2013亞洲學生音樂朗誦比賽(3y9m)

一早就係為左參加「2013亞洲學生音樂朗誦比賽」，先至會報之前嘅海洋盃幫Ambrose熱吓身！正正就係因為有上次嘅經驗，又僥倖攞到銅獎，誦材又係同一首，所以今次呢個比賽，反而無練習！只係比賽前一日剛好是普通話班，叫老師同Ambrose練左就算！

 

今次出去文化中心比賽，規模比起上次的大，間房大d，人多左；而且，同時間應該仲有幾個地方進行比賽緊，見有小朋友攞住盃呀、牌呀行黎行去，佢地應該報左幾個項目。

 

今次比賽撞到一個同學仔，Ambrose之前就係睇過呢個同學嘅朗誦短片，先至肯响爹爹媽咪面前朗誦，見人地最近攞左個盃，佢又話要攞盃，某程度上，Ambrose係幾好勝，亦係因為有呢種性格，推動佢衝破障礙，肯表演俾爹爹媽咪睇，同埋勇於面對群眾表演，咁係幾好嘅，不過另一方面，佢會比較囂張囉，唉！

 

同學仔學左一年普通話，見到同佢同一場比賽，已經諗住無咩機會喇！同學仔第二個朗誦，雖然一開始都有少少緊張，聽到叮一聲之後一陣至有反應開始朗誦，但明顯地覺得佢發音係比Ambrose好！之後落黎嘅十個同Ambrose之後果d參賽者，同之前嘅海洋盃比，真係有唔同，勁d架！

 

Ambrose今次表現其實比上次要好一點，上次表情硬得好緊要，而且可能因為緊張，想要快d朗誦完，佢會講得快d。今次好少少，感覺到佢無咁急，慢左，但佢可能想一氣呵成，無咩換氣，搞到其中一句最尾個字前，突然停左一停要回氣吞口水再繼續，搞笑d囉！仲有就係佢兩次都係唔聽人地叮一聲，就急急開始，可能緊張，好想快d嘔哂首詩出黎，咩都唔理，哈哈！

 

其實Ambrose朗誦完，都已經知道無咩機會攞獎盃的了，等佢之前仲好神氣話要羸個盃返去，對個比賽都好大expectation！爹爹媽咪望吓出面嘅獎牌，似乎都唔係好多咁，諗住可能今次要空手而回！但見Ambrose又好似輕輕鬆鬆咁，以為佢對獎無咩所謂，或者忘記了，但到真係宣佈獎項時，一路都聽唔到人叫佢個名，但好多人已經出左去攞獎，佢就勁問點解佢無份，爹爹媽咪真係唔知點解釋，現實係有可能會咩都無架！

 

好彩，最後終於都叫到Ambrose個名，雖然只係優異獎，大概人人都應該有份，因為優異同良好獎都係頒獎牌，但响呢場比賽入面，以佢表現攞到優異已經算係幸運的了！