打開Ambrose本畫薄，見到今堂呢幅畫，滿腦問號，究竟係咩黎架？！點解咁似上次幅飛機咁嘅？但橫睇掂睇，呢舊咁嘅野都唔多似飛機！再望吓成幅畫，基本上，下面果d估計係山，或者係草地啦，上面個太陽，唔知點解係唔開心嘅，果d雲，真係唔明點解可以畫到一個個圈就收貨！成幅畫，感覺上，以Ambrose嘅速度，應該可以好快畫起！係果d紅色碎紙同白色紙巾，要貼都可能會花多d時間！背景用左圓形黎印，究竟又係咩意思呢？可以話，幅畫真係幾肉酸下！
借意問Ambrose畫入面果舊野係咩黎架，係咪又係飛機呢？答案竟然係。。。。。。。羊羊！仔細睇吓，又真係見到疑似有兩隻好短嘅腳嘅！但媽咪真係唔明，點解唔用棉花黎貼羊毛囉？！紙巾嘅效果，真係麻麻地！
最近總係覺得Ambrose响呢度畫畫真係差左d咁，係因為佢唔使人點理佢所以老師都任佢自己黎，以致無人提點？定還是轉左時間唔同左老師就真係有咁唔同嘅效果？定係已經响呢度畫左都好一段時間，真係無咩突破呢？
考慮好唔好同佢停一停先，反正都想同佢再重組興趣班時間！
學完游水，Ambrose又嚷著要做手工，媽咪真係散哂，唔想成日都拒絕佢，而家就連Ambrose自己都識講，「咁咪做d快d果d手工囉」，真係點捨得拒絕佢丫！諗吓諗起，記起兩年前書展買落嘅Mess Free Color Wonder，有本海底世界嘅畫薄、特別顏料印台、顏色筆，海洋生物嘅印仔，可以俾Ambrose玩吸印仔油顏色，時間可長可短，最重要係沖左涼好乾淨，玩呢個又唔怕整污糟！之前一直都唔捨得攞出黎俾Ambrose玩，佢太細，驚浪費左本畫薄，而家佢都大了，唔會亂搞一餐！
正確d黎講，呢個都唔可以話係手工，不過有印仔吸，油顏色Ambrose又鍾意，所以佢都樂意接受，無堅持一定要手工嘅！Ambrose真係覺得好有趣，問媽咪點解d印仔印左出黎條邊係深啡色，問點解無顏色，但印左上去又有嘅？！哈哈！到佢油顏色嘅時候，原來有d公仔隱藏左少少圖案，當油左顏色後就會浮現出黎，佢又覺得好得意，係咁油係咁油，想睇吓有咩唔同圖案！
玩左兩頁，Ambrose終於都捨得去瞓覺！佢就咁執埋d野，唔污糟，真係好方便呢！
今年媽咪實在太懶，無幫Ambrose 留意下d文娛節目，就算有，都因為佢嘅興趣班實在太忙，有空閒時間的話，媽咪都寧願安排其他活動俾佢，所以就更懶去找節目，以致今年竟然miss左Harry哥哥嘅show！好彩之前收到email有關Mickey Show嘅promotion，媽咪左諗右度，遲遲無去買飛，直至開賣左一段時間之後，先至臨急去買，完全無理過個show係咩內容，只係一如以往地買山頂飛，諗住公仔大，山頂位都好清楚，無需坐太前！
買飛都已經係幾個月前嘅事，如果無mark低，真係差d就唔記得左要睇！因為場地就在媽咪公司，所以媽咪買飛時就專登揀平日，星期五晚上，爹爹可以湊Ambrose來，一來又可以話係接媽咪放工，二來又唔使放假專登過來！
入場前，例必去睇吓有咩紀念品賣！發覺紀念品真係一年比一年貴！記得早兩年睇show，現場都總有d幾十蚊嘅小玩意買，雖然都係貴架喇，不過唔過百元，感覺都可以接受。今年，已經唔覺有咩紀念品係百元以下，件件百多元，真係買唔落手！呢個Ambrose又只鍾意刀、槍、劍，在場就咁啱有劍，爹爹之前已經應承左佢買份紀念品，所以最後都花左百幾蚊買左一把好普通嘅巴斯光年劍！買左百幾蚊，receipt都無張可以攞去free parking！Ambrose當然開心啦，無啦啦又有收獲，仲响度擺哂pose勁chok咁影相，真係服左佢！
個show開始左之後，爹爹媽咪都發覺買錯飛喇！因為今次場show係magic show，真係表演magic，而且仲係有真人而唔係大大隻廸士尼公仔表演magic，坐响山頂嘅我地，幾乎都睇唔到咁濟，悶到爹爹媽咪係咁打喊露，眼瞓都暈呀！真係失策！問Ambrose好唔好睇，佢竟然話好睇，真係唔知佢睇到d咩喇！
下次，真係要小心睇吓內容係咩先至決定買咩飛！
Ambrose今年上K2，終於都有學校興趣班可以報喇！不過由於好多野都已經出左去學，無咩時間；又因為留校上興趣班搭唔到校巴，為免太麻煩，媽咪只係同佢報左交通安全隊，諗住唔係學術野，可以俾Ambrose輕鬆下，同埋返學多d投入感！
報前都知道要老師揀過先，但媽咪一直都認為如果無咩特別，應該人人有份嘅！至於點揀，真係無人知，只係估，係咪睇個小朋友做步操時手腳協唔協調？！
幾日前，有同學仔轉告其媽咪，話老師叫左幾個同學仔出去玩交通安全隊，Ambrose並唔係其中之一，媽咪就諗Ambrose可能落選了，回家再問Ambrose，佢又話老師都有叫佢去做動作，至於咩動作，佢就守口如瓶！
尋日收到老師電話，話Ambrose入選了交通安全隊，但因為太多人報名，學校打算分兩隊，老師詢問媽咪調動時間之安排，但由於調動時間後影響本身的興趣班，老師話remark左先，問埋其他同學仔先決定到。但如果真係調動唔到，有機會入唔到隊。無辦法之下，媽咪就同興趣班老師講要調時間。忐忑著老師最終究竟安唔安排到Ambrose順利入隊呢？！
今日終於收到通告，Ambrose真係入選左學校交通安全隊，屬新界北第55隊（真係奇怪，我地都唔係住新界北嘅）！原來真係唔係人人報都入到，有ｄ同學仔報左都入唔到，Ambrose今次真係好好彩！
希望佢鍾意同投入，亦都希望佢入隊後可以訓練吓紀律同teamwork啦！
