自Ambrose出世之後，媽咪已經戒左電視，夜晚食完飯之後就全情陪Ambrose玩，計起上黎，原來都有二十七個幾月無睇電視！基本上媽咪係連點開部高清盒同電視邊一台都唔多知，唔係講笑！
不過最近睇左萬凰之王，真係害人不淺呀！媽咪晚晚都睇，雖然未必次次都睇足全集，但點都有半隻睇到！有時候Ambrose都一齊睇埋，一話睇皇上佢就醒目地跑去沙發坐好等睇電視！
唉！雖然好睇，但媽咪已經好想快d做完，唔使再浪費時間追劇，集中多d同Ambrose玩好過啦！
2011年11月25日 星期五
衰人
平時搭村巴返工，我都慣性一係坐窗口位，一係就坐三人座果邊嘅中間位。有人話中間位咁迫，唔鍾意坐，但我又唔係咁諗，坐走廊位係鬆d，不過d人一路上車一路撞住你入，真係麻麻地囉，重要開車後會比較“浪”，瞓著左又容易d“西”出去，我一上車就瞓，所以唔會坐走廊位！可能我細粒啦，就算坐中間位都唔算好迫！
不過有d人真係好乞人憎囉，明明自己坐住三人位嘅走廊位，到我行埋去叫佢唔該借借想話坐入去中間位度，佢果時先至一個唔該自己坐埋去中間位度，俾個暖座你坐，有無諗過人地感受架？？？如果一早要坐中間位，做咩唔一早坐入去先喎，係要等人地要坐先至自己坐入去，分明就係睇左係咩人坐落黎，先至決家自己坐邊個位啦，呢d人真係好自私囉！正一衰人！通常我first priority都係搵左兩個女人坐嘅三人位先架麻，見有就一定行左埋去先，你一個唔該坐左我個中間位要我坐走廊位，咁一早知道嘅話我唔行埋去啦，行返轉頭又無左d中間位坐喇，真係好想鬧佢囉！俾著自己早上車都唔會坐住走廊位等人黎先坐中間位啦，唔明呢d衰人咩心態！而家又唔係乞你個位，我都有俾錢架！！！
2011年11月21日 星期一
白內障晶片手術 – 右眼
今日係媽咪手術日，今次係做埋右眼。原本媽咪想話約十一月，但因為呢排又要忙住Ambrose幼稚園面試開放日等等，好多個星期六都唔得閒。要做手術嘅話，其實最好就到星期五做，星期六要覆診都唔使請多日假！但奈何又無時間，媽咪又話唔想太凍先黎做手術，左度右度，就埋老公放假，好辛苦先度到今日去同媽咪做手術，請假就請假啦！
不過真係唔啱時間，度完一輪搵左今日，我又病到死，但因為已經無咩時間，唔想媽咪失望，病住好想改期都要死撐住去，唯有尋日搵左奶奶幫手睇住Ambrose，我就睇醫生大覺瞓至掂！尋日睇醫生先攪笑，醫生一聽完我話狂打乞次又周身骨痛同疑似發燒之後，佢眉都皺埋問我，你究竟係咩人黎架，係邊個星球住架，點解可以唔係呢樣病就果樣病架，一d抵抗力都無，係咪工作地方定屋企有問題，個醫生真係好激動，好好笑！最後醫生話要寫日假俾我，要我好好休息，我話唔使喇，佢話你抖吓啦，你係休息唔夠先至成日病嘅，然後我唯有同醫生講我攞左兩日大假放，所以唔使寫病假俾我喇！咁樣俾醫生話同埋醫生咁堅持寫病假俾我都係第一次，哈哈！
今次同媽咪做手術，重諗住好似上次咁等好耐，之前姑娘都話一點黎可能要等到三點，點知今次真係好快，未夠一點去到，三點已經返到媽咪屋企！今次媽咪都無上次咁緊張，起碼無話一返到去就要瞓响度，唔敢做呢樣唔敢做果樣，哈哈！
三點幾返到自己屋企，老公原本話咁早去睇戲，不過因為明天一早又要同媽咪覆診，要自己搭車，我驚我病又要等咁耐好辛苦，所以都係唔去睇戲，留响屋企大覺瞓，養足精神快d好番，明天再出去！
