Ambrose知道去倒數，心情好興奮，其實爹爹媽咪都唔知佢明唔明咩係倒數，極其量佢應該只係知有街去有show睇同埋會好多人，即係好好玩咁解！十二點先倒數，十一點已經有表演，仲有超級巨聲嘅歌星黎唱歌。不過由於天氣凍，又夜，無理由响街食足成個鐘西北風，所以雖然有表演睇，我地都係十一點半左右至落去，一路睇少少節目一路等倒數！Ambrose其實係一個幾鍾意睇表演嘅小朋友，只見佢好專注咁睇，好似好欣賞咁，可憐爹爹一直抱住佢先夠高睇，對手真係就斷！
倒數一刻Ambrose好落力咁大聲數，真係十級投入！倒數完後更有花火放，其實都幾靚，雖然係好短時間！一倒數完，四圍嘅人都開始散，爹爹終於可以放Ambrose落地，點知，呢個小朋友話肚餓同無力，實情係佢勁眼瞓，捱完倒數，精神一鬆就咩力都無，即刻暈低！結果，爹爹又要抱佢行返屋企，哈哈！
2013年，希望一家身體健康，Ambrose聽教聽話，學業最好可以有少少進步啦！亦希望爹爹可以响工作方面搵到滿足感，開開心心！
直至某日，Ambrose開始收到同學仔嘅聖誕咭，媽咪諗，係咪應該要回聖誕咭呢？因為Ambrose甚少提及班中同學仔，甚至媽咪攞張相去逐個問佢同學仔叫咩名，佢都答唔出，所以媽咪無諗過要派全班。反正見收到的聖誕咭只是一、兩張，那就不如索性收到的至回咭，一來可以俾Ambrose可以感受下聖誕節，二來起碼收到咭至知人地個名架麻！
由於媽咪一向唔太鍾意買聖誕咭，總覺得小朋友咁細個已經唔會識寫聖誕咭，如果張咭就咁買番黎，仲係由家長寫，咁其實又有咩意義呢？媽咪見要回嘅聖誕咭唔係太多，而且原來上年預備左嘅聖誕咭材料還有一、兩張剩，都係決定用埋佢喇！點知剛做起兩張，又諗起要做埋俾老師，同時又開始陸續收到其他同學仔嘅聖誕咭，似乎聖誕咭工作一開始就停不了！上年整聖誕咭其實係好蠢，媽咪要將雪白嘅畫紙印滿顏色，待乾；又要將聖誕公仔嘅stencils 小心奕奕印响咭入面，待乾；再要準備材料俾Ambrose親手製作。最煩係當時無特定咭嘅size，所以最後更要自己做埋信封，真係花左唔少時間！今年學精了，先去找找現成嘅信封，再去買埋A4厚顏色紙，只要再花少少時間製作封面嘅材料俾Ambrose做就搞掂！
媽咪決定做雪人，材料其實都好簡單，唔使另外買！雪人個身係用較早前新買床笠嘅包裝咭紙背面裁成圓形；再用Ambrose嘅diy學生相剪左個個頭落黎；手就用毛絨條屈成；雪人嘅鈕係之前書展買落嘅手工材料；雪人帽用少少顏色紙剪出黎；星星形foam stickers就真係要額外買黎貼上去張咭度無咁寡喇！封面其實都好簡單好快完成！最花時間反而係內頁！媽咪攞左字母印仔俾Ambrose自己印Merry
Christmas等字樣，但其實Ambrose又點會知點串？當然係媽咪讀個英文字母出黎佢去搵同印上去啦！所以進度好慢，但呢個又不失為一個幾好嘅認字嘅小遊戲！等到印好字，又要Ambrose自己寫名，當然又係媽咪串出黎佢寫！Ambrose其實都幾enjoy，覺得好好玩，但媽咪就辛苦了，正常短短時間就應印成嘅字被拖得奇慢，加上印字寫字都要不斷提Ambrose要寫或印邊個位，唔好離咁遠，高d低d，大d細d，真係講到口水都乾！首批完成嘅聖誕咭其實只有幾張，但就足足用左大半日閉門無出街而製成，真係好誇張！哈哈！
信封又係另一拖慢進度嘅一環，叫Ambrose自己寫名，下款已經唔敢叫佢寫埋，只係用番個名字印印落去就算，諗住都可以快快地，點知Ambrose又話要响上面畫公仔，仲要張張唔同，服左佢！
如是者，呢批聖誕咭其實只係做左幾張，仲要其中幾張係平日夜晚媽咪回家同Ambrose慢慢逐一做起嘅！今年媽咪嘅功夫係少左好多，不過所花時間亦唔見得少，只係Ambrose參與多左好多，所以時間相對真係好多。由於學校假期，有D同學仔响假期前果日先送聖誕咭，果d同學仔就無機會回咭了！原本已經準備多了材料製作多幾張送比幾個N班相熟同學仔，但假期甫開始媽咪已忙到不得了，所以最後也放棄了，材料還是留待下年再做吧！下年，相信要十一月尾開始要準備了！
