人仔倉

之前去新加坡為Ambrose介紹過史力加，唔知點解Ambrose好似好鍾意史力加喎，一見到史力加就笑哂，屋企有隻史力加卡通片又嚷住要睇！不過史力加响香港又唔係好common，無咩產品出。尋日爹爹行街竟然見到有史力加好似lego咁嘅樣嘅公仔，忍唔住買左俾Ambrose，咁啱呢期Ambrose玩lego好鍾意拿住d人仔玩，媽咪有見及此又走去買多左幾盒lego俾佢儲人仔。雖然史力加唔可以砌落lego底板度，但size同而家lego人仔差唔多，啱哂手形，Ambrose不知幾鍾意！而家Ambrose人仔倉除左有爹爹、媽咪、爺爺、嫲嫲，重有姨婆、丈公以及姑姐一家（史力加各人組成），而佢自己由原先唔識行嘅bb，經媽咪一番物色之後，買左一盒有個男仔造形嘅俾佢升level，可以行喇，哈哈！

家中釣魚樂

繼之前响屋企玩水水撈魚魚之後，媽咪又有新搞作，就係家中釣魚喇！媽咪之前download左魚仔造形，油好顏色，又响雜誌剪左d魚仔海洋生物公仔圖出黎，全部過埋膠，再自製釣魚竿諗住俾Ambrose釣魚！  

今晚媽咪就將魚仔撒滿一地，要Ambrose釣魚。Ambrose好興奮咁試釣，不過原來都幾有難度，因為魚竿條繩會搖晃，Ambrose要揸定左之後再磁向有字夾果邊先可釣到魚上黎，當中嘅手眼協調同專注力都唔少。開頭Ambrose都好樂於慢慢釣，不過玩到咁上下，佢奸茅，自己蹲低身，用手將個磁石直接磁去條魚度，自己都偷笑呀！哈哈！不過媽咪諗緊條魚竿繩會唔會太長，suppose釣魚高度最好係要佢半蹲身去釣，順便訓練埋下肢肌肉，媽咪見佢蹲身幅度好似都唔係好夠咁，而且佢都好似好難控定條繩，所以索性出茅招？下次倒落一盤水度釣，會唔會好玩d呢？不過d魚會浮浮游游，可能重難控定黎釣，媽咪要再諗吓改良吓至得！

捉住爹爹講故事

今日爹爹放假，媽咪放工返屋企已經聽見爹爹話今日Ambrose捉住佢，要睇圖書館借番黎嘅故事書，爹爹又係講左N咁多次，真係口水都乾埋，哈哈！其中一本書係叫“我要洗手”，入面提到小公主唔洗手，食左好多細菌入個肚裡面，攪到佢肚仔痛要叫醫生黎，經過咁樣密集式講故事之後，Ambrose已經識講細菌呢個字喇，問佢畫完畫畫，手上面有咩野，佢會答細菌，真係好攪笑！

捉住媽咪講故事

今日同Ambrose去左圖書館借書，之後去左婆婆度同表哥玩，返到屋企，病緊嘅媽咪都散哂咁濟，要麻煩嫲嫲幫Ambrose沖涼，媽咪真係投降喇！  

沖完涼玩左一陣，一等媽咪都沖完涼出黎，Ambrose就捉住媽咪要媽咪同佢講今日圖書館借嘅書，真係估唔到Ambrose重記得，同埋真係會好肉緊要媽咪同佢睇，見到Ambrose咁積極，媽咪幾攰，都一定同佢講故事啦！  

而家媽咪同Ambrose有個故事角，但凡睇書，必定坐响白板前排排坐住睇，如果個位有玩具擺左响度，佢重會一路整走佢地一路講“唔該借借”，睇完後擺番d書去書櫃，如果d書擺得太密佢唔識推開少少放書，佢又係會講“唔該借借”企圖塞本書入番書櫃，真係超攪笑呀！

幼兒樂園第九及第十堂

幼兒樂園第九堂，Ambrose發燒病左，迫於無奈無返。  

幼兒樂園第十堂，最後一堂喇，奈何爹爹要返工，重要係返完夜再返夜，無人車媽咪同Ambrose返學，晨早十點去到山林道，爹爹怕媽咪同Ambrose辛苦搭車，所以極力勸媽咪唔好返，就係咁，最後一堂，應該可以攞番份portfolio，無得返學，呢期嘅幼兒樂園真係貴喇，一共無返三堂！  

亦都係咁，Ambrose嘅playgroup生活無聲無息告一段落，九月開學之後再睇情況，先至同佢搵興趣班上啦！

第一張圖書證

呢排Ambrose愛上左睇書，每晚都捉住媽咪同佢講故事，一晚可以共讀六至十本之多，而有時喜歡嘅故事，Ambrose聽完都重要媽咪又再講多一次至得，雖然媽咪講故事講到口水都乾埋，但見Ambrose咁熱愛聽故事睇書，媽咪幾辛苦都會講俾佢聽，務求Ambrose對書有興趣，培養佢睇書嘅習慣。不過媽咪發覺如果以Ambrose呢個睇書嘅進度，真係買幾多書都唔夠，而且亦都無咁嘅地方容納越黎越多嘅書同玩具，所以媽咪諗，都係要去圖書館借書至得喇！  

今日趁住爹爹返夜早上返黎瞓覺，媽咪就決家帶Ambrose出去市中心圖書館做圖書證，方便日後借書。Ambrose歲幾嘅時候，媽咪曾經帶佢去圖書館，不過因為時間嘅關係，加上當時Ambrose都重係只會攞左本書出黎，媽咪講左少少未講完，佢又走左去，又或者唔睇再攞過本，去左幾次之後，媽咪覺得未係好適合同Ambrose去，所以再無去過喇！估唔到再黎嘅時候，Ambrose已經兩歲喇！  

媽咪之前已經準備好哂文件，去到排隊做證，原來圖書證係即申請即有，真係幾方便。做完圖書證，當然要上去兒童圖書館行吓順便借埋書走啦！星期日嘅圖書館都幾多人，所以就算Ambrose一見到圖書館入面有得意動物公仔而叫左出聲，都唔算好過份，無造成騷擾，感覺真係幾好幾自在！Ambrose見到圖書館有咁多書，當然已經自動自覺走去攞，再俾媽咪講故事啦！一本接一本咁講，媽咪根本都無時間去挑選圖書借走。後來，Ambrose攞起左兩本一樣嘅書，點都唔肯放低一本，又好積極去搵地方坐住睇書，媽咪看在眼裡真係覺得Ambrose好可愛！原來果兩本書都係“豬”，重要係屋企都有，媽咪點勸佢都唔放低本書，要用巧妙嘅方法攞走其中一本，所以媽咪一定要幫Ambrose借走呢本書啦！  

响圖書館逗留左個幾鐘，重病緊嘅媽咪講故事都講到口乾又攰，所以忍唔住都要同Ambrose講要走喇，最後Ambrose一共借左四本書，希望Ambrose鍾意睇書嘅熱情唔會係三分鐘熱度啦！媽咪都要努力喇，希望可以盡量同Ambrose每晚都講到故事，同埋希望可以每星期或者隔星期帶Ambrose去一次圖書館，真係要堅持呀！

米奇音樂嘉年華

兩個月前買飛嘅米奇音樂嘉年華終於都到左喇！媽咪又係超級期待！不過今日媽咪病左，個人好似wing wing哋咁，又耳塞塞流鼻水，人又攰，媽咪曾經有一刻想放棄唔去架喇，不過知道Ambrose鍾意米奇，呢個周末周日都係媽咪一個人湊Ambrose，唔出街留响屋企又唔見得可以真係休息到，所以都係頂硬上啦！  

今次Ambrose瞓飽飽食飽飽先出發，不過由於今晚爹爹返夜，所以要勞煩浠爸車我地出去。爹爹返工前拆左Ambrose個car seat，等浠爸揸車過來時安裝上車，咁樣一來Ambrose安全d，二來媽咪又舒服d，三來就係Ambrose第一次坐其他人嘅車，有自己car seat應該會有多d安全感！就响浠爸停車，爹爹準備過對面馬路裝car seat嘅時候，Ambrose唔知點解未見到浠爸已經扯住媽咪向相反方向，到浠爸落埋車，Ambrose見到佢時，媽咪想拖Ambrose過埋馬路睇裝car seat，Ambrose已經死命咁扯媽咪走人，大力程度係媽咪都扯埋走！真係唔明點解Ambrose咁怕見到浠爸，對上果次浠浠生日就已經喊到死咁濟，又唔肯玩發哂呆咁！爹爹好快攪掂左car seat，之後就走番過黎抱起Ambrose上車，再同Ambrose講爹爹返工，要聽媽咪話，唔淮喊，跟手再講bye bye走人。爹爹走左一陣之後，媽咪都唔記得講左／做左d咩野，甚至乎好似都無講無做任何野，Ambrose無啦啦忍唔住喊，個樣慘到呢．．．．哈哈！好彩，喊左一陣，浠浠同Ellen姨姨都到埋，呢幾日病左嘅Ambrose已經日日夜夜提住浠浠，好似好掛住浠浠咁，所以浠浠一黎到，Ambrose都止到喊。不過由於兩個人嘅car seat安裝响一左一右，媽咪要坐响兩個小朋友嘅中間，加上浠浠張car seat微斜，佢自己又好難坐起，變相佢地兩個都唔係好睇到對方，所以浠爸一開車，Ambrose可能平時坐慣係爹爹或者姑丈揸車，唔見爹爹只有浠爸，佢喊哂搵爹爹呀，真係陰公！媽咪為左鎮定佢情緒，迫不得已都要俾個奶咀佢食，等佢多番d安全感！  

一直去到九展，Ambrose都係擰埋塊面望出車外無出過聲。由於以媽咪同Ellen姨姨習慣唔會父母同買飛睇show，所以浠爸只係負責車我地出去，唔會一齊入場。呢個Ambrose一落車就不停問叔叔去邊，媽咪話叔叔泊車唔同我地一齊，之後佢就開始生猛番哂，真係服哂佢呀！見時間尚早，媽咪同Ellen姨姨去左保齡球場附屬嘅餐廳食少少野先入場。  

Ambrose知道黎九展係睇米奇，佢响屋企已經成日話搵Goofy同Donald，所以佢黎到之後非常興奮，經常笑住又彈又跳又跑咁，不枉媽咪病住都堅持同佢黎睇。媽咪以為一切都順利，瞓飽食飽，加上米奇嘅吸引力，入場應該無問題。點知就係响收左飛尾後未入到會場嘅時侯，Ambrose唔知點解又扯媽咪走，佢大力到扯埋媽咪出左去，Ellen姨姨唯有自己行先，媽咪真係頭都大埋！究竟點解Ambrose响會場入口先至開始唔肯呢？之前一直都好地地好期待好興奮架喎！係唔係因為佢見到入面好多人呢？照計入面超光猛未熄燈，唔似上次波波show咁暗，應該唔係光線問題丫！真係唔明！不過媽咪最後同Ambrose講媽咪抱佢入去好麻，好彩今次Ambrose又肯，就係咁，都比上次順利好多入到場！  

雖然個音樂劇話係七點鐘開始，不過坐低左好耐之後都重有好多人陸續入場，成個show都遲左開始，媽咪都不知幾擔心Ambrose由肯坐到等到唔肯呀！不過米奇吸引力都算夠，一開始熄哂燈攪左一輪後就已經見到大大隻Goofy，Donald，Minnie同Mickey公仔走出黎又唱又跳，Ambrose都係咁手指指！  

