今年媽咪實在太懶，無幫Ambrose 留意下d文娛節目，就算有，都因為佢嘅興趣班實在太忙，有空閒時間的話，媽咪都寧願安排其他活動俾佢，所以就更懶去找節目，以致今年竟然miss左Harry哥哥嘅show！好彩之前收到email有關Mickey Show嘅promotion，媽咪左諗右度，遲遲無去買飛，直至開賣左一段時間之後，先至臨急去買，完全無理過個show係咩內容，只係一如以往地買山頂飛，諗住公仔大，山頂位都好清楚，無需坐太前！
買飛都已經係幾個月前嘅事，如果無mark低，真係差d就唔記得左要睇！因為場地就在媽咪公司，所以媽咪買飛時就專登揀平日，星期五晚上，爹爹可以湊Ambrose來，一來又可以話係接媽咪放工，二來又唔使放假專登過來！
入場前，例必去睇吓有咩紀念品賣！發覺紀念品真係一年比一年貴！記得早兩年睇show，現場都總有d幾十蚊嘅小玩意買，雖然都係貴架喇，不過唔過百元，感覺都可以接受。今年，已經唔覺有咩紀念品係百元以下，件件百多元，真係買唔落手！呢個Ambrose又只鍾意刀、槍、劍，在場就咁啱有劍，爹爹之前已經應承左佢買份紀念品，所以最後都花左百幾蚊買左一把好普通嘅巴斯光年劍！買左百幾蚊，receipt都無張可以攞去free parking！Ambrose當然開心啦，無啦啦又有收獲，仲响度擺哂pose勁chok咁影相，真係服左佢！
個show開始左之後，爹爹媽咪都發覺買錯飛喇！因為今次場show係magic show，真係表演magic，而且仲係有真人而唔係大大隻廸士尼公仔表演magic，坐响山頂嘅我地，幾乎都睇唔到咁濟，悶到爹爹媽咪係咁打喊露，眼瞓都暈呀！真係失策！問Ambrose好唔好睇，佢竟然話好睇，真係唔知佢睇到d咩喇！
下次，真係要小心睇吓內容係咩先至決定買咩飛！
買左飛同Ambrose 去睇Thomas Show，又係約左show友浠浠一齊去。上年Thomas
Show係爹爹同Ambrose入場睇，原來個show仲有好多人物出場，但爹爹好多都未見過，完全唔知咩黎，而Thomas就最遲先出場，仲只係出左好短時間，佢話好悶，所以今次都費時再叫爹爹同Ambrose入場了！
特登預早少少到場，睇吓有無小禮品買。今次禮品唔多，只有tee、書、旗、望遠鏡同小燈！其實好多價錢都唔平，較為覺得可以買得落手嘅係旗，$100兩枝，不過，真係無咩用，就算只花$50都嫌多！最後，見Thomas盞小燈有手抽，可以俾Ambrose攞住，真係半夜要行過黎搵我地都有d用，所以雖然要$180咁貴，都照買俾佢，買左禮物係開心d嘅！
今次都係買左山頂飛，但去到時職員通知要換飛！原來山頂無開，職員將我地嘅飛換過前d嘅位置，真係唔多明白，係咪因為少人買飛，開唔哂咁多地方，所以可以upgrade我地呢？Anyway，坐前左就著數左，大家都無異議！
入到去坐低，發覺位置都唔錯，反而前面果d係平面無梯級擺櫈，而後面就有梯級分，所以媽咪覺得前面反而好大機會俾人遮住！個Show好快開始左，仲要一開始無耐，Thomas已經出場喇，仲有Gordon、Percy 、James同埋肥控制員！基本上，其實Ambrose唔係特別熱愛Thomas，亦無睇過Thomas嘅卡通，佢只係識Thomas；而媽咪亦從來搞唔清，究竟邊架車打邊架車，好似架架一樣咁，所以媽咪亦都講唔到俾Ambrose知d車叫咩名，好彩浠浠係Thomas Fans，佢咩都知，哈哈！
成個故事應該係講Thomas同d旅客去搵寶藏，中間因為行到無路軌嘅地方而唔可以前進，而同時間Thomas嘅朋友發現佢無返車站，所以周圍去搜索佢，最終，Thomas亦可以帶領旅客搵到寶藏！故事都算係好簡單，但，真係好悶！雖然Thomas、Gordon、Percy 、James成日都响台上無欺場！點解咁悶？因為成場都講同唱英文，仲要幾高音吓，又無字幕，好難聽明，仲要加上對Thomas真係唔多認識，悶上加悶！好彩個show又出奇地快完喎，成個show加埋中場休息都只係個幾鐘，都算好快過！
都係Mickey Show好睇d！！！
呢套劇係無劃位嘅，所以都要預早少少去排隊。Ambrose都係第一次同兩個朋友仔一齊睇show，平時多數都係同浠浠去，今日三個小朋友一路行一路等就一路顛，真係頭都大埋。
夠鐘入場，呢個劇係無台嘅，都係地下搭佈景，再set到d櫈一級級有高度分別。最前係地墊，之後就係兩排小朋友矮櫈，之後係平時嘅正常櫈，再後面係搭高左嘅台放左正常櫈。今次嘅安排比起上年睇另一個劇好好多。因為大人唔可以坐矮櫈，小朋友坐就要同大人分開坐，諗住Ambrose有朋友一齊都可以啦，點知佢死都要同媽咪一齊坐，結果，天天同浠浠坐响前面，Ambrose就要坐媽咪大脾坐後面。地墊其實無人敢坐，但一開始後有個劇團負責人出黎話家長可以同小朋友一齊坐地墊，但家長要盡量坐邊位，以免遮住後面坐矮櫈仔嘅人。咁樣一講，好多人就出左去坐地墊，而家長又唔係個個坐邊位，搞到好多坐矮櫈仔嘅小朋友都遮住左，包括天天同浠浠。見好多坐超等座嘅家長已經去左坐地墊，反而超等座有位，咁我地一行六人就搬左上超等座，雖然唔可以近距離同d布偶接觸，但因為場地唔大，其實坐後面又清楚又舒服。