搬屋前，問過屋苑個Security，屋苑外有村巴出觀塘一帶，登時放心了！搬屋後再去問村巴公司，原來村巴要買月票，而十一月已經full左，要waiting第三個至有位，呢個時侯至發現無村巴返工，真係好大件事！因為而家呢個屋苑位置比較不方便，唔好話村巴，九巴都唔多路線，有又要兜好多地方！上網不斷search左幾條唔同返工路線，撞正果幾日係咁落雨，真係好麻煩！第一日搭左架車出大窩口轉車，除左塞屯門公路，去到轉車又要等左好耐，等到有車仲多人到要企响司機隔離，再慢慢站站停，同埋再塞埋龍翔道，真係人都顛！終於當日遲左四十五分鐘至返到公司！呢條路線即時可以out喇！
之後試過是但上架巴士出左長沙灣，再轉地鐡，呢次就無遲喇，但全程又無位坐又迫人，仲要响德福步行去shuttle站，晨早流流真係好操勞，如果可以，免得過都唔想迫地鐡啦！
之後就再試搭最早架特別班去尖沙咀再轉車，點知上車無幾耐聽到巴士廣播話架車機件故障，將不可繼續行駛，會安排轉車。但全車人都瞓哂覺，無人有反應，又唔見司機有行動，直至行到出旺角，司機至停車叫人落車轉過第二架巴士，就係咁，原本唔多識路嘅我遇著壞車，再上左架唔知咩巴士，都唔知响邊落車再轉之前target左嘅車，真係幾徬徨囉！結果真係搵唔到要call老公，點知佢又做緊野唔得閒，眼見就夠鐘都仲企响尖沙咀未搵到站上車，真係不得不咒罵，九龍灣真係個不折不扣嘅地方！後來當然也找到車站，遲了三十五分鐘！
心有不甘地於第二日再試同一路線，心想今次無壞車，而且經鑽研後發覺早一個站下車再轉車上會慳兩個站，有機會可以準時返工，點知都係遲二十五分鐘！呢條路線又要certified喇！
返左幾日工，真係辛苦到想死，轉折都不在講，仲要早起身，天未光六點半起身，天寒地凍真係唔知咁返工法可以捱幾耐！
唯有再試下有少少傻嘅方法，搭接駁車返入屯門再搭村巴直出，架村巴到mega box附近有站，行返公司十分鐘左右，無遲到，仲要早到，可以夠時間食個熱早餐添！呢條路線其實最舒服同理想，而且如果夾啱時間上車下車，其實呢度比較stable一d！但咁都唔係代表可以晏d出門，都要七點咁早，唉！
响好沮喪嘅時候，終於收到村巴公司打來話有位喇！不過就得一班車，七點十樓下上車，其實真係好正，時間晏左又咁近上車，唯一擔心係七點十開車，八點九可以到九展嗎？而因為月票形式交費，即係話一交就交一個月嘅錢，如果時間真係夾唔到，呢幾百蚊都會白費，所以第一日搭時真係好緊張！
唔知係咪真係太黑仔，第一日搭，架車竟然遲到，問過其他人，佢地都話架車好少遲，通常早到，呢一遲大概有五至八分鐘，加上又下雨又有少少塞車，再响shuttle站遇正長人龍，最後都無驚無險準時到公司樓下，計埋買早餐同搭lift，都係遲左五分鐘左右！
再試多一日，已經係早五至十分鐘到公司樓下了！呢次搵車返工嘅惡夢就此結束！而家可以七點至起身，真係太好喇！
十一月二十四日搬家了！在這之前及之後的日子，真的很忙很忙！之前爹爹一直都不希望太早執拾，因為一旦開始了，家裡一定會很亂，而家中又有Ambrose，實際環境又不可以太亂，始終小朋友都會在家周圍跑跳玩，又會好奇執屋入箱的東西，總之預期如果太早執拾，家中寸步難行就一定會很麻煩！所以盡量將執拾期縮短至少於一星期！
以前兩個人的時侯，物品不多，搬家並不太煩；如今多了個小朋友，物品真是多到令人頭痛！一開始執，就發覺一星期其實真的不很夠！所以搬家前的一星期差不多晚晚也在開夜車收拾！早期執拾時也會執拾得一絲不苟，但到後期時，時間無多，而且有些東西真的不知道如何入箱，爹爹也就開始見東西就掉入紅白藍大袋就算！
直至搬家當天，家中很多東西都未入箱入袋，真的是一邊搬一邊執！由於姑丈有貨車，所以一如以往也沒有請搬運公司搬屋，都是幾個人搬呀搬的！不過如果有下次搬屋機會，還是請搬屋公司搬吧！大家也舒服一點，而且不用煩惱吧！
說回新屋，其實也沒有像之前的一間拆清所有東西進行大裝修，一來是資金問題；二來這幢樓齡較新，前業主又保養不錯，部份東西也可以保留；三來是因為此次搬屋一買一賣，遷就資金流動的時間，盡量將成交的時間調好，新業主肯將原屋租回給我們兩個月，好讓新屋成交以及裝修，雖然兩個月聽來很長，但實際由收樓至需要交吉時間也只有五星期左右，所以亦不容大裝修了！
