一早買左飛同Ambrose今晚聽音樂會，其實都唔係好知會唔會好似小交響樂團果d音樂會咁輕鬆好玩，只係見個音樂會接受三歲以上嘅小朋友，個音樂會個名又有Heroes呢個字，即管買飛去見識吓！
又係約左鐡腳浠浠一齊去，有個伴開心d嘅！無預太早到達，只係剛剛好到，僅夠入場前去吓廁所，影吓相同埋攞樂器貼紙！可能因為成日講個音樂會係關於Heroes，兩個小朋友影相時係咁擺哂ironman同spiderman嘅pose，哈哈！媽咪已經好醒目咁同佢地講定，Heroes唔一定係呢d架，可能係其他人物，如士兵之類，等佢地入到去發現唔係佢地心目中嘅英雄時，落差無咁大丫麻！
以前同Ambrose聽音樂會，因為年紀細怕坐唔耐，加上慳錢，都會買最平嘅飛，只係俾佢去吓見識吓感受吓！而家Ambrose都大個左好多，知道佢坐得定，加上佢已經學左小提琴一段時間，媽咪就諗住俾佢在現場近距離一點咁去睇人地點演奏，所以今次買左貴飛，好彩Ellen姨姨無反對！
滿心期待咁入場，以為Ambrose見坐得前會好開心，點知佢坐定左之後，就話唔鍾意坐咁前，係咁叫媽咪行去後面坐！激死！當然，又要解釋一大輪點解唔可以去後面坐啦！其實媽咪都可能明白點解佢唔想坐咁前嘅，因為坐得前，其實只係睇到某部份樂器嘅演奏，唔會好似坐後面咁可以睇到full picture！可能係媽咪唔多識點揀位啦，始終唔熟各個場地嘅floor plan，要想揀較前位置又想full picture睇哂成個樂團，究竟坐邊一行最好，其實真係唔清楚，都係次次靠估！
今次音樂會，仲有朱薰E做主持，介紹吓d樂章同埋講番相關嘅故事，其實真係唔錯！不過，可能Ambrose都仲係細左d，理解力唔係咁夠，佢又不斷問個故事內容即係點解呀，有時候媽咪都唔識答佢呀！
音樂會有某段頗長時間係有關Romeo and Juliet的，Ambrose竟然瞓著左！梗係啦，尋日玩足成日，加上尋晚朋友仔黎過夜，佢又唔捨得瞓，搞到成點鐘至瞓著，今日未夠九點又起左身玩，只係揸車出黎嘅時候瞓左幾個字咋！去到音樂會d燈光又咁柔和，以咁嘅精神狀態去聽音樂，好難唔瞓著覺！
雖然買左貴飛，見Ambrose對眼已經睜唔開，半開半合之間仲識聽到聲拍手掌，真係又好笑又可憐呢，唯有叫佢挨住媽咪瞓吓啦！佢瞓左，媽咪自己都樂得清靜，可以好好欣賞個音樂會嘅！
仲以為佢會瞓足全場，點知佢瞓唔夠半小時又醒左，避開左最悶最長果part！醒左之後嘅Ambrose又投入返音樂會，直至完結，媽咪實在有點安慰，哈哈！音樂會完結後，竟然見到Romeo and Juliet嘅演員，佢地話在場外將會有故事聽，於是又同Ambrose跟過去！其實唔算係故事嘅，應該係話劇貼切d，個話劇唔係好長，但演員同觀眾都有不少互動，而演員又演得好生鬼，Ambrose都睇到咯咯聲大笑！
我地當日都有去聽呀!
回覆刪除