芭蕾舞學校家長日(4y7m)

不經不覺，Ambrose學習芭蕾舞已經兩年多了。當初讓Ambrose學習芭蕾舞，其實只不過想俾多d機會佢試吓唔同嘅野，諗住芭蕾舞可以周身郁，對於只有兩歲半嘅小朋友黎講，似乎比坐定定的上堂較適合。呢d非學術類嘅興趣班，基本上只需上堂，不用再回家練習；再加上男仔學芭蕾舞，媽咪完全無期望，所以，一直以黎，學跳舞係零負擔的，原則只係時間應付到便繼續上吧！

雖說只當芭蕾舞是玩玩的性質，可每年四月也會有考試的，考官更是由澳洲飛來香港作考核。所以，每年芭蕾舞學校都在試前舉行一個家長日，讓家長觀課。上年因為要參加畫畫比賽，沒能參與；今年，終於有機會了。這是兩年以來，爹爹媽咪第一次看Ambrose上課學習芭樂的情形呢！上課中的Ambrose很貪玩，有時又唔多正經，唔知係咪因為爹爹媽咪在看，所以特別興奮。看到他認真的拉筋，時常咧嘴而笑，很是enjoy的樣子，媽咪也就沒有太計較他有點搗蛋的表現。

Home Art Jamming @未來的交通工具A780 (4y6m)

Ambrose興趣班今星期的Show & Tell主題是交通工具，先要搜集常見的交通工具圖片，然後再設計一款未來的交通工具作封面！因為沒太多時間及途徑搜集圖片，所以都是叫爹爹上網找了再印出來便算，哈哈！然後，就請Ambrose畫一款未來的交通工具出來！不知道是不是爹爹一直向他說A380是最大的飛機，有兩層的，所以Ambrose覺得好勁，然後佢就朝著三層的飛機方向畫了他心目中的未來交通工具了，哈哈！這架三層飛機，Ambrose叫它做A780，有六個引擎，可以在太空中飛行，勁！

畫好了封面，將圖片及封面加上透明膠片及硬咭底紙，釘了洞，再用毛絨條繫好，就成了一本書，Ambrose很喜歡呢！

可愛的英文工作紙 (4y5m)

Ambrose的英文興趣班，一直都令媽咪好苦惱，似乎，轉了幾次，Ambrose都沒有特別得著及進步。由於之前有過不愉快經歷，所以媽咪對挑選興趣班已經沒有太大要求，只求他有興趣上，上得開心，沒有壓力就算。聖誕節時剛好同Ambrose又試報了一間，中心門口放左好多玩具，希望Ambrose會喜歡呢度。上了近五、六堂，一切都順順利利的，Ambrose無唔想上，但亦唔見佢點提上堂開唔開心，老師好唔好等，所以媽咪亦都一直唔太知道Ambrose上堂大概做些甚麼，學過甚麼！

兒童樂團(4y3m)

Ambrose學小提琴已十個多月，看著他由亂拉一統到現在可看譜拉簡單樂曲，由當初成日叫住佢溫習到現在佢自發練習，真的很開心及感動！

Ambrose一直都是單對單上堂，雖然覺得較集中及有效學習，但就沒有同其他人交流的機會，當有些地方拉得不太好的時候，爹爹媽咪指點Ambrose，佢總唔願聽，堅持自己沒有問題！唔知係咪覺得自己已拉到了歌曲出來，少少錯處並不在意，在媽咪眼中，覺得佢對自己要求不高！

學校旅行@K2 (4y3m)

今日係Ambrose學校嘅秋季旅行。其實學校旅行呢兩年外判左俾本地旅行社搞嘅一天遊，所以行程都係悶悶地，如果唔係覺得學校旅行可以一班同學仔一齊出發一齊玩，大拿拿近二百大元一位，媽咪真係唔多願意去！記得上年係去大坳門放風箏，再到西貢食海鮮餐，然後去獅子會自然教育中心，行程真係唔錯，亦因為呢一次旅行，爹爹媽咪認識左大坳門呢個放風箏嘅好地方！今年，行程真係麻麻地了，先去荔枝角公園，再去熊貓酒店Lunch Buffet，再參觀恆香餅家，最後就係綠田園！

ABRSM@小提琴 (4y2m)