2011年11月12日 星期六
全家病哂
十月尾至病完一輪黎，都未好得哂，又再中招喇！
今次係腸胃炎！話說 十一月五日 要去六間幼稚園面試，Ambrose表現真係神勇，好感恩！但到第二日，Ambrose出奇地瞓到九點幾十點，真係好少有，媽咪不以為以，只係以為Ambrose可能五號果日真係太虛耗精力面試，所以比較攰！成十點起左身之後都係活動左一陣，佢十二點零一點又話要瞓，媽咪重開心緊點解咁好湊，哈哈！點知佢呢覺瞓到成四點幾，起左身之後又唔太肯食野，媽咪俾左d乳酪零食俾Ambrose食氹吓佢啦！點知瞓左咁多嘅Ambrose好似都好吽咁，又成日挨住沙發，又瞓响地下度，又唔多出聲，唔知咩事！隔得一陣，佢重嘔左一大啖野出黎，應該係之前嘅乳酪零食！呢個時候爹爹媽咪先至發覺佢可能唔舒服！
之後，去婆婆家前再嘔左一次，其實爹爹見Ambrose咁樣都唔太想去婆婆度架喇，不過媽咪諗住無飯食，Ambrose又無食過野，都係去一去食飯啦！去到婆婆度，Ambrose想飲湯，媽咪見佢想飲湯當然即刻俾佢啦，成日都無食野，飲吓湯都好丫，點知一飲湯又嘔，重要爹爹同Ambrose一身都係！呢餐飯，一家三口都無咩點食過，見Ambrose今日又掛住瞓，唔出聲唔玩又無反應，又嘔左幾次，一定要同佢睇醫生啦！Ambrose都未試過病到唔玩唔出聲咁得人驚架麻！由於係星期日夜晚，無醫生睇，所以爹爹揸車出左荃灣港安醫院睇門診！
嘔左幾次嘅Ambrose，開始有少少醒咁，都有少少反應，比起日頭時好d咁，不過媽咪唔知點解個胃就超唔舒服，好反胃咁，而爹爹可能之前又食抗生素又無咩點食飯，佢又話好胃痛！不過大家都著眼於快d俾Ambrose睇醫生，所以都無諗住順手睇埋，以為過一陣都無野！好快，醫生同Ambrose檢查過，話係腸胃炎，可能因為周圍掂野污糟又放手入口度食掛，開左d止瀉止嘔藥同營養水就走得！不得不提港安嘅門診服務都幾好，唔使等好耐，環境又濶落，最緊要係咩時候去都有得睇，咁第日星期日又或者夜晚急症都可以去呢度啦，放心哂！
睇完醫生回程返屋企，Ambrose再生猛番少少，不過媽咪開始好唔妥，個胃真係好反胃，好想嘔，媽咪都無咩精神同Ambrose玩！同時間爹爹個胃又越黎越痛，真係好橋囉！返到屋企，爹爹同嫲嫲氹Ambrose食粥，媽咪已經頂唔住要撻响張床度好辛苦！Ambrose食左幾啖粥之後，又再嘔，全屋人都手忙腳亂咁處理！過得一陣，媽咪終於都嘔得出，斷續都嘔左三次，雖然嘔完之後都舒服一d，不過個胃都重係好唔舒服，d腸又係，呢晚，Ambrose同媽咪都頂唔住沖完涼咩都唔理就瞓左！
瞓到半夜，媽咪醒一醒至發覺爹爹唔响度，不過由於都係好唔舒服，唔知爹爹係去左第二間房定點，媽咪唔理得咁多，又昏睡左！到第二朝先知，原來爹爹半夜胃抽筋痛到要走去急症室，不過急症室要等四至五個鐘，最後爹爹去左24小時診所度打針止痛，呢一夜，原來大家都好難過呀！
第二朝瞓醒，媽咪都唔好過架，腸胃抽住痛，又發燒，關節全部都好痛呀！連去睇醫生都行唔到去咁濟，要下午開始退燒先至勉強出到去睇醫生！至於Ambrose，當然係無返學啦，佢唔食唔玩，只係不斷同爹爹媽咪係咁瞓，可憐爹爹重要返夜又唔請病假！
