童創你共我@兒童藝術作品展(3y10m)

今日Ambrose嘅畫室搞左個畫展！其實大概四月嘅時候，老師已經派左通告話有畫展，問家長參唔參加，媽咪之前已經見過九龍有一個畫展好想 俾Ambrose試吓，但礙於參加畫展又要參加八堂畫班至有作品展出，上堂要出九龍上，真係遠左d，所以打消左念頭。就在打消念頭之後，Ambrose畫室竟然話搞畫展，地點仲要係區內，真係方便好多，當然即時同Ambrose報啦！

 

本來老師提議過媽咪，俾Ambrose試畫一次油畫參展，但因為畫一幅油畫要三堂時間，而四、五月時間Ambrose實在太忙，有多個跳舞比賽表演要參與，平日時間又有其他興趣班，畫室又唔係有太多時段可選擇，時間真係度黎度去都度唔出黎俾佢去畫，結果都係放棄了。

 

又，本來以為只係就咁參加畫展，老師會响平日嘅作品中揀選出黎展覽，點知原來仲有個優秀作品比賽，Ambrose有幸被推薦了一幅畫作角逐，以為係人人都有份嘅比賽，但問及兩個表姐有無份參賽時至知原來唔係人人有份，Ambrose算係比較幸運了！比賽分兩part俾分，第一part係响facebook度俾人投票，响四十幾幅作品中最多like嘅十八幅將會出線，再由評審團評出冠亞季軍以及優秀獎。無咩點add friend嘅爹爹媽咪亦都好好彩地有過百個like，Ambrose得以出線。

 

今日嘅畫展就會直接揭盅得獎名單，爹爹媽咪當然有幻想過Ambrose會得獎啦！不過見之前畫室沒有打電話來確認準時到達之類嘅電話，加上十幾幅作品中，真係有好多都畫得好好，而Ambrose又係最細果個，媽咪深知，要攞三甲都幾難喇！唔入三甲嘅十五名小畫家，唔會無獎，都有個安慰獎，就係優秀獎狀一張！當司儀一直叫著名字出去嘅時侯，媽咪心底都有叫過唔好叫Ambrose個名住呀，哈哈！不過，最後都有叫到，Ambrose得了優秀獎！眼見其他人有盃攞，Ambrose又問點解唔俾盃佢？！其實有時都唔太明，點解佢咁細個，又無人教佢，佢都會知道盃係好過獎狀、獎牌？上次朗誦比賽之後，返到屋企果晚瞓覺嘅時候，Ambrose都好耿耿於懷問點解佢無盃，今次再見人攞盃而自己只得獎狀，都可以話係連番打擊，希望佢會知道其他人會叻過自己，佢都要再努力至可以有機會攞盃，而唔係响度自怨自艾啦！

 

睇番三甲嘅作品，亞軍係Ambrose同學仔嘅哥哥取得，媽咪真心覺得亞軍嘅作品比冠軍靚好多，唔係淨止比賽果幅作品，比較埋同參展者嘅其他參展作品，媽咪仍然覺得，點解佢會得到冠軍架？或者藝術嘅野人人感覺都唔同啦，不過真係有d為朋友仔唔抵！另，無意又發現，三甲嘅作品，甚至係佢地嘅參展作品，都係油畫，可能顏色比一般水粉彩畫要搶眼好多啦！

 

睇番Ambrose嘅作品，其實係老師揀出黎展覽，媽咪都係去到至知擺邊幅畫！其實Ambrose作品都係一般，可能因為Ambrose係年頭至轉純畫班，其實畫作選擇都唔太多，即係揀唔落手，哈哈！除左果幅爸爸媽媽拍拖去，用色比較colourful，構圖比例幾好，媽咪由佢一開始畫已經好鍾意呢幅之外，其他兩幅只係一般。花旦姐姐其實係Ambrose三歲鬆少少時畫嘅，當時都覺得好靚，但仔細睇幅畫就覺得畫到有d亂，頭大身細，不過勝在顏色豐富，同埋輪廓分明，點解老師推薦呢幅畫參賽，其實媽咪都唔多明白，哈哈！至於果幅人仔跌落蜘蛛網度仲識笑，真係得啖笑，係Ambrose至有呢d咁奇怪嘅諗法，幅畫其實都ok，不過媽咪總覺個蜘蛛網唔係好似，又或者如果唔係老師講原來有個人仔跌左落蜘蛛網度，其實媽咪都唔多知幅畫背景畫嘅係蜘蛛網，哈哈！