今年嘅生日會，刻意唔想俾太大壓力自己，除左花左d時間去search野訂野，已經無好似上年咁係咁煲you tube溫扭波。上年學左嘅扭波，其實除左長劍仲記得點扭之外，其他已經洗腦了，證明媽咪都無咩潛質搞party！不過260長條汽球，仍然有訂少少返黎，以備不時之需，至少，小朋友只要係汽球，那怕把把都係長劍，都一樣開心！又或者在場有家長識得扭呢？！可能上年實在有太大壓力了，第一年搞生日會，咩都係自己搞，自我要求又高，以致成個生日會都唔可以好relax好enjoy咁！今年爹爹在決定搞生日會後，有提議今年請party姐姐幫手，減輕大家involve嘅時間，不過而家請個party姐姐都唔平，如果只係為左扭幾個汽球，帶玩幾個小遊戲，同埋可能包左少少basic嘅佈置，咁樣使一千幾百，感覺上真係唔太抵，所以媽咪都婉拒了，寧願調節自己，同埋盡量搞得簡單輕鬆少少就算！
因為媽咪瞓過龍嘅關係，場地佈置僅僅在生日會前勉強搞好。本來預左時間要set場，所以特地book多左九點至十點呢一個鐘，但都因為媽咪瞓過龍又要趕製汽球柱嘅關係，要差不多九點八至去攞場，哈哈！當然，亦因為好趕時間碌落樓，好多野都唔記得左！好似一直都話無但又一直都忘記買嘅封箱膠報紙啦、較剪啦，通通欠奉，哈哈哈！好彩會所可以借到，如果唔係都真係幾狼狽！
另外，之前一直都無特登訂table cover，諗住算啦，上年有朋友俾左幾張靚靚膠檯布，生日會用一用就掉好似幾浪費咁，所以即使見到有Batman table cover訂時都無訂到！直到爹爹生日前幾天問起，認為係有需要嘅，先至又衝去反斗城買左幾張返黎！買左返黎後又無打開睇過。之前嘅檯布都係中間留白，兩邊垂落黎嘅先至有公仔，以為所有檯有都係咁，點知今早一開出黎舖檯時，至發現toy story同thomas都係咁，係mickey果張唔知點解係相反，中間係公仔，兩邊係留白！結果，因為實在太奇怪，都係要裁一裁換下位置，先至勉強ok！早知係咁嘅話，真係好應該一早訂埋Batman table cover，同主題consistent一d麻！
上年N班同學仔加朋友仔唔係太多，所以都差不多請哂，加埋親戚，黎盡都係十幾個小朋友，已經好混亂。今年上左K1，識嘅同學仔多左，要請同學仔黎，都要度下，一來預期小朋友在活動室會周圍走好混亂，太多人好難handle；二來越請得多人，收到禮物數量越多，叫人唔送又唔會有人咁做，又無理由指明人地不如封利是，收到咁多禮物，處理真係好成問題，所以就更唔希望請哂所有人，唯有盡量請d平時較多提起嘅同學仔，有機會一齊玩吓就算喇！
媽咪發現，室內個遊樂場實在太吸引小朋友。上年小朋友仲細，都係玩完之後入活動室食野，再在活動室內玩小遊戲之後才切蛋糕，好smooth！今年小朋友响出面玩完，入黎食完野，之後又拉隊話出去再玩過，哈哈哈！最後要叫番佢地入黎玩小遊戲！今年小遊戲都係玩返爭櫈仔，同埋另一個揸匙hold雞蛋鬥快比賽。道具係好耐之前响early learning centre買嘅，有四隻匙同埋四隻真係會打得開嘅蛋，蛋入面有個蛋形小豆袋，小朋友要小心揸匙hold住隻蛋鬥快唔跌落地，如果跌左落地，隻蛋會打開跌左個小豆袋出黎，要再砌番好至繼續行。但由於d小朋友太興奮，有d小朋友又聽d唔聽d，而爹爹媽咪之前又無就賽制詳細傾過及得到共識，第一輪比賽就响好混亂同嘈吵嘅情況下進行。之後，又無預計過d蛋，真係好易跌，都未數完123開始，個個都輪住跌，小朋友跌左砌完又無理係咪正式開始左，就已經開始行，行完就算，唔可以話係比賽囉，哈哈！加上現場又無咪，可以幫助大聲少少廣播，真係要叫破喉嚨都好難叫到d小朋友跟指示！仲有就係，有d小朋友怕羞，唔係話一玩遊戲就出黎，要氹吓至出，結果，各人有各人自己行完就算係玩左，所以玩左幾round都係好混亂之後，都係要停喇！
第二個小遊戲係爭櫈仔，原本諗住好好玩，因為上年反應唔錯，點知今年竟然麻麻地，有部分小朋友根本唔肯出黎玩，所以都係玩左兩round就停了！
玩完遊戲打算切生日蛋糕，至發現忘記了攞火機同candle，即時又要衝上樓去攞！今年個蛋糕，媽咪感覺上好值，上年果個雖然平百多元，但蛋糕上嘅公仔要自己提供，基本上個蛋糕都唔係好難整，成個蛋糕都主要靠d公仔黎突出番。但今年呢個係咩都唔使俾，公仔都係師傅做，details位又多左，手工都响番度！見上年用剩左煙花candle，亦見幾襯Batman主題，所以決定繼續用煙花candle，效果好好！Ambrose見到都好開心，目不轉晴咁望住！
切完食完蛋糕，班小朋友又想出去玩，見時間都差唔多，我地都開始要執野，今日個場好full，兩點緊接就係下一班人了！
今次生日會，Ambrose參與多了，生日會嘅jelly係佢之前自己整嘅，二十幾杯幾隻味嘅jelly，原本照計都唔使一個鐘就整完，因為佢要自己整，所以用左兩個鐘，攰死媽咪，哈哈！仲有係個珍寶珠座，Ambrose幫手插同擺珍寶珠；甚至乎，回禮禮物包，佢都有份幫手放小禮物入內！睇得出Ambrose大個仔左，佢好緊張自己夠四歲未，朋友仔黎到，又好開心係咁主動叫人去攞珍寶珠同jelly，真係好可愛！最開心莫過於同小朋友一齊同檯食野，由上年只能坐櫈仔，用大人櫈做檯咁樣坐响度食，到今年個個小朋友自己圍在一張檯坐大人櫈咁食，心情既感動又有d唔捨得佢大得咁快！
