無薪假

老公要清大假，所以佢今個禮拜都會放假！好開心！我除左成日要去產檢可以攞病假，重要係睇政府得半日，放左都只係夠檢查用，睇私家就一日，可以真係休息吓，真係好耐無放假喇！

 

唔知點解次次老公放假，我都會意外地又放埋咁，上次就入院，放左一個禮拜！今日係佢放假第一日，我竟然唔知醒瞓到九點！原本唸住返下午，不過食完早餐行去買書櫃再返屋企，累到响床度瞓著左，最尾都無返！因為唔係產檢，所以今日放假係無薪嘅，今個月都放左兩日無薪假喇，真係慘！

補品

我好多同事都已經係爸媽級，個個都同我講坐月好緊要，補得好嘅話會好過未生果時，因為坐月係一個重整體質嘅大好時機，我身體不嬲都麻麻哋，所以都好想藉呢個機會攪攪佢！不過自從知道好大機會要開刀，都有d沮喪，因為覺得呢個咁難得嘅時機真係可遇不可求，順產recover得快d，又可以早d補，開刀始終傷元氣，長d時間recover咁，唔知道會唔會重差過以前！不過無計啦，始終都要面對現實，開刀差唔多係九成嘅事！所以我呢排都好關注日後補身嘅野。

 

唸住去買定補品，點知奶奶又話唔使咁早買，又話佢屋企有，咁早買雪櫃無位擺喎！都幾失望架！我又唔係叫佢買俾我，我自己緊張d想早d預備吓，佢都唔明我有幾驚，梗係想做d野令自己安心d架啦！佢話佢已經買左d藥材，不過唔係自己買嘅始終無咁放心咁，唔係話佢唔肯買野俾我，不過自己去買，買好少少貴少少感覺安心d咁！媽咪都好著緊坐月嘅野，可惜佢對眼真係越來越差，自己照顧自己都有d勉強，重點幫我？！佢幫唔到我佢都好無奈，唯有靠奶奶同自己搵定多d資料先啦！

 

奶奶話唔使買野，咁我自己去買都無我符，所以唸住唔叫佢一齊去睇，點知無啦啦有日佢話想去海味街行，咁咪一齊去行囉！去到佢專注睇燕窩，我都好奇怪！因為不嬲佢都係鍾情花膠多d，而我就麻麻哋花膠嘅質感，不過係人都話坐月食雞食花膠都好，雖然我真係麻麻，但我唸住到時都會豁出去架喇！燕窩同冬蟲草係我成日都想買嘅補品，覺得可以取代花膠，哈哈，至少唔使餐餐花膠咁慘！而且燕窩好似對開刀埋口好d咁，冬蟲草滋陰，開刀都可以食，不過而家超貴，一両都唔知食到幾多次，買唔起喇！可能我成日講起買燕窩同冬蟲草，奶奶先會無啦啦又去睇，都好，了我件心事！不過我哋都唔識選，都係睇吓價錢同只選燕盞，最尾買左一斤，唔係乾燕，見佢响雪櫃一盒攞岀黎，話係批發嘅，都無量過係咪真係一斤就買左，唔知真唔真嘅，哈哈，不過買完真係安心d啦！奶奶話佢買俾我，我死都唔肯，費時啦！

見營養師

今日終於係見營養師嘅大日子！自從知道有妊娠糖尿病之後，上網見好多人都要跟餐單食千八卡，我都已經打定輸數我都唔例外，即係會無啖好食！所以呢幾日我都無即刻戒口，反而食得就食，如果唔係就有排都無得食！

 

上到贊育營養部，見到有幾個媽咪已經到左，營養師叫我哋塡張問卷，大致係寫番平時大概食咩，同埋一日裡面係點食野。點食野都幾難寫，日日都唔同，份野只係寫一日，又要寫份量，例如肉有幾両，菜有幾碗．．．．．不過我食野嘅pattern都無變，一日三餐，正正常常，所以份問卷嘅上下午茶同消夜果d位我都唔使塡，係咁易塡完三餐就交。交左之後，營養師會逐様go through，係當眾嘅！所以都知道其他媽咪點食野，都幾得意！

 