個故事大意係講班獼猴因為人類不斷咁開發，而令到佢地失去左原本安居嘅樹林，無左屋企，亦都令部份獼猴嘅飲食習慣改變，內容真係教人反思。雖然部份情節以佢地三歲幾嘅年紀黎講未必會明白或體會到，但大抵內容：因為人類要起樓、馬路而令獼猴無左屋企，同家人失散，Ambrose唔多唔少都明白，可以講番俾爹爹知！
一如以往，Harry哥哥都會响音樂會中穿插表現或搞氣氛，但感覺上，今次出黎嘅次數同時間比平時似乎短左少左咁！期望嘅亙動環節，當然又係因為坐得後無得上台一齊玩，Ambrose又問媽咪點解Harry哥哥唔俾佢上去玩！媽咪下次真係要好好考慮買頭幾行嘅飛至得喇！
唔知係咪對於個show太期待，加上尋日至睇完兩個幾鐘嘅胡桃夾子，Harry哥哥突然謝幕果刻，媽咪真係有d愕然，點解咁快就完左？媽咪仲好期待會响台前玩一陣，或者應該仲有d表演將個show嘅氣氛帶動得更高，畢竟聖誕節係一個普天同慶嘅節日，總係覺得”爭咁d”！好失落！
無好確切在開場時睇過時間，但望下錶，估計番入場以後等左幾耐至開始，減番之後發覺今次個show真係較以往嘅短左少少！之前通常要預起碼個半鐘至出番黎，今次只係一個鐘多少少就走得。
總括今次真係無萬聖節咁好玩，好氣氛，不過都無減Ambrose對Harry哥哥嘅愛戴，依然話好好睇，哈哈！雖然話個show咁快完左，從另一個角度諗，媽咪應該好投入個show至會無察覺時間飛逝，應該都係好睇嘅，只係expectation太高啫！連續湊住Ambrose睇兩晚show，都咪話唔攰，早d完就早d可以返屋企啦！
媽咪一直都好想睇胡桃夾子，不過，如果搵爹爹陪，佢又會好悶，自己睇又好似戇居居咁，所以一直未睇過！直至有Ambrose，媽咪終於可以有人陪睇喇！好不容易等到Ambrose三歲，夠年齡入場，但因為之前已經同佢睇過兩場芭蕾舞劇，兩套劇都超過兩個鐘，要一個小朋友定定坐响度睇完全無對白嘅芭蕾舞劇，有時真係好抽象，大人其實好花精力。所以媽咪知道胡核夾子開始售票時，都係決定多等一年，等Ambrose再大些少至同佢去睇！
殊不知，有一日上音樂堂嘅時候，Ambrose見到胡桃夾子嘅宣傳海報，可能見係士兵造型，又有劍，又打架咁，佢就起勢咁問咩黎，然後佢竟然話想睇！就係咁，媽咪當晚返屋企即買飛喇！
一如以往，媽咪只係買兩張飛入場！爹爹就响出面等！Ambrose去到會場，一如以往咁見人入場佢又好緊張咁係咁叫媽咪快d，話佢自已好心急同緊張，真係好好笑！
因為遲買飛，所以中間較前嘅位已經無哂，唯有買前少少側面嘅位，入到場之後，發覺唔係好側，其實都幾好添！平時媽咪買平飛，通常都坐山頂位，鳥瞰全場，超大超多人咁，今次買到第十五行，真係幾前，但睇唔到balcony嘅人，Ambrose就問媽咪點解呢度咁細？哈哈哈！側面位一共有五連位，媽咪同Ambrose坐入面，出面係一家三口，小女孩大概五、六歲吧，當媽咪同Ambrose入場坐低時，就聽見小女孩爹爹同小女孩講，有小朋友黎睇呀！
平時聽音樂會、睇劇等，次次都一定比預定時間遲十五分鐘至真正開始，今晚真係好好彩，較到最遲入場，只係坐左一陣，就好快開始喇！會場燈光開始轉暗時，就聽到小女孩開始緊張到抽泣，繼而喊，小女孩爹爹即時抱左小女孩出去。小女孩走後，會場關了燈，開始看到台上嘅佈景，呢個時間，全場靜英英，Ambrose突然開口問媽咪問題，聲量其實不大，只是因為全場鴉雀無聲，佢嘅聲音就變得好大聲！媽咪正在阻止Ambrose問問題嘅時候，後面就傳來一聲好粗魯嘅”shh”一聲，聲調極為不滿及無禮，媽咪本能向後望，就見到隔一行隔幾個位嘅一個女人正用手拍拍隔鄰嘅朋友，大概意思就是＂算啦，唔好咁啦＂！呢個時候，媽咪意識到，那一聲”shh”應該係沖著Ambrose而來！其實媽咪一開始見咁靜，Ambrose講野都有少少唔好意思，自己亦已即時阻止佢，但聽見有人即時”shh”自己時，又覺得＂使唔使咁呀？＂
就响俾人”shh”完之後，媽咪已立即不斷响Ambrose耳邊同佢講咁靜唔可以咁大聲講野問野，要問就細細聲問。當然，呢段對話其實持續左幾句，因為Ambrose一向都會堅持問點解，所以媽咪不斷壓低聲線來解釋俾Ambrose聽，但只係响呢短短對話嘅同時，即使係音樂已響起並蓋過我地嘅對話，場務員已走左過來同媽咪講，唔可以講野！其實媽咪心入面比佢地更加著急要教Ambrose細聲點，已經即時做野，真係唔係好明，點解媽咪已經行動緊，佢仲要行過來催迫媽咪！
