Dr Poon Playgroup

以前諗都無諗過要自己嘅bb咁早返playgroup，覺得要bb得果幾個月人仔返學都傻嘅，我又唔係要栽培bb好叻好勁，好似無咩必要咁細個返學！到自己陀住Ambrose開始成日上網睇資料上seminar，發覺而家嘅bb普遍都會返playgroup，已經好common。而且playgroup並唔係我想像中係咁學術嘅野，只係一d親子時間可以同bb一齊玩，去學同佢玩d咩嘅遊戲可以鍛鍊到佢嘅大小肌肉、認知能力、平衡感、空間感等等，呢d就係而家好興講嘅感覺統合。感覺統合嘅訓練對bb黎講都好緊要，原來話感覺統合有偏差嘅小朋友可能會有唔同程度專注力問題，例如過渡活躍、自閉以及各類型學習障礙。雖然呢d遊戲可能我地平時不知不覺都有同bb玩開，但其實玩嘅時候都唔知道原來遊戲本身對bb有咩作用。而一般人都會諗playgroup係幾嘥錢，因為又要俾錢，上堂又只係玩吓遊戲咁簡單，無咩實質野學到，好似有d俾人呃咁！俾著以前我都會咁諗，但係越睇得多越知得多，就明白到呢d遊戲嘅重要性，開始認真咁同Ambrose搵playgroup上！

不過原來你想報都唔係咁容易有班，上網知道基督教服務處嘅幼兒潛能訓練班，好出名，以前一開班重要晨早去排隊，而家改左抽籤形式。我第一時間幫左Ambrose報名，點知得五百幾個位，我抽到去七百幾，即係無望啦！再睇吓並他啱佢嘅playgroup，知道Dr Poon呢個playgroup都幾多人去，除左小朋友真係學到野之外，聽聞Dr Poon都好細心去觀察bb有咩問題從而可以針對性地加強訓練某一方面，佢地係會上完八堂之後有report出番俾家長，並唔係玩完就算，最重要係好多playgroup都只容許父或母其中一個陪bb入去玩，唔可以兩個都去，而Dr Poon嘅playgroup係可以父母一齊入去玩，更加歡迎日間照顧者一齊上堂，我覺得好好，因為我唔可能上完堂去教奶奶點同個仔玩，如果佢都有上堂，咁佢會清楚d點玩，同埋唔會好似我話點點點，而係個老師話要咁，俾佢信服d囉！當我想去報Dr Poon嘅時侯都無位，一係我自己同其他人自組一班，一係就等吓會唔會有侯補位。自問怕麻煩自組班啦，所以都係報左侯補，佢地有位先call我，好好彩報左無耐就有位喇，第一堂係 五月二十九日 ，Ambrose係九個幾月！

疤痕

重記得响醫院嘅時候隔離床個女人好不滿自己開刀傷口唔使拆線，佢覺得有疤痕先至有紀念，我真係好不滿佢囉！有邊個女人唔想自己靚架，雖然開刀位都無人睇到，有無疤都無所謂，不過無梗係好過有啦！

好不幸，我係要拆線果個！我重記得拆線之後姑娘俾塊鏡我照，好嚇人，除左個條好似科學怪人嘅傷口之外，重成肚都係又紅又紫嘅妊娠蚊，真係見到都想嘔！有一段時間我自己都唔敢去掂同睇自己個傷口，因為一見到我就超down喇！

產後嘅傷口一直都只係一條線咁，無咩特別，我以為等佢退左紅個傷口都係咁上下樣，點知產後三個幾月，傷口超痕，又紅又突，重要係佢開始有少少粗，大驚之下都去睇番個婦產科醫生！醫生話我個傷口無發炎，好正常，佢話痕係正常，重話平時我地整傷左傷口結焦都會痕啦，何況開刀傷口咁大，恢復緊係會咁喎，傷口係有少少突，不過恢復緊係咁，之後會平番少少，見佢咁講即係無問題啦，唯有等佢快d好番就唔好再痕同突！不過因為我都好擔心個傷口會越來越突，我有問醫生係咪可以搽野或貼疤痕敵之類嘅產品黎防止傷口出肉芽，醫生又話無醫學根據，又話如果我想試都可以試吓，總之佢個大前提係我個傷口無發炎無問題，只係等佢復完，無咩其他野可以做，而佢都唔會阻止我去搽或貼任何野令個傷口唔好有疤！