媽咪今次一病，又兩日，病得咁急咁重，no paid都要架喇！Ambrose都係同學校請左兩日假，唔係太精神咁再返學，一放學返去已經攰到郁唔到，要即瞓，真係慘！至於爹爹，胃抽筋完之後都唔係好左幾耐，又腸胃炎，又痾又嘔！慘慘慘！
爹爹同媽咪講開，好彩Ambrose面試果日無咩事咋，有問必答，狀態好好，一日之差就已經係咁嘔，又唔出聲，問極都唔答，又挨住大人，又瞓响地，唔玩唔食無反應，如果面試日係咁，真係不堪設想呀！所以爹爹媽咪都大叫好彩呀！
總結番點解個個都腸胃炎，真係諗唔到，媽咪同Ambrose可能係果日去完保田之後响茶餐廳共同食左一碟炒米粉出事，而爹爹因為係胃抽筋，同Ambrose媽咪嘅病徵又唔同，唔知點解佢會咁！最神奇嘅係嫲嫲腸胃都唔舒服，不過就無痾嘔，但爺爺就罕有地又痾又嘔喎！爺爺嫲嫲無同我地食lunch，但果晚就有一齊食外賣生蠔同大排檔炒粉麵，但Ambrose呢一餐完全無食過野，而爹爹嫲嫲兩個人係完全無食過生蠔，大家食嘅野好似都無咩重叠，但又不約而同個個都腸胃炎有事咁，好奇怪呀！
2011年11月3日 星期四
2011年10月5日 星期三
油門
早幾日已經收左樓，初步清潔左之後，發覺間屋都唔係好殘舊喎，要執嘅野又少d，可以慳返d喇！間屋唔係自住，都係租俾人，所以好多野，慳得就慳啦！亦因為咁，我好想做一d平時唔可以做嘅野，就係自己油房門喇！買齊哂材料，包括平底漿、磁漆、沙紙同埋油掃等，盲摸摸開始油漆工生涯！哈哈！早幾日初步油左兩隻房門，油完都好沮喪，似乎唔係想像中咁易，磁漆真係好難先掃得薄同均勻，每次落掃油都有落掃個印，即使我大力d定細力d，來回油多幾層都一樣有一撻撻印，究竟要幾輕力先至無？真係好難攪！
忍唔住打俾大哥同老豆問吓，大哥又瞓左覺，老豆又唔聽電話，迫住去問唔係好識油油嘅二哥，問完都好似無咩得著，哈哈！揣摩多一陣之後，似乎又有少少領悟，但由於天色已暗，無白光好難再油落去，所以收工！都好丫，都要等底油乾左先再油多層好d麻！
今日放假，同完呀仔去玩，又走左去油門，今日用左個半鐘油左成隻大房房門，之前經驗累積左，似乎今日掌握得好好多，反而無之前咁小心奕奕，但效果相當唔錯！唔係專業人士，但我自己相當滿意喇，簡直覺得自己油油有天份呀，只要有時間嘅話！哈哈！再睇番老公油果d，唉，唔係話好差，不過就流哂眼淚咁，我油果隻無架！
最衰無時間啦，唔係我都好有興趣自己油好一屋嘅門，同埋好想試吓油牆，我諗我都應該整得唔錯架！
2011年9月27日 星期二
爹爹生日
今日係爹爹生日，由於媽咪無咩假，而尋日要去律師樓簽文件已經攞左假，為左唔好咁快用哂d假，所以今年爹爹生日，媽咪無攞假陪佢，爹爹要自己過生日喇！不過之前已問過爹爹想點慶祝，佢都無咩想做，又無咩禮物想要，傾完之後，決定星期日果日同老爺、嫲嫲以及姑姐一家一齊去左尖沙咀打邊爐，算係慶祝左！
今晚係爹爹正日生日，佢又唔想掉低Ambrose出去同媽咪二人世界，結果都係平淡响屋企食飯就算。媽咪放工時去買左個迷你天使蛋糕，諗住同爹爹切吓蛋糕。食完飯執埋野，媽咪就攞個蛋糕出黎，Ambrose一見到時就“嘩”一聲。媽咪問佢知唔知邊個生日，佢話係佢生日喎，笑死人！之前買左個音樂蓮花蠟燭，啱啱好放响蛋糕中間，Ambrose一路睇住媽咪整，又好奇又心急想食蛋糕！
