星星老師@第八堂(3y11m)

媽咪今日失聲，請左病假，終於都可以湊吓Ambrose返吓呢個畫班。

 

由於今堂係暑假特別班，所以同恆常班有少少唔同，今堂畫油畫，有少少特別！Ambrose放學出黎，就見佢攞住幅小小油畫，上面有兩隻鴨仔，周圍應該係樹木同花啦！同學仔個個都油個天係藍色，雖然有深藍同淺少少嘅藍的分別，但Ambrose又係明顯不同地用左紅色，而河流構圖亦係放射式而唔係其他同學仔嘅橫式，但今次同學仔就有三隻鴨仔，而Ambrose只係有兩隻，哈哈！問Ambrose 鴨仔做咩？佢話佢地傾計喎！問佢點解得兩隻鴨仔，佢就話因為畫左兩隻無位喇，同埋佢地傾計麻！佢嘅答案都幾搞笑，哈哈哈！

 

今日媽咪可以親自接放學，又可以同老師傾吓。老師話Ambrose係個好有自己主見嘅小朋友，佢畫畫會有自己idea，亦大膽用色，老師一般都唔會規限佢點創作，所以佢畫嘅畫，會同其他同學唔同。呢個comment其實亦唔係第一次聽，亦唔係第一個老師咁講，媽咪覺得也是個不錯的評語。但有時自己同Ambrose畫畫，好難調節自己，雖知創作唔應該有框架，但明明覺得果樣野係應該咁畫，用呢隻色，但Ambrose總會有自己意見，唔係咁畫，唔係呢隻色，搞到畫到怪怪地，真係唔知咁樣係好事定壞事，有時候，也總要聽聽人意見吧！

Home Art Jamming @ Color Me Stickers (3y11m)

唔記得幾時買左呢包stickers，見今晚無咩時間，Ambrose 又好想媽咪一齊做手工，剛好摷到呢包stickers，可以俾Ambrose油吓顏色，貼吓貼紙頂住癮先，好彩佢都肯收貨，無叫媽咪搬其他野出黎做手工，哈哈！不過佢都無咩心機油，求其油完就急不及待搵地方貼紙。最後俾佢搵左公文個數字磁石出黎，見無咩裝飾，話要decorate一下喎！

Home Art Jamming @爹爹媽咪 (3y11m)

幫Ambrose執野時見到佢唔知係幾時畫左呢幅爹爹媽咪，問佢點解有兩個太陽，佢話鍾意囉！再問天上其他果d係咩，佢話係星星喎！有無搞錯，有太陽又有星星都有？！

Home Art Jamming @ 人仔及汽球 (3y11m)

幫Ambrose執野時見到佢唔知係幾時畫左呢幅人仔，埋左响堆紙度，唔執都睇唔到！問佢上面果d係咩黎，佢話係balloons囉！

完成品2 @ coloring tee (3y11m)

上次Ambrose油左自己果件Coloring Tee不知幾開心，仲要真係指定著出街添！見佢咁鍾意，所以今晚終於又攞埋件大人Coloring Tee 俾Ambrose油顏色。

 

基本上，因為無特登拉衡固定件衫就油，所以都係難油！可能件Coloring Tee比之前果件大件，又加上難油，Ambrose破天荒叫媽咪幫手一齊油，哈哈！油完都係無咩idea畫咩上去，都係畫番太陽同草，而今次就唔畫雀仔，畫雲啦！本來畫完呢d都可以收工，但因為係大人衫關係，真係比較大件，一攞起又覺得件衫好寡，於是媽咪提議不如畫怪獸大學個單眼仔同毛毛，Ambrose一聽見畫佢地，當然覺得有趣，即時就畫左隻單眼仔出黎！不過就好細隻眼囉，哈哈哈！之後，可能真係好難响衫上畫畫，所以Ambrose唔畫毛毛，叫媽咪畫，於是，媽咪就跟住佢之前畫過嘅一幅毛毛黎畫，係唔多似架喇，嘩哈哈！

創意畫班@第四十堂 - 上堂趣事 (3y11m)

今堂老師同媽咪解釋今堂Ambrose畫咩，開頭媽咪以為佢畫一男一女中國式結婚，哈哈！原來唔係，係跳舞！之後，老師打開畫薄另一頁，話Ambrose頭先未等佢講完，自己手快快畫人仔，竟然畫左一個滿面鬍鬚嘅男人出黎，老師話頂唔住咁嘅樣，要佢再畫番正常人喎！哈哈哈！

 

估唔到Ambrose快到可以畫完一個人，唔得，再畫過幅畫，都仲可以有時間淨，真係太快（亦證明佢係幾咁求其）！

Home Art Jamming @ 怪獸大學(3y11m)

近來，Ambrose都無咩畫作，唔知點解佢少左好多在家畫畫了。係因為開始無興趣？定還是因為太多時間出去上興趣班，所以留在家嘅時間，都用哂黎玩呢？

 

今日朋友仔黎左同Ambrose玩， 真係好開心！好罕有地兩個男仔一齊玩，唔使媽咪叫住喝住佢唔准呢樣唔好果樣，媽咪好罕有地舒舒服服地响一邊睇住就得，實在太好！

 

返左屋企玩，Ambrose突然畫起畫上來，真係估佢唔到！今次佢畫左怪獸大學嘅毛毛同單眼仔，唔知點解佢會識畫喎！不過幅畫佢畫畫吓又走去剪左一部份出黎，話係車喎，所以幅畫未影相就剪爛左喇！

創意畫班@第四十堂(3y11m)