雖然搞一次生日會真係會幾花心血、金錢，亦會造成不少浪費，但Ambrose平時已很希望可時常叫朋友仔黎玩，一年一次嘅生日會，正好有個機會可以同一班朋友玩兼慶祝，真係好難得！呢d生日會，其實都未必會搞到好多年，到佢大左，就未必想要咁慶祝了，所以如果Ambrose出年仍然希望再搞，媽咪亦都會盡量配合，至少，媽咪相信，小學前，生日會仍然會係Ambrose嘅意願，都只係仲有兩、三年啫！
上年整過汽球柱，大成功！而且又覺得其實都唔難整，所以今年都決定要整汽球柱做場地佈置。
本來search左美國online shop有成個系列嘅Batman主題嘅birthday party supplies，真係幾靚同估唔到有咁集中嘅Batman產品，仲要唔貴，所以都花左幾日時間睇左一輪，但當真係要計運費時，就發覺原來運費所佔嘅比例真係好多，分分鐘多過貨價，而且距離生日又只有約一個月嘅時間，唔知道係咪可以响生日前順利送到香港，左諗右諗之下，都係放棄了！
之後，當然又回歸淘寶啦，响淘寶search過一輪，好好彩，可以搵到Batman嘅鋁汽球，而且仲見到有美國online shop嘅款式，不過由於近年人民幣不斷上升，運費又貴左，其實計落條數，淘寶都唔係平得好多，只係美國網買多d至free 美國本土delivery，變相又要買多d野至抵，但最後國際運費都會以重量計，買得多就重d又貴d囉，所以都係淘寶抵d嘅！鋁汽球除左買Batman，仲買左幾個四歲式樣嘅，同埋最緊要就係門口果個大party signage嘅汽球。上年臨開始party前至爆左大Mickey頭，又無spare，搞到媽咪極度心灰意冷，今年吸取教訓，order Batman鋁汽球時都訂多一個以防萬一，尤其係用作汽球柱頂嘅大Batman。
由於上年整汽球柱時唔係好識，所以訂左好多橡膠汽球以防萬一，以致有好多汽球用剩。又咁啱，今年以Batman做主題，汽球都會以黑色為主，上年有剩嘅黑色汽球就可以攞返黎用。經粗略點算上年用剩之汽球後，再估算吓今年需要幾多，增補左唔夠嘅數量，今年橡膠汽球算係買少左，target係唔好用剩太多！
生日會早上就舉行，汽球柱又唔可以一早就整定，即係話一係之前果晚整（應該無咁靚），一係就早上晨早爬起身整，要媽咪夜瞓就容易，但要媽咪早起就好有難度！怕太早吹汽球效果唔靚，媽咪再前一日吹左一個汽球出黎，試試看放上一整日之後嘅效果，呢個動作，媽咪後悔唔早少少做，如果真係效果唔差，其實早d知道就可以早d開始整丫麻！汽球放左十幾廿個鐘之後，原本媽咪最怕表面會變啞色哂，唔知係咪因為汽球係黑色嘅關係，又唔太覺有大問題。有見及此，媽咪決定响生日前一日黃昏開始整喇！
上年第一年整汽球柱，原本好緊張好擔心，結果出奇地易整同順利，基本上無遇到任何阻滯，所以今年信心爆棚，亦因為唔想俾自己咁大壓力，無好似上年咁勁煲you tube去溫吓點整，完全憑上年果一次嘅經驗同記憶，就咁開始。一開始時，媽咪先整左簡單d嘅小座先，一路吹汽球，一路都仲諗緊，會唔會太早整左第二日無咁靚呢？點知，都未開始紮小座，d汽球竟然係咁爆，爆完再吹，吹左一係紮緊時爆，一係就擺响度一陣就爆，媽咪極之沮喪！點解咁嘅呢？係咪因為d汽球已經放左成年，d膠脆左？但明明order左新嘅落去，因為mix埋左，都唔確定邊d新邊d舊？！媽咪呢個時候就開始擔心，之前實在太大安旨意，咩都無理直至生日前一日至著手處理汽球佈置，完全無諗過會有咁嘅問題。汽球數量之前已經係預計左，之前無預會有咁多爆，如果一路咁爆落去，其實係會唔夠汽球，至慘係就算即時仆出去買，市面上其實唔會有單賣一色嘅汽球，而黑色汽球更加唔會有！點好呢？如果唔出去買定spare番黎，萬一真係係咁爆，整唔到架喎？！最後媽咪都係決定食完晚飯即時仆出去，咩色都好啦，都要買定，in case黑色汽球真係無哂，都仲有彩色丫麻！
出去買汽球，本來鎖定左十二蚊店，上年媽咪都有去呢度買過，都ok。飛車過到去後，竟然揾唔到！問店員又話有，仲話有好多架喎，點知叫佢帶去搵嘅時候，真係無哂！無法子，即時又飛車過市中心，target係大眾同反斗城。兩間都係無淨色汽球買，只有雜色，而大眾賣嘅汽球就有標明尺寸，所以雖然貴d，都幫襯大眾啦，已經唔可以再搏丫麻！
返到屋企，繼續吹波紮波，繼續爆波，唉，真係唔知係媽咪今年吹得大左定係d汽球質素差左，總之真係超級唔順利！即使連吹大眾買嘅汽球，明明已寫明9寸，但吹到唔係太大時，已明顯感覺到個波已經拉衡了，唔敢再吹大，就即時綁好備用，唔夠五分鐘，再爆！真係人都顛呀！
除左爆波，仲有漏氣問題，有d已經吹好紮好嘅波，見無爆就擺埋一邊，點知過多一排，就見有漏氣跡象，都已經紮好哂，又要再拆過整番漏氣果個波出黎，呢次嘅場地佈置製作過程，真係極度艱辛沮喪！
其實如果d汽球唔爆唔漏，根據上年嘅經驗，要整汽球柱同小座，都唔會要太耐時間，媽咪一直都想拖到夜多少少至整，等第二日d波都可以keep靚d，所以十二點前都係慢慢整。但之後，開始加速時，實在太多不順利，令到媽咪真係好懷疑，今年嘅汽球柱會唔會面世呢？！兩點鐘，又眼瞓，又氣餒，終於都係忍唔住要去瞓覺，打算第二日起身再整。