搬了家其實就應該要盡快拆箱收拾，但好可惜，之前在十月訂了幾張床櫃也未能如期在搬家前送到！應該說，到今日為止也只有Ambrose床櫃到了，其他的都未有，所以拆箱收拾是不太可能了！可幸是所有床褥也有，大家也只可在地上睡，感覺上怪怪的！
真希望可以盡快有櫃有床可以收拾一下，快點有個舒舒服服的安樂窩吧！
今年生日正日係星期一，原本轉左工，多左假，其實想生日放假抖吓，但因為黎緊十一月又要搬屋，應該又會攞吓假，計吓出年二月新年個檔期，攞兩日放九日，同埋四月又要攞假去旅行，都係算啦，留番D假有時有咩突發野要放都有假放丫麻！
由於唔放假，爹爹當日又要返工，所以上星期五已經一家三口出左去L Hotel食Buffet喇！一向都鍾意L Hotel嘅Buffet，雖然遠左d，但環境好、服務好、食物啱口味，而且價錢又抵，所以去食Buffet，呢度係我地嘅不二之選！不過今次就有d失望啦！感覺上少左野食，好似沙律咁，連蕃茄仔都無埋，又無粟米粒，只有幾款菜，都幾寡囉！生果可能菠蘿唔當造，所以又無左，取而代之係橙粒，都幾奇特！西瓜唔甜，蝦蜜瓜無味，配埋又係淡貿貿嘅火龍果，生果同沙律呢part我至愛已經fail左喇！好彩仲有無限嘅蟹腳、翡翠螺同枇杷蝦，仲有北海道牛乳奶凍，都好啱食！希望今次只係個別事件，下次再去會正常番啦！唔知點解我幾鍾意呢度！因為生日，酒店送左個火焰雪糕蛋糕俾我地，黎嘅時候至點火，不過一點再攞上台，d火已經熄哂，快得好緊要！好耐都無見過火焰雪糕蛋糕喇，對上食果次可能係大學時代了，所以都有驚喜！
今日正日生日，返工都係無聊聊，新工無人知我生日，都係正常返工食飯放工！原本放工都無諗住出去食飯，老公話反正Ambrose上小演員班都要放七點，都係放左學食埋飯，買埋蛋糕至返屋企喎！所以上完堂，是但去左間唔使等位嘅板長食壽司，食完飯後Ambrose已經急不及待去買蛋糕！真係唔知邊個生日，佢係咁睇蛋糕，睇中左一個布甸蛋糕一定要買，我其實嫌個蛋糕大，得幾個人食好似好難食得哂咁，而且，硬係覺得布甸蛋糕咁新穎嘅野，老公同Ambrose都未必鍾意食！不過點拗都拗唔過Ambrose，佢係咁“捱”住人地個玻璃櫃指住話要個蛋糕，又跳又想喊咁款，最後我都要屈服啦！
買完蛋糕返屋企切，Ambrose都好落力幫手打開個蛋糕同set野！我自己就去左攞上次買番黎嘅煙花candle點，yeah！好靚！之後Ambrose又當正係佢自己生日咁，又話要切蛋糕分蛋糕，oh my god！真係俾佢笑死！
無expect到收到禮物，因為近排為間屋都好煩好忙咁！點知老公竟然買左個Chanel手袋俾我，真係好驚喜！仲要係我鍾意嘅shocking pink系列，好開心！
結果Ambrose真係唔食蛋糕入面果大舊布甸囉，所以基本上個蛋糕雖然大，其實都係唔難食得哂，最後只係留左一件第二日食，好輕易就ko左喇！
七月尾簽左約賣樓同買樓，等呀等的，終於都收左樓喇！住緊果度其實九月尾已經成交左，不過新業主好好人肯租番俾我地住多兩個月，等我地一收樓執埋間屋搬過去！
其實都係原區搬，無咩特別，無辦法啦，兩邊嘅屋企人都住呢區，加上一堆複雜嘅問題，無辦法搬出去第二區，唯有趁樓價升，換一換個好少少嘅環境俾Ambrose住啦！
七月尾簽左臨時約之後，都有去睇過傢俬裝修嘅野，不過屋企嘅緊張大師成日都驚有變動，一日未收樓一日都唔敢咁早take action，所以都係睇完知道下大概想要咩就算，所有野都係留番收左樓至搞喎！
上星期終於收左樓，仔細望左有咩要整，同埋度好哂尺寸，今日趁放假，我地兩個都忍痛擺低左Ambrose走去訂傢俬同買部份電器！原本其實之前都已經睇好左大概鍾意邊d野，仲以為一行入去就可以買架啦，點知都係要再揀吓睇吓問吓，結果搞左成日都只係訂左大床、梳化、Ambrose床同埋買左浴室寶！今日睇左吊扇燈，未決定到買唔買，一來貴，二來唔知係咪真係涼，所以都要再睇吓諗吓先，反正都冬天，唔急用嘅！
