怪獸大學 (3y10m)

呢期怪獸大學鬧得熱哄哄，爹爹知道銅鑼灣有毛毛影，決定要帶Ambrose出去睇！上完興趣班食埋lunch就直接搭車出去喇！

 

好耐都無咁樣湊熱鬧喇，唔係有Ambrose，都應該好難令媽咪大熱天時無冷氣响街度人迫人，又要排長龍，就係為左同d公仔影相！不過，其實Ambrose都唔係咁恨影，係咁叫佢影都反應一般，好可能，只係爹爹媽咪一箱情願囉！

 

好辛苦排完同毛毛影相，好彩Ambrose無話要影埋大眼仔，烈日高溫之下，爹爹媽咪都願意即時放棄，行入商場嘆吓冷氣回一回氣至得！點知，原來時代廣場入面都有得影相，雖然人龍更長，但嘆住冷氣排又另一回事！

 

由於响樓下折騰左好耐，Ambrose又唔係咁特別鍾意影相，加上爹爹一早應承左佢去買機械人，佢好心急要去買，於是，爹爹媽咪都樂意唔再排隊影相，行街街去！