不過可能媽咪都無點睇過廸士尼卡通電影，所以之後不斷做嘅廸士尼卡通電影片斷，又阿拉丁，又唔知咩人魚，好多都唔識，Ambrose又點會識丫，哈哈！可幸係Ambrose都留神睇，又唔係話好興奮好有興趣，不過又無扭計咁啦！再加上Minnie同Mickey等大公仔中間穿插走出黎，Ambrose都有耐性睇！  

對於好似媽咪呢d無咩耐性又驚Ambrose無咩專注力嘅人黎講，最唔好嘅係有中場休息時間，睇得好地地，中間又休息，真係好驚Ambrose又扯媽咪走囉！媽咪同Ellen姨姨趁中場時間走落樓下平台位置俾兩個小朋友郁動吓玩吓，不過因為平台前面其實係玻璃牆，會場保安一見小朋友去掂去摸去挨住塊玻璃就阻止，媽咪想話影張相都好難，唯有坐吓樓梯食吓餅仔就算啦！  

下半場再開始，仍然係人魚同海底大合唱，再做左d唔記得係咩之後，就到toy story喇！Ambrose同浠浠見到胡廸都精神為之一振，哈哈！浠浠由入場講巴斯講到真係有toy story，終於都俾佢恨到啦！巴斯出埋場，當然係全場最high嘅時候，唔明點解咁多小朋友都鍾意巴斯，呵呵！  

音樂劇七點開始，遲左成十至十五分鐘開始，加上有中場休息，完場時已經近九點喇！媽咪臨走時問Ambrose好唔好睇，佢話好睇，又真係估唔到Ambrose可以坐咁耐同埋真係鍾意睇喎！下年再有時，一定要買飛同佢睇至得！今次媽咪買$100飛，兩歲以下小朋友唔使錢入場，即係$ 100兩個人睇場show，簡直係超抵啦！之前有人話坐山頂位不如唔好去睇，媽咪又覺得無咩野，可能媽咪選左對正台嘅山頂位，其實都睇得好清楚，反而坐得前媽咪有擔心Ambrose會驚果d大公仔，而家真係perfect！

轉讓近全新成長繪本(一套六本精裝硬皮書) (已售)

Ambrose未夠一歲時，媽咪特地响台灣網上書店訂購左幾批書，一來台灣書平，主題又好；二來媽咪貪佢地通常都係精裝嘅硬皮書，小朋友揭書都無平裝書咁易爛麻！ 


呢set公主王子成長繪本，媽咪鍾意佢主題貼近生活，所以專登訂番黎俾Ambrose。但由一歲開始放响Ambrose書櫃到而家兩歲，Ambrose攞出黎要睇嘅次數真係超少，有時攞左出黎，都只係揭左 一兩 頁，當媽咪要講時佢就話要收番埋唔睇，次次都係咁，所以媽咪覺得Ambrose似乎對呢套書興趣一般。有見Ambrose書本同玩具都日漸増多，媽咪為左騰空多d空間俾Ambrose擺放佢有興趣嘅玩具同書本，雖然有d唔捨得，媽咪決定出讓呢套書！呢套書一共六本，每本26.6 x 25.7 c m大，每本三十二頁。香港有書店出售呢套書，不過全部都係細本同埋只係平裝書（即唔係硬皮書），價錢好似大約三十元一本。媽咪唔太記得呢套書買返黎連運費幾錢，呢套書雖然一直放左出黎俾Ambrose自行取閱，不過因為佢真係超少攞出黎睇，所以近全新，完全同其他甩頭甩骨嘅書成強烈對比，近全新二手價$180一套六本，由於書重，郵費一定貴，所以媽咪只作屯門／灣仔面交，有興趣請私人留言給我！


本系列繪本以教導孩子對於成長過程中，會遇到的問題與品德學習，以豐富的畫面與趣味簡潔的文字，讓孩子能在故事中潛移默化，培養良好品性與德育。

** 針對較低年齡的孩子們，運用簡單易懂的故事情節，教育孩子品德學習。

** 想像力與富有張力的畫面，學習更具創意度。

** 針對每個不同的品德主題，附上各主題的「父母小叮嚀」，讓父母先了解教育孩子的小秘笈。

** 也附上給予孩子自己閱讀思考的小叮嚀，教導孩子自發性的理解，而不以填鴨式的教學。

** 「讀後學習單」為建立孩子對閱讀後的再次省思，以趣味的方式重建孩子對主題的記憶性。

轉讓二手串珠/穿線/繞珠玩具(已售)

淘寶玩具，串珠係動物造型。三個玩具都係針對訓練小手指而買嘅，不過Ambrose一向對於穿野真係毫無興趣，買左成年都唔知玩左有無十次，二手轉讓三件共$50，唔散賣喇，費時煩，只作屯門／灣仔面交，有興趣請私人留言給我！(註：相以iphone作實物大小參考)

親子共讀嘅魔力

最近Ambrose鍾意睇書，媽咪一放工返黎，佢就扯住媽咪入書房想攞書睇（平時媽咪講嘅書會收入書房，睇時先攞出黎，Ambrose唔可以隨意攞到）！唔知係因為攞唔到嘅書，所以佢先至鍾意睇，定係媽咪真係搵啱主題佢先至鍾意睇呢？平時書櫃嘅書佢可以自由攞出黎睇，反而又唔覺佢鍾意睇，真係好奇怪！  

Ambrose呢排病左唔係幾肯食藥，就算氹到佢食，佢都係食完一枝藥就唔肯，其他果d都要迫住灌佢食，真係好慘！今晚媽咪又要氹Ambrose食藥，又係自己食左一枝之後唔肯再食，但媽咪一定無力抱起大力掙扎嘅Ambrose灌藥，所以媽咪唯有盡力氹Ambrose，但佢完全唔理媽咪！直到媽咪好隨意講左一句：「你唔食藥今晚媽咪唔同你睇書書架！」Ambrose聽到之後終於抬起頭望一吓媽咪，然後緊緊張張跑埋媽咪度，自動自覺攞藥水食，超叻仔呀！原來睇書嘅魔力，係連唔鍾意食藥都可以克服到！媽咪真係唔知道呢一句說話嘅威力咁大，真係有d意外！希望Ambrose鍾意睇書唔會係三分鐘熱度啦！  

今晚Ambrose唔再睇“沙灘樂趣多”同埋“Sport Goes to School”，佢要睇“上學的第一天”、“看醫生”同埋“交朋友”，真係貪新忘舊呀！不過見佢好專心聽哂三本書，又會揭前揭後指住d圖畫好似想問“呢個係咩黎架？”媽咪又覺得佢真係有興趣睇。為左獎勵Ambrose咁叻，肯自己食藥，媽咪再攞左oxford reading tree set播碟俾佢聽，不過由於本書每頁得一句，而每本又得幾頁，真係超快讀完一本，Ambrose好似都唔知發生咩事咁，哈哈！超快完成左呢set書之後，Ambrose又想媽咪攞新書讀俾佢聽，今次媽咪攞左之前响台灣訂番黎，東西出版嘅“小手忙翻天”，呢set書訂左番黎成年都未開始用，今晚就攞出黎試吓先！又係播碟聽左首歌仔，再聽埋每種動物嘅相關短句，之後就去到小手翻書果part，Ambrose翻左幾翻，開始無興趣，望住媽咪擰頭，似乎呢set書真係未係時候玩喇，除左因為係國語之外，媽咪諗Ambrose其實係想聽故事而唔係讀句！最後，媽咪問Ambrose係咪想媽咪講故事而唔係聽碟，佢話係！媽咪即時再攞埋“我自己會讀”其中三本書出黎準備講俾佢聽！爹爹見媽咪忙左成晚，佢提議由佢講，點知Ambrose睇書係有特定人選架，睇DWE就一定要爹爹，媽咪行埋去一齊聽都推走媽咪；講故事就係搵媽咪，今次爹爹話由佢講，Ambrose係都唔肯喊哂口咁推走爹爹，真係服左佢！不過媽咪成功游說Ambrose俾爹爹講，聽吓爹爹講故事好唔好聽，結果係爹爹講完第一個故事之後，Ambrose雙手推走爹爹，由媽咪從新講左呢三個故事俾Ambrose聽，聽完之後，Ambrose終於都捨得去瞓，哈哈！今晚早教時段，全部都係聽故事，無其他喇！

講故事

媽咪其實都幾懶同Ambrose展開早教時段，一來可能因為放工返屋企食飯沖得涼黎都無咩時間，有時又要順應Ambrose意向玩佢想玩嘅野而無時間；二來媽咪覺得大小肌肉嘅訓練都好重要，而一晚嘅時間，要同Ambrose玩，又要小遊戲針對大小肌肉，又要早教學字，時間真係唔夠；三來雖然媽咪一向都相信早教，不過仍然係採取隨遇而安，隨心出發，所以媽咪一直都無訂立時間表，總之，Ambrose想玩咩就同佢玩左先，呢d係親子時間，母子關係嘅建立比學術上嘅得著來得重要！而媽咪相信媽咪响Ambrose心中嘅地位提昇，唔多唔少都係因為咁而黎嘅！加上Ambrose明顯未到文字敏感期，佢對於文字一d都無興趣，勉強要佢學，大家都唔開心，學習都要講求輕鬆愉快，如果因為schedule左要做而勉強做，對大家都無益處！

前排媽咪見Ambrose開始抽起書架上面某d書要求媽咪同佢講故事，媽咪一一答應，一個晚上可能會講上五六本書，呢d書，都係之前媽咪買落嘅幼兒生活習慣書，內容都係講洗白白、沖涼、刷牙、痾臭臭等嘅書，媽咪諗，呢d書可能比較貼近生活，主題好直接，所以Ambrose似乎都幾鍾意聽！因為咁，媽咪較早前就住Ambrose唔鍾意玩沙同埋應付佢將會開學，買左“沙灘樂趣多”同埋“Sport Goes to School”，估唔到呢排佢真係晚晚都要媽咪同佢睇至安樂。相比起基礎漢字500，睇過一次之後，每當媽咪一攞出黎佢就耍手擰頭唔睇，媽咪開始感覺到Ambrose應該係對一d貼近生活嘅短故事有興趣，而唔鍾意單純為認字學句嘅書！

見Ambrose每晚都捉住媽咪要媽咪同佢講書書，似乎呢個小朋友開始鍾意聽故事喎！又見近期Ambrose睇醫生喊，加上快將開學，同埋時有唔合群嘅表現，媽咪特登去書局買左三本書，分別係“看醫生”、“上學的第一天”以及“交朋友”，趁Ambrose有興趣聽故事俾佢聽多d令佢唔好怕！今晚同佢講呢三本書，佢都好專心聽．其中“看醫生”同埋“上學的第一天”重要求媽咪重講，希望呢d書對佢起到作用啦！

2011年8月21日

今日Ambrose都重係發燒，所以返唔到幼兒樂園喇！不過起左身之後，都有同Ambrose出街！因為今日姑婆間改衫店開張，爹爹媽咪循例都要去一去致賀。  

今日出街時Ambrose比平時出得多汗，一頭濕哂，估計佢可能身體要散熱，爹爹話出吓汗好呀，燒會快d退喎！  

去完姑婆新店再返屋企，想話俾Ambrose抖吓，不過食左藥嘅佢好似唔係好瞓到咁，點氹佢都唔瞓，你要佢瞓就扭計喊，真係攪著爹爹媽咪，因為佢唔瞓我地都無得抖架麻！  

結果，都係同佢去探一探表姐啦，三表姐弟見面又係好開心，不過玩左一輪又要走喇！原來表姐下星期二要去海洋公園呀，為左唔好傳染佢地病左去唔成，都係快快走人！  

今次返左屋企之後，真係要捉Ambrose瞓覺，因為七點喇，佢成日都未瞓過，實在太得人驚喇！爹爹同Ambrose瞓時，媽咪就落左去買餸整粉俾Ambrose食；媽咪買完返屋企，Ambrose終於瞓著左！趁Ambrose瞓著左，爹爹媽咪即刻開餐食之前買左嘅外賣壽司。時間啱啱好，食完壽司，媽咪都未開始煮粉俾Ambrose，佢就已經起左身喇，前後都瞓唔夠一個鐘，瞓得好少呀！  