今堂Ambrose畫人仔跳舞，佢竟然話佢地跳緊拉丁舞，問佢老師有無俾圖佢參考吓點畫，同埋咩野叫拉丁舞，佢話無圖睇，但佢知拉丁舞，因為佢見過人跳喎，都唔知係真唔係！

 

真心覺得近來Ambrose畫畫真係麻麻地，無咩驚喜咁，成日都係畫差唔多嘅野，技巧上亦都唔覺有進步。好似呢幅畫嘅人，求其到不得了，真係唔知佢係開始無咩興趣畫畫？定係媽咪對佢要求高！總係覺得呢d程度嘅畫，好似好幾個月前都係咁樣，唉！係佢對自己要求太低，樣樣都求其是但就算？定係媽咪要求高？又或係未遇到良師可以啟發佢更多呢？

Ambrose的第一部相機 (3y11m)

因為媽咪寫blog的原故，所以時常都會用手機影相。可能Ambrose見得多，加上開始長大，每次媽咪影相，佢都要影埋一份！由於爹爹媽咪唔會俾Ambrose玩電話，以免佢沉迷，所以Ambrose要影相，每次都要得媽咪批准，借部電話俾佢，影完即還！

 

爹爹近日諗起之前有部digital camera擺左响度無用，於是摷左出黎，送俾Ambrose，等佢平時想影相時就自己攞出黎影相。呢部相機，其實都係當初媽咪用黎影blog相，不過隨住手機嘅像數提高左，又方便好多，所以部digital camera就被淘汰了。估唔到，竟然可以攞番出黎俾Ambrose用，真係太好！

 

Ambrose收到部相機，非常開心同興奮。其中一個原因，可能係部相機係紅色，佢覺得好型啦！其二，部相機開關好容易，一教佢就識，基本上，佢真係可以一想影相就攞起部相機影，同之前下下要問媽咪攞手機影，自主度大咁多，梗係開心啦！

滿口牙膏 (3y11m)

平時無咩機會睇電視嘅Ambrose，今晚爹爹俾佢睇一陣輕鬆吓！叫左佢去刷牙，咁就可以睇到攰，直接要佢去瞓覺，費時叫停唔睇仲要叫去刷牙同入房！趁住賣廣告時間就叫 Ambrose去刷牙，佢刷完牙出返黎坐响沙發繼續睇電視，媽咪不以為意。過左一陣，媽咪望吓Ambrose對眼會唔會好攰好眼瞓，竟然見到佢成口都係牙膏無抺到！肯定佢太心急要趕出黎睇電視，求其刷完衝返出黎，個口咁多牙膏都可以無感覺，都唔知好嬲都好笑！

完成品 1 @ Coloring Tee (3y11m)

今晚終於攞左件Coloring Tee 俾Ambrose油顏色。不過原來响衫上油顏色真係好難，件衫有彈性，就咁油係會啜住同會皺哂油得唔順。用佢附送嘅Fabric Markers，Ambrose要逐下油落去，唔可以翻手油！媽咪另外買左盒Fabric Crayons，說明書有教用別針拉衡件衫固定左至油，不過無啦啦都無材料用作固定，所以都係就咁油，由媽咪人手同佢拉衡囉！

 

好辛苦至油完d公仔，媽咪問Ambrose有無野想加上去，佢第一時間就話太陽！而呢個太陽，就係今日上畫班畫紅鶴果個太陽，畫左紅色圓形後，就用黃色圍住畫一圈，其實唔知點解要咁畫，不過想話，用畫筆咁畫就快手，响衫上畫，似乎畫傳統有一條條線射出黎嘅太陽會易d囉！另外，就係畫左d草，Ambrose用哂唔同嘅綠色畫草，咁樣畫較有層次嘅，都係多得星星老師教佢咁畫啦，未上佢堂前佢都唔識咁用架！最後，佢話要畫雀仔，不過响衫上畫真係好難，佢畫左一pat野出黎，最後都係要由媽咪同佢修正番，都唔多似，不過真係好難搞，算罷啦！

 

油完Fabric Crayons後，要用燙斗隔紙燙吓先至會無咁易甩色，Ambrose無得親手燙，但佢就好緊張咁攞埋櫈仔响媽咪隔離問呢樣問果樣，仲要中途急vivi要行開，佢好肉緊咁同媽咪講：「你要等埋我架」！哈哈哈！

星星老師@第七堂(3y11m)

今堂Ambrose遲大到，原來一小時嘅堂，佢遲左20分鐘！無法啦，而家放緊暑假，要專程由家中出發去上堂，又係嫲嫲湊去，好難預搭車時間，嫲嫲又唔會見唔對路轉搭的士嘅！原本都唔知道Ambrose遲到，係老師whatsapp媽咪通知，嚇到媽咪以為佢地有咩意外！

 

嫲嫲話Ambrose似乎對於遲到有點不高興，好彩Ambrose一向畫畫好快，成日都好快手畫完同老師講，講到老師都嫌佢煩，哈哈！所以，雖然遲左咁多，都一樣完成到幅畫！今日畫嘅紅鶴，同學仔都係畫兩隻，Ambrose就畫左三隻！問佢點解有三隻，佢話因為中間仲有位丫麻，咪畫多隻囉！佢話一隻係爹爹，一隻係媽咪，一隻係佢喎！仲記得有一次畫人仔食雪糕，佢都只係畫左爹爹同媽咪，媽咪曾經話，點解無左Ambrose嘅？如果下次記得畫埋自己就perfect喇！唔知Ambrose係咪仲記得呢段對話，所以今次見仲有位，就自己要畫多隻呢？！

 