呢一覺，明明較左鬧鐘，唔知點解無響過，原本打算六點起身再整，點知瞓到八點幾！真係極度驚嚇！衝左出去睇吓整落左嘅小柱，發覺部分彩色汽球表面已經無左d光澤，唉！都唔理得太多，早餐都唔食，開始埋首重點整汽球柱！汽球柱配合Batman主題，以黑黃籃三色組成，所以之前亦有訂同size嘅黃、藍色汽球，但吹時又發現，唔知點解，黑色嘅汽球係可以吹得大d，彈性係好d，而黃、藍色汽球相對係細d，再吹大d就已經覺得可能會爆。原打算黑色汽球置頂，但吹完出黎再發現，由於黃、藍色汽球較黑色細，當要紮成柱時，就有d上重下輕，有d企唔穩嘅感覺！為左唔好再有不必要嘅意外情況，媽咪無時間再冒險去搏了，決定將黑色汽球置底紮了便算。接下來就係將大嘅Batman鋁汽球嘗試綁上，但發現汽球本身底部較尖，成個汽球較高身，綁在柱頂上很難固定唔下墜（因為無氦氣），勉強紮上去都可能唔係果回事，d汽球又咁易爆，整唔好又再整爆汽球更加係得不償失，於是即時決定放棄以大Batman鋁汽球做柱頂，改以其他較細嘅Batman鋁汽球就算！大Batman鋁汽球就直接貼在牆上好了！
整完一個汽球柱，其實已經係九點多了，party十點開始，真係無時間再糾纏在整汽球呢部份了！所以決定，唔再整了，要著手執拾其他野了！
總括今年嘅場地佈置，除左兩條banner係比較滿意嘅，其他其實真係覺得好失敗！所有嘅汽球小座因為之前一晚整，已經有d漏氣兼失去光澤！最奇怪嘅係明明所有置頂嘅鋁汽球都係朝早再充氣至脹滿才紮上小座上，仲要原本鋁汽球其實無需綁實都唔會漏氣，但媽咪仍然紮好左至搬去活動室，但當搬到落去時竟然見有幾個已經開始漏了無之前咁脹，真係好唔開心囉！汽球高柱已經改左唔係用大Batman鋁汽球做柱頂，已經好遺憾，仲要其實唔知點解今年呢個好似唔多紮實咁，每每行過有風都好易跌倒咁，失敗！如果下年仍然會整的話，真係要好好再溫書了！今年實在太過信心爆棚、有恃無恐了！
上年生日會訂過吹氣動物長棒，小朋友為之瘋狂，係咁揸住跑黎跑去，打黎打去都可以玩一餐，氣氛非常好！如果想keep住班小朋友唔出去外面嘅室內遊樂場，而留在活動室中，呢個小玩意真係好啱用！原本媽咪係無打算沿用番上年呢個小玩意，始終想年年都有少少新意，但Ambrose出聲要求，爹爹又堅持要再買，諗吓其實成個生日會佈置都唔同左，都已經有新意啦，所以最後都妥協，臨時臨急走去訂批動物長棒番黎，好彩趕得切！
之前訂”Thanks for coming to Ambrose’s Party”嘅sticker嘅時候，發現左樣幾得意嘅產品，就係水樽貼喇！又係可以揀主題公仔再tailor made加自己名未上去嘅！其實款式就唔係好多，但竟然好好彩有Batman，所以又即時訂左。水樽貼，即係飲品樽上面嘅招紙，訂造個人化嘅水樽貼，可以配合到生日會主題，成為另類嘅場地佈置之一。原本生日會其實好少會提供清水，一般都提供飲品果汁，如果要飲水，其實活動室外都有飲水機可裝水，但因為呢d水樽貼，媽咪決定在生日會上都提供一枝枝清水俾賓客，一來呢d換左貼紙嘅水樽放左出黎其實已經可以成為另類嘅生日佈置，二來呢d佈置真係較其他佈置更實用，不會浪費，而且更方便賓客，唔使行出行入裝水。另類佈置，何樂而不為呢？
以為市面上各水樽都差不多粗幼，可以是但買一隻品牌返屋企去包貼紙，但原來各品牌各size都有少少出入。所以去買水前，都要攞定張水樽貼去度位，度到剛剛好而效果最好個樽先買。
由於水樽貼其實係全張貼紙，媽咪在貼第一張時基本上都係全張底紙撕去貼上樽身上，但原本樽身表面絕不平滑，所以當貼上全張貼紙上樽身後，貼紙面好容易托印出樽面上嘅坑紋出黎，效果唔好！之後，媽咪改良左，在水樽貼之頭尾部份界走部分，只以頭尾部份貼在樽身上，以避免貼紙貼在坑紋上，效果即時好轉！
另，包開頭幾樽水樽時並無留意樽身上有個牌子logo在正面，是但就包左水樽貼上去，當排列出黎時，發現如要就水樽貼正面向前，logo方向各有差異，雖然其實應該無人留意到咁細微，但媽咪自己已察覺到唔係咁靚，加上水樽貼又有預多了，所以有幾樽，都要重新再包！
上年三歲生日會，並無準備回禮禮物。原因之一，係因為上年叫左賓客唔好買禮物黎，取而代之，幫手整一樣食物黎生日會就已經係好好嘅禮物！原因之二，上年嘅主題係咸蛋超人，要搵咸蛋超人嘅回禮小禮物真係唔容易。而且，上年第一次搞生日會，對自己要求實在太高，根本兼顧唔到籌備回禮禮物，所以無諗過亦覺得無太大需要準備，也就作罷！
今年四歲生日會，由於之前不斷search有關Batman嘅產品，發現有公司幫人整主題stickers，媽咪見到有張Batman主題嘅”Thanks for coming to xxx’s Party”，真係唔錯，價錢都唔係貴，所以貪得意訂左！訂左之後，再見到有Batman毛巾幾靚，而且諗住毛巾實用，唔會好似d平價玩具或文具咁玩兩玩唔知去左邊，至少毛巾唔用黎抺臉都可以抺檯、抺地都得丫！仲有見到Batman襟章，其實都未諗到有咩用，不過見幾靚，而且都只係預請十幾人，買極都係有限錢，所以都係買左返黎至再諗！仲有見到Batman貼紙，都係未諗到用黎做回禮，定係遊戲小禮物，但實在好平，所以又買左d返黎！
爹爹見到呢d禮物仔，都話好！佢提議毛巾、襟章、貼紙再加枝珍寶珠pack埋一袋，算係小小心意，小朋友可以有少少野玩，有糖食，而毛巾就實用，咁樣一份小禮物應該唔會太浪費！
決定左回禮禮物包內容，至去搵禮物袋！但因為已經唔太多時間去搵Batman禮物袋，而且媽咪覺得回禮禮物有少少濕碎，怕小膠袋好易倒出物件出黎，亦唔prefer用小膠袋。要回應Batman嘅主題，已經可以用”Thanks for coming to Ambrose’s Party”嘅Batman貼紙貼上禮物包上，問題係禮物袋嘅顏色，如果要回應返Batman主題，其實一時之間，亦好難搵！結果，無意下响大眾見到有黑色底，金色星星嘅小紙袋，好襯主題，所以即買！