Ambrose學習小提琴已經有十個月了！由於Ambrose三歲多一點開始學，媽咪當初預計佢嘅進度唔會快，始終咁細個嘅理解力都係較弱，而且亦要協調持弓、看譜、拉弓、撳線、數拍子等等，真係唔係短時間可以拉到似樣d嘅歌出黎！ 

腳傷後的第一個上學天 (4y2m)

尋晚Ambrose撞到右腳，腫到豬蹄咁，都有諗過第二日仲番唔番學？想佢番學，係因為唔想因為只係腳傷就呆在家中，亦都唔想俾佢覺得可以咁易唔使返學；但另一方面，又擔心佢瞓醒第二日，腳傷會更腫同更痛，所以一切都要等第二天瞓醒看看情況才決定。

退出交通安全隊(4y2m)

真係唔明Ambrose點解對於交通安全隊咁焦慮，明明個個小朋友都對套制服好迷戀，好想入選去玩步操，偏偏 Ambrose入左選竟然唔多願返！原本仲以為因為英文班搞到佢好抗拒，點知cut左英文班之後，亦唔覺得留校上交通安全隊有改善嘅跡象！每個星期都會問定今日星期幾？幾時到星期三？如果仲有幾日都無咩野，但如果第二日就係星期三，佢就會尷尷尬尬咁話自己有少少驚喎！又係例牌氹吓佢無野好驚，學校日日都去，留校吃飯咁多同學仔一齊會好開心，諸如此類的安慰說話，講過好多次了！

同老師溝通過，亦係話可能佢需要d時間去適應，老師亦有講過，佢已經同Ambrose重申過好多次，留校上交安並唔係罰留堂！但Ambrose唔知點解對於無得搭校巴返屋企有份執著，總係唔搭唔開心咁！

以為只係時間嘅問題，所以一直都唯有係等待，等待Ambrose慢慢適應！點知...................

Coloring @ School Worksheet (4y2m)

早前見到Ambrose檯面又有學校派嘅worksheet，今次唔係pattern而係油顏色，見到時其實都見佢已經油左顏色的了，不過由於媽咪忙，無時間幫佢執同埋file起，所以就不了了之！

Pattern @ School Worksheet (4y2m)

而家學校唔知係咪都會整d半頁嘅worksheet俾小朋友玩，有次見到Ambrose書包內有填色紙，問佢佢就話係老師俾嘅，再問佢點解會俾，佢就話係唔玩玩具會俾呢d紙架喎！都唔知真定假，但好肯定一定唔係功課囉！如果真係唔玩玩具可以油下顏色，都係一個唔錯嘅選擇嘅！ 

K2學校手工 – 魚 (4y1m)

無留意Ambrose呢個學校手工幾時派返回來，只係突然有日發現佢掛左响個櫃上面，哈哈！平時都好少記錄Ambrose在校做的手工，不過呢條手工魚，一見到時就覺得一定要記錄下來！並唔係因為Ambrose整得特別靚，而係媽咪一見到條魚嘅時候，見到佢身上嘅魚鱗貼得好工整，好感動呀！感動在於媽咪記得响Ambrose好細個時，有一次在家同佢做紙碟魚，當時係媽咪整一隻，Ambrose整一隻，只係痴番d魚鱗上去，Ambrose有版跟住貼，媽咪從旁不斷指點，佢都貼到亂哂！而今，呢條魚竟然油得都幾靚，魚鱗工整排列貼在魚身上，真係好大對比呀！

歇斯底里的驚恐 @ 英文班part 3(4y1m)

Ambrose嘅英文學習進度好慢，媽咪真係唔知點教佢，亦都唔知邊度嘅英文班好，可以俾佢試吓！最大問題係，佢都已經K2喇，黎緊嘅暑假已經開始要見小學，真係無咩時間再試！

媽咪留意到區內一間中心有英詩朗誦班上，見Ambrose普通話方面都試過考試比賽，英文就毫無進展，以前曾經target過五歲就考Cambridge，但見Ambrose進度，除非佢突然有一日突飛猛進，唔係都應該應付不了呢個試。所以，媽咪就諗，read and write唔得，至少oral and listening都要加強訓練一番以應付之後小學面試吧！俾Ambrose睇過咩係英詩朗誦，佢話ok，所以決定俾佢上吓！而另外，間中心亦有做promotion，外藉老師單對單教授，鐘數越多就越平，媽咪真係唔知邊間中心上至夾到Ambrose，見呢度單對單如多鐘數一次過買的話價錢尚可接受到，內容亦可根據媽咪要求制定，媽咪覺得可能可以好似普通話咁，針對性上堂，對Ambrose黎講會好d！於是，為左慳時間出去上堂，媽咪安排了英詩朗誦同埋單對單直落咁上，一共兩小時！

