小b去見工

買左套見工suit都有個幾禮拜，成日都驚到見工果日已經唔啱著，所以我同小b講，媽咪要帶小b去見工，唔係個個都咁好彩可以同媽咪一齊去架，小b要聽話唔好到時俾驚喜媽咪，唔好突然踼媽咪攪到媽咪叫左岀黎，雖然我都重未feel到小b郁！重有呀，媽咪帶小b去見工唔好俾人知架，所以小b要乖，呢個禮拜唔好大得咁快，媽咪件衫唔啱著就會俾人見到小b架嘞！小b要同媽咪去玩就要聽話，等去完返來小b鍾意長到幾大同埋點踢都得。

 

唔知我呢番説話小b有無真係get到呢？我見工前一日攞番套suit出黎試，比起買嘅時候窄左，不過好彩都重啱，坐低應該迫d，不過都係一陣，唔怕嘅！

 

見工前兩日，我嘅心情真係緊張到極點，街都唔想出，响屋企都唔會預備到d咩野，但個心就忐忑不安，邊度都唔想去唔想做，只係想靜靜哋。我都知咁對小b唔好，不過真係無辦法啦！老公叫過我好多次唔好去，一來我又咁緊張，二來我又無咩機會，三來因為我無請全日假，所以要攞衫去換完先返得工，老公唔想我咁辛苦，唔值得！不過既然我suit都買埋，真係無理由而家先話唔去，嘥左套suit，重嘥左我緊張左成個月咁，所以我都唔會唔去嘅，我又應承左小b要去嘅話唔好大得咁快，而家套衫又啱著，我點可以反口？

 

見工果朝都早到成九個字，攪埋d文件野就開始等，咪話唔緊張，個心都想跳埋岀黎咁！咁我咪同小b講要忍耐吓，媽咪見完就日日都會好開心架嘞！我一路望住走廊果d畫，嘗試放鬆吓！我唸我都等左一個鐘，原本十一點三見，要到十一點八先有得入。一見個board三女一男，我都唔抱太大希望，因為我成日覺得女人見男人係好d，同様地，男人見女人會好d！都無自我介紹就入正題，第一條都已經唔係答得幾好，攪到我更加緊張，之後個男人問scenario問題，我都覺得可以嘅，不過見佢咁多follow-up，我唸我都答唔中佢心目中想要嘅答案啦，個男人都好nice，全程都好似好有耐性咁引導我去答，有小小笑容咁！唔似之前果個女人咁嚴肅！不過之後又有另一個女人用英文問問題，呢個人唔可以話嚴肅，應該話勁cool至啱，我就答得都幾差吓，英文唔順之餘又唔係有好strong嘅point，超渣！佢把聲又細聲，我望住出面個海境，太陽唔猛，但係因為對住海，陽光有反射，加埋佢哋無落百葉簾有d一橫橫咁，我對眼有d擘唔大，呢個情境有d似曾相識，响見我第一份番嘅工嘅時候就係咁！可能之前果晚我瞓得奇差，所以呢個環境令我都唔係好集中到，個女人有條問題，我突然間聽唔到佢問咩，重要反問佢pardon？之後重get錯埋，答左第二d野，超低能咁！可能我自己都一早打定輸數，所以答得唔好都唔係好down，當練習啫！難為小b聽到哂媽咪咁渣渣囉！最後個嚴肅女人叫我打開面前果張紙，用普通話讀出第一段，雖然預左有呢part，亦都嘗試過响屋企唸口黃，但係要當住幾個陌生人讀，我d普通話又咁普通，當堂怯哂！我揸住張紙近到只係見到果張紙，咩都見唔到，亦都無抬頭望其他人，斷斷續續走吓音咁總算讀完！希望小b瞓左啦，實在太差嘞，唔好學我呀！

 

見完出返黎換埋衫先走，點知撞啱班interviewer出哂黎針水，唔知佢哋有無為意我極速換左衫，有小小尷尬，不過佢哋應該見唔到小b嘅，算啦，都完左！一出座大樓，真係開心到不得了，好想大叫歡呼，第一時間打俾老公，唔係話我得左，而係我終於過左最難捱嘅時候，YEAH！

見工衫

二月尾嘅時候突然收到信叫我三月三十日去見工，收到呢封信都好愕然，因為從來都無唸過個written會過到，亦都唔記得左報過呢份工！見係政府工，重有成個月準備，雖然而家有左，唸住政府唔會歧視我啩，所以都唸住去見吓囉！

 