至於d禮物點包，又係另一個問題！就咁掉哂d野入袋，又好似好混亂咁！結果，媽咪決定用絲帶綁好已摺得靚靚嘅毛巾（盡量摺到條毛巾個logo向正前方），再用襟章扣好，先至放入禮物袋內，再放一張Batman貼紙，一枝迷你珍寶珠就插上毛巾嘅摺位上，咁就唔會搖黎搖去啦！
最後，攞左家中現有嘅絲帶綁蝴蝶結袋口，仲要因為女仔嘅毛巾係有少少唔同色，同埋女仔嘅禮物包再多可一張公主貼紙，咁啱家中又有兩隻唔同色嘅絲帶可以綁起黎區分到男仔同女仔嘅禮物包，真係perfect！男仔嘅毛巾都有唔同款，朋友仔有一家庭有兩個男仔嘅，都唔想佢收到兩條一樣嘅先巾，最後，媽咪諗到可以將絲帶嘅尾斜剪同分叉剪黎區分唔同款式，咁派時只要留意下絲帶嘅剪法就可以順利派出唔同款，yeah！
後記：最後包好後，竟然忘記了要貼上貼紙在禮物包上，到生日會早上發現時就即時貼上，派了，而又無影到成品！
同往年一樣，生日場地都未可以接受預訂，媽咪已經當場地confirm左黎辦。今年又係搵Vivian表姐幫手整Banner嘅artwork。
因為拜託Vivian表姐整banner，唔想麻煩佢太多，所以都係自己搵左想要嘅圖同相俾佢整，免卻佢花時間又要搵又要整。但Batman圖實在好難搵，一係就係真人嘅圖多，一係d公仔太美式，好多都好似好難攞黎做banner咁！搵左一輪之後，當爹爹見到媽咪save左有關嘅圖片之後，佢就話要搵cute一d嘅圖片喎，結果，搵圖呢個責任就不經意間落在爹爹身上。爹爹仲design左張banner出黎，只不過因為format問題唔可以output做banner，最後，媽咪俾左呢個design同有關圖片俾Vivian表姐搞，最終都可以跟番原稿近九成，呢條banner可以話係爹爹嘅傑作呀！
另外，原本爹爹用左兩張Ambrose嘅相响banner上，其實都幾得意，不過可能因為裁剪後解像度低左，Vivian表姐話要俾番原相佢搞至得。見要再交相，媽咪又諗起之前季尾同Ambrose咁啱買左件Batman有斗蓬嘅衫俾佢，所以靈機一觸，叫左Ambrose換左件衫擺吓pose俾媽咪影過幾張相交俾Vivian表姐整banner。估唔到Ambrose見到件衫之後就深深愛上左，覺得好型喎，仲話要生日會果日著！件衫係長袖架，都唔知會唔會太熱，不過見佢咁熱愛，唯有好住先啦！
八月五日至俾材料Vivian表姐整，八月八日就收到佢嘅初稿，之後因為要換相，八月十二日收到Final version。以上年經驗，俾print shop其實都好快印好，所以距離八月十八日仲有咁多日，都唔太急嘅！八月十三日send野俾print shop並付錢，打算八月十四日可取件，如果有問題，仲可以有少少時間執左再响八月十六日前再取件。點知，八月十四日正好打八號風球，雖然print shop下午打黎話可取件，但臨時臨急安排唔到過去，結果都係要八月十五日放工至去。預期因為d圖像素低會唔係咁清，不過爹爹媽咪要求唔高，而且banner掛在上牆都係遠睇多，唔係太清都唔係好緊要。上年果張banner亦係有差唔多嘅問題，但最後出黎效果亦好好，所以今年亦有信心！
結果，無驚無險，banner印出黎效果不俗，唔需要再執過印過，$59就印到生日banner，真係要多謝Vivian表姐幫手！
Banner 修訂版
決定左同Ambrose搞生日會，第一時間係度左究竟邊日搞；第二時間就係要撲去訂蛋糕！
媽咪問Ambrose今年生日會主題想要咩野，原本以為佢會答Iron Man，仲諗住之前咁hit，要整蛋糕同埋搵 decoration物品應該唔難，點知呢個Ambrose竟然話要Batman，真係有d難以相信，媽咪已經不下幾次於唔同時候問Ambrose，佢都係答Batman，咁即係佢認真架啦！
知道左要Batman之後，媽咪努力搵左好幾間cake shop，都唔見有現成Batman蛋糕款式，就算有做過嘅，都只係Batman果隻蝙蝠 logo，唔係幾理想，因為Ambrose應該唔多知呢個logo就係Batman囉！又或者就算有Batman蛋糕，亦會係同其他人物如superman、spiderman之類嘅人物一齊出現，媽咪又覺得主題又好似有d偏離左，無咁好！無現成做過嘅蛋糕款式，即係要搵圖俾師傅做，媽咪又走上網搵Batman蛋糕款式，好彩都搵到d啱心水嘅，咁就可以聯絡師傅quote價了！
生日前個半月至決定搞生日會，本來亦唔係好遲，但原來訂蛋糕（尤其係立體蛋糕）係要起碼兩個月前訂，甚至乎有d要三個月前就要約定。當媽咪搵好圖之後再聯絡幾間cake shop，發現生日會當天期已滿了！搵番上年整開果間，個師傅話生日會當天去左旅行！之後，亦有搵到一間，但就話因為時間太趕，只可以做簡單蛋糕，做唔到公仔，如要公仔就自己買俾佢地放在蛋糕上。好彩，到最後都搵到一間，俾左圖師傅望過可以做到，亦有期！俾埋個蛋糕款式Ambrose揀，佢都揀左媽咪嘅心水，一切順利進行，實在太好喇！
Ambrose就係揀左呢個款！不過因為要就蛋糕磅數嘅關係，實物蛋糕係無下面幅原稿咁高！不過媽咪已經好滿意個蛋糕了！