營養師go through我嘅問卷時都話我食咁少，係啦，食咁少都有糖尿，真係唔公平！不過佢話我可能唔夠纖維，真係難以置信，一向都唔太“好”肉只鍾意食菜嘅我，竟然俾人話食唔夠纖維，都幾諷刺！至於甜野，我都唔“好”，極其量我係唔鍾意飲水，鍾意汔水、檸檬茶、益力多咁，不過呢d凍野都飲少好多，係出街果兩餐先會飲檸檬茶，重要一定只係飲唔到一半，咁都糖尿，真係唸係咪攪錯左！營養師之後教我哋點食果千八卡，就係一日六餐，早餐、上午茶、午餐、下午茶、晚餐同消夜！好似好多餐咁，重多過我平時食嘅餐數，但係其實每餐都唔可以食得多！好似早餐咁，最多都係兩碗稀粥或者係火腿三文治或者係大半碗米粉或者一平碗通粉，個碗嘅大細係普通飯碗，同酒樓白飯碗咁上下！午餐同晚餐嘅飯量係五平匙，肉三両，一両等於一粒魚彈喎，菜無限！唸起都少啦！返工出街食好難食菜，俾我可以無限食都無用！五平匙飯真係一陣間都無啦！話就話每餐後有小餐好似上下午茶咁，但係一份小食都只係兩塊梳打餅或半塊麥飽加一盒奶或兩份水果，水果又有換算表，唔係你話一個橙就等於一份水果，一個市面上買到嘅橙已經係份半，四份一個火龍果叫一份，市面上大大粒嘅士多啤利四粒一份．．．．．我飲唔到奶可以食yogurt，不過要原味無糖嘅！營養師俾左本書仔我哋，裡面有d食物換算嘅資料，即係我如果唔食飯食其他野嘅份量，一両肉又可以有幾多野可以食等，咁當然佢呢本書仔所舉出可以換黎食嘅野係好general，實際上好多情況好多種類嘅野就真係唔知點換，好難逐様去問！

 

當營養師go through緊點食野嘅時候，我聽到d媽咪講自己幾多度糖尿，原來個個都知得我唔知！果次個糖水test個passing rate係要7.8以下，有d媽咪原來都只係7.9咁上下，都叫啱啱唔合格，所以佢哋大叫唔抵，好好笑！我哋呢班媽咪原來都係餐後血糖高，餐前血糖ok嘅！營養師重話俾我哋知，之後入院食餐驗血糖個passing rate會低d，得6.8咋！臨走時我忍唔住問營養師知唔知我幾多度，佢就搵番我份record幫我睇，原來我嘅餐後血糖成9.9，雖然唔知算唔算高，但係知道人哋都係得七點幾、八點幾，自己就差唔多十，真係down爆！入院個passing rate得6.8，好似好難過囉！

探小ｂ

自從四月尾去私家照結構後都無再見小b喇，雖然五月頭都响政府照過，不過政府嘅野，真係係咁易，之前入院照左幾次都係醫生睇我無得睇，所以正式黎計，真係有兩個月無見喇！今日終於到私家覆診嘅日子，我同老公都好心掛掛，因為之前肚痛入院又無咩原因咁，政府嘅醫生又唔會同你講咁多，所以有咩問題我哋通常要等睇私家先問到。今日最主要想睇吓小b有無事，胎盤有無昇返，同埋問妊娠糖尿病嘅問題！

 

去到診所都好多人，但都唔使等好耐就到我！入到去，巫醫生問我近排點，我都有講番入醫院嘅事，不過都無咩結論，只係話流血穿水或者係肚痛一定要入急症，呢d野我聽過N咁多次，都知。之後我話啱啱知有妊娠糖尿病，巫醫生問我係糖尿定糖不耐，我梗係有好多問號啦，都唔知咩黎，我唸住由頭到尾都只係聽過糖尿呢個term，所以就話糖尿，都唔曉得問佢有咩分別！巫醫生問我幾多度，我都啞左，唯有話我唔知，醫生無講，同埋當時我唔曉問囉！唉！有問到就好啦，可以問吓巫醫生係咪好嚴重麻！不過巫醫生聽到我有妊娠糖尿病嘅時候都忍唔住笑，重話之前我無咩重又擔心，可以肆無忌憚食野增磅，點知而家糖尿就唔得喇！佢知我要見營養師，就叫我乖乖哋跟住食，睇吓飲食控唔控制到血糖先，暫時都無咩結論咁，我哋就直接睇小b有無事先！

 