媽咪見Ambrose起左身又即刻去整粉俾佢食。見佢無咩胃口，媽咪買左蕃茄洋蔥煮粉，諗住酸味味，開胃d！點知Ambrose掛住食蕃茄同洋蔥，好識食咁只“不”餸唔要粉，叻到佢丫！睇黎佢都幾唔舒服，平時佢係唔偏食，有野就一定要食，呢幾日佢都唔係食太多，有包都唔食，而家重要挑餸食！唉！快d好番啦！  

可喜係Ambrose真係退到燒喇！出左一身汗果然真係退到燒呀！

麥當奴叔叔生日會

今日係Ambrose朋友仔雅雯嘅生日，佢地响麥當奴開生日會。不過由於Ambrose一直都唔退燒，媽咪遲遲決定唔到同唔同Ambrose去生日會好。生日一年一次，而且今次重係Ambrose第一次去朋友仔嘅生日會，唔去好似好可惜咁！去嘅話，又好似明知咁多小朋友响度，怕佢惹埋其他人又或者其他人唔鍾意，真係兩難！  

不過見Ambrose都只係有燒，無咩其他嚴重病徵，爹爹決定去啦，最多到時發覺真係太多人我地先走啦！結果，人唔多，地方亦濶落，我地坐埋一個隔開得遠少少嘅位，都ok啦！加上Ambrose一出到街一向都唔合群，基本上全部小朋友走左出去玩，佢就要拖實爹爹媽咪一路向後行，唔同人地一齊玩，唉！真係唔明佢係唔知點同人玩定唔鍾意同人玩，媽咪希望開左學之後，佢返多左學，同多d同學仔相處過，會變得合群一d啦！  

成程生日會，有好幾個小遊戲，媽咪只係半推住Ambrose去玩左其中一個，其他果d，佢都唔肯行出去，推都唔郁呀！一直都係坐响位度食栗米同望人玩咋！媽咪見佢反正都病，唔好同其他人玩太埋喇，今次唔迫佢啦！  

生日會大約個半鐘，臨完前Ambrose飲水唔小心倒濕左條褲，爹爹趁勢叫走先，等Ambrose早d返去沖涼食藥抖吓！

兩歲生日

今日係Ambrose兩歲生日，媽咪特登攞左一日假諗住同佢入去廸士尼玩。一早起身，Ambrose已經叫住要出街街，去廸士尼，媽咪同佢換好衫之後就開始執野，期間Ambrose不斷催促我地，要我地同佢著鞋出街，真係服左佢呀！執到咁上下嘅時侯，爹爹無啦啦攞左個探熱器出黎同Ambrose探熱，一探之下，原來Ambrose發燒呀，即刻邊度都唔使去！Ambrose繼續扭想快d出門口，不過已經明知佢發燒，我地都唔諗住去廸士尼喇，費時佢出左去曬多一曬重病呀！氹左Ambrose一陣，可能又加上扭左一排攰啦，同埋可能佢真係病，媽咪俾左個奶咀佢，問佢瞓唔瞓，佢又乖乖地話好就入房好快瞓左！十二點幾醫生果邊排到佢，爹爹先車出去睇醫生。  

其實睇醫生嘅時候，Ambrose都退左燒，不過係邊緣狀態，爹爹都有問退左燒去唔去廸士尼好，不過媽咪都係驚佢出去曬好易再燒過，所以生日流流，無得去廸士尼玩，重要食藥留在家中，Ambrose今年兩歲生日真係好慘慘呀！媽咪應承Ambrose好番再同佢去過啦！

恐龍

今日爹爹同Ambrose去左Mega Box行街街，Ambrose嘅收獲係兩隻恐龍，好大隻呀！上次同佢去時佢已經唔捨得放手架喇，今次媽咪無一齊去，爹爹即刻買左俾Ambrose，睇佢又摸又鍚隻恐龍就知佢有幾鍾意啦！真係唔明點解Ambrose會咁鍾意動物，好典型嘅男仔呀！

Lego House

星期日幫Ambrose開左個生日會，都未到正日生日，份Lego House已經拆左出黎玩喇！第一晚Ambrose超攰都唔捨得瞓，就係為左玩呢間屋，之後重要攞住“媽咪”一齊入房瞓，哈哈！媽咪果晚已經幫Ambrose砌好間三層嘅屋，諗住三層比平面兩層較開放，方便Ambrose小手伸入去攞同砌人或物。點知，奶奶話第二朝佢未返到去已經俾Ambrose拆左間屋，散哂！真係激親媽咪呀！斯文少少都唔得嘅！  

之後媽咪收起左少少配件，諗住都係唔好一次過放哂出黎俾Ambrose玩，點知，奶奶又砌番哂出黎，不過佢好勁，自創砌一層嘅屋，一層屋，前花園可以好大，放哂所有配件入去又唔係好怕高空發展帶黎嘅拆屋後果！雖然無間隔可言，張床就响前花園度，隔離係爐頭同煲，哈哈，不過Ambrose照玩可也，只係投入d角色做d咩，完全未明白理性同實際上嘅不可能，那管他吧！相信當佢再大一點嘅時候，再慢慢糾正返同佢再起過間屋，應該無問題吧！  

Ambrose呢間屋果然last到好幾日都未散，哈哈！見佢好似都幾鍾意攞起入面嘅人仔玩，媽咪好開心！最攪笑係奶奶話佢呢幾日唔知做咩成日講up & down，媽咪不以為意，但見佢成日攞住“媽咪”行間屋嘅樓梯，媽咪諗緊佢係咪諗起DWE教上落樓梯果課提到up & down，見有條樓梯所以成日同人仔行樓梯同講up & down！

兩歲生日會

Ambrose就快兩歲喇！因為生日正日係星期五嘅關係，媽咪諗住同小部份較為親密嘅親友一齊食餐飯同切蛋糕，所以提早到今日(八月十四日)同Ambrose攪個小小兩歲生日會！  

不過因為之前成日都未諗定會唔會同其他人一齊慶祝，定係一家三口出去玩吓就算，遲遲都未落實有無生日會，到落實會有個小小生日會時，又到爹爹誤會左係過左生日之後果個星期日攪，到媽咪發覺大家攪錯左嘅時候已經係昨日嘅事，所以都無咩預備d咩，蛋糕都無訂到，臨時臨急先約人加買野，不過因為响屋企攪，同埋都係叫外賣，所以雖然急，但都無太大問題！  

尋晚已經去左超市入定飲品零食同埋啫喱涼粉配料，原本應該由媽咪整嘅，不過因為陪Ambrose瞓，加上媽咪尋日太攰嘅關係，陪到媽咪都瞓著左，哈哈！所以整啫喱就由爹爹代勞喇！生日banner用番上年媽咪自製果條，只係今年兩歲，所以媽咪之前已經再印好改過個數字就ok，都係今日放左學返屋企先掛嘅！  

今日Ambrose放左學後我地就打道回府，接埋表姐返屋企一齊玩，Ambrose只係响車程中瞓左大半個鐘左右，算係差吓電咁啦！返到去，因為爹爹同媽咪未食過野又未買蛋糕，所以近近地去左卓爾居食午飯加買蛋糕。超失望地，蛋糕無咩款式，全部都係朱古力味“黑忟忟”嘅蛋糕，一係就迷你天使魔鬼蛋糕，同埋一個叫夏日天使嘅天使蛋糕面加少少berries。由於上年Ambrose生日都係買左個好plain嘅牛乳蛋糕，今年實在唔太想又整個咁plain嘅天使蛋糕，所以媽咪超唔開心，但奈何已經無咩時間又撲出去市中心買，所以媽咪最終都選左個藍莓脆脆蛋糕，都係“黑忟忟”！就要俾錢時多口問個店員係咪得咁多蛋糕，原來佢話唔係，俾左本書我地睇，多左幾款咁上下啦！不過全部都唔吸引，係得一個變型金剛又係朱古力味“黑忟忟”蛋糕，都叫有少少噱頭，雖然都只不過係一個柯柏文樣嘅一大塊朱古力面放上個朱古力蛋糕上面咁行貨，不過都話哂係變型金剛系列嘅蛋糕丫，都比較貼近同小朋友慶祝生日啦，所以媽咪二話不說就改要呢個蛋糕！經過今日一役，媽咪決定下年Ambrose生日，真係要好好好同佢訂番個蛋糕至得喇！今年佢都重未識太多野，有得食已經開心麻，下年媽咪相信唔可以咁求其喇！  

買完蛋糕返到屋企，發現舅父同表哥已經自己上左黎，舅父重去左反斗城買左一桶三架嘅巴斯光年車仔俾Ambrose，都未等切蛋糕就已經拆左出黎玩緊喇！Ambrose超鍾意呢幾個車仔，成日都一手揸住一架周圍行，唔俾人攞。一桶三架佢只可以攞住兩架，佢永遠都係攞青青地色果兩架，有架啡金色嘅佢都勉強可以借俾其他人玩！唔知係咪太鍾意d車仔呢，Ambrose玩完又會自發擺返去個桶度收好，真係好罕有，哈哈！  

今日嘅生日會，只叫左姑仔一家同姨婆夫婦加小馬哥，唔算多人，不過小朋友加埋都有四個，超熱鬧！四個小朋友玩左一個下午，一時就糖痴豆，一時就水溝油。睇得出表哥真係好乖，會聽人講野，唔會搶Ambrose玩具，而且當Ambrose有d危險動作，佢都會用手護住佢，真係好抵錫！唔知Ambrose近多d表哥，會唔會學到佢一半咁乖呢？Ambrose又唔知點解好似都好鍾意表哥咁，之前表哥响四川讀書好少見，而家佢返香港讀書，媽咪又只係一星期先返去一次食飯，咁少時間之間Ambrose就咁快鍾意左表哥咁！媽咪見Ambrose有玩具玩又會俾表哥一齊玩，同表姐爭完嘅野佢又識得take turn俾表哥，之後表姐搶佢玩具佢爆喊，到攞番個玩具時又肯同表哥一齊玩，哈哈！睇黎呢個表哥嘅地位可能泊得住表姐喎！  

終於都到夜晚時份，外賣pizza同壽司都攞齊返黎，加埋蛋糕，啫喱涼粉同埋其他小食，成檯都係！影左相唱左生日歌，就係禮物時間，姑仔送左一盒限量版嘅B. Duck禮盒一份，姨婆係利是，表哥份禮物已經下午拆左出黎玩喇，而爹爹媽咪當然攞埋份Lego Family House出黎啦！不過因為人太多，個個都想食野，混亂間都無咩點影太多相，對比一歲生日會，今次真係影得少喇！  