睇完個醫生之後我都係唔甘心走去買左枝去疤膏，我重好神心咁跟哂instruction搽左一個月，真係搽去肚紋膏都無咁好耐性呀！枝野都無話耍搽幾耐至得，不過我見搽左一個月都好似無咩特別好左，枝野又唔係平，又諗醫生話其實無咩可以做，咁我又好氣餒，之後就放任個傷口，唔理佢，又無再搽野喇！

其實個傷口一路都好鬼痕，不過係一時時係咁，每當佢一發作嘅時侯，我就好抑鬱咁，覺得唔通以後都係咁？我已經都無太在意佢已經再變粗左同突左，因為即使著三點式都唔會睇到條疤，同埋根本上可能連三點式都無機會著番，我最在意嘅係佢真係好痕！痕，可以去抓，不過個疤又紅又突位置又尷尬，我又唔敢抓，坐又坐唔安，好辛苦！

產後八個幾月，情況依然，我有上網問吓其他人個疤幾時先唔再痕．．．．．．答法不一，有人從來都唔痕，有人耐不時有少少痕，有人話產後二年甚至乎十年都重耐不時痕緊，聽到重down，咁即係唔好諗會好番啦！

後來有一排真係好唔開心，同個同事講開我呢個問題，咁啱同事有個外科醫生朋友，佢就幫我去問吓有咩野可以做無咁辛苦，我都唔expect有d咩可以解救我呢個情況，因為睇番好似個個人都唔同，根本唔係開刀手勢好唔好，有無戒口嘅問題！同一時間我就忍唔住走左去買疤痕敵黎貼，貼左幾日已經無咁痕喇，不過可能我嘅皮膚幾敏感啦，反而到塊膠貼邊位嘅皮膚開始有d痕！真係一樣完左又到另一樣！响我好絕望嘅時侯，同事覆我話個醫生朋友話我呢d case好common，去打番d類固醇針就可以喇，同事個醫生朋友重幫我安排去佢間醫院度幫我打針！

其實一聽類固醇係有d抗拒，好似唔係幾好咁！不過一個人去到咁絕望嘅時候有人同你講個問題唔係d咩大問題，係有辦法解決嘅，咁我點都去試吓先啦！同老公講左佢都ok無問題，咁我就去左搵個醫生喇！醫生話我條疤都唔算突得勁，好多人都唔係因為唔靚先至要打針，而係真係好痕好唔舒服，尤其是夏天出汗重要貼住果d疤痕敵，佢真係講中哂我心諗嘅野！我問佢其實貼疤痕敵有無用，佢話絕對有用，話貼住左個傷口無咁多位俾佢突出黎，重話佢好多病人如果可以嘅話佢會叫d病人用夾夾實個條疤添！我聽到真係好後悔當初做咩唔睇多個醫生俾d意見，重信哂個醫生話無咩可以做，無咩醫學根據，無打理過條疤！最初都係一條幼線少少突，而家就又粗又突，如果一早貼左疤痕敵或keep住搽膏，可能唔會好似而家咁！不過醫生話人人體質都唔同，唔可以話做左d咩就一定有用,亦唔會有醫生保證用左咩會無疤，even打針打平左條疤，都唔可以保證日後唔會又突番！雖然聽來都幾灰咁，不過打針都算係我嘅最後生機，都唔諗得咁多！醫生話每月打一次針，平時夜晚要搽類固醇膏，keep住咁樣去到條疤平同唔痕，唔保證要幾耐時間攪得掂，不過响政府打，有限錢，我都唔care咁多！

以為打針落條疤度都好簡單，不來佢係一枝針筒沿住條疤打好多針，都咪話唔痛架！第一次打完佢幫我貼左塊紗布俾我走，我返去拆紗布時見到有八個血印响塊布度，我諗佢應該打左八次落條疤度，好彩都係每個月打一次咋，咁痛！

打左針之後兩三日，真係唔痕喇，不過都無平番，應該唔會咁快，anyway，對我黎講，唔痕已經好好喇！有醫生朋友，原來真係幾好，最衰我無！

九個月成長記錄

好耐都無update到Ambrose嘅成長喇，呢個呀媽真係懶到死！

Ambrose啱啱响六個月之前學識反身，自此之後都好鍾意趴响度瞓，攪到我地就無覺好瞓，成日要同佢反正番個身。六個月買左學習杯俾佢學飲水，不過係鴨咀頭，志在俾佢感受吓點啜水，不過佢正值口腔期，幾乎任何野佢都會放入口，俾個杯佢攞住就係咁搖，一係攞住俾佢啜就係咁咬個鴨咀，食個杯蓋，真係俾佢激死！加上發覺學習杯一定要舉起個杯身先啜到，Ambrose又唔係好識攞住托高加啜水，都令我好氣餒。

