Harry哥哥波波Show

今晚終於都去左睇Harry哥哥波波Show 喇！之前媽咪一知道有呢個show已經即時上網買飛，不過可能媽咪都比較遲知道，上網買飛只係剩番d單邊一個位，而因Ambrose都係計位嘅，所以即係根本無飛啦！媽咪非常之失望，因為個show講到明係啱一歲以上小朋友睇，而其實歡迎一歲以上小朋友嘅文娛節目真係唔多，所以媽咪會好珍惜每個啱Ambrose年齡嘅文娛節目，去得一個得一個！好彩地，呢個show因為太受歡迎，主辦單位安排加場，而其中一場重係加左去屋企附近嘅大會堂，超近！媽咪又點會放過呢個大好機會丫，開賣門票果朝一夠鐘，媽咪已經急不及待上網買飛，點知個網唔知點解上唔到，唔知係咪太多人上去買飛攪到個server down左，結果媽咪要打電話去買飛，呢個電話足足打左一個鐘頭先有人接通兼買到飛，雖然睇唔到個floor plan黎買，但confirmed買到飛果一刻真係超開心！今次買到係第四行，都幾前吓，不枉媽咪打左成朝電話！  

因為個show七點半開始，媽咪放工返黎都已經要七點半，所以媽咪攞左半日假行吓街，再早少少返去接Ambrose一齊同Ellen姨姨同浠浠食埋晚飯先入場。不過今日爹爹同Ambrose去左游水，游完水之後Ambrose無瞓過覺就直接去同媽咪食晚飯，無驚無險，佢都乖乖合作食足全程。  

正式入場，媽咪發覺原來坐第一行，同個台係零距離，好開心之際，Ambrose開始扭計，媽咪知佢游完水食埋飯坐低開始眼瞓先至會扭計，唯有俾個奶咀佢再攬住佢坐媽咪大脾，舒舒服服咁挨住。但媽咪又驚Ambrose坐得太舒服而一開場就瞓左，所以不斷同佢講野，講多幾講Ambrose開始喊，扭計指去後排，媽咪開頭都無理佢，只係不停同佢講陣間有得意野睇，但當Ambrose大喊左幾次有好多人都望實媽咪嘅時候，媽咪唯有抱Ambrose起身行吓，氹吓佢！唔知點解Ambrose係咁指住後排話要去，媽咪唯有抱住佢行上去，原本以為都可以氹到Ambrose，點知識講少少野嘅Ambrose竟然叫媽咪走，真係大件事呀！因為Ambrose不斷扭計喊，媽咪唯有暫時行番出去，費時阻到其他人。出左去之後，媽咪好落力咁氹Ambrose，又攬又鍚又抱又“un”都攪佢唔掂，睇場嘅姨姨同姐姐都不斷幫口氹佢，講到個show有幾好睇，佢都好堅持要走！媽咪心諗，唔係麻，咁辛苦買到飛，重要唔平嘅，都未開始就要走，好浪費啫！媽咪點都唔走，媽咪再打俾爹爹，希望Ambrose同爹爹傾完電話之後會好d，但都係無用。都唔知攪左幾耐，媽咪對手抱到無哂力，痛到痺哂，望住門口對上個電視，知道入面已經開始左，不斷叫Ambrose睇，佢都有睇，不過又係扭吓擰吓，唔肯入去！直到有個姨姨氹Ambrose，話不如你入去睇吓媽咪個袋有無唔見到啦，Ambrose突然間又肯自己行入去，媽咪不知幾緊張！  