欣賞Ambrose的紅鶴，有一隻嘅其中一隻腳提起左，真係好似平時同佢睇書時見到嘅鶴咁樣呀，唔知係佢自己識得咁畫，定係老師嘅提點呢？

Melty Beads@蜜蜂及綿羊(3y11m)

自六月做過Melty Beads 手工，Ambrose突然記起又話要整。不過由於上次一口氣整左幾個公仔，今次要睇吓仲有咩顏色嘅 Melty Beads至可決定做咩公仔，所以整左蜜蜂同綿羊。

 

媽咪燙緊蜜蜂時，Ambrose就問點解蜜蜂無翅膀嘅？媽咪不以為意，就話可能蜜蜂收埋左啦，咁有時畫公仔都唔一定畫蜜蜂飛緊同一定要有翅膀云云。點知轉頭望吓本書，本身人地係有翅膀，係Ambrose自己睇唔到無砌落去！仲問點解？！

 

呢張相係Ambrose自己影嘅！

 

邂逅海賊戰隊 (3y11m)

無意中知道荷李活廣場有海賊戰隊佈景影相，爹爹即時check展覽時間，發現展期至7月21日，而前一日展覽仲有表演睇，可惜爹爹要返工同唔到 Ambrose去，唯有安排至最後一天同Ambrose去！

 

事前已知道要消費$100可同海賊戰隊影相，爹爹媽咪心想也不難吧！去到會場，發現原來有幾個不同的小攤檔遊戲，均需要遊戲卷才可玩。問左職員，原來遊戲卷一本$95，連埋一本passport用作在場內收集印章。爹爹媽咪都覺得$95呢個價錢好蠱惑，買一本又未夠消費同海賊戰隊影相，即又要再加錢購物。再者，一本passport加遊戲卷要$95又有點貴得過份，於是當下決定唔買，直接買戰隊玩具還化算！

 

本來，之前買左海賊合體，爹爹一心下一個target係隻獅子，而响會場又有所有玩具display出來，試過手感覺得不錯，亦都幾好玩，爹爹一心鎖定買佢架喇！ Ambrose聽見有得買玩具，就梗係咩都好啦！點知去到counter準備買嘅時候，突然Ambrose轉軑話唔要！點解？知唔係佢見到銀戰士嘅豪快長茅囉！佢一見到枝長茅就話要買！其實Ambrose已經有太多武器玩具，槍槍劍劍一大堆，爹爹媽咪想淡化佢對武器玩具嘅興趣，所以盡量引導佢多玩機械人，所以之前至會買海賊合體，點知呢個Ambrose一攞到permit買玩具就即時變陣，呢方面就咁醒！

 

就响爹爹同Ambrose爭拗緊買獅子定長茅嘅時候，媽咪發覺原來要同海賊戰隊影相係有Quota，只有50張籌，仲要5分鐘後憑票排隊換籌！於是，媽咪好決斷同爹爹講，佢要長茅就買長茅啦！Ambrose今次真係發大達呀！上星期至買左機械人，今星期又買埋長茅！

 

換完籌至發覺七點鐘又有個見面會，海賊戰隊會出來在台前同大家見見面，所以爹爹同Ambrose又死守台前最佳位置，等左半個鐘等班海賊戰隊出黎近距離欣賞！其實，真係覺得好好笑，爹爹媽咪細個時都無迷偶像，無去過追星！今日咁樣排黎排去，望穿秋水就係為左等班海賊戰隊出黎，同佢影相，真係又無聊又搞笑！估唔到Ambrose咁細個識去追星，哈哈哈！

 

最好笑係當司儀問台前嘅小朋友最鍾意邊個戰士時，一個咪遞到Ambrose前，之前人人都以短答答咩色戰士，但Ambrose竟然以長答答：「我鍾意。。。。。我鍾意。。。。。金戰士」！勇氣可嘉！但司儀O哂咀，因為根本就無「金戰士」，而爹爹媽咪相信Ambrose意思係指「銀戰士」！真係笑死人！

 

最後海賊戰隊同蒙面超人齊齊出黎，講左幾句就走左。再之後我地就好似追星咁，又要憑影相卷行出去會場外圍，又再排隊等影相。呢一張相，真係趕到無朋友，幾乎一行埋去，工作人員就已經叫下一個埋去影！！！

創意畫班@第三十九堂(3y11m)

今堂老師話畫斑馬，因為Ambrose畫得太快，第一隻斑馬嘅紋畫錯左，畫左格仔。以Ambrose嘅個性，佢唔係唔知斑馬紋係橫紋，而應該又係佢一句“鍾意”，所以又自己創作啦！老師話第二隻教左佢畫橫紋，所以正常返！老師話Ambrose又話要加隻獅子，搞到幅畫好迫！更甚者，Ambrose竟然要求老師教佢畫毛毛，哈哈！之前Ambrose在家已經講話想畫毛毛，但唔識畫，爹爹媽咪就叫佢請教老師，估唔到佢真係肯開口問喎！不過，可能幅畫實在太多野喇，毛毛係畫完剪左出黎再貼上幅畫度嘅！

亞軍@第六屆香港青少年及幼兒藝術節舞蹈比賽 – 芭蕾舞群舞 (3y8m)

五月份，Ambrose參加共三個舞蹈比賽，今日又收到其中一個比賽嘅證書， 呢張證書，係除繪畫比賽證書以外，有史以來質素最高嘅一張！早知張證書咁靚，當初就申請做埋個獎盃啦，唔係次次Ambrose有得睇個盃又無得攞返屋企，仲要次次都係隔好耐至有張證書攞返黎，有時佢失落到問爹爹媽咪點解人地唔俾個盃俾佢！

