今堂Ambrose畫北極熊。問 Ambrose北極熊隔離果舊野係咩黎，佢好快答話係「山冰」，真係俾佢笑死！係「冰山」至啱！另外果舊，佢都答到係屋，不過係俾北極熊住架囉！哈哈哈！
今日呢個主題，相信係北極，所以成幅畫，用色不多，主要用白同藍，所以望落好寡！但見白色嘅地方其實係無油油粉彩，即係話Ambrose油底色時要好小心避開唔好油到白色嘅地方，因為無油粉彩嘅保護，一油左落去就無得挽救，但佢都唔係油過界好多，算係咁啦！
爹爹媽咪平時好少同佢講起極地環境，今次係一個好好機會介紹俾Ambrose知咩係極地！
Ambrose離家過夜一直都無太大問題，甚至乎，如果係去旅行住酒店嘅話，佢就仲開心，都唔使要攞d咩先至可以入睡，其實真係幾好。
但，要Ambrose自己去其他人家中過夜，仲未試過。原因係次次問佢，佢都話唔好，係都話要瞓番屋企張床，係都話下次先啦，等佢大個先啦，好好笑！
早兩日二表姐過左黎同佢玩，之後自己話留响度瞓，大家都唔睇好會成功，因為二表姐一向都比較黏媽媽，大家都諗，有得玩時佢就可以話留响度過夜，但如果要瞓時，靜落黎佢應該會搵人，所以爹爹一直stand by，諗住如果真係唔得，都要送佢返屋企！結果，呢兩個小朋友同睡一房，要瞓覺果時，唔係呢個話要飲水就係果個話要去vivi，一係就一齊行黎行去，一係就一個話熱一個話凍，多多要求，係都唔願瞓咁！直至，二表姐攰到背住左Ambrose，Ambrose仍然不斷講野，又話要送野俾二表姐，仲坐言起行咁即時起身攞俾二表姐，二表姐已經話瞓醒先，哈哈！終於，搞到成十二點先至瞓哂覺，無驚無險瞓到第二朝，叻！
唔知係咪因為二表姐已經黎過同Ambrose一齊瞓，今晚姑姐邀請Ambrose去佢屋企同二表姐過夜時，Ambrose出奇地順攤，竟然話好！仲以為佢講笑，點知最後佢真係跟左姑姐返屋企，爹爹媽咪登時勁失落！
姑姐話佢落左車之後，嘴扁扁左一陣，但好快又無咩野喎！
爹爹媽咪又係响屋企stand by，以防姑姐打電話黎搞唔掂Ambrose要接走。不過，又無收到電話，姑姐一直whatsapp媽咪情況。同响屋企一樣啦，都係勁多野講唔願瞓，不過可能因為姑姐陪瞓，更加講唔停、問唔停，所以媽咪叫姑姐唔好陪瞓！又係一時要飲水，一時要vivi，一時又話凍一時又話熱，仲要加上今日俾蚊咬到成腳都係，又叫痕，煩到姑姐死死吓，哈哈！
不過，結果最後都順利十二點七瞓著左！姑姐話佢半夜都有叫，不過係因為蚊癩好痕，無扭計嘅！
雖然覺得Ambrose好叻仔，竟然可以自己在外過夜，真係大個仔左；但又不禁好失落，家中床上沒有Ambrose，總係覺得怪怪的！
一直以黎，Ambrose嘅頭髮都係爹爹同佢剪嘅！唯一唔記得左幾時有帶過Ambrose出去剪過一次咁大把，但呢個第一次嘅經驗就麻麻地，唔係Ambrose唔肯，而係髮型師剪得佢嘅頭髮太碎，搞到下下瞓醒都炒起哂，好肉酸！仲有就係平時都唔使梳頭嘅Ambrose，因為成日瞓醒頭髮都豎起哂，搞到要花時間打理至出得門口，實在太麻煩了，所以，自此之後，都係要爹爹出馬自己剪番就算！
今日跳完舞出黎，本來打算返屋企剪頭髮，但經過一髮型屋時，見到有一小朋友正在剪頭髮，Ambrose睇到眼定定，爹爹問佢不如响度剪頭髮，佢又話好，再問佢好唔好剪到好似小朋友咁短，佢又OK，所以Ambrose終於嘗試左佢人生第二次去髮型屋剪頭髮喇！