簡單set好左個蛋糕，就點蠟燭，個蠟燭好似著左火咁，好大火同大煙，之後朵花打開，好靚！之前同Ambrose一齊整左張生日咭俾爹爹，由於之前已經送左，所以媽咪同Ambrose唱左生日歌，呢個簡單嘅慶祝儀式，告一段落喇！爹爹話朵蓮花好好玩，下次要再買黎玩過喎！
2011年7月8日 星期五
淘寶
好幾年之前聽人講淘寶好多野買，又平又抵，我都忍唔住上網研究吓，開哂戶口，不過當時要開戶口同埋攪俾錢果part真係好煩，最終我開左戶口之後就不了了之，未試過淘過任何野。生bb果時，又係好多人話淘寶bb野又平又ok，我雖然心郁郁，但都係敵唔過一個煩字，最終都係的唔起心肝自己去試，只係有時其他媽咪攪淘寶團購時，我會搭單買少少野，主要都係玩具多。買過幾次之後，就覺得淘寶貨真係好平，質量亦唔差，小朋友玩具有時真係玩一陣，如果下下都買咁貴嘅野，真係倒水咁倒，買平嘅，啱年紀玩一排唔要都唔肉赤麻！不過由於係團購嘅關係，每每都要响指定某幾間店舖選購產品，我又唔係間間都啱，想買果d又唔响list入面，所以我覺得如果自己識淘，真係方便好多囉！
本著唔識就慳返嘅心態，我一直都係得個諗字，無實行過去試淘。眼見周圍同事一個又一個加入淘寶行列，加上我早排有d手工野想買俾Ambrose玩，check過美國網站有得買，但運費極貴，一係就唔接international order，十五十六諗緊好唔好買嘅時候，我靈機一觸諗起去淘寶搵吓先。雖然我想買嘅野最終都係搵唔到，不過响搵嘅過程入面見到淘寶都有唔少美工用品，平時香港書店又唔會有，有又無咁平，我覺得價錢好吸引，所以終於忍唔住試左人生第一次淘寶！哈哈！第一次淘寶簡直錯漏百出，又唔識拍落黎，又唔知點同賣家講改運費，最慘係開戶年代久遠，我完全唔記得個支付密碼，唔記得左就俾唔到錢買唔到野，我撞左幾次又鎖左戶口，又話要等幾個鐘先可重試，又話搵密碼要搵客服，真係煩到想放棄！結果我用左幾日誤打誤撞撞番個密碼，俾到錢，淘到野喇！送黎嘅貨都ok，最緊要係慳左搵嘅時間，坐响度就送上黎，真係好方便！
就係咁試左一次之後，就有第二、三次喇！第二次嘅淘寶，全部都係手工貼子野，好輕，d貨大部份都ok，不過運費到付，而賣家可能包裝問題令我只係買左九十幾蚊貨就俾左九十幾蚊運費，真係貴到嘔，經此一役，我都係覺得一次過同賣家傾好運費一次過俾好過到貨先俾，無哂預算咁！第三次淘寶，係幾本書，質量唔錯，而且唔知點解唔係首重$30，買左三本都叫重嘅書同一幅畫，總運費都只係$27，今次原來賣家係用EMS，又令我識多樣野，原來EMS平過快遞，但都一樣咁快收到，哈哈！
人人都話會中淘寶毒，睇黎我可能都走唔甩喎！
2011年5月6日 星期五
白內障晶片手術
今日係媽咪手術日，我d大假無哂，要去到八月先reset番，所以今日好無奈都要詐病唔番工，陪媽咪做手術。我地無選擇去醫院做，只係响診所做，因為平d，同埋就算响醫院做都係要即日出院，咁不如診所做唔使俾醫院賺咁多啦！