Ambrose其實經媽咪講解後都已經知道唔可以騷擾到人，但小朋友就係小朋友，睇劇會有好多問題發問，媽咪理解！Ambrose當然仲有不斷問，只係佢已經將自己把聲壓得好低，而媽咪答時又响佢耳旁超細聲講，加上開場之後其實音樂聲已很大聲，對話其實並唔影響到果位後座女士，但場務員竟然响第一次走過黎話唔好講野之後不到五分鐘，又走左過黎同媽咪講，叫小朋友唔好講野，話後面有人投訴！講真，响開場短短果十五分鐘，由”shh”一聲開始至場務員走左兩次過黎之間，媽咪已經不斷向後望，而每次場務員都一定向住媽咪做細聲d嘅手勢，已經夠煩，佢仲要走左兩次埋黎話我地，仲叫媽咪叫Ambrose唔好講野，媽咪真係好想問吓，呢度唔講得野架咩？！同埋請問點解個劇已列明招待三歲以上小朋友入場，點解入左場之後我地好似俾人歧視咁嘅？好想請教果位場務員，點樣可以叫一個好奇嘅小朋友唔好講野呢？如果個劇係完全唔俾講野兩個幾鐘，咁佢地係咪應該寫明只招待十八歲以上嘅成人呢？媽咪明白好多藝術性嘅音樂會一般會設年齡限制六歲以上，但呢套劇只設在三歲以上，係咪意味住呢套劇比平時嚴肅嘅音樂會係可以有多一點點嘅包容？再者，其實Ambrose只係响開場最靜果刻用左一般聲量問左媽咪一句夾埋都未必夠五個字嘅句子，就已經惹來一句極無禮嘅”shh”，之後媽咪同Ambrose嘅無音對話亦同樣不斷受到迫逼，媽咪完全唔理解，只係一開始嘅一句短短嘅問題，係咪嚴重影響其他人而要遭受到如此待遇？自問自己唔係持續不斷騷擾人，真係唔明點解好似自己犯下大錯咁俾人不斷怪責！媽咪回想起前兩次睇芭蕾舞劇都沒有受過如此待遇，想來可能因為之前買的是山頂平飛，而今次係較前嘅貴飛，所以呢d買貴飛嘅人就好有”要求”喇！
自從個場務走埋黎兩次之後，媽咪個心都不知幾唔高興，一方面當然繼續同Ambrose講要細細聲同埋等音樂大聲時至問，音樂細聲或無聲時唔好出聲，另一方面媽咪已經費時再去望個場務員同個女人！之前望，係因為真係緊張怕嘈到人；之後唔望，係覺得自己根本無做錯，理直氣壯，唔再需要著緊其他人點睇自己！
如是者，上半場就响不滿不愉快同埋密密壓細聲或無音對話中渡過左，媽咪曾經有一刻以為會俾人趕離場無得睇！中場休息時，會場開了燈，媽咪正正猶豫係咪應該索性離場時，前面兩個女人突然擰轉頭撩Ambrose講野。其實媽咪一直覺得同Ambrose嘅對話並無騷擾到後面嘅”尊貴”人客，反而因為Ambrose坐媽咪大脾睇劇，佢嘅發問雖然已經好細聲近乎無聲咁濟，但因為坐大脾佢會較貼近前面，反而可能騷擾到前面的人！所以媽咪見正好兩位姨姨擰轉頭同Ambrose傾計，即時抓緊機會同佢地講唔好意思，嘈到佢地！點知呢兩個姨姨竟然同媽咪講：細路仔係咁架啦，實有好多問題，唔問至奇喎！佢已經好叻，咁定坐左咁耐無唔耐煩無扭計，又識問問題，而且仲識細細聲問，無嘈到我地喎！聽到呢番說話，媽咪不滿嘅心情終於有點悉懷！當兩個姨姨知道Ambrose只係三歲多一點，佢地都好驚訝Ambrose可以坐定定無扭計睇左成個鐘，仲咁叻可以不停問問題，其中一個姨姨仲叫另一個姨姨下次可以帶個四歲嘅孫一齊睇。言談間，兩位姨姨同媽咪講，音樂越細培養就越好，等小朋友對音樂有興趣，平時可播放不同類型嘅音樂俾佢聽，同埋可以多帶佢地去音樂會，佢地仲介紹了一d音樂會俾媽咪。媽咪亦同佢地講媽咪一直有去呢類幼兒音樂會，同埋之前兩個芭蕾舞劇，總之有啱年齡可以入場的都會盡量帶Ambrose去，今次呢套仲係Ambrose要求黎睇，兩位姨姨無不稱奇，覺得一個三歲人仔已經對呢d音樂會、芭蕾舞劇有興趣，而且原來已不是第一次參加，兩位不約而同叫媽咪俾佢學樂器，因為佢地覺得Ambrose對音樂係好有興趣至可以咁有耐性聽同埋主動要求去睇！媽咪坦言其實Ambrose已不斷要求學小提琴，只係坊間教小提琴嘅老師一般只收四、五歲小朋友，而學鋼琴都起碼要三歲半，所以Ambrose根本”未夠秤”去學！兩位姨姨聽到後對Ambrose真係讚不絕口，係咁話佢gifted，仲叫媽咪一定要好好栽培Ambrose！
姑勿論Ambrose係咪佢地口中所講咁勁咁叻咁”gifted”，同兩位姨姨近十五分鐘嘅對話，已教媽咪感動！感動唔係因為別人盛讚自己個仔果種飄飄然嘅感覺；感動係媽咪竟然响短短一個鐘內對於同一件事得到咁截然不同嘅待遇。响一個咁有文化嘅地方，媽咪深深體會到咩叫＂無禮＂同＂匀難＂以及＂包容＂同＂欣賞＂！作為一個無咩文化嘅家長，好想培養子女多參與文化節目，培養文化修養及興趣，媽咪深信係要由細做起。每遇到合年齡限制嘅節目，媽咪都好想帶Ambrose參與，畢竟合三歲小朋友嘅文化節目其實唔多，媽咪亦好珍惜每個參與機會。如果連合三歲小朋友嘅文化節目都唔可以多一點包容，那培養文化興趣嘅年齡應該去到幾大至合理？係咪要到d小朋友個個只係識得埋頭玩iphone同打機嘅時候至開始夠大呢？小朋友去欣賞文化節目嘅時侯，係有可能對其他人造成干擾，但如果唔係嚴重而且持續，大家係咪可以多一點修養包容一下呢？小朋友欣賞文化節目，同時學習到對其他人尊重，尊重唔係代表完全唔出聲坐响度就係尊重，如果係咁，瞓覺好可能對於個表演者係最尊重嘅表現喇！尊重亦可以响不干擾人之下對於節目進行討論與啟發，呢種係學習嘅過程，點解要咁discourage佢地呢？