不過一入到去之後，可能又大聲又黑，Ambrose又走返轉頭，媽咪唯有抱起佢企响側邊“莊”，Ambrose其實都好奇想睇，見佢都有同媽咪一齊“莊”，不過“莊” 一兩 吓又擰頭想走。好彩個show係有關波波，而Ambrose又係好鍾意波波，媽咪見Ambrose雖然擰頭想走，但已經無之前咁大喊，所以媽咪抱住佢由側邊嘅後排慢慢“詐詐帝帝”行上前，再行上前，再行到去第一排左右，終於都可以望到成個台。台上面咁啱搵左對父女玩，父親攞住個超大超大嘅網球拍，個女就掉個波俾父親打，Ambrose都睇到好入神。不過因為媽咪個位係要橫誇成個場先可以就坐，媽咪驚一行過個台太近d演員，Ambrose扭計唔肯埋去就麻煩，所以媽咪一直抱住Ambrose响台邊睇左好耐，耐到媽咪對手真係支持唔住，耐到媽咪覺得都應該可以埋位坐，即時行快幾步閃埋位抖吓！成功地，媽咪同Ambrose歸位喇，不過Ambrose依然係坐媽咪大脾，媽咪要攬實佢先得囉！不過咁都好啦，起碼媽咪對手有得抖吓！  

坐左埋位嘅Ambrose又好似無咩野咁，佢好專心睇show，有時Harry哥哥行遠左，佢都會伸個頭去追望，證明佢真係睇緊唔係發呆，哈哈！個show其實只係話個女主角唔見左個黃色波波，誤闖入蝦碌大王嘅世界（即係Harry哥哥），响搵波當中夾雜住好多表現，有好多唔同嘅波波，又有邀請在座嘅父母同小朋友一齊參與當中遊戲，如果唔係Ambrose扭計啱啱先平伏到，媽咪一定第一個舉手去玩呀，坐第一行咁方便，真係浪費哂！當中最得意係有bubbles，小朋友見到不知幾開心呀！Harry哥哥嘅bubbles，有d好大，可以成個人都笠到，好利害呀！重有識彈吓彈吓唔係咁快爆嘅bubbles，重有大bubble入面有好多個細bubbles，好勁呀！睇到媽咪自己都好開心！  

無驚無險，個show大概九點先完，臨完場前Harry哥哥分別走到浠浠同Ambrose面前同佢地握手，估唔到超級眼瞓嘅Ambrose肯攞隻手仔出黎同Harry哥哥握手，叻仔！散場出到去可以排隊等Harry哥哥影相簽名同買紀念品。人好多，媽咪都諗緊排唔排好，一來知Ambrose好攰應該要返屋企抖架喇，但成個show又唔俾影相，加上見好少有得影相留念，媽咪都好想影低去，第時俾Ambrose自己睇番都好丫，所以都係決定排喇！媽咪抱住Ambrose叫佢挨住媽咪瞓陣先，佢真係好攰囉，一挨低無耐佢就瞓著左。媽咪就大件事，要抱住佢排到去簽名影相都幾耐吓！好彩，場務姨姨好好人，見媽咪已經排最尾，索性叫媽咪上番去上層攞張椅俾媽咪坐，輪到媽咪時先行過去影相，咁都唔使企住抱得咁辛苦！  

不過當媽咪坐低想整理吓Ambrose手手腳腳嘅擺位時，佢就醒左，真係話都無咁快，佢好似充左電咁，可以落地喎！終於都到媽咪同Ellen姨姨，為左唔好阻住人收工，同埋為左快，媽咪同Ellen姨姨一齊同Harry哥哥影相，Ambrose都尚算合作，無話人地一行埋黎就大叫，順利合照到！Harry哥哥重讚Ambrose好叻，佢話佢留意到Ambrose全程都好專心咁望住佢喎！哈哈！媽咪同Harry哥哥講呢part係下半part，上半part嘅Ambrose係扭計到唔肯埋位囉！買埋枝bubbles水，都係時候走喇！唔知呢枝bubbles水，會唔會勁到可以有泡中泡呢？  

之前幼潛姨姨有同媽咪講，叫媽咪同Ambrose去d陌生地方前都要預早話佢知，媽咪真係無記性，如果今次媽咪有同Ambrose講定，唔知會唔會順利d呢？睇黎Ambrose返學都難逃暴喊架喇，媽咪都要同定佢講定返學情況至得喇！