巫醫生照左一輪就話暫時睇唔到我嘅糖尿對小b產生影響，小b一切都正常，而家有三磅鬆d，算係中b，咁都無咁驚！因為其實由知道有妊娠糖尿病果日起，我突然間唸番起第一次政府產檢嘅時候，我嘅vivi測試其實唔pass，張tester嘅顏色係深紫，我見姑娘比併番d色，深紫已經係最尾嘅色，姑娘又無講咩，叫我即刻去多次vivi再驗多次，粉紅色，無變色，姑娘又無講咩野，就咁就當pass左！之後每次產檢都有驗vivi，次次都唔變色，所以都唔記得有過件咁嘅事！唔知當時點解會係深紫，又變番粉紅？！唔通當時就已經有跡象係糖尿但又唔係成日都驗到？果時只係十一、二週，如果當時已經係血糖高，咁而家先知咪好遲？！無計啦！贊育有驗呢項都算好，如果我去左第二間醫院做產檢，咁就未必會驗，更加唔會知道！而家小b無事，唯有聽日睇吓營養師講咩啦！

 

跟住巫醫生話我胎盤無昇到，等我之前feel到小b踢高左，重幻想緊個胎盤昇左，原來係小b大左，越來越有力，可踢嘅範圍大左。唉！確診胎盤前置第三期！巫醫生叫我預開硬刀，雖然距離預產期都重有兩個幾月，佢話睇我個情況都唔會昇，就算昇，因為我係第三期，成個出口都遮哂，昇左都唔會夠小b過喎！不過我會响政府生，所以都要再等政府certify至確定到開唔開刀！我忍唔住問巫醫生開刀會全身麻醉定半身，唸住佢之前响政府醫院做過，佢會知道，點知佢話要睇個別情況，而且間間醫院嘅做法唔同，佢都答唔到我！其實開刀我已經預左，但都係幾驚，如果全身麻醉，咩都唔知都好似無咁驚，驚都係萬一真係流血不止唔知醒唔醒得番咁，又無得睇住小b出世！如果半身麻醉，係可以見證住小b出世，不過好似好恐怖咁，因為只係唔痛，而我會好清醒咁知道俾人劏開個肚攞小b出黎再聯針，唔痛但你會知d醫生做緊咩，聽到d手術刀嘅碰撞聲，個人又只可以瞓响度，一定會有好多幻想，唸起個情境心都寒埋呀！唔知道半麻醉有無得陪產呢？如果有人同我講吓野都可以分到心無咁驚嘅！不過老公可能都重驚過我，起碼我瞓响度都只係睇到天花板，聽到聲，幻想吓d情境，如果有陪產，我唸佢係坐响度，咁咪可以睇到周圍嘅野囉？！到時可能醫生好唔得閒，要同老公急救左先，因為佢可能已經嚇暈左，嘩哈哈！！！

 

上次巫醫生話我用九月二號預產期小b就細左，用九月九號預產期就大左，所以攪到都唔知而家應該係幾週，廿九定三十呢？因為上forum話要開刀嘅話，通常都响三十八週後開，咁如果我真係用九月二日預產期嘅話，咁小b咪其實早過三十八週出世囉！我問巫醫生其實係咪可以改番預產期去原本嘅九月九日，佢話通常唔會再改喎，又會咁嘅？！咩唔係睇番小b實際幾大架？我覺得小b而家係偏向番九月九號預產多d，因為佢嘅頭圍肚圍大脾骨等等都傾向廿九週多d咁，我只係驚三十八週真係開刀，小b咪即係只有三十七週囉？！唉！醫生專業d嘅，佢咁講我唯有信佢啦！

 

睇完醫生，plan左去d樓上舖買野，點知落大雨，有遮都無用，被迫上左新世紀廣場行，一場出到黎，好過咩都唔行就走嘅！

政府覆診

今朝又要返贊育覆診，真係超無聊，尋日先黎過做糖水測試，今日又要返黎，都唔知點解唔同一日做哂，要我分兩次黎咁煩！尋日見好多媽咪都係上午做糖水測試，下午就常規覆診，幾好呀！今日係星期五，如果係下午覆診都無咁嬲，因為做完可以走得，直接返屋企，但係上午覆診，做完又無地方hea吓先，早左返公司又唔抵，麻鬼煩！

 

今日返去覆診，我唸都好快攪掂，我唸好完左之後去銅鑼灣行一陣，食埋飯兩點先返公司！

 