今次呢套胡桃夾子，Ambrose成功地睇足全程，問佢都話好好睇，媽咪都覺得舞台佈景好靚，係好好睇！但媽咪諗，會唔會再有下次呢？應該話，可唔可以再有下次呢？下一次係咪應該要買番山頂位至唔俾人責難呢？
P.S. 坐出面嘅小女孩一開場喊住出左去後，上半場都無返過入來，媽咪相信，以佢嘅喊聲，應該係被禁止入場，其實都可以理解；下半場之後，就只見佢爹爹返黎，真係好慘呀，佢個位正價$400架！
今晚又約左Ellen姨姨同浠浠一齊睇劇，其實買飛時都唔知個劇係以咩形式進行，大概只係知講朋友嘅，見係for三歲以上小朋友，所以都無特別理內容形式係點喇！
食完晚飯就入場，由於係不設劃位嘅劇，媽咪都唔敢太遲去，驚要排隊！一入會場，發現無台，套劇係响平地演出，大會將坐位刻意做左幾個levels，令前後觀眾有唔同高度之別！不過其實最前坐位只係用cushion放在地下俾小朋友坐，之後果一排係矮櫈仔，再後一排係高少少嘅矮櫈，最後就係普通有背板嘅櫈，幾種櫈實際高度唔係差得太多！由於Ellen姨姨剛剛懷孕，所以為左唔好太辛苦，一行四人都係坐最後排嘅普通櫈，但坐吓坐吓前面又有人坐，即使Ambrose同浠浠已經坐响大人大脾，仍然會被前排遮住視線！最後，一行四人又搬到去第二排嘅矮櫈仔坐，睇得清楚d，不過就辛苦少少！
個劇係以真人演出，大意都係圍繞講咩叫做好朋友，無朋友會點，父母可以點幫小朋友建立自信交朋友。講真，唔可以話個劇唔好嘅，內容其實都可以，不過好多對白、解釋，對於三歲嘅小朋友黎講，似乎有d複雜同抽象，媽咪相信Ambrose同浠浠都唔太明白究竟做咩事！Ambrose更成日望住出面個大公仔對眼嘅顏色轉變，成日話媽咪點解而家係咩色？點解而家又係咩色？仲有就係佢見到演員戴左好誇張假髮原來可以攞起，佢就以為人地果頂係帽，嘩哈哈！由於套劇可能好深，Ambrose出乎意料之外好專心咁睇，中間無咩點問媽咪問題，平時如果同佢睇show睇劇，佢簡直係問足全程！呢套劇，最低年齡應該set番去四、五歲啦！
好辛苦先睇完套劇，原來仲有一part親子共讀嘅分享，顧問仲親自講左本繪本俾大家聽，當中佢不時反問小朋友問題，考吓佢地對本繪本嘅觀察力，但其實媽咪最大嘅問題就係每當同Ambrose講故事，每次都係當媽咪未講完一頁，佢已經睇住d公仔問呢樣問果樣，有時仲會越問越遠，成日都好似好難至講得完一本故事咁，即使講完一本，感覺上成個故事已經斷開哂咁濟，都唔知佢究竟聽到幾多？又聽得明幾多？真係唔好話反問佢，係佢勁問媽咪好多好細微嘅野就真！呢個問題媽咪都唔知點解決，究竟應該任佢問定係點都堅持講埋落去至可以問呢？
Anyway，分享完結後係無Q&A環節，本來可以排隊影相，不過坐左個幾鐘矮櫈仔真係好攰，一行四人都無等影相就走左喇！出到門口，原來有個小小壁報板，貼有呢個劇嘅演出相片，叫左Ambrose同浠浠行埋去影吓相留念，點知Ambrose全程用個背部對住鏡頭擺pose，真係服左佢呀！
因為Ambrose鍾意Harry哥哥，所以媽咪一直都好留意Harry哥哥有無show舉行！本來之前都見過Harry哥哥有個萬聖節show，但可能近排媽咪工作繁忙，完全忘記了！直至十月中左右，先至記起Harry哥哥的萬聖節show，上網買飛時已經無咩位喇！問埋Ellen姨姨去唔去，因為佢呢排唔多舒服唔想周圍去，所以決定唔去，即係只得媽咪同Ambrose去睇！咁買飛反而易買d，因為如果要買四連位，其實已經太遲喇，無哂位！有嘅又係山頂或者側位！媽咪諗住Ambrose都開始大個仔，加上呢個始終又係音樂會，想佢可以睇清楚樂器嘅樣，所以媽咪prefer買貴飛坐前d！不過前面嘅位又只有單丁位，無兩個連位喇！實在太遲買飛，臨開show前兩星期至買飛，真係impossible！不過好彩地，俾媽咪諗起上次Wing姨姨嘅買飛法！就係用學生半價優惠買一張貴價飛，再是但買一張正價飛，入場時就有兩張飛入，但可以坐貴價位！咁都work喎，反正Ambrose次次入場都真係要坐媽咪大脾至得，佢果個位，永遠都係放行李多過真係坐！於是，响開show前兩星期，媽咪竟然買到第十五行嘅中間冷巷位，算係幾前吓喇，好開心！
今次都係媽咪第二次自己湊住Ambrose入場睇show無人陪喇！之前睇Cinderella太長無睇哂，今次只係一個鐘，而且加上有Harry哥哥，媽咪完全唔擔心搞唔掂！有過咁多次睇show經驗，Ambrose次次都好緊張，成日d人一入場佢就好緊張一定要跟住入，慌死遲左唔等佢咁！次次話開場果個時間，d人永遠都未入齊，次次都要等十至十五分鐘至真正開始！所以唔好話早d去到等入場，只係準時去到入場再等開始其實真係差唔多，免得Ambrose係咁話緊張！