經過上年三歲生日會一役後，曾經，媽咪都有猶豫，今年，好唔好再同Ambrose開生日會呢？猶豫嘅原因，其一係因為上年扭波搞佈置實在太辛苦，加上要玩埋遊戲，成個生日會簡直係一個小function，太involve自己落去，反而陪Ambrose時間唔多，自我感覺一般；其二係因為開生日會總會造成不必要嘅浪費，上至生日佈置、食物，下至賓客送嘅禮物，極不環保。所以今年媽咪也沒有查問Ambrose嘅意願。點知Ambrose幾個月以前，就開始意識到自己就黎4歲，可能因為同班同學中已經有好多人已經4歲左，佢自己未到，就問媽咪佢幾時4歲，解釋完俾佢聽之後，佢就好似好期待咁！及後，無端端有一次，更加認定自己會有個四歲生日會，仲同媽咪講想請老師去，同埋數埋叫邊個同學去！就係咁，本來十五十六嘅媽咪，見Ambrose咁期待四歲嘅來臨，都係決定同佢搞生日會啦！
同上年一樣，樓下會所活動室係不二之選，夠大，而且出面有室內遊樂場，小朋友可以暢玩一輪至開始生日會，省卻太多功夫去諗有咩節目俾賓客，但缺點係場地只可以在兩星期前預約。上年生日會，因為未搬進來，加上會所當日有活動，只有晚間或早上時段可預約，所以爹爹為左安全計，一可以預約當天早上七點半就去左會所book場。今年也不敢怠慢，本來決定和上年一樣，一早七點半等開門就book場，點知原來剛巧可book場嘅第一日，一家三口身在長隆！極不安心之下，唯有拜託嫲嫲幫忙，當天一早去預約啦！原本打算生日會時間約中午十二點至下午五點，點知，在酒店收到whatsapp知道約唔到預定嘅時間，只係約到早上十點至十二點，呢個時間真係麻麻地，心情真係好差！
當晚回到家中，得知原來是約到早上十點至下午二時，並不是中午十二時，都有四個鐘時間，也不差，心情又好起來！原來嫲嫲當日早上已經七點落去排隊，但去到已經見前面有兩個人排緊喇，佢地係六點落去排，真係估唔到果日咁旺場，竟然要搞到晨早六點去book場！聽講，佢地之前有book開，上年就係因為俾我地晨早book左間房，所以失左預算，今年都唔敢慢。真係估唔到大家有咁嘅淵緣，如果係咁嘅，相信以後每年，如果仲會响呢度搞生日會的話，每年都要鬥早了！
場地預約了，生日會終於可以落實了！日期為2013年8月18日早上10:00至下午14:00，yeah！
今年無再叫朋友仔自製食物黎代替禮物了，原因之一，係覺得有d人未必鍾意咁樣，寧願費時煩攞份禮物黎就算；原因之二，係咁樣好難預計最終真係有幾多食物，同埋亦好難限制朋友想整d咩食物黎，對於hold party嘅我地黎講，多左d變數。所以為左避免任何變數，今年都係唔再叫朋友幫手喇！
食物方面，係爹爹負責嘅！原已plan好哂order壽司及pizza，再加自製雞翼、菠蘿腸、蛋、咖哩角春卷等食物，一切諗得好美滿嘅時候，至發現壽司及pizza都無咁早開門兼送貨！雖然話party十點開始，應該都唔會十點就有人黎食野，但係即使係十一點都有少少趕，仲未計要搵人出去攞番黎嘅時間，分分鐘可能要成十一點半至十二點鍾至ready有野食擺到出黎，又好似有少少晏，亦都未必spare到人手中途出去攞野食！呢個問題真係令人頭痛，咁又係嘅，好少party咁早開架麻！
最後，為左迎合到十點鐘已有食物上檯嘅要求，爹爹退而求其次揀左吉之島壽司，因為只有吉之島至可以promise到九點九可以攞到！而pizza就放棄左，改而自製兩盆大沙律！畢竟都係早上時間，又會有生日蛋糕，都未必需要食得咁飽嘅！咖哩角春卷，本來諗住自己炸，成本平好多，不過真係無咩時間搞咁多野，最後決定响會所order送去活動室，方便可靠！
加上仲有現成嘅蝦條、薯片、糖，同埋小朋友最鍾意嘅啫喱，諗落都已經唔少食物了！
之前打風嘅關係，暑假畫班因而取消了一堂，由於補堂時間唔係好夾到，最後，唯有安排今日連踩三場興趣班，仲要畫班改左黏土班。見係整壞蛋，Ambrose應該都鍾意，最近亦無時間同Ambrose在家中玩玩黏土，所以欣然接受呢次嘅補堂安排。
Ambrose有一個壞蛋玩具，今日媽咪特登攞埋出去上堂，點知呢個Ambrose竟然細細聲話，老師唔俾攞玩具架！原來，佢都有怯怯嘅時刻，哈哈！媽咪話會幫佢問吓老師，佢至有d悉懷。果然，老師知道佢帶左壞蛋玩具去整黏土，好歡迎佢咁做，順利過關！
呢隻壞蛋，唔知點解對手咁長，而對手掌應該係用較剪剪開成箝狀，但Ambrose又剪得太深，剪到差不到要甩咁濟！不過，整體上，爹爹媽咪都覺得呢隻壞蛋好可愛呀！
今堂又唔見Ms Chen Chen喇，真係好失望，過埋呢個八月，都係要轉番去星期日學了！
今堂Ambrose畫左架飛機，其實都唔可以話係畫，今堂係剪貼畫，都唔知係有飛機形嘅紙俾Ambrose油顏色上去，定係Ambrose油顏色之後，至俾老師剪番架飛機形出黎喇！Anyway，架飛機係油到亂七八糟！飛機頭上面剪有一個人臉貼上，唔知點解無身體，同埋無軑盤。所以當Ambrose攞出黎嘅時候，媽咪以為呢隻係人面雀仔～
畫紙上貼有白色廁紙，又係有d亂貼嘅感覺，媽咪漫不經意話，仲咩整左d廁紙上畫薄度呀？Ambrose好緊張咁話，唔係呀，果d係雲雲黎架！媽咪以為，雲，唔係應該用棉花架咩？！哈哈！果然係創意十足！
今朝早打八號風球，終於可以大覺瞓唔起身！一直瞓呀瞓，真係好耐都無試過咁樣瞓喇，實在懷念！懶洋洋的瞓在床上不願起床梳洗，一直都幻想，下午會不會繼續打風，有多半天假呢？有多半天假，可以做些甚麼呢？想著想著，新聞報告就宣佈下午二時前後考慮改發三號風球，幻想破滅了！公司policy要在下午三時後落風球至可以唔返工！二時前後，也應該不會是三時才下吧！
失望兼沮喪！二時前後落風球，兩小時內回公司，即係如果二時下風球，四時就要回到公司，我放五點半耶～辛辛苦苦咁用兩個鐘頭迫返公司，就係為左返果個半鐘？！
最後，一點四十分下風球，早了！
幸好，老公車我返工，可以舒舒服服晏d至出門口，返到公司四點鬆少少，老公再等我收工接我走，幸福！