有成個月去準備，一心唸住睇多d資料，溫吓書，事關好耐無見過工，又咁難得有政府工見，想做好小小！唸住返工得閒嘅時候就上去個website睇資料，點知一睇又覺得好悶，睇左半日，又覺得重有成個月流流長，都係遲少少先去睇啦，唔使咁早睇定又得個驚字！咁又過左一個禮拜，想溫嘅時候，又開始唔係幾得閒！好快咁得番兩個禮拜，得閒返少少，但我嘅心情都好忐忑，好緊張，為左唔好令自己咁辛苦，我都決定隨遇而安，最尾先睇資料同準備，反正我都唔expect今次有咩希望，咁唔使攪到自己同小b咁緊張。老公甚至叫我唔好去，怕我太辛苦，大住肚唔歧視我，就算真係想請我都未必等到我啦。因為照政府嘅進度，出得offer都六、七月，到時我都腹大便便，八月中就放產假，十一月頭先返工，邊個等我喎！雖然我都知成功嘅機會好渺茫，同以我而家嘅身世都好難攪，但係我都想試吓，當練吓都好嘅，更重要嘅係我唔鍾意退縮嘅感覺（雖然我都算有充份嘅理由）！

 

屋企都無衫去見工，因為之前見工通常都係著西褲加恤衫外套就算，而家d褲全部都唔啱著，又無西裙，所以都要買過！而家個肚唔係大，不過都唔知幾時會無啦啦大，所以唸住越近面試先去買，怕買左好快又唔啱著！重有個幾禮拜我就去買，唸住平平哋買條裙就算，第日又唔知啱唔啱著！去到試左兩條，發覺個肚突突咁，唔著返件外套遮吓都好核突，咁最後死死地氣叫個sales俾埋件褸我試囉！講起個sales，又係激氣！之前叫佢俾條啱碼嘅裙俾我，我都無話自己大肚，我個肚又唔大，極其量都只算有d肚腩仔，佢竟然俾條中碼俾我！我平時著suit一定要加細架麻！中碼都離哂大譜，太侮辱嘞！條裙鬆到我要揸實行出去叫個sales俾細d俾我！最尾俾細碼我就啱啱好，重有d位走盞！件褸佢俾細碼我，一著上身，都唔係好slim咁，又唔可以話唔啱，但唔靚囉！問個sales有無細d，佢話有加細，但講完我知又唔去攞，重係咁話細碼我啱架嘞，我照黎照去都唔覺得好啱，重自言自語咁話件褸唔夠slim，佢見我唔係好鍾意先話使唔使俾埋加細我試，我話有嘅話梗係好啦，佢又話有架，不過你扣唔埋鈕，你想試埋咪俾你試埋去囉！嘩！幾嬲呀！我心唸，就算我真係扣唔埋鈕，你都唔使咁講囉，趕客咩！我一著上身，啱啱好，好fit，重扣得埋鈕，個sales先話係喎，加細碼好睇d喎，我心唸，呢個sales真係好唔掂！而家套suit都唔係買得好大，同我原本嘅size差唔多，希望第日生完都重啱著啦！

16 week 5 day

今日去私家覆診，對上一次已經係三個幾禮拜前嘅事嘞！等呢幾個禮拜等到頸都長埋，始終一日未feel到胎動知道佢响肚入面，一日都唔係咁放心咁！

 

今日去覆診重可以睇埋小b係b仔定b女，雖然上次醫生都睇到，但係佢話過多兩個禮拜會肯定d喎！唔，我都無咩話鍾意仔定女多d，最緊要係健健康康！始終女有女嘅好，仔有仔嘅好，可以嘅話，我都想一仔一女，哈哈！不過陀得唔太舒服，我都唔sure自己係咪可以咁堅持生兩個，而且老公都prefer要一個就算，所以都係生左之後再慢慢唸！

 

今日我有個target，就係問吓醫生可唔可以唔食藥，之前佢開過隻維他命俾我，超大粒，好難吞，吞左又成日想嘔，醫生幫我轉過一次藥，細粒少少，有糖衣嘅，應該會好d！不過我都係攪唔掂，除左指定動作－誓願之外，我次次食左都反胃，超唔舒服，後尾我索性唔食。唸住呢d維他命都唔係must嘅，問左可以唔食，我個心會安樂d！點知．．．．．响我未問呢個問題前，老公問左另一個問題先．．．．．事緣係我由有左到今日見醫生，都有四個月，但係就重得一磅，老公問有無問題，醫生就話重得少，正常呢個時侯都要重五、六磅，上次Tweety間健康院個senior nurse都同我講話二十週前最好重五磅左右，不過，醫生話唔緊要，之後應該會追返喎！成個懷孕期重廿幾磅係標準，之後應該會重多左同快左！講完體重，我就問唔食維他命嘅事嘞！醫生一聽，就話你而家先重得一磅，又話唔食維他命，其實維他命裡面有鐡同鈣，對我好重要，所以唔提議我放棄！唉！原本唸住借醫生把口可以唔食，點知佢咁講，我都心知不妙！老公從來都唔會過問我有無食藥，或者咁講，佢唔知原來我會唔食藥囉！佢一向都好聽醫生講，而家俾醫生咁講，我唔可以唔食藥之餘，重好可能會被監督住食藥！