Ambrose七個月，開始熟習左反身，再唔係成日要樹起兩隻腳用力發埋一邊，而且佢重開始好似蟲仔咁“冷冷下”，主要都係不停扭動個屁股仔同頭仔企圖爬行咁。坐方面都好直好穩，印象中幾乎係最快學識咁，可能係之前一直無特別俾佢坐，見佢識反之後先俾佢自己坐吓，點知一日比一日坐得好。唔記得左幾時開始識得大人攤開兩隻手佢已經知道係抱抱，用番兩隻手伸出黎要你抱佢！食糊仔都斷斷續續試左個幾月，麻麻地習慣咁，唔太合作，健康院姑娘話可以試粥仔，原本想等Ambrose大多d先試粥仔，因糊仔營養好d，不過見奶奶好似好興奮咁可以試粥仔，咁就由得佢啦，試吓會唔會好d。學習杯訓練由鴨咀杯跳去飲管杯。雖然大部份飲管杯都標榜住八個月之後用，不過因為鴨咀杯要托高先啜到，咁樣實在對Ambrose黎講太高難度，對我黎講又好難控制，因為有一種鴨咀係要啜先出水，個杯倒轉少少都唔會漏水，一種係個鴨咀有洞唔啜倒轉個杯都會出水。前者方便少少，不過Ambrose係唔啜只係咬；後者係一倒轉少少而Ambrose扭黎扭去嘅話d水就噴到周圍都係！嬲嬲地去買左隻飲管杯，唔使托高就咁啜，點知一試先發覺Ambrose係識啜嘅，不過佢唔鍾意飲，皺哂眉咁，d水就响個口流番出黎！不過都叫好，識啜，起碼都知佢唔係唔識，係唔鍾意先！攞野已經好叻，左手交右手，右手交左手，一隻手攞住野再俾多一樣佢，佢唔會好前之前咁放低一樣去攞一樣，而係識用第二隻手去攞埋！

Ambrose接近八個月，已經可以爬喇，不過係好似條蟲咁“典吓典吓”兩手兩腳撐撐吓咁去，有時搵玩具引佢爬，見佢好有興趣想衝過黎攞，已經成隻蜘蛛俠咁有趴响度嘅姿勢，一隻腳伸直左，另一隻腳就死都唔伸出黎，係坐响度繞住腳咁，然後就望住個玩具作思考狀，好攪笑！依我推測，Ambrose係鍾意坐响度玩，但係佢未識爬完之後自己坐番，所以我估佢見到玩具唔撲埋去，個姿勢係界乎坐同爬之間咁，係因為佢唔想典到去個玩具度無得坐响度玩，哈哈！粥仔嘅進展唔太好，試左唔同質地唔同味嘅，甚至乎唔同時候餵都試過，唔見得佢鍾意食，餵一餐好似打仗咁，周地都係粥，成面成頭都係粥，甚至乎自己d頭髮都係粥，激死人！自已搽奶樽飲奶，呢樣野之前我地一路都想教佢，不過一路都無教到，突然間有一日老公諗住教，將Ambrose平時其中一隻手攝响大人背後伸番出黎，重同佢講自己渣奶樽飲，好神奇地Ambrose自自然然就識，一take過攪掂！我諗佢一早已經識，係我地無俾機會佢試，重諗住佢會好似渣玩具咁一搽住就起勢搖，實飲唔到，點知佢又知唔搖得咁，搽住定定咁啜，只係擰吓擰吓有時甩左咁，不過真係唔多，呢一樣野真係令我地好驚喜呀！