K2開學第一日，打風！先係三號風球，然後，第二日就已經係八號風球了！尋晚三號風球時，爹爹就拉左Ambrose落樓下感受一下風力，因為樓下平常無風球的日子都好扯風，勁大風！點知，落左去唔夠五分鐘，兩父子走番上黎。爹爹話Ambrose捉到佢隻手好實，好似好緊張咁，但樓下竟然一滴風都無，哈哈哈！
第二朝早起身，已經係八號風球了，媽咪樂得大覺瞓。兩父子又外出，去食麥當勞早餐，又去感受下颱風！睇吓Ambrose攞住把遮咁肉緊，就知有幾大風啦！
上年十月，Ambrose 第一次參加烈火童心，估唔到，事隔未夠一年，佢又再可以去玩喇！本來都無打算再去玩，但同班同學仔組團去，今次亦是機構破天荒俾一個家長陪同小朋友玩，所以又跟大隊再去玩一次喇！
今次同Ambrose攞褲換，感覺好唔同，上次同佢換褲，又大又鬆，今次呢條，著上身已經吊腳了，證明短短時間，佢高左，成長左不少！雖然有好多同學仔一齊去，Ambrose一開始都有少少怕羞，想同人玩，又只係望吓又唔敢行埋去，係都要爹爹媽咪推佢去埋堆至得，社交技巧真係有待改進！
之前有朋友已參加左有家長陪同嘅烈火童心，都話叫爹爹入去，夠高影相好d，所以媽咪都落得清閒，叫左爹爹入去，媽咪自己就同同學仔媽咪傾計，呵呵！
一個鐘時間好快過！好快就畢業喇！Ambrose竟然問媽咪，佢係咪真係做左消防員，嘩哈哈！好可愛呀！
今堂又唔見左Ms Chen Chen，只見到佢响差不多完堂前至返黎，不過都係似收舖多，睇黎，Ms Chen Chen唔係呢個時段教畫囉，咁點解之前佢又寫俾媽咪全部時間都係星期五嘅？
今堂Ambrose畫左兩個人彈鋼琴，雅雯老師話原本佢只係畫左一個人彈鋼琴，之後佢自己話要畫個橙人，所以畫多左個橙色面嘅人喎！但，使唔使連個底色都係橙色呀？問Ambrose個底色係佢自己揀定係老師俾咩色佢就用咩色，佢又答唔到！星期五呢個時間實在都幾多人，只見兩個老師團團轉，又要照顧畫班又要照顧油畫班學生，唔知會唔會因為Ambrose可以自己handle，老師都會轉移多照顧其他學生，所以時常覺得Ambrose近來畫畫都係差不多，沒有太大驚喜咁？希望九月份轉回星期日時間，人少一點，情況又不同啦！
一直以來，爹爹都唔諗住俾忌水嘅Ambrose習泳，大家一直都打算Ambrose過了五歲才開始學！唔知係咪見到Ambrose一直都好怕水入眼，而經過過去幾個月嘅＂照頭淋＂訓練，似乎令Ambrose無咁恐懼，再加上爹爹覺得游水遲早都要學，忌水就更加要學識至安全，所以六月底開始，就幫Ambrose搵左個私人教練，孖住二表姐，一對二咁上堂！
心底裡，Ambrose係怕水嘅，要佢玩水，佢OK，但如果要佢由池邊跳落水接住佢，佢一定唔肯！而且，佢都幾介意有水彈入眼。搵埋二表姐一齊學，原因係一對二，大家夾會平d，二來，大家年齡差不多，進度應該唔會拉得太遠！上左五堂至今，發覺，原來兩個人學，唔怕同成group人一齊學，有排等；又唔似得單對單學咁悶。兩個人之間，存在住好微妙嘅競爭，呢d競爭，令到兩個人都不斷進步！一開始，以Ambrose唔輸得個性，明知二表姐驚，自己都唔好得去邊，但佢會強忍住，唔可以輸俾表姐，要保護表姐，所以由第一堂開始，就已經係出乎意料之外嘅順利同合作，無喊亦無扭計，做咩都有求必應。而二表姐呢？可能有Ambrose一齊學壯吓膽，亦都肯去嘗試，兩個都好叻！
上左五堂，其實都無咁快學到d咩，只係練佢地唔驚水。Ambrose由最初响池邊跳落水，要教練企正响佢前面接住佢，到而家，簡直係越跳越勇，教練要企開幾個身位俾佢跳至得！仲有就係跳上癮，明明唔係到佢跳，佢有時都二話不說，唔理教練準備好未就跳落去，膽子真係大左好多，值得欣慰！
另外，初頭幾堂要擺頭入水吹波波，Ambrose都只係點到即止，簡直係個頭凌空，只有個口放入水就咁吹，真係好好笑。但五堂過後，呢星期又突飛猛進，佢已經可以全個頭浸哂入水吹氣！基本上，如果在及頸到地嘅泳池，佢係可以吸一大口氣再潛入水踢腳游到無氣再上番水，雖然仲未識手勢，但佢呢個程度，都差不多已經同媽咪一樣了，哈哈哈！
期待Ambrose繼續努力，刻服怕水，希望唔使太耐，佢可以學識游水（長期投資，學費不平啊），自由自在响水中暢泳！
一直都有買廸士尼樂園嘅Annual Pass，不過只限平日，原因一來係平d，二來星期六日去廸士尼基本上唔係一個好主意，買可以星期六日去到嘅pass ，其實未必會去囉！由於爹爹返shift，平日放假嘅時間都多，而媽咪只放星期六日，要平日請假入廸士尼，又有d浪費咁，所以大多數時間都係爹爹單拖帶Ambrose去玩多！久而久之，早幾個月前，Ambrose就已經開始要求，想爹爹媽咪同佢一齊去廸士尼樂園玩。聽到佢有咁嘅要求，媽咪一直都話安排吓！機緣巧合之下，Ambrose今日無興趣班要上，加上原打算同埋表哥一齊去，所以媽咪攞左大假陪入廸士尼，諗住帶到兩個小朋友去，請假抵d！結果，安排好哂之後先知表哥唔去得，佢呀媽話”呢d咁花時間又無意思嘅地方”佢唔想個仔去喎！聽到都心痛啦，表哥係响學校參加閱讀比賽而得獎，有兩張廸士尼嘅入場卷，之前佢知道可以同我地一齊去時不知幾興奮，仲話佢星期一至五，日日都ready可以去喎，只等我地安排邊日！點知安排好哂之後就收到呢個消息！真係唔明，個仔咁努力得到嘅小小獎勵，點解佢呀媽要咁樣抺殺佢？暑假流流長，去廸士尼都只係一日時間，又會虛耗左個仔幾多溫習時間呢？