十點鐘，真係好快叫我個名，入到房見醫生，今次呢個醫生係正式嘅，唔係實習嘅！不過我都無唸過有咩問，最近touchwood又無咩特別咁，唸住又係講一兩句就按肚聽心跳就走人，點知一坐低佢又無端端問我知唔知自己胎盤低，原來佢係要講番上次超聲波嘅結果，我以為唔會講添，我話我知道，佢就又係循例講d叫我小心嘅野（呢d我一早都知！）我咪交代番上次入醫院嘅事，同交番醫院果封信俾佢做reference囉！佢都無咩點睇封信同份報告，好求其咁，只係問我上次照超聲波個醫生有無幫我約期再照，我話有，佢只係話咁再睇吓到時個報告係點先決定使唔使開刀。之後，佢就同我講我尋日做嘅糖水測試FAIL左，我唸都無唸過佢哋咁有效率，尋日做今朝就有報告？！我又唔係肥又唔係勁食野，我無唸過會pass唔到，我即時嘅反應都好大，衝口而出好大聲咁講，唔pass？！後面有個姑娘見到我咁大反應响度笑，我先知我幾失態！個醫生好冷靜咁話，係，你確診糖尿病！之後會有姑娘約番我見營養師同埋入醫院食餐做檢查，GOD！真係晴天霹靂！我聽到再做檢查呢個term，我即刻問咁使唔使再飲糖水，醫生話你已經「確診」糖尿病，唔需要再飲，聽到都安心少少，但係佢用左兩次「確診」呢個字眼，真係令我超難受！佢無解釋d咩，又無問我有無問題問，就咁叫我走喇！我唸都無唸過自己一日三餐正正常常，又唔係大食又唔“好”甜品都中招，一時間個腦都空白哂，咩都唔識問，儍吓儍吓就走左出房！

 

出到去再等叫名約期，約左我六月二十三日見營養師，七月三日覆診，七月八日返贊育留院一日食佢哋嘅餐驗血糖。出到門口竟然落大雨，我又無攞遮，贊育落番西環條路又斜，唸黎唸去，最尾都係截的士返公司，無得行街喇！

 

返到公司先有d清醒，即刻上網睇吓妊娠糖尿病嘅資料。睇完都down down哋，原來除左小b有機會做巨b之外，出世都有機會有低糖症，重有其他風險，而大人呢，雖然話呢d叫假糖尿，生完好多人都正常番，但都有人好唔返，同埋就算生完正常番，呢d有過妊娠糖尿病嘅人將來會演變成真正糖尿病嘅機會係比其他人高好多！睇返d媽咪見完營養師，原來個個都係跟同一個餐單食野，一日得千八卡路里，suppose係夠營養嘅，但d媽咪話唔飽喎，重有d媽咪話唔係只係戒糖呀甜野呀，而係飯都要戒，總之係無啖好食喎，好多媽咪話跟餐食想重都好難，唔輕左都算好，所以呢個餐又叫減肥餐，唸起都慘啦！我四、五個月先叫食得到野開始重，重左十四、五磅，而家七個月又話我重得快，又要見營養師食千八卡，咁睇黎我都唔會重得去邊喇！樂觀d去唸，生完咪唔使點減肥囉！因為醫生話生完會即時輕返十幾磅喎！至驚嘅係八號入院食餐唔pass嘅話，d媽咪話要自己篤手指check，重要自己打胰島素針，一係打大脾，一係打落個肚度，真係好恐怖呀！

葡萄糖耐量檢查

 

今朝要返贊育做「葡萄糖耐量檢查」，俗稱糖水測試，睇吓有無糖尿病。之前知道要做呢個檢查都驚架，事關見Ellen Law都唔使做呢個檢查，而自己又要做，不期然擔心係咪我重得太快，所以要驗吓。後來問過人又上過網睇，原來即使係公立醫院，做嘅產檢都會有唔同，有d公立醫院係唔會同你做糖水測試，除非醫生覺得你有potential啦，而贊育就將呢項檢查納入為常規檢查，即係人都要驗，咁我都安心d！

 

之前上網睇吓呢個糖水測試係點做，原來係要你之前果晚十二點後唔好食野，一早空住個肚就抽血，之後要你飲一杯超甜糖水，過兩個鐘再抽血，期間如果有嘔，就要再約期做過。上網d媽咪都話杯糖水勁難飲，而且之前果晚同朝早又唔俾食野，好多人都驚飲完會唔舒服，所以我都想老公陪我去，以防萬一，好可惜佢呢排無咩假，有都要留番我生嘅時候用，所以最尾我都係自己去。我平時一d都唔好甜野，唸起杯糖水我都好驚，求神拜佛千祈唔好嘔，如果唔係又要再飲過就慘喇，重要嘥錢又嘥時間驗過！