Ambrose今日九個月，佢已經識得爬，不過依然唔係四點落地，左手右腳咁爬，而係趴响度用兩手一齊撥前一路向前行，有時見佢有標準爬行（即四點落地）嘅姿勢，不過只係可以維持 一兩 步就又變返一條蟲咁行，哈哈！佢已經識;由趴變坐或由坐變趴，同埋扶住物件自己企响身，活動能力更加大！之前佢未識扶物自己由坐變企，麻麻就鍾意抱企响牆前面等佢挨住幅牆，我地叫罰企，因為佢挨住企唔會跌但係佢又坐唔得番低，佢會求救咁伸兩隻手出黎想人抱佢，而佢係唔會撲前，只係伸手！我地以為佢唔敢撲前係因為佢知會跌，但係唔知邊日開始佢終於忍唔住成個人撲前，咁當然我地即刻接住佢啦，自此之後可能佢知即使自己唔伸手求救只要向前撲，我地自然會接住佢。而家，當每次想罰佢企嘅時候佢都特登撲前喇，好似以為我地同佢玩咁，激死！識得搵人，知道麻麻成日會响廚房整野，成日一個人玩玩吓唔對路就爬去廚房“莊”，其他房佢又唔去架喎！粥仔依然係麻麻地，叫勉勉強強代到一餐，不過呢一餐都唔係易餵！飲水比之前一個月好左，起碼有時啜左真係有飲到，不過有時都會“boo”番出黎，出街斷斷續續咁餐與餐之間餵都可以飲到30ml即一安，當濕吓口都好啦！發音方面都係同之前六七個月時差唔多咁，唔記得佢幾時識發“爹爹爹爹”喇，感覺佢發左好耐，佢爹爹就開心，成日話呀仔識叫佢，不過我覺得呀仔只係識發個音而唔係真無識叫囉，因為佢見到其他人都爹爹爹爹爹架啦．．．

九個月大嘅Ambrose依然keep住每個月都要搵吓醫生叔叔，我地叫佢“潺仔搴”！而家食藥都係會喊到拆天，唔會因為食慣左而放鬆！不過早兩日用針筒餵猴早散俾佢時佢又好安靜咁食哂喎，好神奇！

搬blog成功

07年開始已經有寫blog，不過唔知點解當時用左天空部落，用用吓先發覺有d麻煩，因為分類管理有d亂，朋友要開account login先可以留言，不過因為寫blog都係低調嘅野，內容又涉及私人野，加上都用開左咁耐，所以都一路用，貪佢都唔多人唔覺意睇到，最重要係懶得攪！

不過Ambrose出左世之後都有d野記載，想整理好d個blog，不如一次過搬blog，當一個back up都好啦，花左個幾星期時間，終於搬左過黎！不過由於一路搬一路都有d唔識嘅人留言，發覺响度放相有d唔安全咁，所以舊blog嘅相儘量都無搬過黎喇，之前睇過就算！

捐骨髓

三月中嘅時候突然有一日收到紅十字會嘅電話，話我嘅血初步同一個病人吻合，想叫我返去抽多一次血做覆檢，我二話不說約左第二日就番旺角嘅centre做覆檢，奶奶極抗拒我去，覺得捐骨髓好傷身，老公都麻麻地，可能覺得我太潺弱，捐骨髓好似好大件事咁。我都係果句，只係去抽少少血覆檢，唔係一定吻合，我覺得唔使太緊張，驗左再算啦！不過唔緊張唔緊張我都有上網去睇吓捐骨髓嘅野，原來如果吻合，都重要去做體檢同見醫生，所以都唔係你話捐就捐！睇吓人地講有d人話痛有d人話無野，不過都叫手術，自己諗落都驚驚地！生bb嘅時候自己成日都諗唔驚唔驚，但推緊入去嘅時候真係驚到喊驚到震哂，有一刻諗，如果我d血係吻合嘅，我係咪都有勇氣去捐骨髓呢？老實講，我真係重好驚入手術室，不過我諗我都會去！唔知呢，自從有Ambrose之後，我覺得自己“偉大”左！我會諗，如果有一日Ambrose有事，我都希望會有人肯幫，如果個個人都驚好傷身，咁可能就係因為咁無左一條生命，如果因為驚入手術室而唔去捐，人地有病嘅人日日都要驚唔知幾時唔响度，我呢d驚又幾咁小兒科呢？我睇過一個case係有人已經肯捐骨髓，但未安排到手術個病人已經唔响度，真係好可惜，就只差少少，生命從此唔一樣．．．．．所以捐唔捐到都要睇緣份！

 

紅十字會個姑娘話覆檢後兩個星期如果吻合會收到電話，如果唔吻合佢地都唔會打黎，而家都有成個月無收到電話，咁即係唔吻合啦！希望果個病人好快會搵到啱佢嘅骨髓啦！

有感

Ambrose出世之前我係無參加過任何產前講座，新手媽媽連最基本的初生兒護理都唔識，好彩嘅係產後醫院嘅姑娘會不斷催促媽媽們參加即日响醫院舉辦嘅講座，同咁啱Ambrose要留院，所以基本上最令我望而生畏嘅臍帶清理我都避過左。反而Ambrose出世我返埋工之後，我開始熱衷報唔同嘅講座，內容都係離唔開早教同幼兒食譜咁。