早在年初時，爹爹見澳門威尼斯人做特價，所以是但揀左自己生日去住番晚，順便帶Ambrose搭船去旅行。因為媽咪轉工嘅關係，試用期滿之日僅踏正爹爹生日，返工無耐就話要攞假，唔多好意思，真係差d以為呢次旅行未必去得成！原本今次旅行都有邀請埋公公婆婆一齊去，但兩老又話唔去，結果，爹爹因事忙又無時間plan行程，只係又見Sheraton新開又做特價，最後決定多住一晚，無咁趕，去到至諗有咩做好囉！
訂威尼斯人時，屯門係有船去澳門嘅，好美滿咁諗住响屯門出發好方便，點知到要出發時，間船公司已經停左航，結果又係要出上環上船！爹爹生日當日朝早，自然醒，起身就準備出發，食埋早餐去到上環，已經係十二點了，買左十二點船飛上船，Ambrose响船度食左野又瞓左，醒左之後仲問唔係去搭船咩？哈哈，可能架船實在太平穩，搭左佢都唔知！
去到威尼斯人取房，Ambrose非常開心，唔知係咪因為間房比平時嘅大，而且又有條小樓梯，佢可以行上行落，所以佢非常興奮！仲有就係個廁所好大，入左去之後仲有度門入座廁，Ambrose唔知點解對個浴缸好似好有興趣咁，係咁望住！
擺低行李，落左去樓下food court醫肚，只係買左兩份食物（一碗湯粉同一份薯條漢堡包），咁就$180，好貴呀！食完野，行左去搵酒店嘅兒童遊樂場，去到至發現，原來之前上forum見人講嘅Q立方，原來就係威尼斯人嘅兒童室內遊樂場，同埋係收費嘅！去到Q立方門口，其實都睇唔到入面有咩設施，職員只係有一張大咭俾我地睇吓入面設施嘅相片，咩都無就要決定入定唔入！但Ambrose已經黎到，佢已經知道係去玩，又點會肯唔入去玩丫，唯有乖乖俾錢入去！可能係平日嘅關係，個場好少人，係少到得幾個人，好冷清！其實入去前睇過設施圖片，都知有d設施唔啱Ambrose玩，但見有條長slide，覺得都可以，所以都照入！入到去，至發現條長slide係要坐在墊上“sir”落去，又話要著外套先俾玩，都幾煩！Ambrose玩在一次長slide已經唔肯玩第二次喇，可能實在太快太刺激了！於是我地轉左去爬上爬落行繩網，大人會覺有少少悶，小朋友應該都幾鍾意玩！
其實場內仲有兩條長slide幾乎係成直線咁“sir”落去，一條仲係要戴頭盔先玩得，望到都覺好得人驚，唔明點會有人玩，但又真係有小朋友不斷係咁玩喎！場內另有bb區，係俾五歲以下小朋友玩，於是我地又過左去玩波波池同迷你爬架！但玩玩吓已經有班內地較大嘅小朋友又過埋黎玩，佢地玩得真係好顛，係咁掉野，完全無人理，佢地亦無理果度仲有其他小小朋友，真係好無禮貌！所以玩左陣要避開佢地，走左去玩eye play！呢個雖然係電子遊戲，但佢係project落地上，用眼睛望，用腳玩，好似會有老鼠出黎食芝士，要用腳踩老鼠；又有泡泡飄出黎要踩爆泡泡；仲有踢波等，成身都郁到，真係幾好玩！好可惜，又係俾班內地小朋友迫走，真係無癮！响Q立力玩左兩個鐘，都係時候出去行吓！
威尼斯人行出去，其實都只係行過去官也街，無咩特別！不過Ambrose一出Q立方就已經暈左，哈哈！見佢瞓左，入左去一間食翅嘅舖頭飲番碗湯，仲諗住舒舒服服飲完就走，點知爹爹又話有野食唔叫Ambrose唔係幾好，走去叫佢起身飲湯。攰到爆嘅Ambrose醒左都遊魂咁，湯都唔飲就知佢今次係堅攰啦，真係唔應該叫佢起身！
响官也街食埋晚飯，本來打算係Galaxy睇大鑽石，但Ambrose又成日話要坐船，所以都係返去坐貢多拉！日頭行過見唔多人坐船，仲以為幾時去都有得坐，當我地去買飛時，職員就話係last boat，要等半個鐘之餘，仲要同其他人一齊坐，之後再有遊客想坐，都已經話close喇！最後，足足等左九個字至上到船！船夫幾好，唱完唔知咩文嘅歌之後，竟然唱左首月亮代表我的心，當同佢講起首歌意思時，先至發覺佢其實唔識國語，只係識唱呢首歌！仲有，為左逗Ambrose開心，佢又唱左Twinkle Twinkle Little Star同埋Row Row Row Your Boat等兒歌！
坐完船，終於都返房了！返到去就已經見到酒店送的蛋糕响檯上，都幾靚！簡單唱左生日歌，Ambrose已經急不及待幫爹爹吹熄埋candle要食蛋糕了！哈哈！