洛洛和小熊@2013書展收獲

尋日爹爹同Ambrose去書展，今日輪到媽咪去，收工自己一個人行，行左四個半鐘，其實都唔多夠時間行，只係可以好趕咁行一個圈。

 

一如往年，媽咪並唔打算大量掃書，始終平日都買落唔少，都係擺多。Workbook多到過哂年齡都未做，基本上唔會再買。繪本、故事書，平日都係見到內容啱，針對性咁買，再唔係，其實都係去圖書館借多，以免家中積存大量圖書！媽咪行書展，都係旨在睇吓、了解吓有咩新出教材教具！

 

今日第一樣收獲，估唔到係本繪本，木棉樹出版的！媽咪睇過內容，真的不錯，係講責任心，同埋可以講解埋己所不欲，勿施於人。折左只係$26，好抵呀！

Crayola產品@2013書展收獲

幾乎係行到最後先至見到藝林，呢度不嬲賣Crayola產品平過反斗城吉之島，書展仲有八折添，所以如果唔急用，都係等書展入貨最抵！

 

其實Ambrose 嘅文具櫃已經放滿哂不同種類嘅顏色，都真係無咩可以再添喇，不過見咁抵，一場黎到，無理由唔買d返去作存貨架！

 

之前買過Crayola嘅Model Magic Presto Dots系列，一直都唔捨得開黎俾Ambrose玩，原因之一係覺得太早俾佢玩，整到成pat野就會好浪費，二來因為姑仔盛讚Crayola嘅黏土，話唔痴手好乾淨，好好用，所以媽咪一心諗住遲d先俾Ambrose玩。同時，曾經搵過Crayola細包黏土俾Ambrose平時做手工玩吓，但又無得賣，只有大大包，所以轉用左其他牌子黏土。今日竟然見到藝林有賣盒裝細包裝assorted color嘅黏土，勁開心，不由分說攞左盒！

 

之間見到一pack粗幼不同嘅markers連doodle pad，用個橙紫色嘅拉鏈袋入起哂，最啱攞出街俾Ambrose畫畫。

 

無咩好買，再執左一pack粗身markers。早排Ambrose油到無哂墨，最終同佢轉左幼身markers，但發覺原來幼身markers個筆蓋好難開，Ambrose成日都叫人幫佢開，真係好麻煩，又或者佢自己勉強好辛苦至開到，所以諗吓不如都係買番粗markers取代返佢而家嘅幼markers先啦，等佢再大d至放番幼身markers出來好了！

 

埋單三樣野折左都只係$236，仲送左一枝大大枝嘅漿糊筆，yeah！

Alpha Tales@2013書展收獲

見到有Set字母書名叫AlphaTales，一set有二十六本，每本係一個英文字母嘅故事，即刻諗起幾啱Ambrose。講故事之餘，又可以順便認埋小楷字母。有埋Teacher Guide，特價左都係$450，抵！雖然一向都唔打算要買書，但媽咪最後都托左呢set書回家，哈哈！

熱溶槍@2013書展收獲

經過美芯，見到有熱溶槍賣，$60都幾貴，之前好似响淘寶見過吓唔使咁貴，但淘寶又驚插頭唔同危險，而平時又唔覺香港响邊度可以買到，所以$60都買左先，第日要做手工隨時都有得用麻！

教壞細路@國內童書 (3y10m)

爹爹同Ambrose 去行書展，無咩野買到，只係買左一幅Puzzle，幾本童書。爹爹話，見$5一本，有經典嘅童話故事，所以睇都無睇過就買左六本。上左車先至攞出黎望吓，發覺中伏！

 

唔係話歧視國內嘅野，但係媽咪睇左一本狼和六隻山羊嘅故事，內容同小紅帽差不多，唔計全部簡體字問題，入面嘅內容真係好可以反映國內文化以及人民嘅本質！首先，一本小朋友嘅童書，相信大家會expect啱小朋友睇，有童真嘅，但呢本書，講到隻狼食完d山羊後坐左响樹下休息，佢竟然食緊煙，地上仲畫有煙盒同火機，有無搞錯呀！呢本唔係漫畫書囉！仲有當山羊媽媽回來發現山羊們被吃，外出尋子，當佢見到狼正在瞓覺，山羊媽媽竟然拿著較剪準備剪開狼個肚！雖然一直以來個故事都係咁，但呢本書又畫到山羊媽媽面目憎獰，究竟有無諗過讀者嘅感受架？！之後就係山羊媽媽剪開狼肚放入石頭，到狼醒來後到河邊飲水，失足跌落河，及因滿肚石頭而浸死，本書竟然寫到話山羊媽媽及山羊們見到狼死了高興得又唱又叫話狼死了，真係未見過童書咁寫實囉！死左咪死左囉，使唔使又唱又叫咁開心呀！

 

另外一本提到話有個壞魔女專登拌跌小女孩，個小女孩生氣極了，竟然一桶水潑去壞魔女身上。真係唔識形容，呢個情節，簡直係教壞細路！！！

 

 

 

第一次去書展 (3y10m)

學生時代，媽咪年年都會去書展。畢業做野之後，已經好少去了。到有了Ambrose後，又年年都去，只是而家去一定只去兒童館，成人果邊，真係無時間行！

 

年年書展，爹爹媽咪都會放低Ambrose自己去，咁樣至行到買到野！原本仲諗住Ambrose到五、六歲至會同佢一齊去，點知今年爹爹單拖自己同Ambrose出左去行。預估Ambrose可能只係行到一、兩個鐘，爹爹計劃去完書展再去尖沙咀行吓。點知Ambrose竟然一行就五、六個鐘，唔係因為要返屋企食飯，真係叫極都唔願走，結果尖沙咀之行當然要取消啦！