每次食野表姐都扭計發脾氣，真係唔明點解，又要氹佢食飯，有時媽咪諗如果佢唔食就由得佢餓吓啦，無謂次次都好似搏鬥咁！爹爹竟然氹表姐食好飯就去拆Ambrose份禮物，媽咪聽到都有少少唔高興架，Ambrose份禮物當然係Ambrose拆架啦！表姐重要討價還價問係咩黎先至肯食飯，真係有無攪錯呀！食完飯，Ambrose好似無左件事去拆禮物，就算爹爹同佢講左好多次去拆禮物，佢都無動於衷，真係好笑！結果，爹爹又叫左表哥表姐一齊拆，媽咪雖然唔係好想，不過唔通嬲小朋友咩，無出聲由佢地啦！拆完之後，大家都好心急開埋個盒黎玩，媽咪真係驚人太多又亂，一個唔覺意唔見左d配件，不過小朋友心急要玩就無計啦！開左之後，表哥同表姐就埋首去砌，可憐Ambrose想攞一舊黎玩都俾表姐搶走！好彩媽咪出面幫佢攞返d未要砌住嘅花花同水壺，咁Ambrose先有得玩吓咋！慘慘！重要Ambrose張私家椅俾表姐坐左，表姐又完全無話要讓俾Ambrose坐，佢又唔肯坐開少少，Ambrose想玩，唯有迫埋一條隙到玩咋！

今日Ambrose除左响回程時在車上瞓左一陣之後，玩左成日佢都無瞓，好勁！等到所有人走左之後，Ambrose終於可以舒舒服服咁坐响自己張椅度玩Lego，佢不知幾鍾意呀，係咁攞住黎玩，叫極都唔肯去瞓！最後，爹爹容許佢攞住間Lego House嘅媽咪陪佢瞓，先至肯入房瞓，爹爹話佢幾乎係即時瞓著左呀！哈哈，攰到咁都掛住玩！真係傻豬呀！

 

就係呢個5639 (source from official lego website)

 

砌左三層樓個樣

幼兒樂園第八堂

上一堂嘅幼兒樂園，因為爹爹要返工，而爹爹又唔想媽咪晨早同Ambrose自己搭車去尖沙咀返學咁辛苦，所以上堂決定唔返學。今堂返番學時，發覺Miss Hui返左黎，但賢姐姐又換左另一個助手姐姐，唔知係暫時定係之後都會係咁，媽咪鍾意賢姐姐多d呀！  

今日返學又係遲少少，基本上係無咩時間free play到，原本媽咪知道free play時間就黎完，都無叫Ambrose攞玩具玩，點知Ambrose自己攞左個入圖形嘅大玩具返位玩，輪輪盡盡返到埋位，只係研究點用形狀匙去扭開對應嘅門，都未真係開到，Miss Hui已經叫收拾喇！無法子啦，十點嘅班對於我地住咁遠黎講真係好早，遲唔過free play都已經好好喇！  

收拾玩具之後就圍埋點名，今日Miss Hui要家長們點到自己小朋友名字時唔好提小朋友，要小朋友自己舉手話到，媽咪見有一d小朋友真係要望住叫幾次名先勉強識得舉手，有 一兩 個就好醒咁一叫就識舉手叫到，而Ambrose都叫中間，Miss Hui叫左兩次佢個名先識舉手，希望返多兩堂，佢會再有多d進步啦！不過媽咪留意到班入面兩個小女生 都對 老師嘅指示比其他小男生都要快同有反應，唔知係咪女仔真係叻d嘅呢？見到Ambrose成日都係得個望字睇字同呆樣，媽咪真係唔明點解佢唔可以好似其他小朋友咁投入自在咁玩同反應！希望呢個只係過渡期啦，希望佢明白左返學係咩一回事之後佢嘅反應會好d啦！  

點完名，今日無玩響板，轉左玩沙槌，Miss Hui每次叫三個小朋友出去排隊攞，訓練小朋友識得排隊而唔係一窩蜂圍住去攞，叫到Ambrose時佢都係發呆咁，本來佢都有少少想行出去架喇，但佢又擰轉頭望吓媽咪，媽咪叫佢自己出去排隊攞，佢又想拉媽咪手一齊去，媽咪再同佢講要自己去攞架，佢都麻麻地願去咁，最後都係Miss Hui拖佢出去幫佢企好排隊攞！唔知係咪因為咁，平時唱歌一定會搖沙槌嘅Ambrose無搖到，仍然响度得個呆望，呢個仔真係好慢熱呀！  

玩完沙槌，又係故事時間，今日講嘅故事主題係一齊玩，透過小魚周圍搵朋友同佢玩而帶出主題“一齊玩”嘅概念，今日呢本故事書又真係好唔錯，每頁一打開都有隻立體嘅海洋動物走出黎，好能夠吸引到小朋友！重要係中文書添，唔知點解平時媽咪又唔覺有呢d書賣喎！  

講完故事，今日無手工時間，因為Miss Hui話去隔離活動室玩集體遊戲喎！過到去，原來已經準備左一張彩虹傘。Miss Hui教左家長要留意小朋友揸傘嘅手唔可以反手同用手指勾住後，唱歌仔同“fing”傘開始喇！“fing”完一輪，家長攞起彩虹傘，Miss Hui要小朋友行入傘下面，不過只有 一兩 個小朋友好開心走入去玩，其他嘅都唔郁，Ambrose就係其中一個，佢重好堅持要繼續“fing”，而有個小朋友重喊添！可能因為咁，Miss Hui改為掉熊bear bear入傘中，歌仔唱停後，傘舖在地上，叫小朋友行入傘中幫手執，咁樣小朋友又肯喎！Ambrose雖然肯攞bear bear熊俾Miss Hui，不過佢好多時候都企埋左一邊唔行埋個彩虹傘度，係之後不斷見小朋友執bear bear熊，Miss Hui無叫佢名佢都自己靜雞雞去執，令媽咪諗起有一次同佢上幼潛，佢見間房有bear bear熊，係咁想要媽咪攞俾佢，唔通Ambrose好鍾意bear bear熊？  

今日唔知做咩，Miss Hui話要影相，所以為左要每一個小朋友同家長都影到，呢個彩虹傘都玩左好耐，除左單獨照重影埋大家一齊玩嘅相添！媽咪估可能最尾一堂會派番個profolio，入面可能就係夾住之前畫嘅畫同埋呢d相！  

玩完彩虹傘，係時候去洗手手食茶點！今日茶點生果又係蕉，雖然Ambrose而家唔會食到吐番出黎，但佢又唔係話好鍾意食，如果無其他選擇，佢就好地地慢慢食左條蕉去；但如果有埋其他茶點，基本上佢差唔多一見到就即時塞條蕉俾媽咪想唔食！今日又係咁喇，同檯有個小朋友又係咁，媽咪keep起兩份餅乾茶點，要兩個小朋友一定要食埋先可以食，哈哈！不過過左一陣見兩個人都食到吽哂，可能半條蕉都幾飽滯吓，見都係淨番少少，都由得佢地唔食，俾佢地食餅乾提子乾同埋包包啦！  

今日有d小插曲，班入面有個一向都乖巧嘅小男生，由free play到落堂都斷斷續續喊唔停，佢爹爹只係行去房入面個架攞少少野，佢已經暴喊，見到都好可憐呀！媽咪忍唔住問小男生爹爹，佢係咪已經返左學喇！結果真係，不過佢爹爹話其實只係開始左適應班咋！開頭一星期有父母陪住上三個鐘都相安無事，係 後來 老師話最尾果幾十分鐘，家長要嘗試離開課室俾小朋友自己上堂，咁樣之後小男生就變成而家咁樣成日喊，父母一離開少少都已經喊到好淒涼咁！媽咪所見，小男生唔止係爹爹離開少少但見到都喊，而係佢會本來好地地，佢爹爹都响佢身邊，但佢都會無啦啦觸動神經咁喊，睇到媽咪都心驚驚！以Ambrose平時上堂成日都要痴住媽咪，媽咪一行開佢都真係可以唔玩去搵媽咪，九月開學都唔知點算好喇！因為學校其實八月已經開學，有適應期俾小朋友返學，不過因為Ambrose開學時未夠兩歲唔返得住，所以學校要Ambrose九月先返學，但九月返學係完全無適應期，即係話Ambrose一返學就係要自己一個人入課室上三個幾鐘，媽咪本來已經夠擔心架喇，今日見到呢個小男生咁樣，媽咪同佢無關係都睇到有d眼濕濕咁，到時Ambrose真係返學，佢一定喊死呀，唔知媽咪會唔會忍唔住喊埋一份呢？Miss Hui有見呢 一兩 個月都有學生陸續開學，為左令小朋友對學校環境無咁陌生，佢建議家長可以同小朋友多著校服再帶小朋友去到學校門口，等小朋友知道原來返學係响呢度返，無咁陌生！不過Ambrose似乎唔多鍾意套校服，氹極佢都唔肯著，著左都係咁叫除衫，呢個方法好有難度！媽咪擔心Ambrose返左第一日學之後第二日未必肯著校服出門口添呀！唉！

2011年8月13日

今日爹爹朝早放工返屋企瞓覺，為左唔好嘈住爹爹，媽咪一早起身就同Ambrose梳洗換衫落樓食早餐。本來媽咪諗住行一陣十蚊店好等埋浠浠同佢爹爹食埋早餐同Ambrose一齊去公園玩，不過媽咪大頭蝦唔記得左攞電話就出左街，所以食完早餐行左萬寧買果汁俾Ambrose之後，媽咪又要同Ambrose返屋企先！  

响屋企嘅Ambrose都算乖，無話好嘈，不過因為媽咪之前已經同Ambrose講左會同浠浠一齊玩，所以佢返到屋企之後不斷叫住浠浠個名，可能佢覺得奇怪點解又要返屋企唔係去玩咩？！等浠浠期間，Ambrose又攞左佢近期至愛嘅Day & Night積木黎玩，之前媽咪見Ambrose未能夠對住圖黎入好份積木有d失望，以為都係好簡單嘅事，點知Ambrose對極都入錯，媽咪逐個逐個同佢睇同形容佢知先至勉強入得好，自己玩就一定亂哂。不過媽咪今日先坐定定睇份guidebook，先至發現睇圖入積木要成三歲先開始挑戰，由Day去Night咁上，而三歲而下原來只係俾佢地隨意入，訓練手眼協調。媽咪實在太心急喇！  

玩左陣Day & Night積木之後，Ambrose又要求玩泥膠，當然啦，佢要求到，媽咪一定陪佢玩！Ambrose未識得控制力度去碌扁泥膠，好多時都係媽咪幫手整！不過佢知道個圓形模，“吸”左落泥膠之後就可以整到一個圓形，可能呢個對於佢黎講係比較易，所以佢都樂此不疲係咁整圓形，重扮食，又請媽咪食，好得意！Ambrose今朝好好唱口，一路玩一路唱外星話歌，無停過！  

玩左一輪，終於都等到浠浠喇！收到電話媽咪就同Ambrose落公園搵浠浠玩喇！今次去呢個公園，媽咪好少去，因為好僻靜，媽咪自己同Ambrose去有少少驚，所以盡量唔去，不過今次有埋Ellen姨姨一齊，唔怕！  

呢個公園有條有好多一格格洞嘅橋，Ambrose就比較少玩呢類型講求平衡嘅遊樂設施，所以今日真係一個好機會俾佢試多d喇！只見Ambrose腳震震咁行落去，唔小心差左隻腳入洞度，之後佢每次行呢條橋，就一定要媽咪拖住行，再唔係就一定兩隻手都扶住側邊慢慢行，而唔會單手扶邊行過去。  

估唔到Ambrose對浠浠完全唔生保，Ambrose玩親d咩都會叫住浠浠，好想佢同自己一齊玩咁！不過浠浠就成日俾檸檬Ambrose食喇，佢一時就自己玩，一時就企左响度唔玩，哈哈，都有少少似Ambrose喎！  

玩左一陣之後，Ellen姨姨攞左泡泡水出黎玩，當然，Ambrose係唔會去追泡泡，佢一定係要吹果個，不過佢成日都唔識離身少少先吹，所以攪到一肚同一腳趾都係泡泡水。  