食完蛋糕沖涼去！Ambrose好心急，因為爹爹話俾佢浸浴，而媽媽之前經過樓下嘅Lush，買左個泡泡彈俾佢浸浴用！但其實一向無試過浸浴缸嘅Ambrose，唔知點解聽見有得浸浴缸就咁開心，都唔明佢知唔知浸浴係咩一回事？！俾左個泡泡彈俾Ambrose掉落水，見佢都驚驚地咁，真係好笑！個彈落水就開始“咋”“咋”聲咁溶，其實咪好似平時d“康鈣思”咁，Ambrose都好鍾意睇，唔知點解放大左就驚，叫佢落水佢又問個彈仲响唔响度，俾佢笑死！今次個彈揀左紫色，好似係黑莓，聞落都幾香甜！Ambrose落水後就異常興奮，好開心係咁玩水，見佢咁開心，媽咪諗住第日搬左屋後有浴缸又可以同佢再玩過喇，唔使等去酒店啦！
呢一晚，Ambrose都好攰了，浸完浴缸，舒舒服服好快瞓著左喇！
第二日，瞓醒執埋行李準備check out。原本Sheraton三點先可以check in，十一點半咁早，其實諗住過Sheraton寄存行李先，點知好好彩問一問可否check in先，又得喎！結果，舒舒服服攞左房放低行李，真係好好！不過因為Sheraton只係standard酒店房size，Ambrose一入到去好失望，佢念念不忘威尼斯人，係咁話要去“有兩個廁所間屋度”！哈哈哈！
呢一日打算去科學館，朋友們都話好玩，值得去！搭的士去到科學館時，發現呢度好似人跡罕至咁，去就有的士啫，走都唔知點走喎，之前又無plan過睇過，不過既然去到，走先算啦！
入到去買飛，原來話張飛入左去唔可以出番黎再入，所以要食左野先入得，果度又只得一間麥當勞，所以唔想食都要食！
食完野正式入場，一入去就有座穿梭機火箭，再行入去睇展品，一個人都無，靜英英，好多展品又唔俾玩，只係純睇，其實有少少無聊！見leaflet有兒童館，都係去左兒童館先！都係一d小玩意，最特別係有個工地俾小朋友角色扮演扮工人入去搬運，仲有工衣同帽，Ambrose就幾鍾意，係咁搬黎搬去！不過又係無人，只得一個較大嘅小朋友同Ambrose一齊玩！工地遊戲其實都唔錯，透過遊戲俾小朋友認識到槓桿原理、運輸帶操作原理、天秤操作等，當然Ambrose都未識，佢只係投入個角色當玩咋！
行埋其他館，都係一d水力遊戲，物理原理等，唔係唔好玩，但一來Ambrose未識，有d都無咩興趣，二來個場真係人影都無隻，好悶咁！最後Ambrose又要求返工地開工！
開完工又去左地下出口處嘅室內遊樂場玩，其實就同平時室外遊樂場差唔多，但Ambrose玩到唔願走，爹爹媽咪就悶到傻左！
响科學館走左之後，Ambrose又係暈左，爹爹媽咪一路行一路搵車都搵唔到，唔好話車，人都唔見到個，真係唔知點算！終於行左一輪出大街截車，截左一輪好好彩至截到一架的士，直去大三巴！
去到大三巴，Ambrose醒左，終於可以去呢個地標影番張相，算係到此一遊！影完相，响附近行左一圈，超多人，無咩好行，都係決定走人！本來想搭的士，又係好難至截到架的士，一聽到話過氹仔就話唔去，有無攪錯！結果又盲摸摸走左去搭巴士，去到官也街行番去Galaxy，睇埋個大鑽石，食埋飯，又要過番威尼斯人買番個泡泡彈俾Ambrose玩！今次想話買個橙色，點知無，唯有買個綠色啦！
返到酒店，又係開左缸水俾Ambrose掉泡泡彈入去玩，呢缸水係綠色，都幾似好清嘅海水咁！呢一晚Ambrose足足玩左二十分鐘，浸完出黎紅卜卜嚇到爹爹死死吓，同佢量體溫又去到38度，仲以為佢真係發燒，好彩一個鐘後再量，已經降哂溫喇！下次都係唔好較到d水咁熱，同埋唔可以浸咁耐，真係虛驚一場！
呢一晚，媽咪自己一個人落酒店樓下行街，不過都無野好行，只係去左Zara行左一陣！雖然同香港款式係一樣，不過無人行就行得舒服一d囉！
第二朝早要十一點check out，都幾早！去左Zara幫Ambrose試褲，再去官也街買埋手信，食埋午餐都只係一點！本來買左船飛三點走，最終都改早搭兩點船！
今次澳門之旅其實都幾悶，俾左幾千蚊其實有d唔抵，加多少少可能去一轉台灣都夠，起碼可以坐飛機同埋去動物園！不過媽咪相信，對於Ambrose黎講，一d都唔悶，應該仲會幾好玩，只係大人陪玩playroom，好似有少少無癮咁啫！如果之前plan好d，可以出去戶外行吓觀光吓，其實應該唔差，只係之前真係無時間，唯有當今次係hea遊，輕鬆一下！不過澳門真係未來五至十年都應該唔會再考慮去喇！哈哈！
出發了!
貢多拉
爹爹生日快樂!