 

Ambrose字都唔識多個，去書展，有咩睇？原來書展入面都有不同玩具教具，Ambrose樣樣玩吓，不知幾開心！仲有去到不同檔攤都有故事時間，佢見到大會有名人講故事，竟然又話要排，一排就半個鐘，唔怪知得，行左五、六個鐘都未行哂，仲意猶未盡啦！

 

下年，應該可以安排一日時間同Ambrose去行書展喇，哈哈！

金獎@全港標準舞及拉丁舞公開系列賽 1 (3y8m)

五月份，Ambrose參加左個跳舞比賽，由於跳完就走，之後從同學間得知隻舞攞左第三名，又有聽說有小朋友話老師話係第一名，一直都無深究其實係攞咩獎，反正即使有獎，亦因為係群舞嘅關係，獎盃只屬於學校而非個人，到最後都只是一張證書而已，所以，得第幾名也似乎感受不大。

 

今日學校派發證書，證書到手，才知道，原來隻舞得金獎！不過真係唔多明白，點解一張證書，成隊人名落哂去咁奇怪，已經寫住團體舞架啦，點解唔可以做好少少整番個別名字嘅證書喎！

泳鏡 (3y10m)

上年已經幫Ambrose買左一副泳鏡游水用，不過由於係玩水多，所以都係攞多過用。今年Ambrose開始學游水，本來都無諗住再買過新泳鏡俾佢，但經過六月嘅一輪眼敏感同埋疑似紅眼症，再加上見Ambrose上堂要將頭浸入水裡面，爹爹媽咪都係覺得，泳鏡係必要嘅而且非常重要！有見Ambrose戴緊果副成日都會吸到對眼大細左，佢有時投訴戴左睇唔清野所以唔肯戴，唔多唔少，一係因為副鏡嘅防霧已經無咁好，二來吸到對眼大細左睇野又點會清丫，所以爹爹媽咪決心同Ambrose買過副好d嘅！

 

不過周圍搵過都無咩泳鏡係大副d，搵到心水嘅大細，次次都話係大人用架喎！無意間同朋友講開泳鏡問題，朋友就介紹左一款泳鏡又大副，又一塊過唔會吸到大細眼，而且吸住面嘅邊幾濶，可以好似布咁貼住塊面，而唔似平時嘅泳鏡咁＂質＂住塊面。朋友手上無相，爹爹媽咪憑著佢嘅描述，去左Sogo搵過唔見，不知幾失望。

 

點知，尋日無啦啦行去吉之島，竟然見到一副好似朋友所講嘅兒童泳鏡，簡直係符合哂爹爹媽咪對泳鏡嘅要求，唔肯定係咪朋友所介紹果副，但呢副已經係我地心水喇，所以即時買左！

 

返到去俾Ambrose睇，佢簡直就係一見鍾情，唔係因為佢戴得舒服，而係佢覺得副鏡好型，又好似海賊戰隊咁，即時又黎幾聲＂豪快變身＂，真係俾佢笑死！夜晚仲要攞住副泳鏡瞓覺，真係好搞笑！

幼稚園畢業禮表演 (3y10m)

今年Ambrose有幸被老師揀選响畢業禮表演跳舞，一班三十人，揀五男五女。老實講，雖然Ambrose已非第一次表演，但這是Ambrose第一次被揀選為學校表演，媽咪自然有一點點緊張及壓力。

 

自從知道要表演，總覺得事情未必咁順利，就好似以前去親廸士尼、去旅行咁，一早講左出黎，都會臨出發至發燒，真係唔明點解次次都係咁，所以爹爹媽咪盡量低調，唔提唔講，但其實媽咪個心不知幾咁擔心，唔知到時會唔會有咩亂子。

 

日子越近，班中就開始有好多同學仔病左，有手足口、發燒、痾嘔等，個個都病幾日至一星期不等。擔心，但又唔可以做d咩野！唯有希望Ambrose嘅抵抗力可以頂到吓！無驚無險過左最後一星期，Ambrose無染病，以為可以順利過度，點知又發生電梯夾腳事件，疑似拋柴左兩日，果兩日真係忐忑得好緊要。表演咁難得，爹爹媽咪請哂假，去唔到都會好失望，但如果真係腳傷，都無辦法。但因為跳舞有partner嘅關係，媽咪一直都擔心，如果真係跳唔到，咁個partner點算好呢？呢個至係最大問題！

 

好彩，最後都無事！Ambrose今日可以如期表演！

 

一早送左佢返學校綵排，擺低佢之後就直接去元朗食早餐，跟住就排隊等入場！以上年經驗，上年係排隊先入先搵位，但原來今年學校將唔同團體分左顏色飛，表演、畢業、領獎同觀禮嘅家長分唔同zone坐，早知唔使咁早排啦！

 

終於等到跳舞表演，由於老師同小朋友set哂頭化哂裝，加上媽咪又攞住攝錄機，一開始都見唔到Ambrose，不過好快媽咪已經locate到佢喇！見佢一臉認真咁跳，真係唧都唔笑個款，其實幾搞笑！唔知係咪學校日日都有練舞嘅關係，見到佢地跳得都好齊吓，反而比起自己出面嘅跳舞學校嘅表演比賽，感覺今次Ambrose跳得算幾好，雖然佢有時都要望住人跳，但起碼都無咩蝦碌野發生！

 