Ambrose都坐得好定吓，不過由於佢跳完舞，又已經成點幾鐘，加上坐定定唔郁，見佢雙眼皮都走左出黎。仲有就係見佢幾次都好歇力睜大對眼又眼眨眨咁，可想而知佢係幾咁眼瞓，無扭計又定一定俾人剪頭髮，真係好乖喇！
本來都打算剪到好似個小朋友咁短，剷哂青咁，不過當越剪越短時，爹爹媽咪又好似有少少保留，都係覺得唔好一下子咁短先好d！
剪完之後，Ambrose好滿意，覺得自己好型仔，嘩哈哈！不過，返到屋企奶奶話男仔剪到咁短好頑皮，爹爹媽咪望落又覺得有幾分，同埋始終都鍾意長少少斯文d咁，睇黎，下次都係唔好再剪成咁喇，留番長至得了！
早排爹爹團購左個沙灘帳蓬，早兩日有得攞。攞左就即時同Ambrose 及二表姐一齊去沙灘玩！呢個帳蓬，睇尺寸都知佢係大過平時果d，所以至買。實物開出黎，真係好大，又夠高，成個人瞓哂入去都得，真係唔錯！最正嘅係爹爹話沙灘曬到好應，佢擺左响向太陽果邊，咁個帳蓬就有個倒影位，小朋友可以响倒影位度玩，可以遮陰！
不過，因為第一次用，個帳蓬又大，睇you tube教收好似好輕易，但原來實際係幾難收，要响屋企試多幾次至好攞出去用，哈哈！
上星期去左朗誦比賽，所以又無返學，尋日畫展，畫室唔開，所以今日至補堂！都唔記得左問爹爹係咪Miss Chen Chen教，而家成日都調堂，跟嘅老師成日都唔同，真係唔係幾好，希望黎緊時間可以定番少少。Ambrose 今日畫落雨，把雨量係痴上去嘅，咁大雨，把雨傘仲有無細d呀？！哈哈！個人仔嘅衣服，好典型嘅Ambrose畫法，畫到一格格唔同顏色！果d雨，都係好典型Ambrose畫法，亂七八糟！哈哈！
自從早幾日Ambrose响畫班度畫左隻獅子之後，佢就响屋企「練習」畫獅子了！畫左四張咁多，哈哈！Ambrose話，獅子跑緊，所以對腳係向前而唔係打直喎！
自從二月份見完家長之後，媽咪再諗住努力同Ambrose認中文字。當時，媽咪的起心肝買左個字咭掛袋返屋企，仲真係將個掛袋整上房門，方便俾Ambrose認字用。不過，咁大個掛袋整左出黎，Ambrose都可以視而不見，亦都無話有興趣問爹爹媽咪d字點讀。加上，當媽咪嘗試教Ambrose認字，感覺佢次次都係唔記得多，次次答媽咪都係靠撞，真係好沮喪！
如是者，掛出黎嘅字又無咩點update到，名符其實嘅三分鐘熱度！直至最近一個月，因為小一派位鬧得熱哄哄，爹爹開始擔心Ambrose落後大市，所以開始又搬來「無教點會識」嘅理論，爹爹著手教Ambrose英文字嘅同時，媽咪開始教認中文字！
英文方面，其實真係慘不忍睹，A-Z嘅大楷都仲係會亂，好似B同D，V同Y，N同Z，亂都算，原來當叫Ambrose自己默返A-Z出黎係唔得嘅，真係唔知同齡嘅小朋友係咪咁喇！爹爹仲教佢認英文生字，由眼耳口鼻、顏色同埋數目字嘅英文呢d咁基本嘅字起，但次次都教到嘔血，第二日再攞返出黎都已經洗腦，可以話係無進度可言。
中文方面，反而有少少驚喜，媽咪之前用左「有趣的文字」嘅字咭展示圖字俾Ambrose睇，雖然初初問佢字時，佢都係靠睇圖再答，但熟左之後，媽咪會將圖反轉，只認讀字，Ambrose開始可以認到少少簡單字了！另外，爹爹話曾經聽過Ambrose指住「門」字同「鳥」字讀，呢兩個字筆劃咁多，好肯定媽咪無教過，後來發現原來係學校之前教過，唔知點解咁深Ambrose都竟然認到。由於之前一直都無同Ambrose認字，所以媽咪主要先教Ambrose筆劃簡單嘅字先，但教教吓時，學校又話要做評估，見個個同學都有溫書，仲話個個都可唔睇圖都認讀到d字，媽咪同爹爹又急急特訓Ambrose認學校字先，唉！都咪話幼稚園無壓力囉！