落泡泡彈玩浸浴!
YES!!!
旅行不忘畫畫!
小工人!
拼名字!
到此一遊!
又買左個炸彈玩
就係呢個泡泡彈
正!暑假時幫Ambrose報左上summer course，日日都要返兩個鐘，日日有兩個主題要上，以防佢放暑假放得開心得濟唔記得哂返學係咩一回事，到k1開學又喊過！出奇地，Ambrose好鍾意呢間學校，由day 1開學就响門口已經好期待入去返學！而且上左三星期，見佢又會返屋企提吓學校嘅情況，學校又每日將上堂影低嘅相upload上facebook俾大家睇，真係好好！雖然媽咪一次都無同過Ambrose返學，但各方面嘅野都令媽咪對呢間學校印象好好！
以為暑期班上完就算，點知有一晚老師打電話俾媽咪，話想同媽咪交代吓Ambrose返學嘅情況，真係令媽咪既驚且喜，咁樣一傾就傾左四十七分鐘，N班老師都未試過主動打黎傾咁耐呀真係！內容其實離唔開Ambrose，老師除左講左d上堂趣事俾媽咪聽之外，亦都將平日佢地觀察到Ambrose嘅野同媽咪分享！
老師對Ambrose睇法大致如下：
1) Ambrose係一個幾有主見嘅小朋友，佢會有自己嘅preferences，亦都會同老師講佢想點，唔會問極都無反應！
2) 因為二表姐同Ambrose一齊上，老師話二表姐比較怕羞同被動，老師初時以為二表姐係“呀妹”，因為Ambrose係咁叫佢，於是老師拜託Ambrose要照顧二表姐，結果，老師們對Ambrose處處維護二表姐都感到好驚訝，覺得佢好有責任感，好man咁話喎！
3) Ambrose嘅小肌肉好好，好多時做手工老師們都要幫一幫小朋友，但Ambrose完全唔使人幫，可以自己攪掂哂！
4) 學校有教畫畫嘅老師，佢話Ambrose好多時腦入面已經有幅圖畫，唔使老師講完，佢就已經自動波畫出黎，佢有自己嘅ideas想幅畫係點，手仔又夠力，老師叫媽咪要多多培養Ambrose畫畫呢方面喎！
5) 老師以為Ambrose有上開音樂班，因為佢話覺得Ambrose有拍子感，有時上堂唱歌仔佢會跟住搖動身體，老師話見佢唔係亂搖，而係有跟拍子搖！睇黎都係時候要搵定d音樂啟蒙班喇！老師亦有提到因為Ambrose會唱吓搖吓，同學仔見到佢咁開心又會跟住唱，所以老師覺得佢可以帶動到上堂氣氛，有leadership，不過媽咪反而擔心佢會擾亂課堂秩序囉，唔知佢平時返幼稚園會唔會都係咁？！
6) Ambrose對於識嘅問題係會答，如果唔識佢一定唔會答，而且佢都會唔怕羞，遇到唔識都會不停叫老師，叫到老師理為止，嘩哈哈！
最後，媽咪原先一心想同Ambrose响呢間報英文pre-starter，同老師傾完之後，覺得都係上住一至兩期kiddy先，睇吓佢嘅進度點先至轉去pre-starter，咁樣佢會適應得好少少喎！
見Ambrose响呢度返學仲比返幼稚園開心，突然諗，其實以Ambrose嘅性格，將來係咪都要搵d活動教學嘅學校讀至合適佢呢？
總括Ambrose三歲生日會，媽咪其實好滿意，尤其是自己親手做嘅佈置，得到各朋友們嘅讚賞，真係好有滿足感！另外，媽咪最鍾意放煙花果一刻，真係好靚好靚，媽咪覺得同個蛋糕真係好夾，果一刻見到個蛋糕，諗起之前由無idea到整到出黎，效果亦好好，又係好有成功感！最記得放煙花時各人都扮吹candle，亦有人以為真係可以吹熄，係咁吹係咁吹，其實煙花candle夠鐘就會熄，但各人都咁開心投入，氣氛真係好好！雖然好多人都會去麥當當開生日會（媽咪一個月已經參加了四次了），真係好方便，買個蛋糕咩都唔使理就攪掂，但媽咪由始至終都無諗過去要麥當當開生日會，只係選擇一係屋企一係無就算，因為始終場地所限，自己攪嘅生日會真係有氣氛好多同埋彈性大d，所以，即使辛苦少少，都係值得！