都唔知玩左幾耐，見太陽越黎越猛，媽咪同Ellen姨姨都係決定行埋十蚊店就返屋企瞓覺喇！不過Ambrose可能太攰喇，行到尾聲時佢係咁要媽咪抱住，媽咪排隊俾錢時佢企响度跌一跌，唔知係咪攰到企响度都瞓著左呢，哈哈！  

以為Ambrose超攰，所以一返到屋企快快手餵完粥，涼都無沖，只係除哂之前嘅污糟衫之後就同Ambrose去瞓，點知佢又唔願瞓喇，周床撻，又打媽咪，唉，真係好頑皮。結果原本諗住佢好快瞓著，可以舒舒服服食lunch，唔得啦！外賣到左佢都未瞓，一聽見門鐘響就彈起身落床，真係俾佢激死啦！咁又要一齊食野喇！而因為諗住佢瞓左先到，所以叫左d野食係唔啱Ambrose食，但我地食佢就一定要食，爹爹唯有俾包包佢食啦！  

食食吓包包，呢隻豬仔就開始支持唔住係咁釣魚，對眼都合埋喇！媽咪忍唔住又影低左佢，哈哈，佢第日大個睇番一定笑死。見佢坐住high chair都釣哂魚，爹爹即時抱佢入房瞓，今次Ambrose終於真係瞓著喇！  

原本諗住今日去返playgroup落樓下影特價學生相，但因為Ambrose好晏先瞓，一瞓又好林，結果返五點playgroup，四點半都未起身，要叫醒佢先得，邊度都去唔到！起左身嘅Ambrose又扭計唔肯換衫，氹左好耐先換到衫出門口，今日返學都遲左少少！今日主題係shapes，不過就只教左circle同埋square。教完生字，就响鏡上有張大畫紙，下面有唔同形狀俾小朋友用crayon trace番出黎，啱哂Ambrose啦！今日呢度係最後一堂喇，Ambrose仍然係對所唱嘅歌仔無咩大反應，只有唱bye bye歌時會跟住做動作，同埋係最尾呢幾堂開始跟老師讀生字，見nursery就開學，媽咪無再同Ambrose繼續報呢度喇，等開定左學至諗再同佢報咩學啦！  

返完playgroup，又去左婆婆度，搵埋表哥攞埋籃球落樓下打波，再去埋公園玩搖搖車、氹氹轉同slide，媽咪真係超級攰，幾乎無哂力咁濟！返到去重要服侍埋Ambrose食飯飲湯善後，今日真係攰到無朋友呀！

 

2011年8月12日

今晚媽咪同Ambrose上左浠浠屋企玩。因為媽咪之前買左盒字母模加泥膠set，其實買果時第一時間係諗起浠浠極鍾意字母但唔鍾意泥膠，所以諗呢set泥膠可能幫到佢，但奈何得番一盒，媽咪買左都係留返俾Ambrose先，後來早兩日又見到呢set泥膠返貨，所以買左一盒送俾浠浠，媽咪急不及待要攞俾浠浠玩囉！  

浠浠屋企有貓，Ellen姨姨知媽咪驚貓都會收起先，不過媽咪其實都想俾Ambrose同吓貓玩，等佢大膽d，奈何上次同今次一打開門，隻貓已經咧嘴露哂d牙出黎，攪到媽咪又驚Ambrose又驚，Ellen姨姨收埋隻貓媽咪都無力阻止，哈哈！可能媽咪同Ambrose都要d時間習慣吓先得喇！  

唔知係咪俾隻貓嚇一嚇，Ambrose異常斯文咁入左屋坐上沙發玩玩具，好少落地同周圍行，無論媽咪同Ellen姨姨點樣撩佢落地同浠浠一齊玩，佢都唔係點郁，真係好奇怪，雖然話佢出去係斯文一d，同平時响屋企係兩個人黎，但今晚嘅佢又真係斯文過頭，真係莫名奇妙呀！  

媽咪同Ellen姨姨難得碰頭，雞啄唔斷咁傾計，傾到興起嘅時候，Ambrose竟然出聲叫媽咪走。媽咪氹左佢玩多一陣，隔一陣佢又出聲要走，呢d情形真係好罕有。媽咪問佢係咪唔玩喇，要返屋企，Ambrose話係，見佢咁堅持要走，媽咪諗住佢可能攰，咁就唯有同佢返屋企啦！一入lift，媽咪問Ambrose返去沖奶奶俾佢飲左瞓好唔好呀？佢話唔好，真係俾佢激親呀！  

返到去奶奶先話Ambrose瞓到六點九，照計就唔太眼瞓喎，但媽咪見佢有得同浠浠玩都叫走，又好似吽左咁，所以媽咪都照沖奶諗住同佢瞓。點知沖好佢又掛住玩近期新寵Day & Night積木，見到枝奶都無咩反應。媽咪等Ambrose玩完一次之後就捉左佢入房瞓喇！點知佢飲完奶响張床撻黎撻去攪左好耐都無瞓到，媽咪攰到差唔多瞓著但又要苦苦支撐唔好瞓，都唔知過左幾耐Ambrose先至瞓著左，媽咪可能都瞓著左一陣，到起身去沖涼時已經係十一點九咁夜喇！原來Ambrose答媽咪唔瞓係真係唔眼瞓囉，下次媽咪都係問左佢就要信佢喇！

2011年8月11日

今晚雅雯上左黎同Ambrose玩，又係由一開門開始，Ambrose就好似上身咁周圍彈，又叫又笑又行黎行去，精神異常亢奮咁，真係唔明，點解次次佢見到雅雯嘅反應都咁大，成隻猩猩求偶咁！  

不過雖然Ambrose見到雅雯好似好high咁，但當雅雯攞佢d野玩時佢都好肉緊唔俾人玩，同平時嘅佢有d唔同！起碼平時佢都會有d玩具肯俾人掂俾人玩，而雅雯一黎佢就樣樣都唔肯！  

一如以往，雅雯又係呆左咁睇住Ambrose呢d咁粗魯同霸道嘅行為，唔知雅雯其實想唔想黎嘅呢？可能佢心諗，我都唔鍾意佢咁粗魯，都唔知佢攪咩又要我黎，有得睇無得玩，哈哈！  

媽咪俾左治療膠雅雯玩，估唔到佢好有興趣係咁搣，雖然佢搣到一條條絲一地都係，哈哈！玩完治療膠，媽咪開左cake set泥膠出黎玩，基本上唔見雅雯好抗拒泥膠喎，佢重好似幾有興趣添！媽咪就諗，點解Ambrose每次有唔同觸感嘅野都要花上長d時間去接受呢？媽咪見好多小朋友對顏色、泥膠同沙都好熱愛，完全唔會有接受嘅困難，但Ambrose就較抗拒，令到媽咪又再諗會唔會因為Ambrose係剖腹生產而唔係產道出世，所以佢嘅觸感刺激得唔夠，令佢對於唔同觸感嘅野比較易抗拒？不過，好彩嘅係，經媽咪努力之下，顏色、漿糊同泥膠呢三樣野，Ambrose似乎都較以前接受到，而家只差沙！  

玩左泥膠一輪之後，Ambrose示意要去vivi，成功去左vivi之後，轉頭雅雯都開口講要vivi，不過佢係同一時間講同vi到一地都係！Wing姨姨抺好地同簡單清理雅雯之後，就急住要返屋企同雅雯沖涼換衫，就係咁，今晚兩個小朋友只係玩左一陣！

泥膠cake set

呢排Ambrose成日玩治療膠，睇黎佢都有少少興趣！加上之前上幼兒樂園都有一堂有玩泥膠，有膠碌俾Ambrose碌扁泥膠，可能佢知泥膠要有野碌至得，所以呢排佢玩果時都問媽咪攞碌碌。不過因為媽咪見佢之前都唔係好鍾意玩泥膠，所以媽咪都未有正式買泥膠工具俾佢玩，所以而家每次Ambrose問攞野碌泥膠，媽咪都諗唔到俾咩佢碌好，唯有俾左枝水畫墊嘅筆俾佢粗粗地扮住先。不過枝筆又唔夠粗同長，又無手揸位，所以對於Ambrose黎講係難用d，有見及此，媽咪想買個碌俾Ambrose，但奈何唔知點解媽咪搵唔到有手揸位嘅碌，而通常只有一條圓柱咩都無嘅碌。

反斗城無，媽咪就去灣仔玩具街睇，如果只買工具就無咩選擇，亦都無有手揸位嘅碌，不過媽咪見到有set裝，一盒入面有幾盒泥膠，加少少工具同模，媽咪睇黎睇去，終於見到呢盒cake set係有想要嘅碌！價錢又唔太貴，實在太好喇！

今晚同Ambrose玩呢盒泥膠，估唔到佢已經接受到，雖然佢唔係好識玩，不過見佢會攞起個碌就去碌泥膠，又會用手搣泥膠，見媽咪用模整左d士多啤利同埋蛋撻，佢又想自己整，哈哈！媽咪真係好開心！原來要Ambrose接受新嘅質感，真係唔急得，要有耐性一步一步黎！

同浠浠一齊玩

世事真係好難料，原本媽咪同Ellen姨姨未生bb之前都耐唔時聚吓，Ellen姨姨同媽咪先後有bb，大住個肚都一齊出去行街買衫，到各自生左bb之後，Ellen姨姨重要搬埋同媽咪同一個屋苑住，媽咪重諗住Ambrose以後就可以多d同浠浠玩。不過原來住得近都無用，媽咪同Ellen姨姨時間成日都唔夾，成日想約埋一齊玩都就唔啱，結果Ambrose同浠浠一齊玩嘅次數真係唔多。  

今日終於都約到Ellen姨姨同浠浠過黎玩喇！唔知點解Ambrose少見浠浠都可以同佢玩得投契，重好快咁已經識得叫浠浠同佢一齊玩！可能大家响媽咪肚入面已經打過招呼啦！哈哈！  

今日Ambrose超開心！起身同媽咪落街食完早餐之後就返左屋企等浠浠黎，兩個小朋友一見面都無咩陌生。初時大家都係各自玩吓住飯仔，玩具仔，玩左一輪之後，媽咪就開壇畫水彩喇！因為Ellen姨姨之前話浠浠無玩過顏色，想話同佢試吓畫畫睇吓佢有無興趣，所以今次嘅約會，畫畫係重點啦！Ambrose畫過好多次，所以佢一見媽咪舖地下，已經知道有得畫畫，超興奮咁！攪左一輪，媽咪開哂壇，首先係攞左個jumbo stamp pad出黎玩手印先，Ambrose已經熟哂，自己印印印；浠浠好似唔想手污糟，無Ambrose咁熱衷！玩完手印就要收起喇，唔係個pad一定俾Ambrose整污糟哂都似。平時同Ambrose畫畫，因為佢會好快撈埋哂d色，所以媽咪慣左只俾三隻色佢玩，不過今日浠浠黎到，想引起佢對畫畫興趣，媽咪開哂六隻色出黎。好快，Ambrose同浠浠已經各自攞實一杯顏色，Ambrose主要用黃色而浠浠主要用粉紅色！ Ambrose成日坐地下畫畫都係只畫佢前面果張畫紙，好少會畫遠d又或者行黎行去畫，所以媽咪要幫佢轉畫紙轉吓位置，而浠浠似乎對用畫筆麻麻地有興趣咁，但就對印仔有興趣，見佢攞住畫筆油落個印度想印，而唔係直接用筆去畫落畫紙度，睇黎要引佢畫畫可能都要先用印印玩起喇！玩左一輪，浠浠已經唔玩喇，但Ambrose仍然意猶未盡，係咁撩d顏色出黎，真係好浪費，見一大pad顏色整左上畫紙度咁浪費又難乾，媽咪索性用手指摔開去，Ambrose又學埋一份。玩左一餐之後，唔知係咪Ambrose發覺浠浠已經走開左，佢好罕有咁話唔畫喇，媽咪都係第一次見佢主動唔畫，而唔係媽咪叫停！  