今次主題係萬聖節，原本Ambrose都有造形衫，但之前一日上興趣班時又係要著Halloween衫，所以洗左無衫著，只係著普通衫，好彩佢見到其他人有悉心打扮都無嘈自己無咋！
音樂會都係一貫Harry哥哥show嘅作風，有d魔術，有d搞笑，有少少故事，加埋管絃樂嘅配合，真係幾啱小小朋友！今次個show有少少特別，請左個沙畫大師表演，只見個大師係咁用手在沙上畫又不斷撥沙，真係畫得好似同好快，勁呀！不過Ambrose就係咁話人做咩撥哂d沙落地下，話人唔啱，真係唔知好嬲定好笑！今次Ambrose有進步，當Harry哥哥問問題同叫人舉手上台，Ambrose都有舉手嘗試，之前佢可能仲細未識又或者多數發呆，不過可能坐第十五行都未夠前，Harry哥哥無叫佢上台！Ambrose無得上台就係咁問媽咪點解Harry哥哥唔俾佢上台，真係俾佢笑死！
音樂會中間有一段係邀請左小朋友上台，講話有隻怪獸走出黎，小朋友要同Harry哥哥打怪獸。其實隻怪獸只係上身套左類似龍蝦造形嘅套，雙手係長長嘅箝，可能加上左比較恐怖嘅音樂，Ambrose竟然嚇得有 d想喊咁，好彩前面有個姨姨幫手話Harry哥哥會打低隻怪獸，而Harry哥哥又真係好快就打低左佢，所以Ambrose至平定左，真係唔話佢細膽滕雞都唔得！
完場時Harry哥哥邀請小朋友到台前一齊跳舞，本來媽咪都唔想行落去，點知Ambrose又話去，難得見佢咁講就陪佢顛吓！去到台前其實有好多小朋友，好迫！有d家長仲將小朋友放在台上同Harry哥哥一齊跳，其實場面都幾混亂，不過又真係幾好玩！本來媽咪叫Ambrose上台玩，點知佢又話唔好，俾佢激死，之前又好似好恨上去玩，有得上去時又話唔上！媽咪估計可能台上台下都勁多人，呢個細膽嘅Ambrose一定係怯啦！最後，媽咪抱住佢响台下近距離睇Harry哥哥，都唔錯嘅！
最後，夠鐘完場，Ambrose係咁同Harry哥哥講bye bye，但太多人叫住Harry哥哥喇，Ambrose又唔夠大聲，Harry哥哥都無同佢bye bye，佢又係好耿耿於懷，狂問媽咪點解Harry哥哥唔bye bye佢！仔呀仔，無法啦，咁多人，下次媽咪應該早少少同你出去排隊等簽名，咁你就可以同Harry哥哥影相同講bye bye啦！
總括黎講，今次個show真係好抵睇，又有管絃樂又有Harry哥哥同埋沙畫，仲要都比較坐得前少少！下次睇Harry哥哥嘅show真係要買貴飛了，不過好可惜，黎緊嘅聖誕節，因為就Ellen姨姨一定要四連位，所以無買到貴飛，買左幾後吓，唉！唔知到時Ambrose會唔會好失望呢？
一早已經買左Cinderella 芭蕾舞劇嘅飛，但又無啦啦發現今日要上三堂興趣班，適逢爹爹放假，本來媽咪見到咁忙，好想賣左d飛俾朋友唔去喇，但爹爹話既然都買左，無所謂啦！好彩Ambrose 畫班前已瞓左兩個鐘頭覺，應該都ok，媽咪至放心少少！
今次無同Ellen一齊去，原因係浠浠唔鍾意芭蕾舞，又唔鍾意公主，所以媽咪自己去囉！一如既往，爹爹都係唔入場，只有媽咪同Ambrose入場睇，其實都幾risky，因為上次睇白雪公主時，Ambrose有驚，好彩爹爹响度先至過渡到，今次又係成兩個幾鐘，但爹爹唔入場，只有媽咪，真係唔知搞唔搞得掂！
好順利入場，Ambrose又係好緊張咁等開場，一路睇佢就一路問媽咪點解咁點解咁，講到媽咪口都乾，又驚煩住其他人！之後每次個幕一關上，佢就問係咪走得？係咪完？哈哈！第一次中場休息時，媽咪見有成十五分鐘，就同Ambrose出去行吓郁動吓，點知佢竟然呢個時候搵爹爹，可能以為套劇完左一定會見到爹爹接，所以開始扭計！媽咪搵野食氹左佢一陣，都唔係好得，以為要放棄喇，再問佢不如入番去睇Cinderella好唔好，佢又話好！之前入場唔記得攞場刊，呢個時候就順手攞埋入去。估唔到Ambrose好似好鍾意咁，係咁要睇又唔俾媽咪揭走Cinderella，哈哈！不過其實媽咪都知道Ambrose扭計另一個原因，係佢唔鍾意Cinderella兩個家姐咁衰，唔鍾意佢地推撞Cinderella，唔鍾意佢地蝦Cinderella！呢個Ambrose就係咁，每次見到呢d唔好嘅野都想喊想喊咁，同佢平時玩開超人怪獸果d強悍樣係兩回事！
第二幕終於又開始番，一切又順利番，Ambrose又繼續不斷問過不停！以為可能可以睇到尾，點知做到白雪公主十二點夠鐘走就又中場休息！唉！呢個時候Ambrose又以為做完，佢又要搵爹爹，今次仲要喊哂口咁！媽咪之前唔知套劇做幾耐，所以同爹爹講約兩個鐘，入左場至知唔至，仲要加埋兩個中場休息，真係好長時間！見Ambrose今日已經上左三堂興趣班，又怕爹爹乾等，其實套Cinderella已經睇左三份二，再睇埋落去都已經好夜喇，林林種種嘅原因，媽咪決定走喇，唔好俾Ambrose有太多bad feeling，見好就收啦！