 

問完野我哋就睇小b，醫生話呢度係頭仔，果度係肚仔，呢樹係大脾骨，嘩！我咩都睇唔到！之前睇小b，個mon係睇到哂小b成個人形，而家好似一part一part睇咁，醫生話係正常，遲d小b再大d，個mon睇唔哂喎，又會咁嘅？我都係覺得成個小b人形睇到得意好多，而家唔知邊度打邊度，講完係咩都想像唔到咁，有d失望啦！等左成個月喎！小b今次度有成10.xx cm呀！哈哈！就黎有把間尺仔咁長嘞！都好難想像佢响我個肚入面係點咁！我個肚都唔大，會唔會好迫呢？醫生話佢係中碼b，但都要再睇之後先可作準！中碼都幾好，大隻d無咁難湊，不過就驚會唔會難生d呢？

 

圓方

最近我哋發現原來圓方泊車好平，而且佢個泊車優惠係幾容易，一百八十元嘅消費便有六小時免費泊車優惠，食餐飯都攪掂啦！一家大細黎行一陣，食吓野都係唔錯嘅消閒活動，所以都決定帶埋Cherry同蘇b黎逛吓！咁啱有promotion，响圓方購物九千大元，加八百元就可換最新Nokia手機，都賣緊三千幾架！咁啱之前我睇中左個Gucci手袋，唸住睇吓其他人會唔會有野買揍夠數去換，點知買完個袋，個sales話部手機換哂嘞，咁我哋都疊埋心水唔特登再買野揍數嘞！講開個手袋，其實都好鍾意，但係買左返黎又唔係特別好興奮咁！買之前都無以前咁要左唸右唸好耐，可能某個程度上係覺得需要而唔係奢侈品啦！事關我個個袋都大袋，一唔係就係好迷你嘅袋仔，而家有左小b又攞唔到重野，日日揹住抽住d大袋都好吃力架！我已經逐步逐步將d隨身物可唔攞就唔攞，得番d 銀包鎖匙咁，但都幾重，因為袋大啩？！後尾見到呢個斜揹袋，大小適中咁，夠哂輕便，所以都唔係唸好耐就決定買，當係獎勵吓或者係氹吓自己開心啦～

豈有此理

星期三攞左病假，公司有個每月例會我無開到，原本個會有個Sec負責take minutes，因為佢放假，suppose個副Sec負責嘅，不過唔知點解佢唔會寫，我個partner次次都叫我同佢寫，但都係出佢個名！其實我都唔太鍾意咁，佢做得副Sec，就有佢嘅責任架麻，如果佢唔想做，當初點名問佢做副Sec好唔好嘅時候，佢可以拒絕，但佢係好欣然話好！今次我突然攞病假，我都唸住佢自己做番，點知第二日返到公司嘅時候，我partner俾左份minutes我，叫我寫埋，我話我無開會唔知講左d咩，佢指住份野話開會內容drop哂响裡面，我打開份野睇，只係見到d鬼畫符，我真係幾嬲架！

 

第一，我覺得佢好唔負責任，應該係佢做嘅，點解要搵我去做？重要唔係佢自己黎叫我幫佢，而係叫我partner叫我做，我可以say no咩？第二，佢或者係我partner從來都無解釋點解佢唔寫要我寫。有時我會唸係咪佢嘅英文唔得？棠棠一個IO，雖然話係內部調升，但係我覺得英文都要有一定要求，既然升左，唔會太差呱？如果唔係，果d考生考死，過五關斬六障先入到黎做IO嘅就好似好唔抵嘞！大家都咁髙咁大，但係連呢d嘅基本要求都可以咁大差異，好奇怪囉！做得呢d位，唔多唔少都要寫吓report，我覺得即使係經驗搭夠去升一個人，至少都要fulfill到語文呢方面嘅要求囉！第三，我已經無去開會，佢都重唔自己寫返，成個會咁多人，無其他人幫手咩？點解一定係我呀？原來我係咁重要架？我而家先知喎！第四，果份minutes都唔知邊個take嘅，鬼畫符咁，叫人幫手都唔該俾d誠意，寫好少少，咁我都易睇d易寫d啦，完全係唔considerate，唔負責任嘅行為！第五，最嬲嘅係個當事人之後打俾我，唔係唔該我，亦唔係去clarify吓果份minutes講d咩，而係叫我寫番當日「佢」自己report果part，千叮萬囑叫我點點點咁咁咁寫，我心唸你咁緊張咪自己寫番囉！