 

九點半已經抽完血，攞左杯糖水返位度飲，杯糖水其實exactly係一杯外賣凍飲杯大小，望落好似都唔太難飲哂。可能已經餓左好多個鐘啦，第一啖飲落去都ok，因為杯糖水應該加左少少檸檬汁，所以飲落有d似暖檸水咁，我登時個心都無咁謝，重有d開心，點知飲多兩啖就頂唔順，真係飲唔落，望吓其他人又好似無咩野咁，係咪我嘅問題？！其實飲果杯糖水都無人監住你，有一刻我心唸飲唔哂掉左都無人知嘅，好想即刻掉左杯野就咁等抽血，不過咁做又好對唔住小b咁，唯有頂硬上。成杯飲哂之後，即時覺得好飽，個胃好頂，我好驚嘔呀！我即時行近d厠所，驚一嘔就趕唔切，到時成地都係就瘀爆！坐左一陣，無嘔，不過都超難受！重要呆坐兩個鐘等抽血，又鬼死咁眼瞓，勁慘！果度又唔係幾收到電話，想搵人講吓電話都唔得，好彩呢個時候有廣播話樓上三樓有產前講座重有位，有興趣嘅媽咪可以去聽吓，我一個講座都無去過，咁難得有得去聽吓，消磨吓d時間都好，拿拿聲仆上去啦！果然，時間過得好快，講座都未完我就夠鐘落番去抽血喇，個講座都有d用，起碼都知道入院要攞d咩！

 

抽完血就走得，姑娘話有問題會响十日內通知喎，無電話即係無事！唔記得問十日嘅定義係十個工作天還是就咁數十日．．．．．不過，算啦，做完就算！

高左？！

呢幾日我開始發覺小b好似踢高左咁，以前佢會响我肚底踢吓撩吓，所以會覺聚聚哋咁。呢幾日我覺得佢突然間上左去肚臍附近咁，無咁聚，有時候更加誇張到好似踢到我嘅肋骨，唔知小b係大隻左定係胎盤昇高左呢？下個星期先有得睇私家醫生見小b，到時就知小b有無聽爹爹話要「步歩高陞」，有d緊張！

咳

出左醫院幾日，開始喉嚨痛，真係邪！唔睇醫生由至可，一睇就開始咳同流鼻水，重要係一發不可收拾，邪上加邪！攞左日病假，乖乖响屋企食藥，d藥一食左唔夠半個鐘就超眼瞓，好似就黎暈咁，係收到鼻水，不過唔知點解瞓唔到覺，好辛苦！返左一日工，係咁咳，雖然有戴口罩，都唔係幾好意思，咳到我個肚都扯住痛，頂唔順都攞多一日no paid病假休息，醫生本來俾兩日我架，不過成日病假又唔係幾好，又無錢，所以都係休息多日就算！奶奶叫我睇中醫，我成日覺得中醫慢d，啱調理身體，有病都係西醫快，不過半推半就又睇中醫又睇西醫咁，西藥又唔敢食太多，所以都係臨瞓前先食，中藥就夜晚食，攪到亂哂，都無起色！最後都放棄兩様都唔睇！

 

咳左成個禮拜，好辛苦，日日都要响公司戴口罩，又扯住個肚，都係就去睇多次中醫啦，唔得就算！點知好神奇，食左一、兩次藥已經好得七七八八，所以今次好神心咁乖乖執多幾次藥快d好番，咁小b就唔使成日俾我嘈住哂啦！

寫大字

之前响醫院嘅時候小b都大幅度郁動，大力左好多，但係出左院又靜左好多，唔知係咪响醫院驚驚先至狂郁，返到屋企就定哂，安樂哂就係咁瞓？！等左幾日都係無之前咁活躍，算啦，有郁就得啦！

 

點知呢排我又feel到小b郁得唔同左，佢响我個肚入面寫大字呀！即係佢唔知手定腳會撐或者踢我嘅肚皮然後滑左去第二個位度先停，全個過程我都feel到，所以感覺好似小b响肚入面寫大字咁！好得意！

 

唔知佢想寫咩字呢？