其實另一原因，係下午時份爹爹一早預告俾Ambrose知會去尖沙咀，Ambrose要求要食海港城反斗城門口隔離果間雪糕，爹爹又一口答應左Ambrose，搞到成日心掛掛住杯雪糕！一瞓醒又問去得未，去到畫畫又問，搭車出去又問，睇緊Cinderella嘅時候又無啦啦醒起又問！就係因為呢杯雪糕，媽咪唔敢再堅持睇埋第三幕喇，相信睇埋出去間店已關門，如果真係咁嘅話，真係變相講大話喇！
最後，Ambrose終於食到呢杯雪糕，行左一陣反斗城，仲出左去睇埋多啦A夢！今日真係超充實，超攰呀！
呢場Cinderella 芭蕾舞劇，Ambrose話Cinderella跳得好靚呀，呢一句說話又鼓舞住媽咪，一定要俾多d機會佢接觸唔同嘅文化節目！因為媽咪相信多接觸、多欣賞至會有興趣！好可惜，音樂會大多都不歡迎三歲小朋友囉！
一年一度嘅Mickey Show又黎喇，Ambrose 咁鍾意Mickey，媽咪一定買飛同佢睇啦！仲要係早在五月有得優先買飛果時已經買定喇！今年就貴喇，同樣只係山頂飛，上年一張$100，兩歲唔使錢，即係$100兩個人入場，好抵！今年，一張飛要$150，升幅真係驚人，仲要Ambrose剛夠三歲，要俾錢喇，大小同價添呀，即係$300兩個人，貴左三倍！本來Ellen話浠浠身形同個樣可以呃得吓人，但媽咪相信以Ambrose嘅身形，應該好難仲話佢得兩歲，佢自己都會話自己三歲，萬一人地問起就唔多好啦，所以都係唔慳喇！
本來次次睇show都預早左時間出去，但次次可能都要就小朋友晏覺或各樣而遲左！Ambrose今次都好乖，知道有show睇就好合作去瞓覺，所以佢上車時好精神！相反，浠浠無瞓過，本來應承左Ellen上公路就瞓，結果多多野講，加上Ambrose自己玩引到佢唔願瞓，哈哈！最後，個show在九展開，佢就响到鑽石山附近時瞓左！結果，媽咪同Ambrose先下車食野，Ellen陪浠浠瞓多陣至落車！
食完野，又要搵廁所vivi，最後都係趕住入場咁濟，原本打算睇吓有咩紀念品賣都無時間喇！
入左場，媽咪同Ambrose影相，點知唔小心向後行時踩左落下一層嘅椅背後嘅隙縫度，整傷隻腳，鬼死咁痛！坐定定之後，媽咪同Ellen見前排有人攞住個米奇望遠鏡好得意，已經猜想係紀念品之一喇，媽咪好想即刻落樓下買！不過問過Ambrose，以佢咁緊張嘅個性，開場前又點會俾媽咪離開佢丫，果然，佢直頭話媽咪唔好走開，哈哈！結果，Ellen放低左浠浠自己落去三樓買，真係唔該哂佢喇！其實會場入面都有物品兜售，不過係成$70一桶嘅爆谷，媽咪一定唔會買囉！個望遠鏡咁靚，都只係$70咋，呢個抵d！
記得上年嘅Mickey Show都有少少悶，可能因為大多數係泰山、史廸仔、獅子王等無咁hit嘅公仔人物啦，又勁多唱歌，所以幾悶！今次好好多，大部份時間都係Mickey、Minnie、Goofy同Donald一齊，又有Toy Story，又有跳跳虎，呢d全部都係Ambrose識嘅人物，而且又有故事情節，仲有架靚靚道具車，今次Ambrose明顯睇得投入好多囉！
個show去到中段時候，台上有d大波碌落去觀眾席度玩，算係有d亙動，Ambrose見到好想玩，仲話點解我地唔坐前d！下年，媽咪帶Ambrose睇show可能都要開始考慮選擇性地唔坐山頂喇！
之前同Ambrose睇過幾次Harry哥哥嘅show，以為佢咁細個都無咩印象，睇完就算！點知原來佢真係記得，仲成日提起Harry哥哥，甚至乎已經俾佢感染左，成日响屋企表演魔術，好搞笑！
見Ambrose咁鍾意Harry哥哥，於是今年又好努力搵吓佢有無show搞，以為佢又會做今年嘅國際綜藝合家歡，又無喎！好失望之際，發現左呢個“魔幻木偶奇遇記”，應該係Harry哥哥搞嘅！雖然明知應該係“樂之優兒”學生嘅表演多，但劇名用埋Harry哥哥，相信唔多唔少Harry哥哥都會有表演掛，所以唔理喇，照買飛！
因為爹爹要返工，所以無車出，楓叔叔又唔揸車，媽咪要自己搭車喇！本來以為可以同Ellen一齊搭西鐡，點知佢原來唔記得左要睇show，約左人，所以佢要出去先，即係話媽咪要同Ambrose兩個人搭車出尖沙咀咁遠，都真係第一次，哈哈！
等Ambrose瞓醒再落樓食野至出發，原本預左時間好似好鬆動咁，不過瞓醒晏覺嘅Ambrose動作又超慢，出得門口再行去餐廳食野都已經好遲，無法啦，唔可以唔食，又驚出去唔熟路唔知去邊度食，所以遲左都要食！坐低叫完野食等左一陣，嚇然發現已經六點，個show七點半開始，Ellen話搭西鐡要預一個鐘，但餐廳距離西鐡站步行黎計，最快都要十分鐘，但拖住Ambrose就應該要雙倍時間，野食又未到，媽咪突然覺得好緊張，唔知會唔會遲到，d飛仲响媽咪手呢！