學校嘅字其實都好深，有「醫生」、「飛機」、「泳池」、「謝謝」、「船」等，已經打定輸數Ambrose應該追不上，但原來當每個字同佢講吓似d咩似d咩，佢又好似好快可以認讀到咁！當然，都要每日都同佢讀吓，唔係應該好快又忘記了吧！但有d字爹爹媽咪都諗唔到點講似d咩，佢就真係忍唔到，真係要諗吓辦法至得！
另外，由於Ambrose都認到少少字，有日佢自己攞左「基礎漢字500」第一冊出黎，唔知係咪打開見到有d字自己識得讀，佢就開始讀俾爹爹媽咪聽，話係講故事喎，如是者，又學多左少少連接詞同形容詞如「的」、「有」、「很」、「高」、「在」等！
但奇怪嘅係，一些簡單嘅字如「水」、「火」、「大」、「木」，唔知係咪字形有少少似，筆劃又比較少，佢反而好易混亂左！
暫時自己教同認學校嘅字都認到幾十個，有d字上學期教左但完全無溫，都未攞出黎問Ambrose，唔知仲有幾多佢係識而我地唔知喇，希望係有啦！
仲諗住尋晚打風，今日應該橫風橫雨，所以無應承婆婆返去食飯！點知今日咁好天，適逢爹爹又要返工，懶惰嘅媽咪又懶得郁。同Ambrose出左去晚飯撐檯腳後，返到屋企無所事事，就諗起俾Ambrose浸浴缸，當補償吓今日無得出街玩囉！
今晚Ambrose又話要做黏土，又同佢攞本黏土大全出黎睇吓整咩！今次佢又話要好似上次咁整扣針，好彩媽咪一早有準備，一早買定幾個小襟章以備不時之需，今晚就啱哂喇！
見時間唔係好多，本來Ambrose想整果d都幾複雜，媽咪都要研究吓點整，加上原來已經無咩黏土喇，所以氹左Ambrose揀隻蟹黎整，哈哈！呢個Ambrose真係無咩點諗過腳與腳之間應有嘅距離，見有位就痴腳上去，搞到腳貼腳，仲要最後個蟹箝都無位放咁濟！
整完隻蟹，佢又話要整多一個，今次唔使扣針，因應住仲有咩顏色嘅黏土响手，最終揀左蜻蜓！睇住佢整對翅膀，簡直一步一驚心，因為蜻蜓身佢整到好大，但翅膀嘅黏土唔多夠，所以翅膀整到好薄，佢痴上去時有時又痴到隔離想搣起再痴，但翅膀太薄想爛，最終都係痴左上去之後再慢慢修正，所以對翅膀唔多對稱，哈哈！
整完黏土手工，Ambrose好滿足！
Ambrose認字超差，英文字母有好幾個都仲有時會撈亂，好似Y同V，B同D，最嚴重係6同9，錯嘅機會係八成以上，真係唔知點教佢！其實有時都好煩惱，6同9好多時印左出黎就真係上下掉轉，大家都係彎彎地，但個9字如果手寫出黎其實果劃係一棟，根本唔係彎，但普遍嘅教材、作業都係彎嘅，真係好難解釋俾佢知點解，同埋好難consistant教佢，果劃應該係一棟！仲有個7字，明明學校教係一橫一棟，成90度角，但workbook好多都會係一橫之後就斜落，成50度角咁，話Ambrose唔係咁又唔係，因為佢都係跟書寫，佢又真係無錯嘅，真係唔明點解市面上嘅workbook會咁樣，好煩呀！
為左加強Ambrose認字能力，爹爹開始叫Ambrose寫A-Z同1-10，呢d應該係最基本啦！諗住佢寫得多就會記到。不過見Ambrose寫得悶悶地，媽咪又覺得不求甚解嘅抄寫意義唔大，或者可能係事倍而功半，所以呢排都不斷諗計點可以幫到Ambrose。媽咪都有諗過其實Ambrose係咪有學習障礙？！都有去搵過資料係咪有得做評估，但一般都要成六歲以上先會有，似乎又唔可以咁早去斷定佢係咪學習障礙，定係佢只係仲細，未記到認到！
