荔枝團

早兩日舅公打俾婆婆，話係時候摘荔枝喇，原本諗住落雨，婆婆懶得去，媽咪又怕辛苦唔想去，不過舅公話會好天，媽咪再諗Ambrose而家都開始識野喇，都未試過去摘荔枝，又好耐無去探舅公，反正無節目，去就去啦！爺爺之前已經成日話想去摘，今次都叫埋佢去幫手，諗住人少少無所謂，點知就連姑姐一家同埋嫲嫲嘅弟妹都好有興趣，媽咪真係唔明，又熱又多蚊蟲咬，咁辛苦個個都話想去，如果唔係媽咪諗住俾機會Ambrose體驗吓，媽咪都唔會應承去呀！媽咪見人太多衝去舅公屋企會唔好意思，所以都只限爺爺嫲嫲同姑姐一家就算喇！

 十一點鬆d就出發去龍鼓灘，一來係婆婆唔想我地太晏入去幫手，二來媽咪諗落太晏嘅話太陽都猛d，咁多小朋友去就好辛苦，所以都係早d好！  

今日好彩姑丈都有黎，因為姑丈係做開園藝工作，佢識得用工具去剪生得比較高嘅荔枝，爹爹同爺爺都只係摘到比較低嘅荔枝，唔識用工具，唯有爬上樹摘，媽咪就唔太想係樣！姑丈好幾次都剪到一大抽嘅荔枝落黎，佢重將成大抽荔枝倒掛响矮樹度俾小朋友慢慢摘，都幾好玩！不過Ambrose就一路睇一路摘重要一路食囉，食到佢成隻手指塞埋入口裡面，超攪笑！  

雖然已經噴左防蚊水，又用左防蚊帶，Ambrose都俾蚊咬左兩啖，唔知如果唔用嘅後果係點呢？媽咪本來係著短褲去，但臨時又驚好多野咬，都係著長褲涼鞋，結果係腳面露出黎嘅地方俾蚊咬左幾啖，都算係咁喇！摘摘吓荔枝開始落雨，媽咪趕哂d小朋友入屋，不過場雨好快落完，太陽又出番黎！Ambrose同表姐表哥姑丈出左去門口踢波，真係精力充沛！落完雨出黎黎嘅太陽好勁，超曬呀，連濕哂嘅地下玩左一陣之後都已經曬乾哂！Ambrose曬完一輪入屋抖，好攰喇，俾個奶咀佢食，一陣就瞓著左！二表姐又係，兩表姐弟齊齊瞓响沙發度，場面都幾攪笑！哈哈！  

見個太陽咁猛，大家抖左一排已經唔願郁喇！呢個時候表姨媽先黎到，媽咪真係望穿秋水，以為等唔到佢要走先，好彩都趕及見上一面，哈哈！估唔到傾吓講吓抖吓又過左個幾鐘，媽咪見大表姐重興致勃勃同小馬哥玩緊，媽咪就話玩吹泡泡喇！點知唔知係咁啱定Ambrose聽見吹泡泡，佢無啦啦彈左起身，之後重識行出去玩，真係俾佢笑死！玩左一陣，又倒咁d泡泡水之後，大家都又攰又餓，都係快d返屋企沖番個涼食吓野抖吓喇！  

總括今日嘅荔枝團，可能唔係太熱嘅關係，又只不過响屋企門口好方便清洗同避暑避蚊，媽咪又著定長褲無咁多野咬同痴立立，所以媽咪覺得都唔太辛苦，小朋友可以體驗吓玩吓都幾唔錯，又有地方俾佢地玩，如果有時間同有預備，出埋去沙灘玩就真係perfect喇！  

荔枝團後大家返左屋企食野同沖涼，之後又浩浩蕩蕩過左南浪舅婆家食飯。當然，食飯係其一節目啦，其二亦係媽咪主要嘅目標，就係同Ambrose去遊樂場玩啦！今次Ambrose唔知點解叻左，之前佢黎呢度行獨木橋，陪佢行完一次之後佢就已經唔肯再玩第二次，今日佢竟然來來回回係咁要行，真係好叻！不過玩到咁上下媽咪發現有好多較大嘅小朋友跑黎跑去，完全無視有幼兒响度行緊咁危險，所以媽咪雖然怕怕地猩紅熱，都要帶同表姐同Ambrose入左去室內波波池玩！Ambrose似乎都幾鍾意呢度，佢竟然肯爬上去高處玩，完全唔怕，媽咪有d意外！最神奇都係高處有一個繩網，Ambrose又係不斷來來回回咁行，媽咪見佢幼潛唔肯玩大肌肉遊戲，以為佢開始識驚同埋抗拒玩，但又見佢肯行獨木橋又肯爬高又肯行繩網，又唔似真係抗拒，所以媽咪諗Ambrose唔肯玩可能都係環境問題。呢度似乎又幾好咁，至少Ambrose無抗拒，呢度又有室外遊樂場，室內波波池繩網，又有泳池，好彩舅婆肯出張住戶證俾我地，閒時同Ambrose過黎都應該可以玩到一晝，真係個好地方！