 

可能好多人都覺得而家嘅父母都太緊張，尤其係香港嘅父母，樣樣都唔敢執輸，怕自己嘅小朋友比唔上其他嘅小朋友，將來大個之後會唔夠人爭，所以個個都咁緊張要提早教育，早教早教，要嬴在起跑線！好多人嘅心態都係自己以前咩都無都係咁長大，係而家嘅父母先會咁攻利咁緊張去催谷小朋友。我唔排除有d家長係咁嘅心態去催谷自己嘅小朋友，驚執輸驚蝕底，人人都話早教，自己都要早教，羊群心理，人云亦云，根本唔知其他主張早教嘅父母嘅理據及信念，而我好相信時下好多人都只係睇到呢部份人嘅“緊張”行為而去作出批評！我對於早教其實唔係認識好多，基本上我亦都無咩偉大嘅教育理念，不過我係支持早教嘅媽媽。由陀bb嘅時候就已經聽音樂，聽胎教機，甚至睇圖卡、碎碎唸同bb講見到d咩做緊d咩，我諗好多人都好似我咁會聽音樂進行胎教，如果有人認為早教係無用同過度緊張嘅行為，咁點解胎教又唔係呢？好多時陀住bb嘅時候d人都會叫媽媽笑多d開心d，咁bb先會開心先會笑，呢d咪教育囉！既然bb未出世我哋都已經不斷咁進行教育，點解出左世之後一定又要等到學齡先再教呢？真係好矛盾！bb一出世其實我哋己經係不知不覺咁進行教育，如果唔係佢又點會無啦啦有一日識叫爸爸媽媽？既然係咁，其實學習呢樣野已經係由佢出世之後不斷進行緊啦，點解我哋要咁抗拒早教呢？定還是大部份人都俾香港嘅教育制度個框框死左，認為小朋友番學先叫學習？未到學齡根本就應該只係响屋企瞓吓覺食吓野玩吓玩具，要識嘅野自然佢哋就會識？

 

之前聽過唔同講座都有講0 – 3歲時期幼兒嘅學習能力係最高嘅，你俾d咩野bb，bb就學d咩野，佢哋個腦就好似海棉咁，你俾d咩佢哋就會吸收哂，呢個係硬灌輸時期，你想孩子係一個點樣嘅小朋友，就好睇你俾一個咩環境佢，所以教育唔係等小朋友大個d嘅時候做，而係由細細過就去俾一個你想要嘅環境小朋友，去教養你心目中嘅孩子，過左某d嘅時候，你想教佢都未必俾你教，你想培養佢可能已經錯過左時機！我相信，因為我自己本身就係果d“以前咩都無都係咁長大”嘅人，無專長無特別興趣無理想嘅女人仔，成個人生都無咩特別，讀書做野結婚生仔，人人都係咁嘅人生，唔可以話我唔快樂，只係有得選擇嘅話我都好想我識跳舞彈琴或者咩都好嘅一樣野，我重好記得細過學學吓琴學學吓芭蕾舞都停左，問番媽咪點解原來只不過係帶我去好麻煩，屋企無琴俾我練點學落去？今時今日我仍然都覺得係好遺憾，覺得點解呀媽咁懶唔帶我去學，當然無錢買琴或者租琴我係無得怨啦！而家我有自己嘅小朋友，經濟許可嘅話，我當然係想俾一個好嘅環境去培養佢啦，我唔想將來有一日佢會好似我咁問我點解唔俾佢點點點。只係我嘅信念係俾一個理想環境佢，之後佢接觸過d咩野有無興趣就係後話喇！我哋唔可以強迫亦強迫唔黎！語言文字係一切學問之始，我哋係透過語言文字去探索呢個世界，可見語言文字係幾咁重要！既然咁重要而又必學，bb又絕對有能力去學習，點解我哋去抓緊呢個黃金學習時間會被人認為係過度緊張，俾壓力呢？我睇唔到早教有咩問題，我睇唔到基於咁嘅心態去進行嘅早教係有幾攻利！

 