一直以來，Ambrose上興趣班都無咩大問題，只係轉跳舞學校時曾扭計唔肯入過一陣子，媽咪歸咎於當時Ambrose太細，只係三歲，就要佢由上開嘅一間跳舞學校轉過另一間，所以一時未習慣。自此之後，上興趣班就甚少遇到問題，爹爹媽咪一直都為Ambrose呢方面嘅乖巧而欣慰不已。是以，當媽咪安排新嘅英文班俾Ambrose時，亦沒有太多顧慮。

點知，Ambrose學英文之路真係一波幾折！

唔知做咩 @ 英文班part 2 (4y)

無上之前嘅英文班，媽咪幫Ambrose報左個Phonics班。本來中心要評估完再度過個時間，話俾差不多level嘅學生同班，但上左一堂後發現，原來中心有竹昇妹／仔，或外籍人士樣嘅英文老師，於是，爹爹話要學，咁就上外籍人士啦，俾 Ambrose對多d紅鬚綠眼嘅人，反正學校不嬲都有，佢都無問題，唔爭在呢度都對吓喎！所以就同Ambrose轉左時間，由本來女嘅竹昇妹轉左個男嘅外籍老師，都唔覺轉時間有難度，唔知究竟有無真係夾過小朋友level！

上左幾堂，次次問親Ambrose學左咩，佢都話唔知呀，唔記得呀，一係一放學即問佢學左嘅sound，佢都可以答錯，真係俾佢激死！問佢老師有無講故事，佢又話無，問佢响入面做咩，佢竟然話玩！而事實上，之前媽咪真係响門外聽到收拾積木嘅聲！

虛耗時間 @ 英文班part 1(3y10m)

Ambrose嘅學術方面一直都麻麻地，唔知係咪記性唔好，所以認字能力都差！由於一早已感覺到佢係一個Slow Learner，媽咪於K1時已安排左英文班俾佢上，諗住由細細個俾佢慢慢浸下，幫補下佢課堂唔吸收嘅問題！因為細個，所以對英文班無咩特別要求，仲同埋兩個朋友仔一齊上諗住開心d輕鬆d。由於係平日上，媽咪甚少接送上堂，所以一直都無咩點理上堂教左咩，學左咩，放左學更加係無理，亦唔會同佢溫書，諗住輕鬆學習！

如是者，上左約八個月之後，Ambrose有一朝早第一次向媽咪講話唔想上英文班，媽咪當時以為佢想去玩唔願返學，所以都係氹吓哄吓佢就算，不了了之！一、兩個月後，Ambrose又再向媽咪提起唔想上英文班，媽咪問佢點解，佢就答話老師好惡，話老師成日鬧人，但再問佢老師有無鬧佢同鬧d咩野嘅時候，佢又話唔係鬧佢。同爹爹商量完，覺得既然Ambrose唔係第一次咁講，佢必定suffer緊某d野，所以至令佢再三提出要求，如果做父母都唔去幫佢，真係會好無助。

Ambrose的焦慮@交通安全隊(4y1m)

對於Ambrose被選入交通安全隊，爹爹媽咪本以為係一件開心事，因為見交安要步操，覺得Ambrose鍾意操兵，加上有制服著，佢一定認為好有型，所以佢一定鍾意。其實報交安前爹爹媽咪係無問過Ambrose，因為真係覺得好啱佢，同埋一直以黎，除左學小提琴係Ambrose自己提出之外，其他嘅興趣班都係爹爹媽咪安排俾佢，一直以來都相安無事！

點知，唔明點解，諗住一個唔會出事嘅興趣班竟然可以出事！

K2學校生日會 (4y)

之前Ambrose的學校生日會，除左蛋糕之外，都無同佢預備其他野！第一年N班一開學就搞生日會，媽咪都無咩經驗，完全唔知發生咩事；第二年就有為Ambrose準備蛋糕！

入選交通安全隊(4y)

Ambrose今年上K2，終於都有學校興趣班可以報喇！不過由於好多野都已經出左去學，無咩時間；又因為留校上興趣班搭唔到校巴，為免太麻煩，媽咪只係同佢報左交通安全隊，諗住唔係學術野，可以俾Ambrose輕鬆下，同埋返學多d投入感！