好彩，食物終於到左，而Ambrose真係好乖仲要好快咁自己食左一碗烏冬，登時令媽咪鬆一口氣！極速食完野，行左出去商場門口，仲猶豫緊應該步行去屯門站定搭輕鐡去兆康站轉西鐡好，似乎兩者都需時，媽咪好少搭西鐡輕鐡，真係唔知道究竟邊樣快，煩惱之間見到有輕鐡行走，靈機一觸，決定搭一個站嘅輕鐡去返屯門站，代替步行，又唔使怕輕鐡去兆康站原來仲慢！本來已經走左一架輕鐡，好彩另一架一分鐘就到，於是急急抱起Ambrose上車！去到西鐡站，非常好彩地有車快要開，媽咪衝入最近嘅門上車，本來一車都係人，竟然有個好心人讓位俾媽咪同Ambrose坐，實在太好喇！由六點鐘仲响餐廳無野食，到六點半已經上左西鐡，呢半個鐘頭真係好驚險呀！
好順利，七點一左右已經到尖東站，又話要一個鐘嘅？！
由於早左到，同Ambrose去埋廁所都仲有好多時間，本來叫Ambrose影吓相，呢個小朋友好搞笑，成日好易緊張，佢一緊張就只會集中落果樣野度，叫佢做其他野佢一定唔肯，死都唔肯影相！其實都幾似媽咪！仲要開始可以入場，d人慢慢行入場，但因為媽咪要等埋Ellen先可以入，Ambrose真係急到喊起上黎，係咁話入得喇，快d行啦！d人見佢咁仲以為佢扭計，其實佢真係好緊張囉！好喇，終於等到Ellen黎到，一齊入場，見條樓梯有咁多氣球同勞作咁靚，叫極佢都唔肯影相，係都要入場！最搞笑係，媽咪見入場又要分單雙數坐位排隊，而隊尾附近有部汽水機，本來媽咪想話買罐汽水入去飲，都俾Ambrose死扯住去排隊入場，都唔知係好嬲都好笑！
一如之前expect，個show其實係樂之優兒嘅學生表演，又歌又舞又話劇，對白仲要係全英文，好利害！d英文仲要係好typical嘅外國口音嘅英文，勁好聽囉！雖然都見有d學生係外藉人士同埋mixed，咁好聽嘅英文真係唔奇，不過見佢地小小年紀就一口流利英語，又咁大膽在台上表演話劇，真係覺得佢地好叻！希望Ambrose多睇呢d表演對於日後有機會在人前表演可以無咁緊張同埋有信心d！
其實Ambrose咁細，套劇又全英文，故事又未聽過，有d舞台表演都幾抽象，媽咪都要响旁邊解話，唔知Ambrose明得幾多！不過好明顯，佢知道講大話會“長鼻鼻”，媽咪見佢咁認真，再講埋如果唔聽話都會有“驢子耳朵”架！哈哈哈哈！返到屋企，佢都仲講緊“長鼻鼻”同“驢子耳朵”，真係入哂腦喇！
返左新工，真係少左好多時間上網睇野，如果唔係學校旅行話要去呢個「探索大自然遊學園 x 動物農莊2012」，都完全唔知有呢個活動！好可惜，因為學校安排星期五去旅行（想是避免星期六日人潮的關係吧），媽咪爹爹都攞唔到假，所以被迫放棄！原本，媽咪記得上年睇過其他人comment麻麻，所以都無諗住要去，但同學仔去完返來個個都貼左好多相出黎，好好玩咁，見成人入場費好平，Ambrose又未夠三歲可以免費，所以為左彌補，今日特登同佢入去玩！雖然應該同成班同學仔一齊去最開心，不過既然都無辦法，就當係自己一家三口親子吓囉！
學完芭蕾舞，即時揸車入亞洲博覽館，去到都未夠一點，個場出乎意料之外少人！入到去見到同學仔一齊做嘅稻草人，當然我地都有做啦，呢個手工都唔錯，只係略嫌工具唔夠，成日都要周圍搵工具！做完手工，隨意閒逛，最吸引Ambrose嘅莫過於彈床，呢度嘅彈床有好多張，我地第一張玩嘅彈床，仲要係可以俾大人陪入，真係好好，Ambrose不知幾開心，係咁要拖住我地一齊跳！
玩完彈床，行左去睇動物，Ambrose見到d羊，又要驚又要睇，真係好攪笑！本來係有餵飼時間，點知過左，要指定時間去排隊，我地又夾唔啱時間再返去排，所以只係响籠邊拾左d葉係咁易餵過就算！
睇完羊，去左睇馬！其實場館好多野都唔使點排，唯獨是睇馬就排長龍，我地足足花左半個鐘黎排，不過好可惜，本來有三隻馬可以睇，Ambrose又指定想睇隻白馬，點知臨到我地之前，白馬要休息，俾人拉開左一邊，唔可以摸佢睇佢喇！不過我地見到白馬vivi同poo poo，真係好攪笑！
睇完馬，我地就去左整玩具！用樹枝同麻繩自製小玩具，其實就完全唔啱Ambrose整架喇，所以佢去左隔離玩積木，媽咪繼續整埋個玩具！個玩具，真係不過不失啦，似乎又係未啱Ambrose玩咁！
又再夾埋時間去排紮染同自製肥皂嘅工作坊，雖然每節時間都略嫌匆忙，但Ambrose對於做呢d手工玩意好有興趣，同媽咪一齊整又好開心，好有滿足感，媽咪自己都係第一次整，都覺得好好玩，今次黎呢個遊學園，真係覺得做到呢幾個手工真係超值呀！
玩多幾個彈床，都係時間要走喇！原本仲有落田種野同埋玩沙掘恐龍骨，不過因為我地完全唔知道有呢d活動，完全無準備黎，所以為免難於善後，都係盡量唔提起唔經過就算，哈哈！仲有係有個吹氣嘅攀爬山，好大座，好似好好玩咁，Ambrose嘈住要玩，但佢唔夠高，無得玩，佢又唔信我地，唯有抱佢去問工作人員至心息！見佢對爬山有興趣，都有提議佢玩個長滑梯，點知佢話唔玩，話“咁高”！真係俾佢笑死，個滑梯都唔及爬山咁高，但佢爬山又嘈住要玩，反而滑梯大把人排佢又話驚！仲好，可以唔使排，哈哈！