大家都洗好手腳，媽咪諗到不如攞Ambrose個浴盤出廳玩撈魚啦！因為驚有意外，所以媽咪只敢倒三小桶水落個盤度，然後就放玩具魚俾兩個小朋友玩，當然，吸水地布就放响隔離隨時stand by，地下一濕就要即抺！估唔到兩個小朋友都好鍾意撈魚，重要又爭魚網又爭大魚，Ambrose又充份表現到佢霸道嘅本色，唉！最慘係佢大力，媽咪不知幾咁擔心地下濕又“線”，佢大力同浠浠推撞會整到浠浠！不過好彩爭還爭，大致秩序都係可控制嘅！浠浠似乎都幾鍾意撈魚，因為以媽咪平時見佢玩嘅遊戲佢都唔玩得耐，今次撈魚，佢真係好專心撈左好耐，媽咪都係第一次見，哈哈！得閒真係應該再約浠浠上黎玩撈魚，等Ambrose又可以一齊開心吓！  

玩玩吓，媽咪一個唔留神，唔知係咪Ambrose向前中，定太肉緊打瀉哂盤水，攪到一地都係水，佢衫褲都濕哂，好彩媽咪見佢頭面都係乾，應該唔係頭中左入水。不過都夠嚇死媽咪，第一時間係驚佢浸到，第二時間係成地水但有兩個小朋友响度，驚佢地“線”到！Ellen姨姨即時幫手湊開浠浠同Ambrose，而媽咪當然係快手快腳咁要抺乾地下啦！  

玩左一輪，兩個小朋友越玩越顛，走埋上床撻黎撻去，真係唔知好嬲定好笑！等浠浠試埋校服，媽咪就同Ellen姨姨落街食午飯。食完飯又一齊去左公園玩，Ambrose今日真係開心呀，有浠浠陪佢玩左咁耐，又可以同浠浠去公園玩！  

媽咪都好耐無同Ambrose去公園玩喇，而自夏天以黎，爹爹都多數同Ambrose游水多，公園真係少去。今日媽咪竟然見到Ambrose可以自行爬一個佢之前爬唔到嘅爬架，個爬架只係一個一個圈連串住，唔太密，而且係向上連接住個遊行組合，所以離地頗高，媽咪都唔知Ambrose係幾時識爬上去，睇到媽咪都目瞪口呆！Ambrose成日一路都叫住浠浠，好似好想同佢一齊玩，又或者係叫佢一齊玩，不過當佢兩個一齊時，又成日爭個軑盤黎玩，Ambrose就粗魯到推人，唉，呢個仔真係好霸道，重好惡呀！媽咪見浠浠有幾次俾Ambrose推又或者罵，都好似嚇一嚇，唔敢惹佢咁，媽咪驚第時Ambrose返學，佢嘅粗魯同霸道會令佢無朋友仔一齊玩囉！一唔係可能成日同人打架俾人投訴，唉！唔通性格真係天生嘅？  

玩到三點幾四點，Ellen姨姨同媽咪都散哂喇，係時候返屋企。因為Ambrose真係太污糟喇，所以媽咪都迫於無奈同佢沖埋涼先瞓。時間關係，媽咪無好似平時咁抱佢坐住洗頭，而係企住洗，不過因為媽咪之前都未試過咁洗，搽好哂shampoo成頭泡時就諗唔到點洗好，結果媽咪諗住用花灑沖左後尾枕嘅泡先啦，點知唔小心同Ambrose照頭淋，原本好眼瞓嘅佢就一定係大喊啦，慘慘！好辛苦先洗好個頭沖埋涼，點知Ambrose由企缸行出去時可能手揸住d魚仔，佢“線”一“線”又無手balance到，佢一個頭中埋去企缸出面嘅拖地水桶度，好彩媽咪接得切，佢只係挨左埋去個桶邊，但因為佢盤骨位已經撞左埋去撞爆左少少肉，成條線咁紅哂，Ambrose喊到顛左！真係好慘！成日都係媽咪湊佢先出事咁！唉！為左氹番Ambrose等佢開心番，媽咪唯有出動果汁，果然，Ambrose見到就已經乖乖收聲，一口氣飲哂果汁之後就上床瞓覺喇！  

媽咪今日陪Ambrose玩左成日都超攰呀！不過Ambrose瞓左覺媽咪都重未抖得，因為之前畫畫嘅工具同埋撈魚工具全部都未洗未處理，而家Ambrose瞓左媽咪先至可以清理咋！  

攪好哂屋企嘅野，媽咪上床只係挨左一陣，又係時候叫醒Ambrose出發去婆婆度玩！結果，媽咪都無抖過，又去婆婆度，Ambrose就差夠電，去到婆婆度又同表哥表姐玩過，真係開心到暈，媽咪就攰到暈喇！

又買野喇

為左去波波show，媽咪攞左半日假，原本就應該係媽咪行街街relax一下，不過最終媽咪又係睇Ambrose嘅野，結果當然又買野啦！

先去海港城，諗住睇吓反斗城有無新返欖球仔，結果行經mothercare見做緊特價，行左入去睇，嘩，好多野都有半價喎！媽咪當然唔執輸，睇吓有咩野平買定出年著啦！見到一條沙灘褲，紅色mickey公仔，乾嘅時候係紅色咩都無只有公仔，原來濕左紅色布會有mickey頭走出黎，折左只係$75，有2-3years，媽咪買左一條俾Ambrose出年去沙灘又好，游水都好啦！再見到件長袖薄衛衣，啱哂秋涼時著，只係$65，不過只有藍色，媽咪諗黎諗去，最後都係放棄左，因為藍色唔利Ambrose，都係避得就避！轉過頭又見到件灰色短袖tee，一千零一件，重要係2-3years，折左$35，媽咪都無理係咩公仔，一手攞起，三十幾蚊，粗著都抵啦！再之後就係鞋仔，媽咪諗得最耐就係鞋仔喇！見到一對似cros嘅鞋仔，折左$98，藍色，好啱Ambrose平時落街或游水著，有24碼，啱而家著，不過Ambrose已經有對addidas涼鞋仔，都係同樣落街游水著sporty衫著，再買多對又好似唔著得幾耐咁，Ambrose又就黎返學，照計呢對addidas都要著到冬天換季！不過$98又好似好抵喎，呢d方便鞋，真係必備一對架麻，媽咪唯有睇吓大 一碼25.5碼 ，不過又真係好大隻，好難想像Ambrose對腳著入去，又唔知到出年佢啱唔啱，話哂對鞋係夏天鞋，真係要等足成年先著得，都係搏唔過！行黎行去又行返去睇鞋，買鞋係媽咪嘅僻好，哈哈！今次再行埋去個鞋架，無啦啦又見到對布短靴波鞋，綠色迷彩，魔術貼，折左$105，又係好平！媽咪諗住for冬天著，即年尾至出年，而家Ambrose都有時著7碼，呢對鞋有齊7同8碼，攪到媽咪都唔知買咩碼好。而家7碼一定啱，可能都有少少鬆，因為布鞋唔同波鞋，同碼布鞋比同碼波鞋鬆，但諗住年尾先著，到時冬天又可能會著厚襪，8碼又好似穩陣d，不過8碼攞上手又好似好大對咁。媽咪問sales兩歲一般著幾碼，俾人寸到一棟都無！問左等於無問！不過sales話鞋款無得換，所以媽咪都係買8碼，買大左都係等到啱至著啫，買細左唔啱又或者迫住即刻著就唔好啦！買左三樣野，盛惠$215，好抵！

之後去左反斗城，無欖球仔之餘，連張價錢牌都無埋，可能以後都唔返貨lur！

又忍唔住行book buddies，今日係平日下午，無人行，所以媽咪行得好舒服，唔會有d大細路橫衝亂撞。媽咪好少行去最後排，今日見無人，加上之前見到後排地下放左好多set裝書，所以今日媽咪八掛行去後排蹲响地下睇。都係見識見識，無咩野睇啱。起身時發現左一本俾人求其亂放出黎嘅練習書，封面係一隻八爪魚，見佢原來係以“ocean”為主題嘅dot-to-dot練習書，所以媽咪八掛打開睇吓！媽咪發覺本書又幾好，平時dot-to-dot都係以數目字排序去連線架麻，呢本除左有數目字之外，重有英文字母排序，而且構圖簡單，將來Ambrose連完線重可以當埋colouring book油顏色，又係佢鍾意嘅動物，所以媽咪決定買呢本書喇！媽咪其實再想搵有無其他主題，但實在太多書，又唔知本身本書放响邊，見最近都買左好多唔同嘅書，都係收手啦！反正dot-to-dot嘅書屋企都有！

再行掛圖位，見到有好多唔同掛圖同埋掛袋，成三百幾四百蚊一個天氣月曆掛袋，係好靚，不過成屋都係海報都無位放喇，又唔平，都係睇左有個concept第日有時間自己整一個黎教重化算！睇吓睇吓見到有個細教學用嘅鐘仔，唔錯喎，佢入面係齒輪黎，所以撥動分針時針都會除之而郁，唔同平時果d要自己撥埋時針，同真鐘又真係幾似，細細地又可座檯，跟埋本書仔都係$89，雖然Ambrose又係未到學睇鐘嘅時候，媽咪見咁有緣見到佢，又唔貴，又係買定先！

行番前面想搵本手工書，上星期已經搵過無，不過因為果日爹爹响度費時悶親佢，加上成店都係細路行黎行去，媽咪無咩心機搵，所以今日實在啱哂，認真d搵吓先！不過都係失望而回，都係無！反而又俾媽咪見到有spot系列嘅特價書，由原先$99.9一本特價到$49.5一本。其實媽咪都唔知價，唔知$49.5一本係咪真係平左抵左，不過因為媽咪見到有一本係講返學，似乎都好啱用黎响開學前同Ambrose睇多d，等佢知返學係咩一回事，希望佢到時唔好喊得太勁，而呢本書又係一本揭揭書，媽咪估Ambrose都會鍾意揭吓攪吓，又會鍾意主角嘅狗狗，所以媽咪決定買呢本書同Ambrose一齊模擬吓返學情況。

買完之後，媽咪要趕過去Learning is Fun幫Ambrose買治療膠。本來已經有一舊架喇，但爹爹見幾好玩，又乾淨唔污糟，Ambrose而家又日日會攞出黎玩，所以爹爹想話買多舊硬身少少，同埋唔同色喎。今次媽咪買左聲稱hard嘅藍色治療膠，不過返到屋企玩時就覺得藍色都唔及Ellen姨姨買嘅綠色硬，失望！不過都好嘅，試吓林d嘅可能之後接受泥膠會易d嘅！

黎呢度買野除左係買治療膠為主目的，次目的就係買個夾俾Ambrose夾野練指力。其實之前都已經買左隻膠嘅夾for age 2，不過真係又大又實，Ambrose根本好難要對準物件之餘重協調到用力夾起，只係偶然幾次成功，但大部份時間都係唔得，所以媽咪一直想搵番個啱佢手型但無咁實嘅夾。市面上又無細同短嘅夾，唯一係夾糖送嘅夾仔，其實都應該唔錯，不過媽咪見呢隻鋼夾，放開個扣後係大開，真係要用手去控制開口大細繼而夾物件，好似又俾夾糖夾易handle同用多d虎口位同頭二指嘅力，所以雖然隻夾成二幾蚊咁貴，但搵左好耐都搵唔到啱心水，都係買番呢隻啦！

