第一次有朋友仔來家中sleep over (4y10m)

Ambrose的床係子母床，不過由佢搬黎呢間屋企開始，已經好順利自己瞓一間房了，即使偶爾要爹爹媽咪陪瞓，佢都要一齊擠在子床，所以張母床，真係無咩人瞓過！不過佢就好似成日好proud of自己有張子母床咁，成日同人講佢自己有兩張床，當佢想留人在家一齊瞓時，佢就會不停咁話可以一齊瞓架，但細問佢點一齊瞓時，佢一定會話自己瞓上面，其他人瞓下面，掉轉位置都唔得，哈哈！

Ambrose好鍾意邀請其他人留家過夜，好想有人同佢一間房瞓，大概因為獨生子太寂寞吧！之前曾經有表姐仔同姨婆來過夜，Ambrose都會興奮得不停係咁同人傾計唔瞓覺，搞到對方都無覺好瞓，哈哈！見佢成日都想有伴同佢玩，都會周不時問吓佢去唔去姑姐家中過夜，佢之前去過一次咁多，但果次之後，點叫點氹佢都唔再肯了！

今個周末，終於都約到個朋友仔黎sleep over！雖然巧朗哥哥以學年計係大Ambrose一年，但其實佢只係大Ambrose八個月左右，今次，佢都係第一次去唔係親人嘅屋企過夜！

約左一班朋友黎家中玩，當然包括巧朗哥哥啦，玩完成日，大家都玩得火熱，十一點幾，巧朗哥哥嘅父母要走了，也沒有甚麼扭擰，好順利！之後，玩多陣就叫左兩個小朋友刷牙入房瞓覺，又無咩野！只見Ambrose又係咁捉住人講野，同埋玩，搞左一大輪都未瞓，結果，兩個小朋友凌晨一點左右才瞓著覺！

爹爹媽咪預計巧朗哥哥可能半夜夢迴會搵自己父母，但，真係好好彩，大家都一覺瞓到天光，好順利呀！

有過呢一次經驗之後，相信Ambrose更加會識向爹爹媽咪要求約朋友仔黎過夜喇！