姑娘要我地十一點九到，但佢話真正做手術時間係一點鐘。今日我地早左少少到，去到簽吓紙同滴眼藥水，等左個幾鐘，見前面嘅人都同姑娘所講做半個鐘左右，點知媽咪好快，四、五個字就出番黎，真係極速呀！見媽咪隻左眼皮比平時腫左少少之外，好似唔覺有咩唔同，係可能滴左好多眼藥水，隻眼水汪汪咁！佢一出黎重同我講點樣點樣，我驚到叫佢唔好同我講係點，哈哈！醫生話做完手術可以正常活動，行街睇戲食飯無問題，不過媽咪聽其他人講咩都唔好做，又唔可以烏低身，總之好似人地坐月咁咩都唔做得咁，真係點講佢都唔會聽。所以，做完手術我地咩都無做，野又無食，即時開車返屋企叫外賣食同抖吓。我陪左媽咪個幾鐘，見無咩野可以幫手，都係快d趁有少少時間，去左剪頭髮，睇醫生攞醫生紙同埋買衫，嘻嘻！
2011年5月3日 星期二
眼科檢查
前排我陪媽咪驗眼，得知原來媽咪眼睛視力唔好嘅原因唔係我一直以為嘅青光眼，而係一直已知嘅夜盲症，真係有d驚訝！因為一直以黎都以為夜盲症係名符其實咁夜晚睇唔到野，但原來夜盲症係會慢慢令眼睛退化，損壞眼睛視野，重會好易伴隨青光眼同白內障，而媽咪其實就只有夜盲症，無青光眼，眼壓無問題，係有白內障囉！多口問醫生關於夜盲症遺傳問題，因為一直以黎都話係傳女唔傳男，但近年發覺有個表哥病發，真係有d擔心，上網睇呢個病又唔太多資料咁！
原來醫生話夜盲症遺傳係可以以唔同形式出現，唔分男女，可以隔代，大部份患者係三十至四十歲時病發，未病發前係無野可以驗到出黎，病發左亦都無藥可醫，聽完真係好灰！咁即係話即使我而家無事，都唔可以保證一年後、五年後甚至十年後我都係無事。我只有等，等有一日發覺夜晚睇唔到野，先至知自己有無遺傳到！咁即係話，即使我無事，即使Ambrose係男仔，都唔可以保證佢對眼可以永遠都明亮，佢望出黎嘅世界永遠都廣濶清明！一直以黎睇住媽咪眼力唔好，真係受左好多苦，生活上亦都有好多限制，我以為自己而家無事，呢一世都可以無事，但係而家有人做黎話我知，唔係架，而家無唔等於你無，只係可能未出現。我真係難以想像自己有一日都可能好似媽咪咁，好多周邊嘅野都睇唔到，睇嘅野矇查查，因為咁樣成日撞傷跌傷，因為咁樣而受盡白眼，因為咁樣而唔好可以去好多地方！如果話唔驚真係呃人，有邊個會想咁樣過人生，但作為一個母親，除左擔心自己將來要依賴其他人而活，更加擔心嘅係Ambrose，唔論將來係一個咩社會，作為一個男仔，比女仔更要有承擔，更要有能力照顧到自己，我真係唔願意去諗如果有一日佢會好似媽咪咁，佢又可以點面對同自處呢？如果一定要有人受嘅話，我寧願果個係我，唔係佢！
今日就聽醫生話，去左做眼科檢查，結果醫生話我對眼好靚，暫時未見到有夜盲症嘅痕跡，不過為左安全計，都要每年驗眼。
2011年4月11日 星期一
失聲
媽咪終於都病左喇！經過兩日假期，湊足Ambrose兩日，又上playgroup，撲撲頻頻，媽咪原本已經聲沙沙，去到昨日已經失聲，叫外賣都差d叫唔到，今日真係頂唔住，唔想攞病假都要攞喇！如果攞病假可以有人工，我真係好想放多一兩日，以我嘅病情，我相信我返到工都嚇親d同事！當然，呢個世界係無free lunch啦！一日都好過無喇！
十一點幾，爹爹同Ambrose陪我出市中心食野同睇醫生，今次因為病情較嚴重，所以要食抗生素，療程五日。睇完醫生食完野，返左屋企食藥休息吓，再起身嘅時候都只係四點幾。媽咪見時間尚早，提議同Ambrose落樓下公園玩，今次媽咪終於都記得攞埋枝長泡泡劍落去玩喇！Ambrose其實都唔係話好熱愛遊樂場，次次去都係睇人玩多過自己玩，唔會表現到好狂熱好興奮，可能只係媽咪一箱情願想佢去玩多d！