再買返之前玩爛左嘅觸感彈彈水母，見到有隻青蛙又係觸感玩具，即買！

最後就係見到之前blog友玩嘅puzzle，呢隻puzzle唔係好似平時玩果d一凹一凸咁，而係成幅圖分開一part一part，整整齊齊，媽咪之前見到時已經覺得幾好，一來真係可以train到拚砌，二來一part一part咁砌又可以响砌時教Ambrose每一part係咩黎，好分明！呢隻puzzle有分好多主題，媽咪選左個人衛生俾Ambrose，貼近生活d，同埋俾佢多d衛生概念！

唔覺唔覺又買左好多野，再行耐d真係會破產，所以媽咪決定收手，遲d再睇過啦！

有趣的文字

以前就知道有呢套中文字咭，不過好多台灣賣家都唔寄香港，所以買唔到。媽咪都差唔多已經唔記得呢套教材嘅時候，又俾媽咪誤打誤撞買到，真係太好喇！因為市面上絕大部份嘅教材都係以英文又或者數學做主導，反而中文係我地嘅母語，教材真係好少，要認字就只有字咭，好沉悶！而且Ambrose似乎對中文較無興趣，要提高佢對中文字嘅興趣，單單用字咭真係唔work！呢套有趣的文字，媽咪自己都覺得好有趣，一個字點由圖像演變而黎，好清楚展現出黎，圖字咭分開，將來等Ambrose認得字時又可同佢玩配對，真係唔錯！希望Ambrose都一樣覺得有趣啦！雖然現階段俾Ambrose玩呢套咭又係早左d，一定又會俾佢掉到成地都係咭，不過媽咪都係本住有啱嘅教材就買左先，唔係第日要搵又未必有，又浪費時間，所以都係買左返黎先，啱時候先攞出黎俾佢認字！

2011年8月6日

今日係新一代英文幼稚園嘅家長會，爹爹媽咪帶埋Ambrose一齊去，重車埋Ellen姨姨、Wing姨姨同雅雯一齊去。今日真係超多人，去到嘅時候真係位都無得坐咁濟。其實唔明點解咁多人去到先至發覺喇叭唔係好得，個個坐哂响度等佢又搬喇叭又行黎行去駁拖把，整完之後反而後排嘅我哋唔係聽得好清楚。之 後由 老師講解，有powerpoint播放，媽咪都唔係好聽到，唯有老遠望住powerpoint果d字，講完一次英文，又再黎一次中文，大佬，成鵬人响度又有細路，d聲又唔係大聲，冷氣又唔係夠，使唔使咁樣講兩次喎，重要講果d都唔係好關開學細節嘅野，似係宣傳佢哋收費嘅課外活動多，媽咪覺得呢個家長會真係唔係好得，原本對佢嘅行政混亂已經有所不滿，就更不滿喇！  

講完一餐話分班，唉，真係好亂囉，聽到自己個名就出去跟老師入房喎，又唔知果度有幾迫，行出行入咁，唔明點解佢地唔索性一早張貼分班嘅list出黎等家長會一散就自行入班房囉！攪到爹爹聽錯Ambrose個名行左出去，入到班房先發覺Ambrose唔係果班囉！  

去左另一班度等，好失望，Ambrose同浠浠同雅雯唔同班lur！入左班房都好混亂架，大人就企哂起度，小朋友就坐，個老師只係講左幾句話開學帶乾濕毛巾、片片同埋杯之如此類嘅野，無其他！之 後 老師派校服，叫家長同小朋友度完唔啱响出面換番。因為之前一直wait緊另一間學校，所以媽咪一直都未同Ambrose買校服，所以無咩可以做。老師派完校服就話散得，真係有無攪錯！之前打電話黎問野又話有家長會，家長會時會講，而家黎到，無野講就散得都有，真係激死人！媽咪唯有衝出去問野啦！老師都好似唔係好熟d野，媽咪問完都好似無黎過咁。唯一可以真係肯定因為Ambrose近月尾先夠兩歲，所以要九月先開學，而唔係八月中囉！而且因為八月中開學係有適應期，而Ambrose係九月先開學，變左到時Ambrose一返學就真正返學，係唔會有適應期嘅！  

問完野，見個老師都流流地，都係走啦，有咩好問丫！出左去順便幫Ambrose買校服。媽咪覺得d校工好勁囉，只係問左媽咪係邊一級嘅學生，問都唔問你其他野，就响張單係咁tick要買嘅野，一套校服、一套運動服、一件外套、一個書包、重有一個生日袋同埋d咩名印呀通告袋同埋d唔知咩野，就咁就$428！重要個校工勁問媽咪有無交到名印錢，媽咪已經話老師話有印，佢都一定要媽咪攞番張單出黎，好似唔攪清楚有無交到就唔幫我開單去攞校服咁！重有就係果個生日袋，都唔知咩黎，無啦啦生日又要個唔同嘅袋，又要比錢，媽咪問佢地幾耐攪一次生日會，幾時先會用到個袋，佢地只係答媽咪到時會有通告，真係吹脹！媽咪其實個心都重响wait緊果間學校度，所以真係唔多願花咁多錢响呢間學校度！  

買完校服，同Ambrose玩左一輪之後，校工話要清潔場地，叫小朋友唔好再玩，媽咪見要整嘅野都整完，又無得玩，諗住搵埋Wing姨姨同雅雯就走，點知去到佢地班房，發覺佢果班好整齊咁個個坐住，老師啱啱話半日嘅學生可以走得，全日嘅留低繼續講埋落去！嘩！點解人地果班半日都講左咁耐架？媽咪又不期然覺得呢間學校真係超亂，好想Ambrose開學前wait到另一間，咁樣Ambrose就可以同表姐一齊返學，咁佢可能易d適應！呢間嘅適應期重係一個月咁耐，媽咪覺得比較啱Ambrose一d！可惜，到而家都未有位！  

攞完校服返屋企，氹極Ambrose都唔肯試，一同佢除衫就喊，唔通佢都唔鍾意呢間學校？定係藍色嘅校服真係唔利佢？  

食埋野瞓一覺，又到shining garden playgroup，今堂係尾二嘅一堂喇，返埋呢兩堂，weekend終於都可以free一d，可以去遠d地方玩喇！今堂topic係The Wheels On The Bus，呢個topic相信無咩小朋友會抗拒！而學校都幾有心機，真係搵左幾個紙箱黎做巴士，好靚！今堂Ambrose做嘅worksheet係將sticker貼番落指定陰影度，雖然每個sticker媽咪都有提示Ambrose去貼，但Ambrose真係好認真用雙手去嘗試貼準個位，呢張worksheet都貼得唔錯！  

返完學，又去搵表姐喇！姑仔嘅老爺响愛琴買左間兩房收租，所以表姐佢地可以有證入去會所玩。呢度個會所真係超正，又大，設施又包到軟林林，啱哂Ambrose玩，而且隔離又有個餐廳，大人真係可以食住野睇小朋友玩！除此之外，有室內外泳池，而室外重有幾個遊樂場添！同埋呢度嘅小朋友，除左本地人之外，外籍小朋友都好常見，Ambrose如果多d黎玩，都應該有d得著，哈哈！所以爹爹已叫姑丈出多一張住戶證俾我地得閒去玩，yeah！

Harry哥哥波波Show

今晚終於都去左睇Harry哥哥波波Show 喇！之前媽咪一知道有呢個show已經即時上網買飛，不過可能媽咪都比較遲知道，上網買飛只係剩番d單邊一個位，而因Ambrose都係計位嘅，所以即係根本無飛啦！媽咪非常之失望，因為個show講到明係啱一歲以上小朋友睇，而其實歡迎一歲以上小朋友嘅文娛節目真係唔多，所以媽咪會好珍惜每個啱Ambrose年齡嘅文娛節目，去得一個得一個！好彩地，呢個show因為太受歡迎，主辦單位安排加場，而其中一場重係加左去屋企附近嘅大會堂，超近！媽咪又點會放過呢個大好機會丫，開賣門票果朝一夠鐘，媽咪已經急不及待上網買飛，點知個網唔知點解上唔到，唔知係咪太多人上去買飛攪到個server down左，結果媽咪要打電話去買飛，呢個電話足足打左一個鐘頭先有人接通兼買到飛，雖然睇唔到個floor plan黎買，但confirmed買到飛果一刻真係超開心！今次買到係第四行，都幾前吓，不枉媽咪打左成朝電話！  

因為個show七點半開始，媽咪放工返黎都已經要七點半，所以媽咪攞左半日假行吓街，再早少少返去接Ambrose一齊同Ellen姨姨同浠浠食埋晚飯先入場。不過今日爹爹同Ambrose去左游水，游完水之後Ambrose無瞓過覺就直接去同媽咪食晚飯，無驚無險，佢都乖乖合作食足全程。  

正式入場，媽咪發覺原來坐第一行，同個台係零距離，好開心之際，Ambrose開始扭計，媽咪知佢游完水食埋飯坐低開始眼瞓先至會扭計，唯有俾個奶咀佢再攬住佢坐媽咪大脾，舒舒服服咁挨住。但媽咪又驚Ambrose坐得太舒服而一開場就瞓左，所以不斷同佢講野，講多幾講Ambrose開始喊，扭計指去後排，媽咪開頭都無理佢，只係不停同佢講陣間有得意野睇，但當Ambrose大喊左幾次有好多人都望實媽咪嘅時候，媽咪唯有抱Ambrose起身行吓，氹吓佢！唔知點解Ambrose係咁指住後排話要去，媽咪唯有抱住佢行上去，原本以為都可以氹到Ambrose，點知識講少少野嘅Ambrose竟然叫媽咪走，真係大件事呀！因為Ambrose不斷扭計喊，媽咪唯有暫時行番出去，費時阻到其他人。出左去之後，媽咪好落力咁氹Ambrose，又攬又鍚又抱又“un”都攪佢唔掂，睇場嘅姨姨同姐姐都不斷幫口氹佢，講到個show有幾好睇，佢都好堅持要走！媽咪心諗，唔係麻，咁辛苦買到飛，重要唔平嘅，都未開始就要走，好浪費啫！媽咪點都唔走，媽咪再打俾爹爹，希望Ambrose同爹爹傾完電話之後會好d，但都係無用。都唔知攪左幾耐，媽咪對手抱到無哂力，痛到痺哂，望住門口對上個電視，知道入面已經開始左，不斷叫Ambrose睇，佢都有睇，不過又係扭吓擰吓，唔肯入去！直到有個姨姨氹Ambrose，話不如你入去睇吓媽咪個袋有無唔見到啦，Ambrose突然間又肯自己行入去，媽咪不知幾緊張！  

不過一入到去之後，可能又大聲又黑，Ambrose又走返轉頭，媽咪唯有抱起佢企响側邊“莊”，Ambrose其實都好奇想睇，見佢都有同媽咪一齊“莊”，不過“莊” 一兩 吓又擰頭想走。好彩個show係有關波波，而Ambrose又係好鍾意波波，媽咪見Ambrose雖然擰頭想走，但已經無之前咁大喊，所以媽咪抱住佢由側邊嘅後排慢慢“詐詐帝帝”行上前，再行上前，再行到去第一排左右，終於都可以望到成個台。台上面咁啱搵左對父女玩，父親攞住個超大超大嘅網球拍，個女就掉個波俾父親打，Ambrose都睇到好入神。不過因為媽咪個位係要橫誇成個場先可以就坐，媽咪驚一行過個台太近d演員，Ambrose扭計唔肯埋去就麻煩，所以媽咪一直抱住Ambrose响台邊睇左好耐，耐到媽咪對手真係支持唔住，耐到媽咪覺得都應該可以埋位坐，即時行快幾步閃埋位抖吓！成功地，媽咪同Ambrose歸位喇，不過Ambrose依然係坐媽咪大脾，媽咪要攬實佢先得囉！不過咁都好啦，起碼媽咪對手有得抖吓！  

