁止狗隻進入嘅牌，牌上有隻狗影，佢就成日指住望住，果然對動物有情意結！

天黑去食飯喇！上左商場是但搵左間坐得好d嘅食肆，食完行過間文具店，爹爹見到有一set沙灘玩具，媽咪見個桶係城堡形，入左沙係可以整到城堡出黎，好靚，入面又有四個公仔模，有泥爬同shovel，一set都係三十五蚊，比起反斗城又或者吉之島果d，又平d又多d野重要係又靚d呀！當然我地都買左，預備之後有機會去沙灘玩時用啦！媽咪順道買左兩張大畫紙，厚身d嘅，預備有時同Ambrose留响屋企油水彩用。買完野，又係時候返屋企喇！