Anyway，都要諗吓點幫佢認字，而家仲只係停留响大楷同數字，爹爹都有嘗試直接教英文生字，不過更加徒勞！似乎真係要同佢打好A-Z個底先可以proceed教生字！
為左咁，媽咪又摷到本wipe
clean dot to dot俾Ambrose，等佢唔使下下都係寫字咁悶，順序連吓線，都可以考到佢排序。由於個圖形佢都大致估到點畫，所以連得好快，希望佢連嘅時侯，都順帶有望吓d數字或英文字，從而加深印象啦！
去完畫班，食埋晏就同Ambrose返屋企避暑。估唔到佢竟然話眼瞓，媽咪即時同佢換好衫開埋冷氣入房瞓啦！
點知早瞓晏覺，佢又早左起身，媽咪仲諗住執吓屋先架麻！無野好做，執野時發現上年書展買落嘅萬花筒手工仲未做，所以即席同Ambrose整萬花筒！
叫左Ambrose响畫紙度畫公仔，媽咪就研究點整萬花筒！其實可以話唔使點整，只係將d珠入左落個膠波入面，將三塊鋁板貼在咭紙上捲成三角柱體放入筒內，最後將Ambrose畫嘅畫捲在外圍，完成！Ambrose可能見係手工，但自己只負責畫畫同痴野，係咁問媽咪點解佢做咁少野？！唯有氹佢，下次整個勁手工啦，唔係個個手工都要有好多工序架麻！
不過好想講，上年書展响美芯買嘅手工set真係唔多掂！上次同表姐做嘅木火車便條座，開出來已經唔齊parts，上好哂色要砌先發覺砌唔到！今次呢個萬花筒，波入面嘅珠好少，望入去都同平時果d有少少唔同，係可以透過個筒望到對面嘅人，都算啦，最大問題係個波係可以開合，只係扭實佢放入個筒內，但如果唔小心撞跌個萬花筒，個膠波就會好易跌到打開，入面嘅珠就散到一地都係！整左都唔夠幾個鐘，跌又唔係跌得勁果隻，搞到次次成地珠，真係好麻煩！本來媽咪試用膠紙貼住膠波開口條邊，但可能用嘅係磨沙膠紙，望入去個筒又見到哂張膠紙，完全唔靚！下次都係唔再買佢嘅手工set喇！
今日Ambrose一早起身，媽咪仲暈吓暈吓，瞓响床唔願郁。Ambrose話要畫紙畫畫，所以媽咪起身俾左張畫紙俾佢之後，又走返上床瞓覺，好懶呀！
瞓呀瞓，聽到出面靜英英無哂聲，又覺得自己好衰，結果都係起身去睇吓Ambrose。呢個時候，Ambrose攞住幅畫走入房搵媽咪，原來佢畫左架兔仔車、太陽、雲、小烏同屋！媽咪見佢張畫紙下部份留白左，建議佢畫其他野上去，等幅畫好睇d，結果，佢再攞返幅畫返黎時，見到佢畫左花、草、，蜜蜂同蝴蝶！畫得幾靚呀！於是，媽咪將Ambrose嘅畫貼在房門上，貼堂呀！哈哈！
之前响畫班Ambrose學左整輕黏土長頸鹿，爹爹覺得好靚，拜託Ambrose找一日教佢整，Ambrose一聽到教爹爹整就一口答應！爹爹買定左Ambrose講嘅材料之後，一直都無時間學整。撞啱今日要幫手湊住二表姐，咁不如叫Ambrose教二表姐整，爹爹媽咪乘機可以輕鬆一下。
估唔到，隔左咁耐，Ambrose都仲記得點整，真係走去教二表姐。不過佢就唔多識做老師，好多時都係講左一句之後，自己整自己果隻，二表姐都唔知點做，都係要媽咪出手幫一幫二表姐！
由於當初預嘅黏土比實際要用嘅少，搞到包好個身體之後，竟然無哂黏土包腳同頸，結果，迫不得已要自己溝色，溝出黎嘅顏色自然同之前嘅有出入，搞到隻長頸鹿兩截色！
兩表姐弟，一齊整左兩隻長頸鹿之後，好鬼開心，攬頭攬頸話要影相！Ambrose應該比二表姐開心，因為今次佢做左小老師，表姐又成功整到隻長頸鹿出黎，點會唔興奮丫！