既然假都已經攞左，Ambrose又一直恨一家三口去玩，所以都照原定計劃，一早十點左右就到左廸士尼樂園喇！之前嘅Pass已經過左期，响屋企已經online申請左Annual Pass，仲以為一去就有得攞，點知一落車，都未行到去入口處，就已經俾人潮嚇窒，大有置身彌敦道嘅感覺！人多到要攞Annual Pass ，都要跟大隊排長龍去counter取飛！仲要，入飛都要再排長龍去閘口檢查同入場，淨係搞攞飛入場都搞左半個鐘至九個字，真係萬人空巷！
有經驗嘅爹爹話，咁多人，入場一陣之後，好多機動都會好快要排成個鐘至有得玩喇！佢嘅策略就係先衝入Toy Story Land，玩左最緊要嘅彈弓狗先，因為呢個game係一晏左少少，就會好長龍，係唔會再有機會再玩多次架喎！果然，入到去都已經有人龍，只是又未至於超多人果隻，排連玩大約25-30分鐘左右，算係不錯了！
之後，原本打算一出彈弓狗，趁人還未算多，又再走番入去再玩多次，點知Ambrose叫停，佢話唔想再玩多次，反而佢話去玩跳降傘喎！真係好奇怪，之前爹爹同佢玩左一次，一開始落時佢已忍唔住喊，仲以為佢會有陰影，知道好驚唔會再玩添，點知又主動叫玩！好，就去排隊！點知，差不多到我地時佢竟然叫急vivi，都係叫佢忍住玩埋先去！原本，媽咪就無打算要玩跳降傘，因為媽咪好驚呢d機動遊戲，但爹爹話，Ambrose玩，當然係一家三口喎！媽咪唯有硬著頭皮去啦！坐定定後，爹爹要同Ambrose影相，呢個Ambrose就勁緊張，係咁叫爹爹快d坐番埋去，話開始喇，鬼咁肉緊！其實比起過山車果d，降傘已經係小兒科，不過媽咪少少驚嚇都唔得，玩降傘時，真係全程閉眼，又忍唔住大叫，玩完眼角都有少少眼淚呀！下次，真係唔好再預媽咪喇，心血少呀！
玩完降傘，出發去迷離莊園！唔算太多人，排左半個鐘就入到去玩！不過排隊嘅過程真係幾不愉快，因為實在有太多內地人，不斷响度迫下迫下，又有d人完全唔會覺得有問題，响後面一直攝住d空位咁行上前，係咁打尖！總然之，香港人係習慣唔會企咁迫，俾d空間大家咁企，但係有秩序咁排隊；內地人一見你地排到有咁多位，總係覺得佢地係可以行入呢d位度企，even佢响你後好多嘅位置，都一樣係咁樣衝埋黎！入到去會場內某位置，有d擺設嘅，有人停下腳步去欣賞、影相，咁正常如果排緊隊你停低，我唔睇就行先架啦，無理由阻住後面等埋你架麻！呢d咁嘅內地人，又要睇，又怕蝕底，明明已經落後左一大段，但又突然識＂排隊＂，排番响我地前面，仲要係一個人排番响我地前面，之後，就係咁向後大聲叫喊佢嘅同伴歸位！佢地對排隊嘅定義，真係有雙重標準，一方面，要打尖時就唔會認得前前後後果d係咩人著咩衫，但落後左之後，又識得揾番之前佢地跟開排開嘅人囉！
原本以為迷離莊園係睇恐怖野，仲有d天真以為係鬼屋之類，原來唔係！Ambrose未入去前都有話＂好似好恐怖咁喎＂，哈哈！結果，大家都覺得幾好玩，都幾特別！
玩完迷離莊園，打算行番出去攞Winnie the Pooh 嘅Fast Pass。十二點鐘鬆d，就已經話全日Fast Pass派哂，都唔係第一次架喇，之前都已經試過十二點鐘就已經無Winnie the Pooh 嘅Fast Pass，真係唔多明點解！唯有去攞巴斯Fast Pass！過埋去小小世界玩返轉，過一過冷河，出番黎睇巡遊。之後，又過返去迷離莊園果邊食午飯！其實，平時就已經好少响樂園入面消費，今日咁多人，如果唔係有朋友晏d入黎join埋一齊玩，媽咪大概會話走得，唔使响樂園食飯！因為，去到呢個時候，絕大部分嘅機動，都排住長龍，真係無可能會去排！等朋友嘅關係，唯有去食野啦！一個咖哩菜飯餐，咁就$88，加個兒童餐，upgrade杯野飲，兩個餐埋單$178！其實又唔係貴得好緊要，不過只有四個餐揀，其中有雞嘅餐，又有印尼炒飯（好似好spicy咁），基本上，係無選擇囉！仲要明明原來有Annual Pass有折，媽咪成張證掛在頸上都無人提，俾完錢坐低同爹爹傾開至知有折，蝕哂！
食完晏，都只係兩點左右，朋友未到，要成三點左右先黎。呢段時間，Ambrose瞓左，應該會一瞓醒就見到朋友架喇，但媽咪真係有d頂唔住，又熱又多人，推住Ambrose入去商店涼吓，雖然衰左d，不過唔咁做真係好難捱囉！已經都玩左幾樣機動，Ambrose瞓左，其實好想走！
等呀等，等呀等！終於等到其中一個朋友到來，由於全部機動都排長龍，正正煩惱究竟去邊度玩時，發現又就黎巡遊，於是又走去搵個位睇巡遊喇！同之前果場唔同，呢場講明係會噴水，廣播呼籲d人要將唔濕得水嘅野收好！果然，巡遊車真係不斷灑水噴水。初初媽咪都仲有開傘避一避嘅，不過人又多，又熱，都係豁出去啦，濕左少少，真係涼快好多！呢次巡遊真係幾好玩，幾特別！今次亦都係第一次一日內睇兩場巡遊添呀！
睇完巡遊，用左之前攞嘅Fast Pass入去玩巴斯光年，之後，再join埋另一個朋友，因為見到突然變天，又趕緊入左小小世界玩番一轉，順手避雨！玩完出黎真係停左雨，哈哈！
再去灰熊谷，朋友們都唔太想在室外玩水，怕失控濕哂，所以都係在室內玩射水！其實只要有朋友一齊玩，Ambrose玩咩都一樣咁開心，可能平時佢都成日一個人，無人同佢玩啦！
行左一陣，無咩意欲排隊，玩左成日（係曬左成日就真），好攰了！朋友們打算睇埋煙花至走，但爹爹媽咪一早就黎，支持唔到咁耐，唯有走先，下次再約過去玩喇！
今日都算大滿足，玩機動嘅次數唔少，雖然真係又曬又累又辛苦，但咁難得可以陪Ambrose入廸士尼，有人朋友仔陪佢，見到佢開心，媽咪都好開心呢！
