Crayola Washable Markers (3y9m)

之前Ambrose向媽咪反映，佢嘅水筆無咩色喇。開頭媽咪回應，咁等埋其他顏色都無咩色就同佢買盒新啦，如是者，佢耐唔時都有講一、兩句咁嘅說話，媽咪都係咁打發佢，因為媽咪見佢雖然話無色，但總係見佢不斷有畫畫出黎，好似無咩問題！

 

終於近日佢又再同媽咪講，仲要加多句，好多都無顏色喇已經，哈哈！所以，今日同佢去買盒新水筆啦！本來Ambrose一直用開Crayola粗身水筆，不過媽咪見十六色都要$70，幼身嘅水筆，二十色至係$60，粗身真係貴左少少咁！猶豫緊買邊隻好嘅時候，轉過彎見到有盒幼同短身嘅水筆，六十四色$150，雖然銀碼係貴d，但有六十四枝喎，計落係抵d，反正Ambrose都成日畫畫，六十四就六十四啦，哈哈！

 

返屋企同佢一齊將已經無咩色嘅筆執番出黎掉，至發現，原來，無色嘅係紅、橙、黃、綠、藍、啡同黑色！原來佢最常用嘅顏色莫過於呢幾隻咁基本嘅顏色！