 

報前都知道要老師揀過先，但媽咪一直都認為如果無咩特別，應該人人有份嘅！至於點揀，真係無人知，只係估，係咪睇個小朋友做步操時手腳協唔協調？！

 

幾日前，有同學仔轉告其媽咪，話老師叫左幾個同學仔出去玩交通安全隊，Ambrose並唔係其中之一，媽咪就諗Ambrose可能落選了，回家再問Ambrose，佢又話老師都有叫佢去做動作，至於咩動作，佢就守口如瓶！

 

尋日收到老師電話，話Ambrose入選了交通安全隊，但因為太多人報名，學校打算分兩隊，老師詢問媽咪調動時間之安排，但由於調動時間後影響本身的興趣班，老師話remark左先，問埋其他同學仔先決定到。但如果真係調動唔到，有機會入唔到隊。無辦法之下，媽咪就同興趣班老師講要調時間。忐忑著老師最終究竟安唔安排到Ambrose順利入隊呢？！

 

今日終於收到通告，Ambrose真係入選左學校交通安全隊，屬新界北第55隊（真係奇怪，我地都唔係住新界北嘅）！原來真係唔係人人報都入到，有ｄ同學仔報左都入唔到，Ambrose今次真係好好彩！

 

希望佢鍾意同投入，亦都希望佢入隊後可以訓練吓紀律同teamwork啦！

幼稚園畢業禮表演 (3y10m)

今年Ambrose有幸被老師揀選响畢業禮表演跳舞，一班三十人，揀五男五女。老實講，雖然Ambrose已非第一次表演，但這是Ambrose第一次被揀選為學校表演，媽咪自然有一點點緊張及壓力。

 

自從知道要表演，總覺得事情未必咁順利，就好似以前去親廸士尼、去旅行咁，一早講左出黎，都會臨出發至發燒，真係唔明點解次次都係咁，所以爹爹媽咪盡量低調，唔提唔講，但其實媽咪個心不知幾咁擔心，唔知到時會唔會有咩亂子。

 

日子越近，班中就開始有好多同學仔病左，有手足口、發燒、痾嘔等，個個都病幾日至一星期不等。擔心，但又唔可以做d咩野！唯有希望Ambrose嘅抵抗力可以頂到吓！無驚無險過左最後一星期，Ambrose無染病，以為可以順利過度，點知又發生電梯夾腳事件，疑似拋柴左兩日，果兩日真係忐忑得好緊要。表演咁難得，爹爹媽咪請哂假，去唔到都會好失望，但如果真係腳傷，都無辦法。但因為跳舞有partner嘅關係，媽咪一直都擔心，如果真係跳唔到，咁個partner點算好呢？呢個至係最大問題！

 

好彩，最後都無事！Ambrose今日可以如期表演！

 

一早送左佢返學校綵排，擺低佢之後就直接去元朗食早餐，跟住就排隊等入場！以上年經驗，上年係排隊先入先搵位，但原來今年學校將唔同團體分左顏色飛，表演、畢業、領獎同觀禮嘅家長分唔同zone坐，早知唔使咁早排啦！

 

終於等到跳舞表演，由於老師同小朋友set哂頭化哂裝，加上媽咪又攞住攝錄機，一開始都見唔到Ambrose，不過好快媽咪已經locate到佢喇！見佢一臉認真咁跳，真係唧都唔笑個款，其實幾搞笑！唔知係咪學校日日都有練舞嘅關係，見到佢地跳得都好齊吓，反而比起自己出面嘅跳舞學校嘅表演比賽，感覺今次Ambrose跳得算幾好，雖然佢有時都要望住人跳，但起碼都無咩蝦碌野發生！

 

畢業禮完畢，一家三口跟左學校去Panda Hotel食buffet，但原來無同學仔去。開頭都仲擔心會悶，因為全部都係畢業學生及家長，但氣氛都幾好，老師叫畢業生再在台上表演，Ambrose好鍾意睇。見到d小朋友表演，媽咪就覺得時間過得真係好快，兩年後，將會輪到Ambrose了，個心真係好唔捨得佢咁快大！

 

認讀中文字(3y10m)