之前我同老公毅然決定買左一套幾萬蚊嘅教材俾Ambrose學英文，有d人話“廢架！”，有d人會話“使唔使呀？”，有d人會話“唔使買咁貴嘅教材都教到啦！”當中有幾多唔認同及不屑，我從來都無去炫耀套教材有幾好有幾貴，實際我都好肉赤，亦都唔知套教材係咪好係咪得，當然我哋買之前並唔係人哋話好我哋就去買，而係有真正比較過其他教材先去買，我哋係相信套教材嘅概念先至買，並唔係羊生羊太！我哋都相信即使唔用呢d咁貴嘅教材都可以教到英文！只係我哋番工都好忙，放工返到屋企已經唔係好多時間同呀仔玩同教呀仔，有一套有系統嘅教材係可以減低我哋嘅負擔，唔使成日諗點教用咩教買咩教！當然我哋唔會天真到認為咁貴一套教材買左番黎bb就會變叻，每套教材都有佢不足之處，一套教材唔可以教得哂，呢d只係輔助性質，點樣用點樣教同父母俾幾多時間小朋友係重要過套教材本身嘅，我哋唔係想要呀仔幾多歲就識幾多生字，唔係想佢做神童，只係想由細教佢英文將來無咁難去catch up，亦都透過套教材，早d俾佢有閱讀嘅概念，培養佢閱讀嘅興趣！除左英文之外，其實我哋都有俾其他語言呀仔聽，例如普通話、法文同意大利文，全部都係歌仔韻文，當平時背景音樂聽吓咁，我唔會覺得誇張，只要抱住嘅心態係輕鬆學習，將學習融入環境之中，學到咪當bonus，學唔到或無興趣咪算囉，我唔覺得咁樣係辛苦同催谷！

轉身之後

自從年三十晚我親身見證了Ambrose第一次轉身後，老公在年初一早上也看到了，大家都很興奮，因為相比起會用手拿玩具，轉身似乎是一項比較明顯的大動作，這亦意味著將來的某一天Ambrose會爬行，他的世界從此便不一樣了！

 

話說回來，自從Ambrose學會轉身，我哋都會不停用玩具鼓勵佢轉身，不過心態只係想睇佢轉身果個攪笑樣多過想同佢運動！Ambrose通常平瞓嘅時候想轉身，佢唔係將個身直接打側先，而係將兩隻腳舉高半空，然後用雙手捉住雙腳，再將兩隻腳發去一邊，咁佢先打側到個身，唔知係咪因為佢重所以平瞓時自己唔可以隨意打側身而要舉高腳用手借力發個人過一邊呢？當佢打側身之後佢就會係咁用個頭呀身呀典吓典吓就轉左身喇，過程係幾好笑架！不過當同佢換片或換衫嘅時候，佢會係咁走佬，典左典右就唔使點舉高隻腳先發到個身向一邊，繼而好快就扒左响度，攪到換衫同換片都好似打仗咁，我開始諗係咪要同佢著學習褲呢，因為換片係一定要瞓响度先換到架麻！

 

換片都重可以放番high chair度換，等佢無位走轉唔到身！床就唔可以轉過張細啦！自從Ambrose識轉身之後，佢夜晚瞓覺都越黎越大動作！以前可能係瞓左响度唔郁，之後係瞓瞓吓一係典左向上一係典左落下面，但都係直瞓，再大d就係瞓到打橫，個頭同腳就啱啱卡在床嘅濶度裡面，見到都覺得辛苦，但佢又瞓到架喎，到而家識得反身，真係煩喇！唔計佢晚晚嘈嘈嘅呼吸聲同食手聲，轉身郁黎郁去抓床圍嘅聲同偶然嘅喊聲之外，佢好興半夜反身扒响度瞓，再唔係佢反左身反醒左就周圍望唔瞓，攪到本身我都會一晚醒幾次睇佢會唔會“褲”被同卡左响張床度，而家係俾佢再嘈醒，又要搬番佢啱位，搬完又好快典左去第二度又再搬，但又驚搬醒佢，攪到我成個人都醒哂，重要如果佢反身反醒左周圍望，我又唔可以起身氹佢瞓番，驚佢以為我同佢玩唔肯瞓，但佢扒响度唔瞓我又唔可以唔理，唯有瞓响度咪起對眼“莊”佢，睇佢玩幾耐先再瞓，快則五至十分鐘，慢則半個鐘至九個字，唉！一場覺有幾多個“半個鐘至九個字”呀？所以而家真係一場覺係分左N咁多次瞓，好疲累呀！

 

原來Ambrose會轉身唔止意味住佢嘅世界從此不一樣之外，我嘅世界從此都不一樣呀！