坐左埋位嘅Ambrose又好似無咩野咁，佢好專心睇show，有時Harry哥哥行遠左，佢都會伸個頭去追望，證明佢真係睇緊唔係發呆，哈哈！個show其實只係話個女主角唔見左個黃色波波，誤闖入蝦碌大王嘅世界（即係Harry哥哥），响搵波當中夾雜住好多表現，有好多唔同嘅波波，又有邀請在座嘅父母同小朋友一齊參與當中遊戲，如果唔係Ambrose扭計啱啱先平伏到，媽咪一定第一個舉手去玩呀，坐第一行咁方便，真係浪費哂！當中最得意係有bubbles，小朋友見到不知幾開心呀！Harry哥哥嘅bubbles，有d好大，可以成個人都笠到，好利害呀！重有識彈吓彈吓唔係咁快爆嘅bubbles，重有大bubble入面有好多個細bubbles，好勁呀！睇到媽咪自己都好開心！  

無驚無險，個show大概九點先完，臨完場前Harry哥哥分別走到浠浠同Ambrose面前同佢地握手，估唔到超級眼瞓嘅Ambrose肯攞隻手仔出黎同Harry哥哥握手，叻仔！散場出到去可以排隊等Harry哥哥影相簽名同買紀念品。人好多，媽咪都諗緊排唔排好，一來知Ambrose好攰應該要返屋企抖架喇，但成個show又唔俾影相，加上見好少有得影相留念，媽咪都好想影低去，第時俾Ambrose自己睇番都好丫，所以都係決定排喇！媽咪抱住Ambrose叫佢挨住媽咪瞓陣先，佢真係好攰囉，一挨低無耐佢就瞓著左。媽咪就大件事，要抱住佢排到去簽名影相都幾耐吓！好彩，場務姨姨好好人，見媽咪已經排最尾，索性叫媽咪上番去上層攞張椅俾媽咪坐，輪到媽咪時先行過去影相，咁都唔使企住抱得咁辛苦！  

不過當媽咪坐低想整理吓Ambrose手手腳腳嘅擺位時，佢就醒左，真係話都無咁快，佢好似充左電咁，可以落地喎！終於都到媽咪同Ellen姨姨，為左唔好阻住人收工，同埋為左快，媽咪同Ellen姨姨一齊同Harry哥哥影相，Ambrose都尚算合作，無話人地一行埋黎就大叫，順利合照到！Harry哥哥重讚Ambrose好叻，佢話佢留意到Ambrose全程都好專心咁望住佢喎！哈哈！媽咪同Harry哥哥講呢part係下半part，上半part嘅Ambrose係扭計到唔肯埋位囉！買埋枝bubbles水，都係時候走喇！唔知呢枝bubbles水，會唔會勁到可以有泡中泡呢？  

之前幼潛姨姨有同媽咪講，叫媽咪同Ambrose去d陌生地方前都要預早話佢知，媽咪真係無記性，如果今次媽咪有同Ambrose講定，唔知會唔會順利d呢？睇黎Ambrose返學都難逃暴喊架喇，媽咪都要同定佢講定返學情況至得喇！

2011年8月4日

今晚放工返屋企，就已經見到Ambrose攬住本Pop Up Jungle周圍行，見到媽咪返黎又想叫媽咪同佢一齊睇，成晚耐唔時都攞本書出黎回味咁，睇黎Ambrose真係好鍾意本書，哈哈！

今晚媽咪開始早教時段，睇完Pop Up Jungle，介紹左入面嘅動物中英文名，又攞埋本Pop Up Sea出黎睇，雖然入面有好幾隻海洋動物都散哂，媽咪形容佢地已經死左，哈哈，但以Ambrose記性，佢係知道原本隻動物係點嘅！

睇完Pop Up書，媽咪攞左兩張自己印嘅shape matching worksheets出黎，上面分左右兩排，每排都有唔同嘅形狀，媽咪示範左一次咩叫連線配對之後就俾左枝鉛筆Ambrose自行配對番形狀，點知Ambrose揸住枝筆亂畫，完全唔知咩叫連線，睇黎連線matching練習都未係時候開始，再要等吓先得喇！

玩完matching worksheets，媽咪攞左本colour sticker book俾Ambrose貼，不過由於媽咪之前無好好預備，只係即場打開本書要Ambrose攞指定嘅貼子出黎，完全無將同顏色先group埋一齊之後先至叫佢攞，結果係一片混亂，Ambrose只顧住想攞佢鍾意但唔係媽咪要佢攞嘅貼子，當媽咪要佢攞指定嘅貼子時，佢一係就睇唔到，一係就好想睇哂成份貼子，效果唔係幾理想。所以媽咪完成左橙色之後就要停止，唔好浪費左本貼子書喇！再等Ambrose大多少少同埋媽咪準備好少少時先至再玩過啦！

玩完貼子書，再玩SpecialLuk，今次媽咪直接俾Ambrose玩Level 2，唔再重溫Level 1喇，點知Ambrose只係肯玩兩個練習就擰哂頭，無興趣，為左唔好令佢反感，媽咪見好即收，等遲少少先同佢再玩過啦！

好緊湊，媽咪攞埋之前過好哂膠嘅大Sight Word Pictionary字咭，媽咪一早攞定五張字咭，首先同Ambrose讀每張字咭生字，再反轉字咭後面讀句型，讀哂五張，Ambrose都有跟住媽咪一個一個字讀，真係算唔話得！媽咪貪心，諗住重頭同Ambrose讀多次，點知當媽咪讀到第二張咭時，佢已經又擰頭唔讀喇！又係見好即收！

好快，媽咪再攞埋之前買嘅基礎漢字500，呢本書其實都幾悶吓，每課教一個字，每個字有單字，短句同長句子，但每課都好悶咁重覆同一個字，真係唔知Ambrose鍾唔鍾意。出奇地，Ambrose都聽左媽咪讀十二課咁多，差少少就成本睇哂架喇！讀到媽咪覺得悶到唔想再讀落去添呀，山、高山、高高的山、手、大手、大人、大人有大手、大人的手很大，嘩！真係超悶！

見差唔多要瞓覺，媽咪本來想攞之前同Ambrose睇過嘅我自己會讀系列黎睇，唔知係咪上次媽咪未睇點樣伴讀，所以講得唔好聽，今次媽咪想攞出黎時，Ambrose已經擰哂頭唔肯睇喇！唉！媽咪唯有攞本新買嘅“沙灘樂趣多”出黎同Ambrose睇，諗住多d同佢講會唔怕沙！呢本書之前已經响書展見到，但當日行完後諗住遲d行返轉頭買，點知最尾行返轉頭收書時已經唔記得左喇！所以最後係過左書展响書局買返！呢本書真係幾唔錯，故事唔長，字唔多，內頁又有家長指引，同埋又有可撕出黎嘅字咭認字玩遊戲，咁好嘅書唔知點解書局就係得一本咁多，都無第二個主題！今晚媽咪同Ambrose睇呢本書，Ambrose要求媽咪講完又講，媽咪都有應佢要求講多幾次，不過媽咪講多左幾次之後Ambrose都未滿足，係咁又重頭要媽咪再講，媽咪口水都乾埋喇！唯有同Ambrose講媽咪要去沖涼之後陪佢瞓，要佢自己睇。神奇地，Ambrose真係點頭自己睇，俾媽咪去沖涼，哈哈！呢本書，可以吸引Ambrose睇完又睇，真係買得抵！

Pop Up Book

上年書展時買左本Sea為主題嘅Pop Up Book俾Ambrose，其實果時Ambrose係極愛動物，不過媽咪見只有Sea無其他主題，諗住Ambrose愛動物，遲早都愛埋海洋動物，所以都買左俾佢。買左好耐之後先攞出黎俾佢睇，佢果然都好鍾意，可能本Pop Up又夠大本，一打開就有好大嘅立體動物彈出黎，吸引佢視線。就係呢本書，Ambrose開始認埋海洋動物同埋對佢地都有興趣。

呢排媽咪耐唔時都會上淘寶睇手工書，唔覺意見到淘寶都有呢本Pop Up Sea，重有其他主題，例如Jungle / Animals / Farm，重有較細size嘅選擇，媽咪相當興奮，因為有Ambrose至愛嘅動物，價錢又唔貴，大嘅係人仔$42，細嘅重只係人仔$13，call埋朋友仔一齊買，足足買左八本細，一本大，哈哈！大嘅當然係媽咪買啦，襯番本Pop Up Sea麻！今日收到貨，品質ok啦，同我買果本Pop Up Sea差唔多，書展買港幣$69定$79，而家計埋運費圍番$58，唔係超平，都叫平左，最重要嘅係有Jungle，Ambrose一定超鍾意啫！



Pop Up Sea & Pop Up Jungle

Pop Up Jungle內頁

Play-Doh – Numbers, Letters’ n Fun

一直都想買泥膠俾Ambrose玩，不過因為Ambrose唔係好接受到軟林林嘅泥膠，所以媽咪都唔係好落力搵俾佢玩，只係諗住俾佢玩一陣治療膠後，慢慢先加入泥膠，等佢習慣吓先！

媽咪買玩具時有奇遇，有時想買嘅玩具會無啦啦出現眼前，真係可遇不可求！今次，媽咪又見到好嘅泥膠set喇！呢套泥膠係Play-Doh，大牌子野，信得過，而且一套入面有八盒小泥膠，最重要嘅係有數字同英文字母模，一共有三十五個模咁多！玩泥膠之餘可以學埋數字同英文字母，一套都係$69，超抵！又係最後一盒俾媽咪買左！超開心！呢套泥膠，媽咪暫時未响反斗城及各大書局見過，唔知遲d會唔會有！

創意治療膠

尋日表姐同Ambrose一齊玩治療膠，爹爹話表姐教左Ambrose一個新玩法！就係用左枝泡泡槍响舊膠面扮攪拌整蛋糕，枝泡泡槍個咀有紋印左上舊膠上面，好似唧花咁，又真係幾似蛋糕喎！今晚Ambrose係咁話要整蛋糕，哈哈！

2011年8月1日

今日爹爹放假，所以尋晚叫左表姐過黎瞓，咁Ambrose又可以同表姐一齊玩喇！聽爹爹講，表姐都算乖，所以佢一個人湊兩個小朋友，雖然係攰少少，但都可以應付到！媽咪之前為爹爹預備左少少手工包，可以俾表姐同Ambrose，消磨吓時間，再加上畫畫，都幫到爹爹湊佢地無咁辛苦。出奇地，爹爹攞左治療膠俾兩表姐弟玩，媽咪以為Ambrose唔太玩，點知可能有表姐陪，佢又肯玩喎！果然有伴一齊玩，Ambrose肯接受多d野同開心好多！  

今晚爹爹同媽咪因為有文件要簽，所以出左去食飯，順便行左去反斗城望吓有無之前見到但又無新貨嘅欖球仔賣，點知屯門呢間分店係連大欖球都無，唔好話細喇！好失望！不過媽咪行過Lego個架，竟然俾媽咪見到有一盒媽咪搵左好耐都唔見有得賣嘅Lego House，重以為係唔再出定點，媽咪一見到就好興奮！不過唔知點解只得一盒，媽咪呢期用左好多錢買野俾Ambrose，實在唔想又使錢買野，但得番一盒又驚下次黎會無，最後爹爹話買啦，一手攞起盒Lego House就去俾錢，媽咪勁開心呀！反正今個月Ambrose兩歲生日，呢盒Lego House就當係Ambrose生日禮物，咁媽咪個心都安樂d，哈哈！