Ambrose又唔係好熱愛滑梯，只係媽咪次次都叫Ambrose去玩，Ambrose只會應媽咪要求爬上去之後，叫極都唔會“sir”落黎，反而佢只係鍾意爬上爬落，行上行落樓梯同埋扭滑梯上個駕駛盤。媽咪見Ambrose都唔係咁興奮，一於攞把泡泡劍出黎fing泡泡，點知Ambrose唔係好似其他小朋友咁追泡泡，佢都仍然係得個望字，之後佢就要搶枝泡泡劍，要自己浸入去再抆番出黎，可惜佢唔識搖枝棒，無泡泡出，但佢都重好有興趣又抆出黎又對好耐插入去，來來回回都係得個攪字，無咩泡泡！
玩左一陣開始天黑同大風，都係返屋企喇！媽咪今日乖乖食左藥，把聲都重係超沙，開唔到聲咁濟！今次隻菌真係勁呀！
2011年3月31日 星期四
困lift記
今日lunch阿sir請食飯，所以早左少少出去攞位同點野食。由三十八樓入lift，本來已經係全lift人好迫，在lift門就關上之際，竟然就有人按開lift門衝入黎，心諗好心啦，咁多架lift，好快就有lift，重要咁樣迫入黎，個女人入左黎見咁迫都話唔好意思！
Lift開動左一陣之後，應該係時候到地下，突然無啦啦好大聲“嘭”一聲，架lift似乎撞左落地下，我自己都因為咁樣一撞震到要屈膝，我身後個女人重要驚叫之餘，雙手捉實我，真係俾佢嚇一跳。咁樣撞完之後，架lift好似無咩反應，唔開門停左落黎，不過好彩燈都重著住。呢個時候d人開始話架lift壞左，但都無人按警鐘，我企响門口附近，雖然唔多太就手，都唯有自己去按警鐘，其他人就响度嘈嘈斃。長按左好一陣時間，我都開到聲話按到有d手軟，竟然都無人話幫手按制，重要企响d制前面個男人全程都响度抖大氣又吹氣，吹鬼住哂，核核突突咁，我身後個女人就好好人咁拉我企後少少以避過佢d氣功，我就索性唔鬼按制由得佢喇！
最慘係最尾迫入lift個女人一撞lift之後就不斷好似好驚咁話困lift好驚好想暈，佢話佢之前試過一次困lift暈左，所以好驚，但係佢把口就不斷話暈，又唔覺佢真係咁虛弱囉！無按制一陣之後管理處有人在喇叭開聲叫我地冷靜，又問我地有無人唔舒服，話叫左人落黎睇吓，佢把聲一d都唔專業，而當問到個好驚嘅女人要唔要叫定白車時佢又唔出聲，但又不斷咁話暈，真係有d頂佢唔順，覺得佢都唔知係咪，得個嘈字！後面有人話叫定啦橫掂都係，身為公務員，講d咁嘅野真係唔多掂，好彩有人出聲話如果真係覺得有需要先call啦，你咁樣一路叫暈管理處真係會call白車等，到時唔係又浪費左人力物力，總算有人講d人話呀！諗落個女人唔係咁樣衝入lift佢都唔使無啦啦困lift，真係注定佢係撲入黎困lift架！
等左一陣都唔覺有人黎救我地，已經覺得頭先個管理處阿嬸流流地！呢個時候聽到同事打通左電話報警，不過講講吓cut左線，大家都諗緊隔離就係消防局，照計都好快有人黎救我地，但再等多兩分鐘又唔覺有人，同事又再打999，問係咪已經有人跟進，係咪已通知消防，不過警察果邊嘅態度麻麻囉！再等多一陣，感覺到架lift郁緊，呢一刻我都有d擔心架lift會唔會走番上去又落多一次黎重恐怖！攪左一輪，郁左一陣，開始聽見出面有消防員同我地講叫我地冷靜，同埋唔好企咁近lift門，原先已經好迫嘅lift，因為要企後俾位消防開lift門而更加迫！