畢業禮完畢，一家三口跟左學校去Panda Hotel食buffet，但原來無同學仔去。開頭都仲擔心會悶，因為全部都係畢業學生及家長，但氣氛都幾好，老師叫畢業生再在台上表演，Ambrose好鍾意睇。見到d小朋友表演，媽咪就覺得時間過得真係好快，兩年後，將會輪到Ambrose了，個心真係好唔捨得佢咁快大！

 

疑似拗柴 (3y10m)

早兩日Ambrose俾電梯夾完，行路有時都唔多順咁，又唔係幾跑到，但見無明顯傷，無紅無腫，諗住佢可能扯到d筋，所以都無同佢睇醫生。如是者過左兩日，開始見佢好似無咩野咁，問佢仲痛唔痛，佢又話唔痛，於是又俾佢返學綵排同埋照常返跳舞班。

 

其實都唔知佢係咪真係無事，不過見佢又跳到，如果真係有問題，照道理應該會痛會叫架麻！今次嘅電梯意外真係好奇怪，發生時，爹爹媽咪完全睇唔到過程，周圍又無人。發生後又唔見表面傷痕，疑似拗柴左兩日，又好神奇地忽然無事。真係不幸之中嘅大幸！

創意畫班@第三十八堂(3y10m)

好搞笑，幅畫係畫買西瓜，Ambrose一定愛吃西瓜上哂腦，連畫畫都要畫買西瓜，哈哈！問佢右手邊黑色框框白色底果舊係咩黎，佢話係寫住價錢果塊野喎（即係價錢牌啦），點解會响個人隔離咁搞笑？！仲有就係，點解個人嘅牙齒咁參差，咁肉酸架？！

電梯意外 (3y10m)

影完怪獸大學，買埋海賊合體，走左過去皇室堡搵野食。見到地牢有元氣壽司，咪諗住趁早應該無咩人等位就食左先，費時行黎行去搵喇！就响搭自動電梯落地牢時，Ambrose在未到地面時就無啦啦彎身叫痛繼而暴喊！爹爹於是立即抱佢埋一邊睇吓咩事，Ambrose指住左腳話好痛，爹爹即時提起佢隻左腳睇，只見Ambrose對新波鞋，左腳腳側成行黑色機油，腳踭位仲有少少刮開爛左，見到咁樣真係嚇一嚇，好明顯佢隻腳係俾電梯夾過！即時同Ambrose除鞋除襪睇吓隻腳，可能佢對腳一向都肥厚，爹爹媽咪睇左好耐都唔覺佢有紅有腫，但Ambrose一向跌到整親都好少嚎哭收唔到聲，今次佢就真係收唔到聲咁濟，爹爹媽咪總覺得佢真係好痛！但望黎望去，都唔覺得佢隻腳有傷。

 

氹左一陣，又同Ambrose搓過腳仔，見無咩特別野，又同佢著番鞋，諗住行去前少少食野。只見Ambrose一行就有少少就住就住咁，行多幾步佢又再想喊過，似乎今次真係整親。爹爹話覺得Ambrose似拗柴喎！

 

真係諗唔明究竟點解會咁，明明Ambrose企定定，都無行黎行去，點解會俾電梯夾到？係佢自己拗隻腳埋去？定係新鞋問題？如果今日咁啱著左涼鞋，咁隻腳真係難以想像會變成點，諗起都心寒！問Ambrose發生咩事，佢又唔係幾講到，只係知佢夾到之後佢自己用力抆番隻腳出黎！

 

見到Ambrose行到怪怪地同埋跑唔到，又心痛，又心煩！因為正正下星期二係學校畢業禮，Ambrose當日要負責表演跳舞，呢次跳舞表演並唔係人人都有份，一班三十人只係揀十個去，Ambrose有幸被揀選去，爹爹媽咪一早已攞定假去睇！雖然今次唔係Ambrose第一次表演，但學校表演則是第一次，好難得！如今整到腳，都唔知表演點算？！

 

見Ambrose腳未有紅腫，又唔係行唔到，只係不停問佢痛唔痛，佢就話痛，好難確定係真痛定係心理作用，所以無即時同佢睇醫生，諗住瞓一晚，睇吓第二日起身會唔會腫先至決定點處理。夜晚瞓覺時同佢搽左喜療妥，希望佢瞓醒無事啦！

怪獸大學 (3y10m)

呢期怪獸大學鬧得熱哄哄，爹爹知道銅鑼灣有毛毛影，決定要帶Ambrose出去睇！上完興趣班食埋lunch就直接搭車出去喇！

 

好耐都無咁樣湊熱鬧喇，唔係有Ambrose，都應該好難令媽咪大熱天時無冷氣响街度人迫人，又要排長龍，就係為左同d公仔影相！不過，其實Ambrose都唔係咁恨影，係咁叫佢影都反應一般，好可能，只係爹爹媽咪一箱情願囉！

 

好辛苦排完同毛毛影相，好彩Ambrose無話要影埋大眼仔，烈日高溫之下，爹爹媽咪都願意即時放棄，行入商場嘆吓冷氣回一回氣至得！點知，原來時代廣場入面都有得影相，雖然人龍更長，但嘆住冷氣排又另一回事！

 

由於响樓下折騰左好耐，Ambrose又唔係咁特別鍾意影相，加上爹爹一早應承左佢去買機械人，佢好心急要去買，於是，爹爹媽咪都樂意唔再排隊影相，行街街去！

海賊合體 (3y10m)

影完怪獸大學就同Ambrose去買海賊戰隊個合體機械人喇！其實都唔知係爹爹想買定係Ambrose想買？！Anyway，買呢個機械人唔係無啦啦話買就買嘅，係同Ambrose講，爹爹媽咪要儲好耐錢至可以買俾佢，而佢亦要戒掉成日扮惡樣嘅習慣，見佢有進步，爹爹先決定買俾佢咋！