完左生日會之後，其實都有一陣子猶豫、檢討，下年生日，係咪應該再攪生日會呢？今次生日會籌備時間短，而且只有媽咪獨自處理，所以攪得比較辛苦！而媽咪最大心血，就係攪場地佈置，但結果發現，媽咪嘅心血，換黎一對手指甲邊爆烈勁痛，手臂因為不斷泵氣第二日極酸軟，真係辛苦到想罷工！但睇番相片，原來爹爹都無咩時間同d咁靚嘅佈置好好地影吓相留念（都有一兩張不過就唔係清場影囉）！仲有就係成個生日會攪左幾個鐘，相就只影左二百幾張，大部份都係成班小朋友一堆混戰緊，一係就係其他人嘅相，一係大合照，有自己嘅相又或者有自己而又是是正正嘅相，真係唔多，仲要係媽咪中間發覺未影相捉人同自己影番至有，如果唔係可能忙吓忙吓唔記得哂架喇！
再諗吓生日會當日，媽咪足足花左半日去攪佈置。其實當日係Ambrose生日，但因為媽咪忙，所以反而希望Ambrose入房瞓覺唔好攪住，再三諗番，其實生日就更加要同佢開開心心咁過，為左生日會，就咁浪費左半日時間咁！
生日會期間，亦唔見得可以陪住Ambrose，因為太多野要安排，之前要準備佈置，去到要準備野食，食緊又要準備遊戲，玩緊就更加忙，玩完又要開始準備執野，媽咪自己都無咩點食野，亦有好幾次Ambrose叫媽咪坐定定陪佢食野，有時都諗，究竟生日會係攪俾人地開心定係自己開心？當然媽咪深信Ambrose一定開心嘅，只係媽咪自己太忙，無法與眾同樂啫！
生日會另一煩惱事，就係雖然叫左朋友唔好買禮物，但最終都係收到一堆禮物！講真，現實d講，禮物呢d野未必份份啱心水，咁樣收到一堆之後，其實真係唔知可以點處理！响教養角度黎講，亦唔想Ambrose收到一大堆禮物，好似禮物得來太易又太多，唔識珍惜、感恩！環保角度講，寧願佢地封利是就算，起碼可以買到自己心水嘅野，亦唔使一下子塞滿屋企地方！
雖然生日會令媽咪有不少反思，不過媽咪知道Ambrose有咁多朋友仔同佢慶祝，一齊顛左一晚，又放肆地食左三杯啫喱，真係好開心！媽咪嘅辛苦都係值得！會不會有四歲生日會，要再慢慢思量了！
場地佈置篇提到嘅氣球佈置，其實已經差不多係成個生日會全部嘅佈置，好彩一車迫迫地可以車哂過去！原本以為整好哂d佈置，去到都應該幾輕鬆，不過因為表哥表姐一齊跟車到左，要顧及佢地又要攪埋少少其他佈置，時間上都係慢左！本來諗住去到會場再整多幾朵氣球花，但最後都只係整多一兩朵就停左，一來今日整左成日已經好攰；二來雙手頭二指指頭因為要不斷將氣球打結而令指甲與下低之指甲肉不斷拉扯，早在家中製作時已紛紛爆開流血，痛到死；三來眼見氣球柱加banner擺埋一齊已經好靚，其他原本嘅idea都係暫且放下吧！始終一個人嘅精力真係有限，要求真係唔可以太高！唔再整氣球花，媽咪就整埋“3”字氣球小座就算，同埋吹埋巨形party signage貼在門外，一切佈置總算完結！
佈置完成左，之後就係扭波波喇！趁小朋友未到，諗住扭定d出黎擺住先，點知可能忙左成日，媽咪一到扭波時，個腦突然一片空白，即使連最簡單嘅劍都完全記唔起點扭！可想而知獨自攪場地佈置真係令媽咪完全虛脫！諗黎諗去，試左一輪至記得番點扭劍，再過多一陣，試多一陣就記得點扭laser gun，但其餘果d本身練得無咁熟，真係完全洗腦！
好彩嘅係媽咪之前不斷練習扭波，都知道自己資質有限，加上時間實在太少，intensive籌備生日會又令媽咪體力真係有d透支，所以媽咪對扭波一環其實都唔太有信心做到心目中嘅standard！媽咪靈機一觸諗起唔知幾時見過有d動物吹氣長棒，小朋友見到又係會玩得一餐，於是即時上網搵，終於花左兩晚時間搵到一間最近嘅淘店，務求盡快送貨，以備不時之需！不過呢間淘店只做批發，一個款最少訂十二個，不散賣！媽咪睇中四個款，真係無理由買四十八個，生日會小朋友其實只有十幾人，唔需要咁多！媽咪即管問每個款要半打，收貴d可唔可以賣俾媽咪，又得喎！不過計落條數，其實媽咪只要放棄一個款，買三款共三十六個仲抵過四款夾埋得廿四個，所以媽咪最後落實要三個款！三十六個好似好多咁，不過睇comment話有部份會漏氣，賣家話送膠水可痴番漏氣位，但膠水唔可以寄空運要用普通快遞，需時幾日，而媽咪已等不到喇，要求賣家唔要膠水發急件，只係梗梗响生日會前一日收到，真係一額汗！而因為有呢d吹氣棒，小朋友個個都攞住黎玩，好開心，所以即使媽咪真係扭唔到太多花款嘅波波，其實已經唔重要喇！最估唔到係d小朋友攞住d吹氣棒呀，扭波劍同槍已經玩到失控！