見度lift門好似撬極都開唔到，果個氣功男又一味响度嘈嘈斃，又話無理由架喎，消防有匙一開就得，又話可唔可以搖控開門，個要暈嘅女人又不斷話驚同暈，真係好想佢兩個收口囉！一係就快鬼d暈喇，有人暈左可能消防會積極d快d救我地，唔係佢地嘈到人心都煩，空氣又少d咁！
結果lift門終於打開，但同地下都有少少距離，要行高一級樓梯先可以踏上地面，架lift最多可坐二十四人，我地果日足足有二十三人，都未叫超標嘅，不過成個困lift過程足足二十分鐘，咁多人迫埋一齊，出到lift之後反而有d腳軟同抖氣唔順，好彩，行左一陣又無咩野喇！
今次係我人生第一次困lift，雖然困左成二十分鐘，比我當初想像中要耐，但好彩並唔係好似睇電視咁樣咩燈都無咁恐怖，所以都唔係真係好驚，希望唔會有第二次啦！
事後同事講番原來之前試過困lift開lift門又係要踏上一級先出到地面，响踏上呢一級之際架lift突然開動夾到人，好得人驚，我以為呢d只會在電影中出現嘅情節，原來現實生活都有發生，好彩佢係响我出lift之後先同我講咋，唔係都真係幾驚嚇！
2011年2月19日 星期六
情人節
今年情人節爹爹book左機場富豪酒店住宿晚飯兼spa嘅package，係好surprised！不過當日我要返工，我都係放左工由灣仔出發去機場，七點左右已經到喇！間房對正架大飛機，好正，如果Ambrose睇到嘅話！諗住第二日六點先退房，酒店又有個playroom，加上又有lunch buffet買一送一卷，諗住第二日叫奶奶湊Ambrose過黎玩吓！
在房間settle左之後就落去做spa，好耐都無咁relax俾人按摩，真係超正，好舒服，差d瞓著左！之後我地去左居酒屋食晚飯，不過佢地上野食真係超耐，我地都係d無咩耐性坐响度食野食好耐嘅人，最尾甜品都要催佢地快d上！
酒店個package有紅酒同朱古力送，不過我唔啱朱古力，我地另外買左少少零食去送紅酒，一路睇住電視做“情陷紅磨坊”一路食零食，真係最高享受！因為自從有Ambrose之後，我地已經戒絕電視，睇戲更加少上加少，Ambrose而家我地食咩佢又要食，佢唔瞓我地都唔可以食零食，終於又有得睇戲又有得食零食，按完摩真係超爽呀！
可惜第二日醒嘅時候發覺周身唔多妥，個人好似俾人打左一身，頭重重，個人好熱！原來我發燒呀！爹爹又超頭痛，佢重痛到入左洗手間嘔，嘔左好幾次先出返黎，身上最慘無頭痛藥，結果，本來諗住可以接埋Ambrose入黎玩同食buffet，都要取消，拿拿林打返公司請假，退房返入屯門睇醫生！而爹爹嚐試响機場買頭痛藥，點知搵左兩間萬寧都無，至慘佢唔係隻隻藥都食得，想買第二隻牌子都唔得，重要開車返入屯門，好慘呀！
我去睇醫生果陣個人真係好虛，不時打冷震，全身肌肉閃電式痛，掂到少少又痛，最慘係要等，等左成個鐘先入到去見醫生，見完又要等攞藥，真係攞命！食左少少野返屋企食藥瞓覺，瞓醒就起身食野，點知半夜又再發燒，我好耐都未試過發燒喇，重要一發退左又再發過咁利害，好彩我已經一早將自己隔開左另一間房瞓！呢一次病我足足攞左四日病假，自己昏迷左幾日，瞓到翻天覆地，不知時日過，好番嘅時侯已經係星期六喇！
2011年嘅情人節真係好難忘！多謝爹爹安排左咁好嘅節目俾我，奈何又用盡唔到兼病到懞左收場，不過都好開心，耐唔時有咁relax嘅時間可以二人世界，真係超正！希望下年又會有surprise啦！哈哈！
訂閱：
文章 (Atom)