最後，見到有個位置有好多禾桿草，唔使排隊就咁入左去玩！原本以為Ambrose唔會鍾意玩，點知佢又好鬼鍾意，叫極佢都唔走，結果每節時間唔知係咪五分鐘，我地足足玩左三四五次！雖然媽咪覺得平時都好難得有機會咁玩d禾桿草，想俾Ambrose多體驗之餘，又覺得d草係人都著鞋踩入去玩好污糟，仲要周圍fing，諗起都身痕咁，而爹爹一早已經失守，d人係咁fing，佢個鼻就開始痕喇！
今次呢個遊學園其實真係唔錯，幾好玩，如果下次準備好少少，應該可以玩成日！今日我地玩左五個鐘，都未行哂玩哂！下年再搞的話，都值得再來！
一早買左飛同Ambrose睇呢套芭蕾舞劇，其實今次除左係Ambrose第一次睇呢類型嘅show，媽咪都係第一次咋！套劇140分鐘咁長，驚Ambrose扭計要走攪到媽咪都無得睇，所以今次破天荒捉埋爹爹一齊入場睇！
去之前有約略同Ambrose講過吓個故事內容，不過始終佢仲細，唔明點解白雪公主食左蘋果就死左，哈哈，唔知佢會唔會因為咁之後食蘋果有陰影呢？
雖然買左最平價再貴一級嘅飛，但都一樣係山頂位，只係山頂嘅第一行中間罷了！由於個台有某d場景係有樓上樓下嘅，我地坐响山頂鳥瞰，當d人上左樓上嘅時侯，其實都唔係太睇到！而且，因為全部都係真人，唔同平時睇公仔show咁有大大個公仔咁eye catching，坐左上山頂其實完全睇唔到表演者嘅表情，所以有過今次經驗，下次有同類型嘅節目去睇時，如果真係好鍾意的話，真係寧願買貴少少喇！
講番套劇，Ambrose都係一半一半鍾意咁！睇得出佢都鍾意睇白雪公主同小矮人，但去到惡毒後母就話驚！無辦法啦，套劇係芭蕾舞劇，又無對白，只有音樂，成個故事都係靠人物動作、舞台音樂、背景同燈光光暗等去表達！次次去到惡毒後母個背景都陰陰沉沉，音樂又恐怖d緊張d，可能加上之前同佢講過後母係壞人啦，攪到佢驚到要走！
本來中場休息時媽咪都想過放棄架喇，因為見到Ambrose唔enjoy都好似無咩意思咁，同埋之後果幕會做後母變巫婆去害白雪公主，應該仲恐怖d驚d，媽咪都怕佢頂唔住！好彩爹爹响度咋，爹爹攬實Ambrose擰埋一邊唔睇，又安撫佢，咁先捱完呢幕，去到之後嘅Happy Ending，音樂，佈景同燈光回復正常，又有小矮人攪吓氣氛，佢又笑到keke聲！
離開左之後再問Ambrose個show好唔好睇，好彩佢話好睇咋！希望今次嘅經驗唔好嚇怕佢啦，黎緊媽咪又買左“Cinderella”芭蕾舞劇嘅飛，希望今次無巫婆會好d啦！
之前都唔敢同Ambrose講定會有 show睇，一來媽咪轉左工之後突然好忙，差d唔記得左買左飛睇show，二來因為打風嘅關係，怕講左會去睇但打風去唔成，都係唔講。結果，只係當日氹Ambrose瞓晏覺時同佢預告有show睇，等佢乖乖快d瞓，好彩Ambrose一向都鍾意睇show，呢個方法都有用！
又係預早時間去食飯，又係早左食完，早左過去會場，結果係七點九開show，七點三已經到左，等到Ambrose都係咁問點解咁耐，真係有d唔好意思喇！最慘嘅係到入左場坐定之後，又要等埋其他人入場，結果都成八點鬆d至真正開始，真係唔明點解d人唔可以早d到架咩？都已經寫明七點九開始，唔係應該早十五分鐘到場準備架咩？點解可以七點九甚至更遲先黎到？對於我地呢d咁準時嘅人黎講，真係好唔公平，要知道個show都係俾小朋友睇，佢地多數都好心急架啦！好彩有浠浠一齊去，又加上可能Ambrose細細個開始都去慣呢d場合，已經習慣係咁等，所以touchwood佢都只係個口不停問點解未得，但都好合作咁坐定定！
兔媽媽男孩係講個小男孩同家姐爭玩具，佢覺得媽媽唔錫佢，只係錫家姐，於是佢離家出走，要去搵爸爸！其實情節都幾寫實但又有 d好脫離現實，好似之後個男孩出走後，無啦啦佢變左隻兔仔，重有就係有兩隻小白兔錯認佢做媽媽，發展落去就係講身為媽媽嘅佢要負責照顧呢兩隻小白兔，响照顧其間佢遇到好多情形都同自己同家姐嘅爭執一樣，亦遇到一d兩難嘅問題，如此種種令佢開始明白到媽媽並唔係唔錫佢，體會到媽媽嘅辛勞。故事又突然間返到現實，男孩又變番男孩，重同家姐媽媽重聚，主動道歉！個故事真係幾好，不過現實同虛幻夾雜一齊，唔知Ambrose明白幾多？不過至少媽咪知佢明白小男孩同家姐爭玩具，同埋最後重聚時佢家姐買左幾枝雪條一齊分享，因為佢係咁講“雪條”，嘩哈哈！
值得一提呢個show幾特別，有真人演出！但當男孩變左兔媽媽後，就變成左幾隻毛公仔演出，而公仔就係靠真人手持操作，媽咪估公仔後有一枝柄俾工作人員揸住同埋易於控制，而工作人員全負裝束都係黑色，全程其實都唔係幾睇到佢地對手操作公仔，真係幾得意！總括黎講，都幾好睇，亦都可以俾Ambrose接觸多d唔同嘅文化節目同演出媒介，值得睇！