 

後記：個合體機械人竟然玩左一日都無就有一part合唔埋，最終要攞番去換，媽咪諗，呢個機械人咁化學，唔知可以玩到幾耐呢？！

星星老師@第六堂(3y10m)

好得意，Ambrose畫到d企鵝好似跳緊舞，又有d似飄浮咁！其中上排有一隻小企鵝無畫紅色腳仔，媽咪問Ambrose係咪畫漏左，佢話，唔係呀，佢對腳收埋左去後面咋！都唔知係咪真嘅，定响度死撐，哈哈！

新波鞋(3y10m)

覆完診，爹爹同Ambrose去左買波鞋，皆因爹爹見Ambrose有時都會同佢落樓下踢波，話想買對波boot俾佢著黎去踢波喎！原本爹爹揀左對迷彩嘅以為Ambrose會鍾意，可以扮士兵，點知見到呢對紅卜卜嘅，Ambrose係都要呢對喎！

 

原因，好簡單！Ambrose果日著左紅衫紅褲，佢買埋對紅鞋，以為自己係Iron Man囉！真係頂佢唔住呀！

疑似紅眼症 – 覆診(3y10m)

明明約左星期二覆診，點知星期一姑娘打黎問係咪唔記得左，真係激死！擺明佢地mark錯啦，咁都算喇，再約過囉！Ambrose要返學，自然就要約下午時間架啦，日日都話無，又話醫生不嬲都係睇上午，真係唔知囉，媽咪平時自己睇都係下午多架喎！之後先至話醫生返埋星期四放假，呢幾日都係睇上午喎，仲要約上午嘅時間又唔係個個時間都得，真係麻鬼煩！其實Ambrose滴完藥水一日就已經無野，不過因為醫生話要返去覆診，媽咪又諗住d藥水係類固醇，所以唔覆診又擔心，點都要去，又唔可能等到下個月醫生放假返黎至覆架！

 

結果，咪唯有學校果邊請假去覆診囉！

 

醫生放假前夕，真係好多人去睇！真係辛苦哂爹爹同Ambrose，辛苦搭車出去再要呆坐等睇醫生！

 

同醫生講Ambrose無跟足佢指示滴足七日藥水，因為頭一日已經好返喇！點知醫生話，係呀，好多人都係咁架，都可以唔滴足喎！聽到都嬲嬲地啦，咁如果一早同我地講，話退紅就唔使滴，咁就唔使搞到我地個心咁不安啦！滴又驚唔滴又驚架麻，佢就咁輕描淡寫！

 

今次應該主要都係度番眼壓正唔正常，因為類固醇眼藥水嘅副作用係怕眼壓升。上次睇時有同Ambrose用機驗過，係勁難capture佢對眼，但爹爹話今次Ambrose好勁，定到d風吹佢隻眼都無縮過，好快搞掂！仲要姑娘都忍唔住讚佢，要請糖佢食呀！哈哈！

創意畫班@第三十七堂(3y10m)

今堂Ambrose畫人仔！其實想話，呢幅畫真係好一般，個人仔，基本上係典型 Ambrose會畫嘅人仔，手肥腳肥。天上嘅係星星，都係Ambrose平時都會畫嘅，地下果d綠色黏土，圓形一粒粒，都唔知咩黎，哈哈！

 

最近總係覺得畫班作品無咩驚喜咁，畫出黎嘅，感覺上Ambrose自己在家畫都係咁上下咁。而且，唔知點解，好似成日都係畫人仔咁，有d悶！當然，Ambrose自己唔會覺得啦，佢都仍然好enjoy上畫班，只係媽咪覺得，Ambrose响畫畫方面，無咩突破咁，而且，佢响屋企畫畫嘅頻率少左，畫嘅野仲要無之前咁靚喇！

Homework Time @ Fun with Shape and Size (3y10m)

忘記了哪日和Ambrose做了自己嘅workbook，呢本似乎都係淺左少少，但都勉強仲啱做！都係不外乎找不同或相同，但估唔到係當要Ambrose搵番兩個圖形一樣嘅連埋，原來幾難！佢竟然會將出面三角形入面正方形嘅圖形連左去第二個圖形度，又或好難都搵唔到一樣嘅出黎！但做positional words同repeating pattern，媽咪讀出題目俾佢聽，估唔到佢又知做咩，唔使額外提示喎！

疑似紅眼症(3y10m)

自從覺得Ambrose成日捽眼，六月頭忍唔住同佢去睇眼科，得出結論係佢眼睛比較易敏感，所以成日痕，痕就成日捽。本來醫生俾左抗敏藥水Ambrose滴，真係幾好，通常滴一次已經成日唔見佢捽眼，但Ambrose可能已經唔怕滴眼藥水，三日唔埋兩日佢都話眼痕，要滴藥水喎，爹爹又驚滴得多無效兼習慣左，所以當Ambrose嘈住要滴眼藥水時又話唔俾佢滴！唔知點解未睇醫生前又唔覺得佢痕得密，只係見佢一捽就起勢捽至同佢睇醫生，反而睇完醫生就成日叫痕！

 

諗吓當中最大可能係因為泳池水，因為感覺上都係當Ambrose游完水就特別會話痕，同埋加上夏天到，成日有機會游水，所以至會覺得近期痕多左咁！

 