 

真係激死人嘞！

又病假

今日又病假嘞！因為個胃重係抽住抽住，尋日返工都好辛苦，咁我都唔堅持太多，睇多次醫生，順便休息多一日！

 

因為無再嘔，無再見血，醫生話唔安排做其他檢查，除非之後再有血啦，咁要即刻睇醫生喎！我同醫生講我個胃重抽住抽住，佢同我講無辦法，我而家好多藥都唔食得，俾得我食嘅都係mild嘅藥，係要耐d先會好！其實一路以黎都down down哋，聽完佢咁講，重down！

 

睇完醫生去行左一陣，買下衫散下心，都重係好down，返屋企途中Tweety打俾我，傾開先話佢知我有左，講講下我都down到响屋企樓下喊左出黎！佢問我點解唔開心，我覺得好大原因係因為由我知道bingo之後，我就無間斷咁唔舒服，唔係見啡就肚痛腰痛作小產，就係肚疴腸痛胃抽筋，總之一様完左就到下一様，又唔係食得瞓得，真係好down，而家醫生重話係咁，要耐d先會好，我真係唔知幾時先會好！佢叫我唔好唔開心，如果唔係小b第日都會唔開心，好難揍喎！佢重提醒我話我family history唔好，因為我媽咪生完我之後抑鬱，到而家都要食藥先瞓到，所以我會係高危一族！我以前都無唸過產前抑鬱呢様野，但就成日驚產後抑鬱，聽到佢咁講，我都有d清醒，如果自己成日都咁唔開心，成日都俾自己唔出聲發吽哣咩都唔理唔唸，真係有一日抑鬱都唔出奇！所以我都係要向好果方面去唸，好似作嘔即係小b响肚度健康嘅反應；食唔落嘅話唔怕，想食咩野儘量俾自己去食，唔理果d禁忌，只要適可而止就得，過一排胃口好嘅時候會食到我驚肥；肚疴即係我嘅消化力重ok；瞓得唔好係要訓練第日生左之後成晚要起身湊b！雖然唔係成日都可以唸得咁正面，起碼知道唔可以俾自己成日都down！

嘔血

尋日日頭食完鯖魚之後個胃就頂住頂住唔舒服，又食唔落野，晚飯打邊爐都只係食到少少丸同菜。因為我唔飲得鮮奶，又唔食得落好多野，我怕無咩營養，又怕肥，聽人講隻日本孕婦奶粉唔肥又唔太奶味，咪買黎試下囉！打完邊爐返到屋企又肚空空咁，沖左杯日本孕婦奶粉試下。飲完都覺ok，唔甜，淡淡哋唔似奶，可以接受！點知沖完涼食完維他命上床瞓嘅時候，就嘔嘞！因為屋企厠所水係中央有藍色消毒劑，所以厠所水係藍色而唔係透明嘅，我嘔左第一下之後隱約見到好似有血絲响d水度，咁我就即刻用tissue接著之後嘅嘔吐物，竟然真係血，嚇到我叫左出黎！

 

今朝又再請病假去睇醫生，醫生檢查完就話要睇下有無持續嘔或疴血，先知有無需要做更進一步嘅檢查，暫時睇我係胃抽筋，如果無再見血，咁可能只係嘔嘅時候整損左個胃或者喉嚨，所以有血，咁就唔擔心喎！醫生開左藥俾我，我重問醫生可唔可以俾藥水我，醫生話我唔係細路仔，d藥唔係好大粒，同埋唔係様様都有藥水可以代，叫我咁大個人唔好怕喎！唉！佢又唔係我，佢唔會知我有幾驚！曾經有次病，我食咩嘔咩，就連食藥都可以成粒嘔返出黎，重要唔係一日半日係咁，係好幾日都係咁，餓住都唔敢食野，因為知道一食又會嘔，呢個經歷，係一個陰影，我過左好耐都overcome唔到，只係好少少，耐唔時食一兩次藥都可以，只要唔係又厚又大粒又圓形，都重食到！我連panadol都要食子彈形，食左好多年都唔敢轉圓形架！腸胃藥，尤其係果d胃藥，總係離唔開果隻要咬碎（或即使唔使咬碎）又成陣薄荷味嘅胃藥，次次嗅到都想嘔，呑左都會好想嘔返出黎，真係好難頂！雖然係萬般不願，但係自己知自己嘅腸胃真係好差，為左快d好，我都乖乖照食，不過依然係誓願咁攤哂d藥出黎望左十幾廿分鐘，無錯，係十幾廿分鐘唔係秒，先至好驚咁呑落肚！