之前一晚難得抽到少少時間同爹爹一齊度生日會run down同埋遊戲，生日會場地book左五點鐘，預一個鐘頭set up，大概六點半至七點開始食野，諗住朋友們五點鐘到可以响出面室內playroom玩一陣，六點半七點入返活動室開餐，食到咁上下就玩少少遊戲，諗住約八點左右可以切蛋糕，九點左右可以陸續散場收拾場地！但朋友們大多都六點幾至到，所以原本打算六點半開餐都唔得喇！時間一路向後推，場面其實都一片混亂，又要等埋未到嘅朋友們，又要calm down班小朋友，同埋捉番走左去出面playroom玩緊嘅朋友仔，咁樣一攪已經七點幾先正式食野！
當然，遊戲時間都因為咁而要推遲，不過都堅持响開餐半小時之後，八點前開始！之前同爹爹度好左有幾樣Ambrose最愛嘅物件收埋响會場入面，要小朋友幫手搵出黎，不過因為去到個場地發現得四幅牆，可以收埋嘅地方實在有限，所以呢個遊戲set up都幾難，哈哈！不過唔緊要，準備左都照玩！原本諗住係小朋友玩嘅遊戲，但一講要搵咩出黎個個大人都四出去搵，最後當然都係大人搵到再俾小朋友交番黎啦！最攪笑係有大人一早已經知道物件放响邊，都未講已經走左去攞喇！同埋有d物件係講之前由媽咪搵地方擺，有人見到媽咪行去邊度，就即時行番去搵，好奸呀！
玩完搵野，之後就係期待已久嘅爭櫈仔遊戲喇！小朋友玩爭櫈仔，真係要用小朋友高度嘅櫈仔，呢個遊戲玩得成，都係多得嫲嫲有個在幼稚園工作嘅朋友，响生日會前無啦啦通知嫲嫲學校要換櫈仔，舊櫈要掉哂，嫲嫲朋友覺得浪費所以問嫲嫲要唔要！就係咁，因為有一批櫈仔，所以爹爹媽咪諗到要玩爭櫈仔喇！開頭都驚佢地咁細唔識玩，不過經過媽媽們示範之後，佢地好似又識喎！睇佢地氹氹轉行到老遠一聽到音樂停就即彈返去搵櫈坐，真係好笑！最搞鬼係Ambrose有一轉搵櫈坐，其實佢都好快架喇，不過兩張櫈同時有三個小朋友坐（小朋友細粒係兩張櫈都夠三個人坐），而佢係最邊果個，佢自己都知道唔得，一坐低就喊左出黎，嘩哈哈！雖然佢係壽星仔，但其他人都無意思免佢唔使輸，所以遊戲繼續！而最後贏左果個一定係大表姐囉，因為成班都只係得果三歲嘅小朋友第一次玩，同個六歲玩過好多次嘅小朋友，其實唔玩都知佢一定會贏啦！
玩完遊戲，抖多一陣就切生日蛋糕喇！個蛋糕媽咪只係响爹爹去攞時影左幅相俾媽咪睇過一次咋，媽咪自己都好心急睇吓個蛋糕真身！不過班小朋友重心急，個個都圍哂去張檯度等開盒！一開出黎大家都嘩嘩聲，大家都俾蛋糕上嘅咸蛋超人公仔吸引住，七口八舌咁問d公仔係真定假，食唔食得，攞唔攞得！哈哈！其實個蛋糕加左d公仔後真係幾靚，個咸蛋超人朱古力牌比想像中要好！不過諗諗吓如果無左d超人公仔，其實個蛋糕咩都無，只係做多左一層火山，而上次在舖頭以另一款超人蛋糕做參考，蛋糕面上有好多彩色波波，師傅都無做到，只係唧左幾朵忌廉花，d超人公仔仲係媽咪提供，講真，收八百幾蚊，其實都幾貴囉！嘩完一輪，都係切蛋糕嘅時候，媽咪攞出之前準備左嘅煙花candle，點起，三枝煙花不斷放，真係好靚，亦都好切合超人蛋糕主題，媽咪覺得真係幾perfect！
未食完蛋糕，班小朋友已經又走哂出黎玩！今次仲搵左個有份量嘅爹爹出黎扮怪獸，成班小朋友攞哂長棒，扭波劍同槍去打怪獸，真係好開心！本來場地只可book四個鐘，理應到九點，不過因為開始遲了，而間房咁夜都唔會有人再用，所以我地可extend多一個鐘，俾小朋友玩多陣，同埋預時間執番d野！
最終，本來叫左朋友們唔好買禮物來，仍然有一堆禮物要攞番去！花左半日時間整嘅氣球佈置，始終都帶不走，只有兩個哈哈笑小座同埋大米妮頭俾大二表姐取回家，其餘嘅都只可以留在場地，真係好唔捨得，但又無可能又車回家！本來所有鋁質氣球都聲稱可以放氣收藏下次再用，不過放左一個party signage之後發覺氣球面都皺哂，而且未能完全放氣，摺唔埋，所以都要忍痛放棄佢地！
終於，Ambrose三歲生日响九點半正式結束！
好難得嘅一家三口合照
氣球佈置
氣球佈置加banner
party signage
咸蛋超人蛋糕加煙花candle
吹氣動物長棒
生日會部份物資sponsered by ellen and kula