星期日至同Ambrose去游水，尋日爹爹帶Ambrose趕返學時，見到Ambrose嘅人都問仲咩Ambrose隻眼有d紅？爹爹先至見到，以為佢咁啱又捽過黎，所以不以為意！到接Ambrose放學時先至大吃一驚，Ambrose隻眼比早上紅，而且眼皮部份有點腫！望落唔似敏感咁簡單，媽咪覺得Ambrose隻眼可能發炎，又或者紅眼症。於是媽咪周圍打去有咩眼科醫生可以去睇，好彩上次睇開果個可以俾Ambrose上去，即叫爹爹同Ambrose出去睇！

 

據爹爹透露，醫生一見Ambrose就話佢紅眼症，即時開左有類固醇嘅眼藥水俾Ambrose，聽到類固醇呢個名都幾驚，但醫生又俾多左眼藥水俾Ambrose解返類固醇嘅副作用，醫生話好安全喎！寫埋病假，要一星期後返去覆診！

 

原本媽咪仲諗住Ambrose要成個幾兩星期至可以好番，因為記得中學時有個同學仔又係紅眼症，佢都紅左好耐先好番，所以concept紅眼症係要好耐至好！但，Ambrose睇完醫生已經係下午六時，滴左兩次藥水，瞓醒覺之後，隻眼又無事喇喎！好神奇！搞到爹爹想話唔再滴藥水，話都好返左喎！但媽咪聽見係類固醇，梗係唔敢唔聽醫生講啦！

 

上網睇吓資料，紅眼症又叫結膜炎，可以分三類：細菌性、病毒性及敏感性，媽咪覺得，一係個醫生求其，一見隻眼紅就話紅眼症；一係Ambrose只係敏感性結膜炎，因為佢無咩眼分泌，唔似前兩者囉！

 

Anyway，Ambrose最終都係放左一日病假，又如常返學，又無咩捽眼，所以真係唔知佢隻眼搞咩？另一個比較無醫學根據嘅說法，就係因為早一晚Ambrose一口氣食左好多粒荔枝，所以熱氣谷上眼，至會第二朝眼紅腫。真係唔知真定假喇？！

Home Art Jamming @ 油顏色(3y10m)

收到Book Club本My Cool Coloring Backpack，原本諗住收埋先，等家中存貨用完至攞出黎，點知呢個Ambrose一放學回家就已經摷哂d書出黎，見到呢本My Cool Coloring Backpack有貼紙又有得油顏色，自己走左去油喇！ 最慘係佢用左水筆油，佢又唔會就住力輕手油，d紙又唔係畫紙咁厚，咪搞到d顏色過哂底囉，一過仲過左幾頁，真係浪費哂喇！

 

見佢油隻獅子時，又加多左幾筆畫獅子嘅頭髮，幾搞笑！

Scholastic Book Club – 2013年5月份訂書 (3y10m)

今期book club訂書，訂左四本，得三本有貨。

 

其中有Curious George Saves His Pennies，平時Curious George會有特價書，$11一本，但今次無特價，媽咪都照買，主要原因係想培養Ambrose對錢嘅概念啦！其實平時爹爹媽咪已經成日同 Ambrose講，返工先至會有錢，有錢至可以買玩具、買野食。但呢個Ambrose真係好醒，每次返左工到放假時，佢想買玩具都會話我地返左工，有少少錢可以買啦，所以爹爹媽咪又要灌輸佢有錢係唔一定要用左佢，可以延遲欲望，儲多d錢買d貴嘅野，如果下下都買左野，儲唔到錢，又或儲慢左，就好耐至買到一d貴嘅野或甚至乎無錢買！所以見到呢本書時，就覺得好啱攞黎教Ambrose！

  

另一本係Clifford’s系列嘅Graduation Day，主要因為Ambrose對Clifford’s系列嘅書都ok鍾意，見呢本係講畢業，媽咪諗住買定都唔錯，就算佢未畢業，都可以話到佢知畢業係咩一回事麻！

最後一本係My Cool Coloring Backpack，呢本係一本貼紙填色書，見Ambrose得閒無事都鍾意自己坐响度填吓色，雖然家中有幾本存貨，但呢本只係$44就厚厚一本，所以買多本看門口！

Snakes and Ladders @ Pavilion (3y10m)

又見到反斗城有清貨玩具，不過唔係特別平，又唔多款式！之前試過幾次同Ambrose玩飛行棋，可能又多顏色又要跳棋同炸棋，佢都好似亂亂地，更會玩玩吓話唔玩，媽咪見到有呢盒Snakes and Ladders，似乎比較簡單，只有向上同向下，應該易明d掛！見有成100格，又可以玩時同佢數吓數字，都幾好咁！平得唔係好多，原價$69.9，特價$40，其實呢d遊戲只有底板同幾粒棋一粒dice，$40都嫌貴咁！但見底板係厚硬咭紙，唔係一張輕飄飄易走位嘅紙，看似都會耐玩少少，摺起上來都好細唔阻地方，$40就$40啦！

Coloring Tee @ Bossini

唔執野都唔記得，入季時同朋友一齊online訂左兩件coloring tee，諗住同Ambrose親子裝，而家都七月喇，仲未攞出黎玩，完全唔記得左！

 

件tee其實好正，啱哂鍾意art and craft嘅Ambrose。件衫只有公仔嘅框線，隨衫附送一包Fabric Markers可供自行上色，真係一個幾好嘅親子活動！唔同平時做嘅手工set，呢兩件衫可以著番，雖然朋友話驚油得唔靚唔敢著出街，哈哈，不過當家居服都無咩所謂啦！仲要價錢好抵！只係略嫌公仔線條看來有少少複雜，要油靚靚真係唔係咁易咁！