講故事

媽咪其實都幾懶同Ambrose展開早教時段，一來可能因為放工返屋企食飯沖得涼黎都無咩時間，有時又要順應Ambrose意向玩佢想玩嘅野而無時間；二來媽咪覺得大小肌肉嘅訓練都好重要，而一晚嘅時間，要同Ambrose玩，又要小遊戲針對大小肌肉，又要早教學字，時間真係唔夠；三來雖然媽咪一向都相信早教，不過仍然係採取隨遇而安，隨心出發，所以媽咪一直都無訂立時間表，總之，Ambrose想玩咩就同佢玩左先，呢d係親子時間，母子關係嘅建立比學術上嘅得著來得重要！而媽咪相信媽咪响Ambrose心中嘅地位提昇，唔多唔少都係因為咁而黎嘅！加上Ambrose明顯未到文字敏感期，佢對於文字一d都無興趣，勉強要佢學，大家都唔開心，學習都要講求輕鬆愉快，如果因為schedule左要做而勉強做，對大家都無益處！

前排媽咪見Ambrose開始抽起書架上面某d書要求媽咪同佢講故事，媽咪一一答應，一個晚上可能會講上五六本書，呢d書，都係之前媽咪買落嘅幼兒生活習慣書，內容都係講洗白白、沖涼、刷牙、痾臭臭等嘅書，媽咪諗，呢d書可能比較貼近生活，主題好直接，所以Ambrose似乎都幾鍾意聽！因為咁，媽咪較早前就住Ambrose唔鍾意玩沙同埋應付佢將會開學，買左“沙灘樂趣多”同埋“Sport Goes to School”，估唔到呢排佢真係晚晚都要媽咪同佢睇至安樂。相比起基礎漢字500，睇過一次之後，每當媽咪一攞出黎佢就耍手擰頭唔睇，媽咪開始感覺到Ambrose應該係對一d貼近生活嘅短故事有興趣，而唔鍾意單純為認字學句嘅書！

見Ambrose每晚都捉住媽咪要媽咪同佢講書書，似乎呢個小朋友開始鍾意聽故事喎！又見近期Ambrose睇醫生喊，加上快將開學，同埋時有唔合群嘅表現，媽咪特登去書局買左三本書，分別係“看醫生”、“上學的第一天”以及“交朋友”，趁Ambrose有興趣聽故事俾佢聽多d令佢唔好怕！今晚同佢講呢三本書，佢都好專心聽．其中“看醫生”同埋“上學的第一天”重要求媽咪重講，希望呢d書對佢起到作用啦！