唔知Ambrose係咪遺傳左媽咪同爹爹嘅眼鼻敏感，成日都見佢捽眼捽鼻！次次見佢捽眼，搞到眼都紅哂，真係幾驚吓，次次都話同佢睇醫生，但次次即時又無去睇，過左無見佢捽又無特登同佢去睇！
呢排又見Ambrose捽眼，再加上去完泳池游水，呢兩晚見佢狂捽，好難先至氹到佢滴眼藥水，但眼藥水只係萬寧度買嘅滋潤眼水，似乎對於眼痕都無咩作用。見Ambrose捽得咁勁，今日終於的起心肝同佢去睇眼科，求個安心！
見醫生前要初步驗吓眼先，Ambrose第一次驗眼，其實都幾搞笑，佢坐左部電腦機前面，本來應該向前望入去入面定住睇個熱氣球嘅，但佢對眼就係咁周圍望，成日郁，搞到姑娘整左好耐先capture到佢對眼，應該係隻眼，因為搞左好耐至做到一隻，另一隻又係好耐，最後姑娘放棄左，哈哈！最好笑係，部機要度眼壓，會吹d風去隻眼度，見Ambrose被風吹到隻眼之後個樣又驚訝又厭惡咁，但又唔敢反抗，真係幾得意！之後就係戴副眼鏡睇英文字，仲以為咁細個小朋友驗眼會同大人唔同，點知都係一樣，只係無問E字三劃向邊，姑娘不斷放唔同英文字問Ambrose係咩字！好彩Ambrose僅僅認到，唔係都唔知可以點驗眼？！基本上見佢好多都講到，真係有d好細粒嘅，連媽咪都睇唔到，佢都話睇唔到！不過見佢有好幾個都話唔知，真係好想知道佢究竟係唔知個英文字母定睇唔到？！
驗完眼，入去見醫生，醫生再用其他儀器照眼，都係話佢眼睛敏感，視力無咩大問題，跟手開左d眼藥水俾佢眼痕時滴。隻眼藥水都幾得，睇完醫生後見Ambrose又捽眼，即時同佢滴，成晚完全無再捽過喇！
老師話同Ambrose畫呢幅畫時，Ambrose唔多明點解個人要吹住個喇叭，同埋條蛇嘅關係，所以開左段片俾佢睇完至畫喎！媽咪諗，Ambrose又真係無見過，個主題都幾難，不過幾有趣，平時自己唔會諗到要畫呢d野！今次媽咪覺得畫得麻麻地，可能始終畫嘅野完全無接觸過無咩概念，比較難掌握！睇得出個人都唔似係Ambrose手筆，尤其是對手，識得畫到起哂角，同d手指比平時佢畫嘅仔細好多，哈哈！不過d月亮同星星一定係Ambrose嘅傑作喇！
一直都想攞盒Melty Beads出黎俾Ambrose玩，但玩呢個又要摷埋個燙斗出黎先得，超懶嘅媽咪就一直無行動！今日爹爹返工，出面勁曬，返完興趣班就即時返屋企避暑，無咩好做，終於的起心肝摷個燙斗出黎，等Ambrose可以試玩盒Melty Beads。
其實又係可以早d同Ambrose玩，因為只係同佢講左一次，佢就自動波咁自己砌喇，都唔使媽咪陪佢同幫佢！砌好左之後，媽咪幫Ambrose燙個圖案，Ambrose見到覺得好新奇，係咁狂問點解要燙，點解唔係用膠水，點解呢樣點解果樣，真係答都口水都乾！
Ambrose一共整左四個，分別係警車、消防車、屋同狗！不過當佢砌完警車同消防車之後，佢又貫徹作風，將間屋同隻狗嘅顏色自我發揮一番，完全唔跟指示砌！整體其實都好好玩，Ambrose本來仲想繼續砌，不過媽咪燙到又攰又熱，整左四個就收工啦！
同反斗城賣嘅Beads有d唔同，呢盒Melty Beads 只有一塊釘板，只要放在書上面嘅圖案，就可以跟住砌，而反斗城果隻係特定一個釘板，印象中無記錯好似只有心心、熊同車仔咁上下。覺得呢盒Melty Beads有咁多唔同公仔可以砌，彈性大好多，推介！