自從二月份見完家長之後，媽咪再諗住努力同Ambrose認中文字。當時，媽咪的起心肝買左個字咭掛袋返屋企，仲真係將個掛袋整上房門，方便俾Ambrose認字用。不過，咁大個掛袋整左出黎，Ambrose都可以視而不見，亦都無話有興趣問爹爹媽咪d字點讀。加上，當媽咪嘗試教Ambrose認字，感覺佢次次都係唔記得多，次次答媽咪都係靠撞，真係好沮喪！

 

如是者，掛出黎嘅字又無咩點update到，名符其實嘅三分鐘熱度！直至最近一個月，因為小一派位鬧得熱哄哄，爹爹開始擔心Ambrose落後大市，所以開始又搬來「無教點會識」嘅理論，爹爹著手教Ambrose英文字嘅同時，媽咪開始教認中文字！

 

英文方面，其實真係慘不忍睹，A-Z嘅大楷都仲係會亂，好似B同D，V同Y，N同Z，亂都算，原來當叫Ambrose自己默返A-Z出黎係唔得嘅，真係唔知同齡嘅小朋友係咪咁喇！爹爹仲教佢認英文生字，由眼耳口鼻、顏色同埋數目字嘅英文呢d咁基本嘅字起，但次次都教到嘔血，第二日再攞返出黎都已經洗腦，可以話係無進度可言。

 

中文方面，反而有少少驚喜，媽咪之前用左「有趣的文字」嘅字咭展示圖字俾Ambrose睇，雖然初初問佢字時，佢都係靠睇圖再答，但熟左之後，媽咪會將圖反轉，只認讀字，Ambrose開始可以認到少少簡單字了！另外，爹爹話曾經聽過Ambrose指住「門」字同「鳥」字讀，呢兩個字筆劃咁多，好肯定媽咪無教過，後來發現原來係學校之前教過，唔知點解咁深Ambrose都竟然認到。由於之前一直都無同Ambrose認字，所以媽咪主要先教Ambrose筆劃簡單嘅字先，但教教吓時，學校又話要做評估，見個個同學都有溫書，仲話個個都可唔睇圖都認讀到d字，媽咪同爹爹又急急特訓Ambrose認學校字先，唉！都咪話幼稚園無壓力囉！

 

學校嘅字其實都好深，有「醫生」、「飛機」、「泳池」、「謝謝」、「船」等，已經打定輸數Ambrose應該追不上，但原來當每個字同佢講吓似d咩似d咩，佢又好似好快可以認讀到咁！當然，都要每日都同佢讀吓，唔係應該好快又忘記了吧！但有d字爹爹媽咪都諗唔到點講似d咩，佢就真係忍唔到，真係要諗吓辦法至得！

 

另外，由於Ambrose都認到少少字，有日佢自己攞左「基礎漢字500」第一冊出黎，唔知係咪打開見到有d字自己識得讀，佢就開始讀俾爹爹媽咪聽，話係講故事喎，如是者，又學多左少少連接詞同形容詞如「的」、「有」、「很」、「高」、「在」等！

 

但奇怪嘅係，一些簡單嘅字如「水」、「火」、「大」、「木」，唔知係咪字形有少少似，筆劃又比較少，佢反而好易混亂左！

 

暫時自己教同認學校嘅字都認到幾十個，有d字上學期教左但完全無溫，都未攞出黎問Ambrose，唔知仲有幾多佢係識而我地唔知喇，希望係有啦！

Ambrose 的第三對芭蕾舞鞋(3y9m)

不知不覺，原來Ambrose 學芭蕾舞已經有十五個月了，雖然佢都唔會跳俾爹爹媽咪睇，但見佢返學放學總是笑咪咪的，知道佢應該幾enjoy跳舞，所以都任由佢繼續落去，當做吓運動。

 

當初學跳舞，媽咪親自同Ambrose買左對芭蕾舞鞋，果時只係size 8.5D，哈哈！仲記得果時第一次買時，個sale竟然俾左對size 10俾媽咪，一攞上手，超大對，唔使度都知唔會啱著！Ambrose轉左跳舞學校後，其實學校都有代訂芭蕾舞鞋，但媽咪都係堅持自己買，總係認為學校訂那對無自己買咁靚！

 

今晚，媽咪又要幫Ambrose買鞋了，呢對係佢嘅第三對芭蕾舞鞋，已經著到size10.5D了！之前果兩對，暫時都好好地珍藏住！睇住Ambrose 嘅鞋仔，先至發覺佢一日一日咁在長大喇，時間真係過得好快！唔知Ambrose會學幾耐芭蕾舞，會換幾多對芭蕾舞鞋呢？